الموضوع: إسأل و إطمن علي الفرامل..

المشاركة الأصلية كتبت بواسطة sss2000

السلام عليكم اولا اشكر حضرتك علي المجهود الرائع المبذول في هذا الموضوع انا عندي عربية سويفت 94 لسة شاريها من كام شهر لاحظت ان فراملها ضعيفة رحت لواحد خد هوا من العجل الخلفي فقط ورجلش علي فرامل اليد واصبحت جيدة وبص علي التيل الامامي والخلفي وقلي كويسين ولكن انا حاسس ان الفرامل ضعيفة لا تسعفني اما ادوس في السرعات العالية العربية متقفش بسرعة تحس انها تفضل ماشية فترة قبل ما تقف وانا دايس جامد علي الفرامل يبقي عيب اية دة ولك جزيل الشكر

لا شكر علي واجب

لكن هل بتحس اني الفرامل بتهبط بشكل طبيعي معاك يعني الفرامل تحت رجليك كويسة و لا محجرة يعني تحس انك دايس و زي ما يكون في طوبة تحت رجلك؟؟

لو الفرامل عادية و كله تمام و الراجل قال لك التيل كويس ممكن يكون ضعف في السوست بتاعة التيل و مفيش مانع تراجع علي الماستر العمومي و تشوف الزيت حتي لو منسوبه كويس شوف نوعيته ممكن يكون نوعية رديئة لكن يستحسن تعمل ده عند ورشة فرامل و دبرياج لانه خبرته اكتر من الميكانيكي في الفرامل.
لكن لو الفرامل حسيت انه محجرة يبقي عيب سرفو و لو تحب تضيف حاجة انا في انتظارك.

المشاركة الأصلية كتبت بواسطة Viper911

لاسلام عليكم يا كار لوفر ....
أنا عندي سؤال بخصوص عربيتي السوزوكي سويفت 94 ... العربية أنا رافعها من 13 سنة و لسه مكمله معايا 23 ألف كم و أنا مجتش من ساعتها جنب الفرامل من ساعت ما جبتها من المصنع .... بس الفرامل بحس أنها ضعيفه و حصلي موقف كنت بشد على البحر و اتفاجأت بواحد الله يسامحوا جاي من أقصي اليمين للشمال رحت ضاغط الفرامل على اخرها و العربية الحمد لله و قفت بس بالعافية و من غير مسمع صوت كاوتش ولا حاجة ((يعني العجل مقفش و ده اللى مفروض يحصل و العربية مكنش فيها حد غيري )) مع العلم ان تعاملي مع الفرامل كويس جدا و نادرا ما بضغط عليها جامد و بفرمل بالموتور على السرعات العالية ...
أنا سؤالي المفروض أعمل حاجه فيها مع العلم ان التيل مالوش صوت تماما و الزيت مش بينقص و الفرامل مش بتوصل للأرضية لما بضعطها للأخر و الماستر تمام و كل حاجه فل ...
معلش طولت عليك بس ده عادي في السويفت و لا فيه حاجة
و ألف شكر على الموضوع الجميل ده

مش عارف حسيت من كلامك انه برضه عيب سرفو و حسيت انه مشترك مع العيب اللي رديت عليه قبلك تقريبا نفس الكلام و نفس العربية بس طالما كله تمام عندك و انت بتقول بتدوس بس الفرامل مش بتسعف و مع ذلك البدال مش بينزل للارض يبقي غالبا سرفو و يستحسن تغير الزيت ده لاني العربية مرفوعة بقالها كتير و اكيد الزيت ده مبقاش صالح للإستخدام بس لوكهيد او اللي دايما بنصح بيه و هو بندكس و لو تحب تسال في اي حاجة عن الموضوع ده برضه او غيره انا موجود.

المشاركة الأصلية كتبت بواسطة Viper911

ألف شكر على ردك و معلش تعبينك معانا ...
طيب ليه ميكونش ده عيب في فرامل السويفت بمعنى انها ضعيفة في الأساس زي اللانوس ... معنى أصح ممكن تكون الطنابير أو نظام الفرامل مش قوي فاذا كان فيه تعديل ممكن يتعمل زي الموضوع بتاع اللانوس الى في المنتدى هنا لما غير الطنابير بطنابير نوبيرا ... و على العموم أنا هعمل بنصيحتك و هغير سائل الفرامل بس ياريت ايه هيا أحسن طريقة و الأفضل أروح لمتخصص فرامل ولا الميكانيكي اللى بتعامل معاه هو اللى يعملها ........ و ألف شكر مرة أخرى

بصراحة انا رأيي الشخصي اني المصنع اللي منزل العربية هو ادري واحد بيها و زي ما بيقولوا "أهل مكة أدري بشعابها"
و جايز تكون حكاية تعديل الفرامل دي نجحت في ماركة معينة و ماركة لا و ممكن تنجح في عربية و عربية تانية لا فبنصح بعمل اللازم في الفرامل المتركبة في السيارة و علي كل حال حتي اكون امينا في كلامي سأقوم بسؤال الأسطي لما انزل بعد شوية عن الموضوع ده.

و بالنسبة لتغيير سائل الفرامل ممكن يعمله الميكانيكي بس بتاع الفرامل و الدبرياج هيكون متخصص اكتر طبعا و تقدر تطلب منه بعد تغيير الزيت تعليه الفرامل بعض الشئ و طبعا هو هياخد هوا من نفسه و حتلاقي تحسن كبير إن شاء الله.

المشاركة الأصلية كتبت بواسطة sss2000

الف شكر علي ردك ولكن انا رحت لكزا واحد والعيب زي ما هوا هل تعرف حد كويس تثق فية تدلني علية وجزاك الله خيرا

بصراحة واضح اني العيب ده من العيوب الغير ظاهرة او من العيوب اللي مش بتتعرف بسهولة و لازم يتكشف علي العربية و ردي ليك بعتته في رسالة خاصة لحضرتك.