"عيادة طب الاطفال للإستشارة

[Eng. Rafy Samy]

نصيحة هامة وعاجلة للجميع ... د/محمود ارجو التعليق

احد اصدقائي ابنه في العناية بقالة يومين بسبب ( قطمة فلافل ) السبب انيميا الفول ( مع العلم ان الاب والام والجدود لا يوجد لديهم انيميا الفول ( يمكن في اجداد الاجداد )

انصح بالتوجة لأقرب مركز تحليل لعمل تحليل انيما الفول لأطفالكم (g6pd) التحليل تكلفتنه 40 جنية وبياخد يومين (48 ساعة)
مش حنخسر حاجة بس نتأكد انهم بخير

ربنا يبارك فيهم ويحفظهم ويحميهم من كل مرض ..

تقبلوا تحياتي

[د.محمود صلاح]

ربنا يكفينا شر المرض ... ويكتب له الشفاء

لو عندك مقدرة وتقدر تعمله مافيش مشكلة بالذات لمن يعانون من الانيميا ..

وهذا التحليل هو خطوة من عدة خطوات المستخدمة لتشخيص حالة انيميا .

[hemalotfy]

السلام عليكم

ازاي حضرتك يا دكتور محمود وربنا يبارك فيك ويوفقك لما يحبه ويرضاه

عندي استشارة بسيطه لبنتي نورسين 8 شهور

* من شهر تقريبا اكتشفنا ان عندها في صدرها تحت الحلمتين كولكيعة(انا مش عارفلها اسم) قد حباية البسله كده او يمكن اصغر شوية جامدين ومبيوجعوهاش لما بنضغط عليها سالت دكتور صاحبي في التليفون قالي ده لبن وعصره ليها ! بس احنا مرضيناش نعمل كده ليكون فيه خطورة ولا حاجة
رحت لدكتور جراح شافها قال لا ده مش لبن ولا هرمونات لكن للاسف مقلش هو ايه وكتب لنا مضاد حيوي ومرهم هيموكلار وقال الموضوع ده هياخد شهر لحد ما تروح
احنا اديناها اول 3 ايام المضاد الحيوي وبعد كده بطلناه والمرهم بندهن منه مره او مرتين في اليوم والحال كما هو

ايه راي حضرتك

[د.محمود صلاح]

هتحتاج مراقبة ومتابعة مع دكتور جراحة كويس .. مش هقدر اديلك رأي قاطع . وربنا يطمنك عليها

[hemalotfy]

الـف شكــر يا دكتور محمود

[Sh_sunsea]

السلام عليكم - ازيك يا دكتور - يارب تكون بخير يارب

كنت عايز أستشير حضرتك في نقطة صغيرة كده - ابني بدء يعضعض في أي لعب - وبينزل لعاب كتير - فالرأي العام الي بيتقال يعني ان هايبدأ يسنن

فأنا كنت بفكر أجيب عضاضة ليه - سواء عادية - أو أحاول أبحث عن الي بتتحط في الثلاجة علشان تبقى باردة لتخفيف الألم - فأيهما افضل - وهل صح اني أجيبهم ولا ده ممكن يعمل له مشاكل أو حاجة - وهل فيه مواصفات معينة ليهم

وشاكر جدا لحضرتك

[د.محمود صلاح]

طبعاً رحلة الأسنان حتى تبرز من اللثة بتبقى مصاحبة بنوع من الضيق والألم عشان كده الطفل بيستحلي يعضعض اصابعه ويده .. موضوع تبريد العضاضة أول مرة أسمع عنه .. بس المعلومة اللي اعرفها ان الثلج بيبطل اشارات الألم بالفعل .

بعض المسكنات الموضعية بتريح الطفل ولكني لا أفضلها

[aymanmaly]

السلام عليكم
لية استشارة عند حضرتك يا دكتور
انا لية بنت شهر 11 القادم تتم 7 سنوات
المشكلة فى تغير او تبديل الاسنان
السنتين الاماميتين فى الفك الاسفل تم تبديلهم و طلعو حاجة بسيطة جدا و ماكتملش نمو السنة المستبدلة من اكثر من خمسة اشهر مع العلم ان و احدة منهم تم شيلها عن طريق طبيب اسنان
و من حوالى شهرين سنة امامية من الفك العلوى بتتلخلخ بسيط بس من اسبوع كدة بدات الاسنان الامامية فى الفك العلوى كلها تفرق بين الاسنان
فارجو افادتى بالرأي المبدأي للاطمئنان
و بعد كدة ارجو النصيحة متابعة الموضوع دة مع طبيب اطفال ولا اسنان
ولو اسنان ترشحلى طبيب معين لانى معرفش طبيب اسنان اطفال كويس
شاكر اهتمامك

[Sh_sunsea]

طبعاً رحلة الأسنان حتى تبرز من اللثة بتبقى مصاحبة بنوع من الضيق والألم عشان كده الطفل بيستحلي يعضعض اصابعه ويده .. موضوع تبريد العضاضة أول مرة أسمع عنه .. بس المعلومة اللي اعرفها ان الثلج بيبطل اشارات الألم بالفعل .

بعض المسكنات الموضعية بتريح الطفل ولكني لا أفضلها

أنا كنت قرأت عنها - وكلمت صيدليات سيف هنا - قالتلي آه تقريبا عندنا ..؟؟
فلسه هاروح أشوفها - الي فهمته وحاولت أوصله للصيدلية - انها بتبقى عضاضة بس محشية نوع من أنواع الجيل - توضع في الثلاجة علشان لما يعضعض فيها تبقى باردة على اللثة -

الي فهمته من حضرتك ان العضاضة بوجه عام مافيش ضرر منها - كنت خايف اصلي انها تساعد مثلا على اعوجاج السن أثناء خروجها - وده الي كنت عايز أطمئن من حضرتك ليه - أنا هاجيبها كده أجربها وربنا يسهل

شاكر جدا لاهتمام حضرتك يا دكتور

[د.محمود صلاح]

هي ليها مشكلة >>

النظافة وانها بتلم ميكروبات حتى ولو كنت حريصين على نظافتها ,,

أما بخصوص اعوجاج الأسنان فده بيبقى من السكاتة وحلمة الببرونة أثر منه عن العضاضة

[Sh_sunsea]

هي ليها مشكلة >>

النظافة وانها بتلم ميكروبات حتى ولو كنت حريصين على نظافتها ,,

أما بخصوص اعوجاج الأسنان فده بيبقى من السكاتة وحلمة الببرونة أثر منه عن العضاضة

تعرف يا دكتور إيه الرائع في الموضوع ده
مش سهلة اني أروح للدكتور وأحجز معاد وأنتظر - ومشوار رايح ومشوار جاي علشان أسئلة على حاجة (شكلها بسيط) بس شغلة بالي - الحاجات دي الواحد بيقعد يدور على ناس عندها خبرة - أو تجربة من فترة قصيرة بالموضوع ده - علشان ياخد منهم رأيهم - وطبعا الآراء بتبقى مختلفة اختلاف السماء والأرض

فحضرتك بتمثل ملاذ بالنسبة لي بصراحة في المواضيع دي - رأي أخوي ولكن موثوق فيه جدا - ربنا يجازيك خير بصراحة على مجهودك هنا

بالنسبة للعضاضة - هخليها تغيرلها - كل ما تيجي تغيرله وأمرنا لله

[د.محمود صلاح]

ربنا يحفظلكم اولادكم من كل سوء

[Sherif Khalifa]

السلام عليكم

ابنى سنة و نصف من حوالى 12 يوم بيعانى من نوبات كحة ببلغم اثناء النوم و بقية اليوم رشح
الكحة و الرشح كانت بتروح و تيجى يعنى يوم مفيش او بسيط و كذا يوم كتير

بعد استشارة الطبيب اكد لى ان معنى 12 يوم كحة بالصورة دى تعنى حساسية فى الصدر

هل دا صحيح ؟
و كيفية التشخيص الصحيح للحساسية؟
و هل لو فعلا حساسية هل تمثل خطورة و نسب شفائها اية بمشيئة الله

[د.محمود صلاح]

حساسية الصدر ( الربو الشعبي أو الأزمة التنفسية ) ممكن تيجي على هيئة كحة وفي الغالب بتبقى مصاحبة بتزييق في الصدر ( صوت صفارة موسيقية مع الزفير ) .

تشخيصها اكلينيكي بواسطة الكشف الطبي في الغالب وأيضا مع استبعاد الأسباب الأخرى المشتركة في نفس الأعراض , وتتميز بزوال الصوت مع استخدام موسعات الشعب .

التاريخ العائلي يلعب دوراً أيضا , كما أن الإصابة بأمراض حساسية أخرى مثل العين والجلد والأنف تساعد في تشخيص المرض .

الريو الشعبي له تدرجات حسب الشدة وحسب خطة العلاج ,, الغالبية من الأطفال بيزول عنهم المرض ( حسب التاريخ العائلي من الأب فقط أو من الأم والأب سوياً )

[نور القمر]

لو كان لا قدر الله حساسية فعلا بادر بعلاجه فورا عند طبيب متخصص في حساسية الصدر
لان الحساسية اعراضها بتزيد مع اي تراب او دخان ويبقه صوت صدر الطفل عالي ومسموع ومحشرج وبيعاني فعلا من التنفس
يوسف ابني كان عنده حساسية وراثية وقعدت فترة حوالي سنة الخبط مع دكاترة الاطفال في العلاج واتهرى ادوية وحقن .. كل مرة يتشخص على انه دور برد عادي اونزلة شعبية وكان عمره زي ابنك تقريبا لحد ما ربنا كرمنا بدكتور صدر وحساسية ممتاز اسمه محمد شاهين في المهندسين وربنا شفاه على طول ومجالوش حساسية تاني من ساعتها ودلوقت عمره 4ونص