الموضوع: التقييــــم الشامـــل لهيونداى النتــــرا 2012 ومقارنتها مع هـــوندا سيفـيـــك 2012

السلام عليكم

المشاركة الأصلية كتبت بواسطة semsem kane

بس لما وجيت بقى عملت الكلام على السيفيك 2010 ال vti هاقولك انسى السيفيك 2010 افضل بمراحل من الالنترا 2012 وعن تجربة ( مسألة الشكل ازواق ودية وجهة نظر حضرتك ) بس فية حاجة عايز اقولها شكل الالنترا حلو انك تبصلة اول مرة بعد كدة مافيش الجاذبية اللى تخليك تبص عليها , بعكس شكل السيفيك 2010 تحب تبص عليها حتى مع مرور 5 سنوات على نزولها الاسواق وانتشارها فى الشوارع ودية بردة وجهة نظرى

مش لدرجة مراحل يا استاذ سامح فين المراحل دى , ياريت مانديش الحاجه اكبر من حجمها خصوصا اننا بنتكلم فى فئه من العربيات الفروق بينها مش مراحل ولا حاجه وكل واحده ليها عيوب ومميزات , والسيفيك ممتازه ومن افضل العربيات اليابانى بس هى مش اكورد عشان نقول مراحل

المشاركة الأصلية كتبت بواسطة semsem kane

بالنسبة لاجابة سؤالك هجاوب علية بمنتهى البساطة , زى بالظبط سر الانتشار الرهيب للفيرنا

هل دة مقياس انها عربية حلوة اكيد لأ طبعا بس زى ماقولتلك هيونداى وكيا لاعبين لعبة حلوة اوى وهية حاطين عربيات فى متناول ظروف المواطن المصرى عشان لو واحد معاة مقدم 50 الف وعايز يجيب عربية ومايقسطش كتير مش هيلاقى اختيار غير الكورى قدامة وفيها اوبشن كويس وبتتباع بسرعة لو حب يغير

بالنسبة بقى للخليج وامركيا لما اركب العربيات اللى بتنزل هناك اقدر افيدك ساعتها يمكن الاختلاف مابين هنا وهناك بيخليوهم يركبوها

وبعدين ياباشا نصيحة منى السوق المصرى لا يتم تحديد لية اى هوية لانة ماشى على المعتقدات القديمة ,- احنا ماشيين ورا كلام التجار يقولك ارفع الاسعار تترفع الاسعار نزل الاسعار تنزل الاسعار , يقولك دية حلوة تلاقى الكل جابها , يقولك دية وحشة تلاقيها بتتباع برخص التراب ,و هاتلى واحد كبير راكب النترا وقولة دية كام حصان هيقولك ماعرفش + ضحك المبيعات على الزباين عشان يبيعوا وطبعا كلة بعمولتة , الناس اللى بتشترى العربية من غير حتى مايجربوها كل دة دليل على ان المستهلك المصرى بيجيب اى حاجة وخلاص , لكن اللى بيبقى لية متطلبات فى العربية صدقنى هيبعد عن الكورى نهائى يعنى لو واحد عايز ( محرك قوى + ثبات + اعتمادية بجد + عربية رياضية بمعنى الكلمة ) هيبعد عن الكورى نهائى ومعظم اليابانى , مش هقولك عشان يبانى يبقى تمام , لأ طبعا فى عربيات يابانى كتير الواحد عارف ان مستوى الكورى افضل منها بدون ذكر اسماء

ماشى اللى بيركبوا كورى مش فاهمين وعشان رخيص وعلى اد ايديهم , طب واللى بيشترى يابانى عشان الماركه او العلامه بس هو دا اللى فاهم ؟

طب هانبعد عن الكورى ( النترا - سيراتو ) ومعظم اليابانى طب هانجيب ايه وبكام ؟ فى نقطة مهمه جدا فى الشراء بيتاخد بيها فى كل دول العالم , القيمه مقابل السعر , دفعت كام اخدت بيه ايه

طيب بعد اذنك كدة ممكن تقولى اية الاوبشن اللى موجود فى الالنترا اللى ب135 الف اللى بيقولوا عليها ( full option - autamtic transmission )

ب 132,500 فئة GL فيها 2 ايرباج و ABS

ب 138,500 فئة HighLine فيها ايرباج و ABS وجنوط وفتحة سقف

ب 144,000 فئة GLS فيها 2 ايرباج و ABS وجنوط وباركنج سنسور وحساس مطر وتكيف اوتوماتيك مش فاكر ايه تانى

فولى لودد ب 156

المشاركة الأصلية كتبت بواسطة semsem kane

طبيعى ان كل عربية ليها مميزاتها وليها عيوبها ومعاك ان سعر الهوندا غالى جدا بس المشكلة انها فعلا عربية عيوبها تكاد ان تكون لاتذكر واهم مميزاتها ( محرك قوى - ناعمة - عفشة كويسة جدا- ثبات عالى جدا - معمرة جدا - شكل جميل - اوبشن كتير ورائع ويرضى جميع الازواق والمتطلبات - مواصفات امان عالية - بها كل وسائل الامان - شكل مميز وجذاب - خامات نظيفة جدا وتقفيل فى منتهى الروعة - استهلاك بنزين ممتاز ) دية السيفيك هاتلى بقى واحد يهتم بالحاجات الطفيفة اللى هقولها ودية العيوب ( منخفضة شوية ودة عيب فى شوارعنا مش فى العربية وعموما العربية فى كل الاحوال مش بتحك غير مع الحمولة + مطب خاطىء - رجة خفيفة اثناء فصل وتشغيل التكييف فقط - قطع غيار بيقولوا عليها غالية ومش هعرف اقولك انها غالية غير لما تسمعنى كدة حاجة من قطع غيار الالنترا - الكنبة الخلفية ضيقة شوية لو واحد طويل هو اللى بيسوق ودة موجود فى كل السيفيك على فكرة لان العربية بيبقى سقفها منخفض ) غير كدة مش هتلاقى دية السيفيك بأختصار

معلش انتوا بقى اللى القسم بتاعكوا معلوماتة قليلة جدا عن اى عربية

وانا شايف ان ال135 الف جنية دول مايدفعوش فى عربية فاضية اوبشن وكورى , لان اللى حضرتك الاوبشن اللى انت قولتة دة مايفيدنيش بحاجة

( تكييف تاتش : ولا لية اى لزمة - بلوتوث : طييب ماى حد ممكن جيب كاسيت ب400 جنية يكون فية شاشة + gps + blutooth + usb + aux اية المشكلة يعنى

حساس مطر : على اساس ان مصر كل يوم بتنزل فيها المطرة او كل شوية واحد بيرش مياة على الزجاج ولا الواحد مكسل يرفع بس الاوتو بتاع دراع المساحات

معلش ياريت بردة توضيح اكتر لاوبشن الالنترا 2012 الفئة ال 135 الف جنية

طب ودهان السيفيك ؟ والعزل ؟ وتزييق البطاحات ؟ مش دى برضه عيوب اشتكى منها ملاكها مش انا

المشاركة الأصلية كتبت بواسطة semsem kane

اولا : فتيس الالنترا مش محتاج 6 سرعات لانة اولا زود الاحساس بالنقلات + ان المحرك اصلا بيجيب 200 بالعافية , ومحرك الهوندا كويس جدا علية 5 سرعات بيأمنلة تسارع ممتاز وعدم الاحساس بالنقلات ودة اللى يهمنا

ثانيا : مش عارف انت ازاى بتقول على عفشة الالنترا انها ناعمة ياريت تجربها تانى وتحكم

ثالثا : شكل السيفيك 2010 شكلة رياضى وجذاب جدا وعصرى . بالمقارنة بشكل الالنترا اللى حلواة بس يفتقد للجاذبية

رابعا : السيفيك فيها كل عوامل الامان standard فى كل الفئات , مش زى اللالنترا اللى فئة واحدة بس اللى مجتمعة فيها مواصفات الامان ( وهما abs- 2airbag ) بس , والاوبشن اللى كل مرة يضحكوا بالناس علية ويدفعهوم فلوس اكتر بكتير

خامسا : السيفيك ال vti فيها كل تستخدمها بجد مش اوبشن وخلاص والاسم موجود فى العربية زى ( نظام ال vsa مساعد الثبات : ودة مهم جدا وبيفرق كتير فى الثبات - paddle shift : مهم جدا للقيادة الرياضية ولية متعة تانية لعدم تشتيت الانتباة - فتحة السقف لاضفاء اللمسة الرياضية على السيارة - ديسكات خلفية موجودة فى كل الفئات مش طنابير زى الالنترا - طبعا بجانب الانظمة الاساسية ( abs- ebd- 2airbag- vsa ) صدقنى متعة تانية خالص

سادسا : السيتى فعلا تمنها غالى انا ماقولتش حاجة بس معلش لو قارنتها بغيرها يبقى هية احسن على الاقل فيها عوامل امان واداء محركها كويس جدا وناعمة جدا وعفشتها فى قمة الراحة ,يعيبها الخامات - غلاء قطع الغيار - سعر اعادة بيع وحش

سابعا : بالنسبة للاسعار انا بدفع 200 الف جنية وعارف انها غالية عليها بس فى المقابل واخد عربية كاملة فى كل حاجة وعلى فكرة هما بس 189 الف مش 200 الف للدقة فى كلامى , لكن لما تاخد بقى عربية ب135 ولا ب138 الف جنية ومافيهاش عوامل امان وعربية متنفضة يبقى اية !!!!!!!!!!!!1

جميل جدا طيب لما احب اركب سيفيك اعمل ايه لازم اجيب مستعمل ؟ فين الجديد بتاع الهوندا ( اللى خيب امال الكل ) وحتى لو قبلت بالجديد واقتنعت بيه هل فرق السعر منطقى ؟

وحتى لو افترضنا ان فى سيفيك VTi جديده ب 190 ينفع يبقى الفرق دا وهل تستاهل تمنها

المشاركة الأصلية كتبت بواسطة semsem kane

هو حضرتك لية كل مااجيبلك سيرة ال paddle shift تجيبلى سيرة السيراتو هو احنا بنتكلم على الالنترا ولا السيراتو , وعموما ياباشا انا قولتلك جرب الpaddle shift بتاع السيفيك والسيراتو وانت تعرف الفرق هتعرف فرق ال response مابينهم

وتانى مرة ياباشا السيفيك 2010 ب 189 الف , والالنترا ب 159 الف جنية انت بترخص هنا وبتغلى هنا

السيتى 118 حصان , الالنترا 128 حصان بس جرى الاتنين وانت تعرف فرق ال i-vtec هيعمل اية فى المحرك , السيراتو 124 حصان دية الارقام الصحيحة

معلش الالنترا الاوبشن بتاعها فقير جدا بالنسبة لسعرها 141500 ,ومافيهاش غير ايرباج واحدة وحبة اوبشن واقسم بالله ولاليهم اى لزمة ليييييييييييييييييييييييي ييييية واى حد يقولى هل يدفع 141500 فى عربية مافيهاش اى وسائل امان ؟؟؟؟؟؟؟؟؟؟؟؟؟

بالنسبة لسعر السيتى ياباشا زى ماقولتلك سعرها مبالغ فية بس مش للدرجة اللى زى الالنترا سعرها مبالغ فية , يعنى زى ماقولتلك سعر السيتى اة غالى بس لو قارنتها بفئتها مثلا ال rb هتلاقيها ب105 الف جنية وفاضية بمعنى كلمة فاضية مقابل دية ب 135 الف جنية وعلى فكرة هو مافيش سيتى دلوقتى استنى موديل 2013 هنشوف هيكون بكام

ولا السيفيك ولا السيتى الاتنين مبالغين فى سعرهم

بس هاتلى عيوب فى السيفيك تخليك تقول يعنى اتضحك عليا وكمان كل دية عيوب وكمان مافيش وسائل امان

بعكس عربية سعرها مغالى فية تماما وكمان فيها عيوب + مافيهاش وسائل امان

وياريت تقولى بعد اذنك اية اللى يخلينى ادفع فى النترا 141500 الف جنية , فى عربية فاضية اوبشن وكمان خامات بلاستيك وفية عندى ال fully loaded ب 159 الف جنية وفيها كل حاجة لان الفرق مش قليل بس اسمك جيبت عربية فيها مواصفات امان , مع العلم ان الفئة اللى ب 141 الف مافيهاش نظام immoblaizer كمان , والفئة الfully loaded مافيهاش مرايات ضم , ولا فيها زينون , مافيش تحكم بالمصابيح الامامية ,

والعربية اللى فعلا قليلة جدا ومش بشوفها هية الالنترا ال fully loaded

ولا السيفيك ولا السيتى مبالغين فى اسعارهم ؟؟؟!!

اولا مينفعش نجيب سيرة السيتى مع الالنترا دى تتقارن بالاكسنت

وبعدين محدش بيجبر حد يشترى الالنترا من غير وسائل امان الزبون هو اللى بيختار , عندك حوالى 10 فئات منهم 4 فيهم وسائل امان اساسى 2 ايرباج و ABS بسعر يبدأ من 132 , ايه المشكله فى السعر ؟ وفين البديل الافضل

المشاركة الأصلية كتبت بواسطة Ahmod

بالنسبة لإنتشار الالنترا فهي انتشرت مش عشان هي افضل من السيفيك او افضل من الكورولا إطلاقا

الالنترا انتشرت اولا عشان اتسوقلها كويس شوف كام اعلان هتشوفه للالنترا وال Rp مقابل كام اعلان للسيفيك !!؟

الاعلان طبعا عامل مهم بس مش هو كل حاجه اللى بسببه الناس بتشترى

ثانيا وده الاهم : ان الالنترا بتخاطب متطلبات الشعب المصري : الا وهي "البلوتوث - حساس المطر - السينسور - فتحة السقف - الفوج لايتس - قطع غيار بتتباع عن البقال - يوم ماتحب تبيع بكرة تتباع من غير ماتخسر كتير ... etc " انما اداء العربية عموما كقوة ماتور - ثبات - وسائل امان ABS/Airbags .. ياراجل بلا امان بلا بطيخ الحافظ هو ربنا "

هى دى متطلبات الشعب المصرى دلوقتى , ماهى موجوده فى عربيات كتير اشمعنى الالنترا مع انها مبقتش رخيصه زى زمان

الالنترا تفوقت على السيفيك فقط في الشكل الداخلي والخارجي والكماليات فقط لا غير !!

لكن كعربية قصاد عربية ماينفعش اني اقارن او احط الالنترا مع السيفيك في جملة واحدة

يااه للدرجه دى

السيفيك محرك اقوى <<< هتقولي دي 130 حصان ودي 122 حصان ازاي !! ؟ هقولك ببساطة بص على الالنترا ال Md كانت 124 حصان في حين السيفيك ال 2010 122 ومع ذلك !! السيفيك كانت بتكتسحها على كل السرعات !! جايز بقى الالنترا احصنة كوري زي مافورميلاتور قال !! ؟ هههههههه

السيفيك اثبت بكتييير ومافيش اي وجه للمقارنة مابين السيفيك والالنترا في الثبات

الالنترا الجديدة على فكرة عفشتها زي الزفت !! ركب فيها 2 ورا وزنهم تقيل حبتين ومشيها في شارع مكسر وسلملي على نفسك وعلى احلى اصوات حك هتسمعها مع كل مطب او حفرة

وعلى فكرة الكلام ده قدام عيني مش افترى او كلام من الهوا النترا 2012 فول لودد شفتها من كتر ماهي ساقطة على الارض كنت حاسس صاحبها مسقطها !! والله العظيم ماكان فيه مجال حتى اني ادخل صباعي مابين العجل والكرتيرات !! ؟ مافيش دقيقتين ركنت على جمب لقيت نزل منها 3 كانو قاعدين ورا قامت العربية رفعت تاني على الارض

وطبعا كاعتمادية السيفيك افضل واحسن بكتير وهات سيفيك بقالها عشر سنين على الطريق او عاملة كيلو متر عالي وقارنها بالنترا ماشية نفس المدة وانت تعرف الفرق مابين دي كعربية ودي كعربية

عموما انا من وجهة نظري الالنترا على الرغم من سعرها المبالغ فيه الا انها ممكن تكون مناسبة للي بيحب الكماليات والاوبشنز والشكل الخارجي والداخلي وناوي بعد تلت اربع سنين يبيع انما لو واحد عايز يجيبها بحيث تكون عربية العمر مافتكرش انها هتكون مناسبة

ماتنسوش ان العربية 2012 يعني كل ملاكها لسه جايبنها وماكملتش مع حد خلونا نستنى تلت اربع سنين قدام ونشوف اراء الملاك عن العربية هيبقى عامل ازاي

انا مش بقول انها وحشة لكن ماينفعش تتقارن بالسيفيك او حتى بالكورولا

-------------

ماشى دا رأيك وتقييمك مقدرش اكلم , لكن نقطة مينفعش تتقارن دى اللى مش فاهمها بصراحه

بالنسبة للكورولا فانا مش عارف هو ايه اللى دخلها في الموضوع طالما المقارنة مابين السيفيك والالنترا

لكن الالنترا / او هيونداي عموما لسه قدامها ممكن بتاع 10/15 سنة علما تعمل عربية في اعتمادية وقوة ومتانة الكورولا فالاحسن نطلعها برة الموضوع عشان مايبقاش فيه تشتيت ويبقى الموضوع مقارنة مابين السيفيك والالنترا

الكورولا ملهاش اى ميزة غير ان عليها علامة تويوتا ودا بيمثل نسبة 50 % من قرار شراءها من بعض الناس , ال 50 % التانيه انها اعتماديه ودى بقت حاجه عاديه مبقتش حاجه حصريه لليابانى دلوقتى دا كان زمان دلوقتى الكورى اعتماديه زيه بالتجارب مش كلام وخلاص

لكن فنيا الكورولا اقل من معظم عربيات فئتها

الكورولا فى اى مقارنه او ريفيو بتتطلع المركز الاخير دايما ماشاء الله :) ومع ذلك هى الاولى فى المبيعات فى امريكا

المشاركة الأصلية كتبت بواسطة semsem kane

وعشان بس تبقوا عارفين حاجة الفطيم نزل السيفيك بالاوبشن دة لان فعلا العربية غليت برة يعنى الكاملة برة عاملة 23 الف دولار لو حسبتها هتلاقيها عاملة تقريبا 130 الف جنية مع الجمارك والمكسب هتعدى ال 200 الف عشان كدة اقتصد منها كتير

هو الفطيم بيجيب نفس اوبشنز وكماليات ومواصفات امريكا ماعدا الموتور بس ؟