اولا بعتذر عن تأخر الرد و لكن بجد ظروف و برد و ساقعة زي ما حضرتك شايف و لو مفيش ورايا حاجة بتكلفت تحت الغطا..
بالنسبة لمشكلة حضرتك انا بصراحة مش فاهم ازاي صنايعي و بيركب تيل جديد علي طنبورة و مش بيخرط او جايز احنا و بتوع الفرامل كلهم مش بيفهموا و هو بيشتغل بطريقة جديدة بس لو جبت لك اصغر عيل من الصبيان اللي كانوا عندنا في الورشة و سالته هيقولك تغير تيل يبقي نخرط الطنابير لاني اللي اعرفه انه مفيش حاجة اسمها اركب تيل جديد علي طنبورة من غير ما اخرطها و تصدق بايه اني ساعات بتكون الطنبورة جديدة و طالعة من كرتونتها و بتكون محتاجة خرط فطبعا تركبيه التيل بدون خرط غلط و ده بيبوظ التيل الجديد.
فرأيي الشخصي تخرط الطنابير و تركب التيل اللي هو فيها حاليا ابو 55 جنيه طالما انه مريحك و لما تيجي تغير التيل خلي التيل التاني عندك و جربه بعدين في التغيير اللي جاي إن شاء الله لكن لو تحب تسيب الطنابير علي كدة و حاسس اني العربية كدة كويسة خلاص بس رأيي انا تتخرط افضل.
- و بالنسبة لأخد هوا من الفرامل انت متعملش فيه حاجة اي ميكانيكي او يفضل طبعا صنايعي فرامل و دبرياج هو اللي يقوم بالمهمة دي و الكلام ده بيتم كالآتي:
كل عجلة فيها مسمار هوا بينزل عند كل عجلة و يقولك "كارك" يعني تدوس و تسيب دواسة الفرامل كذا مرة ورا بعض و بعد كام دوسة يقولك "دوس" و يروح فاتح مسمار الهوا ده و يخرج الهوا و تتكرر العملية دي في كل عجلة و في الماستر العمومي لحد ما كلهم يجيبوا زيت و يقولك العجلة جابت زيت يقفل مسمار الهوا و خلاص و هو ده اخد الهوا يعني العملية بسيطة جدا و مش بتاخد 10 دقائق علي بعض, و العملية دي بتتم لما بيحصل شغل في الفرامل (فك و تركيب) او الفرامل تاخد هوا عامة و دي بتعلي بدال الفرامل شوية و هي عملية بالرغم من بساطتها لكنها سهلة جدا و مهمة جدا كمان.
- و بالنسبة لتطبيع التيل فحسب مشاويرك بالعربية يعني من 3 ايام لاسبوع و ممكن اكتر لو العربية بتقف كتير.
ملحوظة: العربية الأوتوماتيك بتاكل تيل اكتر من الفتيس العادة.
و اي استفسار آخر انا تحت امر حضرتك و آسف لتأخير الرد مرة اخري.
المفضلات