خطيبتى خانتنى...موقف صعب أتمنى المساعدة

[ahmed4000]

ياشباب هدوا الكلام شوية علشان الراجل حيندم انه اتكلم بصراحة
انا كانت نصيحتى قبل مقرا الجزء التانى انه يسيبها..وطبعا بعد الجزء الثانى لا تغيير

بس انا طلبى ان الناس تخف عليه شوية لان الضغط عليه حيخليه ميتكلمش وكده ممكن الاهل يعملوا ضغط عليه ونلاقيه بيعزمنا على الفرح

[maka]

‘سمحولى قبل أى كلام إنى أوضح مشاعرى
ماشاء الله بجد أسم بالله لم أكن أتخيل هذا العدد الهائل من الردود...حسيت بنشوة غريبة وإحساس لايمكن وصفه..قد إيه المصريين دول عظام وقد إيه نايل موتورز ده رائع والله أنا فخور جدا وانا أحمل الستيكر على زجاج سيارتى...إنتوا عملتوا معاى أهم حاجة كنت محتاجها وإنى أفضفض ومش بس أفضفض لأ ده أنا بفضفض مع واحد مهتم بأمرى وبيفكرلى حتى وانا مش قاعد معاه انا امبارح فضلت طول اليوم بعد الشغل بره البيت علشان أمى متاخدش بالها منى..والنهاردة جيت لقيت الردود زادت وكل دلا بدلوه فى الأمر.....جزاكم الله عنى خيرا ولاوضح أحد فيكم فى مضيقة أبدا ورفع همكم إن شاء الله.

هحكيلكوا اللى حصل إمبارح بقى....
هى لما كلمتنى أنا جرحتها جامد من كلام يقتل بدون لفظ خارج بس كلام صعب ولما قلتلها إنى هاقول لعمى إنهارت ...المهم بعد شوية لقيت زوجة عمى بتكلمنى فرحت مكلمها لقيتها بتقولى انا عرفت اللى حصل والموضوع ده كله غلط وهى قالتلى من فترة إن فيه زميلها كان عنده مشكلة مع مراته(وهنا كانت الصدمة...ده متجوز)قالتلى أه ده متجوز وعنده 3 عيال وهى حبت تساعده وده نابع من طفوله وعدم خبره وإحساس بالكيان إنها ممكن تساعد فى حل المشاكل ديه والبنات بيحبوا يرغوا قوى فى القصص ديه...قلتلها وإزاى بتكلمه فى الوقت ده باليل وبتبعتله رسائل...قالتلى ده كان فترة ساب الشغل وكانت بتشوف عامل إيه فى مشاكله من نوع الإطمئنان على زميل...وده مش مبرر وانا مكنتش أعرف إن فى مكالمات باليل انا كنت أعرف إن فيه مشكلة مع زميلها وكانت بتحكيلى وبتحكى لباباها (اللى هو عمى)وكنا بنعرض حلول لكن مكناش نعرف إنها بتكلمه باليل وهى واثقة مليون فى المية إن بنتها غلطانة وتستاهل الضرب والبهدلة لكن فى نفس الوقت واثقة فى بنتها ومتأكده من حبها ليه وبتشوفها قد إيه لما بتكون مستنيانى وانا جى بتبقى فرحانة وكلام من ده...وانتهت المكالمة
طبعا لم أقتنع لإنى حطيت نفسى مكان أمها لقيتها مينفعش تقول غير كده...
المهم هى حاولة تكلمنى قلتلها إنى كدابه وبتكدبى على أمك وبتقولها كده وإزاى بتكلميه الساعة 12 باليل علشان تصالحيه على مراته؟؟؟ليه !!!! المهم برده كنت بقولها كلام يقتل يعنى!!!! وافرضى إنه مراته عرفت كانت عملت فيكى إيه..كانت فضحتك فى شغلك وسمعتك...
المهم المكالمة لم تحل الموضوع...شوية وبعتتلى رسالة قالتلى إن عمى عرف وإن أمها حكتله المكالمة وانها لما رجعت بهدلها ومرمتها.
المهم كلمنى وطبعا انا استغربت إنه هاجمنى وقالى إزاى تشك فى بنت عمك..إزاى تفكيرك يوصل لكده..أه هى غلطت ولازم تاخد جزائها ولازم تتعلم إنها مدخلش نفسها فى موضوع زى ده تانى أبدا لإن المواضيع ديه بتفرض النية السيئة حتى لو كانت باطنها سليم...وقالى انا عارف بنتى كويس وانا مربيها وده انا اعتبرته نوع من انواع الطيبة المبالغ فيها اللى لازم تنهيها تماما..وانى لاانكر عليك غضبك لكن انكر عليك شكك واى قرار تحب تاخده انا تحت امرك لكن مش هوافق انك تشكك فيها وقالى إنه عارف قد إيه هى مرتبطة بيه واحنا كنا بنخلص العفش فإستحالة يكون في نوع من الريبة أو الشك والشك ده مش مفروض يخش قلوبكم.وقالى إن البنت هاتضيع وانا المفروض أخاف عليها أكتر منك وكان ممكن أموتها لو إتأكدت إن فيه حاجة غلط ..لكن المواضيع ديه لاتحتاج للشباب كان لازم تيجى تقولى من أول لحظة وانا كنت هاساعدك نعرف الحقيقة من غير ماشوف البنت نايمة وسخنة وضغطها على.
وقالى تجهز أمك علشان نطلع يوم الجمعة على النجار علشان الصالون كان فيه حبة تعديلات ونجيب باقى الفلوس علشان نخلص وقالى شد حيلك يامحمد إحنا فاضلنا كام شهر على الجواز.
حالى بعد المكالمة
أولا أنا لم أتوقع إن عمى يكون ده ردة فعله أبدا...انا عارفه كويس جدا وعارف عصبيته...
ثانيا إحساس جوايا حسسنى إنى لبست الحوار.
ثالثا إحساس جوايا إنى هالبس إنى أنا اللى غلطان :)

بس وطبعا مكلمتهاش من ساعتها وهى حاولت تتصل بيه كتير مردتش ورحت قعدت على القهوة ولعبت بولة إستيميشن لحد الساعة 2 وروحت نمت وصحيت متأخر على الشغل.

ردى عليك قبل هذا الرد كان هيكون مختلف و من مجمل ان الكل مخطىء وخير الخطائين التوابون و مش اول ما الواحد يغلط لازم ندبحه

لكن الرد ده فور دمى بصراحة , المكابرة فى الغلط تغيييييييييييييظ يعنى الراجل و الست بيحاولوا بيعتذروا بس بكبر

اقولك من الاخر اللى فى دماغ عمك : قالك الباشمهندس ده طيب و زى ابنى و احاول اضغط عليه و نلم الدور , تانى نقطة الكبر ده اعتراف واضح و صريح بانهم حاسين بغلط بنتهم فيه ناس لما بتغلط بتتكبر علشان تدارى على خبيتها

ابقى كداب لو قولتلك القرار سهل

لكنى وضعت نفسى مكانك و رايت الحل انى هسمع كل الردود المتعقلة و الغير ثم اتوكل على الله و اسافر اى حتة و انقطع عن العالم الخارجى من اول المنتدى و اصحابك انتهاء بعمك و اخذ قرارى , استخير ربى عليه , اسعى لتنفيذه

اخيرا فى ردود هنا تولع فى القارة القطبية اسمع و احكم عقلك و قلبك متسبش دماغك لحد , عمك لازم يحس ان الموضوع مش بساهل و انك مش سهل الضغط عليك و انك هتاخد مهلة للتفكير براحتك , استعين بربك و اطلب منه يهديك للخير و ينور بصرك و بصيرتك فهو الوحيد الاعلم بالخير فين و اعلم بالغيب لكن احنا بنقول اراء قد تخطى و قد تصب

بالتوفيق باذن الله

[Karim_Monir]

احب اولا اشكرك على الترافيك :-) الموضوع ما شاء الله 7 الاف مشاهدة
يا ريت تعمل الجزء التاني

نصيحة ليك سواء هاتكمل او مش هاتكمل من واحد خبرته على قده في النساء:
لو شفت من المرأة ما يسيئ لرجولتك ونخوتك وتغاضيت لاي سبب..
بتسقط فورا من نظرها حتى لو انت جيت على نفسك عشان خاطرها

ومافيش واحدة مكتملة الانوثة تستثني من القاعدة دي

[Maged_Samy]

الموضوع مش محتاج اى تفكير الحمد لله انك عرفت الكلام ده قبل الزواج .... متكملش طبعاً و خليك جامد ولا يهمك ومتفكرش بقلبك علشان متندمش طول عمرك --- فكر بعقلك بعقلك وبس -- علشان فيه حاجات ممكن الواحد يسامح عليها وحاجات لا ومتنساش ان انت اللى اكتشفت مش هى اللى اعترفتلك ودى تفرق كتير ---- بنت عمى على عينى وعلى راسى لك مراتى لالالالالالالالالالالالالا والف لا .

[opelawy]

مبئيا انا هتكلم عن نفسي لو فى نفس الموقف:
اولا هنهى خطوبتى بيها ومش لازم يكون فيه مبرر او انى اقول لاهلى او لاهلها وخصوصا انك زى ما بتقول انها بنت عمك فاعتقد كدة هتقلب الترابيزة على الكل.
انا هنهى الخطوبة لعدة اسباب:
1- مش عشان انت وقتك غير سامح انك تعوضها الرومانسية فتشوف غيرك يديها الناقصها
2- الموقف دة ممكن جدا يتكرر بعد زواجك منها....اعتقد فى الحالة دى الموقف هيبقى اصعب
3- مع احترامى الكامل ليها بس ماينفعش تبقى مرتبطة بواحد وبتدلع مع واحد تانى .....ولا حضرتك ليك راى تانى

فى النهاية دة راى انا لو فى نفس الموقف هنهى الخطوبة فى هدوء وبدون اى مبررات حتى لو الكل مغلطنى لكن مش هقول على السبب عشان برضه دى فى النهاية قريبتى

موافق تماما و لو منك عمري ما هعمل غير كده
للاسف هيا متستهلش ضفرك اصلا

[bmw2007]

السلام عليكم ورحمة الله وبركاته

اخي الكريم موضوعك قلب عليا الماضي وذكرني بذكريات سيئة من اكتر من سنين لم اكن اريد ان استعيدها لكني هذكرها لك فقط لتقتنع بما جف به حلق الزملاء الاعضاء المحترمين وارتفع ضغطهم واتحرق دمهم (عافانا الله جميعا) بانه من عاشروالف ومليون المستحيلات ان ينصلح موضوع ارتباطك بقريبتك ولاحل سوي الانفصال الي غير رجعه وربنا يعوضك خير لكن اصدق النية بالخيرواحتسب اجرك عند الله وايضا ولافادة الجميع بإختصار للإعتبار واخذ الموعظة الحسنة من خبرات سابقة وتجارب واقعية .
يعلم الله صدق كل كلمة ..انا جامعي ودراسات عليا واعمل بمجموعة كبري والحمد لله بمستوي اجتماعي راق ومادي ميسور ووالدي واخوتي وازواجهم مراكزهم ممتازة والحمد لله متزوج حاليأ وانعم الله عليا قريبا بطفل . بعد ما خرجت من موضوع قريبتي(خطوبة) وباجزاء متطابقة مع قصتك كماستري فيمابعد واشتريت نفسي وكرامتي وربنا عوضني بالزوجة الصالحة الحمد لله ملاك واخلاق بجد وشخصية وطيبة كما تمنيت اذا غبت عنها حفظتني واذا نظرت اليها سرتني كما في الحديث الشريف .
الموضوع في نقاط سريعة :
· من حوالي 15 سنة كنت في اخر سنة جامعة واعمل في شركة خاصة ولم اكن مرتبط وعرضت عليا اختي ووالدتي ان اخطب بنت خالتي وكان عمرها وقتها 17 سنة ووافقت بدون اقتناع كامل واللي تعرفه احسن من اللي متعرفوش فقط هي امامي منذ الطفولة واصغر مني ب 4 سنين وكانت من محافظة بعيدة وقريبتي وجميلة وثرية ووالدها رجل اعمال . وفي اعجاب بيننا وبالفعل قرينا الفاتحة .
· بعد الفاتحة وشهرين وحب (برضوا السن والخبرة كانوا قليين)ولظروف عائلية وعملية وابتعاد الاماكن لم نتمكن من التواصل لمده حوالي 3 سنوات سوي مرات قليلة وكان اغلبها تنافر ومشاحناتومهاترات وشد وجذب لاختلاف التفكير والثقافة لكني كنت بقول دي اخلاقها عالية ومن عيلتي وهجيب مين احسن منها (وكنت معتقد انها الحب الكبير ههه ) المهم فاعل خير بلغني انها علي علاقة بحد طالب معاها في الجامعة والمواضيع شلل من بنات وولاد وكبلز والامر لايطمئن .رحت وسألت ناس قريبة منها وسمعت انها فعلا بتعرف واحد اي كلام وبتقعد معاه اوقات ف الجامعة ببساطة قابلتها وقلتلها خلاص انسي الفاتحة والخطوبة وكلمت ابوها واعتذرت عن الاستمرار وكانت صدمة عنيفة واتهموني بتشويه صورتها وفضيحتها ودافعوا عنها بالباطل دول زمايلها عادي انت ماكنش لك زمايل وعشان يدارو عالموضوع جريوا دبسوا واحد قريبنا تاني محترم وابن ناس ميعرفش حاجة عن الموضوع وانا كنت اعرفه معرفه سطحية وتمت خطبتها له بعد انفصالي عنها وعملوا خطوبة كبيرة .
· مرت 3 سنوات اخري ولم اتابع اخبارهم الا انها افتعلت مشاكل مع خطيبها الجديد وصممت علي تركه لتقيم علاقه جديدة مع جار ليهم وكانت معجبة به من الطفولة وتليفونات وحاولت فرضه علي اهلها للارتباط ولم يوافقوا مستواه اقل بكثير ..
· بعد سنة اخري حاولت الاتصال باخوتي واثناء مناسبات عائلية هي ووالدتها المحوا لاعادة ارتباطي بها وانها تغيرت تماما ونسيت الماضي كله وهي زي الفل الان وبتصلي بالفرض ع السجادة وربنا غفور رحيم وانا كمان كنت مقصر معاها تماما ومتجاهلها واهملتها كثيرا وكنت شريك اساسي ومسئول عن تدهور احوالها ولم اسارع باتمام الزواج وطولت الخطوبة وبالفعل ودي اكبر غلطة في حياتي تأثرت بالحملة دي ووافقت علي اعادة خطبتها بخطوات جادة سريعة للاتمام وبالفعل كتب كتاب سريع المرة دي (لما فكرت الان أعذروني قبل ماتنقدوني انا مش مصدق نفسي واللي بكتبه واللي عملته ف نفسي ده وازاي وليه ؟؟؟ !!! مستحيل اكون انا ) .
· قبل وبعد كتب الكتاب اقنعتني انها تغيرت واصبحت ملاك وتاني صدقت وقلت خلاص وبدأت حركاتها ومهاتراتها الا انني كان عندي احساس كبير اني اريد مراقبتها ومتابعة التليفونات وتواجدها باي مكان وكنت دائما لا اطمئن لها تاني وتصرفاتها غريبة ولاتريد ان تحس انها اصبحت علي ذمة رجل وتلبس ملابس غير لائقة وافتعال ازمات وخروج بدون اذن وحضور مناسبات مع نفسها هي كانت مثلا تستأذن وكنت لما ارفض تعمل مشكلة وتقعد ف البيت واتهامات انت خانقها انت لاتثق فيها واهلها مساندينها دايما خط واحد الدفاع بالباطل وكنت خلاص ومحاولات منهم للضحك عليا احنا واخدين بالنا هو احنا هنرضي بحاجة غلط ده السواق بيوصلها واخوتها لحد الجامعة وايام كتير والتها معها .. المهم مليت ووصلتني حتي للحلفان عليها بالطلاق المعلق لو خرجت بدون إذن (وحلوا الموضوع اهلها وجابوا شيخ وقالو لأ دي كفارة بس مع اني بعد ماسالت عالم كبير كان هذا خطأ وكان طلاقها واقع فعلا هذا ما تأكدت منه لاحقاَ) وجبت لها خط موبيل بدقائق ايضا 250 دقيقة او حاجة كده لا اتذكر وجبت الفاتورة وشفت الارقام ولقيت رقم متكرر دائما واوقات طويلة وفي نفس اللحظة اوقفت الخط وزادت عنادا وجابت خط تاني كلمت ابوها وقالي اخدت منها الخطين وليس معها خطوط الان وبعدها اكتشفت انها استخدمت الدقايق بس كانت مع صديقة لها (اول مرة تطلع بريئة) بعد ما اعتقدت انها مع شاب بعد كده ابتعدت عنها تماما لتأديبها عسي ان تكون اخر محاولة الا انها استمرت في التمرد والعصيان وانها تعبت من الارتباطوهي اللي مش عايزة تستمر قلت الحمد لله جات من عند ربنا للاعتبارات العائلية والفضائح والحساسيات والكلام ده حاولت الاتصال مباشرة بوالدها وعن طريق وسطاء الاانهم تهربوا تماما ولم اجد سوي الذهاب للمأذون وارسال ورقة طلاق علي محل اقامتها .
· بعد 3 شهور من ورقة الطلاق عرفت انها عرفت قبل ما ارسلها الورقة واحد صايع والله وعاطل ومدمن مخدرات وامه فراشة في مدرسة وابوه بيعمل شاي في نصبة علي محطه ميكروباس ومعاه اعدادية تخيلوا وطبعا بصراحة تضايقت جدا وقلت خاينة وواطية بس بعد ايه كنت خلاص ارسلتلها ورقتها لو كنت عرفت قبلها كنت قطعتها (وده دليل اني طلقتها بدون ما اعرف خيانتها لاني كنت خلاص لا اطيقها ) و الحمد لله عرفت من الفتوي الصحيحة انها ماكانتش علي زمتي من سنة ونص قبل الورقة وتعمل اللي تعمله بقا منها لله حسبي الله ونعم الوكيل .
· بعد سنتين اتجوزت وخلفت من الصايع الاخير بعد مافرضته علي اهلها وهددتهم بالهروب معاه وفضحهم فرضخوا للامر وهو طبعا ماصدق استغلال وعايش ببلاش وركبته عربية وعاش في فيللا وشقة تانيه تمليك ورفع مستواه.تخيلوا العند وتدمير الذات سبحان الله والله ان الموضوع عارف انه اغرب من الخيال ومن افلام السينما لكنه الواقع.
· اسوا حاجة اني كنت حاسس بعد المهازل دي اني شكلي في العيلة وحش لكن اكتشفت العكس واني موضع كل تقدير واحترام من الجميع والحمدلله.

اخيرا :الباشمهندس صاحب الموضوع اخلص بقا بسرعة قبل ما تتورط اكتر من كده انا قبلت كشف اسراري الخاصة لوجه الله وسنين طويلة كنت نسيتها والله والله يأجرني علي صدق واخلاص النصيحة لشخص لا اعرفه لعلك تقنعك بالابتعاد وتشتري نفسك وكرامتك وتتاكد ان مافيش مسامحة ولا فرصة تانية للخيانة والاستهتار ..وتحمد ربنا علي مااصابك وتتاكد من ان ربنا بيعوض كما حدث معي .
والله المستعان ..

[mohabelnegm]

فى حاجات ماينفعش بتاتا نسامح عليها.. بالتأكيد لازم تسيبها.. بس برضه بالمعروف و بدون ما تسىء اليها. ربنا ان شاء الله هايعوضك باللى تستاهلك

[sha2e]

طبعا بعد كلام الزملاء و خصوصا احمد بيه كمال مفيش حاجه تتقال

بس و انا بقرا الردود تفتقت الفكره ده في ذهني و قلت اقولها لك

انت تعمل نفسك شربت الموضوع و تروحلهم ترزع اعتذار خفيف كده
و تاني يوم تاخد البنت و تطلع علي دكتور بحجه عمل فحوصات قبل الجواز
و شويه تحاليل و اشعات و ياخدو منها شويه دم ( ده اذا لقوا اصلا)
الكتور يتطلع علي التقارير و هوبااااا الجواز ده لا يمكن تتم لانه اذا حصل هتخلفوا عيال ب 6 رجول و راسين و بيقولوا مااااء و ده عشان القرابه
و بكده تقدر تخلع
طبعا الموضوع فيه شويه تكاليف و لازم تكون مظبط الدكتور هو و اي واحد تاني ممكن هما يقترحوه عشان يتاكدوا


شكلي بتفرج علي افلام عربي كتير انا بس اهو فكره جت علي بالي و قلت اقولها و السلام

و الله يكون في عونك و يصبرك و يهديك للي فيه الخير

طيب وافرض انهم راحو لنفس الدكتور وظبطوه تظبيطه أكتر من الى كان هوا مظبطهالو ..؟؟
تانى يوم هتلاقيه بيقول معلش يا جماعه كان فيه غلطه فى التحاليل والجوازه دي لاااازم تتم وبخصوص الخلفه احب اطمنكو لانى بعد أتأكدت من التحاليل الاصليه وفحصتها كويس أكتشفت ان الولاد هيكون فيهم نسبة ذكاء عاليه جدا والولاد هيكونوا شبه براد بيت والبنات هيبقو شبه نانسي عجرم
وطبعا لو جيه يكلمه هيقوله ضميري صحي

[Karim_Monir]

لصاحب الموضوع
تم حذف موضوع كشف عضويتك الاخري من الاشراف لعدم تعرضك للاحراج من اي شخص
رجاء ارسال طلب بوقف عضويتك الحالية بعد الانتهاء من مشكلتك

[SheNo0o]

احب اولا اشكرك على الترافيك :-) الموضوع ما

نصيحة ليك سواء هاتكمل او مش هاتكمل من واحد خبرته على قده في النساء:
لو شفت من المرأة ما يسيئ لرجولتك ونخوتك وتغاضيت لاي سبب..
بتسقط فورا من نظرها حتى لو انت جيت على نفسك عشان خاطرها

ومافيش واحدة مكتملة الانوثة تستثني من القاعدة دي

دي خلاصه الكلام الي ممكن اقوله ف الموضوع ده الصح والحق مفيش احسن منه
ومفيش احسن من انك تبقا دغري ومن خبرتي انا كمان المتواضعه في البنت او المراه بشكل عام
اي تنازل هتقدمه حتي لو قليل هيتمسك عليك وعمرها ما هتقدر انك عملت كده علشان انت بتحبها وقدمت تنازل علشان نفسك تكملوا سوا وسوري ولو اني ممكن اكون بغلط في بنت عمك الشخصيه الي زيها كده مبتتغيرش مهما طالت الايام وفاتت هيفضل ديما ليها الصديق الي بيكلمها ويهون عليها وتهون عليه بكل ما تحمله العلاقه او المكالمات من معني مش دي الانسانه الي تتاتمنها علي اسمك وشرفك وعرضك هتتعب بعدين

وانت بالفعل نزلت من نظرها بسكوتك لغايه دلوقتي ورجولتك اتهزت ف نصيحه من اخوك الي بينكم اتكسر خلاص وسيب احسنلك وانت الكسبان لا تقولي عيله ولا تقولي عمك ولا تحط ف اعتبارك اي حاجه ولا السنين انت قريبها قبل ما تكون خطيبها يعني دخولك وخروجك شئ عادي قدام الناس اعتقد

اشتري نفسك

[eng.m7md.ali]

بطني وجعتني بجد من كتر قراية الردود ووجعتني اكتر من الضحك على ردود الاستاذ احمد كمال المفتري هههههههههههههههههههههه
انا كنت عايز اعرف منك اخواتها عرفو الموضوع ده ولا عمك ومراته بس ؟؟
لو انت معتبر حد من اولاد عمك من اصحابك وبتحكو مع بعض علطول ممكن تحكيله على الوضع من اوله وانها قالتلك انها بترتحله وهو بيحبها وراحت قالت كلام تاني لابوها وامها علشان يلمو الموضوع

[ahmed_su]

حرقت دمى بجد بكل ما تحمله الكلمة من معنى

احمد ربنا واسجد له طويلا لشكره على نعمة انه انار طريقك

وانه كشف لك وانت على البر اللى كنت لو اكتشفته فيما بعد لكان الموضوع كارثة

انجز واخلع وعمك ده اسقطه من حسابتك تماما فهو لايصلح لان يكون كبير عيلة ولا حتى صغير - وهيكون السبب الاساسى فى شقاءك فيما بعد

لان اى خلاف من الزوجة لابد من العودة "لكبيرها" واديك شوفت العينة من الكبير

انت راجل طيب والطيبون للطيبات - ربنا هيعوضك بالزوجة الصالحة التى تقر عينك

وتصونك وتطمئن اليها ان شاء الله

[amrezzat82]

بص من الآخر
لازم تسيبها عشان كدة مافيش أمانة و ده أهم حاجة أنها لازم تصونك فى نفسها و أنت مش معاها
و أنت حتفضل تفتكر ده و تعيش فى جحيم
باأما تقولها هي تقول لأبوها الموضوع خلص و أنها مش مرتاحة ولا مبسوطة أو أما أنت تحكيلوه لو حسيت إنها حتلبسك قدامهم
معلش مهو أنت مش حتيشتري راحة حد على حسابك خصوصا فى لاحاجات ديه و بلاش تقول يجرالوه حاجة محدش بيموت ناقص عمر و من اللى الواحد بيشوفوه أو يسمعه ممكن تتوقع أي حاجة و على فكرة أكيد فى حد فالبيت عارف كويس ما هو مش معقو 650 دقيقة فى 3 أسابيع يعنى فى السر
و نصيحة حتنسي أي بنت لو عرفت بنت كويسة تانية فأمسك أعصابك و أنت حترتاح و حتحب تاني أقوي ديه مش النهاية

[نور القمر]

انا شايفة في الجزء الاول من القصة انقسمنا لرأيين
لكن بعد الجزء الثاني اجتمعنا على رأي واحد
لم يتبقى لك الا صلاة الاستخارة والتنفيذ
واتمنى تكون هي بتدخل المنتدى وتشوف الموضوع ده وتشوف رأي الناس فيها ايه لعله يكون درس قاسي وعبرة لباقي حياتها وتتعلم من غلطتها

[amrezzat82]

معلش يا جماعة كان ردي بعد
ما قريت المشكلة فى الصفحة الأولى بس
و لكن بعد ما قريت رد أبوها و أمها
أن آسف إنىأقولك أنت بتتقرطس و بيستهبلوك
شوف انت كنت خايف عليهم أزاي و هم مثلوا عليك الدور كويس
ديه الست بمنتهى البساطة سيبالها تحل مشكلة واحد متجوز و أبوها كماتن بيقولها حلول
مع الرغم أن البنت قالتلك أنه بيحبها أو مرتاحة ليه يبقى البت و أهلها متفقين
بس الموضوع اللى فيه عك كده يبقى بلاش منه
حيركبوك و يدلدلوا
عشان كده معظم الناس بتكره جواز القرايب عشان بتتحرج من رد الفعل و تبقى مخنوق لحد ما تنفجر فى كل اللى حواليك
على العموم فى ستين ألف داهية الخسارة و خد فلوسك باللتى هىأحسن يا أمي أعملهم مجنون أو خد حقك قانوني
و بتهيقلي من كلام عمك أنه ما يتخافش عليه خالص
خليك جامد و صون رجولتك و كرامتك