الموضوع: القواعد الذهبية لاختيار زيت العربية.... موسوعة مبسطة لأساسيات زيوت المحركات

المشاركة الأصلية كتبت بواسطة abo.omar

باشا الله ينور
بس بصراحه عايز اسئلك برضه عشان لسه مش قادر اقرر
العربيه لانسر 2007 عامله 150000 وكنت عامل عمره السنه اللى فاتت ... ومن ساعه ما اشتريتها ( سنتين ) وانا بحطلها شيل الجركن الاصفر ومبحددش هو لزوجه كام

هل كده النوع المناسب ؟؟؟ ولو الجركن الاصفر لزوجه واحده هل هى الدرجه المناسبه ؟؟

طيب يا فندم أعرف إزاي؟؟

حضرتك ما إدتنيش أي معلومة أقدر أعتمد عليها علشان أقوللك إذا كان الزيت مناسب أو لأ..


عموما.. أنا عامل الموضوع ده أساسا علشان نتعلم ونبدأ نعتمد على نفسنا... وما نديش ودننا لحد يفتي ويقول على زيت حلو أو وحش.

ملخص الموضوع إن الزيت المناسب للعربية هو اللي مواصفاته مكتوبة في الكتالوج..

غير كده.. الزيت يبقى غير مناسب.. يعني وحش... حتى لو كان الزيت ده حلو مع عربيات تانية.

وعلشان أساعد حضرتك... لازم نعرف الكتالوج قايل إيه... وبعدين نشوف أنهي زيت يمشي مع العربية.

وفي معظم الأحوال... بيبقى قدامنا أكتر من نوع زيت .. وأي واحد فيهم يمشي.. ما دام مطابق للمواصفات.


على فكرة.. ما دام الموتور معمول له عمرة... يبقى رجع كإنه جديد.



...

المشاركة الأصلية كتبت بواسطة abo.omar

طيب اللى انا فاهمه ان طالما الموتور كأنه جديد يبقى استخدم تخليقى بالكامل .. اللى هو فى شيل الجركن الاسود .. والجركن دا 5w40
فى حين
زى ما حضرتك شايف فالصوره
ان اقرب لزوجه لمصر هى الاولى 20w40 , 20w50 ودا كده هيكون تقيل على حركه البساتم ويتناقض مع الكلام الى فوق


اعذرنى انا متلخبط شويه

أيوه كده... الصورة كده أوضح كتييييييير :)


يا سلاااااام.. اليابانيين زي ما عودونا دايما.. مديينا اختيارات كتير.. ومعظمهم يناسبنا.

بالنسبة للصورة.. تقدر تقول إن كل الزيوت اللي موجودة في الرسمة دي تقدر حضرتك تستخدمهم

والزيوت اللي مرسومة على "السهم" المتجه ناحية ال50 درجة مئوية كلهم ينفعوا حتى في الخليج.

لو عايز تريح بالك وتحط تخليقي.. يبقى أنسب واحد بالنسبالك هو ال5w-40.. لإن اللزوجات التانية محدودة بدرجة حرارة قصوى حوالي 40 درجة مئوية.

لو حضرتك ساكن على السواحل الشمالية.. زي اسكندرية أو مطروح أو بورسعيد.. يبقى حضرتك كمان تقدر تستخدم اللزوجات التانية بدون خوف.


أهم شيء تاخد بالك منه وانت بتشتري الزيت إنك تبص على العلبة من ورا.. وتحاول تشوف الكلام الصغير المكتوب ده بيقول إيه..

لو لقيت مكتوب عليه acea a3/b3 أو acea a5/b5 اشتريه علطول.. ولازم كود الapi يكون sl أو sm أو sn.

أعتقد زيت شيل ألترا يتوافق مع كل ده.. ومش هو لوحده... أتوقع إن زيوت تخليقية تانية كتير تمشي معاك بردو..

بس المشكلة إني مش موجود في مصر وبالتالي مش قادر أعرف العلبة مكتوب عليها إيه.

متهيألي لو حضرتك تشوف بنفسك يكون أحسن..

وحط في دماغك دايما إنك من حقك تتأكد إن الحاجة اللي هتشتريها وتدفع فيها فلوس تكون مناسبة ليك.. ومش عيب أبدا إنك تمسك علبة الزيت وتشوف مكتوب عليها إيه.


...

المشاركة الأصلية كتبت بواسطة abo.omar

الف شكر يا باشا
وطبعا احط فلاشر قبل ما اغير صح كده ؟

لو هتحط شيل.. يبقى مش محتاج تحط فلش.

ولو الزيت ماركة أمريكاني .. فالله أعلم

ولو الزيت ألماني.. فالموضوع يعتمد على حسب المكتوب عليه.


...