"خطيبتى"_اسيبها ولاأكمل_انا تعبت_وخايف!!!.

[grumby78]

عزيزي المحتار
احب اكلمك من واقع تجربه شخصيه سابقه وتجارب اصدقائي
المراهنه على انفصال الزوجه عن اهلها بعد الزواج رهان خاسر ... الزوجه بتقترب من اهلها اكتر بعد الزواج خصوصا الام
ثانيا الزواج زي مااعضاء كتير قالوا لايتجزاء يعني ماينفعش تكون نفسيا انت او اهلك غير مرتاحين ومايكونش فيه انسجام وتقدير متبادل
وموضوع بيع العربيه وخلافه انا مش شايف انه مهم يعني لو حصلي مش حاهتم بس يدل ايضا على النظره الماديه البحته للناس دي وده شيء غير مطمئن لان النسب مش فلوس وقدرات ماديه بس
في رايي ابعد عن الناس دي واتجه لمايناسبك في كل شيء ولاتغض الطرف عن حاجات وتقلل من شانها عشان الحاجات دي بتكبر بعد الزواج والبنت في اغلب الاحوال بتاخد قيمها وطريقتها في الحياه من امها تحديدا
الزواج مش فردين فقط لا الزواج عائلتين اجتمعوا على الموده والرحمه واختاروا الانصهار ليكونوا واحد..
دمت بصحه

[vBulletin]

اتصدق باية ؟ بربنا طبعا انا اخوايا متجوز بقالة بتاع 4 سنين بيشوف اخو مراتة كل بين الحين واالاخر وطبعا بيشوف حماتة بس
هما نفعوة باية ؟؟ هما اة كويسسين مع اخويا بس الدنيا مشاغل كل واحد بيبقة مشغول فى حاجتة يعنى المقابلة هيا الى هاتفرق معاك ؟ ولا العزومة ؟ كبر دماغك وفكك من اهلها انتا بعد لما تتجوزو وتخلف مش هاتبقى فاضى تروح لحد من اصلو



هايبقى الشغل والبيت والاولاد ومش هاتلاقى وقت
طب انا هاسئلك سؤال انت امتة اخر مرة شفت فيها عمك ولا عمتك ولا قاريبك ؟ اكيد من زمن بعيد هتقولى لية ؟ هتقولى مشاغل والحياة ياما هما مش بيسالو ............... اعتبر اهلها بقة زى ناس من قرايبك بس احب انبهك لحاجة صلة الرحم واجبة يبعنى كلمتين كل لما تقدر حتى ولو السلام عليكم ياعم اعمل خير وارمية البحر

وانا علاقتى بعمتى زى الزفت بس بردة بكبر دماغى واهة عمة والسلام اهة ياسيدى قرايب وبيعملو كدة هنقول اية بقة
سيبك من النقط الى متجبش دية وخليك فى المهم

بص لو البنت بتصلى وعارفة ربنا يبقى تمام اوى اوى تستخير ربنا وتوكل على اللة وتمشى فى الموضوع عادى ياراجل ياراجل دة كفاية انها بتقولك احنا هنبقى مع بعض وهما فى حالهم واحنا فى حالنا ما اعتقدش فى انسانة شارية الراجل فى الزمن المنيل دة با لطريقة دية

على الاقل تكسب ثواب تدخل الفرحة فى قلبها وبعدين هو انت مش بتحبها ولا كنت بتكلمها كدة وخلاص ؟؟؟؟؟؟؟؟ وانت تاخد الى بتحبك احسن متقع فى واحدة اهها بيحبوك وهيا مش شارياك

ومتسمعش للردود الى بيقولوك سبها دة كلام مش منطقى واعتقد الناس دية ولا هيا متجوزة ولا حاجة بس هما بيكتبوا ردرود

وحتى لو متجوزين اسألهم كدة امتة اخر مرة شاف حماتة ولا اى حد من عيلة مراتة وهتلاقى الاجابة قليلة جدااا

ادينى نصحتك كاخ لية والى تعملة انت حر

[vBulletin]

فية حاجة نسيت اقولها بس الاستخارة واجبة فى الامور الى زى ديى انت صلى ركعتين استخارة وتوكل على الله لو ربنا مش عايزة ليك والله لما تعمل اية مش هاتتجوزوا ولو خير ليك هتلاقى الموضوع بيقرب بتساهيل ربنا والله لو اهلها دول ناس عارفين ربنا مايعملوش كدة ابدا



وياعم اذا كان خدوا منها العربية فكك دة شعب مصر كلة بيفكر كدة مش جديد يعنى ان ابو البنت يفكر ان جوز بنتة انة فى يوم من الايام يضحك عليها دة بيحصل كتير ياخ احمد

وحاجة كمان هل امها وابوها موافقين عليك من الاول ولا كانت موافقة عليك بخصب من بنتهم ؟

[mahmoodallam]

بصراحة موضوع النسب بيبقى موضوع متكامل على بعضه يعنى مينفعش نختار جزء و نسيب الجزء التانى بمعنى ان الواحد بياخد البنت و اهلها و عيلتها كلهم

ما يصح الا الصحيح
المفروض يعملو قسم الخاطبين والخاطبات
ويعينوك استشاري القسم

[mahmoud5777]

يا باشا تخيروا لنطفكم فان العرق دساس
الولد التوتو ده غصب عنك هيبقى خال ولادك
آه ممكن تقاطعه بس لو عمل حاجة غلط بعد عشرين سنة ممكن ميدخلش ابنك شرطة مثلا لأن ده رباط موش هاينفصل ابدا
رأيي سيب الناس دى اللى يق بنته فلوسى متطلعش برة ده موش محترم واللى تقول لخطيبها كدة على ابوها تبقى ناقصة وممكن تروح تقول لأبوها عليك ده بيعمل فيى كذا وكذا
استخير ربنا واركن العواطف على جنب
وربنا يوفقك لما فيه الخير ليك حتى لو انت بنظرتك القاصرة كنت شايفه موش خير

اخوك متجوز من 6 سنين والحمد لله

[م. عصام مهنى]

المشكلة انها مش هتقطع صلتها بيهم لان دول اهلها فى الاول والاخر
البنت كويسة بس المشكلة بعد الزواج هتحن لاهلها ودا هيعملك مشاكل لانك مش بتحبهم يمكن مع الايام يتغيروا أو لما ربنا يرزقوا باطفال اصل الاطفال بتعمل ارتباط ودعم بين الاسرتين .المشكلة هتبقى فيك انت لو قدرت تعمل كنترول على نفسك بعد الجواز وملكش دعوة بيهم ولا تقعد تقولها اهلك اهلك ، هى مش هتضايق دلوقتى بس بعد الزواج دول اهلها برضوا ودى بنت حتحن لامها واهلها .

هى فعلا مشكلة بس الحلو مايكملش يعنى ممكن تلاقى بنت كويسة واهلها مش كويسين والعكس صحيح للولد أو البنت
توكل على الله واستخير ربنا واللى فيه الخير ربنا هيهديه ليه

والله الموفق

[LAMBOZ]

إذا البنت كويسة بجد وإنت ضمنها وشايف إنها شاريك وبتحبك وبقية عليك يبئا اتوكل على الله وهم ممكن يكونوا عمله كده عشان يشوفوا إذا إنت طمعان فيها أو ناوي تنصب عليها مثلا و الصراحة في ناس كتير بتعمل كده وممكن هما الأنين من كده.

معلش عشان العربي البايظ ده :d بس معنديش عربي.

[m_elkhishin]

لو انت شايف البنت كويسه
المثل بيقول

خد بنت الندل وخاصمه

[a_samy]

شوف حضرتك...أنا كنت زيك فى نفس الموقف تقريبا..بس الفرق أن أهلها وبمعنى أصح ,الدتها عشان والدها متوفى كانت كويسه معانا فى الأول وممكن تعزمنا عادى جدا وبتتعامل معانا كويس جدا,,لما جينا لوقت الجد بقى وأبتدينا نشترى العفش والحاجات قلبت عليا قلبه سوده(الأم)عشان كانت عاوزه تمشينى على كيفها وتخلينى أعمل وأشترى اللى يعجبها هيا وطظ بقى فى رأى أنا وخطيبتى.
وللأسف أخو خطيبتى الكبير كان واخد نفس صفها وكان سلبى جدا مش عاوز يناقشها فى اللى بتقوله وبالتالى أنا كمان عملت زيك ويقيت أتجنبه تماما.
ومكدبش عليك أنا فكرت أكتر من مره أنى أسيبها بسبب أهلها لأنى فعلا حسيت أنى حفضل طول عمرى فى مشاكل معاها بسبب أهلها ووصلونى لدرجة أنى أبتديت أتخانق معاها كتير وأعاملها وحش،بس هيا متمسكه بيا جدا جدا وبتحبنى أوى ولقيت أنى مش هعرف ألاقى واحده تحبنى كده.
أنا حكيتلك كل ده عشان أقولك فكر كويس أوى قبل ما تاخد أى قرار وصلى أستخاره كتير وكل يوم وفكر برضو أنك صعب تلاقى واحده تحبك وتتمسك بيك زى ما خطيبتك بتحبك كده.
وربنا يهديك للى فيه الخير والصالح ليك وليها.

[cOrn]

لو تعرف تقنع خطيبتك انها تفكها من اهلها خالص مدام هما مش فارقة معاهم و بيقولولها انها مش هتيجى هنا تانى , اية مش هتيجى هنا تانى دية ؟ هما لاقينها على باب جامع ؟؟ و انكوا تتجوزوا بمعرفتكم و بشروطكم انتوا من غير اى تحكم من الاخرين و تخلى والدتك تعاملها زى بنتها , و الناس التانية اللى مكرهينها فى عيشتها دية تسيبهم خالص و تعرفهم غلطهم و ربنا على المفترى

[i_Am_Legend]

دلوقتى_هى عارفة انى قرفان من الموضوع_وهى معترفة تماما_ان اهلها اسلوبهم مش تمام_وبنائا عليه انا قررت_الإنفصال_هى ما كنتش راضية_وانا مصمم_اهلك دول ما يتعاشروش_قالت دة آخر كلامك_اه آخر كلامى_طيب انا هاقول لبابا وماما_وهخلى حد يقابلك علشان اديك حجتك_راحت قالتلهم_احمد مش عايز يكمل_طيب ليه ومش ليه_انتوا السبب معاملتكم ليه_خنقتة_احنا ما عملناش حاجة ومش هانتغير_وغلطوها_وأقلولها أكيد انتى ضايقتية أكيد قرفتية_وشالوا من عليهم اى اتهام_هى جت قالتلى النهاردة الصبح:طيب يا أحمد ادينى فرصة تانية هاحاول اصلح الأمور_وكبر دماغك من اهلى دول علشان_هما_مش هايتغيروا_بس هاحاول اصلح بردة.
انا:انا كنت واخد قرار نهائى فى الأنفصال_طيب سيبينى افكر كدة_وعموما انا هاديلك فرصة تانية تصلحى انتى بنفسك العلاقة مع عيلتى انتى كويسة دينا وخلقا لكن علاقتك باهلى كمان مش كويسة_هاشوف هاتعملى ايه_بس بردة سيبينى افكر.لأنى مش مرتاح

[أحمد كمال]

طيب انا كنت هاتجنن_عايز اعرف ليه بيعاملوها كدة_لدرجة انى شكيت انها بنتهم_بالتبنى_بس هى نسخة من ما متها_وشبه والدها جدا فى حاجت كتير_وهى وأخوها نفس لون العين.قالتلى احنا عيلتنا ما بيحبوش البنات_طيب ياستى مش لازم يحبوهم_طيب انا بيعاملونى كدة ليييييه_هى:علشان انت خطيبى.!

دي ناس psycho و البعد عنهم غنيمة .....

بص يا باشا

و اسمع كلام اخوك الكبير

و انا متجوز بقالي 3 سنين على فكرة

الجواز package كاملة

البنت بأهلها بأمها بأبوها باخواتها

لان مستحيل تقدر تقطعها عنهم حتى لو هي مش طايقاهم و بتقول لك كده دلوقتي ده كلام

هيحولوا حياتك لجحيم

مش هتعيش حياة اسرية طبيعية كصهر او نسيب

ممكن جدا يعصوها عليك و انت طول النهار في الشغل مش هتعرف تحكم الموضوع ده و لو ما زارتهمش التليفون موجود

---------

انا عارف اللي بيدور في بالك و انك خايف من الفراق و خايف تزعل بعد ما تسيبها و ما تلاقيش غيرها و لا زيها

كل ده كلام فارغ اسمح لي مع كامل احترامي ليك لانك دلوقتي بتفكر بقلبك و القلب عضو المشاعر مش عضو التفكير يعني ما ينفعش تدق مسمار بمفك بدل شاكوش .....

هتلاقي غيرها

و احسن كمان

هتقول لي و هي ذنبها ايه؟

هاقول لك و انت ذنبك ايه؟؟؟؟؟؟

معلش يعني

مصلحتك فوق مصلحة اي حد في العالم ..... حتى ابوك و امك

الانسان الوحيد اللي انت ممكن و لازم تحبه اكتر من نفسك هو ابنك او بنتك غير كده انت اولا

دي مش انانية و لا تكبر

بس انت ذنبك ايه تعيش حياة مفككة مع اسرة سايكو

و بعدين افترض بكرة اتخانقت معاك و سابت البيت و راحت لهم

هتلاقي مين فيهم عاقل تتكلم معاه و تاخد و تدي؟

واحد صاحبي مراته سابت البيت عشان سمعت حماتها بتقول عليها في التليفون "البت بنت الكلب" (و ماكانتش عارفة انها معدية قريب و سامعة) ..... ابوها قال لها انا قابل الشتيمة على نفسي ... ارجعي بيت جوزك مالكيش مكان هنا .... و بعد ما رجعت كلم جوزها خلاه يطلع من شغله عليه و مسكه نفخه ..... بس صاحبي بيقول لي هافضل طول عمري شايله و مقدره عشان رجعها البيت و بقيت باخاف على زعلها عشان ما اكسفش نفسي قدامه .... شوف العقل؟

انت بقى لما تختلف معاها لو اتجوزتها - و سيبك من كلام الحب و الغرام و الانتقام و احنا مش هنتخانق و هنفضل متفاهمين الخ الخ .... انت دلوقتي الهورمونات هي اللي بتتكلم مش عقلك و مفيش زوجين ما بيتخانقوش - مين هينصفك من اهلها؟ مفيش

ترضى اخوها السيس ده يبقى خال ولادك؟

ترضى امها السايكو دي تبقى جدة ولادك؟

ترضى ابوها الظالم الظلام اللي واكل حق بنته يبقى جد ولادك؟

هما دول المثل العليا لولادك بعديك انت و مراتك على فكرة



و بعدين سيبك من حكاية مراتك غيرهم و بتاع

ايام الخطوبة حاجة و بعد الجواز حاجة


للمرة التانية .... اخلع قبل ما تندم حيث لا ينفع الندم

اخلع قبل ما يبقى بينكم اطفال و تعيش بقية حياتك في سجن مكبل باولادك لانك مش هتقدر تسيبهم و تمشي و ممكن بعد فترة توصل لمرحلة انك تكرههم لانك حاسس ان هما اللي مكتفينك و رابطينك فيها

اخلع دلوقتي ببلاش - حتى لو هتخسر شبكة بكام الف و لا هدايا بكام الف - قبل ما الخلعان يبقى بتحويشة عمرك من شقة و نفقة و بلاوي زرقة

اخلع .... انت صغير و العمر طويل قدامك و هتقابل زيها و الاحسن منها .... اوعى تفتكر ان ليس في الامكان ابدع مما كان و بتاع .....


اخلع و الخلعان مش ندالة .... زي ما هو مش ذنبها الظروف المهببة اللي هي فيها مش ذنبك انت كمان .....

[hesham2004]

انا لو مكانك ، حخلع - بلاش وجع دماغ و دور على مصلحتك اولا ، و اختار الى تريحك و تريح دماغك
و ربنا يهديك للى فيه الخير ليك و للصح

[أحمد كمال]

أنا حكيتلك كل ده عشان أقولك فكر كويس أوى قبل ما تاخد أى قرار وصلى أستخاره كتير وكل يوم وفكر برضو أنك صعب تلاقى واحده تحبك وتتمسك بيك زى ما خطيبتك بتحبك كده.

ده بقى اللي انا باقول عليه تفكير بالقلب مش بالعقل

لا هتلاقي اللي تحبك و تتمسك بيك و احسن منها كمان

البنات الكويسين على قفا من يشيل و ما بيصدقوا يلاقوا شاب جاد و كويس و راغب في الحلال

[abou-yahia]

بص
انا مقرتش اغلب ردود الناس اللي اتفاعلوا معاك لاكن حقولك حاجه
الواحد مش بيتجوز البنت لوحدها لا البنت بتيجي هيه واهلها اللي لازم متكونش عليهم علامات استفهام كتير خصوصا في الفتره ديه .
ليه عشان البنات ممكن تكون بعد لجواز غير فتره الخطوبه خالص وطبعها تتغير بدون ما تتوقع ساعتها يحصل الخلاف تقدر تقولي حترجع لمين عشان يقومها او يكون حكم بينك وبينها , وده خصوص مع ناس انت من دلوقتي مش قابلهم
فرضا ياسيدي البنت طلعت كويسه حتفضل عايش منعزل انت وهيه وتصبح علاقتك بيهم شكلها ايه حتلاقيك واحده واحده مش عايز تروح تزورهم وبتخليها تروح لوحدها ومتضايق لو همه جولك عشان هارف انهم مش بيوجبوا معاك لما بتروح .
دلوقتي الواد الفرفور ده ينفع يبقه خال عيالك اذا كان انت من دلوقتي مش محترمه اذاي ده حيكون قدوه ليه .
لما ربنا يرزقك بالذريه الصالحه بأذن الله مين نحياخد باله من مراتك ويراعيها في لمرحله ديه .
بص من الاخر الجواز ده مرحله في الحياه مهمه ان مكنش الواحد يعملها وهوه والناس اللي حواليه راضيين عنها حيفضل يشرب المر اللي في الدنيا
فلازم الواحد ميعملش فيها شجيع السيما ويعرف هوه ايه اللي يقدر عليه والشهامه ليها حدود وياما ناس عملت ذيك كده وقرفت طول حياتها .
يا اخي ده : الله يقول في محكم لتنزيل : { يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ }
وانت عايز تستقل بحياتك ومش عايز تعرف اهلها وديه تبقه جوازه .
انصح تعمل صلاه استخاره وتشوف ربنا حيسرك بايه مع انني بنصح متكملش في الجوازه ديه وربنا يقسملك الخير
وشكرا