تقييم الm11 من الاول للاخر

[hemaa_82]

السلام عليكم ...

من ساعة ما غيرت التيل وانا حاسس بتقل في العربية بس فضلت اقول لنفسي التيل بيطبع ...المهم جت امبارح وانا في صلاح سالم و الدنيا زفت قامت قافشة علي حق بقي .... دخلت التعاون لقيت ميكانيكي ...فك يا عم .. فتح وقالك عايزة طقم اصلاح بستم ....قولتله لا يا معلم افصلي الفرامل علي الفردة دي....جاب مسمار و تيله بفتلة و حطه جوة ماسورة الباكم و فعلا فصل الفرامل و العربية مشيت علي 3 عجلات فرامل ....
كلمت محمد رشاد بتاع المتحدة و قلتله قالي شرفنا 10 دقايق و هتتحل...
رحت النهاردة فكوا العجلة و شحموها و خففوا رجلاش فرامل اليد و بقت حلاوة الحمد لله ...جم في الحساب كام قالولي لا احنا اسفين اساسا ان حضرتك عطلت و مفيش اتعاب ....
حتي استاذ محمود حسين مدير المركز قالي ممكن نركبلك الاكصدام المكسور ببلاش بس انا كنت مستعجل فقلتله بعدين بقي اجيبلك الجديد تركبهولي ....

نوافيكم بكل جديد ان شاء الله

[kimocyc]

أستاذ hema_82 مبروك الصيانة..

وسؤالي: دي اول مرة تجربة لزيت شيل 5w40 ؟؟ عايزين تقرير لو اول مرة استخدام بعد موبيل 1..

[bassem.naguib]

ازيك يا هيما عامل أيه ... ويا ترى المركز ده (المتحدة) كويس ولا أيه النظام .. وهل هو شغال في كل الصيني (بي واي دي جاك ، شيري ...إلخ ) ولا اسبرانزا بس .. ويا ريت العنوان بتاعه بالتفصيل الممل .

[hemaa_82]

السلام عليكم ....

بالنسبة لزيت شيل .... هيه اول مرة فعلا .... صوت المتور مكتوم سنه صحيح انما مش للدرجة الفظيعة يعني ....عامة ادينا لسه قدامنا 10 الاف كيلو و نحدد ان شاء الله

بالنسبة للمتحدة ...بيشتغلو في اي عربية جديدة .... وانا هناك كان في بي واي دي بتصلح كنترول "دفع 700 جنيه ...تاكسي ابيض" ... كان فيه فيرنا ...كان فيه تويوتا يارس متدشملة حادثة...
المكان صعب الوصف شوية ...انت لو جي من دائري الهرم اتجاه المعادي...وانت علي محور المنيب ...قبل ما توصل علي النيل المركز هيكون علي اليمين جنب الدائري تماما بس مالوش نزلة ....بيطلعولك حد ينزلك ...

لو هتنزل منك لنفسك و للسهولة تعمل ايه ...؟؟؟

تنزل نزلة الكورنيش التانية بتاعة اللي راجع من حلوان ..تطلع الطلعة التانية علشان ترجع علي الدائري كأنك جاي من المعادي للمنيب ...تنزل النزلة اللي كأنك هتاخد يو تيرن تحت الدائري ....تعدي النفق تحت الدائري...تمشي مع الشارع يمين ...لما تلاقي نفسك كأنك داخل تاني نفق تمشي شمال مع الدائري ...هتلاقي عمارات في وشك ...تمشي شمال لحد ما هتلاقي دخلة يمين بين عمارتين ...تدخل هتلاقي الطريق كأنه فلاحين و الدائري بيكون علي يمينك ...هتلاقي جامع و ملعب كورة نجيل صناعي و بعديه المركز

[hemaa_82]

ده فيديو يو تيوب بيوضح الطريق

‫المتحدة لصيانة السيارات الطريق للمركز من محور المنيب‬‎ - YouTube

[hemaa_82]

السلام عليكم

انا كنت قلتلكم اني جبت الاكصدام ب 250

المهم خدته السبت اللي فات و طلعت علي المتحدة ...

اشتغل في العربية صنايعي سمكرة اسمه عبد العزيز"زيزو"
فك القديم ...فك الشبكتين ...فك الفانوسين..فك شبك الفوانيس... فك الكاسح..فك الكارتيرة التحتانية منه ..فك الصدادات اليمين و شمال ...فك النمرة و الحامل بتاعها
ركب بقي كل اللي فات ده بكلبساته كلبس كلبس من غير ما ولا واحد يتكسر ما شاء الله
ثبت كل جزء بمسمار واحد لزيادة التأكيد و لعدم التحرك تاني لان الشبكة التحتانية بالذات كانت بتريح لجوة
ثبت الكصدام مكانه بعد ما عدل خبطات بسيطة في الرفرفين علي البارد
ركب الكارتيرة التحتانية في الاكصدام من جوة و ربطها في الصدر من تحت
ظبط كارتيرات العجل بالذات الشمال لانها كانت خارجة من دوران الرفرف
طبعا غسل الحاجات اللي فاتت و هية مفكوكة
خلصنا ...

كشفت علي العربية بالسكانر بتاعهاعلشان مرتين في الدوران الصبح كانت بتدور مبرجلة لمده 4 ال 5 ثواني ...طلع ان في 3 اخطاء موبينة ...سلك بوجيه مهزوز...ظبطناها

الحساب بعد 3-4 ساعات

150 جنيه ......
سألت م/ محمد رشاد نرجلش الهاند علشان مشوار اليد طويل بس بتمسك كويس ...قالي نستنا لحد صيانة ال60 علشان البستم اللي كان قافش يكون اشتغل 100 % كويس ...كدة كدة الهاند بتمسك علي فكرة

بصراحة ...لسة مش شايف الغلو اللي الناس بتتكلم فيه ....
العيب الوحيد بعد"بضمة فوق ال ب" المكان و سوء النزلة للمركز ...غير كده بجد حلاوة و يستاهلو الشكر

[aftr]

انته عملت الكلام ده فى مركز ايه ياهيما ومبروك التجديد انا عندى نفس المشكله
كشفت علي العربية بالسكانر بتاعهاعلشان مرتين في الدوران الصبح كانت بتدور مبرجلة لمده 4 ال 5 ثواني ...طلع ان في 3 اخطاء موبينة ...سلك بوجيه مهزوز...ظبطناها
بخصوص عدد لفات الموتور بخصوص عداد ال rpm علي السلانسيه ....
الطبيعي و المفروض انك اول ما تدور العربيه الصبح مثلا يكون ال rpm فوق الواحد بشرطه و بعد دقيقه مثلا ينزل علي ال الواحد و بعد دقيقه كمان او ديقتين يتظبط السلانسيه و صوت الموتور يهدي و ينزل ال rpm لتحت الواحد بشرطه مفيش الكلام ده عندى خالص هل مشكله رشاشات ولا طرمبه بنزين ولاحساس كهربا انا رايح بكره تكنو سيرفس 2 اغير كالون الباب عشان السنتر بيعلق عندى انه شايف وفى حاجه كمان فى صوت فرقعه بتحصل الصبح المصدر بيكون من حاجه جنب فلتر الهواء حاجه بلستك على شكل بوق

[hemaa_82]

المركز اللي هوه المتحدة
البوق البلاستك ده غالبا مدخل الهوا بتاع الفلتر


الموبينة كلها ب 350 حسب حسين م الكهربا اللي وصل الجهاز ... و قالي وقتها نجرب بعد التأكيد علي كابلات البوجيهات و برضه قالي طالاما مش بتبرجل خالص و هيه سخنة يبقي حرام نغير الموبينة حتي لو العيب استمر.نغيرها لو بتبرجل علي المشي العادي...بس الحمد لله بطلت تبرجل من يومها حتي الان

[hemaa_82]

برجلت امبارح .... بس غالبا هطنش لانها فعلا كويسة جدا و عادية و هية ماشية ....

نفيدكم بكل جديد اول بأول ان شاء الله

[aftr]

هيما المهندس كشف على العربيه وقال مشكله البطاريه مع ان البطاريه لسه جديده وعدسه البطاريه خضراء هل فعلا البطاريه تعمل كل ده غياب فى الدواره برجله فى الماتور اكنه مش قادر يقوم وصوت فرقعه وعداد rpm
سؤال ياهيما دلوقت انا جبت زيت شيل 10000 انته عارف ان m11 بتاخد 4.5 بالفلتر دلوقت مفيش شيل حجم صغير ازود موبيل وخلاص

[hemaa_82]

انا لما غيرت في المتحدة حطولي الجركن .. و جابوا جركن تاني خدوا منه لتر و حاسبوني علي ال 5 لتر ....

اكيد مش صح انك تزود موبيل بس برضه المتور مش هيفرقع يعني .... حاول تشوف شيل احسن بس لو مفيش حل اخر هيبقي امرنا الا الله بقي.....


بالنسبة للبرجلة ... لو البطارية سليمة فعلا زي ما بتقول يبقي ازاي هيه السبب؟؟؟؟ انا شاكك في الرد ده .... هوه حط العربية علي الاسكانر "الجهاز" ؟؟؟

[alnashar]

معلش فيه استفسار يا هيما بما انك ليك باع طويل مع m11 , انا معايا m12 و زي مانت عارف هيا هيا ام 11 في الميكانيكا و العفشة و كله ............... من ساعة ما جبت العربية و فيها حاجة غريبة , لما ادورها و اطلع بيها قبل ما ادي التاني او لما اوصل لسرعة 20 كم الاقي لمبة الabs و في الاثناء دي قبل ماتنور اللمبة و صادفت اني هديت و دست فرامل بلاقي احساس دواسة الفرامل تحت رجلي غريب اكنك دست على الهوا و تلامس حديد في حديد بعدها بس بعد ما اللمبة تنور بيروح الاحساس ده من الدواسة ,..... و بعدين فيه حاجة كمان , العربية سحبها تقيل قوي و سرعتها على الخامس مش جايبة اكتر من 120 مع الدوسة العادية و على السرعات البطيئة بتكركر زي ماتكون بتجر حاجة بيها او محملها مع اني دايما ببقى لوحدي سايق

ياريت تقوللي ايه رأيك في الكلام ده و تنصحني بايه لما اروح التوكيل , و اروح انهي توكيل مع العلم ان العربية عاملة 2800 كيلو بس

[aftr]

انا لما غيرت في المتحدة حطولي الجركن .. و جابوا جركن تاني خدوا منه لتر و حاسبوني علي ال 5 لتر ....

اكيد مش صح انك تزود موبيل بس برضه المتور مش هيفرقع يعني .... حاول تشوف شيل احسن بس لو مفيش حل اخر هيبقي امرنا الا الله بقي.....


بالنسبة للبرجلة ... لو البطارية سليمة فعلا زي ما بتقول يبقي ازاي هيه السبب؟؟؟؟ انا شاكك في الرد ده .... هوه حط العربية علي الاسكانر "الجهاز" ؟؟؟

مش عارف حطو الجهاز ولا لا بس فى التوكيل حسبونى على الكشف وقال مشكله بطاريه وبالنسبه للزيت زودت هيلكس الاصفر 5000 انا زودت نص فقط بس الكود 15w40 وكان فى موبيل بس اعلى قولت لا ناخد اقل

[hemaa_82]

بسم الله

البرجلة بتاعت الدوارة بتحصل تقريبا مرة في الاسبوع .... و دايما بتكون العربية باردة ....
مونت عادي من غير رافع الاوكتان علشان احدد هل مؤثر ولا لا ...مفيش فرق
في حاجة جديدة ان احيانا العربية بتسقف و ده محصلش قبل رافع الاوكتان خالص ..... انا شاكك انها من الموبينة بس مش عارف اقرر غير بعد لما التفويلة دي تخلص ......
لما بتسقف لو زودت بنزيز بتطلع بنزين ني من الشكمان و برضه ده بيحصل لما بتبرجل الصبح من الموبينة ......

نفيدكم بكل جديد ان شاء الله

[hemaa_82]

سلام الله عليكم

كنت قلتلكم اني كان عندي مشكلة في الدوارة الصبح احيانا و ان في المتحدة قالولي بعد وضع العربية علي السكانر انها مسجلة موبينة و انها غالبا السبب

بعد ما رحت عند محمد رشاد بعد ما ساب المتحدة و فتح في صقر قريش المعادي و جاب اسكانر للورشة بتاعته قاللي مش مسجلة موبينة خالص اساسا...


المهم بعد ما الراجل جاب اخره و جربلي من عنده كابلات بوجيهات و عزلنا دورة بخار البنزين و جربنا بوجيهات تانيه "و هيه دي بس اللي دفعت تمنها في اكتر من 5 زيارات" , و جربنا موبينة تانية ..... و نتيجة استمرار العربية في البرجلة في الدوارة و هيه بارده ...استنتج محمد ان ممكن يبقي فيه حاجة في وش السلندر و بترشح زيت لما بتبرد ..

انا بصراحة مستريحتش للاستنتاج ده لان اولا العربية مسخنتش مني ولا مرة و برضه احيانا بتبرجل او ترزع و هية ماشية ....


المهم جه في بالي ابانوب اللي في الاميرية وانا مروح من صقر قريش الجمعة امبارح فقولت انا مش هخسر حاجة ...

المهم سألت لحد ما وصلت "مشهور جدا اخر حاجة عند موقف الاميرية"

يا اخوانا دي ورشة ابانوب رد عليا واحد قالي ايوه ...طب انا عندة موضوع كدة في العربية ...قالي طالاما موضوع اناديلك الاسطي .يا اسطي ابانوب ...لقيت واحد شاب شكله صغير جالي قالي خير ...انت يا سيدنا ابانوب قالي ايوه ...طب انا عندي مشكله في الدوارة و احيانا بتسقف ....قالي لعبت في العربية ولا لا ؟
قلتله غيرت بوجيهات و سلوك و سديت دورة بخار البنزين و لسه نفس الموضوع ...

قالي طب دور ....دورت
زود بنزين ...زودت
قالي تعالي كده حاول تفك غطا الزيت بتاع المتور.... جربت لاقيته مشفوط علي الاخر ....

قالي بص انا هفك حاجة و الغيها علي ما تجيبها ....
واداني مشترك في ايدي اشتريه ....المهم تجرب بقي الغطا بتاع الزيت بقي مهلبية...

نزلت جبتله مشتركين و احد جديد من عند الملك في الحرفيين و واحد استيراد من عند شيخ طه في الحرفيين برضه و المستخدم اغلي ....

ركب المستخدم .....جربت العربية النهاردة الصبح ....حلاوة ..... و جاري التأكيد من عدم ظهور المشكله خلال السبوع ده ان شاء الله ....سواء مع الدوارة او التسقيف مع المشي ....

بس العربية والمشترك متشال عبارة عن طيارة مش عربية