الموضوع: أخيرًا جبت بولو

المشاركة الأصلية كتبت بواسطة umoussa

بالنسبة بقى لموضوع الإيرباج فالموضوع كبير شوية..

طيب علشان تركب الإيرباج لازم الأول تعرف طقم الإيرباج بيتكون من إيه؟؟

1. ضفيرة إيرباج
2. كنترول إيرباج (موجود وراء الكنسول الأوسط تحت التابلوه)
2. طارة إيرباج
3. تركيب كبسولة إيرباج في التابلوه (مش محتاج تغير التابلوه)
4. حزامين إيرباج
5. حساس تصادم خلفي (2 حساس، واحد تحت كل كرسي)
6. كبسولتين إيرباج للكرسيين الأماميين

يبقى حضرتك محتاج 6 حاجات علشان يكون عندك 6 إيرباج في العربية وطبعاً دي تجهيزات ال GTI
وهي عبارة عن طارة وتابلوه وحزامين وكرسيين.

عربيتك أصلاً المشكلة الضخمة الي فيها إنها مفيهاش Convenience System ولأن الإيرباج ليه علاقة بالسنترلوك وسريبنة الإنذار الأصلي بتاعة العربية يبقى عربيتك مش حينفع يركب فيها إيرباج.

على الرغم من إني لسه مركبة في عربية من حوالي شهر، بس العربية كان فيها Convenience System

يبقى موضوع الإيرباج خارج التفكير خالص

طيب تحب تعرف الأسعار؟

الضفيرة بحوالي 2500 جنيه
كنترول 500 جنيه
طارة (انت وشطارتك) مش أقل من 500 جنيه
كبسولة تابلوه 200 جنيه
حزامين 500 جنيه
كبسولتين كراسي (معرفش ثمنهم كام لأنهم مش موجدين استيراد أصلاً)
حساسين تصادم خلفي 200 جنيه

يعني بتتكلم في حوالي 5500 إلى 6500 جنيه من غير مصنعية.

طيب لو موافق، مفروض يحصل إيه؟

1. حتفك الكرسيين الأماميين
2. فك التابلوه بالكامل (فوق وتحت)
3. فك موكيت الأرضية بالكامل وكشف صاج العربية
4. فك الجانبين الفبر (القائمين اليمين والشمال)
5. توصيل سلك واحد على فيشة التجميعة الحمراء
6. توصيل كنبرول الإيرباج بال CAN وموضوع ال CAN ده يطول شرحه (بس باختصار حتوصله بالعداد، سلكتين مش أكتر)

وبعد كده تقفل والدنيا تشتغل سكينة في الجاتوه.

أكيد حتقول التكلفة غالية... طبعاً غالية طيب الحل إيه؟

تنزل بورسعيد تروح عند الحج مجدي البيومي تاني

تشوف نص بولو 1400 جي من إيطاليا دريكسيون شمال تاخد ضفيرة الصالون بالكامل وساعتها حتقدر تركب الحاجات التالية:

1. إيرباج
2. زجاج كهرباء
3. مريات كهرباء بالسخانات
4. إنذار أصلي
5. سنتر أصلي
6. نظام مراقبة داخلية (Interior Monitoring)

طيب التكلفة أد إيه؟
الضفيرة بالكامل بحوالي 1000 جنيه + البنود من 2 إلى 6 الي انا قولتهم قبل كده.

قبل ماتقول طل الي انا وفرته 1500 جنيه، أحب اقولك إجابة غلط، طب ليه؟

لأن ضفيرتك أصلا متعرفش تشغل الأوبشن الجديدة الي انا قولتلك عليها فسعتها طبعاً حتكون كأنك اشتريت عربية جديدة.

خلي بالك، لا قدر الله لو الإيرباج فتح إيه الي حيحصل وإيه الي حيتغير؟

1. حتغير التابلوه لأنه حيتقطع من أدام الي قاعد جنب السواق.
2. حتغير كبسولة الإيرباج بتاعة الطارة.
3. حتغير الحزامين، لأن الحزام لما الإيرباج بيفتح بيشدك في الكرسي ومبيفكش تاني ولازم يتقص.
4. الكنترول لازم يتمسح من عليه حاجة اسمها Crash Data ودي حتكلفك من أقل من 200 جنيه.

وطبعاً خد بالك السواقة المتهورة وإنك تاخد مطبات عنيفة أو تطلع فوق رصيف أو تخبط في عربية أدامك أو عربية تخبط فيك من الخلف كلها حاجات تخلي الإيرباج يفتح.

أتمنى أكون وضحتلك الصورة وحشرحلك في الرسالة القادمة موضوع الإنذار

ملحوظة أخيرة، ممكن تقفل الإيرباج في أي وقت، أنا بعد ساعات بعمل كده وده عن طريق الجهاز أو إنك تشيل فيشة أي حزام من الحزامين أو فيشة أي كرسي من الكرسيين، وساعتها نظام الإيرباج كله حيتعطل ولمبة الإيرباج حتنور في العداد.

كمان ممكن تشغل العدد الي انت عايزة من الإيرباج، يعني ممكن تشغل الطارة بس؟ أو الطارة والتابلوه أو الطارة والتابلوه والحزامين، وأقل عدد يشتعغل هو 1 وده بيكون الطارة بس لوحدها.

وسلام مؤقت

الف شكر بجد والله يا أسامه انت كدا عرفتنى فعلا حاجات مكنتش اعرفها ودا يرجع الى انى لسه جديد فى عالم السيارات اساسا

اجى بقى لبعض استفساراتى على ما شرحت ودا بعد اذنك طبعا .
اولاً: هل بمجرد انى اشوف طرنبة الهواء الخاصه بالسنترالى عندى وأكتشفت انه اصلى زى ما قولتلى دا بيبقى معناه انى عندى Convenience System وبكدا يبقى أجراءات تركيب الايرباج اسهل شويه ولا يبقى هيه هياها ؟

ثانياً: وعشان اشوف الطرنبه دى واشيل الموكيت الى على اليمين والى معمول عليه بالاخضر+ بقطع فيه ولا هو بيشال ويركب تانى عادى ؟

ثالثاً: ولو لقيته انه اصلى السنتر يعنى هل بكدا هضطر اركبله الانذار الاصلى بتاعها ولا إيه ولو لازم هجيبه منين ؟

رابعاُ: لو طلع بقى ان عربيتى مفيهاش الــ Convenience System بمعرفتى انى السنتر الى راكب عندى طبعا بلدى مش أصلى , وحبيت اروح اجيب ضفيرة صالون نص العربيه ال 1400 الجى البولو الايطالى بالكامل من عند الحاج مجدى برده هو الى بيركبهم ولا حد تانى ؟

ولو مش هو مين هناك كويس يركب الفيلم دا ؟

المشاركة الأصلية كتبت بواسطة umoussa

أنا قولتلك،
1. افتح شنطة العربية
2. حتلاقي موكيت يمين وشمال
3. فك الموكيت اليمين، حتلاقي قربة هواء لونها أسود في أبيض وراكب فيها فيشة وطالع منها خرطوم هواء.

أنا مقولتش بص عند الاستبن.

الجنب اليمين ده مفروض بيتحط فيه شنطة الاسعافات الأولية وحتلاقي عليه علامة (+) لونها أخضر.

لو لقيت طرمبة الهواء دي.. يبقى متركبش إنذار وحقولك ليه، ولو مش موجوده يبقى العربية مفيهاش أي انذار أصلي والي راكب فيها بلدي وساعتها ركب اي انذار انت وذوقك.

سبب عدم التركيب

الإنذار البلدي بيعمل شوية حاجات، من ضمنها لما تشغل العربية يقفل وفي حاجات بتقلد فولكس لما العربية تمشي وتوصل سرعتها 15 كيلو يقفل..الي عايز اقولهولك ان وظيفة "يقفل" في الانذار البلدي كتتيييييييييير أوي ودي حتخلي طرمبة الهواء بتاعة السنتر الأصلي تبوظ من كتر الاستخدام وحتتمرجح لما تبوظ علشان تلاقيها لأنها مش كتير وكمان غاليه (125 جنيه)

كمان لما يجي يركب الإنذار حيحتاج يعرف اسلاك معينة في الضفيرة بتاعة الصالون الي بتشغل السنتر الأصلي، زي مثلاً انهي سلك الي شايل اشارة الفتح وانهي سلك الي شايل اشارة القفل وممكن يعمل مشكلة في العربية خصوصاً إن غالبية الي بيركبوا بيحبوا يستخدموا ذكائهم.. ولو غلب ذكائه حيقولك نشيل السنتر الأصلي ونركب قرب في الأبواب ودي حتبقى أحسن من الستر الأصلي.


اما بقى لو مفيهاش سنتر أصلي يعني مفيش طرمبة الهواء دي...قأقدر اقولك عيش وركب الي يعجبك.

وصلت يا حج شربيني ولا لسه؟

سلام مؤقت

وصلت يا اسامه باشا وميه ميه والله يخليك على جهدك وتعبك معايه فى الشرح والتوضيح دا .

وبعدين انت تقصد يا اسامه ان لو طلع سنترها اصلى مركبلهاش انذار اساسا واسيبها زى ما هيه ولا ايه ؟

وفى سؤال نسيت اسألك عليه
انا ساعات بسيب العربيه فتره يعنى اسبوع او اتنيين مبدورهاش فطبعا البطاريه بتنام وبضطر اجيب وصلة سلك واوصل مع واحد صاحبى وادورها المهم فقبل ما بترجع تدور بلاقى السنتر بيعلق يعنى باب السواق بس الى بلاقيه بيسك والباقى لاء فهل دا يفيد بحاجه ولا اى سنتر بيعمل كدا لما البطاريه بتنام ؟

ولك جزيل الشكر

المشاركة الأصلية كتبت بواسطة umoussa

دا ياسيدي الجنط ال 15 بوصة الي انا مركبه - برازيلي
ومقاس الكاوتش: 195/50/15 "بريدجستون - بوتينزا أدرينالين ياباني الفردة كانت 650 جنيه من سنة" ودا أكبر من مقاس العربية 5 ومش بيحك



وعلشان تركبه لازم تخلف بيض المقص علشان الزوايا تتظبط ولو معملتش كده حيبقى عندك مشكلتين

1. حيحك
2. عمر الزوايا محتتظبط والكاوتش حيتآكل

بسم الله ما شاء الله

الجنط جميل يا اسامه وربنا يباركلك فيه

طيب فى بقى زى الجنط دا بس اشكال تانيه ونفس الجوده والنظافه طبعا عند الحاج مجدى برده ولا إيه؟

ومعلش اذا كنت دايئتك بكتر اسئلتى واستفسراتى وردودى يا اسامه وكله فى ميزان حسناتك إن شاء الله

يعنى معنى كلامك انى عشان اجيب جنط كويس لازم اسافر القاهره

طيب ربنا يسهل بقى اما أحب أعمل موضوع الجنوط دا ابقى اسافر اشتريه من هناك إن شاء الله

بس بالمناسبه هو دا افضل واحد أقدر اجيب من عنده ولا فى أحسن ؟

بقولك من حق يا أسامه

انا بمون ببنزين 90 فممكن أمون ببنزين 92 ولا لاء؟
ولو ينفع هل فعلا بيفرق فى أداء العربيه وبيحافظ على الموتور زى ما سمعت ولا مبيختلفش كتير عن ال90 بالنسبه للبولو ؟

المشاركة الأصلية كتبت بواسطة elshrpeny

بقولك من حق يا أسامه

انا بمون ببنزين 90 فممكن أمون ببنزين 92 ولا لاء؟
ولو ينفع هل فعلا بيفرق فى أداء العربيه وبيحافظ على الموتور زى ما سمعت ولا مبيختلفش كتير عن ال90 بالنسبه للبولو ؟

أنا كنت زيك كدة وغيرت ل 92 وحسيت بفرق فى السحب حلو والموتور بقى مرتاح مع ال90 أيام الموتور الكربراتير كانت العربية فى الطلعة بتعمل صوت كركرة خفيفة....بعد ال92 الصوت دة راح.ودة عن تجربتى.

طيب كدا تمام

يبقى ابقى امون ب 92 من المره الجايه إن شاء الله