ما خاب من استشار تحت امركم فى اى استشارات مالية او عقارية

**mfe** · 18-10-2014 11:06 PM

المشاركة الأصلية كتبت بواسطة egyptawy2010

طيب ايه رأى حضرتك فى كمبوند فاميلى سيتى فى محور النوادى باكنوبر

بص اقولك راى بصراحة عمرى ما افكر فى كومبوند الا لو كان كومباوند بجد بخدماته بمدارسه ببنوكه بمستشفياته غير كده مبحبش ادفع ٥٠٪ او ١٠٠٪ زيادة علشان اسمى ساكن جوه سور و مش باخد اى خدمات اضافية ده غير مصاريف الصيانة الى حضرتك هتدفعها علشان الحدائق و الامن و خلافه و الى بتبقى مبالغ فيها جدا الحقيقة
فالكومباوند بالنسبة لى هو خدمات لو لاقيتها اهلا و سهلا ملقيتهاش يبقى اوفرلى اشترى شقة فى فيلا و اخد مكان فى الجراج علشان عربيتى و اوفر كل الفلوس دى
انا بصراحة معرفش الكومباوند ده فيه الخدمات دى و لا لا بس اعتقد انه كومباوند صغير

**mfe** · 18-10-2014 11:13 PM

انا بعتذر ياجماعة انا ان شاء الله مسافر بكرة لمدة اسبوعين و على فكرة انا ان شاء الله بجهز كده لمشروع صناعى هبقى اخد رايكم فيه هو فكرة جديدة لم تنفذ فى مصر و لا فى الشرق الاوسط قبل كده مش عارف هتنجح و لا لا و ياريت لو حد ليه خبرة فى تصميم الماكينات الصناعية يساعدنى لان تصميم المكن فيه تحدى كبير و للاسف سعر المستورد منه فلكى معتمدين على صعوبة التصميم رغم انى انا شايف ان ممكن يتنفذ فى مصر بعشر التكلفة بس بصراحة الموضوع يستاهل المخاطرة لان ارباحة كبيرة لتوافر المواد الخام الاساسية فى مصر و رخصها

**ahmed_eng2001** · 19-10-2014 08:03 AM

ترجع بالسلامة ان شاء الله ... و فكرة حضرتك جيدة جدا .. متابع باهتمام

**mhamdsamy** · 19-10-2014 12:10 PM

المشاركة الأصلية كتبت بواسطة anaslbda

مجهود تشكر عليه,
معايا 2 مليون و 800 الف وعايز أشتري شقة في حتة كويّسة تنفع كاستثمار مع مرور الزمن, هل من الافضل آخد في الزمالك مثلاً أو في المُربّعات الراقية في العجوزة أو المهندسين أو الدقي ولا ادوّر في كومباوند؟

انا حاسس ان الكومباوندز ما هي الّا bubble ومع مرور الوقت قيمتها هتقل. ايه رأيك؟

عندك كام سنة وانا اقولك المبلغ دة كام منة تستثمرة و كام تحتفظ بية او تشتري بية عقار
ولو انت استثمرت قبل كدة لحد ماجبت المبلغ دة او وراثة ياريت توضح كان اية نوع الاستثمار

**wawamoha** · 19-10-2014 07:26 PM

شكرا يا دك محمد
ربنا يوفقك و ترجع بالسلامه

ياريت الاداره تثبت الموضوع ده

**Hanan Ahmed** · 19-10-2014 08:17 PM

ايه رأى حضرتك في أرض القادسية ... هل قدامها مستقبل وارتفاع في السعر ولا هي منطقة مش كويسة او فيها مشاكل؟

**mfe** · 20-10-2014 02:10 PM

المشاركة الأصلية كتبت بواسطة hanan ahmed

ايه رأى حضرتك في أرض القادسية ... هل قدامها مستقبل وارتفاع في السعر ولا هي منطقة مش كويسة او فيها مشاكل؟

شركةًالقادسية كانت شركة زراعية كانت بتبيع ٥ فدادين و ٥٠٠ متر بنا بحوالي ١٥٠ الف او اقل و الارض بعد كده اتقسمت بشكل عشواءي للبناء عامة هي فيها مشكلتين المرافق الحكومية و التصالح مع الدولة لتغيير النشاط من زراعي الي سكني
و لغاية ما ده يحصل انا عن نفسي ما انصحش بيها

**hesham fawzy h** · 20-10-2014 05:07 PM

لو معايا 200 الف و عايز اعمل بيهم مشروع اعمل اييية بعيد عن العقارات

عايز حاجة تكون دورة راس المال سريعة

و لسة معنديش خبرة فى اى مجال

**Hanan Ahmed** · 21-10-2014 04:45 PM

المشاركة الأصلية كتبت بواسطة mfe

شركةًالقادسية كانت شركة زراعية كانت بتبيع ٥ فدادين و ٥٠٠ متر بنا بحوالي ١٥٠ الف او اقل و الارض بعد كده اتقسمت بشكل عشواءي للبناء عامة هي فيها مشكلتين المرافق الحكومية و التصالح مع الدولة لتغيير النشاط من زراعي الي سكني
و لغاية ما ده يحصل انا عن نفسي ما انصحش بيها

فيه شركات بتعمل عقود بيع على انها ارض استثمارية بناء على أساس انها معاها ورق بكده وفيه وزارة البترول واخدة هناك وشركة النصر وناس بنت انا زرتها ولاقيت فلل على الواجهة ومن وراء الفلل مبانى بس قليل ... واخر حاجة انها دخلت تبع العبور .... هل فيه احتمال ان العقود دى لن يعترف بها من قبل جهاز العبور ...

**hisho1** · 31-10-2014 11:50 PM

فى البداية, لازم اشكرك يا دكتور على وقتك و مجهودك و اخلاصك فى النصيحة,

سؤالى, اذا كنت عايز استثمر بشراء عقار, ففكرت بطبيعة الحال فى حاجة فى مونتن هايد بارك,
تفكيرى انى اخد شقة فى حدود 180م مش فيلا عشان اولا, لو حصل مشكة مبقاش خسرت كتير, ثانيا, لو عايز ابيع بتبقى اسرع من الفيلا و فى الاخر الاتنين هيحققوا نفس الربح, ايه رأآ حضرتك؟

الشركة عندها حاجات فى المرحلة الجديدة و عندها حاجات resale من المراحل اللى قبل كده, ايهما تنصحنى بيه يا دكتور من وجهة نظر الاستثمار, علما يانى مش مستعجل

بكرر شكرى على وقتك يا دكتور