الموضوع: القواعد الذهبية لاختيار زيت العربية.... موسوعة مبسطة لأساسيات زيوت المحركات

المشاركة الأصلية كتبت بواسطة hassan_attia

بعد اذنك يا هندسه انا معايا عربيه فيرنا موديل 2006 عامله 55 الف كيلو طول عمري كنت بحط شل الاصفر و في اخر سنتين كنت بحط شل الازرق النص تخليقي او كاسترول ماجنتيك ايه رايك لو حطيت نفس اللزوجه بس زيت تخليقي بالكامل (amsoil) و هل في اي زيت في مصر بيوفر اللزوجه دي 10w-50 علشان يبقي يوفر حمايه عاليه ف الدرجات العاليه و برده يبقي خفيف علي البارد ؟

آمسويل عندهم زيوت تخليقية بالكامل بلزوجة 20W-50.. وهما الوحيدين في مصر اللي بيوفروا اللزوجة دي في زيت تخليقي بالكامل.

ودرجة 20W دي تشتغل معاك كويس جدا على البارد لحد درجة 15 تحت الصفر.

مشكلة درجة 50 إنها هتعمل إعاقة شوية في المشي.. فلو بتدور على شوية توفير في البنزين.. يستحسن تجيب زيوت أخف..

ادخل على الموضوع ده..
http://www.nilemotors.net/Nile/481878-a.html

فيه خلاصة كيفية اختيار درجة اللزوجة.. خصوصا في حالة الكتالوجات اللي فيها لزوجات مسموحة كتير .. زي كتالوج الفيرنا


...

المشاركة الأصلية كتبت بواسطة sam30

بعد اذن حضرتك انا بغير بزيت موبيل 20w-50 وعربيتي عامله 100000 كيلو بس المشكله اني بسيبه فتره اطول من سنه لانى مش بستخدم عربيتي كتير يعني مش بعمل بيها 5000 كيلو فى السنه ,فكنت عايز اسال حضرتك هل داه ممكن يضر الموتور ويقصر عمره والا مفيش مشكله ؟

أيوه فيه مشكلة...

تغيير الزيت لازم يكون حسب توصيات الكتالوج... وأغلب الكتالوجات بتقوللك تغير الزيت على 10 آلاف كم (أو 5000 في حالات الخدمة الشاقة) أو 6 شهور... أيهما أسبق.

ليه الزيت لازم يتغير؟؟؟

علشان الزيت فيه إضافات عمرها قصير.. خصوصا لما تتعرض لحرارة الموتور.. وبعد شوية بتلاقي الزيت فقد مميزات الإضافات اللي فيه.. والزيت يبقى كإنه زيت بدائي ما يفرقش غن الزيوت اللي كانت بتتحط في العربيات من 50 سنة.


ده غير إن الناس اللي بتسوق عربياتها مسافات قليلة زي حضرتك غالبا بتبقى مشاويرهم قصيرة...

المشاوير القصيرة دي أحد الحاجات اللي بتقضي على الزيت.. علشان الموتور بيكون لسه بارد وملحقش يسخن وبالتالي أبخرة العادم (غازات الاحتراق بما فيها بخار المية) بتدخل جوه البلوك وتترسب فيه.. وده بيخلي الزيت يتأكسد (بالبلدي كده يخزز).. وبالتالي بيفقد جزء كبير من مميزاته .


أكبر مشكلة في الزيوت المتأكسدة إنها بتبدأ تكون رواسب زيتية تقيلة.. وتتحول بعد شوية لرواسب طينية (Sludge).. زي اللي في الصور دي:






الرواسب دي ممكن تعمل طبقة عازلة بين الزيت والأجزاء اللي المفروض يوصلها الزيت (يعني الموتور مش بيتزيت).. وأحيانا ممكن تزود من المقاومة على حركة الموتور.. والمقاومة دي معناها سحب أضعف واستهلاك بنزين أكتر.

يبقى دلوقتي لازم حضرتك تغير الزيت كل 6 شهور بحد أقصى... أو حسب ما الكتالوج يقوللك.


...

المشاركة الأصلية كتبت بواسطة sam30

انا متفق مع حضرتك فى كل اللى بتقولو بس السؤال الاهم واللى معلش محتاج توضيح منك لو الزيت فقد خواصه فوضع طبيعي داه هياثر على درجه حراره الموتور وداه محصلش معايا لان دى اكتر حاجه انا بهتم بيها اثناء السواقه وبعدين موضوع الاكسده داه لو فيه اختلاط مابين الزيت والميا نتيجه للتبخير اللى بيحصل فداه وارد انه يحصل من اول 100 كيلو فقط!! والا حضرتك انا فاهم غلط؟؟ السؤال الاخير ومعلش اذا كنت هتتاقل عليك ,لو معدل استهلاكى مش بيجيب 1000 كيلو فى السنه تنصحني اغير الزيت والا استمر على النوع داه وامرى لله واغيره كل 6 شهور ؟ انا كنت بسمع احيانا انه ممكن يقعد سنه مش 6 شهور بس !

مش ضروري إن الموتور حرارته تعلى مع فقد الزيت لخواصه... خصوصا إن الإضافات اللي في الزيت أنواعها كتير..
وما نقدرش نحدد أنهي فيهم اللي بدأ يبوظ الأول.

ومسألة ارتفاع درجة الحرارة بيبقى مؤشر عام على صحة الموتور... وممكن قوي يكون بيديك إنذار متأخر.. بعد ما تكون الدنيا باظت فعلا.



من ناحية الأكسدة واختلاط المية بالزيت... فده بيحصل فعلا في كل مرة بتبدأ تشغل العربية وهي باردة بعد وقفة طويلة مش أقل من 3 ساعات... وعلشان تتخلص من آثار بخار المية وغازات العادم لازم تمشي بالعربية مشوار طويل...

علشان كده دايما بيكتبوا في كتالوجات العربيات إن المشاوير القصيرة تعتبر من حالات القيادة الشاقة اللي يجب عندها إنك تغير الزيت بسرعة.

المشوار القصير هو اللي مسافته لا تزيد عن 8 كيلومتر (5 ميل).

ولو عربية حضرتك متشال منها ثرموستات الكوعة.. فتغيير الزيت بسرعة هيكون ضرورة حتمية.. لإن وجوده هو أحد أسباب سلامة الزيت وطول عمره في الموتور.



بالنسبة لمدة بقاء الزيت في الموتور... فالموضوع كالتالي:

أولا.. اتبع تعليمات الكتالوج... أغلب الكتالوجات بتقول 6 شهور في حالات الاستخدام العادي... وبعض الكتالوجات بتقوللك 6 في العادي و3 شهور في حالات الاستخدام الشاق... وبعض الكتالوجات التانية بتقوللك ممكن تقعد لحد سنتين بشرط وجود تجهيزات معينة في العربية...

كتالوج عربيتك بيقول إيه؟؟


ثانيا.. اتبع تعليمات الكتالوج... التعليمات دي للزيوت كلها بغض النظر عن كونها معدنية أو تخليقية.. لإن الكتالوج ما بيحددش غير مواصفات اللزوجة ومستوى الأداء للزيت في أغلب الأحوال.

ثالثا.. اتبع تعليمات الكتالوج... ما تسمعش كلام بتاع الزيت اللي يقوللك سنة ولا الكلام الجميل ده... إلا إذا كان الداتاشيت بتاعت الزيت نفسه اللي هتستخدمه بتقول حاجة زي كده...

رابعا... الزيوت التخليقية بس هي اللي ممكن تقعد سنة... وكمان مش أي زيوت تخليقية.. لإن فيه منها أنواع مختلفة.

تقدر تعرف أكتر عن الموضوع ده لو دخلت هنا:
http://www.nilemotors.net/Nile/453047-a.html



يا ريت تقولنا كتالوج عربيتك بيقول إيه علشان نساعدك أكتر... وحضرتك ما قولتلناش نوع العربية ولا موديلها.


...