عداد الـrpm ... إزاي تستخدمه؟؟؟

**Ahmed Nasser** · 05-04-2013 07:53 PM

موضوع اكثرمن رائع
وانا دايما ببص على الار بى ام اكتر ماببص على السرعة والحرارة والبنزين

**ياسر مصطفي** · 11-04-2013 02:52 PM

بجد الف شكر استفدت جدا من موضوعك الرائع ده شكرا يا باشا

**Mostafa Hessen** · 20-04-2013 02:06 AM

موضوع رائع جداً و مهم جداً , احييك عليه

**borio1704** · 12-05-2013 02:42 PM

المشاركة الأصلية كتبت بواسطة svneleven

طب يا هندسة ايه رأيك في تغيير الكاوتش مثلا بكاوتش قطره أكبر؟ بيزود التسارع و السرعة النهائية و استهلاك البنزين و الا بيقللهم؟

باشا... انت سألتني السؤال ده قبل كده

بس عشان خاطرك هجاوب تاني... ويشرفني تواجدك معانا في الموضوع

بص يا سيدي

تزويد قطر الكاوتش بيعمل حاجتين:

1- يزود السرعة القصوى ... وبالتالي فـفي حالة المشي على سرعات ثابتة (زي الطرق السريعة مثلا).. فالمفترض إن الاستهلاك يقل، لإن العجل بيلف عدد لفات أقل عشان يوصل نفس المسافة نتيجة إن القطر بقى أكبر

2- يقلل التسارع ... وبالتالي فـفي حالة التسارع أو وجود مقاومة عالية (زي صعود مناطق عالية مثلا).. فاللي بيحصل إن الاستهلاك هيزيد... لإن العزم اللي واصل للعجل بقى أقل من الأول نتيجة تكبير القطر، وبالتالي عشان ناخد نفس التسارع القديم لازم ندوس بنزين أكتر عشان نزود العزم

الفرق في التسارع احتمال ما يكونش محسوس إذا كان الفرق في القطر صغير، بس بيبان كل ما الفرق كبر.

بس متهيألي مع الكلام ده محتاجين نعرف الأول إيه هو العزم؟؟؟

باختصار ... العزم ده تقدر تعتبره القوة الدورانية... وبتتحسب عن طريق ضرب القوة المحركة في المسافة إلى مركز الدوران

دي هي نفس الفكرة اللي بيتولد بيها العزم داخل المحرك

كده عمود الكرنك بقى فيه عزم... اللي هيتنقل بعد كده لاسطوانة الدبرياج ومن ثم إلى العمود الرئيسي داخل صندوق التروس

التروس اللي راكبة على العمود الرئيسي هتحول العزم إلى قوة خطية

وبالتالي مقدار القوة الخطية دي يختلف باختلاف المسافة (نصف قطر الترس)

كل ترس من دي إسمه الترس القائد (Driver) .. لإنه بيقود الحركة، والتروس اللي هتستلم الحركة إسمها (المنقاد Driven)

يبقى نفس القوة الخطية الناتجة من الترس القائد هتتنقل إلى الترس المنقاد (زي ما هي) ، ولكن العزم عليه قد يتغير باختلاف نصف قطره (لو كان أصغر العزم هيصغر... ولو كان أكبر العزم هيكبر)

في علب التروس... أبطأ نسبة تعشيق هي اللي فيها أصغر ترس قائد مع أكبر ترس منقاد... والعكس صحيح

طيب ليه بناخد أكبر عزم من النسبة البطيئة؟

بافتراض إننا ثبتنا سرعة الدوران... يبقى العزم الخارج من الموتور له قيمة محددة
والترس القائد في علبة التروس هيتنقله العزم ده بالكامل... ولإن نصف قطره صغير جدا... فالقوة الخطية الخارجة منه هتبقى كبيرة جدا

في المقابل... القوة الكبيرة جدا دي هتتنقل للترس الكبير (المنقاد) ... ولإنه قطره كبير، فالعزم الناتج منه هيكبر أكتر لإن القوة اضربت في مسافة أكبر

وبالتالي ... العزم الناتج هيقل كل ما عشقنا نسب أسرع (تروس منقادة أصغر)

طيب... إيه اللي بيحصل للعجل لما نكبر قطره؟؟؟

العجل هنا نقدر نعتبره زي الترس القائد

وهنفترض إن العزم اللي جايله ثابت... يبقى القوة الخطية اللي هتتطلع منه هتصغر كل ما كبرنا قطره

القوة الخطية هنا هي اللي بتتنقل للشارع عشان تحرك العربية

يبقى القوة الفعلية اللي بتحرك العربية بقت أقل، وبالتالي التسارع هيقل

يا رب أكون قدرت أبسط المعلومات بالشكل الكافي ... وما حدش يتلخبط :)

لو عايز معلومات مفصلة... تقدر تدخل على الرابط ده:
Horsepower and Torque - Craig's Website at Backfire.ca

...