الموضوع: ما خاب من استشار تحت امركم فى اى استشارات مالية او عقارية

المشاركة الأصلية كتبت بواسطة wawamoha

شكرا يا دك .....
وانا فعلا اشتريت في الشماليات ... الحمد لله
تقدر تقوللي ايه انسب وسيله لاستثمار ٥٠٠ الف
غير انك تحطهم وديعه بحيث:
يحافظم عل قيمه الفلوس الحقيقيه - عل الاقل
سهوله البيع والتكييش
المده المتوقعه للاستثمار - سنتين
وشكرا تاني - بارك الله فيك

الصراحة فرص الاستثمار بالمبلغ ده لمدة سنتين فقط مش كبيرة الا لو عملت مشروع تجارى او صناعى و ده عايز خبرة و تفرغ و ساعات السيولة بتبقى اعظم استثمار و انا شايف ان السيولة مهمة فى الوقت الحالى

المشاركة الأصلية كتبت بواسطة hanan ahmed

أ/ محمد
لك جزيل الشكر على معلوماتك القيمة
انا اتصلت بشركة مصر الجديدة علشان استفسر عن مشروع هليوبارك ، 5 اتصالات وفشلت انى أوصل للمبيعات حسيت انى بكلم جهة حكومية والناس بتتعطف انها ترد عليك!!! واللى بيرد على التليفون اخر ما زهق قالى اصل النهاردة فيه مزاد!!! هي المبيعات كلها بتبقى في المزاد؟!!
المهم انا كنت بتصل لانى مش عارفة أي حاجة عن مشروع هليوبارك ولا حتى موقعه
كان من فترة اتعرض شقة في التجمع الخامس تابعة لوزارة الأوقاف لسة ما بدأوش بناء ومش عارفة هيبدأوا امتى اصل بقالهم سنين كده. هي اجمالى بالاوفر حوالى 350 الف ومساحة 120 متر صافى،، هل لديك معلومات عن المشروع ده وهل ده فرصة لان مفيش الأسعار دى في التجمع طبعا ... هو كمباوند جمعيات يعنى كمباوند لوزارة الكهرباء، وواحد تانى اتصالات وواحد صحفيين وهكذا
مين افضل للسكن هليوبارك ولا شقة الأوقاف ؟!! وأسعار هليوبارك ايه ومكانها فين؟
بكرر شكرى لمعلوماتك القيمة

هليوبارك مشروع المستقبل لشركة مصر الجديدة لسة مبداتش فيه محتاجة تمويل ضخم غير متوافر لسة و فيه كلام عن شراكة فى الارض هو موقعة جنب مدخل بيت الوطن على طريق السويس بعد الرحاب المدخل التانى و بعد المقابر بحوالى ٣ او ٤ كيلو و قبل مدينتى بحوالى ٨ كيلو او اقل
كومباوند الاوقاف اعتقد جنب الجامعة الامريكية فى منطقة الجمعيات هو مختلف شوية عن كومباوند الازهر و الصحفيين الى فى المستثمرين الشمالية
طب فيه مشكلة اه فيه ٣ مشاكل مش واحدة
الاولى ان مفيش ميعاد محدد للبناء يعنى على حسب توافر التمويل فى صندوق العاملين بالاوقاف يعنى ممكن عشر سنين زى بتاع الازهر
الثانية ان السعر مش هيتحدد الا بنهاية المشروع يعنى على اساس التكلفة الفعلية و الفلوس الى بتروح للحبايب و حبايب الحبايب
الثالثة انه نظام تخصيص يعنى مش هتعرفى وحدتك لو اصلا طلعلك وحدة لان الاولوية لكبار موظفى الاوقاف و ممكن اوى ميطلعلكيش وحدة بعد القرعة الى هتحصل فى نهاية المشروع و يبقى الى ليكى بس فلوسك الى دفعتيها للصندوق مش الاوفر و الكلام ده حصل فى كومباوند الازهر قبل كده

المشاركة الأصلية كتبت بواسطة egyptawy2010

أ/ محمد
لك جزيل الشكر على معلوماتك القيمة

ايهم تنصح شراء شقة فى شماليات اكتوبر فى كمبوند محندق وصغير اسمه فاميلى لاند ولا شراء شقة فى بفلى هيلز

لو بتخيرنى بفرلى هيلز طبعا نصيحتى فى الشماليات شراء ارض لان مكسبها بعد البناء هيبقى ممتاز

المشاركة الأصلية كتبت بواسطة mfe

انا اسف ياجماعة على التاخر فى الردود بس بجد بحاول الاقى وقت
فى ملاحطة عامة بتخلينى اقلق على مستقبل مصر الى فعلا بحبها بس واضح ان فيه حاجة غلط
انا اشتغلت فى حوالى ٥ دول كاستشارى مشروعات و منهم دول عربية دايما كانت المشروعات الصناعية لها النصيب الاكبر من العائد خصوصا الى فيها ابتكار او معرفة فنية و بعديها المشروعات التجارية و اخيرا الاستثمار العقارى
هنا فى مصر الدنيا مختلفة كتير الاستثمار العقارى بيجيى فى المرتبة الاولى و التانية و الثالثة ثم المشروعات التجارية و اخيرا الصناعية ده لو حد اهتم بيها اصلا
مش عارف هل ده مقصود و لا ايه الموضوع
عامة انا هرد على الاستفسارات الى هنا واحد واحد

يسلم فمك انا اتنبح صوتى فى فهم وشرح النقطه دى لكن لا حس ولا خبر
مش عارف هل هى فقاعه ودة صعب لان الطلب على السكن فى مصر عالى جدا من الزيادة السكانيه
ام هو توجه عام من اجل اضعاف اقتصاد الدوله وانهيارها
فكما اعلم ان الاستثمار العقارى القيمه المضافه له فى الاقتصاد صفر لانه لايمكن تصديره
ويتحول الى شويه طوب واسمنت فقط

بصوا ياجماعة الاستثمار العقارى جزء مهم من الاقتصاد بس مش هو الاقتصاد
للاسف فى مصر النمو العقارى حقيقى مش فقاعة و بقول للاسف و هفسر كلامى
احنا عايشين على مساحة محدودة جدا من ارض مصر و القاهرة لوحدها فيها حوالى ٣٠٪ من سكان مصر طب ده وضع طبيعى لا طبعا مش طبيعى
طب فرص العمل فين
طب الترفيه فين
طب مصالح الحكومة فين
طب البنوك فين
طب المصانع فين
للاسف ٨٠٪ من كل ده متركز فى القاهرة و الباقى فى بعض عواصم المحافظات الكبيرة زى المنصورة و دمياط و المحلة و الاسكندرية
طب و الاف الكيلومترات الفاضية من الصحراء دى و لا ليها اى لازمة بنشوفها بس و احنا مسافرين الساحل او الغردقة و شرم الشيخ
الحاجة الى تزعل ان مصر مليون كيلومتر و كان الفراعنة عايشين على المليون ده و عمروا كل حتة فيها من السلوم الى سيناء و سابو اثارهم فى كل شبر
احنا بقى مصر بالنسبة لينا هى ٥٠ او ٦٠ الف كيلو متر بس و الباقى و لا ليه اى لازمة فى كل اجيالنا المعاصرة ١٠٠ مليون عايشين فى ٥٠ الف كيلومتر بما فيها الاراضى الزراعية و المستصلحة يعنى ٢٠٠٠ بنى ادم فى كل كيلومتر و ده من اعلى معدلات العالم باستثناء قطاع غزة
طب ده غلط مين للاسف الادارات المتعاقبة على حكم مصر من عهد محمد على و حتى الان يعنى الله يرحم محمد على و اولاده من غيرهم كان زمانا عايشين على ٢٠ الف كيلومتر بالكتير قوى
ٍفالاسعار فى مصر بتتحدد على اساس المساحة المتعمرة فعليا و عدد السكان و النمو الحقيقى و خلى بالكم كمان احنا هيجيلنا ملايين من الاشقاء العرب و غير العرب الى بلادهم بتتدمر دلوقتى من ليبيا و سوريا و العراق و اليمن و مين عالم بكرة مين تانى
كل الى بقوله ان احنا نبقى اذكياء و نفكر شوية فى مشروعات صناعية تفيد البلد نحاول نستثمر فيها
و الله فى ورش فى المانيا مساحتها ١٠٠٠ متر بتكسب ١٥ و ٢٠ مليون يورو فى السنة يعنى حوالى ٢٠٠ مليون جنيه و كلها شغل يدوى او نصف اوتوماتيكى بس باحترافية عالية و مهارة عالية نفسى نبقى كدة مش الاقى كل الصناعات فى مصر مدمرة و سيئة حتى ما تميزنا فيه فى الماضى اصبح سراب
اقولكم على حاجة
القطن المصرى احسن قطن فى العالم و بيخسر المزارعين دلوقتى علشان محدش بيطلبه لان ملوش مكن و الهادر فيه كتير يعنى نقطة التميز بقت عيب
الجلد المصرى احسن جلد فى العالم بس مش عارفين نصنعه علشان الدباغة و تكنولوجيا التصنيع اصبحت قديمة جدا و متهالكة و ضارة بالصحة و مرفوضة من معظم دول العالم
الرخام و الجرانيت المصرى نسبة الهادر فيه ٤٠٪ لان لسة بنستخدم الديناميت فى المحاجر لتفجير الجبل و العالم كله بيقطع دلوقتى بمقصات الليزر او السلك بس دى عايزة طاقة كهربائية ضخمة و مش موجودة فى اماكن المحاجر
عندنا اكبر مخزون من العالم من رمال السيليكا النقية و من رمال السيلينيوم و للاسف بنستخدمها كمواد بناء فى بعض المحافظات لان ملهاش مصانع
الرمال المصرية لو صنعناها صح ممكن تبقى اغلى من البترول نفسه
جبال سيناء مليانة معادن ثمينة و احجار نصف كريمة و لكن محدش بيهوب هناك
ده غير مخزونات معادن موجودة فى هضبة العوينات و للاسف غير مستغلة
تعرفوا فى شمال السودان على حدود مصر فى كام مشروع تعدين اتعمل و منهم مشروع تعدين للذهب
تعرفوا مخزونات النحاس الى فى جنوب مصر اد ايه و الخرائط متصورة بالاقمار الصناعية الامريكية الحديثة و ممنوع تتسلم لمصر
تعرفوا انى قبائل العبابدة و البشايرية على جبال البحر الاحمر بيستخرجوا الذهب و الاحجار الكريمة و بيصدروها بمعرفتهم
و احنا بعد كل ده بندور نهاجر علشان مفيش فرصة عمل فى مصر و مش طايقين نعيش هنا
طبعا الى انا قولته ده ١ ٪ من موارد مصر و فى الاخر ده حالنا
كل واحد غاية همه شقة او حتة ارْض تستره على ارض المحروسة بس الشقق دى مش هتوكلنا لما نبقى ١٥٠ مليون
مش هقدر اقول غير ربنا يهدى القائمين على الدولة و يوفقهم و يعرفوا ان الشعب ده عمروا ما هيقدر يستمر كده
ملحوظة اخيرة لغاية ما ده يحصل هيفضل الاستثمار العقارى افضل استثمار اخذا فى الاعتبار ان الدولة بقت بتستثمر و تسقع الاراضى زينا بالضبط و تبيعها ب ١٠ اضعاف التمن بعد فترات صغيرة فلازم كمان احنا نعمل كده يعنى احنا مش هنبقى ملكيين اكتر من الملك نفسه

السيد الفاضل الدكتور محمد

كنت عايز استشير حضرتك بالنسبة للاتي:

1- ترشيح مواقع شراء اراضي في مصر باسعار معقولة ويكون ليها مستقبل في زيادة الاسعار خلال فترة من 5 الى 10 سنوات وبحيث يكون فيها مهلة مفتوحة للبناء .

وايه رايك في شراء ارض بمدينة هليوبوليس الجديدة على اساس انها مضمونة ومفيهاش مهلة محددة للبناء، وهل يتوقع زيادة سعرها في المستقبل ؟

2- بالنسبة لموضوع التمويل العقاري: هل ينفع حضرتك ترشح افضل بنك واسهل وسيلة للحصول عليه لتمويل شراء ارض تكون مسجلة ووضعها قانوني لو ينفع؟

3- يا ريت حضرتك برده تتكرم علينا وتشارك خبراتك للسادة باقي اعضاء المنتدى بالنسبة لقانون الضريبة العقارية الجديد لان هناك التباسات كتير ومش واضح معالمه بالنسبة لطريقة حساب الضريبة على العقارات المملوكة سواء السكنية او التجارية وكذا الوحدات المؤجرة منها

معلش تقلت على حضرتك بس انا قولت اكيد لازم كلنا نستفيد من خبرات حضرتك العظيمة في هذا المنتدي الرائع

موضوع اكثر من رائع ... ربنا يباركلك

محتاج رأى حضرتك .... عاوز اعمل مشروع صغير .. او افتح محل و ابدأ تجارة معينة ...
انا مهندس ميكانيكا ... بحب الصيانة و العمل اليدوى ....معايا اقل من 500 الف .. متفرغ للمشروع .. مش مستعجل على الربح ... و املك محل مساحته 30 متر فى منطقة جديدة فى مدينة 6 اكتوبر ... قريبة من التوسعات الشمالية