تقييم الm11 من الاول للاخر

[hemaa_82]

الزمان : السبت 12/3/2011
الخطة :- من الزيتون الي العلمين صد رد


سلام الله عليكم و رحمته و بركاته :)

طلعت الساعة 9 وصلت 12 .... و طلعت من هناك 3 وصلت 6راجع الحمد لله

السرعة علي الطريق لم تقل عن 160 .....
تم الوصول الي سرعة 200 كيلو في الساعة .... السيارة محملة ب 4 افراد باجمالي وزن حمولة حوالي 400 كيلو
متوسط استهلاك البنزين 10 لتر لكل 100 كيلو " مع العلم بأن الصحراوي من بوابات القاهرة لبوابات العلمين خدناه في ساعة و 45 دقيقة و اكتر من ساعة بقي علي المحور و اكتوبر "


اغبي ما في الموضوع :- الزجاج الامامي يمين "باب المرافق" علق مرتين ..... في الطريق الرايح فضل تلت ساعة مش راضي يطلع
و برضه في الراجع عمل نفس الحركة .......
و رجع اشتغل لوحده تماما ...... تقريبا في سلك مفكوك من المكنة لاني بسمع صوت الكتاوت بتاعة الزراير بس لما بيعلق مبسمعش صوت المكنة .... بس لما اشتغل بقي عادي تماما و طول الطريق عمال العب بيه طالع نازل لما كنت انا اللي هبوظة بجد :)


ان شاء الله كده صيانة ال 25000 فاضلها 1000 .... و معاها هغير تيل امامي + فك بطانة الباب و الكشف علي وصلات مكنة الزجاج

العربية علي 200 كيلو في الساعة تحفة و بسم الله ما شاء الله

ربنا يكفينا و اياكم شر الطريق

اتمسوا بالعافية

كنت حكتلكم علي موضوع الزجاج اللي بيقفش .....المهم ... طبعا لسة -بكل الكسل كالعادة بس والله مفحوت في الشغل علشان كدة غبت من هنا بقالي كام يوم- مرحتش التوكيل .... بس النهاردة وانا مروح الحرفيين حصل نفس الحوار .....
الازاز اليمين-بغباوته بشكله العكر - فتح و حلف ما يقفل .... و كالعادة سامع كتاوت الزراير بتفتح و تقفل علي الفاضي من غير اي حس لمكنة الزجاج....
قمت مروح البنت و مامتها و متوكل علي الله و قررت اخاطر و ادخل اشوف في الحرفيين حد يفك الباب و يشوف لو في سلك مهوي ....

رحت و بعد لف كتير-علشان الساعة كانت 11 بالليل- لقيت واحد اسمه صالح ......
جه صالح و فك الباب و كأنة فكه قبل كده - مع انه بيركب ب 7 مسامير في اماكن عجيبة - و بص لقي كل الفيش تمام .... يجي يجرب مفيش ..... حاول يوصل المكنة علي البطارية بسلك خارجي معرفش علشان الفيشة بتاعتها شفايفها غويطة و المكنة طلعت بوش بالمناسبة بس معرفش بقي الماني ولا صيني ... ايا كانت ...قام معري اسلاك الفيشة اللي بتغذيها .... و جه يجرب لقي الاسلاك بتشرز ....و كالعادة قال في قفلة لان كده في كهربة في ال رايح و الراجع ..... طبعا انا علي طول افتكرت حوار لمبة المارشيدير بتاع كاميرا الرجوع و ان الدايرة حتي و اللمبة مطفية فيها كهربا و قعدت افهمة .... بس بصراحة محاولش يفتي و قالي كدة محتاجين كهربائي .... وطلعنا علي واحد ...

جاب تست ... يجرب الزرار ينور و الازاز محنطر و مش بيتحرك ..... و اذ فجأة قام العفريت انصرف و الازاز اشتغل ......طبعا الكهربائي فتح بقه و تنح ..... وبرضه اذ فجأة قام العفريت رجع في كلامه و رجع قفش تاني .....

قام الكهربائي بكل وقار سألني هل ال DVD ليه كود ؟؟؟؟ قلتله لا
قام منادي الصبي بتاعه و قاله فك كهرابة البطارية ......
وبعد التوصيل اشتغل الازاز زي الحلاوة .....
وادي اخرة ام التكنولوجيا اللي لحست دماغ العالم ...... بقي بزمتكم .... ايه لزمة ان الازاز يبقي علي الكمبيوتر ؟؟؟؟؟؟؟

المهم طبعا قفلنا كل حاجو والحياة بقت زي الفل ... و اديت الكهربائي بريزة و اديت صلاح ريال بس بصراحة علشان مفتاش مش لمجهود ولا حاجة .... و ان شاء الله مع صيانة ال 25 هروح اعملهم بوليكة في التوكيل علي الهبل ده و علي الله بقي لو حصلت تاني ....
اولا هجرب مني لنفسي حوار الريست ده ... بس بجد هروح ابهدلهم في التوكيل لان ده كده هبل

بس برضه انا ليا واحد صاحبي معاه سيتروين c4 و يوم ما استلمها بالليل كل انوارها و كهربتها قفشت ما عدا النور الامامي و المتور ... ولما راح معملوش اكتر من اللي عمله الكهربائي الهمام بتاع الحرفيين


ربنا يعفينا و اياكم من تهنيج الكمبيوترات ... مش عارف بقي دي شغاله ويندوز ولا ايه

[hemaa_82]

الحمد لله كل شئ اخر تمام و زي الفل .... ربنا يديم علينا و عليكم كل خير ان شاء الله

[doda112a]

بص .... بيتهيألي المفروض بعد الافراج الجمركي اللي جالهم علي الشحنات في يناير 2011 ميبقاش في مشكلة في قطع الغيار ... و لو كان فيه ...حماية المستهلكاثبت كفاءة في الموضوع ده ... و ربنا ما يحوجك لمسمار حتي يتغير ان شاء الله

اما بالنسبة للعدد... انا روحت 4 علي الكنبة و 2 جنبي يعني اجمالي بيا 7 ... انما ده بصراحة استعباط و استنطاع و اكيد بيكون لوضع طارئ مش طبيعي والا فكك بقي و اشتري مكروباظظظظظظظظظظ :)

ربنا يبارك لك و لنا ان شاء الله

والله الواحد بيفكر فعلا فموضوع الميكروباص عشان كده m11 مش هتسد مع الوحوش
الي عندي(اصحابي و عيلتي) اصل كان زمان عندنا فولفو قديمة كان اقل واجب 10 ركاب و هما اتعودوا علي كده

[ALAA_EL_NAGAR]

انا قريت الموضوع بتاعك ده صفحة صفحة 31 صفحو كلهم
و بقالى كتير فيه ساعتين تقريبا
و بصراحة متزعلش منى انت اسلوبك مستفز جدا فى الكلام عن العربية .. انا مش عارف حضرتك لو كنت راكب عربية نضيفة شوية كنت هتعمل ايه فينا
بس صدقنى انا بدون تحيز العربية دى عجبنى شكلها اوى و ده اللى خلانى اهتم بالموضوع بس بصراحة مفيش غيرك عمال يشكر فى العربية و بقيت الناس بيشتمو فيها و عاملين مقابلات و طالع عينهم و انت بتتكلم ولا كأنك راكب بى ام مثلا
انا عاوز اقولك حاجة بجد كتير اوى الاعطال و الحورات اللى انت قولتها دى فى عربية زيرو علشان دى لو عربية محترمة مكنتش عملت كده و اقل حاجة 50000-60000 الف كيلو من غير مشاكل و قصص و انت بتتكلم فى كام عيب بعد 30000 و سنة استعمال - فى عربيات مبتعملش صيانات اصلا زيك كده و بتمشى قشطة من غير مشاكل
والله العظيم انا مفيش بينى و بينك حاجة بس معلش اركب عربية محترمة و انت تعرف الفرق و بلاش تغرى الناس بيها حرام عليك بجد دى زبالة و كل اللى جبها ندم اوى انو جابها و فيها مشاكل الدنيا و الدين و كل اللى انت بتقولو قربة و شكمان و القصص دى سمعتها من ناس كتيير اوى و اكتر منها بكتير و كلها هتظهرلك متقلقش لشان من اول التقرير كل م امشى كام صفحة الاقى مشكلة ظهرت عندك من اللى انا شوفتهم مع ملاك العربية المحترمين اللى بجد بيقولو العيوب قبل المميزات مش شعر حضرتك فى العربية.
بلاش كذب العربية سيئة و انت عارف كده و بتحللها لنفسك و انا مش بقول كده و الله لانها صينى - صناعة وحشة اصلا - بس لان بجد مشاكل كتييير اوى ظهرت من ملاك و تقريبا عربيتهم صينى و عربيت حضرتك صنع فى المريخ
حضرات الافاضل الاعضاء المحترمين العربية زباااااااااالة بمعنى الكلمة و مليانة مشاكل كتير اوى و بجد بلاش العربية دى و بلاش نشجع صناعة رديئة زى دى و كفاية علامة اسبرنزا العار اصلا و كلمة يا عم ده راكب صينى (( تخيل 70000 الف و يتقال عليك ده راكب صينى و اللى راكب بيجو 504 بيتبصلو باحترام عنك )) .
متزعلش منى انا لا اقصد شخص و لكنى انتقد عربية و طريقة كتابة عنها و هذا للمصلحة العامة فقط والله

[hemaa_82]

انت اسلوبك مستفز جدا فى الكلام عن العربية .. انا مش عارف حضرتك لو كنت راكب عربية نضيفة شوية كنت هتعمل ايه فينا
مفيش غيرك عمال يشكر فى العربية
اركب عربية محترمة و انت تعرف الفرق
بلاش تغرى الناس بيها حرام عليك بجد
ملاك العربية المحترمين اللى بجد بيقولو العيوب قبل المميزات
بلاش كذب
العربية سيئة و انت عارف كده و بتحللها لنفسك
تقريبا عربيتهم صينى و عربيت حضرتك صنع فى المريخ

متزعلش منى انا لا اقصد شخص و لكنى انتقد عربية و طريقة كتابة عنها و هذا للمصلحة العامة فقط والله
طلعتني قليل الادب كداب و منافق و اهبل و مؤذي و مش محترم و مبفهمش "في اعتقادك الشخصي" و تقولي متزعلش ؟؟؟؟؟

احسن رد علي شخص محترم زيك عدم الاجابة


و طالاما مش شايف غيري بيشكر فيها و كله بيشتكي "مع ان في ناس جايباها بعدي و ماشية تقريبا ضعفي و برضه بيشكروا فيها" يبقي تمام .... حقك انت عليا .... يا زوق يا ابن الناس يا متربي

[hima77]

يا جماعة احنا هنا بنقول اراء عن تجارب شخصية مع عربياتنا بأمانة ... ولكل واحد رأيه وقناعتة ياخد بالاراء دى او لأ هو حر محدش واصي على حد ... كتير عربيات بيبقى فيها عيوب صناعة او عيوب تجميع من كل الماركات مش صيني بس
الهدف هنا ان احنا بنتعلم من بعض ومن المشاكل اللي بتاقبلنا كلنا ... مالوش لازمة الكلام اللي يجرح ويزعلنا من بعض
وربنا يهدينا للي فيه الخير ان شاء الله

[hima77]

يا جماعة احنا هنا بنقول اراء عن تجارب شخصية مع عربياتنا بأمانة ... ولكل واحد رأيه وقناعتة ياخد بالاراء دى او لأ هو حر محدش واصي على حد ... كتير عربيات بيبقى فيها عيوب صناعة او عيوب تجميع من كل الماركات مش صيني بس
الهدف هنا ان احنا بنتعلم من بعض ومن المشاكل اللي بتاقبلنا كلنا ... مالوش لازمة الكلام اللي يجرح ويزعلنا من بعض
وربنا يهدينا للي فيه الخير ان شاء الله

[katoba]

اللى انا مستغربة بجد ان الاخ الى بيتكلم عن العربية وبيشتم فيها معندوش اصلا العربية ومركبهاش ومجابش سيرة ان واحد صاحبة ركبها مثلا او شافها دة قال تقييمة بناء على كلام الناس فى المنتدى .. الغريبة بقى ان انا كمان قريت نفس الكلام زية بالضبط وطلعت نتيجة ايجابية جدا عن العربية ولقيت مدح اكتر من ذم بكتييييييير حتى الى قال عيوب قال انه حلها ومازال بيشكر فى العربية .. الحاجة الاغرب بقى انه شتم الاسبرانزا ككل بجميع فئاتها طيب يااخى كان اولى بيك تجربها الاول وتحكم عليها وصدقنى انت جاوبت على نفسك مافيش واحد عاقل مصرى محترم تعبان فى ال70 الف دول يروح يرميهم فى عربية تعبانه ومن غير مايكون دور ولف وشاف وسال وفحص واستكشف .. انا ياجماعه اكتر حاجة تضايقنى ان حد مجربش الحاجة ويحكم عليها .. الموضوع دة منتشر جدا فى المصريين مع الاسف .. كل واحد عاوز يقول راى منفرد وخلاص .. انت عاوز الحق بقى انا مشوفتش فى مصر عربية محترمة من فئة ال 50 الف لحد ال 100 الف مفيهاش العيوب دى ولو عندك قولى وانا اصبر كمان سنتين تلاته واجمع باقى الفلوس واشترى عربية تانية غيرها بدل مارمى فلوسى فى عربية زباله وبيئة كدة .. ياجماعه احنا عاوزين نستفيد مش نتكلم وخلاص وننقد وللاسف من ناس مجربتش العربية اصلا .. انا بحترم اى واحد اشترى العربية وشتم فيها وقطع فى سلسفيل جدودها كمان لانه ساعتها بيتكلم عن تجربة مش كلام فى الهوا وياريت حضرتك تقرا كلامى حته حته وتشوف لو اسئت ليك فى حاجة رغم انى بنقدك لاطلعتك كداب ولا خبطت فيك .. متهيالى فية ادب حوار افضل من كدة

[meedoo69]

اللى ما يعرفش الاسبيرانزا ومركبهاش يقول عدس العربيه زى لفل

[meedoo69]

السلام عليكم

بقالي يومين مدخلتش و وحشتوني والله ....
المهم ... الحمد لله جبت dvd 2din من انجلترا .... معاه gps + rear cam + ipod controler + usb + sd + analog tv + radio + bt car kit

كله مع بعضه حتة واحدة ..... و ركبته يوم الاثنين .... عند راديو باص ... اللي هوا توكيل الcd الاصلي بتاع نقاوة

انا قلت اركبه هناك لان هما هيبقوا اكتر ناس حافظين ال عربية و ضفيرة الكاسيت

التركيب خد من الساعة 1 و ربع الي 7 و ربع تقريبا ..... بجد طلع عينيهم .... خاصة مع مقلب جامد فحت و هو ان العربية حتي و هي طافية لمبة الرجوع"المارشيدير" بتكون فاصلة ارضي انما في كهربة في الدايرة بتاعتها و ده اضطر اللي بيركب ان هوه يركب كتاوت علشان يقدر يعمل فرع بيخرج كهربا لما اللمبة تنور بدل ما تبقي كهربا دايما ....
بس بجد ركب و كأنه فابريكة ... و بجد الناس حافظة العربية تماما
المهم ... الجهاز و قف بالكاميرا بتاعته بتركيبه بالخريطة اللي نزلوهالي عليه بسلاطاته ببابا غنوجه "من ساعة ما جبته لحد ما اشتغل" ب حوالي 2500 ....

جربت ال gps شغال مظبوط
جربت ال راديو مظبوط
جربت التلفيزيون شغال
ال باركنج كام مظبوط

ان شاء الله ابقي اصورلكم الدنيا و اوريهالكم :)

نوافيكم بكل جديد

حصل معايا نفس المقلب وانا بركب شاشه على المرايا وكاميرا خلفيه وبعد 6 ساعات توصلوا للحل ده عند ماكس باور فى مدينه نصر وبرده ركبوا كتاوت

[hemaa_82]

حصل معايا نفس المقلب وانا بركب شاشه على المرايا وكاميرا خلفيه وبعد 6 ساعات توصلوا للحل ده عند ماكس باور فى مدينه نصر وبرده ركبوا كتاوت

انا فضلت اركب في توكيل الكاسيت القديم اللي ابو الفتوح معتمد له وكالة الكاسيت علشان ميبقاش في شبهة تخريب ... انا لو كنت مخلص الضمان كنت ركبتة انا ....

الف مبروك ليك و ليا و للجميع الخير دايما ان شاء الله

[mmffor]

العربية كويسة بس الغريبة انها اضيق من ال 516

[ALshahba]

^^^^^^^^^^^^^^^^^^^^^^^
+1111111111111

[hemaa_82]

صيانة ال 25 في تكنو سيرفيس 2

السلام عليكم ...

حجزت الساعة 8 .... و رحت الساعة 8 دخلوني في الدور علي الورق 8:30 و العربية دخلت 9

المطلوب :-

صيانة 25 "عامل 26"
تغيير تيل امامي
الشكوي من الزجاج الامامي يمين "علشان حوار العفريت"
الولاعة فاصلة
..... وانا رايح الصبح و سبحان الله ... سمعت خبطة في العجلة قدام يمين ... نزلت تحت العربية لقيت جلب لبمقص الامامي يمين خفيفة و علشان كده بتخبط... ف قلتلهم مطلوب تغيير جلب بس بتاع الاستقبال قالي نكشف و يحددوا في الورشة لن شاء الله ....

الخروج تم الساعة 12 " ميزة السرعة كويسة"

تم تغيير التيل " 135 تيل + 10% ضريبة .... 35 مصنعية + 10% ضريبة عليها " = تقريبا 200 جنيه
تم ربط العربية " الصيانة 180 جنيه- كتير فحت ... ابو غالي كان بيعملها ب 90 جنيه- + 10% ضريبة علي المصنعية = 200 جنيه تانيين"
تم حل مشكلة الزجاج" تفسير كبير اللصنايعية ان كان في زي تمليح علي زراير الكنترول فبتعمل زي قفلة و تمنع الاشارة توصل للمكنة احيانا " بغض النظر عن اقتناعي خلينا ورا التوكيل و لسة معانا سنة و نص ضمان نخنق بعض".... بس للامانة لسة معلقش تاني "
الولاعة .... قلب الولاعة عامل قفلة و واجب تغييره علي الضمان و تم طلبه و في الانتظار
الجلب ... تم تربيط العربية و تم اختفاء الصوت .... واجب عمل تقرير زوايا للتأكد من انتهاء المشكلة و مكنة الزوايا في تكنو 1 مش 2 و تكنو 1 اجازة السبت غير ان بعد الاتصال بهم ... مكنة الزوايا تحت الاصلاح من بداية الاسبوع ....تم عمل تقريري و تم حجز معاد في ابو رواش لنهاء الوضع ....

الخلاصة .... تكنو سرفيس غاليين علي الفاضي بس سرعتهم كويسة ... و مش هيحلوا اي حاجة فيها احتياج لقطع غيار علي الضمان ...

نوافيكم بكل جديد و اتمسوا بالعافية

[hemaa_82]

شكرا لطارق بتاع الازاز

السلام عليكم ....

برغم اختفاء صوت الجلب تماما-الحمد لله- و برغم ان بعد الربط العربية حتي منظرها مش محتاجة تعمل زوايا و ما شاء الله ماشية عدل .... قلت لنفسي برضه اعمل عبيط و افضل معاهم لحد ما يطلع تقرير ورق منهم بيقول كل حاجة فلة ....

المهم بعد اتصال كل يوم مع تكنو سرفس اللي جنب مرسيدس عند سوق القناة....برضه لسة المكنة خربانة ...مكنة الزوايا يعني....قمت قلت لنفسي طب ليه مجربش الكويت والبلاد العربية اللي بيعمل صيانات فولفو ... مهوه كده كده جنب الشغل و شكلهم نضيف ....

كلمتهم طلعوا من غير حجز ... رحتلهم الخميس -امبارح- علي الساعة 7:30 الصبح ... دخلت و جه مهندس الاستقبال الساعة 8:10 ..

سألني ..حكيتله علي الموضوع و ان عايز تقرير زوايا ... قالي طب هيه بتحدف ؟؟؟ طب لسه في صوت .؟؟

طبعا فهمته اني بس بحاول اكون ماشي علي الاجراءات بالحرف مش اكتر ...قالي طب نجرب الاول ولو في اي حاجة نشوف .... طبعا بالتجربة مفيش حاجة لان الحمد لله العربية كويسة ....
قالي بص هو سهل اني ادخلك زوايا و اخد 55 جنيه و بعدين اربطلك عفشة ب 110 تانيين و انا هكون كسبان انما حرام .. و العربية زي الفل ....
حتي بقولو يعني انا كده كده لسة فاضلي سنة و نص ضمان فرأيك يعني اطنش ...قاليي لا مش تطنش ..انما اصلا مفيش حاجة .....

قلت بيني و بين نفسي طب اسأل تركيب الاكصدام مكانه بكام ؟؟؟ "الامامي اللي كنت مركبه بأيدي بعد ما اشتريت الحامل اليمين اللي كان مكسور" ........... طلع ب 150 جنيه ....فقلت لا كتير و مشيت ....

طبعا لما سألتهم علي الصيانة بكام و قالي 110 اشتكتله من تكنو سرفيس ... ولما عرف خد مني ورقة الصيانة صورها علشان يراجع مع توحة يشوف هل الاسعار غليت ولا تكنو هما اللي بيغلو من دماغهم ....



المهم ....

طلعت من عندو قلت لنفسي طالاما كده كده مش هعمل حاجة و الدنيا بدري ...طب ما ارد الباب علي البارد عند السمكري اللي ردلي الرفرف علي البارد ....
رحت ... يالا يا سيدنا هنرد الباب و نركب الاكصدام علي ابوه ....

فكوا الاكصدام و عدلوا الصاجة التحتانية بتاعت الكارتيرة و ركبوه و فله ...

و الصنايعي التاني شغال في الباب و فك البطانة و عدل الفدغة بايده من جوه و بدأ بيضرب من جوة علشان يعدل الصاج ...
خبطة التانية و هوبا ... الازاز اللي كان مرفوع و مقفول قام نازل علي ايده ....
طب ازاي ؟؟؟؟ ما المكنة مقفولة ... يا عم انت فكيت حاجة ؟؟؟لا يا بيه ....

المهم فكينا مكنة الازاز ..لقيت ان ودن من ال2 اللي بيمسك فيهم السلك في الفبرة اللي بتتحرك علي الشاسية الصاج و ترفع و تنزل الازاز الودن دي اتكسرت .... طب و بعدين في الحوسة دي ؟؟؟؟

المهم قعدنا انا و السمكري نفصل في دعامة صاج للفبرة المكسورة علشان بعد ما نلحمها بأمير متطقش تاني ... و قد كان .. و نجحت الفكرة ...حرك يا عم بايدك الفبرة ... حلاوة طب ركب المكنة ... جرب بالكهربا ... عينك ما تشوف الا النور ... اصوات عجيبة و حاجات بتتحشر و شغلانة ....
بصيت بطرف عيني كده لقيت ان اللي احنا عاملينة كويس ... بس السلك لما فلت ...السوستة ريحت فقام السلك ركب علي بعضه في قلب المكنة علي القرص اللي بيلف حواليه ....

يادي النيلة ... هوا احنا نصلح خرم نلاقي بلاعة .ما الباب كان مخبوط و زي الفل شغال .... طب و بعدين ....قالي طب بص ..في هنا واحد بتاع كوالين كويس ... قلنا يالا بينا بقي مبدهاش ....

رحنا .... اسمه طارق .. ابو يوسف -ربنا يحفظله اولاده- بص كده و قالي كده لازم سلك ... بكام يا سيدي ... 50 جنيه ... طب اشتغل ...و قلت لنفسي انا مش هفضل الف يعني علشان في الاخر اوفر 10 جنيه .. المهم الشغل يكون تمام ....

لما بدأ يشتغل ...لقي طبعا الافتكاسة بتاعة الجبيرة ... فقالي ايه ده؟؟ ....شرحتله
قالي طبعا مينفعش ....
عمل ايه بقي ...... كسر الجزء بتاع الودان خالص .... و فصل زي شاسيه حديد بخرمين علشان الاسلاك ... و في نفس الوقت يركب في الفبرة بمسمار بدل الجزء بتاع الودان ..... جرب ... حلاوة ....
طالع نازل و صوته بقي اقل من الفابريكة اللي الناحية التانية و أأمن لان كده حتي مفيش احتمال الودن تتكسر ولا حاجة لأنها ودان حديد....

طب يا عم كنت هتاخد 50 في السلك ..... عايز كام ؟؟؟؟

كله كله 70 جنيه ....طب والله كويس ......

حتي قلت ما بيني وبين نفسي ان ممكن ان شاء الله من غير ما ودان ال3 مكنات التانيين تنكسر ابقي اخليه يعمل نفس الحركة ... علشان الواحد يريح دماغه خالص .....

اللي عنده مشكلة مع كسور في فبرة المكن و يحب ياخد نمرة الراجل ده او الوصفة يقول و انا ارد عليه .....

و ربنا ما يجيب حاجة وحشة ....

الحمد لله ردينا الباب و ركبنا الاكصدام و مكنة الزجاج بقت احسن من الفابريكة ....



نوافيكم بكل جديد