الموضوع: انت تسأل وإستشاري منتدى متسوبيشي يجيب (2)

[QUOTE=mfarouk5;3873149069]

المشاركة الأصلية كتبت بواسطة مصراوي جدا

انا عرضت السؤال على المهندس احمد عناني مدير الورشة في مركز الخدمة الرئيسي لشركة مصرية وقال الآتي :
للأسف لازم يتفك وش السلندر ويتشكف عليه وفي ابسط الحالات يتغير جوان وش السلندر بعد ما يكون الوش اتقاس وطلع سليم ومش محتاج تغيير أو قشط
التكلفة تقريبا لو الوش محتاج قشط ويتغير جوان حوالي الف ومائة جنيه تقريبا



بارك الله فيك يا بشمهندس بس انا عندي استفسارين :
اولا انا رحت مركز صيانه المأمون في الاسكندريه وقالي التكلفه اعلي من كده بكتير وهي تقريبا 1000 جنيه جوان و350 جنيه خراط و1000 جنيه مصنعيه ده غير ضريبة المبيعات
وثانيا طلبت منه زيت فتيس ورفض وقالي لازم تعمل الصيانه عندنا لان مفيش زيت كتير وانا محتاج زيت الفتيس ده ورحت الصفوه قالي في زيت تاني ب 30 جنيه الكيلو وكل اللانسر بتحط منه فهل الكلام ده صح ولا لا والتكلفه العاليه بتاعه المامون دي ليه واجيب زيت الفتيس منين علما باني من الاسكندريه؟

الحقيقة مقدرش اعرف التكلفة اللي قالها المأمون مختلفة ليه انما هو شاف العربية وهنا المهندس احمد ماشفهاش وممكن يكون فيه حاجه مختلفة هتتعمل بعد ما يتم الكشف على العربية
بخصوص الزيت فزيت الفتيس ميتسوبيشي الأصلي موجود فقط عندنا في مصرية ونظرا للظروف الحالية وتوقف الشراء من ميتسوبيشي لقطع الغيار فباقي مراكز الخدمة بتستخدم زيت ATF العادي وهو كان بيتستخدم عندنا في اوقات كتير لما بيكون زيت ميتسوبيشي غير متوفر (على فكرة قوانين البلد عندنا تمنع استيراد الزيوت من الخارج نظرا لأن لها بديل مصري)

المشاركة الأصلية كتبت بواسطة bele334001

الف شكر يا بشمهندس طارق ,, على الاهتمام و سرعه الرد ,,
لكن انا للاسف كنت بسرع شويه عن 90 كم و اظن ان مكتوب في الكتيب سرعات اعلى خلال التليين ,,
مش عارف هل في خوف من اللي حصل ده و لا ايه ,,
انا كنت عاوز اتأكد من حضرتك هل مركز الرحاب كافي و كويس بما يكفي لعمل صيانه الالف و لا اروح مركز رئيسي احسن ؟؟
و هل محتاج حجز في مركز الرحاب ؟؟
و معلش لو حضرتك ممكن تقولي تكلفه الزيت و الفلتر كام ؟؟

باذن الله مفيش مشكلة من زيادة السرعة طالما اقل من المذكورة في الكتيب انما احنا بنحب نكون في الامان
مركز الرحاب مركز صغير انما صيانة الألف بتكون بسيطة مش محتاجة المركز الرئيسي
تكلفة الزيت والفلتر 230 + 55 + ض.م

المشاركة الأصلية كتبت بواسطة sey3a

ممكن يا بشمهندس تقولي الفرق بين الشارك / القرش 2009 . الخليجي والمصري
يعني ايه الفرق بين الخليجي والمصري في الشارك + يعني الاحسن ايه وهل المميزات الي يغلب المصري ولا الخليجي خصوصا الكويتي لان كتير بيقولولي هيا دي الاحسن لاني ان شاء الله هشتري الاسبوع ده وقدامي الاتنين المصري والكويتي وبـ 105 الف
مستعمل ممكن رئيك في السعر وهل كتير عليها ولا قليل ولا حلو كدا وشكرا

الكويتي بتزيد كماليات الفانوس الأمامي زينون متحرك والراديو سي دي روكفورد 9 سماعات بدلا من 6 ومنهم سماعه صب في الشنطة الخلفية
انما غير كده العربية هي نفسها

المشاركة الأصلية كتبت بواسطة titomanchester

السلام عليكم يا باشمهندس /
من فضلك كنت عايز اعرف هل تركيب زينون فى لانسر شارك يخرجها من الضمان ,,,, و لو كده ايه الحاجات التانية اللى بتخرج من الضمان
شكرا...

هو احنا في مصرية كنا بنسمح بتركيب الزينون او جهاز انذار او راديو كاسيت في السيارة مع استمرار الضمان طالما بيتم في مركز متخصص ولا يؤثر على وحدة الكمبيوتر وضفيرة السيارة انما طالما الضمان هيتنقل للوكيل الجديد فالأفضل عدم عمل تركيبات لأن ممكن ميوافقش على التركيبات دي ويخرج العربية من الضمان

المشاركة الأصلية كتبت بواسطة memo200545

استفسار للباشمهندس طارق انا كان عندى نص سم فى العجلة اليمين جوة روحت لواحد بتاع عفشة قالى دا فى الكارتيرة وبسبب مطب شديد اتاخد بسرعة شديدة المهم قالى ان حلوا الوحيد اما يجنزر العربية وقالى نص سم مش مستاهل او انوا يقطع المساعد ويحط ورادى ويلحمها تانى فاية راى سيادتك ياباشمهندس واستاذنك فى سؤال تانى انا عندى العربية لما بشغل التكييف بتقطع بمعنى تسحب وشوية تضعف تانى فى السحب فاية راى سيادتك برضو فى الموضوع دا واية الحل بالاضافة ان العربية كلها بتقطع كدا مش عارف ليه والسلانسية عندى على 700 فهل كدة تمام ولا عاوز يتزود ولسيادتك جزيل الشكر

انا عرضت السؤال على المهندس عبد الجليل وقال
الاجابة على السؤال الأول لابد من وضع السيارة على جهاز الزوايا مع الكشف الدقيق على العفشة وبعد ذلك يتم تحديد كيفية التعامل مع السيارة
وبالنسبة للسؤال التاني لابد من الكشف على المحرك نفسه وضبطه اولا ثم يتم اختبار اداء المحرك مع التكييف وتحديد السبب

المشاركة الأصلية كتبت بواسطة bran

الفتيس الاتوماتيك بتاع لانسر مكواه 2001 فيه دقرة جامدة لما بيكون على ال p فقط انما باقى الغيارات تمام فى ناس قالوا ان لازم اشد فرامل اليد الاول قبل ماانقل على p وانا جربت وهو نفس العيب وكشفت على زيت الفتيس طلع كويس ممكن حد يفيدنى من الاخوه الافاضل اعمل اية وايه الحل

انا عرضت السؤال على المهندس عبد الجليل وقال
لابد من الفحص الجيد لتحديد هل هي من عصا الفتيس ولا من داخل الفتيس