الموضوع: مخصص للرد على أسئلة الأعضاء في مجال التوظيف و سوق العمل

عودة لحتة نقطة الضعف دي عشان مهمة جدا. هو احنا طبعا مش هانألف نقاط ضعف عشان نرضي اللي بيعمل لنا الانترفيو، عشان كده زي ما قلت لازم تعمل لنفسك self assessment كويس جدا و ما ينفعش خالص حد يتسأل السؤال ده في انترفيو و تكون الإجابة مافيش.. أو تخترع (انا باتكلم عموما يعني مش موجهة كلامي لحد معين) نقطة ضعف مثالية جدا، زي مثلا أصلي معطاء أوي و ده بيطمع الناس فية.. و لا نقطة ضعف تودي في داهية زي مثلا أصلي عصبي و لما باتنرفز مش باشوف قصادي.. و هكذا.

- هدفك إيه من الشغل ؟

دي كمان لازم تقعد مع نفسك فيها و تسأل نفسك و تجاوب.. انت هدفك ايه من الشغل؟ مافيش إجابة مثالية هنا.. الإجابة المثالية هي اللي تطلع منك بعد ما تقعد مع نفسك.

- تقدر تشتغل تحت ضغط ؟

برضه جاوب السؤال ده مع نفسك و جاوب بمنتهى الأمانة كمان، و لو حبيت تسأله أي نوع من أنواع الضغط اسأله، يعني هل ضغط شغل كتير؟ و لا ضغط مديري علية؟ و لا ضغط عملاء هاتعامل معاهم و لا ضغط جو عمل؟ و على أساس الإجابة جاوب انت. انما عموما حاول إجابتك هنا تكون آه باقدر اشتغل تحت ضغط، إلا طبعا لو كانت هي دي نقطة ضعفك الأساسية اللي لحد لحظة الانترفيو مش قادر تتغلب عليها، في الحالة دي حاول تسأله عن نوع الضغط اللي ممكن تتعرض له و حاول تكون صريح و صادق و ما تحاولش تجمل نفسك في حالة زي دي عشان مش هاتكون في صالحك.

- ما هو الشيء الذي لا يستطيع أحد غيرك القيام به ؟

ده سؤال أساسي بيتسأل في الانترفيوز و لازم تبقى محضر له إجابة قبل ما تروح الانترفيو.. لازم لازم لازم و طبعا إجابته متعلقة بمهاراتك و مؤهلاتك و خبراتك مقارنة بالوظيفة اللي انت مقدم عليها.. إووووووووووعى تروح انترفيو و مش معاك إجابة السؤال ده.

- ما هي الفائدة العلمية والإجتماعية التي خرجت بها من عملك السابق ؟

برضه دور على إجابة السؤال ده في نفسك و مع نفسك و ممكن على فكرة تكتب الأسئلة دي كلها و ترجع لها لما يكون عندك انترفيو تاني عشان تبقى جاهز بإجاباتها في المرة اللي بعدها و عن طريق كده فعلا الواحد بيتعلم.

- هل تقدر تشتغل 12 ساعة يومياً ؟
أنا قلتله لأ

طبعا من حقك انك تقول لأ لو فعلا مش عايز تشتغل 12 ساعة، بس الأفضل انك تسأله طيب هل ده باستمرار؟ كل يوم يعني؟ و لو كانت الإجابة بآه قول له انه للأسف مش هاينفع معاك لإنك من الناس اللي بتؤمن بأهمية التوازن بين الوظيفة و الحياة الاجتماعية و يهمك جدا انك ما تفشلش في أي من الجهتين. أما لو كانت الإجابة بلأ فحاول تاخد منه معلومات عن كل أد ايه و لو لقيت الموضوع في المعقول قول له انك طبعا تحت أمر الشغل لو محتاجك تشتغل لمدة 12 ساعة "في بعض الأحيان".

و أسئلة أخرى كثيرة ليس لها معنى حتى مللت منه الصراحة

يمكن بالنسبة لك انت تظهر أسئلة بلا معنى، بس بالنسبة للي بيعمل لك الانترفيو هي المعنى كله :)

موضوع نقاط الضعف والقوة فكرنى بالدكتور بتاع ادارة مشروعات هندسية
كان فالقنى كل شوية swat analysis بس الغريبة ان الواحد عمره ما فكر يعمل تحليل سوات لنفسه ابدا
لييييييييييييييه ....؟ مش عارف

متابع باهتمام ,

جزاك الله خيرا
موضوع رائع

موضوع هايل ....كالعادة :)....جزاك الله خيرا يا علا باشا و وفق الجميع للخير باذنه

اسمحيلي يا علا باشا أضيف بعض من أكثر الأسئلة شيوعا في المقابلات لطلب الوظائف (على الأقل في كندا ) من خلال خبرتي الحياتية :

- حدثني عن نفسك
- ما هي نقاط القوة و الضعف فيك
- ما أخر الكتب التي قرأتها.....حدثني عنه
- ما هي اكثر الأشياء التي تقدر قيمتها في حياتك
- كيف تشغل وقت فراغك
- أوصف أحداث يوم تقليدي في حياتك
- من هو أكثر شخص تأثيرا عليك
- ما هي التضحيات التي قدمتها لتصل إلي مكانتك اليوم
- كم ساعة تحتاج للنوم يوميا
- كيف تتصرف اذا تعرضت لضغط عصبي
- كيف تتعامل مع ضغوط الحياة اليومية
- أوصف موقف شخصي صعب تعرضت له و كيف تغلبت عليه و ماذا تعلمت منه
- نفس السؤال السابق و لكن موقف مهني بدلا من شخصي
- ماذا تفعل اذا اكتشفت أن زميلك قام بعمل لا أخلاقي
- نفس السؤال السابق و لكن رئيسك المباشر بدلا من زميلك
- أذكر ٣ انجازات حققتها في حياتك تفخر بها
- أوصف موقف خلافي تعرضت له و كيف قمت بالتصرف فيه
- ما احساسك تجاه رئيسك اذا كان اصغر منك سنا
- ماذا تفعل إذا حصلت على الوظيفة و ماذا تفعل إن لم تحصل عليها
- كيف يصفك أصدقائك و كيف يصفك زملائك في العمل
- هل تفضل أن تعمل تحت أشراف أعلي أم بدون إشراف
- هل لك أي اسئلة

من خلال تجربتي(و نصائح زمايل العمل الأكبر سنا و مقاما) كثير من الأسئلة المذكورة هدفها بيان التوازن النفسي للمتقدم للوظيفة و قدرته على التكيف مع متطلبات الوظيفة نفسها مع الأخذ في الأعتبار التعرض لضغوط الحياة اليومية بالاضافة إلي ضغوط الوظيفة ....أيضا قدرة المتقدم على أخذ زمام المبادرة و حل المشاكل .....مواقفه الأخلاقية و القدرة على العمل وسط فريق ......و بعض الأسئلة هدفها استفزاز المتقدم و مراقبة رد فعله ....

لا توجد اجابة نموذجية لأي سؤال انما على كل متقدم إعداد اجابة جيدة خاصة به ....

مع أطيب تمنياتي للجميع