الموضوع: ما خاب من استشار تحت امركم فى اى استشارات مالية او عقارية

المشاركة الأصلية كتبت بواسطة hesham fawzy h

لو معايا 200 الف و عايز اعمل بيهم مشروع اعمل اييية بعيد عن العقارات

عايز حاجة تكون دورة راس المال سريعة

و لسة معنديش خبرة فى اى مجال

اقول لحضرتك دورة راس المال السريعة محتاجة مشروع تجارى و انا مقتنع ان تسعة اعشار الرزق فى التجارة بس انا الحقيقة مش متخصص فى المشاريع التجارية ممكن اقول لحضرتك مثلا لو عايز تستورد حاجة من بره لكن تفاصيل المشاريع التجارية و اسرارها مش عندى انا زى مقولت متخصص فى الجوانب المالية و العقارات و المشاريع الصتاعية فقط
و عايز راى بلاش تغامر بدون خبرة و فى الحالة القائمة فى البلد حاليا. الحقيقة معظم المشاريع التجارية بتعانى لنقص السيولة

المشاركة الأصلية كتبت بواسطة hisho1

فى البداية, لازم اشكرك يا دكتور على وقتك و مجهودك و اخلاصك فى النصيحة,

سؤالى, اذا كنت عايز استثمر بشراء عقار, ففكرت بطبيعة الحال فى حاجة فى مونتن هايد بارك,
تفكيرى انى اخد شقة فى حدود 180م مش فيلا عشان اولا, لو حصل مشكة مبقاش خسرت كتير, ثانيا, لو عايز ابيع بتبقى اسرع من الفيلا و فى الاخر الاتنين هيحققوا نفس الربح, ايه رأآ حضرتك؟

الشركة عندها حاجات فى المرحلة الجديدة و عندها حاجات resale من المراحل اللى قبل كده, ايهما تنصحنى بيه يا دكتور من وجهة نظر الاستثمار, علما يانى مش مستعجل

بكرر شكرى على وقتك يا دكتور

اقول لحضرتك فيلا او شقة مش هتفرق ده على حسب امكانياتك المالية و احسن سعر تقدر تاخد بيه سواء resale او من الشركة
مشروع هايد بارك ليه مزايا اكيد و اهم ميزة المساحة الكبيرة و التصميم و الخدمات علشان كده هو هيكون ليه مستقبل يعنى مش هتخسر ان شاء الله فى جميع الاحوال
و عايزك تاخد بالك و تفكر فى كلامى كويس الاستثمار العقارى بطبيعته طوبل الاجل يعنى بنتكلم فى اقل مدى زمنى ٥ سنوات اتحقيق العائد بتاعه ممكن طبعا فى بعض الاحيان يبقى اقل من كده او اكتر من كده بس ده الاستثناء يعنى لو حضرتك فيه احتمال انك تحتاج الفلوس قبل كده او تسافر بره البلد مثلا يبقى مفيش داعي للاستثمار العقارى الا فى حدود المبلغ الى مش هتحتاجه خلال فترة الخمس سنوات دول
و من كلامك راى تاخد الشقة مش الفيلا

المشاركة الأصلية كتبت بواسطة رحالة

لو سمحت ايه رايك في اراضي الريف الاوروبي، هل وضعه امان والا فيه مشاكل في الملكية

مفهوش مشاكل فى الملكية الارض مخصصة بالفعل من فترة كبيرة المشكلة الوحيدة بتبقى فى الاستخدام لان التخصيص زراعى و تجاوز النسبة البنائية عليه غرامة كبيرة لو حدث فيه تجاوز

المشاركة الأصلية كتبت بواسطة محمد عز

السلام عليكم يادكتور محمد

ربنا يجزيك خير ويوفقك لكل صالح

مجهود عظيم وافادة جميلة

كنت عايز استشيرك ، ناوى اشترى شقى في مدينتي 200 متر بحوالي مليون ونص أقساط على 4 سنين

متشطبة تشطيب عادى وجاردن فيو

ايه رايك ؟

اقول لحضرتك انا من سكان الرحاب و بصراحة مش عاجبنى الوضع فيها حاليا بامقارنة بسعرها و عارف ان مدينى اسوء كمان من الرحاب فالمبلغ ده بصراحة عالى على مدينتى و ممكن تجيب بيه حاجة كويسة جدا فى التجمع نفسه فى اى مشروع جديد انت بس خصص يومين كده تلف فى التجمع و هتلاقى حاجات ممتازة اقل من كده كمان و هتلاقى فى الشروق كمان حاجات ممتازة اقل من كده

المشاركة الأصلية كتبت بواسطة aminibrahim

دكتور محمد الفاضل بعد التحيه
انا راجل كنت شغال في السياحه وبعدين عملت شركة سياحه مع واحد شريكي واهي ماشيه مع ان الظروف صعبه جدا ومش واضح للبلد معالم
وكنت قاعد في اسوان في بيتي في ارقي احياءها بيسموه اطلس ونظرا لظروف قهريه ها نقل القاهره في شقتي في الشروق في اسكان مبارك ٧٠ متر وفارشها كويس
السؤال هل ااجر الشقه اللي اسوان هي مفروشه لوكس المساحه ١٤٠ م وغاز ونت وكل ماتتخيل فيها لانه بيتي والا ابيعها وهلالايجار يبقي كام ؟
ثانيا نفسي ااعمل مشروع بره السياحه ففكرت ابيع نصيبي من الشركه وابيع البيت في اسوان واشتغل في العقارات
ثالثا ،، انا ممكن اوفر مبلغ٢٠٠ الف جنيه دون البيع بس مش عارف اعمل ايه بيهم
يا ريت المشوره

اجاوبك واحدة واحدة
طبعا انا مقدرش احددلك الايجار هيبقى كام بالضبط ده انت ممكن تعرفوا اكتر منى بي هساعدك فى قرار الايجار
انا فى تخيلى مثلا ان الايجار هيبقى فى حدود ٢٥٠٠ الى ٣٠٠٠ جنيه فى الشهر لو مفروشة لوكس و يبقى من ١٥٠٠ الى ٢٠٠٠ لو فاضية طبعا ده تقدير ممكن يبقى مش صحيح بس ده مقارنة بموقع مثيل فى الغردقة مثلا
حضرتك شوف الفرش يكلفك كام دلوقتى بنفس المستوى و اخصم منه استعمالك و اعمل حسابك ان الفرش ده هيعقد ٥ سنوات بس لو اجرت مفروش بشكل مستمر
هضربلك مثل انا عندى شقة فى الغردقة فرشتها على اعلى مستوى ممكن كلفتها حوالى ٧٠ الف فرش لو حبيت ااجرها هتجيبلى ٣٠٠٠ جنيه فى الشهر و لو اجرتها فاضية هتجيبلى حوالى ١٨٠٠ جنيه يعنى الزيادة حوالى ١٢٠٠ جنيه فى السنة حوالى ١٤ الف جنيه فى ٥ سنوت حوالى ٧٠ الف لغاية دلوقتى متردد فى قرار التاجير و بفكر يا اما اخليها او ابيعها لان العملية متساوية تقريبا
بانسبة لقرار البيع الحقيقة اسوان من المدن المظلومة فى الوقت الحالى رغم جمالها و انا مقتنع ان هيجى اليوم الى هتاخد فيه و ضعها فبلاش تبيعها و انت لسة مش عارف هتعمل ايه بالفلوس الشقة دى امان ليك
الحقيقة وضع مصر كاستثمار صعب شوية دلوقتى نتيجة اوضاع كتير مش مجال ذكرها شغل العقارات كويس مش وحش بس علشان تبدا تشتغل صح محتاج حوالى ٣ او ٤ مليون جنيه لو متوفر المبلغ ده معاك او ممكن تجيب شركاء هقولك تبدا ازاى بطريقة عملية و مربحة و غالبا هتبدا فى التجمع او الشروق علشان اقرب ليك و لفكرة ببساطة انك هتشترى ارض و تبدا فى ترخيصها و حفرها و تبدا تبيعها شقق بالتقسيط على اربع سنوات بمقدم ٤٠ ٪ مثلا و بعدين تاخد المقدم و تشترى بيه ارض تانية و تكرر الموضوع و هكذا و تبنى من الاقساط الدورية الى هتجيلك كل شهر
العملية دى بتبقى محتاجة نموذج تدفقات نقدية علشان تظبطها cashin/cashout لو قررت تبدا فيها انا هعملهولك بنفسى دون اى مقابل
٢٠٠ الف جنيه بالنسبة لظروفك مش هيعملوا حاجة ممكن اساعدك لو قررت تشتغل فى الاستيراد مثلا

حمد الله عل السلامه يا دك محمد
معلش انا تخطيتك و رديت عل الاستاذ بوريو على اساس ان عندي شويه معلومات عن التوسعات الشماليه

المشاركة الأصلية كتبت بواسطة boriooo

د/محمد ترجعلنا من السفر بالسلامه إن شاء الله

أولاً انا بتفق مع حضرتك جداً في موضوع الإستثمار الصناعي وإن التوجه للأسف للإستثمار العقاري قلباً وقالباً.

وأنا للأسف هسأل حضرتك في الإستثمار العقاري ، أنا متابع مشاركات حضرتك من فتره وحضرتك مره رديت عليا في موضوع

كنت بتكلم فيه إننا نبني فيلا في القرنفل او التمر حنه ولكن الموضوع فشل لأني سألت في جهاز المدينه وترخيص

الفيلا هيكون 4 شقق فقط .

عموماً أجي لسؤالي لحضرتك ، التوسعات الشماليه في 6 أكتوبر ، الميزانيه إلي معايا 650 كاش ، و 200 مجمدين في عقار

فا حضرتك تنصحني أنزل ادور فين في التوسعات الشماليه ؟ فين بالظبط ؟ متوسط الاسعار هناك إيه ؟ مدخلها منين او اروحلها ازاي ، السكن هناك متاح بعد كام سنه

والترخيص بيكون قد ايه في الارتفاع ؟

يا ريت حضرتك تديني معلومات عنها لأني بعد نصايح حضرتك قررت اشتري فيها بس عايز اشتري في مكان كويس وليه مستقبل ، وإن شاء الله أنا ناوي ابني مش ناوي اشتري وابيع .

شكراً مقدماً لحضرتك يا دكتور وربنا يجعله في ميزان حسناتك ، ومنتظر رد حضرتك لما ترجع من السفر إن شاء الله .

الترخيص فى القرنفل و التمر ٦ شقق مش ٤ لانك بتدفع غرامة الدور التانى الى هيه ٢٥ ٪ من سعر الارض المخصصة بيه يعنى بتدفع حوالى ٨٠ الى ١٢٠ الف على حسب مساحة الارض و ممكن بعد متخلص بناء و تدخل الكهرباء ترفع قضية فى مجلس الدولة و تستردهم كمان
التوسعات الشمالية حضرتك بتمشي فى المحور لغاية متوصل لمول العرب و تخش من عنده يمين كانك طالع على طريق اسكندرية الصحراوى. و ترجع تلف كانك طالع على نادى الصيد هى كل المنطقة الى ورا نادى الصيد و انت مكمل لغاية الاخر
اشتراطتها برضه فيلات ارض و دورين و مستقبلها كويس و السكن هناك هيكون مستقر فى فترة من ٣ الى ٥ سنوات و ممكن اقل لو ظروف البلد استقرت اسرع
القرار انت الى هتخده وفقا لظروفك لان سكان شرق القاهرة نفسيا بيحبوا التجمع و سكان غرب القاهرة نفسيا بيحبوا اكتوبر
بس الاتنين كويسين كسكن و ان كان التجمع اغلى و اسهل فى البيع لقربه من القاهرة و وسط البلد و كثرة محاوره