الموضوع: إسأل و إطمن علي الفرامل..

المشاركة الأصلية كتبت بواسطة maka

.

هو التيل ده موجود للفيورا و اللانوس؟؟؟؟

معلش سوال تانى هو التيل بيتغير كل كام كيلومتر ولا ملهاش علاقة

التيل موجود للكوري و الياباني و الفيات و اللادا و كل الماركات تقريبا.

و بالنسبة لتغيير التيل ليس له علاقة بالكيلومتر اطلاقا عكس كل شئ في العربية يمكن كل شئ بالسيارة فعلا مرتبط بالكيلومتر بس التيل لا لانك ببساطة ممكن تكون بتسافر يوميا و بكدة بتستهلك كل حاجة في العربية ما عدا التيل تقريبا لانك طول الطريق لا تستخدم الفرامل الا قليلا و لهذا فالتيل ليس له علاقة بالكيلومتر ابدا.

المشاركة الأصلية كتبت بواسطة mohamedbarakat

بصراحه يا كار لوفر الله ينور بجد كلها معلومات قيمه وسليمه 100\100
بس ياريت لو نلقي نظره علي بعض السيارات اللي بتكون الفرامل اصلا بتعتها ضعيفه زي الوبيرا مثلا عندي ضعيفه مع ان التيل جديد والمساتر سليمه وشكراااااااااااااااا


محمد بركات

ألف شكر لحضرتك جدااااا لتشجيعك و لكلامك الجميل......
بس بصراحة انا اول مرة اسمع اني النوبيرا بطبيعتها فراملها ضعيفة و انا شخصياً سوقت اكتر من عربية نوبيرا مش عربية واحدة بس بصراحة كانت فراملهم جيدة و ادائهم حلو جداً.
و ممكن يكون عند حضرتك الموضوع كله اني التيل جديد زي ما بتقول فلو كان جديد فعلا و لسه متركب من فترة قريبة فإحتمال يكون لسه مطبعش.
او محتاج يتاخد هوا من الفرامل و ده اللي عامل ضعف في الفرامل.
و لو حضرتك عندك اي استفسار او ايضاح تاني انا في خدمتكم جميعا دائما.

المشاركة الأصلية كتبت بواسطة SuccessCre8or

شكرا على الموضوع المفيد ده ...
ازاى اعرف ان الفرامل عندى مظبوطة ؟
عربيتى فيرنا 2007 ماشية 14500 كم ...

من كام يوم حصل وواحد نرفزنى فى وسط الطريق .. رحت كاسر و ساحب جامد ( قرصت عالعربية ) بس معدتش السرعة بتاعت الأول بكتير يعنى .. و بعدين جبت التانى و دايس بنزيييين على اساس انى عايز اطلع من الزحمة دى بقى..لاقيتلك تاكسي من اقصى اليسار كاسر عليا و داخل يمين ..دوست فرامل عالأخر و العربية مش عايزة تقف! مع العلم انى كنت جبت سرعة 40 كم/س مثلا ..يعنى مكنتش طاير بس الحمد لله فاديته بانى كسرت يمين شوية ( بجد كنت خلاص هدخل فى الإكصدام المدرع بتاعه )

السؤال : اعرف ازاى ان الفرامل مظبوطة ؟ هل لما الواحد يقرص على العربية فى السحب كفائة الفرامل بتقل ؟ مش المفروض ان انا طالما دوست فرامل عالآخر العربية تقف ؟ طب لية موقفتش ؟ مع العلم انى مسمعتش صوت الفرملة الشهير و صوت زحف الكاوتش مثلاً ... يعنى من الآخر حاسس ان فى حاجة غلط!

شكراً

اهلا بيك و الحمد لله انك لحقت العربية.

و ازاي نعرف اني الفرامل مظبوطة؟
سأجيب علي سؤالك ده في رد لوحده حتي يستفيد منه الجميع بصورة اوضح و ستجد الرد اسفل هذا الرد مباشرة.

و من الواضح اني الفرامل عندك واطية و ده ليه اكتر من احتمال:
اولا: يكون الفرامل واخدة هوا و لا زم يطلع منها عشان الفرامل ترجع تعلي.
ثانيا: يكون في نقص في زيت الفرامل و في الحالة دي راجع علي خزنة زيت الفرامل مرة تانية و لو وجدت ناقصة يتضح ان هناك تسريب زيت او تأكل في التيل.
ثالثاً: ان يكون هناك عيب في الماستر العمومي.

فأول خطوة الان هي الكشف علي مستوي الزيت و لو وجد ان مستواه جيد اذهب الي اي ورشة فرامل و دبرياج و أطلب منه اخد هوا من الفرامل و قوله البدال واطي و هو حياخد هوا لو ظبطت يبقي تمام لو لا حيبدا في الكشف علي الماستر العمومي و لا اعتقد اني السبب سيخرج عن تلك النقاط.

كيف أتأكد من جودة الفرامل؟؟

1- يكون مشوارها مش طويل لتحت زي ما هو واضح عندك.

2- (تجربة الفرامل العادية) تاخد سرعة بالعربية و تفرمل فجائي و لو صرخ العجل و توقف العجل عن الدوران يبقي الفرامل جيدة.

3- ألا تكون الفرامل ناشفة زيادة عن اللزوم يعني مشوارها قصير زيادة عن اللزوم و اول ما تدوس العربية تكلبش في الأرض.

4- تكون الفرامل مش محجرة لما تدوس تحس انك بتدوس علي طوبة و مع ذلك العربية مش بتفرمل و لا تتوقف.

5- عدم وجود حدفة يمين او يسار.

6- أن تكون الفرامل مستقرة و استقرار الفرامل بمعني الا تتوقف في مرة و مرة الفرامل تهرب.

7- عدم توقف عجلة واحدة فقط و الباقي لا و عدم توقف جميع العجل و عجلة واحدة لا أو ان تتوقف السيارة من ناحية الشمال فقط او اليمين فقط او من الامام فقط او الخلف فقط.

* و للتأكد من فرامل اليد نضع السيارة علي السرعة الاولي و نشد فرامل اليد و نقوم بالتحرك بالسيارة بصورة عادية و كأننا بنتحرك بالسيارة بشكل عادي لو امتنعت السيارة عن التحرك أو المحرك بطل تكون الفرامل جيدة اما لو تحكرت السيارة و لو بثقل يكون هناك عيب.
و الباب مفتوح لي و لغيري لإضافة المزيد من طرق التأكد من الفرامل لو كان هناك المزيد.

المشاركة الأصلية كتبت بواسطة car_lover

التيل موجود للكوري و الياباني و الفيات و اللادا و كل الماركات تقريبا.

و بالنسبة لتغيير التيل ليس له علاقة بالكيلومتر اطلاقا عكس كل شئ في العربية يمكن كل شئ بالسيارة فعلا مرتبط بالكيلومتر بس التيل لا لانك ببساطة ممكن تكون بتسافر يوميا و بكدة بتستهلك كل حاجة في العربية ما عدا التيل تقريبا لانك طول الطريق لا تستخدم الفرامل الا قليلا و لهذا فالتيل ليس له علاقة بالكيلومتر ابدا.

شكرا..........