كل ما يخص مازدا 323 موديل 82 (اعطال.قطع غيار.كماليات)

[uhlphp]

جبت المقصات بكام ياباشا؟ وياباني ولا تايواني؟

انا اشتريت المقصات بـ 220 جنية من عند ابو زيزو ( تايونى لان مفيش يابانى بينزل خالص ) .

اما سبب تغير المقصات كلها لان الجلب المصرى بـ 30 جنية ووحشة جداً والجلب التيلاندى بـ 90 جنية ( الطقم 8 قطع للمقصين ) يعنى تقريبا نصف ثمن المقصات .
بجانب حالة المقص هل مخبوط او معوج لان فى الحالات دية كبس الجلب لن يحل المشكلة كلها ولذلك فضلت انى اشترى المقصات واريح نفسى مرة واحدة .

[uhlphp]

انا برضة لسة مغير جلب مقصات امامى مش خلفى
ماغيرتش المقصات كلها
العفشجى ماقالش هتفرق فى اية الحتة دى؟

ممكن اعرف جبت الجلب بكام ونوعهم واية الاسباب القى خليتك تغيرهم .

واعتقد ان العفشجى مطلبش انك تغيرهم لان المقصات الامامية كبيرة وجامدة اقوى وصعب يحصلهم حاجة بسهولة .

[aturkia1]

السلام عليكم ورحمة الله وبركاته
شكرا على الموضوع المفيد الرائع
لو تكرمتم اريد الاسعار الاتية

الزجاج الامامى\ انواعه
البطارية\ انواعها
فلتر الهواء
مفتاح الاشارات والمساحات والنور
مكن رفع الزجاج

شكرا لكم جميعا

[thedeveloper87]

البطاريات:
أولا - بطاريات سائلة:
1. النسر فارتا (تجربتي وممتازة) السعر: 220 جنيه
2. كلورايد (سمعت إن هي مش قوي) : مش عارف
ثانيا - بطاريات جافة:
1. AC Delco (صاحب العربية اللي قبلي كان جايبها قبل ما يبعها بسنة وشهرين تقريبا وباظت من أول يوم أنا خدتها) دي سعرها 300 وحاجة.
2. فارتا الألمانية ودي غالية شوية. مش فاكر بكام
نصيحة: جيب بطارية سائلة واهتم بصيانتها ، هتعيش معاك أكتر من الجافة.

* فلاتر الهواء:
1. فلتر هواء ياباني : 35 جنيه
2. فلتر هواء مصري: 15 جنيه

النور العالي والواطي تقريبا اللمبة بجنيه

بالنسبة للزجاج الأمامي أنا مش عارف أنواع بس فيه نوع ب 110 ونوع تاني ب 220.
النوع اللي ب 110 لما بيجيله سرطان الزجاج لاقدر الله بيتفرتك علطول.
لكن النوع التاني أبو 220 بيمسك نفسه.

ولو عايز بتاع قطع غيار كويس للمازدا فيه واحد اسمه مجدي مازدا في شارع ترعة الجبل - حلمية الزيتون.

[aturkia1]

الف شكر ياباشا على الرد


ياترى حد عنده كتالوجات العربية دى انا دورت كتير على النت ومالقتش حاجة وفيه رابط هنا فى المنتدى بس مش شغال

فى حد عنده الكتالوجات دى وممكن يرفعهالنا؟؟

[thedeveloper87]

الف شكر ياباشا على الرد


ياترى حد عنده كتالوجات العربية دى انا دورت كتير على النت ومالقتش حاجة وفيه رابط هنا فى المنتدى بس مش شغال

فى حد عنده الكتالوجات دى وممكن يرفعهالنا؟؟

العفو ياباشا على ايه.
أنا دورت على الكتالوج بتاعها على النت لحد لما غلبت.
وكلمت صاحبي معاه العربية دي من الزيرو بس مش عنده الكتالوج.
فلو وقع في إيدي إن شاء الله هرفعه هنا.

[mohamed777]

ممكن اعرف جبت الجلب بكام ونوعهم واية الاسباب القى خليتك تغيرهم .

واعتقد ان العفشجى مطلبش انك تغيرهم لان المقصات الامامية كبيرة وجامدة اقوى وصعب يحصلهم حاجة بسهولة .

انا كان عندى دربكة جامده فى المطبات وروحت للعفشجى وقالى الجلب بايظة
وفعلاً شوفتهم كانوا متقطعين على الاخر
بفضل الله جبت الجلب يابانى 70 جنية والامور اتظبطت شوية

[mohamed777]

وفى معلومة مهمة جداً عرفتها من العفشجى ويمكن اغلبكم عارفها وهى ظبط ضغط الكاوتشات بيفرق فى الاحساس بالمطبات
انا كنت ظابط الكاوتش على 30 والعفشجى وهو بيجرب العربية ومن غير ما اقولة قالى انها فيها هواء زياده وقالى اظبطهم على 28 صيف وشتا
وفعلاً حاسس بفرق فى نعومة المطبات

[agwaa]

السلام عليكم إخواني الكرام

سؤال ومطلوب إجابته بسرعة إذا تكرمتم ....

حد جرب يركب لعربياتنا دي ماكينات زجاج كهرباء .. لأني نويت أتجنن وأعملها

[mohamed777]

السلام عليكم إخواني الكرام

سؤال ومطلوب إجابته بسرعة إذا تكرمتم ....

حد جرب يركب لعربياتنا دي ماكينات زجاج كهرباء .. لأني نويت أتجنن وأعملها

باين انه مافيش حد ركب زجاج كهربة
بس انا بفكر اركبة لانى تعبت من الاكر

[uhlphp]

ممكن اعرف التكلفة الاجمالية للزجاج الكهرباء فى حدود كام

[agwaa]

ممكن اعرف التكلفة الاجمالية للزجاج الكهرباء فى حدود كام

أنا دفعت له عربون 200 ومنتظر وصول المكنتين ...
وأعدكم أقول لكم على التكلفة الإجمالية لما أركب .

[agwaa]

باين انه مافيش حد ركب زجاج كهربة
بس انا بفكر اركبة لانى تعبت من الاكر

بص يا عم محمد ..
أنا تعبت من مشاكل الأكر كالتالي :
- الأكر المتاحة بلاستيك والشرشرة بتاعتها بتتلف كل شوية وبالتالي تغيرها كل شوية هو صحيح الأكرة رخيصة ( 5 جنيه وفي التوفيقية ) بس ما هو رخيص مع التكرار بتبقى المحصلة في النهاية تكلفة وكمان علشان تسيب شغلك وتروح التوفيقية وكل شوية دة عذاب يا إما هتشتري لك دستة كل مرة تنزل فيها التوفيقية _ ماهو فلوسنا كتيرة وموش عارفين نصرفها فين
هههههههههههههههههههه ( و طبعاً تلف مشرشر الأكرة أخف وطأة من تلف مشرشر ترس ماكينة الزجاج ) .
- وكل دة ناهيك عن الإحراج لما حد بيركب معاك ويلاقي الأكرة بايظة أو موش موجودة أو حتى واقعة على الدواسة .
- لما تهرب من وقوع الأكرة وتركب التيلة الحديد للأكرة بتقطع في فرش الباب وإللي محزني إني لسة مركب فرش جديد للأبواب الأربعة .
تعالوا نقارن ونوازن بين الغلبة دي كلها مع مزايا وعيوب ( أيوة عيوب ) المكن الكهرباء _ ما هو العاقل إللي يحسبها صح _ ولا إييييييييه
المزايا :

راحة _ نزاهة _ موش قادرين على الزيرو وبلاويه فبنحاول نجمل الواقع [gdwl]( كن جميلاً ترى الوجود جميلاً )[/gdwl]

العيوب :

- تكلفة أعلى قد تصل إلى 500 جنيه ( وموش جندي ولا بندق زي ما الناس بتقول وكأن كلمة جنيه عيب ولا عار مثلاً ) .
- كما يقال أن المكن طالما موش راكب فابريقة بيقلب ( يعني المكنة تتوقف ولا تتحرك ) وإنت وحظك .. عطل بقى والزجاج مفتوح ( وهنا الكارثة ) يعني إن شاء الله هتفرش جنب العربية وتقعد جنبها أوالمكنة إتعطلت والزجاج مقفول ويا سلام لو الدنيا صيف والحرارة عالية ....
لكن الحاجة إم الإختراع ( وعلى فكرة أنا كان ليا تجربة سابقة وناجحة في الكراسي الأمامية حبقى اقول لكم عليها بعدين بس إنتم فكروني ) .
سامحوني على الإطالة بس أنا كنت فاضي شوية فحبيت أعرف الناس الدنيا في الموضوع دة ماشية إزاي ... وأسرد القصة كاملة وحصرياً .. ومجاناً .. وبدون تشفير ...

[thedeveloper87]

على العموم ربنا يتمملك بخير موضوع زجاج الكهرباء ده.
بس ابقى طمنا عملت ايه والزجاج شغال معاك ازاي.
وياريت لما تعمله إن شاء الله ترفعلنا صور للزراير بتاعت الزجاج (معمولة إزاي يعني)
علشان لو كده أنا هعمل موضوع الزجاج إن شاء الله.
وجزاك الله خيرا م/ أحمد.

[agwaa]

ربنا يبارك فيك يا هندسة
وأكيد أول ما أنتهي من المشوار هبلغكم على طول
بس على الله الراجل يصدق معايا