Tweet
المشاركة الأصلية كتبت بواسطة muslimah_dentist
مشاهدة المشاركة
نكمل مع بعض حكايه وليمه الاشرار.....
ولله الحمد كنت فى فتره بشتغل فى مصنع فى منطقه شبرا الخيمه.....
وكان الراجل صاحب المصنع بيعزنى جدا وبيستأمنى على حاجات مبيأمنش عليها غيرى....
المهم جينا فى رمضان من الاتنين اللى حضرتهم فى المصنع وكان كل سنه صاحب المصنع يشترى شنط رمضان ويفرقها على كل العمال والموظفين ....مش بس كده...كان بيعمل مائده إفطار امام المصنع للمساكين...
جه الشخص المسئول عن المائده دى مسافر السنه دى اسكندريه يفطر اول اسبوع مع عائلته فى اسكندريه....
طبعا صاحب المصنع طلب منى ومن محاسب زميلى نقوم بالموضوع ده بدل الشخص ده وطبعا كان الموضوع إختيارى واقترح اننا نبدل الايام مع بعض أنا وإسلام زميلى....
وإحنا إجتهادا مننا فى طلب الثواب نوينا نحضر احنا الاتنين الفطار كل يوم ونشتغل مع الناس بإيدينا ...يمكن ربنا يرحمنا يوم القيامه أو يزود فى قلوبنا الخشوع والمهابه لجلاله...وأهو علاج لجمود القلب اللى الواحد بقى فيه...يعنى لما اشوف احوال الناس اللى حتى الاكل مش قادرين عليه...أعرف نعمه ربنا عليا.....
أحكيلكم بقى كان النظام ماشى إزاى فى ترتيب المائده دى.....
أولا....الطباخ أو الطباخه اللى بنتفق معاه بييجى ويبدأ الشغل...
ثانيا....الجزار يبعت اللحمه.....
...بنتين او تلاته بيساعدوا الست فى التجهيز.....
قبل ما نعدى النقطه دى....
الجزار كان بيبعت أسوء لحمه ممكن تشتريها.....يمكن عشان صاحب المصنع كان استاذ فصال والجزار زى ما بيقولوا متعرفش تضحك عليه....وفاكر كويس يوم ما اللحمه جت والبنات شكوا فيها لان لونها كان مايل للأزرق وريحتها مش ولابد..ورجعناها وهددناه اننا مش هنشترى منه تانى ...بعتلنا لحمه نظيفه وحمرا كمان..
الست اللى كانت بتيجى تطبخ كانت بطريقه ما بتسرسب من اللحمه او الفراخ بدون إذن .....او تعمل لنفسها صينيه محترمه وتروح بيها البيت بجانب الاجر المتفق عليه.....
البنات بقى ..طول النهار خناق وكل ما الاكل يطلع ناقص ملح او الرز سواه مش كويس او أى حاجه....يتخانقوا ان كل واحده ممديتش ايديها فى الحاجه دى...
بيخلص الطبيخ ونبتدى نوزع الوجبات فى اطباق....
كل طبق عباره عن رز وقطعتين لحمه وسلطه وطبيخ كوسه او لوبيا او فاصوليا....
او مكرونه وربع فرخه وسلطه خضرا...
وطبعا التمر بيتنقع وبيبقى فى تمر هندى للى يحب ..وبيتصب فى الكوبايات على صوانى كبيره ويتوزع مع الوجبات....
Comment