الموضوع: القواعد الذهبية لاختيار زيت العربية.... موسوعة مبسطة لأساسيات زيوت المحركات

المشاركة الأصلية كتبت بواسطة turbuooooo

ألف شكر يا بش مهندس أحمد كان ليا شرف الاستفادة منك وعلي الرغم من اني مهندس وخدت دورة زيوت من اكسون موبيل الا اني التخبط لما الحاجة كانت خاصة بيا

والله أنا اللي ليا شرف إفادة كل اللي بيدخلوا للموضوع ويستفيدوا معلومة جديدة تنفعهم في حياتهم.


وبالنسبة لموضوع اللخبطة ده.. صدقني.. أنا كمان بيحصللي لخبطة .. بالذات في القرارات المهمة.. ولازم أستشير ناس تانية.

مع إني واخد كورسات في كيفي اتخاذ القرارات .. بس الدماغ بتهنج والمعلومات بتدخل في بعض وتعمل قفلة :) :) :)



...

المشاركة الأصلية كتبت بواسطة wesam elmansy

سؤال فنى يا بشمهندس
و أنا بفحص سائل التبريد فى القربه اللى جنب الردياتير لقيت ان سائل التبريد مملؤ اكتر من علامة الفل
مع ان الكتالوج بيقول ان لا تملئ سائل اكتر من العلامه ؟
احنا دلوقتى فى فصل الشتاء و العربيه كويسه هل هناك ضرر و المفروض اشفط السائل الزياده فى محطة البنزين و لا اسيبه زى ما هو

مفيش أي ضرر إن شفط السائل الزيادة.. بل بالعكس.. الشفط أفيد .. وسواء الجو شتا أو صيف.. المفروض إنك ما تملاش القربة أكتر من علامة الـMax

بس سؤال صغير... هو حضرتك راجعت على مستوى المية إمتى؟؟

يعني والعربية باردة ولا والعربية سخنة؟؟؟


لو كانت العربية سخنة.. يبقى حضرتك مش محتاج تشفط الزيادة...

ليه؟؟

الطبيعي إن مستوى المية في القربة يزيد لما العربية تسخن... لإن المية لما بتسخن في الرادياتير ضغطها بيعلى نتيجة تكون بخار المية .. ولازم الضغط الزيادة يطلع علشان ما يحصلش تسريب..

الضفط الزيادة بيطلع ومعاه بخار (يعني مية) .. ولو استمر الموضوع بالشكل ده المية هتنقص.. ولازم كل فترة نزود مية.

والقربة معمولة علشان تستقبل بخار المية وترجعه تاني للرادياتير لما يبرد.. لإن لما المية تبرد الضغط بيقل وتبدأ تشفط المية الزايدة من القربة ..

وبكده نحافظ على مستوى المية في دايرة التبريد ثابت باستمرار.



...