تقييم الm11 من الاول للاخر

[fineart607]

+++++++++++++++++

[hemaa_82]

الحر السخيف لما باظ التكييف

السلام عليكم

يوم الثلاثاء اللي فات ... ماشي الصبح غلي اكتوبر الساعة 6:45 صباحا رايح الشغل كالعادة .... و كالعادة برضو قرصت بعد الملف اللي عند رمسيس في الوسعاية اللي عند منزل شبرا و منزل 15 مايو ... المهم ... خدت الغرزة وانا علي 140 و اذ فجأة بوم .... هبدة من اللي قلبك يحبها ... العربية رزعت في الارض و كأني لبست مطب ....!!!!؟؟؟؟؟ بس علي اكتوبر؟؟؟؟؟

المهم موقفتش ... ولما رحت الشغل لقيت مفيش اثر لخبطات فطنشط ... مانا كده كده نايم اساسا هشوف ايه ....

جيت وانا مروح بقي ببص لقيت الكوتش طلعله دوالي اللي هية البالونة يعني .... رحت عند بتاع الكاوتش ..قالي هية مش جامدة بس علشان الحر الغريب بتاع البلد اليومين دول خليها استبن احسن... و بكدة الاستبن شرف علي الارض ....

قلت الحمد لله جت علي قد كده ....

وانا مروح ببص بقي انا هبدت في ايه .... اتاري حتة من الارض متشاله في مكان لحام الكوبري القديم و التوسيع الجديد .... حته يدخل فيها حجر من احجار الرصيف و يبات مستريح .... قلت الحمد لله ان العربية متقلبتش ولا حصل فيها مصيبة

المهم تاني يوم بقي وانا مروح و الدنيا حر ... قلت يا واد بر نفسك و خدلك نفسين تكييف ... اشغل ... حر.... برضه حر..... لسة حر ..... الكومبرسور مبيلقطش .....
اخص ..... اقفل افتح مفيش .... فتحت الكبوت ... السير راكب ... الفيوزات سليمة .... اومال ايه؟؟؟؟

المهم .... عديت علي الكويت والبلاد العربية اللي في الدقي جنب الشغل .... قالك في ماسورة تكييف مشروخة ... طب يا عم ضمان .... قالك برة الضمان و مش موجودة و هتتلحم و تتشحن فريون باجمالي 660 جنيه ..."380 شحن + الباقي لحام و مصنعيات"
طبعا قلت لا ... قفل العربية بس اشوف الماسورة الاول....
رحت لقيتهم بيقولو يبقي تدفع كشف 60 جنيه .... طلعت علي مكان الاستقبال بقولو الدفع هنا؟ قالي حضرتك عملت ايه؟؟؟ قلتله ولا حاجة ... مش هصلحا الا علي الضمان في ابو رواش و لو مرضيوش هشتكيهم في حماية المستهلك ....
الراجل قالي طب لحظة ... و سابني و بعديها ب 5 دقائق رجع قالي العربية طلعت و حضرتك مش هتدفع حاجة علشان التلف مش بفعل فاعل ...؟؟؟؟؟ طب ينفع تقرير ؟؟؟ اه ممكن ...
المهم خدت التقرير و طلعت اكلم الضمان في التليفون ...

الوضع كذا كذا ... قالولي نحولك علي مدير الضمان ... كل ما يحولوني الخط يقع ...
بدأت اتنرفز ...... قمت كلمت محمد ابراهيم "و له خالص التحية و التقدير والشكر" من ابو الفتوح في الادارة ... و هوه المسؤل عن مواضيع حماية المستهلك و كان بيتابع معايا ايام القربة ....

المهم فكرته بيا و شكرته و الراجل بشوش ما شاء الله الله يباركله .... قالي اساعدك في ايه ؟؟؟ حكيتله ....قالي طب روح اكشف وان شاء الله تبقي ضمان و خير ....
كلمت الصيانة احجز في ابو رواش يوم الحد علشان السبت شغالين بس اجازة ضمان .... مفيش مواعيد قبل الثلاثاء .....

كلمت محمد تاني قالي طب انا هكلمك .... 10 دقائق و لقيت البنت اللي كانت بتقول مفيش مواعيد قامت مكلماني و حجزالي الاحد الساعة 9 ....

رحت .... غيرو الماسورة .... شحنه التكييف ببلاش
عملت صيانة 30 بدون زيت و فلتر "تربيط" ب 95
رجلشت فرامل اليد ب 40
حجزولي في خدمة العملا قلب ولاعة .... و اشتكيت من تزييقة سلك مكنة زجاج قدام شمال"بتاع السواق... قولت يشحموا الجراب بتاع السلك ...... حجزولي واحدة جديدة ... و ان شاء الله اركبهم خلال صيانة ال 30 " تغيير زيت بس بقي "

بجد انا حاسس بفرق ... مش عارف دي اخلاق الثورة بقي ولا خوف الثورة ....

بس اكرر .... محمد يا ابراهيم ... الف شكر .... يا ريت لو حد يعرفه يقوله



اتمسوا بالعافية

[hemaa_82]

كنت خايف التكييف يطلع مفسي بعد التصليح بس الحمد لله من قبل و من بعد .... رجعت تلاجة زي الاول ما شاء الله ....

نوافيكم بكل جديد ان شاء الله

[maxman]

قطع غيار m11

شباب انا سمعت ان قطع مش موجوده حتى فى التوكبل
حد يعرف الكلام ده صح او غلط
ياريت حد يفدى ؟

[samer_geo]

ألف مبروووك علي العربية
و ألف شكر علي التقييم الممتاز

[maxman]

ya gam3a 7ad ye3raf 7aga 3n qeta3 el 4yar
ya reet elly ye3raf yfedny besor3a
shokran moqdaman

[karimbow1]

العربيه دي جميله وربنا يبارك لك فيها ، بس فيها عيب قاتل جدا بالنسبه لي وهو ان مفيهاش مسند لايد السواق ، يا تري ام 12 فيها مسند ولا برضه فيها نفس العيب هو المسند ده ممكن يركب ويكون شكله شيك ولا صعب؟ يا ريت اللي يعرف يقول لي يا جماعه لاني بفكر في العربيه دي قوي

[hemaa_82]

شباب انا سمعت ان قطع مش موجوده حتى فى التوكبل
حد يعرف الكلام ده صح او غلط
ياريت حد يفدى ؟

المفروض ان توحة مظبط ... والا مكنش عرف ينزل ال m12 لان هيه هيه العربية ... مفتكرش هينزل عربيتين من غير ما يأمن قطع غيار لل2 ..... غير ان من مكتب قطع الغيار كان المفروض في شحنة داخلة اخر شهر 7 ... مش عارف دخلت ولا لا ....

و كده كده ربنا ما يحوجنا لقطع غيار ابدا قادر يا كريم

العربيه دي جميله وربنا يبارك لك فيها ، بس فيها عيب قاتل جدا بالنسبه لي وهو ان مفيهاش مسند لايد السواق ، يا تري ام 12 فيها مسند ولا برضه فيها نفس العيب هو المسند ده ممكن يركب ويكون شكله شيك ولا صعب؟ يا ريت اللي يعرف يقول لي يا جماعه لاني بفكر في العربيه دي قوي

والله انا لما بحط المج بتاع العربية بسند عليه و مبحسش بنقص :) ... و اكيد في سروجية يعرفو يفصلولها لو الموضوع فارق معاك قوي ... و لو وصلت لجديد ابقي شاركنا :)





كل سنة وانتوا طيبين رمضان علي الابواب

[hemaa_82]

هبوط في الايقاع الحيوي ولا نحس ولا ابتلاء من الله ...؟؟؟؟ ربنا يستر بقي

الموضوع بدأ من قبل العيد.... بالتحديد يوم الخميس اللي الاتنين اللي بعده بدأ العيد...نزلت بعد الشغل يوم الخميس و معايا زميل .... فتحت الانذار ... زميلي فتح الباب الوراني و حط شنطته علي الكنبة ..... قفل الباب... عادي ... فتح الباب القدماني و دخل قعد عادي ....فتحت بابي انا عادي.....
اللي مش عادي بقي ان بمجرد ما زميلي قفل الباب لقينا الزجاج الوراني بوم ....بقي بودرة....

عوضنا علي الله ..... طلعت وانا مروح علي الثلاثي في جمال عبد الناصر في الحرفيين ... عندك يا عم ..؟؟؟؟ شاف في المخزن لقاه بس طلع امان مش جريش .... يكام يا سيدي ؟؟؟ ... ب 480 ... طب فاتورة ضريبية علشان التأمين؟؟؟؟ يبقي يزيد 48 ضرايب .....
ركب يا سيدي ......

وهما بيركبو لقو حتة من كعب كباية في الشنطة .... تقريبا وقعت علي الازاز و ده اللي خلاه يتلكك و يعمل السرطان اللي نزله الارض........


قلنا الحمد لله و قدر الله و ما شاء فعل ......

عادي بقي ..حكة يمين ... ولا شمال العادي بتاع البه........ قصدي البنيئادمين في بلدنا ....

جيت بقي الخميس اللي فات علي طول قلت يا واد اطلع روح اقعد مع مراتك والعيال في الساحل ....
هب طلعت من الدقي علي محور صفط اللبن علي الصحراوي علي العلمين علي القرية .... الطريف كله من 160 - 190 كيلو في الساعة زي الفل ....
دخلت القرية ... وصلت تحت العمارة ... بهدي علي المطب قبل اليوترن بتاع الجراج ...اسمع اْءءءءءءءءءءءء و الاقي بوم .... و اي اللي بيحصل ده ....؟؟؟؟ عيل رقيع عنده بتاع 14 سنة سايق عربية لانوس لبس المطب و الرصيف و طار فوق و حبكت ينزل علي الاكصدام الورانر بتاعي .....
انا طبعا من شدة الخبطة نازل متوقع الاقي العربية هاتش باك ...الحمد لله لقيت الشنطة و الفوانيس سليمة ... الخبطة كلها في الكصدام .... اكصدام فبر و ستارة و علب و الشنطة من تحت العلبة اليمين لجوة علي خفيف.....

كلمت والده و قالي ولا يهمك و تحت امرك في اللي التوكيل يقوله ....
وديتها الاحد اول امس .... و التأمين عاين امبارح .... و ربنا يكرم بقي و ابقي احكيلكم علي اللي بيحصل اول بأول ان شاء الله


ربنا يرحمنا و يرحمكم و يستر علينا كلنا و يكفينا شر الطريق

[hemaa_82]

صحيح ..... لقيت العربية لما بتجيب ال 180 علي الرابع و يكون ال rpm قرب 6000 .....بتعما ال 100 كيلو ب 20 لتر ؟؟؟!!!!!!!!!!

ايوة ..... 20 لتر لكل 100 كيلو علشان تجيب 180 علي الرابع و تفضل حارق


في حين لما تجيب ال 120-130 علي الخامس و يكون عدد اللفات 2500-2800 بتعمل 7.5 لكل 100 كيلو

7 و نص لتر لكل 100 كيلو ....

الفرق حوالي 13 لتر فيكل 100 كيلو .... علشان تمشي 180 -190 بدل 120-130

احساس السرعة حلو اه صحيح بس مش لدرجة 26 جنيه لكل 100 كيلو ......



الحاجة التانية ...... العربية ما شاء الله اللهم بارك صاجها فعلا جامد .... اللانوس جابت كبوت و رفرفين و فوانيس و المقص اليمين اتكسر من الرصيف والمطب ....
انا كله علي بعضه اكصدام جوة و برة و بعجة خفيفة في مكان العلبة اليمين اللي محمل عليها الاكصدام و لله الحمد

[huss2000]

معلش يا كبير اللي يجي في الريش بقشيش المهم انت والاسرة وبخير

[hemaa_82]

ربنا يباركلك ... الحمد لله علي كل حال

[firstknight_eg]

قدر الله ما شاء فعل

والحمدلله انها جت علي اد كده

[fineart607]

ربنا يحفظ كل اماوى اليفناوى

[ooooosooooo]

معلش والحمد الله انك انت والاسرة بخير والف سلامة......وابقى طلع حاجة لله ...وشكلك كدة محسود