الموضوع: القواعد الذهبية لاختيار زيت العربية.... موسوعة مبسطة لأساسيات زيوت المحركات

المشاركة الأصلية كتبت بواسطة e_abdelraouf

اللة ينور على الموضوع الجميل دة
انا معايا رينو فلوانس 2014 ماشية حوالى 14000 كم
و دى صورة صفحة الزيت فى الكتالوج


يا ترى ممكن استخدم اى نوع لزوجة علما بانى عايش فى منطقة ساحلية (هتفرق ؟؟؟؟؟)
دورت على زيت 5w30 sn,acea a5 فى مصر ملقيتش غير بترومين و قلقان منة
اية رايك ممكن استخدم اية ؟؟؟؟
اشكرك

إيه ده؟؟ ده أنا نسيت أرد على البوست بتاعك ... أنا آسف جدا ..

بص يا سيدي...

الصورة الأولانية هي اللي تمشي عليها... لإن الصورة التانية بتاعت المواتير التربو بس.



الجدول متقسم لجزئين...

الجزء اللي على الشمال ده بيبين الاستاندارد بتاع مستوى جودة الزيت اللي المفروض تستخدمه..

وبيقوللك إن الزيت المفروض يكون عليه واحدة من المواصفات التالية على الأقل:

مواصفة رينو RN 0700
أو مواصفة ACEA : ممكن A1 أو A3 أو A5 (الأفضل هو A5 أو A3)... (مع العلم إن A2 مواصفة قديمة واتلغت حاليا)
أو مواصفة API: تكون SL أو SM أو SN (الأفضل هو SN)

لو لقيت زيت عليه الـ3 مواصفات يكون أحسن بكتير



باقي الجدول بيوصفلك اللزوجة اللي تستخدمها... وكلها تنفع في جو مصر... والتقسيمة الموجودة بتبين كل درجة لزوجة مقابل أقل درجة حرارة للتشغيل على البارد (يعني أقل درجة حرارة في الشتا تقدر تشغل فيها العربية بعد ركنة طول الليل.. ودي مفيدة جدا للناس في أوروبا.. إنما بالنسبالنا مالهاش قيمة)

بالنسبة للزوجات المسموحة بناء على الكلام اللي فوق ده فهي كالتالي:

0W-30 أو 0W-40
5W-30 أو 5W-40 أو 5W-50
10W-30 أو 10W-40 أو 10W-50
15W-40 أو 15W-50

الدرجات اللي بالأزرق هتلاقيها تخليقية غالبا.
الدرجات اللي بالإسود هتلاقيها نصف تخليقية غالبا أو تخليقية أحيانا ويمكن تلاقي منها معدني.
الدرجات اللي بالأخضر هتلاقيها معدنية غالبا.


كل الكلام اللي فوق ده خاص طبعا بعربيتك فقط.



اختيار اللزوجة يعتمد على طريقة استخدامك أساسا + أولوياتك بالنسبة للعربية.

تفاصيل الكلام ده في المشاركة دي:
http://www.nilemotors.net/Nile/3876022162-post23.html


...

المشاركة الأصلية كتبت بواسطة e_abdelraouf

شكرا على التوضيح بس مفيش زيت 5w40 , a5 اعتقد ان a5 بيكون 5w30 يس
و ملقيتش عندى غير بترومين طبعا انت بتشكر فية جدا بس انا مش عارف هيبقى عامل اية عندنا

هو الحقيقة أنا مش بشكر فيه.. أنا بقول إنه هو الزيت الوحيد المتاح قدامي اللي بيغطي المتطلبات... ومادام بيغطي المتطلبات يبقى تمام... وثبت الكلام ده بالتجربة.

والكلام ده ينطبق على كل الزيوت اللي بتغطي المتطلبات... هتلاقيها تمام ومش بتعمل مشاكل وتحافظ على الموتور.

وبالنسبة لـacea a5.. فهو فعلا مش موجود إلا في اللزوجات الخفيفة بس (0w-20 , 0w-30 , 5w-20 , 5w-30).

لو حطيت زيت أثقل.. يبقى تروح علطول على a3


...

المشاركة الأصلية كتبت بواسطة e_abdelraouf

معلش يا باشا من الاسئلة الكتيرة
كان فى موضوع بيتكلم على bizol green oil
وكنت وضحت انة hc synthetic oil
اية الفرق بينة و بين fully synthetic oil و هل ممكن استخدمة فى عربية رينو فلوانس
و لا استخدم بترومين يكون افضل خصوصا ان هو الوحيد التاح بالمواصفات اللى بدور عليها

المشاركة الأصلية كتبت بواسطة e_abdelraouf

معلش يا باشا سؤال كمان
فى جو اسكندرية استخدم 5w30 و لا 5w40 مع العلم ان سواقتى عادية
مش فحت يعنى

الفرق الأساسي بين الـHC Synthetic Oil والـFully Synthetic Oil إن الأولاني (الـHC) عبارة عن زيت معدني تم معالجته بطريقة تخليقية بحيث إن تكوينه الكيميائي كله بقى متماثل... إنما الـFully Synthetic فده أصلا كان مادة بلاستيكية وتم تحويلها لزيت بالأسلوب التخليقي.

في الاستخدام.. الاتنين زي بعض من ناحية الحماية والأداء... بس الـHC Synthetic عمره ما يزيدش عن 10-15 ألف كيلومتر ... إنما الـFully Synthetic فغالبا عمره بيكون في حدود 20-25 ألف كيلومتر.


ومن ناحية تستخدمه أو لأ: أكيد ممكن تستخدمه... لو كانت مواصفاته زي المكتوب في الكتالوج أو أحسن.


بالنسبة لسؤالك عن اللزوجة المناسبة...

حسب الكتالوج... مش جو اسكندرية ولا القاهرة هو اللي يفرق... إنما استخدامك هو الأساس..

وحسب كلامك.. فتقدر تستخدم 5W-30 ما دام سواقتك عادية.


...