الموضوع: عايز أركن قصاد بيتي

افسم بالله العظيم قصاد البيت وتحت البلكونة بتاعتى وراكن الساعة 2 صباحا ونزلت 9 صباحا لقيت البرابريز الامامى مدغدغ قولى اكلم مين الجيران بيقولوا كلهم مش من عندنا يا عم حطها فى اى حتة وسيبها على الله تعالى وهو هيسترها

المشاركة الأصلية كتبت بواسطة w-m-a

افسم بالله العظيم قصاد البيت وتحت البلكونة بتاعتى وراكن الساعة 2 صباحا ونزلت 9 صباحا لقيت البرابريز الامامى مدغدغ قولى اكلم مين الجيران بيقولوا كلهم مش من عندنا يا عم حطها فى اى حتة وسيبها على الله تعالى وهو هيسترها

سبحان الله
يعنى راكن تحت بيتك والزجاج الامامى إتكسر
يعنى مش شرط إننا نركن تحت البيت علشان نحافظ على السيارة

المشاركة الأصلية كتبت بواسطة KIA_SEPHIA_2001_K

كنت بعمل حاجة من لاما بشوفوا فين والناس عندى فى الشارع يشفونى داخل
ينادوا من نفسهم على الراجل لو الراجل مش موجود بزنقوا ولما يرجع ادوخ اموا عشان انزلوا ومن سعتها يحرم
ده بجانب ان الى بيركن قادامى عميد ومعندهوش تفاهم ممكن يتخانق مع اى حد راكن مكانه

اخر مره بقى لقيت محامى بقوله بعد اذنك قلى متركن فى اى حته طلعت البيت وشربت شاى ورميت الباقى عليه

WMA
عمارتي يا سيدي مش مخالفه ، وعدد العربيات فيها على قد المساحه اللي قصادها ، واحيانا بتكون زياده شويه ، ومعنديش مشكله ان المساحه الفاضيه يستغلها حد من جيراني الأفاضل
انما انا بلاقي ملاكي السودان وأجره ليبيا جاي يركن عندي
كأن المكان قصاد بيتي مطار مش شارع جانبي
وبعدين لو كل واحد ح يعزل عشان معندوش في عمارته كراج ، يبقى البلد ح تبات في الشارع
والله فكره ، عشان محدش يركن خالص
sharky
ممكن حضرتك تشوف جراج قريب من شارع و تركن فيه السيارة
اعتقد ده دور اللي جاي يركن في مكان غريب
وده اللي انا بعمله فعلا
عمري ما ركنت قصاد بيت حد إلا مضطراً ، ولو فعلا مش ح اغيب ، وبشغل الانتظار بتاع العربيه ، وبسيب كارت ع الشباك عشان لو حد عايزني اطلع
hn_kamel
انا مسلم بقضاء الله وقدره
بس انت بتفكرني بحدوته تاريخيه جميله قوي
لما دخل الطاعون الشام ، وكان سيدنا ابوعبيده بن الجراح والي الشام ، بعث إليه عمر بن الخطاب يطلب منه الخروج من الشام فوراً ، خوفاً على حياة أبوعبيده (امين سر الأمة الإسلاميه ) ، فبعث إليه ابوعبيده يقول : " يا امير المؤمنين .. انفر من قضاء الله ؟ " ، وكان رد عمر حاسم " نعم .. نفر من قضاء الله إلى قضاء الله " ، بس للأسف الخطاب ده وصل بعد وفاة ابوعبيده بالطاعون ، رضي الله عنهما.
فياسيدي انا باخذ بالأسباب ، ومش ح اقولك ان عمرها ما اتخبطت تحت بيتي ، بالعكس ، ياما حصل ، بس اهو الواحد بيعمل اللي عليه
انما مجيش اركنها في اخر الدنيا ، ولو حد حاول يسرقها ، محدش ح يقوله بتعمل ايه ، واوعي تقولي لأ !! ده احنا بقينا سلبيين لآخر درجه
Kh_talaat
كل سكان عماره يقدروا يرتبوا الموضوع بينهم ، ويستغلوا المساحه اللي قصادهم ، اما المصالح والهيئات والقصص التانيه دي
فصدقني انا عمري ما خرجت اروح اعمل حاجه ، غير بلاقي كراج ، أو بلاقي رصيف جنب جنينه ، صدقني لو دورت ح تلاقي ومش ح تتعب
انا كنت بستغرب قوي قصاد مستشفى النزهه الدولي، ناس سايبه الأماكن اللي جنب المستشفى ، وسايبه طبعا الكراج ابو فلوس
وبتركن قصاد البيوت اللي ع الجنب التاني !!
اسمحلي دول مش بيستغلوا حقوقهم ، دول بيتعمدوا ايذاء الآخرين ، عشان يوفروا 2 جنيه رسم انتظار في الكراج ، او انه يمشي كام متر
itsonlyme
الاتنين ، الشارع والرصيف
اصل انا الرصيف عندي منخفض شويه (بصراحه انا ظبت الناس اللي بترصف الشارع ايامها) فاصبحت المنطقه عندي مستباحه
mido01050
بشكرك على ذوقك
وبعترف اني فعلا كنت متنرفز جدا امبارح وانا بكتب الموضوع ، لأنه كان لسه اللي حاصل
mustang69
هو ده اللي انا قصدي عليه تاما
الغريب هو اللي يدور على كراج او مكان بعيد شويه ، او كده كده خارج مشوار ، وشويه وح يمشي
sasatony
وهل حضرتك متصور اني بعمل غير كده ؟؟؟
انا كلمت الراجل بمنتهي الذوق في الأول ، بس هو كان عايش في دور حامي حمي الحقوق ، كان نفسي اشوفه وهو بيخلص ورقة في مصلحة حكوميه ، يوريني شطارته
semo_siriony
في ناس واخده الموضوع شخصي جدا
وبتعتبرني رمز لكل اللي فسولهم العجل قبل كده
ويانا يا السفاره في قلب العماره
على أي حال
الموضوع ده ساعدني على فهم الآخر (اللي بيركن قصاد بيتي)
smax
يا سيدي ما جري عليه العرف فهو اقوى من القانون
يعني من العرف كده لو لقيت واحد واقف بيتسكع قصاد بيتك ، بتقوله : انت مستني حد ؟؟ رغم انه مش واقف في شارعك ولا رصيفك ولا بيتنفس هواءك !!
جرى العرف في كل بلاد العالم
ان الناس بتركن قصاد بيوتها !!!!!! محدش بيسيب الناس تركن قصاد بيته ويروح هو يركن في الصحرا
وبعدين ماهو عشان احنا متعلمين ومثقفين ، الواحد ح يطق ، لكن لو احنا همجيين ولا بلطجيه ، مكنش حد ركن قصادنا
onsi
بحترم وجهة نظر ، بس انا ضد العنف عموماً ، وصدقني لو انا استخدمت العنف مره كل شهرين ، محدش ح يركن قصاد بيتي خالص ، بس انا مش ح ابقى مبسوط اني اخذ حقي (او اللي انا شايفه حقي) باني ادمر للآخرين ممتلكاتهم اللي دافعين فيها دم قلبهم
hamedoo
بص ، انا مقدر احساسك ده
ساعات كتير الاقي واحد طالع فوق الرصيف وشويه وح يركن فوق سور البيت !!!
طيب يا عم الدستوري هو كمان الرصيف بتاع بيتي داخل ضمن حدود ركناتك وشطحاتك ؟؟؟ وهو الرصيف ده مين اللي عامل البلاط بتاعه ؟؟
بلاش .. مين اللي لما البلاط بتاعه بيهبط لتحت بيجيب ناس تعمله ؟؟
اللي يركن بالطريقه المستفزه دي انسان معندوش ادب ولا ذوق
لأن ابسط قواعد الأصول ، اني احترم حرمة البيت ، مش اركن واسد مدخل البيت !!!
karimabuela
يا ريت تقولي الإجراءات ، بلاش ، قولي اروح اكلم مين في شعب مصر
وانا ح اعمل الموضوع ده فوراً ، عشان اشتري دماغي خالص
لو فيه فلوس بتدفع انا معنديش مشكله خالص
عشان بس الناس اللي بتتكلم عن الحقوق تعرف اننا عايزين نركن قصاد بيوتنا ، مش عايزين نحل النزاع الدولي على منطقة حلايب
homme49
لاحظ اني قلت مستشار متقاعد ، يعني خرج من منصبه والحراسه اتشالت
ومازال احدا من الساده الشجعان اصحاب الحقوق والواجبات لا يجرؤ على الركن قصاده !!!!
والموقف اللي حضرتك حكيته بيدل على انك رجل متحضر
وصدقني انا مع التعامل بالإحسان والفضل بين الناس ، لأن في النهايه لازم نقدر ظروف بعض ، مش نكسر عين بعض ونضايق بعض
tutankhamoun
بشكرك على المشاركه
وهي دي فعلا من الآفات المصريه ، ان كل واحد فينا معاه ميزان بيحاكم بيه الآخرين ، وميزان تاني بيحاسب بيه نفسه !!!
خلينا نعترف ان مصر داخله على مرحله ماديه انانيه ذاتيه جدا
بحسها وانا سايق لما بوقف عشان اخلي حد كبير يعدي الشارع
اللي ورايا بيهريني كلاكسات كأني عطلته عن ميعاد المكوك الفضائي اللي طالع
وبحسها لما الاقي واحد داخل تقاطع وعايز يكسر ع الناس عشان هو اللي يعدي الأول ، ومش مهم الشارع كله يقف وراه
المجتمع داخل على حالة غليان ، ونفور من الآخر بشكل رهيب
والسبب هو غياب النظام
سيبك انت
ايه العدادات الشيك دي ؟ ;)
agwaa
متفق معاك تماماً ، لأن العربيه لو قعدت تصوت مع نفسها ، ولا حد في الشارع ح يعبرها !! انا وانت وكلنا لما بنسمع سرينه انذار عربيه ، بنبص من الشباك على عربياتنا !! لو مش عربيتك خلاص .. بترجع تكمل نوم
ويا ريت تسرد تجربتك عشان نستفيد كلنا
w-m-a
خذ بالأسباب ، وسيبها على الله
KIA_SEPHIA_2001_k
اهو كلام حضرتك ده يؤكد اننا شعب يخاف ميختشيش
طبعا انا عارف ان الناس ح تسيب كل حاجه
وتمسك في كوبايه الشاي اللي اترمت ع المحامي !!!
بالمناسبه
ساعات كتير ناس بتركن مضطره قصاد الغير ، وده مش بيستفزني بقدر ما الاقي واحد راكن ومعرضها ع الآخر كأنه راكن في شارع ابوه ، واخد مكانين تلاته ، وقصاد الفيلا اللي مامته جايبهاله ، ويقوم كمان مغطيلك العربيه !!!
يعني بحس بجد اني مفروض اشيل يافطه العماره ، واحط بدالها (سايس خصوصي لسيارة البيه)
ناهيك عن اللي بيكون قاعد في العربيه ، وعامل فيها التنك اللي فاهم وهارش كل القوانين والدساتير
بس هو في سؤال صغير
هو شاي حضرتك سكره ايه ؟؟؟ اصل لو زياده يبقى الراجل دلوقت زمانه ملزق في بعضه !!!
sharky
مازلت مقدر ومحترم تماماً وجهة نظر حضرتك
وبعترف انك ساعدتني كتير في تفهم ليه الناس بتركن قصادي بغل
اه والله بحس انه بيركن وكأنه بيقوله " اهوه ، انا اخدت حقي ، انا مواطن درجه اولى "
لكن عمرى ما قلت لحد راكن امام منزلى ماتركنش فيه علشان أنت مش ساكن هنا و لا عمرى إستخدمت البلطجة و حجز المكان لإنه ليس من حقى و بختار إن أمشى شوية او أركن بعيد عن إنى أخد خد حق مش حقى أو أمارس أى نوع من انواع البلطجة
طيب وهي ايه البلطجه في اني اطلب من واحد بشكل مهذب انه يفضي المكان اللي قصاد بيتي عشان اركن فيه ؟
هو حضرتك سيبت كلامي كله ، وشوفت فيه اني كنت ح انزل اضربه ،رغم اني لا نزلت ولا ضربته !! واهي كلمتين بنقولهم في ساعة نرفزه !! ايه الواحد ميعرفش يتفك معاكوا بكلمتين ؟
على فكرة السيارة لو مكتوب لها إنه تتخبط او تتسرق
برضه حتتخبط أو تتسرق حتى لو راكنه جوا عمارتك
آمنا بقضاء الله وقدره
بس برضه ناخد بالأسباب
أعقلها وتوكل
كلامك ده ممكن واحد شاب من بتوع الغرز برضه يقوله
ويقولك يا عم الأعمار بيد الله !!!
زي برضه سواقين الميكروباص ، تلاقي الواحد فيهم سايق كأنه عامل تعاقد مع عزرائيل ، ومولع 3 سجاير في ايده ، ومشغل اغنيه هابطه تحت المجاري ، ولابس سلسله وعامل شعره بزيت موبيل 1 ، وشكله ولا يعرف شكل الجامع ايه من جوه، ولما تقوله هدي شويه يا عم انت شايل معاك قفاص منجه !! يقولك " يا بيه الأعمار بيد الله ، كله مقدر ومكتوب " لا مؤمن قوي يا عم الشيخ
طبعا مع الفارق
انا فاهم قصد حضرتك كويس ، بس وجود العربيه قرب البيت بيحميها اكتر
ولا حضرتك شايف ايه ؟
ممكن حضرتك تشوف جراج قريب من شارع و تركن فيه السيارة
يعني بالذمة ده كلام ؟
انا اشوف كراج
واللي جاي غريب هو اللي ياخد المكان اللي قصاد بيتي ؟
وبعدين مع احترامي الشديد
ايه تعريفك لحرمه البيت وحماه ؟

على فكره
تباين وجهات نظرنا ده يا sharky مسأله صحيه
وانا شخصياً استفدت جدا من كلامك وبشكرك عليه
على الأقل انا فاهم دلوقت الراجل كان بيفكر ازاي وهو بيتكلم معايا
وده ريحني نفسيا
بشكرك

المشاركة الأصلية كتبت بواسطة humhum

sharky
مازلت مقدر ومحترم تماماً وجهة نظر حضرتك
وبعترف انك ساعدتني كتير في تفهم ليه الناس بتركن قصادي بغل
اه والله بحس انه بيركن وكأنه بيقوله " اهوه ، انا اخدت حقي ، انا مواطن درجه اولى "

أكيد هما بيعملوا كده نتيجة لإنهم شايفين إن حضرتك بطالبههم بحاجة مش من حقك و كانهم غلطانين فيها !!!

المشاركة الأصلية كتبت بواسطة humhum

لكن عمرى ما قلت لحد راكن امام منزلى ماتركنش فيه علشان أنت مش ساكن هنا و لا عمرى إستخدمت البلطجة و حجز المكان لإنه ليس من حقى و بختار إن أمشى شوية او أركن بعيد عن إنى أخد خد حق مش حقى أو أمارس أى نوع من انواع البلطجة
طيب وهي ايه البلطجه في اني اطلب من واحد بشكل مهذب انه يفضي المكان اللي قصاد بيتي عشان اركن فيه ؟

لا طبعا دى مش بلطجة لكن البلطجة إنه لو رفض تنفيذ طلبك و دا حقه إن حضرتك تتخانق معاه و تكون عايز تضربه و تشتمه

المشاركة الأصلية كتبت بواسطة humhum

على فكرة السيارة لو مكتوب لها إنه تتخبط او تتسرق
برضه حتتخبط أو تتسرق حتى لو راكنه جوا عمارتك
آمنا بقضاء الله وقدره
بس برضه ناخد بالأسباب
أعقلها وتوكل

فعلا ناخد بالأسباب زى مثلا لما إن حضرتك تركن سيارتك فى مكان مظبوط زى بقية السيارات حتى لو فى مكان مش تحت بيتك تبقى خد بالأسباب

لكن ماينفعش إنك تروح تركنها صف تانى او خارجة عن الرصيف و تيجى تقول لو مكتوب لها لإن كده حضرتك ركنت اصلا غلط
لكن لما تكون راكن صح فى اى مكان تبقى كده اخذت بالأسباب مش إنك تركنها تحت بيتك تبقى أخدت بالأسباب

المشاركة الأصلية كتبت بواسطة humhum

انا فاهم قصد حضرتك كويس ، بس وجود العربيه قرب البيت بيحميها اكتر
ولا حضرتك شايف ايه ؟

لا طبعا لا يحميها اكتر

دا مجرد إرتياح نفسى ليس أكثر

المشاركة الأصلية كتبت بواسطة humhum

ممكن حضرتك تشوف جراج قريب من شارع و تركن فيه السيارة
يعني بالذمة ده كلام ؟
انا اشوف كراج
واللي جاي غريب هو اللي ياخد المكان اللي قصاد بيتي ؟

و إيه المانع طالما هو زيه زيك
ثم هل هل فيه جراجات عمومية فى مدينة نصر علشان الضيوف يركنه فيها
سؤال لحضرتك هو الضيوف لما تيجى تزورك بتركن فين ؟؟؟

المشاركة الأصلية كتبت بواسطة humhum

وبعدين مع احترامي الشديد
ايه تعريفك لحرمه البيت وحماه ؟

مال حرمه البيت بركن السيارة فى الشارع !!!!!!

هو كام عدد العربيات إللى فى العمارة عند حضرتك ؟