القواعد الذهبية لاختيار زيت العربية.... موسوعة مبسطة لأساسيات زيوت المحركات

**sayed_7439** · 04-04-2014 12:57 PM

جزاك الله خير...............جهد اكثر من رائع................

**elbobmeroo** · 04-04-2014 03:43 PM

شكرعلى المعلومات القيمة. بخبرتك كده ايه أحسن. زيت يدى أداء و

يحافظ على موتور عربيه فيات 32

**borio1704** · 04-04-2014 05:29 PM

المشاركة الأصلية كتبت بواسطة elbobmeroo

شكرعلى المعلومات القيمة.

بخبرتك كده ايه أحسن زيت يدى أداء و يحافظ على موتور عربيه فيات 132

الزيوت اللي في السوق حاليا أقل نوعية فيها ( اللي الكود بتاع الapi بتاعها sg ) معمولة للعربيات موديلات التسعينات وما قبلها

طبعا حضرتك عارف إن آخر فيات 132 وحتى الأرجنتا كانت إنتاج 1987 تقريبا.. وبالتالي أي زيت موجود في السوق ومن أي ماركة هيكون مناسب جدا ومفيهوش أي مشاكل

طبعا.. الزيوت اللي كود الapi بتاعها أعلى هتديك حماية وأداء أعلى.. بس سعرها أغلى بكتير

فيه حاجة مهمة جدا.. ابعد عن أي زيت تخليقي .. خصوصا لو كنتش عملت عمرة للموتور بقالك فترة أطول من 5 سنين.

بس حقيقي حقيقي.. مش هقدر أدلك على ماركة زيت معينة.. ﻹنهم بالنسبة لي كلهم واحد... اختار الماركة اللي تريحك ... بس لما تشتري اختار مكان موثوق فيه علشان الغش.

**memmed_esmat** · 06-04-2014 02:55 AM

طب لومفيهاش احراج........ممكن اعرف ايه هو الزيت المناسب للنيو صني؟؟ وهل mobil1 و shell altra مناسبين للعربيه ولا لا؟ وخصوصا اني بحس ان العربيه تقيله في السحب غير اي نيوصني سوقتها وصوتها بيعلى على 2500 RPM ومش عارف التقل ده من الزيت ولا من الفتيس ولا من ايه !!!!!!!!

**borio1704** · 06-04-2014 02:56 AM

المشاركة الأصلية كتبت بواسطة elbobmeroo

سؤال بس أعرف منين الزيوت التحليقيه دى أنا بحط كاتليكس. فلور ده كويس ولا ايه

بصراحة مش واخد بالي من نوع الزيت اللي حضرتك بتحطه... لو تقدر تجيبلنا اسمه مظبوط بالانجليزي أو تصورلنا العبوة من قدام ومن ورا

ولو الموضوع صعب هحاول أبسطها على حضرتك

ببساطة كده.. امسك علبة الزيت وبص عليها

لو الزيت تخليقي.. هتلاقي مكتوب عليها Synthetic بخط واضح وكبير

ولو عايز تعرف كود الـAPI... غالبا هتلاقيه بخط صغير.. غالبا على ظهر العلبة.. وممكن تلاقيه من قدام تحت كود اللزوجة

أعتقد إنك بتدور على زيت اقتصادي ما يكلفكش كتير...

صدقني زيوت التعاون كويسة جدا..وبالنسبة للفيات 132 تقدر تحط فيها أي زيت في التعاون..

بس ما تنساش يكون متعدد درجة اللزوجة.. يعني مش مكتوب عليه SAE 40 مثلا.. لازم يكون مكتوب عليه حاجة زي 20W-50 أو 15W-40.

...

**borio1704** · 06-04-2014 10:51 PM

المشاركة الأصلية كتبت بواسطة lancar

ايهما افضل ياباشا بعد اذنك في نوعية الزيت التخليقي لكيا سيراتو 2014

1- موبيل وان .... بس في ناس بتقول انة بيتبخر فاية راي حضرتك في الكلام دة

2 - شل الترا بس ممكن الواحد يتعب علي مايلاقية بس موجود

3- توتال كوارتز بس في ناس بتقول انة بيعلي صوت الموتور

فاية راي حضرتك وايهما ترشح علمأ باني لسة لم اغير الزيت بعد ولسة لم اكمل 1000 كيلو فاعايز اعود العربية الحقيقة علي نوعية زيت تكون كويسة وامش عليها باستمرار .. .. وايهما تفضل في رقم اللزوجة بما ان حضرتك معاك نفس العربية .. وبارك الله فيك

أنا أؤيد فكرتك في استخدام نوع زيت واحد ... لإني قريت في أحد المواضيع إن الاستمرار على ماركة زيت واحدة أفضل علشان الإضافات اللي في الزيت الجديد ممكن تسبب بعض المشاكل مع بقايا الزيت القديم.. صحيح كمية البقايا صغيرة وممكن تهمل تأثيرها.. بس استمرارك في استخدام ماركة زيت بعينها أفضل بشكل عام من التغيير من ماركة للتانية كل شوية.

المسألة هنا مالهاش علاقة بكون ماركة زيت معينة أفضل من التانية... وزي ما أنا بقول باستمرار.. الفروق بين ماركات الزيوت تكاد تكون غير ملموسة.

بالنسبة لزيت موبيل 1 .. أنا بصراحة مش مقتنع بالكلام بتاع التبخر اللي طالع عليه ده... بدليل إن ناس كتير بتستخدمه ومحدش اشتكى.. والناس اللي اشتكت أظن إن الزيت مش مناسب للاستخدام في مواتيرهم أصلا.

بالنسبة لزيت شيل ألترا.. أنا شخصيا أفضل ما أتعبش علشان أشتري الزيت.. خصوصا إذا ما كانش فيه فروق محسوسة زي ما قلنا من شوية

بالنسبة لزيت توتال كوارتز.. فكتالوجات سيارات كيا عموما بتوصي باستخدام زيوت توتال كوارتز... وأنا شايف إن لو الزيت ده متوفر بسهولة.. اشتريه... انت كده ماشي زي الكتاب ما بيقول

بالنسبالي.. أنا ما غيرتش الزيت غير مرة واحدة هنا من ساعة ما اشتريت العربية... وغيرته على 5000 كم... حسب ما قالولي في التوكيل وأنا باستلم العربية

رحت في أحد محطات الخدمة التابعة لوكيل كيا وحطولي زيت بترومين a-1 تخليقي مستوى الخدمة بتاعه api sn ولزوجته 5w-30

الحقيقة ما لاحظتش مشكلة مع الزيت.. وصوت العربية (اللي عامل لناس كتير مشكلة) ما اتغيرش.

أنا لو ناوي أغير الزيت .. هحط زيت توتال كوارتز .. والسبب في كده هم مجرد إني أمشي على توصية الكتالوج.. ولو إن الجزئية دي بالذات مش مشكلة بالنسبالي.

حضرتك عارف طبعا إن اللزوجة الموصى بيها في كتالوج السيراتو (لمنطقة الشرق الأوسط) هي:
5w-30
5w-40
10w-30
15w-40
20w-50

يمكن لو لقيت زيت 5w-40 ممكن أجربه ... بس أتوقع تغيير بسيط في سحب العربية.

...

**Ayman_Aly** · 10-04-2014 12:49 AM

المشاركة الأصلية كتبت بواسطة borio1704

موضوع التحويل من زيت معدني إلى تخليقي طالع عليه كلام كتير أنه مش كويس وبالذات لو الموتور كان قديم

طيب ليه كده؟؟؟؟

عشان نجاوب لازم ندخل في شوية تفاصيل علمية :(

بالنسبة للزيوت المعدنية.... فهي مافيهاش مشاكل بشكل عام لما نحط عليها إضافات لتحسين الخواص بتاعتها.

إنما الزيوت التخليقية الزيت الأساسي فيها بيتسمى (بولي ألفا أولفين polyalphaolefin) أو poa، وطبيعة الزيت ده إن الإضافات مش بتدوب فيه ! ! !

وعلشان الإضافات تدوب .. فيه مادة تانية وسيطة (مذيب) بتتزود ... الإضافات تدوب فيها وهي كمان تدوب في زيت الـpoa.

المادة دي بتبقى معمولة من أحد مركبات الـ(إستر ester).

طيب إيه المشكلة؟؟؟

المشكلة الأساسية إن الإسترات مواد مذيبة ... ولما الزيت يشتغل في الموتور تبدأ هي تدوب الرواسب والمواد الملتصقة من الزيوت المحروقة وخلافه، وتفضل موجودة جوه الزيت، وفيه احتمال كبير إنها تسد الفلتر

المشكلة التانية اللي ممكن تحصل... الإسترات ممكن تأثر على الجوانات والأويلسيلات الموجودة في الموتور، وده معناه تسريب وفقد الزيت

بس ده كان واضح بشكل كبير في الزيوت التخليقية القديمة (أول زيوت تخليقية ظهرت في السبعينات)

حاليا.... الزيوت اتطورت، ومبقاش فيها التأثير المدمر ده.... إلا إذا كانت الجوانات والأويلسيلات أصلا تعبانة ومشرخة ... فالزيت هيظهر الشروخ والشقوق ويخليها تظهر بوضوح

طيب إيه الاحتياطات اللي لازم نعملها علشان ما يحصلش معانا مشاكل؟؟؟

أولا: لو الموتور قديم

يعني بقاله كام سنة شغال على الزيت المعدني بس... والخطوات دي هتتعمل قبل أول مرة هتحط فيها زيت تخليقي:

1- لازم نغير الجوانات والأويلسيلات بتاعة الموتور لإنها حتضرب بعد التشغيل بمدة قصيرة، بالذات لو الموتور بقاله أكتر من 5 سنين

2- يفضل يتعمل أويل فلش oil flush قبل ما نحط الزيت التخليقي عشان نشيل الرواسب القديمة

3- لازم نغير الفلتر، ونلاحظ ضغط الزيت وصوت طلمبة الزيت بعد التشغيل مباشرة

ثانيا: لو الموتور جديد

يعني الموتور لسه ما كونش ترسبات كتير والجوانات والأويلسيلات لسه جديدة

* مفيش مشاكل إن شاء الله... هتغير الفلتر وتلاحظ التشغيل وبس

طيب ... إفرض إني حبيت أرجع للزيت المعدني تاني... فيه مشاكل؟؟؟؟؟

أبدا.. بدل وغير زي ما انت عايز .... المهم يبقى موتورك أصلا حالته كويسه

...

شكرا على الموضوع الجامد يا باشا
نيسان صنى 2002
150,000 كيلو
أستخدم زيت شل 15/50
أقدر أستخدم وولفر نصف تخليقى 10/40.. أو غيره
ولو ينفع هل لازم أعمل الحاجات اللى انت كاتبها فى المشاركة أعلاه ولا أغير فلتر وزيت علطول ؟