الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[/quote]

المشاركة الأصلية كتبت بواسطة hish_hummer

المشاركة الأصلية كتبت بواسطة hish_hummer

بجد الواحد مش عارف يشكرك يا استاذ حسين ازاى ع المعلومات دى كلها ......بجد الف شكر

ليك .......
لا شكر على واجب .. انا اللى بشكرك على كلامك الجميل ده

ودى اول مشاركة ليا فى المنتدى ككل

وإن شاء الله ما تكونش آخر المشاركات ونستفيد من تجارب حضرتك

وانا كنت اتعلمت من سنة كدة وبعدين رجعت من 3 شهور كدة اتعلم تانى علشان الرخصة والحمد لله طلعتها

الحمد لله ... ودى تعتبر نسبة 20% من اهمية موضوع القيادة ... انا الاول كنت فاكر ان اهم حاجة هى الرخصة ... طلع موضوع الرخصة ده اسهل حاجة .. لان كل التدريب يدور حول اجتياز اختبار الاقماع فقط لا غير .. يعنى حصتين ثلاثة والموضوع يخلص

ورايح كمان كام يوم اسوق تانى .....علشان حتة الممارسة دى ....
هو ده الكلام السليم والمية مية ... التدريب ثم التدريب ... بدون استعجال وبشىء من الصبر وكل شىء هايكون تمام التمام إن شاء الله

وبجد الواحد اتعلم كتير من الموضوع اللى انت عملتة دة وبشكر برضة استاذ محمد فوزى
الحمد لله رب العالمين .. إن فيه استفادة ... وطبعا الفضل يرجع لاستاذنا الفاضل محمد فوزى ندعوا الله انه يكون بخير وفى احسن حال وكمان الاستاذ احمد والاخوات الفاضلات اميرة ولبنى وسارة وكل الاصدقاء موش عايز انسى اسم منهم

عندى سؤال ......بمناسبة العجلة اللى نامت منك هو اية انسب مكان نحط فية الكوريك ؟؟؟؟
موضوع الكوريك يتوقف على حاجتين
نوع العربية
ونوع الكوريك
يعنى بالنسبة لى عشان العربية تويوتا كورولا 1984 والكوريك نوعه "تمساح"
على فكرة الكرويك ده كويس قوى وتقدر تركبه من خلف العربية ومن الامام ... عشان لو العجلة نامت لا قدر الله ... هاتلاقى العربية قربت من الارض بشكل كبير قوى من الجانب ... وموش هاتقدر تركب كوريك بسهولة من جانب العربية ... والله اعلم

يظهر النقاط المناسبة فى الصورة التالية




اهم حاجة تبعد عن النقاط المتحركة .. يعنى لا يوضع تحت الاكس اللى ماسك العجلة الامامية "الاكس المتحرك" ... موش عارف اسمه ايه
ولا يوضع مثلا تحت تانك البنزين


بالنسبة لحضرتك لو كتبت لى نوع العربية ايه يمكن يكون الشكل مختلف .. فى الحالة دى ممكن ارفع لك صورة توضح النقاط المناسبة لرفع العربية لو وجدتها إن شاء الله

مع اطيب التمنيات
اخوكم حسين غزالة

المشاركة الأصلية كتبت بواسطة lobna_yaseen

إزيك ياأستاذ حسين وإزيكم جميعا

الحمد لله رب العالمين ... انت عاملة ايه .. ندعوا الله انك تكونى بخير انت والاسرة الكريمة

بجد ياأستاذ حسين مجهودك لايقدر بثمن والواحد مش عارف يودى جمايلك دى فين

الله يكرمك يا رب ويبارك فيك وفى اولادك وفى اسرتك واصدقائك ويسعدك دنيا وآخرة ... شكرا لحضرتك على كلامك الجميل وتشجيعك المستمر لى

أنا النهارده داخله أحكى تجربتى الفظيعه لأنى وديت إبنى الإمتحان بدل ما أدفع شهر كامل للباص على كام يوم عملت ابو العريف وقلت أنا اللى هوديه

عشرة على عشرة ... برافو عليكى ... ده انت اشجع منى بكثيير

أنا عموما إلى الآن كل مشاويرى بسيطه وداخل المعادى وده غصب عنى مش بمزاجى لو على أخرج بره المعادى وأواجه الطوفان الحقيقى للسواقه بس الظاهر إن ربنا عايز يسترها معايا لغاية ماأتمكن لأن كل حياتنا فى المعادى وأهلنا وشغلنا وخروجاتنا

يا ستى ... ربنا يدومها نعمة .. ومانشوفش الزحمة ابدا ... وكويس جدا لك وللعربية ...

المهم مدرسة إبنى بعيده شويه لأ شويتين تلاته عن البيت رحنا الحمدلله من غير خساير

ربنا يستر لك طريقك ... واكيد المشوار ده يزيد عندك الثقة ... وده شىء كويس جدا .. برافو عليكى

بس اللى ملاحظاه فى سواقتى إنى حاسه إن الناس كلها عارفه إنى مبتدءه

وده كويس مافيش مشاكل .. عشان كل واحد يعمل حسابه ... خصوصا لو كان عنده شوية دم واحترام ... وبيراعى المبتدأ اللى بيسوق امامه ... ومايحاولش يربكه بالكلاكسات والحركات اللى مالهاش لازمة

وبحس إن ممكن لو واحد بيجرى جنبى هيسبقنى عشان بلاقى أغلب اللى حواليا بيعدوا من جنبى عشان يسرعوا مع إنى والله وصلت لل80 أحيانا

اتت كده ممتازة ... والمفروض داخل المدينة السرعة اعتقد لا تزيد عن 60 كيلوا اساسا .. وانت وصلتى الى 80 كليوا فى الساعة وده عشرة على عشرة ... آه كل العربيات الحديثة عداد السرعة 200 كيلوا واكثر ... لكن انا بجرى حسب الشارع اللى امامى وحجم الازدحام اللى فيه ... وحتى ولو فاضى والشارع سالك ... المشى على 80 كيلوا فى الساعة ممتاز جدا ... وموش هايفرق فى الوقت مع اللى ماشى بسرعة 120 غير فى حوالى 5 دقائق ... ده لو انتم كنتم مسافرين مشوار 100 كيلوا ... يعنى هو يوصل قبلك بحوالى 6 دقائق ... وقت تافه قوى ولا له تأثير فى أى شىء

بس الحمدلله مش كلهم يعنى فيه ناس بتمشى ورايا وحاسه إنها سريعه

فعلا بيقابلنى ناس محترمة .. كثيير .. وبكون سعيد لما الاقيهم مشايين ورايا ولمسافة كبيرة وموش عايز يعدى منى ... وشايف انى سايق "بعقل وبدون تهور" وبدون توقف وبدون حركات ... بخلاف اللى عايز يجرى ... اتركه يجرى مافيش اى مشاكل المهم انى ابعد عنه على قدر المستطاع واوسع له الطريق إن امكن ذلك دون تعريض نفسى للخطر

بس المشكله إنى لسه خايفه حاسه إنى فى وسط البحر والعربيات اللى حواليا كأنها الموج بيحاصرنى من كل مكان

فعلا المشى فى السريع يخوف جامد ... خصوصا لما تحسى انك بالنسبة لهم ولا حاجة ... وهما داخلين مع بعض سباق ... حتى العربيات النقل اصحابها فاكرين نفسهم سايقين عربيات ملاكى ... "عنبر العقلاء" ... اهم حاجة انك تركزى فى اللى امامك كويس جدا وتلتزمى بحارتك ... ومتخافيش منهم ... اللى عايز يجرى ... يجرى ...

اللى مابيعرفش يعوم هيفهم قصدى إيه مع إن الإحساس ده عمره ماحصل لى وأنا بسوق الأتوماتيك

سواء اوتوماتيك او سيارة عادية .. اول الواحد ما يمشى فى الطريق السريع يشعر بالخوف .. لكن انت عايزة الحقيقة ... اعتقد ان قيادة الاوتوماتيك "متعة" ... واحلى واحسن واريح بكثيير من السيارة العادية

يمكن من خوفى من الغيارات اللى لغاية الآن مش عارفه أضبطها يعنى كان فيه مكان مكسر وفيه زلط كبير وصغير فكنت حاسه إنى بكسر العربيه لما كنت بمشى على التانى أرجع على الأول ألاقى صوت الموتور عالى ومش عارفه الصح إن الواحد كل شويه يغير على الأول وبعد دقيقتين يرجع للتانى وهكذا ؟ يعنى ده مش بيبوظ العربيه وينفع الواحد يمشى بالأول مدة 10-15 دقيقه لو الطريق مكسر ماأنا سرعتى بتبقى 20 أو أقل ؟

شوفى ... الغيار الاول ده ... مالوش اى لازمة غير تحريك العربية ... يعنى اول العربية ما تتحرك معاكى .. ثوانى ... وانقلى الغيار التانى على طول ... خصوصا لو الطريق ماشى امامى
افترضى ان انت واقفة فى الإشارة وبالكاد السيارة بتتحرك وترجع تانى توقف بعد ثانية واحدة ... خلاص يبقى مافيش داعى انقل الغيار الثانى ..

لكن
لو العربيات كانت واقفة فى الإشارة ... وبدأت فى التحرك لمسافة طويلة .. خلاص هانقل الغيار الثانى ... وامشى معاهم عادى

الافضل انى انقل الغيار التانى "مادام العربية اتحركت"

استخدمى الغيار الاول فى حالتين فقط ... ان العربية تكون واقفة تماما او شبه متوقفة

"مثلا وانت طالعة على المطب" ... والعربية اتعلقت على المطب شبه بتتحرك ... الافضل هنا الغيار الاول ... لان العربية تقريبا متوقفة

الاستخدام الثانى ... وده مهم جدا جدا جدا .... لو كنت طالعة شارع مرتفع قوى .. مرتفع جامد ... وكنت ماشية على الثانى ببطء جدا ... اول ما تقربى من الشارع ده ... انقلى على الغيار الاول .... لان العربية تقيلة ... والشارع عالى جدا ومرتفع ... ومحتاجة الى غيار قوى .. يحرك العربية ويدفعها الى اعلى .... الموضوع ده بحرصك منه ... حصل معايا ... وممكن يقابل ناس كثيير خصوصا لما تسافرى اسكندرية وتلاقى شوارعها عالية ومرتفعة وبتنخفض خصوصا اللى بجوار الكورنيش.

واللى لاحظته كمان إنى مش عارفه أدخل على الملفات بالسرعه البطيئه اللى بتحكى عنها ياأستاذ حسين أو اللى أنا بتخيلها من كلامك يعنى كنت عاوزه أسألك تقريبا كده بتبقى على سرعة أد إيه وانت بتلف الملف؟

عمرى ما هادخل على ملف وسرعتى هاتزيد عن 20 كيلوا فى الغالب هاتكون بين 10 و 15 تقريبا ...
خصوصا لو كان الملف "على ضيق"
او الملف نازل على شارع رئيسى والعربيات فيه مسرعة
او ملف مزدحم بالعربيات او المشاة

ببساطة ... انت داخلة على الملف
لو كان فيه عربية امامك ... ابسط حاجة تحاولى تحافظى على مسافة بينك وبينها ...

هاتتركى العربية تمشى لوحدها ...
لو كانت سريعة ... اضغطى على الفرامل خفيف ... ورجلك تفضل مستعدة فوق الفرامل

لو كانت مازالت سريعة ... اضغطى على الفرامل مرة تانية ...
المهم انى
ادخل على الملف وانا بضغط الفرامل
ادخل على الملف وانا بتحكم فى سرعة العربية "بالفرامل"
ادخل على الملف وانا احاول ألا اتوقف تماما

ولو موش محتاج انى اضغط الفرامل على اساس ان العربية مازالت بتتحرك ... يبقى رجلى تكون فوق الفرامل حتى ولو موش هاضغط عليها ... جاهزة لاى طوارىء ... وطبعا رجلى الثانية اساسا ضاغطة على الدبرياج على طول الخط

فيه فرق بين انى اتوقف بالعربية ... وبين انى اترك السيارة تسير بالقوة الدافعة واتحكم فى السرعة بالفرامل
لو انا شايفها داخلة على الملف بهدوء
خلاص موش هاضغط على الفرامل ... وهاتركها تمشى بسرعتها بهدوء
لو حصل اى حاجة امامك انت اصلا ضاغطة على الفرامل او رجلك على الفرامل

طيب لو كان الشارع سالك .. والملف مافيهوش اى مشاكل
خلاص
انا اساسا داخل على الملف وناقل مثلا الغيار الثانى
ده على اساس ان العربية ما زالت بتتحرك
اول ما الاقى الشارع سالك ... هارفع رجلى عن الدبرياج وازود بنزين و امشى على طول

طيب ولو الشارع موش سالك زحمة مثلا
لو العربية سرعتها هادية ... هاتركها تمشى لوحدها ... وانا ضاغط على الدبرياج ورجلى فوق الفرامل ...
لو الشارع وصل لدرجة التوقف
خلاص اضغط على الفرامل بالكامل
وانقل الغيار على الاول او "امور الفتيس" حسب الظروف


أيوه صحيح وكمان كنت عاوزه أسأل لو أنا على الغيار الرابع مثلا وسرعتى عدت الستين وهديت السرعه لو نقلت على التانى على طول فيها مشكله ولالأ ؟

بالنسبة لى ...
لو سرعة العربية نزلت اقل من 40 كيلوا ... انقل الغيار التانى
لو السرعة نزلت عن 60 كيلوا ... انقل الغيار الثالث
لو السرعة اعلى من 65 تقريبا .. انقل الغيار الرابع

وتقريبا الرابع ده داخل المدينة صعب قوى ان الواحد يختاره من كتر الزحمة
المشى داخل الزحام اغلبه على الثانى والثالث

يعنى انا شايف ان الطريق هايتوقف خلال ثوانى
اضغط ضعطة حلوه على البنزين وانا ناقل الغيار الثالث ... واترك العربية تمشى لوحدها الشوية اللى فاضلين ...
لو الشارع مشى .. خلاص استمر فى السير
لو الشارع توقف .. اضغط على الفرامل واتوقف

فيه ناس تانية
تنقل الغيار الرابع وتمشى عليه حتى ولو ثانية واحدة
وقبل الزحام ... تضغط فرامل جامدة وتتوقف بالعربية
وترجع تانى تنقل الى الغيار الثانى او الاول حسب سرعة العربية

طيب ما انت كده كده واضح انك هاتقف بعد ثوانى ... ليه لزومه تنقل الرابع وترجع تنقل الثالث او الثانى ... وتفضل تلعب لعبة الكراسى الموسيقية


انا عن نفسى لا احب ضغط الفرامل كثيير ... ونقل الغيارات كثيير
ممكن استمر فى السير بهدوء ... وعلى ما اوصل للزحام ... يكون ربنا سلكها ... واستمر فى السير خلف تجمع السيارات بشكل عادى


لأن الطريق كان سالك والعربيات بتجرى بسرعه جدا وطبعا أنا أقل منهم برضه وأنا على الرابع بس مره واحده لاقيت الشارع فى آخره وقف على ماهديت وقربت أوقف العربيه وأنا على الرابع بس ماوقفتش فنقلت من الرابع على التانى فكده صح ولا إيه ؟

عشرة على عشرة
اولا: لانك نظرتى الى الامام بمسافة كبيرة .. واكتشفتى ان الشارع متوقف او شبه متوقف
ثانيا: انك اول ما اقتربتى اخترتى الغيار السليم .. الغيار الثانى ... لانك اكيد سرعتك نزلت اقل من 40 كيلوا
مافيش مشاكل انى انقف من الرابع الى الثانى
او من الرابع الى الثالث
او من الرابع الى الاول
ما فيش اى مشاكل ... المهم ان الغيار يكون مناسب لسرعة العربية

وكمان (يالالا الظاهر الواحد لما يسوق بجد فى شوارع سريعه كل شويه هزقكم بالأسئله بتاعتى)

ههههههههههههههههههههههههه
بالعكس
الاسئلة البسيطة بالنسبة لنا
ممكن تكون مهمة جدا جدا لاى سائق مبتدأ
يعنى الواحد لازم يفكرة بعقلية ان موش كل اللى بيقرأ الكلام ده محترف فى القيادة
ولو أن يوجد كلام كثيير بين السطور مفيد للاثنين سواء كان مبتدأ او حتى محترف والله اعلم

أن الصح إنى لغاية ماأوقف العربيه من الرابع كل شويه ألاحظ السرعه وأنزل بالغيار الأقل لغاية ما أوصل للتانى

شوفى
انت ماشية على الرابع مثلا
وشايفة ان الطريق هايبدأ يتوقف
اترك السيارة تسير بدون الضغط على اى حاجة
لو الشارع مشى فى امان
خلاص
هانقل الغيار مثلا
الثالث لو كانت سرعتى نزلت عن 60 كيلوا
الثانى لو كانت سرعتى نزلت عن 40 كيلوا
او هاستمر فى السير على الرابع ... لو كانت سرعتى اعلى من 65 كيلوا او 70 كيلوا

طيب لو كان الشارع هايتوقف
اول ما اقترب من الزحام ابدأ اجهز رجلى على الفرامل
اقتربت جامد
اضغط على الدبرياج
ورجلى الثانية فوق الفرامل واضغط على الفرامل ضغطاط خفيفة ... بحيث العربية تهدى لكن لا تتوقف تماما
اقترب جدا .. ابدأ اهدى العربية واتحكم فى سرعتها بالفرامل
توقف الشارع تمام
خلاص اضغط على الفرامل بالكامل واتوقف انا ايضا

ولا عادى إنى أهدى خالص وبعدين أنقل على طول للتانى من الرابع ؟ وهو كلكم كل شويه لاتزيد عن دقيقه أو دقيقتين بتغيروا للغيار الأعلى أو الأقل ولا أنا اللى عاملاها لعبه وكل دقيقه بغيار شكل ؟

كلامك سليم
مافيش داعى انقل الغيارات عمال على بطال
ما دام الشارع شايف انه هايتوقف ... اترك العربية تسير لوحدها
وبعدين عملية نقل الغيار حسب المسافة اللى امامك
شايف ان الشارع سالك ومية مية
خلاص هانقل وهامشى على طول
هانقل الغيارات ورا بعض بدون مشاكل

لكن لو الشارع شكله هايتوقف
من وجهة نظرى مافيش داعى انقل غيار اعلى لمدة ثانية او ثانيتين .. وارجع تانى اتوقف
واضغط على الفرامل بشكل جامد



حاجه تزهق بجد وصحيح لما بقف بالعربيه عشان زحمه أو تقاطع أكون على الغيار الأول ولا التانى ؟
لو العربية مازالت بتتحرك بهدوء ... اكن فيه واحد ماشى جنبها
خلاص انقلى على الغيار التانى بدون تردد

لأنى برجع على الأول لغاية ماالعربيات تتحرك ولا خلينى على التانى مادام العربيه مافصلتش ؟
تمام كده ... ما دام العربية بتتحرك انقلى على الغيار التانى
لو العربية توقف تماما او كانت يا دوب بتتحرك بصعوبة قوى ... انقلى الغيار الاول
ياه دا أنا هوريكم أيام لو مستعدين لسماع تجاربى فى السواقه
ههههههههههههههههه
والله الكلام ده كله هاتخدى عليه ثواب كبير
لانى اعتقد ان فيه ناس كثيير قوى بالنسبة لها الكلام ده مهم جدا جدا
وموش عيب خالص ان الواحد يسأل مرة واثنين وثلاثة
مافيش اى مشاكل
اهم حاجة ان الواحد يفهم كويس

وكنت عاوزه أسأل كل مبتدأ إبتدى معانا الموضوع لغاية دلوقت إنت خايف لا تعمل حادثه ولا خلاص بقى الموضوع عادى ؟

الخوف بالنسبة بيقل كثيير
لكن عشان احنا مبتدأين
اول ما يواجهنا اى موقف سخيف ... الخوف يرجع لنا بسهولة
اللى يساعد الواحد على مواجهة الخوف ... التدريب ثم التدريب ... والفهم كويس قوى

لأنى بحس إنى بحارب وأنا نازله الشارع بس الحقيقه الإحساس ده ما بيجيش غير على الطرق السريعه اللى فيها العربيات بتمشى بسرعه جدا

ده الواحد لو اعصابه حديد
كفاية يمر بجواره سيارة شاحنة حاوية ... عنده 20 عجلة
ههههههههههههه
رعب على الطريق
اهم حاجة ... امشى داخل الحارة بتاعتك
اوعى تمشى على الخطوط الموجوده بين الحارات
واتركى مسافة كافية بينك وبين العربيات الموجودة امامك


يعنى مثلا أنا فى الزحمه ببقى مطمئنه نفسيا أكتر من الطريق السريع حاسه إنى ممكن ماألحقش أقف فى الوقت المناسب وأعمل كارثه

بعد الشر
هو فعلا المشى فى الزحام مافهوش مشاكل غير فى التقاطعات والميادين خصوصا لو كان مفيش عسكرى مرور ...
وكل واحدعايز يعدى بمعرفته
هنا تظهر الخطورة على المبتدأ
العربيات ماشية خلفك
وعايزينك تعدى التقاطع ... قبل العربيات الاخرى
وانت خايف تخبط حد فى التقاطع ... برغم انك ماشى ببطء

المهم إنى رجعت الحمدلله بسلام من غير حوادث

الف مليون سلامة

أيه رأيكم فى هذه التجربه وياريت تجاوبونى على الأسئله بتاعتى علشان بناءا على ردكم هأطمن واصلح أغلاطى وطبعا يأأستاذ حسين منتظره ردك بالخصوص عشان إنت ماشاء الله عامل زى أستاذ محمد فوزى فى الأسلوب اللى بيفهم اللناس بالتفصيل الدقيق وياسلام لو أستاذ أحمد سعد فهمنى الغلط بتاعى كمان وشاكره لأى عضو من أعضاء المنتدى يقولى رأيه
سلامو عليكم

وعليكم السلام ورحمة الله وبركاته
فى رعاية الله

مع اطيب التمنيات
اخوكم حسين غزالة

السلام عليكم ورحمة الله وبركاته

اليوم حصل بعض المواقف السخيفة
وفضلت انى اكتب عليها تعليق سريع وهام من وجهة نظرى
وحبيت انى احرص كل الاصدقاء المبتدأين فى القيادة من هذه المواقف

سبق واتكلمنا فى موضوع التقاطعات ... تحت عنوان "احترس من التقاطعات"

اليوم وفى احد الميادين الضيقة الصغيرة "ميدان ابن الحكم"
دخلت على الميدان المرة دى بطريقة صحيحة
كان اليوم الجمعة
والحركة معقولة موش زحمة وموش فاضى قوى

المهم انظر الى الصورة عشان الشرح يكون واضح


انظر الى السيارة الزرقاء ودى بتاعتى انا اللى راكبها
المرة دى دخلت على الميدان بطريقة صحيحة
مشيت على المسار الخارجى للميدان ... لانى طالع على طول
اما لو كنت هالف يعنى سوف يتم الدوران مع الميدان يبقى الافضل انى اكون قريب من الجزيرة الوسطى مثل السيارة الصفراء

المهم انا راكب السيارة الزرقاء
وتقريبا دخلت على الميدان بطريقة صحيحة جدا
وبعد الانتهاء من ملف الميدان
والسير فى الطريق الطوالى
المفاجأة ... سيارة تاكسى وافقة بعرض الشارع عشان ياخد زبون

تيخلوا انتم ... سيارة تاكسى واقفة .. موش فى نص الشارع ... ودى واقفة زى الصورة تمام
يعنى لو كان بوكس عامل كمين "كنا قلنا معلهش" دى شغلته ...

وكمان صاحب التاكسى راجل كبير ... يعنى المفروض خبرة

المهم فى اللحظة اللى انا قررت اعدى فيها من التاكسى
وبالرغم انى دخلت فى منتهى الهدوء والحرص
من اول ما دخلت الميدان وانا ماشى بهدوء وحرص

المفاجأة فى نفس اللحظة اللى بعدى فيها من السيارة التاكسى ... تظهر سيارة نص نقل تعدى من على شمالى

فى الوقت اللى انت كل تركيزك على السيارة التاكسى وانك تعدى بدون ان تحتك بها
تظهر العربية النص نقل من على شمالك "عايز يخطف الطريق" زى ما بيقولوا

لولا ستر ربنا
وانى داخل بهدوء ... طبعا كان ممكن يحصل مشاكل على سبيل المثال
احاول انى امشى يمين شوية .. فى الحالة دى اخبط التاكسى
او انى ادخل على طول .. فى الحالة دى اخبط العربية النص نقل
لولا انى دخلت بهدوء .. ربنا سترها معايا

طبعا انا غلطان ... غلط كبير
غلطان فى ايه ؟
الاول: بمجرد انى دخلت الملف .... لم اتوقع انه يوجد اى عربية او اى معوقات او اى حد أنا آسف غبى "يقف الوقفة دى" بعربيته
ثانيا: المفروض انى كنت وقفت خلف سائق التاكسى "معلهش الغبى" لحد ما تخلص المشكلة اللى هو تسبب فيها
ثالثا: كان المفروض انى اتحلى بالصبر وماكانش لازم اعمل المغامرة دى واعرض عربيتى للمشاكل
رابعا: كان المفروض انى لا ازيد سرعة السيارة خالص ... ما دام هناك معوقات

اما لو كنت مكان السيارة النص نقل
نفس الشىء كان لازم يعمل حسابه كويس ... وبالبلدى كده "مايحشرش نفسه" بجوارى
لانه ضيق على المرور بشكل جامد .. كنا هانخبط بعض احنا الثلاثة
عشان انا موش عندى صبر ولا حكمة فى الموقف ده
ولا هو عنده صبر
وسائق التاكسى الله يسامحه "لا تعليق عليه"


ده موقف بصراحة اتعلمت منه كثيير
وكنت ماشى بالعربية وانا مضايق
وشاورت لسائق التاكسى وقلت له بصوت عالى "حرام عليك" دى وقفة دى
غصب عنى .. الواحد بيشوف حاجات موش عايزة تكون مطلع رخصة ولا حتى كرنيه مترو ههههههههههه
حاجات فى منتهى الذكاء

رببنا يسترها مع الجميع



الموقف الثانى
انى اليوم قررت ان احسن حارة امشى فيها بدون توقف هى الحارة الوسطى
ولنا كلام فيها بعد كده إن شاء الله
ماشى فى الحارة الوسطى واللى عايز يجرى من على شمالى يجرى
واللى عايز يتوقف بسيارته على اليمين يتوقف
واللى عايز يفتح باب عربيته مافيش مشاكل
عايز يمشى براحة على اليمين يمشى

المهم انى فى الحارة اللى فى النص ... والشارع ماشى بطريقة معقولة
واذا قابلنى اى "يوتيرن" انا كده كده بعيد عنه ...
ومريح دماغى ... لا بنقل نفسى من الحارة دى ولا من الحارة دى

المشكلة فى ايه
لو عربية عدت من على شمالك ... ده طبيعى جدا
وانا اصلا تارك الحارة اليسرى عشان اللى عايز يعدى ... اتركه يعدى ... واللى عايز يجرى .. اتركه يجرى

الغلاسة والرخامة وقلة الادب
لما واحد يعدى من على يمينك
المشكلة موش لما يعدى من على يمينك
المشكلة لما يكون اللى بيعدى "اوتوبيس اخضر متوسط" تابع لنقل الركاب
العربية موش صغيرة
وكمان انت رايح فيه
ده احنا ثانيتين وهانقف كلنا
موش هاقول لكم غير انه كان بينى وبينه شبر
تخيل سائق متخلف زى ده ... كان ممكن يعمل معاك ايه
ممكن يكون هو عارف انى موش هاغير حارتى مهما حسل وملتزم بالسير داخلها
وده هو اللى شجعه يدخل الدخلة دى
لكن ليه من الأول
الواحد بقى موش عارف يمشى ازاى فى البلد دى

افتكرت
ان صاحبنا كان بينزل ركاب
وانا عديت منه
وهو بدل ما يعدى من على شمالى زى ما عديت منه
راح معدى من على يمينى ... فاكر نفسه راكب عربية ملاكى صغيرة
اصبح فيه عربيات بتعدى بسرعة من الشمال وهما صح مافيش مشاكل
وصاحبنا بيعدى فى نفس الوقت من على اليمين اللى مساحته اصلا ضيقة ..



الموقف التالى وده خطر جدا جدا جدا
وسبق اتكلمنا قبل كده
وهو باختصار يا جماعة
الله يكرمكم كلكم وربنا يسترها معاكم
اكرر مرة عاشرة وموش هازهق

لو كانت الإشارة خضراء
موش معنى كده ان الطريق سالك
موش معنى كده انى ادخل بسرعتى
اليوم كانت الساعة الثامنة والنصف صباحا "يوم الجمعة"
الطريق سالك وكويس
والإشارة خضراء "محطة المحكمة" فى مصر الجديدة

سيدة كانت راكبة عربيتها وداخلة على التقاطع بسرعة
آه فيه عربيات كانت بتجرى وعدت التقاطع
وانا مافيش ثوانى ... بقول لام الاولاد: شايفة العربيات بتعدى التقاطع ازاى
ثوانى وظهرت عربية السيدة الفاضلة ... داخلة على التقاطع بسرعة
فى نفس الوقت طالع لها 3 او 4 عربيات ... اللى هما ماعندهمش صبر
وبالبلدى كده بيقولوا "طالع ببوز العربية" على الطريق
وغير ملتزم بالتوقف خلف الخطوط البيضاء

طبعا السيدة المسكينة دخلت بسرعة على التقاطع على اساس ان الاشارة خضراء
وثوانى كانت هاتخبط فى العربيات المتقدمة فى التقاطع

انظر الى الصورة


فى الصورة تظهر العربيات الحمراء اللى ماعندهمش صبر ولا احترام لإشارة المرور
والسيارة الصفراء دخلت على التقاطع بسرعة على اساس ان الإشارة خضراء
طبعا ربنا سترها
انا دخلت الحمد لله بهدوء على الرغم من ان الإشارة خضراء
العربيات الحمراء ... جريت ... واعطيت لها فرصة انها تعدى بالسلامة
العربيات الخضراء ... بمجرد ما اقتربت من التقاطع ... بصراحة فى منتهى الادب والالتزام ... كلهم وقفوا خلف الخطوط البيضاء فى انتظار أن الإشارة تفتح لهم

وطبعا لازم تنظر الى السيارت الخضراء كويس فى الناحية اليمين
وتنظر الى السيارات القادمة من الناحية اليسار "معلهش الصورة موش كاملة"
وتنظر اكثر من مرة يمين وشمال قبل ما تدخل على اى تقاطع


فى الحقيقة كل يوم يظهر لى ان الكلام اللى بيتكتب ده الى حد كبير ... صح جدا
واحنا يا جماعة موش بنكتبه للتسلية
وبكرر مرة تانية وثالثة
الكلام ده موش للتسلية
لازم نفهمه كويس ونفتكره كويس جدا طول ما احنا ماشيين فى شوارع المحروسة خصوصا

وربنا يحفظكم من كل سوء
وربنا يسترها مع الجميع

فى انتظار التواصل

مع اطيب التمنيات
اخوكم حسين غزالة