الموضوع: القواعد الذهبية لاختيار زيت العربية.... موسوعة مبسطة لأساسيات زيوت المحركات

المشاركة الأصلية كتبت بواسطة tasaka

الحمد لله .. اشتريت زيت يترومين بترومين سوبر سينثتيك a1 .. لزوجه 5w30 .. السعر 385 جم

مواصفته حلوه .. زيت الاساس تصنيعى 100% ( يعنى المفروض مجموعه رابعه !! )
الزيت بيحقق اعلى المواصفات الامريكيه .. و اعلى المواصفات الاوروبيه

المواصفات الامريكيه
api s/n
ilsac gf5
dexos 1

المواصفه الاوروبيه
acea a3/b4 , a5/b5 .. بيحقق اعلى مواصفه للبنزين a5/b5 ( موفر للبنزين )






يتبقى التجربه لان المطلوب عندى فى الكتالوج هو 10w30 .. ربنا يسهل و يستر و الامور تمشى مويس

ربنا يسهل وإن شاء الله الزيت يمشي كويس.. ولو إني متحفظ على تغيير اللزوجة.

اللي أتوقعه إنك هتسمع صوت الموتور أعلى شوية خصوصا مع بداية التشغيل.. بس هتلاقي فرق أكيد في سحب العربية إن شاء الله.

وطمنا عملت إيه...

وكل عام وأنت بخير


...

المشاركة الأصلية كتبت بواسطة tasaka

كل عام و انت بخير يا باشمهندس احمد .. رمضان كريم

ان شاء الله ساضع التفاصيل .. بعد الاستخدام لفتره .. و ربنا يستر

الصوت العالى عند بدء التشغيل حيكون دلاله على ايه ؟؟ .. ممكن التوضيح

انا اللى خايف منه جدا ( حتى وصول الزيت لدرجه حراره 40 مئويه ) .. هو انضغاط الزيت داخل ال bearing بتاعه الكرنك .. هل هيكون كافى لعزل عمود الكرنك عن ملامسه ال bearing ام لا .. لان اللزوجه حتكون اقل بفرق شويه و ممكن تتسرب من فتحات التزييت و متحققش الانضغاط المطاوب فى المكان ده ( بس لم اقرأ اى شيئ عن الموضوع ده .. مجرد تخمين )

اما اعلى من درجه حراره 40 مئويه .. المفروض مفيش فرق تقريبا بين 5w30 , 10w30

لى سؤال ساضعه فى موضوع الفولكس باسات عن اختيار اللزوجات ..

تحياتى و اعزازى

تخوفك ده هو السبب إننا بننصح باللزوجات الأثقل لو كنت بتحمل العربية أو بتستخدمها بأسلوب رياضي أو فيه تحميل على الموتور.

غير كده... اللزوجة دي كافية إن شاء الله.


...

المشاركة الأصلية كتبت بواسطة tasaka

حتى بدون تحميل او استخدام رياضى ..

انا تخوفى علشان التصميم الاساسى نفسه لدوره التزييت و الفتحات لدخول و خروج الزيت داخل ال bearing بتاعه الكرنك .. قبل وصول الزيت ( موش دوره التبريد ) لدرجه حراره 40

طيب ما ده نفس الوضع بالضبط للزيت ال5w-40..

عموما.. لو ثرموستات الكوعة راكب .. كل اللي حضرتك محتاج تعمله إنك تسوق بالهداوة وبدون رفع للدوران فوق 3000 rpm خلال أول 3 دقايق من تشغيل العربية.


...

المشاركة الأصلية كتبت بواسطة tasaka

حسب ما فهمت من البحث على الانترنت لتصنيع الزيوت المتدرجه التصنيعيه Multi Grade

- الزيوت التصنيعيه من اساس معدنى .. يكون البدء بالزيت الخفيف كزيت اساس مثلا 10W ثم تضاف اليه محسنات اللزوجه VI ( بوليمرات تحسين اللزوجه ) للوصول الى اللزوجه الثفيله المطلوبه 30 مثلا .. البوليمرات دى بتتمدد بارتفاع درجه الحراره و بالتالى بترفع لزوجه الزيت من 10 الى 30

الزيوت دى بعد فتره بتستهلك ال VI الموجود بيها نتيجه لتكسر هذه البوليمرات لعده اسباب .. و التكسر بيكون لحدوث Shear .. و البوليمرات دى بتصبح بحجم اصغر نتيجه التكسر و بالتالى لن تستطيع رفع اللزوجه الى اللزوجه المطلوبه عند ارتفاع درجات الحراره .. الزيت بيصبح اخف من 30

- الزيوت التصنيعيه من اساس غير معدنى ( مجموعه رابعه ) .. يكون البدء بالزيت الثقيل كزيت اساس مثلا 30 ثم تضاف اليه محسنات اللزوجه للنزول به الى اللزوجه الخفيفه 10W مثلا

بالتالى لو الزيت ده تكسر ( و ده صعب فى الزيوت من اساس غير معدنى ) .. لان تكوين الجزيئات ثابت اصلا و ايضا متجانس فصعب ان يحصل ليها Shear .. يبقى حتفضل على لزوجه ال 30 برضه ( زيت اساس ) حتى بدون وجود اضافات اصلا

اللزوجه المفضله حسب الكتالوج

زيت بترومين سوبر سينثيتك A1

- المفروض ؟؟ !! .. انه من الزيوت التصنيعيه من اساس غير معدنى ( مجموعه رابعه ) .. يبقى انا موش خايف من نزول اللزوجه اقل من 30 للاسباب الموضحه باعلى

- اللزوجه المفضله حسب الكتالوج هى 10W30 .. بدرجه حراره فى الجدول هى نفسها لل 5W40 ..
و التوكيل حسب ما قيل فى المنتدى بيحط 0W40 .. يبقى برضه موش مفروض اخاف من ال 5W

- مواصفات زيت بترومين قريبه جدا للزيتين 10W30 و 5W30 .. المتاح عندى هو داتا شيت للسوبر سينثتيك GF5 و ده حيكون قريب جدا من ال A1 ( و اعتقد اقل من A1 )

و لاحظ ان اللزوجه عند درجه التشغيل ( 100 مئويه ) هى قريبه من 12 فى داتا شيت المواصفات للزيت .. يعنى الزيت ده تقريبا وصل لمواصفه اللزوجه 40 .. يعنى حمايه كويسه اكثر من اللزوجه ال 30 العاديه

طبقا لتصنيف اللزوجات ( اعتقد API )
اللزوجه 30 بتبدأ من لزوجه 9 الى 12.5 تقريبا
اللزوجه 40 بتبدأ من لزوجه 12.5 الى 16 تقريبا

تخوفاتى الشخصيه هى درجه الحراره اقل من 40

1- ان الزيت ما يكونشى مجموعه رابعه .. لان معنى كده انه ممكن يفقد لزوجه عند درجه حراره التشغيل و يصبح اقل من 30

2- اللزوجات بها اختلاف واضح قبل درجه حراره 40 .. ثم فروقات بسيطه بعد ذلك





تحياتى و اعزازى

تحياتي الخالصة لحضرتك ولبحثك المستمر .. واللي بصراحة بيجبرني إني أراجع المعلومات اللي عندي للتأكد والاستزادة :)


أنا عايز أوضح نقطة (اللي أنا ملونها باللون البنفسجي في اقتباس رد حضرتك) يمكن تفسر بعض النقط اللي فاتت..

فعلا.. الزيوت المعدنية بيضاف إليها محسنات مؤشر اللزوجة (Viscosity Index Improver) علشان تعلي اللزوجة في درجات الحرارة العالية.. أو بمعنى أصح.. تثبت اللزوجة مع تغير درجات الحرارة..

إنما الزيوت التخليقية فيها ميزة أساسية .. إن لزوجتها أثبت بكتير .. وبالتالي فهي مش محتاجة محسنات لمؤشر اللزوجة .. أو محتاجاها بكميات أقل بكتير (علشان تظبط المنتج حسب المواصفة).

وبالتالي.. ده ممكن يفسر ليه رقم الـTBN في الزيوت التخليقية الحقيقية (مجموعة 4 و 5) أقل من زيوت التكنولوجيا التخليقية (مجموعة 3)... وممكن تكون دي وسيلة لمعرفة إذا كان الزيت ده تخليقي حقيقي ولا تكنولوجيا تخليقية.



أما بالنسبة لطلبات الكتالوج... فأنا لفت نظري في الصفحة التانية إن الكتالوج طالب لزوجة 5W-30 !!!

يعني كده ما تخافش.. إنت ما خالفتش الكتالوج ولا حاجة...


وبناء على تحليل حضرتك لزيت بترومين سوبرسينثتك A-1.. فلزوجة الزيت تعتبر كويسة جدا ومقاربة للحد الأدنى للزوجة الـ5W-40 فعلا.. مع مؤشر لزوجة عالي (162) .. وده يديك ثقة إنه بيشتغل كويس في درجات الحرارة العالية..



أما بالنسبة لقلقك من اللزوجة تحت حرارة 40 مئوية... فما تنساش إننا في الصيف.. ودرجة حرارة الزيت في الكارتيرة أصلا مش هتقل عن 25..

راجع الرسم ده كده



الفرق في اللزوجة (بين 10W-30 و5W-30) عند درجة حرارة 25 ما يعتبرش كبير لما تيجي تقارنه لزوجة 10W-40 مثلا.


اطمن.. إن شاء الله أداء الزيت يريحك جدا... وقولنا عن انطباعاتك بعد سواقة العربية.


...