الموضوع: انت تسأل وإستشاري منتدى متسوبيشي يجيب (2)

المشاركة الأصلية كتبت بواسطة memo200545

استفسار للباشمهندس طارق انا كان عندى نص سم فى العجلة اليمين جوة روحت لواحد بتاع عفشة قالى دا فى الكارتيرة وبسبب مطب شديد اتاخد بسرعة شديدة المهم قالى ان حلوا الوحيد اما يجنزر العربية وقالى نص سم مش مستاهل او انوا يقطع المساعد ويحط ورادى ويلحمها تانى فاية راى سيادتك ياباشمهندس واستاذنك فى سؤال تانى انا عندى العربية لما بشغل التكييف بتقطع بمعنى تسحب وشوية تضعف تانى فى السحب فاية راى سيادتك برضو فى الموضوع دا واية الحل بالاضافة ان العربية كلها بتقطع كدا مش عارف ليه والسلانسية عندى على 700 فهل كدة تمام ولا عاوز يتزود ولسيادتك جزيل الشكر

هاعرض الموضوع على المهندسين المختصين وارد على حضرتك

المشاركة الأصلية كتبت بواسطة ame_elgohary

السلام عليكم يا بشمهندس طارق
ـ انا اشتريت من شهرين سياره شارك سبورت اللي كان عليها التخفيظ من معرض في مدينة نصر...... المعرض قال لي انها ضمان الوكيل (مصري مش خليجي) و فعلا اداني كتاب الضمان مختوم بختم شركة مصرية بس الافراج الجمركي كان باسم شركة مكة للاستيراد..... انا عادي رخصت على كدة......بس لما روحت اعمل خدمة ال1000كم طلبوا مني شهادة ضمان حمرة ......لما قولتلهم مختهاش قالولي عادي هنعملك الخدمة بس لازم تروح تجيبالشهادة دي من المعرض اللي في شارع رمسيس
ـ
ـ لما روحت سألت في المعرض...... قالو لي السيارات التي افراج شركة مصرية هي اللي بيطلعلها الشهادة دي .....بس انا عربيتي عادي في الضمان مفيش مشكلة فيها......
ـ
ـ ارجو التوضيح الفرق بين افراج شركة مصرية و افراج شركة مكة

الفرق في الاجراءات فقط انما مكة ومصرية نفس المعاملة كسيارة مصري لها ضمان الوكيل 100 ألف كيلو او ثلاث سنوات ايهما اقرب وختم مصرية كافي جدا
ورقم شاسيه العربية مسجل في ميتسوبيشي اليابان انها من سيارات مصرية ويوم ما يرسل لهم في اليابان اي عملية ضمان للعربية لن يعترضوا سواء ارسل لهم الآن من مصرية او مستقبلا من دايموند موتوزر الوكيل الجديد

المشاركة الأصلية كتبت بواسطة bele334001

السلام عليكم ,,
اولا الف شكر على مجهودك الكريم ,,

انا لسه شاري بومه 2010 كلاسيك 1600 ضمان الوكيل ,,
انا كملت 1000 كم ,,

- عاوز اعرف اقرب مركز خدمه معتمد ممكن اعمل فيه صيانه 1000
انا ساكن في التجمع الخامس ,, و اعمل في المهندسين - ش البطل احمد عبد العزيز ,,
سمعت ان في مركز في الرحاب هل ده صحيح و هل هو معتمد و كويس في الصيانات العاديه ,,

- ليه بيتغير الزيت في صيانه الالف مع انه لسه جديد ؟؟
و زيت موبيل 1 بيتغير كل قد ايه بعد كده ,,

- هل في مشكله من استعمال بنزين 92 ؟؟

- انا بركن العربيه في الشغل مايله يعني الكاوتش الخلفي بيطلع على رصيف ارتفاع 15 سم تقريبا ,, هل ده يضر بالعربيه و لا عادي ,,؟؟؟

- بالنسبه للعنايه بالنظافه الداخليه للتابلوه و الخارجيه للصاج ,, هل هناك اي نصائح مع العلم ان السياره سوداء ,,؟؟

اولا مبروك العربية الجديدة ربنا يديك خيرها ويكفيك شرها
مركز الرحاب معتمد وممكن تعمل فيه صيانة الألف بس الفني يمضي لحضرتك على دفتر الضمان انه الصيانة اتعملت في ميعادها وحضرتك بتدفع ثمن الزيت والفلتر انما المصنعية هي المجانية
وفيه مركز الخدمة في جسر السويس بجوار سوق القنال الدولي وجوار الألمانية مركز خدمة مرسيدس

تغيير الزيت بيتم في صيانة الألف لأن العربية الجديدة بتكون في الألف الأولى لازال المحرك في اول تشغيله ويجب عدم تخطي سرعة 90 كيلو متر خلالها ، وحسب تعليمات شركة ميتسوبيشي لازم يتغير الزيت والفلتر بعد الألف الأولى
والأفضل تغيير زيت موبيل وان أو اي زيت تخليقي مشابه يقعد 10 ألاف كيلو لأن الصيانة بعد كده كل 10 آلاف كيلو فكل مرة هتغير فيها زيت تخليقي ومش هتحتاج تعمل في العربية اي حاجه خارج الصيانات الدورية كل 10 آلاف كيلو غير البنزين

البنزين طبعا 92 كويس جدا وننصح به ولا ننصح بال 90 أو 80 وطبعا ال 95 غالي جدا وغير مطلوب اصلا للعربية خاصة المصري

موضوع الركنة اعتقد مفيش مشكلة منه وان كان ممكن يأثر على المدى الطويل على المساعدين شوية انما عموما المساعدين متغطية بالضمان

العناية بالغسيل العادي وممكن حضرتك تلاقي في قسم الورشة او الكماليات مواضيع عن العناية بالتابلوه والبودي بس فيه نصيحة هامة وهي عدم استخدام معطر سيارة سائل لأنه بيسيل على التابلوه ويترك اثر رهيب عليه فارجو الاحتراس من ذلك

المشاركة الأصلية كتبت بواسطة bele334001

معلش سؤال كمان ,,
هل الرواس و مصريه مستمرين في الصيانه و لا الوكيل الجديد هو اللي هيكمل و هل هتتغير مراكز الخدمه مع الوكيل الجديد و لا ايه النظام ,, ارجو توضيح النقطه دي للاطمئنان ضروري؟؟
و الف شكر يا باشا ,,

مراكز مصرية والرواس بالفعل مستمرة في صيانة السيارات الميتسوبيشي

الضمان حتى الآن مع مصرية وما زالت مراسلات الضمان مستمرة بين مصرية وميتسوبيشي اليابان وشركة دايموند كانت صرحت في حفل توقيع العقد (حسب تصريح الأستاذ احمد نوح زميلنا بالمنتدى واحد الحاضرين للحفل بصفته الصحفية) ان الضمان سينقل لدايموند موتورز على السيارات المباعة عن طريق مصرية الوكيل السابق وسيتم استكمال الضمان لديهم

اما الصيانة فهي مستمرة في مصرية والرواس حتى بعد ان تبدأ شركة دايموند في العمل وذلك كمراكز صيانة فقط