عايز أركن قصاد بيتي

**w-m-a** · 06-05-2009 12:55 PM

الاستاذ الغالى
ليه حضرتك ماسكنتش فى عمارة فيها جراج متهيألى هو ده حقك الى انت فرطت فيه مش ركن مواطن فى الشارع وبعدين لو كل سكان العمارة عندهم عربية واتنين سعادتك هاتركن فين سعادتك لما تروح تشترى حاجة ولا عيادة ولامحل مش فى عمارة وفيها سكان ولا سعاتك ما بتركنش
هدى نفسك واستمتع بجمال الانتظار بشوارع القاهرة

**Sharky** · 06-05-2009 12:56 PM

المشاركة الأصلية كتبت بواسطة humhum

انا بروح من شغلي 12 ليلا
وساعات 2 صباحاً
وصدقاً مبلاقيش اي مكان اركن فيه خالص
تفتكر الحل اني اركن في شارع بعيد عن بيتي وانا ونصيبي العربيه تتسرق او تتخبط او يحصلها اي حاجه ، وحصلت قبل كده

ولا استعمل الطريقه اللي حضرتك بتعتبر انها بلطجه واخذ حق مش بتاعي !!! واللي تقريبا نص سكان المحروسه بيلجأوا ليها لأن الناس مبقاش عندها احساس ببعض

ممكن اعرف حضرتك بتلاقي مكان تركن قصاد بيتك ؟ على فكره ، لو حضرتك ساكن في التجمع الخامس مثلا يبقى صعب تحس باللي انا بتكلم فيه

أنا ساكن فى مدينة نصر و بعانى من نفس مشكلتك لدرجة إنى ساعات بركن فى شارع تانى غير اللى انا ساكن فيه

لكن عمرى ما قلت لحد راكن امام منزلى ماتركنش فيه علشان أنت مش ساكن هنا و لا عمرى إستخدمت البلطجة و حجز المكان لإنه ليس من حقى و بختار إن أمشى شوية او أركن بعيد عن إنى أخد خد حق مش حقى أو أمارس أى نوع من انواع البلطجة

على فكرة السيارة لو مكتوب لها إنه تتخبط او تتسرق
برضه حتتخبط أو تتسرق حتى لو راكنه جوا عمارتك

ممكن حضرتك تشوف جراج قريب من شارع و تركن فيه السيارة

حضرتك بإسلوبك دا بتأكد فعلا إن الناس مابقاش عندها إحساس بغيرها و هما نفسها فقط !

**hn_kamal** · 06-05-2009 01:47 PM

المشاركة الأصلية كتبت بواسطة humhum

انا بروح من شغلي 12 ليلا

تفتكر الحل اني اركن في شارع بعيد عن بيتي وانا ونصيبي العربيه تتسرق او تتخبط او يحصلها اي حاجه ، وحصلت قبل كده

ولا استعمل الطريقه اللي حضرتك بتعتبر انها بلطجه واخذ حق مش بتاعي !!! واللي تقريبا نص سكان المحروسه بيلجأوا ليها لأن الناس مبقاش عندها احساس ببعض

طيب ما هو ممكن تتسرق أو تتخبط وهى تحت البيت وده حصل مع ناس كتير وساعتها بقى ممكن تقولى سيادتك حتعمل ايه اذا كنت نايم مثلا وما شفتش اللى خبطها أو سرقها (بعد الشر طبعا)

ياباشا اذا كان كل سكان المحروسة بلطجية (مش نصهم زى مابتقول ) حاول انت تكون اول واحد مش بلطجى وصدقنى ده مش حيبقى ضعف منك بالعكس ده حيكون قوة لانك قدرت تحكم نفسك
وطبعا انا أوؤيد تماما ان من حق اى مواطن يركن عربيته فى اي مكان فى الشارع طالما مش بيعطل جراج او مرور

**kh_talaat** · 06-05-2009 02:15 PM

الصراحه الموضوع دة من الموضوعات اللي بتجيب لي الضغط وياما اتنرفت على ناس بسبب حكاية انا عايز اركن قصاد بيتي دي ( مع الإعتذار لصاحب الموضوع)

يا جماعة احنا كلنا نفسنا نركن تحت بيوتنا لكن مش معنى كدة ان احنا نستولي على الشارع اللي احنا فيه ونقول محدش يركن غير اللي ساكن فيه او ندق الخوازيق تحت بيوتنا ونحجز أماكن لنفسنا

ببساطه كدة لو هي دي القاعدة يبقى يا أستاذ humhum يبقى مش من حقك تركن في اي حته في البلد غير تحت بيتك بس !!!!!
ودة معناه انك تركن عربيتك تحت بيتك وتروح مشاويرك مواصلات

المشكلة مش مشلكة الناس ... المشكلة مشكلة الفساد الحكومي اللي بيترك مسئولي الأحياء يسمحوا للعمارات تتبني ابراج من غير جراجات دة غير سوء التخطيط والزحام الرهيب في القاهرة

يعني لو الموضوع مضايق حضرتك جدا للدرجة دي يبقى أنصحك انك تعزل في عماره فيها جراج وساعتها لو حد ركن عربيته جوه الجراج بتاعك يبقى من حقك انك تولع في عربيته لأن دة جراج خاص بيك أنت

وعلى فكره انا مش ساكن في التجمع الخامس وبعاني زيك بالظبط في الركن تحت بيتي وربنا يتوب علينا بقى من زحمه القاهرة

**itsonlyme** · 06-05-2009 02:27 PM

في بس نقطة بسيطة يا استاذ humhum، هو حضرتك بتتكلم على الركنه فوق الرصيف ولا في الشارع قدام العمارة؟

**mido01050** · 06-05-2009 03:02 PM

يا جماعة أنا مش عارف ليه دائما أسلوبنا عدواني في تصحيح أخطاء الغير , الراجل متنرفز من حاجة و زعلان و جاي يحكلنا عليها زي أخواته المفروض الأول نمتص غضبه بطريقة كويسه و نخفف عنه و بعد كده نبدأ نفهمه ان مفهومه ده خطأ , مش ندخل فيه شمال و كل واحد يخبطه كلمة نزود بيها غضبه

**Mustang69** · 06-05-2009 06:16 PM

انا عن نفسي مش عايز اركن امام بيتي انا نفسي اركن جوه المنطقة نفسها زمان كنت مقتنع ان اي حد من حقه يركن في اي مكان لحد ما ربنا ابتلانا بسيتي ستارز اللي الحمد لله اغلب العاملين فيه و نسبة لا بأس بها من زواره يفضلون الركنة داخل المنطقة مع العلم ان احنا 40 عمارة و كل عمارة بها علي الاقل 60 عربية بلا اي مبالغة فالمنطقة اصلا حتنفجر من كتر العربيات و كل ده و سيتي ستارز ليه جراجه الخاص و حواليه شوارع تكفي فوق 3000 عربية لكن كل الناس يا بتستسهل يا بتستقرب المكان و تكسل تمشي دقيقتين انا دلوقتي كل مشوار لازم اعمل حسابي في تلت ساعة علي مالاقي مكان انا اقصد ان مش لازم عشان واحد خارج يرفه عن نفسه او يشتري حاجة انه يتعمد يركن جوه المناطق السكنية و يتعب سكانها مع وجود اماكن ركن تانية بس ابعد 30 او 40 متر زيادة و ارجو اني اكون قدرت اوصل الفكرة

**sasatony** · 06-05-2009 08:22 PM

صلو علي التبي ياجماعة مفيش حاجة مستاهلة
حضرتك جيت لقيت واحد راكن قدام بيتك قولو بالذوق ممكن اركن علشان دهالماكن الي بركن فيه علي طول صدقني هو بطريقة كلامك دي هيقتنع ويسبلك المكان بكل ادب وزوق لكن حضرتك هتدخل فيه شمال او تكلمه بطريقة انك بتأمره هيعاند معاك
وبعدين حضرتك مش لازم تركن قدام باب العمارة عندك الشارع طويل شوية
مفيش اسهل من النرفزة والزعيق ومفيش اصعب من كظم الغيظ والهدوء

**SeMo_SiRiOnY** · 06-05-2009 08:55 PM

هدوا اعصابكوا يا جماعة مش كدة
مش كل يومين نلاقي موضوع فية مشاحنات شخصية
وافتركوا كويس ان مش كلنا ملايكة ولا بنتعامل مع ملايكة
فعلا في مواقف كتير ممكن تستفز اي حد ويخرج عن شعورة محدش يعرف ظروف حد
ومحدش يقدر يحكم علي حد من غير ميعرفة

**smax** · 06-05-2009 09:12 PM

مع احترامي لصاحب الموضوع و رجاء عدم اخذ الكلام بصورة شخصية لان المشاكل دية اصبحت ظاهرة و عدوة علي كل المستويات.
مشكلتنا ان مفاهيمنا اصبحت مغلوطة يعني اكون غلطان من ساسي لراسي و عايز اخد حق مش بتاعي و كمان باشتيكي و مش عاجيبني و فاهم ان دة حقي!!!!!!!
و في حاجة كدة مش فاهمها؟؟ لية نشوف كل مجتمع او فئة معينة و نختار الحاجات السيئة الي بيعملوها و نقلدها حتي لاو كانت اخطاء فردية!!!! و طبعا الحاجات الكويسة نقعد نحكي عليها بس "تقدم الصين و دبي, معاملة الاوروبين الراقي للناس" من غير ما نحاول نقلدها و لا حتة نفكر في اسبابة.
و بعدين دة احنا ناس متعلمين و مفترض مثقفين و دة بقي تفكيرنا امال بقي الجاهل يعمل اية يبقي حقة يولع في العربية !!!! منبقاش نزعل لما نركن قدام كشك و نلاقية عامل حاجة في العربية.