خلينا نوضح حاجة مهمة..
زي ما قلنا في المشاركة رقم 3 في أول الموضوع... زيت دلفاك فيه منه كذا فئة:
في اللزوجة:
فئة أحادي اللزوجة... يعني لزوجته مش بتتغير زي الزيت متعدد الدرجات اللزوجة... وغالبا حتلاقي مكتوب عليه SAE 40
فئة متعدد درجات اللزوجة... زي زيوت المواتير العادية بتاعتنا.. وممكن تلاقي منه درجة اللزوجة دي 20W-50
في كود الخدمة:
فئة محركات الديزل فقط... يعني كود الـAPI مكتوب عليه رمز الـ(C) فقط.. زي CI-4 أو CF مثلا ... ومفيش عليه أي كود (S).
فئة محركات الديزل/ البنزين: يعني عليه كود الـ(C) وكود الـ(S)
حسب ما أنا فاهم من موقع Mobil لزيت دلفاك MX 111... الزيت ده متعدد الدرجة ولمحركات الديزل فقط
موقع زيت موبيل دلفاك إم إكس 111
المعروف عن زيوت محركات الديزل (وزي ما شرحنا في المشاركة رقم 3) هدفها التنظيف قبل التزييت، لإن طبيعة مواتير الديزل بتطلع رواسب كربونية كتير جوه جسم الموتور، خصوصا إن الاحتراق بيتم عن طريق الضغط العالي وليس عن طريق الإشعال بالبوجيهات
الكربون بيبقى عامل طبقة على الأجزاء المتحركة فبيبقى هو في حد ذاته طبقة حماية للأجزاء المعدنية... بس استمرار تكون الرواسب أكتر من اللازم بيعمل مشاكل ولازم يتشال أول بأول
خلي بالك إن الزيت ده مخصص لمواتير سيارات النقل... يعني هيفي هيفي ديوتي
طيب... محركات البنزين مش بتطلع كل الرواسب دي... عايز تنظف إيه بالظبط؟؟؟
لو زيت دلفاك MX بس (مش MX 111) أقولك ماشي لإنه بيشتغل على محركات الديزل والبنزين
ده بالنسبة للزيت
______
بالنسبة للإضافات... فده موضوع تاني
أصلا... صعب جدا تعرف مكونات الإضافات دي إيه... والمعلومات المتوفرة على الإنترنت في الموضوع ده قليلة قوي.. وعلى فكرة شركة "أبرو" مش هي الشركة الوحيدة اللي بتعمل إضافات للزيوت
المعلومات اللي قدرت أوصلها عن الإضافات ملخصها حاجة واحدة
ما تشتريش إضافات للزيوت
لإنها ... يا إما مالهاش تأثير ... يا إما ليها تأثير مدمر
إزاي؟؟؟؟ وكل الكلام ده إيه؟؟؟
اختراع الإضافات كان له فايدة كبيرة زمان لإن تكنولوجيا الزيوت كانت متأخرة نوعا ما. والإضافات كانت فعلا بتعمل شغل... دلوقتي الزيوت بقت أحسن بكتير... أُمال إيه لزمة كود الخدمة بتاع الـAPI؟؟؟
الإضافات في السوق أحد أربع أنواع من ناحية المكونات
1- إضافات مغشوشة... ودي طبعا مش أكتر من مجرد زيت عادي ممكن يكون مضاف إليه لون أو رائحة أو أي شيء ليس له علاقة بتحسين الأداء
2- إضافات أساسها مادة الـPTFE أو المعروفة تجاريا بـ"التفلون"، ودي المادة الأساسية في أواني "تيفال" المشهورة... ودي مشكلتها الأساسية إنها ممكن تعمل حماية فعلا على الأجزاء المتحركة... بس غالبا بتعمل سدد في مجاري الزيت الضيقة وكمان ممكن تسد فلتر الزيت
3- إضافات أساسها مادة من أحد مركبات فوسفات الزنك (ديالكيلدي.ثيوفوسفات الزنك Zinc dialkyldithiophosphate)
ودي بردو ممكن تكون مفيدة جدا وبتعمل حماية للأجزاء المعدنية بالذات لو المحرك تعرض لأحمال قوية جدا... زي السباق أو جر أوزان ثقيلة مثلا
طيب ده حاجة كويسة جدا... إيه المشكلة بقى؟؟؟
المشكلة إن مركب فوسفات الزنك ده موجود دلوقتي في كل الزيوت العادية تقريبا، ولو حبيت تزود الفايدة وتحط إضافة... المركب (الزيادة) ده هيخرج مع الزيت المستهلك في السلندر ويبقى سبب رئيسي في سدد علبة البيئة بتاعة الشكمان
يعني من الآخر: الشيء اللي يزيد عن حده بينقلب ضده
4- إضافات أساسها مواد مذيبة ومنظفة: غالبا مواد زي الكيروسين والنفتالين والأسيتون... ودي مهمتها إنها تذوب الرواسب من الأجزاء المتحركة... زي فكرة زيت الديزل أساسا.
فكرة إزالة الرواسب ماهياش فكرة سيئة... إنما إضافة المواد المذيبة ممكن تكون زيادة عن الحد لإنك ما تعرفش تحط منها قد إيه... يعني حطيت كفاية ولا بزيادة؟؟؟ وزي ما قلنا.. حطيت بزيادة يبقى بتعمل تآكل زايد في المحرك.. فما بالك وانت حاطط زيت ديزل؟؟؟
بعد المعلومات اللي فوق دي... قوللي انت كده... رأيك إيه؟؟؟
من الآخر... أغلب الإضافات اللي فوق موجودة أساسا في الزيوت العادية... والإضافات دي كانت كويسة مع الزيوت القديمة من 40-50 سنة... إنما دلوقتي... كل الزيوت عليها إضافات كافية تغنيك عن أي مغامرة ما تعرفش نتايجها.
...
المفضلات