الموضوع: القواعد الذهبية لاختيار زيت العربية.... موسوعة مبسطة لأساسيات زيوت المحركات

المشاركة الأصلية كتبت بواسطة michohat

لو كتالوج العربيه مكتوب فيه اكتر من لزوجه انهي لزوجه افضل بالنسبه لي
وكان في مقوله متعارف عليها سابقا ان الزيت التقيل بيطول عمر الموتور ويحميه ولكن بيزود استهلاك البنزين والعكس في الزيت التقيل
فلو دمجنا نصيحه الكتالوج مع المقوله دي بمعنى اننا نستعمل اتقل درجه الكتالوج بينصح بيها هل كده بحمي الموتور وازود عمره على حساب استهلاك البنزين؟؟

هنفترض أولا إن اللزوجات المتعددة دي تنفع كلها في الجو اللي هتشتغل العرببة فيه.

في الحالة دي.. فعلا اللزوجة الأتقل بتحمي أكتر.. بس ما ننساش بردو إن اللزوجة متقسمة لجزئين..

جزء بيشتغل مع بداية التشغيل.. ويفضل تكون خفيفة بالقدر الكافي للوصول لأجزاء الموتور بسرعة.. بس ما تبقاش خفيفة جدا بحيث إنها ما تعملش الحماية الكافية بردو

أما الجزء التاني.. فهو الخاص بالحماية أثناء التشغيل.. ودي اللي بنتكلم عليها إنها لما تزيد بتحمي أكتر بس استهلاك البنزين هيزيد.

عموما.. بعض الكتالوجات بتنصح باستخدام اللزوجات الخفيفة ما عدا في حالات التحميل الشديد على الموتور.. زي قطر السيارات مثلا أو صعود مناطق جبلية أو قيادة العربية وهي محملة بأوزان عالية.


...

المشاركة الأصلية كتبت بواسطة michohat

طيب حاليا بستخدم لزوجه مش منصوصه في الرسم المرفق من كتالوج العربيه ولكنها تجميعه من 2 لزوجه منصوصه
يعني بستخدم 10- 40
فهل الافضل الالتزام نصاً باللزوجه المدرجه مثلا 20-50 او 15-40 او 10-30 ( اعتقد غير مناسب للمناخ المصري)
وعليه فان افضل لزوجه متاحه من المعدني 20-50
و التخليقي 15-40
وظروف سواقتي تعتبر مجهده للعربيه لانها مشاوير قصيره كل يوم
فالمفضل هنا المعدني ولا التخليقي

حضرتك لازم تلتزم باللزوجات الموجودة في الكتالوج بس... التجميعة دي غير مضمونة العواقب.

والمناخ المصري متغطي فعلا في الرسمة اللي حضرتك حاططها، لإن كل الدرجات منتهية بأسهم لدرجات أعلى من 40 °م.

بالنسبة للسواقة المجهدة... فالمفضل هو تغيير الزيت على فترات أقل.. يعني 5000 كم.


بس سؤال... هو حضرتك بتمشي مسافات صغيرة كتير كل يوم .. ولا هما مرتين أو تلاتة في اليوم وخلاص؟؟

لو العربية بتشتغل كذا مرة كل يوم (6-7 مرات مثلا) فالأفضل هو الزيت التخليقي... علشان الميزة الأساسية للزيت التخليقي هي عند بداية التشغيل.

إنما لو هي مرتين وخلاص... فالأفضل من وجهة نظري هو الزيت المعدني.. ومدة التغيير تعتمد على حسب توصيات الكتالوج.



هو فيه ملحوظة صغيرة... احتمال كبير تكون توصيات اللزوجة دي موجهة للسوق الأمريكي والكندي لإن لزوجة 5w-20 ما شفتهاش في أي توصيات للشرق الأوسط في الكتالوجات اللي عدت عليا.. وأتوقع إن الكتالوج المطبوع اللي جاي مع العربية يكون فيه اختلاف علشان اختلاف جو منطقة الشرق الأوسط.. فياريت تتأكد من الكتالوج المطبوع أو من أي زميل يكون عنده نفس العربية.



...

المشاركة الأصلية كتبت بواسطة michohat

دي صورة من كتالوج العربيه هنا
و العربيه بتدور في اليوم مرتين والمسافه المقطوعه في المره الواحده اقل من 5 كيلو
فهل احول للمعدني بغض النظر عن الكلام عن خلوصات الموتور وكده

شفت؟؟ صورة الكتالوج دي غيرت حاجات كتير..

حضرت مطلوب منك تحط زيت كود الـapi بتاعه لا يقل عن sm

وعلشان تلاقي الكود ده في مصر.. مش هتلاقيه إلا تخليقي.

كود الـsl مسموح به بس في حالة إنك تكون مضطر لاستخدامه لو مفيش أي زيت كوده sm أو sn في السوق.


...