"خطيبتى"_اسيبها ولاأكمل_انا تعبت_وخايف!!!.

[ashouhdy]

شوف يا أحمد الجواز دة باكيدج واحدة ذى الوجبة الكومبو كدة

انت مش بتاخد بنت بس لأ بتاخد بنت و اب و ام و اخ وعيلة ... يعنى عيلة بتندمج جوة عيلة لو انت شايف ان العيلتين مش ركبيين مع بعض يبقى بلاش لا عمرك حتعرف تقفل ع نفسك باب و تطنش عيلة و ولا عمرك حتعرف تفصلها عن جزورها


نصيحتى لييك لو انت شايف البنت ممتازة وتستاهل التعب .... شوف اية سبب المشكلة بتاعت اهلها ابتدى أعزم انت و اسأل فى التليفون وهكذا وقابلهم بوش حلو و جميل وشوف فى تغيير ولا لأ

لكن صعب قوى تناسب عيلة انت مش بلعها...

ويارب مكونش ظلمت حد يارب

لو انت مش (مبسوط) يبقى بلاش ومترغمش نفسك ع حاجة وذى ماقلتلك الجواز يعنى انت بتاخد اب و ام و بنت واخ وخال و عيلتين بيندمجوا جوة بعض.

المفروض الخطوبة تبقى اسعد ايام حياتك لو مش شايف انها كدة يبقى أبعد
يعنى ببساطة شديدة لما بترن عليك ولقيت قلبك بينقبض يبقى ابعد

لو عايش ايام سعيدة وطاير وفرحان والموضوع دة بيضيقك 5 دقايق فى اليوم يبقى كمل انت شايف اكتر منا

حاجة تانية واخيرة عشان منذهقش ومحدش جاب سيرتها خاااالص ...

لازم البنت بتكون بتحب وتقدر مامتك جدا جدا جدا جدا و تكون بتعملها بحب بجد ... عشان متجيش بعد كدة تبقى محتار ترضى مين مراتك ولا أمك ... واكيد كلنا بنختار الأم و لازم مامتك بتكون بتحبها وتعتبرها ذى بنتها عشان ترضى عنك وحياتك تبقى كلها سعادة بأذن الله.

راجع كلامى معاك .... شكل خطيبتك مش قابلة اسلوب اهلها نهائى وعايزة تبعد عنهم بأى طريقة ومش حباهم نهائى وفعلا اهلها دول بيطفشووك

كنت لسة سبحان الله بقول لأبن خالتى نفس الكلام ... لو الجوازة حاسس انها معقربة متجادلش وأبعد لو الجوازة ربنا قاسمها لييك حتلاقيها ماشية ذى الحلاوة وذى النسمة ..... لو أنت بتحبها الحب الافلاطونى يبقى استحمل بقى نكد أهلها عليك طول حياتك ... وصدقنى الذنب مش عليك ابدا ومش حتطلع ندل الذنب ع اهلها واللى بيعملوة فى بنتهم. مش لازم تطلع بطل وتضحى لية .... دى حياااااة كاملة والواحد بيجوز دلوقتى مرة واحدة بالعافية وخلاص.... ربنا معاك بس


متجيش أبدا ع نفسك

[i_Am_Legend]

استاذ فارس_فعلا انا كنت متمسك بيها جدا_وخصوصا انها بتصلى الوقت فى وقتة_وبتتخانق معايا لو اتأخرت فى صلاة الفجر_وبتحضر دروس قرآن _بس اهلها زودوها معايا قوى_واهلى كمان مش عاجبهم الناس_بس ساكتين علشان انا مازعلش_ماما_بتقولى يابنى من ساعة ما خطبناها من شهر 3_اهلها ولا حس ولا خبر_دة كلام_وبابا بردة_بيقولى ابوها ما سألش عليا ولا مرة دة كلام_حتى البنت ما بتسألش علينا ولا أنا ولا مامتك_عموما_ لو هى مريحاك يابنى ما تشغلش بالك بينا.

[hazoom2006]

فى حاجة بقا عايز اقوولهالك لما روحت اتقدمت اول مره خالص اهلها كانو بيعاملوك ازاى ودى مهمه جداااااااااا

[heshamzaky]

انت عارف الموضوع دة ماشى لية لان البنت زنت ((( ألحت )) ل ابوها و امها و الاب و الام و الاخ مش عاجبهم و الشواهد دالة على ذلك سحبو العربية و الفلوس لانهم مش عاجبهم كلام البنت بس بيظبطولها مخها شويتين و عيشتكم مش حا تبقى سهلة و اسمحلى لو دخلك مش كبير نسبيا حا تقلب الجوازة ب غم أذا دخل الفقر من الباب هرب الحب من الشباك و اسمحولى يا جماعة انا شايف ان متوسط أعمار السادة الاخوة الزملاء و ليسو كلهم فى حدود 30 سنة و اقل من كدة ممكن جدا يكون عندهم عقل راجح بس خبرة فى الحياة متوسطة شوية و اعذرونى دة مش اساءة لحد و لا تهكم بس الراجل لو حا أنصحة اقولة كلام عن تجربة حقيقية مش اجتهادات نظرية و بس

[fares515]

استاذ فارس_فعلا انا كنت متمسك بيها جدا_وخصوصا انها بتصلى الوقت فى وقتة_وبتتخانق معايا لو اتأخرت فى صلاة الفجر_وبتحضر دروس قرآن _بس اهلها زودوها معايا قوى_واهلى كمان مش عاجبهم الناس_بس ساكتين علشان انا مازعلش_ماما_بتقولى يابنى من ساعة ما خطبناها من شهر 3_اهلها ولا حس ولا خبر_دة كلام_وبابا بردة_بيقولى ابوها ما سألش عليا ولا مرة دة كلام_حتى البنت ما بتسألش علينا ولا أنا ولا مامتك_عموما_ لو هى مريحاك يابنى ما تشغلش بالك بينا.

على فكره حضرتك كان لازم تخاف من أهلها أوي كده لو هي متأثره بيهم وبتروح تحكي لمامتها كل حاجه وواخداها قدوه لكن واضح انها زعلانه من اللى بيحصل ومش عاجبها حالهم فده هيأثر عليك تأثير ايجابي لإنها هتفضل عندها عقده من اللى بيعملوه ومش هتكرروفي بيتها وبالنسبه لموضوع سؤالها على والدك ووالدتك انت ممكن تلفت نظرها بشياكه لكده وطالما هي انسانه متدينه يبقى انت عايز ايه تاني خلاص هي عندها الأساسات اللى ممكن تبني عليها الحاجات الجميله اللى انت عايزها كلها وعلى فكره انا بقلهالك عشان أخلص ضميري انا اعرف واحد زيك كان خاطب واحده ممتازه جدا ومش عارف سابها عشان حاجات تافهة زي كده برضو وربنا رزقو بواحده اهلها ثبتوه تثبيت جامد في الخطوبه وكان حاسس ساعتها انه خلاص مش عايز حاجه تانيه من الدنيا(وكانو بيعزموه وبيسألو وبيتعاملو معاه كويس جدا) دلوقتي الراجل ده حياته اتدمرت تماما بسبب مراته ومتسألنيش ازاي بس انا متأكد انه بسبب الانسانه الكويسه اللى هو كسر قلبها وربنا بيخلص برضو
ملخص الكلام:قدر السعاده اللى انت فيها مش سهل تلاقي حد بمواصفات كويسه زي اللى انتا بتقولها اليومين دول وبالنسبه للأهل نفضلهم وانساهم خالص اعتبر انك خاطب واحده يتيمه مقطوعه من شجره كنت هتعمل ايه ساعتها؟؟هتطلع اهلها من الترب مخصوص يعزموك ويتصلو عليك يقولولك كل سنه وانت طيب؟؟واسأل نفسك ان هما ينفضولك خالص وميسالوش عليك أحسن ولا يقفولك على الواحده ويعايروك بكل حاجه وكل اما تعمل حاجه يحسسوك انك اقل منهم ويكلمو عليك من وراك او من قدامك كلام مش تمام ويتعمدو انهم يطفشوك بالكلام والفعل؟؟
وفي النهاية القرار بايدك ونتيجته لك أو عليك

[i_Am_Legend]

يا جماعة انا اول ما اتقدمتلها كان ابوها مسافر_والكلام كان بين والدتها ووالدتى_ووالدتها كانت بتبلغ باباها فى السعودية_ووافقوا_واقسم بالله انا ما كدبتش عليهم فى حاجة_اتفقنا على العفش_والشبكة وكلة تمام_طيب آمين_اقروا الفتحة لحد ما ابوها ماييجى كمان 3 شهور_فضلنا فى حكم المخطوبين3 شهور_كنت بزورها كل يوم جمعة_4مرات فى الشهر_امها كانت كويسة إلى حد ما_والبنت كانت تقعد تشتكيلى منها _دى بتعمل فيا كذا_دى بخيلة معايا واخويا لأ_دى كذا وكذا_وانا ما كنتش مصدق_لحد شوية بشوية _بدأ _يبان الوحش بتاع والدتها_
طبعا ابوها كان برة_وماعرفش عنة حاجة_ولا اعرف طبعة_اخوها بردة_ماكنتش اعرف عنة حاجة لانى ما قبلتوش كتير_لانى كنت بروحلهم على الساعة 7_كان هو بيبقى قالب يومة_ونايم الصبح_ويصحى بالليل_بكون انا على10 مروح_يسلم عليا وينزل_ييجى تانى يوم الصبح.دى علاقتى بيهم فى الأول.

[hazoom2006]

طب لغايه ما والدها رجع كان المعامله من والدتها كويسة برده الى حد ما ولا لا

ولما والدها رجع معاملته ليك فى الاول كانت ازاى

[i_Am_Legend]

يا هشام بيه_تخيل هى قالتلهم_احمد عايز يسيبنى!_وانتم السبب_بمعاملتكم ليه_قالولها_احنا ماعملناش حاجة_ومش هانتغير_اكيد انتى اللى ضايقتيه او هو مش عايزك_انا:اقسم بالله_انتى زى الفل_وخسارة فيهم _انا اساس المشكلة اهلك_انا متأكد انهم هايقلبوا حياتى جحيم بعد الزواج_والحياة مش مستحملة_وانا عايز اسرة وعيلة_ليه يبقى فى مشاكل_مع الأهل.انا بطبيعتى راجل مسالم _واهلى بسطاء طيبين _ما بيحبوش المشاكل.غصب عنى.

[i_Am_Legend]

طب لغايه ما والدها رجع كان المعامله من والدتها كويسة برده الى حد ما ولا لا

ولما والدها رجع معاملته ليك فى الاول كانت ازاى

كانت المعاملة كويسة يا حازم_علشان مافيش مواقف_تعرفة آه_عاشرتة لأ_يبقى ما تعرفوش_ابوها دة عمل فيا انا واهلى مواقف!يا نهااااار ميتاليك_انا لو حكيتلك عليها هاتضربنى بالنار.

[ashouhdy]

خلااااااااااااااااااااااااااااااااص نهاية القصيدة ... أنت قلتها ... حيقلبوا حياتى جحيم

الواحد بيتجوز عشان ينبسط مش عشان يعكنن نفسة

واولادك يبقوا مبسوطين عند جدتهم و جدهم وانت تبقى مستريح نفسيا

وتروح بيتك عشان تسكن الية ......... والله الحياة ما ناقصة عكننة

[i_Am_Legend]

هاصلى الفجر وارجعلكم_لو هاتناموا نكمل بكرة.

[i_Am_Legend]

يا شهدى"انا نفسى فى جو العيلة_انا الناس كلها بتحبنى_حتى امهات اصحابى_نفسى احس بجو العيلة_نصيف مع بعض_ناكل مع بعض_آخد ابوها وننزل نصلى_امها تبقى زى أمى_وقولها يا ما ما من غير طنط_ييجوا_يقعدوا عندنا_يحبوا الولاد_يهتموا بيهم_كدة_يعنى_انا مش طالب حاجات فى الأحلام_فى ناس كتير جدا كدة_انا عندى اتجوز واحدة ابوها موظف عادى_وامها مش متعلمة اصلا_وعلى قدهم_هايبقوا احسن 1000 مرة طبعا.موضوع اهلها عاملى قلق جبار فى دماغى.

[ashouhdy]

الحقيقة ... ذى ما انا شايفها وكتيير اوى نصحوك .... للأسف ع الكلام اللى قريتة الأسرة دى متنفعكش انا عارف انك طيب و مش قادر تبلع انك تسيب البنت وحتأثر فى نفسيتك عشان انت حاسس ان مالهاش ذنب

بس الصراحة الذنب مش ذنبك واللى جنى عليها اهلها ... اللى انت بتحلم بية مش حتلاقية مع الأسرة دى.

وأوعى تيجى ع نفسك وأهم حاجة رضا أمك و أبوك دى اهم اهم حاجة لما تشوف السعادة فى عينهم من حسن أختيارك والله صدقنى دى بالدنيا كلها. لما تلاقى أمك بتسألك عن خطيبتك وبتحبها وبتجبلها حاجات ذى بنتها حتكون طاير من السعادة ولما أبوك يبقى قاعد فى بيتهم كانة بيتة برضوا ومبسوط وسعيد بيك دى بالدنيا كلها. لكن طباع الناس دى غير طباعك و غير طباع أهلك. أنت نفسك مش مقتنع ... ريح عقلك و قلبك وانساهم... ومتعش دور البطل المقدام المضحى اللى حيضحى بسعادتة وسعادة اهلة عشان خاطر خطيبتة.

اللى ميقدرش أهلك و حيحطهم فوق راسة من فوق و يقدرك ويحبك حتى لو بنتة أجمل وأطيب بنت فى العالم --ميلزمكش--

[sherif_m72]

اولا ربنا يعينك على مشكلتك
انا مش عارف رأيى البسيط اذا كان هيساعد ولا (يزعل)
انا حسيت لما قريت الموضوع من بدايته ان الموضوع فيه (سر ) وبعد اما وصلت فى القرايه لغاية اخر مشاركاتك اتأكدت اكتر من ظنونى
بص ياأبو حميد \ انت خطيبتك انسانه مش وحشه واهلها كمان ناس عاديين بنقابل زيهم الوف والوف في اليوم طبعا مع اختلاف طبائع البشر
المشكله عندك فى خطيبتك انها بعد كل اللى شافته و اللى بيتعمل معاها من اهلها بقه عندها عقده نفسيه ضد اهلها بسبب كرههم للبنات وبتحاول تكره الناس فيهم وبالتالى هما بيكرهم الناس (لكل فعل رد فعل) انا حاسس ويمكن بعض الزملاء برضه حاسين بس محتاجين تأكيد عشان يقولوا رايهم
فكر فى الموضوع بتحليل وقولى انا غلط ولا ممكن اكون صح

[kamalsalem]

في اوروبا والدول المتقدمة البنت بتسيب البيت وهي عندها ستاشر سنة... وممكن تتجوز ومتشوفش اهلها تاني... انا شايف انه هي دي الحياة... بعد كده صلة الرحم دي اوبشن ممكن تعمله وانت سادد منخيرك

وبعدين انا شايف البنت شرياك ومش بتاعة خراب بيوت... ولا ماشية ورا كلام امها... فهقولهالك بصراحة ومتزعلش مني... متطلعش انت الندل في الموضوع... هي تبيع اهلها عشانك.. وانت تبيعها... وفي الاخر هي اللي تشيل الليلة وانت تخلع

الجواز مقرف.. انا عارف ووالله العظيم لو حكيتلك هتحس اني عايش معاك... وكنت قرفان من الاهل جداً لكن هقولك حاجة.. احيانا بيعملوا الحركات السخيفة دي عشان مييبقاش في عشم وعشان انت تلتزم... وهما لو ده اسلوبهم وف نفس الوقت مش عايزينك كانوا طفشوك من زمان.. انا حاسس انه بعد الجواز المعاملة هتختلف

استخير ربنا وان شاء الله هتكمل انا عارف