الموضوع: القواعد الذهبية لاختيار زيت العربية.... موسوعة مبسطة لأساسيات زيوت المحركات

المشاركة الأصلية كتبت بواسطة hassan_attia

هندسه بعد اذنك دلوقتي انا عايز احافظ علي الموتور لاطول فترة ممكنه و مش فارق معايا توفير البنزين بس المشكله اني ساعات بستخدم العربية في اليوم علي فترات متابعده فاني الافضل استخدم ال 10w40 ولا 20w50 ولا 15w50 و كلهم مناسبين طبقا للكتالوج
و دلوقتي في حاجه انا مستغربها زيوت امسويل منزلين 20w50 تخلقي كامل بس sl طب دلوقتي مش مفروض ان الزيوت التخليقية مستوي خدمه عالي انا استفدت ايه بمستوي خدمه قليل بس زيت تخليقي و هل ينفع استخدم امسويل مع موتور كان طول عمره بين المعدني و النص تخليقي موديل 2005 ؟و ايه رايك في زيوت mannol & motul و خصوصا ان ال موتول فيه ايستر هل استخدمه ؟

بالنسبة ليا أنا شايف الـ3 لزوجات زي بعض... وعلشان نمسك العصايا من النص من ناحية حماية الموتور وسرعة السريان في بداية التشغيل فلزوجة 15W-50 كويسة جدا جدا .. خصوصا إننا داخلين على الصيف.. وكل الزيوت بتبقى سريعة السريان في الحر بدون استثناء.


أما بالنسبة لاستفسارك عن آمسويل...

فالقاعدة دايما هي مقارنة المواصفات أولا.. وبعدين نبقى ندور على موضوع التخليقي والمعدني...

ميزة الزيت التخليقي الحقيقي بتبقى في حاجتين :

1- سرعة سريان عالية في بداية التشغيل... وبالتالي حماية أكبر في النقطة دي تحديدا.

2- ثبات كيماوي عالي خصوصا في درجات الحرارة العالية قوي والمنخفضة جدا.. وبالتالي بيبقى عمره أطول في الموتور.


بس كده...


ومع ذلك.. فمواصفة API SL تعتبر أعلى من متطلبات كتالوج الفيرنا.. وبالتالي فالزيت مناسب لعربيتك..

إنما لو لقيت زيت معدني بنفس اللزوجة ومستوى أداء أعلى (SM أو SN) استخدمه وانت مغمض... بس ابقى غيره حسب توصيات الكتالوج.. مش أكتر من كده.

والزيت ده موجود فعلا في مصر... (التعاون SM بدرجة لزوجة 20W-50).



أما بالنسبة لزيوت Motul... فحسب كتالوج الفيرنا مفيش عندهم حاجة تنفعك... وحتى الزيوت التخليقية بتاعتهم اللي لزوجتها عالية زي 15W-50 فهي مخصصة للسباقات وبيقولوا إنها أعلى من كل المواصفات الحالية.. بس مش شايف أي اعتماد رسمي من أي جهة عالمية (ولا API ولا ACEA ولا أي حاجة خالص)..

https://www.motul.com/fr/en/products...iscosity%5D=32


أما زيوت Mannol.. فبصراحة ما لقيتش عندهم حاجة ملفتة.. زيوتهم عادية جدا ويمكن أقل من العادية..

accessory chemical module title

وأكتر حاجة بتقلقني من شركات الزيوت دي إنهم عندهم قايمة منتجات خاصة بالإضافات.. وأي شركة زي دول مش بفضّل أتعامل معاهم خالص... ودي نفس حالة زيوت ليكوي مولي وزادو مثلا.



ملخص الكلام...

اشتري آمسويل لو عايز حماية في بداية التشغيل ومشيك قليل... واشتري التعاون لو عربيتك بتمشي مشاوير طويلة نسبيا.


...

المشاركة الأصلية كتبت بواسطة tasaka

دى صفحه الزيت
Shell Helix Ultra 5W-40 | Shell Global

و دى المواصفه فيها توافق مع شركات المانيه .. و ال Approval من مرسيدس

Specifications: API SN/CF; ACEA A3/B3, A3/B4; BMW LL-01; MB approval 229.5, 226.5; VW 502.00/505.00; Porsche A40; Renault RN0700, RN0710; PSA B71 2296, Ferrari. Meets the requirements of Fiat 9.55535-Z2 and Chrysler MS-10725
[/RIGHT]

بشكل عام .. مواصفة الـACEA بتركز على مناطق مش مركزة عليها مواصفة الـAPI.. والشركات الأوروبية كمان بتشترط مواصفات أعلى للزيت علشان تضمن اداء كويس لمواتيرها... وبالتالي فالزيت اللي يكون متوافق مع كل المواصفات دي أكيد هيكون أداؤه أفضل.

المشاركة الأصلية كتبت بواسطة tasaka

[RIGHT]- انا شايف انهم مركزين على قدرته على التنظيف فى الاعلانات بتاعتهم اكتر من الكلام على الحمايه

وأنا كمان شايف نفس الكلام.. بس أعتقد إن الكلام عن الحماية مبقاش محل نقاش .. خصوصا مع وجود كمية الاعتمادات اللي اتكلمنا عليها.

المشاركة الأصلية كتبت بواسطة tasaka

- قريت فى بعض منتديات ان السبب فى انتاج هذه التكنولوجيا هو الاستفاده من الغاز الطبيعى الغير مستعمل فى قطر ؟؟ .. لا اعلم مدى دقه هذا الكلام .. لان موش ممكن شركه كبيره زى شل تفكر كده على ما اظن

الكلام ده صحيح 100% .. وده اللي بيقولوه على الموقع الرسمي بتاعهم

Shell Helix Ultra with PurePlus Technology - a revolution in motor oil

من وجهة نظري.. أنا شايف إن شل كانت بتدور على تكنولوجيا تميزها عن باقي الشركات.. خصوصا إن معندهاش زيوت تابعة للمجموعة الرابعة أو الخامسة حسب تصنيف الـAPI لزيوت الأساس...

ومع ذلك... تكنولوجيا بيوربلس ما زالت هتخلي الزيت تابع للمجموعة الثالثة.... أو ممكن يتصنف في المجموعة الخامسة باعتباره تكنولوجيا جديدة تماما.

تقدر تعرف معلومات أكتر عن تصنيف زيوت الأساس من هنا..
http://www.nilemotors.net/Nile/453047-a.html

المشاركة الأصلية كتبت بواسطة tasaka

موش فاهم تقصد ايه بالجمله دى ؟

أنا كان قصدي إن الزيوت اللي عليها مواصفات للشركات الألمانية بالإضافة لتصنيف الـAPI والـACEA .. أكيد هيكونوا أفضل من الزيوت اللي عليها تصنيف الـAPI والـACEA بس.

المشاركة الأصلية كتبت بواسطة tasaka

سؤال
فيه زيت AMSOIL .. هل هو افضل ام شل افضل ؟ بصفه عامه .. لانى محتار بين الاثنين

هل شركه AMSOIL تصنيفها رقم 1 فى امريكا و شركه زيوتها محترمه جدا ؟
انا قريت انها اول من اخترعت الزيوت التصنيعيه .. بس هل هى ما زالت سباقه فى الزيوت حتى الان ام لا

بمعنى لو انت حتختار لنفسك .. هل ستفضل امسويل ام شل ام شركه اخرى ( لنفس المواصفه )

شكرا

آمسويل هما فعلا اللي اخترعوا الزيوت التخليقية من مركبات الـPAO سنة 1972 (ارجع للموضوع في الرابط أعلاه لمزيد من التفاصيل)..

وحتى الآن.. لما بيحصل مقارنة علمية لأداء الزيوت في أمريكا .. عادة زيوت آمسويل بتبقى من ضمن الـ5 الأوائل .

ده ما يمنعش إن آمسويل عندها زيوت أداءها أقل... بس الشيء المميز فعلا لآمسويل إن كل زيوتها تخليقية تماما بلا استثناء.


بالنسبالي شخصيا.. المقارنة دايما بتبقى بالمواصفات... ولو قدامي زيت تخليقي بمستوى أداء ضعيف قدام زيت معدني بمستوى أداء عالي.. أكيد هاختار المعدني... كل المسألة إني هغير الزيت المعدني على فترات أقل.

وبافتراض إن الزيوت اللي قدامي متساوية تماما في المواصفات.. ساعتها هدور على الزيوت التخليقية الحقيقية (من مجموعة 4 و 5)..

ولو تساووا.. هدور على الزيوت المضمونة إني ألاقيها في السوق باستمرار... لإن التغيير المستمر غير مستحب..

ولو تساووا... أشوف أنهي اللي يقعد في الموتور أطول فترة ممكنة قبل التغيير...

ولو تساووا... أشوف مين فيهم الأرخص.



عموما... الترتيب أعلاه يختلف حسب أولويات كل واحد.


...