الموضوع: القواعد الذهبية لاختيار زيت العربية.... موسوعة مبسطة لأساسيات زيوت المحركات

المشاركة الأصلية كتبت بواسطة borio1704

أولا أنا باعتذر بشدة عن تأخيري في الرد.. بس الفترة اللي فاتت كنت مشغول وبصراحة الموود مش جايب ... بس الحمدلله... الواحد بقى أحسن.




بص يا سيدي... كل الزيوت اللي حضرتك قلت عليها تمشي... لإن الكتالوج مديك مجال واسع للاختيار.


حسب الكتالوج... أفضل زيت تحطه لزوجته 5w-30، ومستوى الخدمة بتاعه api sm على الأقل

طبعا... الزيت ده مش هتلاقيه معدني في مصر


لو عايز تلتزم بالمواصفات دي.. روح على التخليقي .. عشان هو اللي هيوفرلك المواصفات المطلوبة... بس راعي الاحتياطات المكتوبة في المشاركة رقم 4 في أول الموضوع... خصوصا إن عربيتك عمرها حوالي 5 سنين.


على فكرة... لو لقيت زيت مستوى الخدمة بتاعه n ... اشتريه وانت مغمض.. لإنه في الحالة دي أحسن من المطلوب للعربية... وإن كان هيبقى أغلى بدون شك.

ولو ما لقيتش الـ5W-30... الـ5W-40 والـ50 يمشوا بردو... وإن كنت بأفضل ما نبعدش كتير عن الـ30... يعني الـ40 أفضل من الـ50.



إذا حبيت توفر ... نقدر نروح على الزيوت الأخرى... ودي موجود منها زيوت معدنية

وحسب الكتالوج بردو... فيه جملة مهمة جدا مكتوبة:

"إذا لم يتوفر زيت المحرك sae 5w-30 ، ilsac gf-4 ... يوصى بزيت المحرك الثانوي الذي يتوافق مع مدى درجات الحرارة."

على فكرة... الـilsac دي منظمة عالمية للزيوت زي الـapi ... ودرجة الـgf-4 مكافئة للـsm

حاجة مهمة كمان... أقل زيت مسموح تستخدمه في العربية هو sl


ملخص الكلام ده:

لو هتستخدم زيت معدني... استخدم أي زيت ما يقلش عن sl ...
ولزوجته متناسبة مع جو مصر... يعني 20w-50 ... 15w-40 ... 15w-50 ... كل ده يمشي وما يأذيش الموتور في حاجة... ما دمت ما خرجتش عن اللي قلناه ده.



يمكن بس هتحس بشوية فرق في السحب ما بين الزيت المعدني والتخليقي... بس علشان التخليقي لزوجته أخف... مش أكتر.


والاختيار لك في الآخر



...

المشاركة الأصلية كتبت بواسطة michohat

مفيش داعي للاعتزار عن التأخير حضرتك لان مفيش تأخير حصل ولا حاجه
وربنا فراج الكروب واكثر من الاستغفار

بالنسبة للزيت حاسس ان حضرتك ميال للمعدني
وبالنسبة لي مش هتفرق معايا معدني ولا تخليقي ولا زيت ايه لاني بدور على الحاجه اللي بتدي عمر اطول للموتور و تصونه بغض النظر عن هيا ايه
حاليا متوفر امامي الدرجات 5-30 و 5-40 و 5-50 من التخليقي بالكامل وبدرجات مختلفه لا تقل عن sn or sm
فاخليني معدني زي ما انا 15-50 ولا انقل للتخليقي ولو تخليقي اثبت ع ال5-30؟
فكري اني رايح لل 5-50 علشان بس اظن انه متشابه مع 15-50 اللي كنت بحطه في انه 50
اسف اني بعيد الكلام تاني و بزعجك

المشاركة الأصلية كتبت بواسطة borio1704

أنا ميال فعلا للمعدني لسبب أساسي... هو إن العربية عندك بقى عمرها 5 سنين... يعني لما تيجي تحول للتخليقي فيه احتمال كبير إن جوانات وأويلسيلات الموتور تضرب...

عندك استعداد تحط زيت تخليقي وبعد كده تلاقي الموتور جايب زيت من كل حته؟؟ ده غير احتمال انسداد الفلتر لما تيجي تعمل فلش.


لو نويت على التخليقي خلاص... خليك أحسن في الـ5w-30 ... زي الكتالوج ما بيقول.



...

المشاركة الأصلية كتبت بواسطة michohat

تمام كده
وخصوصا وان في عندي معلومه سابقة بان صاحبها السابق كان بيتأخر عليها ف غيار الزيت (لاني لسه شاريها من قريب)
بس عاوز استفسر عن نقطه احتمال انسداد الفلتر في حاله الفلش
هل المقصود ان الفلتر الجديد اللي هغيره بعد عمل الفلش فيه احتمال انه ينسد؟ من ايه طيب
حسب فهمي ان الفلش بينظف داخل الموتور وبينزل مع الفلش والزيت القديم ولا في بقايا ورواسب بتاخد وقت لحد لما تنزل؟

المشاركة الأصلية كتبت بواسطة borio1704

لا... غالبا الجوانات والأويل سيلات مش بنحتاج نفتح فيها الموتور، بس أحيانا بنحتاج نفك أجزاء كتير، وفيه احتمال في بعض الأحيان نحتاج نرفع الموتور من العربية علشان نوصل لأويل سيل مستخبي

بص على الصورة دي...



غالبا الجوانات والأول سيلات اللي بتضرب هي:

1- جوان غطاء التاكيهات
2- جوان الكارتير
3- جوان غطاء التقسيمة (لو كانت على جنزير... إنما لو على سير يبقى مفيش)
4- أويلسيل الكرنك من الأمام
5- أولسيل الكرنك من الخلف.... وده هو المشكلة لإنه بيبقى مستخبي ورا الحدافة عند اسطوانة الدبرياج



بالنسبة للفلش... فده عبارة عن زيت خفيف جدا عليه بعض الإضافات لتنظيف الرواسب، والعملية بتبقى ببساطة عن طريق وضع الفلش مع أو بدال الزيت العادي وتشغيل الموتور كام دقيقة (مل التعليمات دي حتلاقيها على العبوة)...

غالبا لازم يكون الموتور متسخن كويس قبلها

في فترة التشغيل دي زيت الفلش بيشيل الرواسب، وبعدين بننزل الزيت كله ونشوف ... غالبا بيكون الموتور نضف من الرواسب اللي فيه




بس نصيحة... ما تستخدموش كتير... يعني مرة كل كام سنة كفاية قوي



...

باختصار اللي حصل بعد الكلام ده اني سبت العربية للميكانيكي يعمل صيانه قام حط فيها زيت شل احادي الدرجه 50 و 2 علبه زيت شمبر ولما رجعت قال لي ان دي خلطه علشان صوت الكستبانات اللي بيظهر الصبح وبيروح وبيرجع تاني لما العربية تسخن

طبعا كنت قلقان و هنا ع المنتدى نصحوني انزل الزيت خصوصا وهو كان مخلي مستوى الزيت اعلى من العلامه ب لتر تقريبا

قولت استغل الزيت ده وان العلبه بتاعته مكتوب عليها انه للديزل برضه وانه بينظف الترسبات ومشيت عليه مشوار 200 كيلو ونزلته
وعلشان قلقي من الفلاش مش استعملت فلاش و حطيت زيت تخليقي بالكامل لزوجه 5-40 درجه خدمه sm (اعتمدت ان الزيت التخليقي من ضمن مهامه تنظيف الرواسب برضه حتى ولو الرواسب هتنزل بعد اكتر من تغييره ) و فوق الزيت ده حطيت اضافه خاصه للكستبانات حسب ما بيقولوا بتنظفها (هيدروليك لفتر) وبرضه لسه في صوت
وحاليا متابع تناقص الزيت والحمد لله مفيش لحد دلوقت (500 كيلو )

المشاركة الأصلية كتبت بواسطة abou-yahia

زيت الفتيس نصيحه متزودش عن 30 الف خصوصا لو طبيعه قيادتك في الزحمه

اشكرك جدا

طيب لازم اغير الفلتر معاه ولا انضفه بس كفايه (فلتر الفتيس)

اشكرك للتواصل