الموضوع: انت تسأل وإستشاري منتدى متسوبيشي يجيب (2)

بداية أعتذر لتأخري في الرد

المشاركة الأصلية كتبت بواسطة m_zeidan

لأستاذ / طارق
السلام عليكم ورحمة الله وبركاته
وشاكرين لك مجهوداتك فى خدمة أعضاء نايل موتورز
كنت عايز اعرف تكاليف عمل الصيانة 30000 كم وانا ديما باسنخدم ذيت bp 10000 كم اعلي فئة من الذيت عندهم من شركة car gas.
الكشف علي السيارة بالكامل بالكمبيوتر بسبب اني عايز اعمل كشف كامل علشان ان اشترتها من حوالي 2 شهر موديل 2009.
و لاحظت انها بتستهلك بنزين بصورة كبيرة سواء كنت على طريق سفر او في وسط البلد و المتوسط بتاعها 200 في الصفيحة و هي ما تعملهاش صيانة ال 20 الف تقريبا بس صاحبها غير بس زيت و فلتر و انا كمان مشيت بيها سرعات عاليه 180 و 190 بس مش لمسافات كبيرة فهل ده فرق في حاجة و لا ده ممكن يكون حاجة في البوجيهات او الموتور و هل ممكن اوديها مركز الخدمة الموجود في غمرة ورقم تيلفونو كم ولازم حجز ولا .
وهولسيادتكم جزيل الشكر

اهلا وسهلا بحضرتك ومبروك العربية الجديدة

سعر الكشف الكامل على العربية 180 جنيه + 10%

صيانة الثلاثين ألف تشمل تكلفة صيانة 150 جنيه + 10% و زيت موبيل وان 10 آلاف كيلو 230جنيه +10% أو لو تحب تجيب معاك الزيت اللي متعود عليه و فلتر زيت 60 جنيه + 10%

وخلال الصيانة حضرتك بتبلغهم بملاحظة استهلاك البنزين العالي وهم بيكشفوا على العربية ويشوفوا السبب سواء كانت محتاجة تغيير بوجيهات او فلتر هواء وان كان ميعادهم الفعلي عند الأربعين ألف

رقم تليفون مركز الرواس غمرة هو 24830754

المشاركة الأصلية كتبت بواسطة mragh

السلام عليكم باشمهندس طارق

من فضلك كنت عايز أعرف صيانة ٤٠٠٠٠ لانسر ١٦٠٠ منوال تتكلف كام ، و هل ممكن تتعمل في مركز الخدمة السريعه اللي في موبيل شيراتون

مع العلم اني المفروض أغير تيل فرامل كمان

ايوة ممكن حضرتك تعمل صيانة الأربعين في مركز خدمة موبيل شيراتون الاوتوستراد
تكلفة الصيانة 170 ج + 10% و زيت موبيل وان 230 ج + 10% و فلتر زيت 60 ج + 10 % و فلتر هواء 230 ج +10% و فلتر بنزين 565 ج + 10% و بوجيهات 120 ج + 10%
سعر تيل الفرامل للبومة 450 ج + 10%

المشاركة الأصلية كتبت بواسطة kholio

بعد إذنك يا بش مهندس طارق كنت عايز اعرف ثمن الكلاكس الاصلي وتيل الفرامل الأمامي الأصلي للانسر الشارك كام في التوكيل حاليا؟

ثمن الكلاكس الأصلي للشارك
بيكون عالي وواطي سعرهما 250 و 190 ج + 10% ، وفيه طقم ياباني مش اصلي سعره الاتنين عالي وواطي معا بـ 110 ج + 10%
سعر تيل فرامل الشارك 430 ج + 10%

المشاركة الأصلية كتبت بواسطة mohamed777

السلام عليكم ورحمة الله وبركاته
كيف حال حضرتك ياباشمهندس ... اسأل الله ان تكون فى اتم صحة واحسن حال

العربية راكنها ومش بستعملها غير فى السفر وممكن تقعد بالشهرين ماطلعهاش
بس بسخنها وهى فى مكانها لمده 20 دقيقة مرتين فى الاسبوع

فهل ده كويس للمحافظة عليها؟
واقصى مده اد اية لركنتها ممكن تقعدها وبعدها احركها؟ علشان العفشة
علما انى بلاحظ الكاوتش علشان ما ينامش والسلك يتكسر

لانسر 2007 اوتوماتك هاف اسبورت عدادها تقريباً 43 الف كم
وجزاك الله خيرا

انا عرضت السؤال على المهندس احمد عناني مدير الورشة في مركز الخدمة الرئيسي في قليوب وقال
يجب طبعا تغيير زيت المحرك لو عادي كل 3 شهور ولو تخليقي (مثل موبيل وان) كل سنة حتى ولو لم يتم عمل كيلو متر كبير على زيت المحرك
ويجب تحريك السيارة من مكانها حتى لا يتلف الكاوتش وتحركها كل اسبوع على الأكثر
ويجب تشغيل التكييف البارد ولو لمدة خمسة دقائق كل اسبوعان حتي يتم تزييت الاورنجات الخاصة بخراطيم التكييف

المشاركة الأصلية كتبت بواسطة temokemo

المهندس المحترم طارق
اليومين دول بدور علي عربية تكون 1600 بس اوتوماتيك بس كلة قالي مادام هتجيب اتوماتيك يبقي افضل انك تكشف عليها في التوكيل او مركز خدمة معتمد وانا الحقيقة مش قاعد في القاهرة فكنت عايز اعرف ممكن لما ربنا يوفقني في حاجة كويسة ممكن اكشف عليها فين والكشف هيكون تكلفتة كام وهل في الكشف بيديني تقرير كامل عن العربية و هل لازم احجز معياد قبل ماروح ولا اية ينفع اورح في اي معياد من غير حجز
ارجو من حضرتك النصيحة ولحضرتك جزيل الشكر

هو حضرتك من المنيا واعتقد القاهرة اقرب لك من قنا اللي فيها مركز خدمة معتمد في صعيد مصر وبالتالي حضرتك شرفنا في مركز الخدمة الرئيسي في قليوب لما تتوفق في عربية باذن الله كويسة
المكان في قليوب الكيلو 16 طريق اسكندرية الزراعي ت 42157629 وممكن تيجي في اي وقت مش مشكلة بس يفضل بدري شوية في اي يوم
والتكلفة 180 ج + 10% وبيكون فيه تقرير شامل للعربية عن الصاج والحوادث ، والتكييف ، وحالة المحرك ، والفتيس ، والعفشة ، وايه اللي العربية محتاجاه وهل فيها قطع غيار مش اصلية ولا لأ خاصة العفشة

المشاركة الأصلية كتبت بواسطة mgk_tex

السلام عليكم
انا امبارح دخا موتسكل فى المرايا اليمين بتاعت العربيه وكسرها هيه ماسكه دلوقتى على السلك الكهربا سالت ناس قالولى لازم تغير المرايا كلها وقالولى كمان فى الاصلى وفى حاجات تايوانى سعرها ارخص المشكله ان الماتور بتاع المرايا شغال وكويس انا كده لازم اشتريها بالموتور ولا ممكن الاقى مرايا اشتريها من غير الماتور بتاعها؟

هي المرايا الجديدة الأصلي للبومة سعرها حاليا 900 ج + 10% يعني 1000 جنيه انما لو القاعدة بس هي المكسورة (او مع الزجاجة فقط كذلك) لكن البودي سليم والمحرك سليم ففيه عدة موضوعات اتعملت هنا في المنتدى عن طرق تغيير القاعدة لوحدها او لصقها وان كان ده مش اصلي لأن الأصلي لازم المرايه على بعضها

هي لو العربية مش في التأمين يبقى حضرتك شوف استيراد مثلا أو التايواني ممكن يكون ارخص