الموضوع: إسأل و إطمن علي الفرامل..

سؤال ياباشا انا غيرت تيل الفرامل من اسبوع والفرامل قعدت كام يوم جامده اوى بعد كده حسيت ان الدواسه بعدت عن الأول ومش بتمسك زى الأول رحت لعفشجى قالى اصل التيل مبلط وصنفره ياترى هل ده ليه خطوره ولا عادى يعنى اغير التيل ولا اسيبه ولو سبته فى حل عشان يبقى حلو
وعايز اسأل على حاجه تانى التيل الأولانى كان بيصفر وفى التوكيل شقولى التيل والصفاره راحت فعايز اعرف ايه فوايد شق التيل وعيوبه

من شهر وبتاريخ 28-11-2008

روحت توكيل ميتسوبيشى لحل المشكله اللى تقريبا موجوده عند معظم ملاك اللانسر وهى صوت صفاره عاليه ومزعجه جدااااااا مع الفرمله بالرغم ان التيل اللى كان فيها كان بتاع الفبريكه وكانت ماشيه 25 الف كيلو المهم المهندس قالى مش محتاج يتغير ده يتصنفر ويشتغل فتره قولتلوا لا غيره وخلاص وبالفعل تم تغيره بتيل اصلى وكان سعره 325 جنيه ولونه ازرق ومكتوب عليه ماركه او اسمه sumitomo
وسالت وهو بيركب التيل الطنابير فيها حاجه لا الطنابير سليمه وتمام اوكى راكب التيل والمفاجاءه بعد اسبوع الفرامل بتصفر تانى روحت راح مصنفر التيل والطنابير وراح الصوت واول امبارح رجع الصوت تانى عالى علما الصيانه كانت فى فرع ميتسوبيشى اللى فى بنزينه موبيل اللى امام محطه مترو المعادى مباشره وكده التيل مكملش ال 3000 كيلو والنهارده بعد صلاه الجمعه روحت لميكانيكى معرفه واحد قريبى فك وطلع التيل بيقولى ده ناعم ووحش علشان كده بيصفر اقوله ازاى ده اصلى وتمنه كذا يقولى لا فى نوع تركى كويس انا بستخدمه على طول حركبه وتشوف وفعلا اشتريت التيل ده وكان تمنه 55 جنيه وصناعه تركى وماركه اسمه beser
وطلع يجرب معايا بصراحه والا صوت والا الهواااا راحه اعصاب فزيعه بس المشكله ان حاسس ان الفرامل بقيت اضعف بس هو قالى لسه التيل لما يطبع حتبقى تمام فكنت عاوز اعرف من حضرتكم ايه رائيكم فى الكلام ده مع العلم ان فى التوكيل قالوا ان التيل بيصفر علشان الطنابير عاوزه تتخرط والميكانيكى قالى الطنابير فبريكه وتمام اوعى تخرطها ده من التيل وفعلا كلام مقنع علشان لو عاوزه تتخرط كانت صفره مع التيل التركى ده والا ايه؟؟ ودلوقتى انا ارمى التيل اللى جايبه من شهر ب 325 وسمعت ان غلى بقى ب 425 ومكملش 3000 كيلو والا اركبه واخرط الطنابير والتيل التركى ده لما يطبع حيمسك حلو والا ايه النظام وحيطبع امتى؟؟ وانا شوفت فى المنتدى سحب الهوا من الفرامل ازاى اعمل كده ومين اللى بيعملها ودى بتتعمل ازاى ولما يحصل ايه؟؟؟ معلش يا جماعه صدعتكم من الرغى الكتير ده بس انا اهم حاجه عندى فى العربيه الفرامل وبجد الموضوع ده مجننى ومعكنن عاليا جامد وغلبت مع الفرامل ومش عارف اعمل ايه؟؟؟