نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[م. عصام مهنى]

الاخ الفاضل / حسين
ربنا يبارك لك
وجزاك الله كل خير

وكل عام وانتم بخير

[abeer_roushdy]

شكرا استاذ حسين على تواصلك وردك

انا اليومين دى مستولية على العربية شوية لان جوزى سافر وعملى توكيل لادارة العربية علشان اسوقها بس فيه مشكلة ان لسة مش طلعت الرخصة بس ممكن كدة على الاسبوع القادم ان شاء الله فيه حد ممكن يساعدنى انى اطلعها ودعواتكم

المهم بئى انا بمشى العربية كل يوم لوحدى دلؤتى بس هو محلفنى انى مخرجش على فيصل الرئيسى وبلف فى الشوارع الجانبية للعمارت والشارع الخلفى لفيصل

طبعا بتعلم من دا المشى فى الزنقة وفى وسط العربيات الراكنة والرجوع فى مسافات ضيقة او بين عربيتين ويادوب مسافة تعدى عربيتك

بس امبارح اتعرضت لموقف ربكنى

فيه شارع جانبى لفيصل عبارة عن شارع بحارة واحدة بس رايح جاى وفيه مطب عالى اوى وانا ماشية وبفتكر فى الكلام اللى قريته هنا عن كيفية المشى على المطب تقريبا سرحت والعربية بطلت منى امام المطب بالزبط

وطبعا مش قادرة اوصف بئى على الربكة اللى حصلت فى الشارع وكمان كان وراية ولازق فيه ميكروباس فولكس وطبعا كل سكان فيصل عارفين يعنى ايه سواق فولكس دا وكل ماجى ادور العربية وانقل على الاول علشان اطلع المطب العربية تبطل تانى لانا امام المطب العالى على طول ومش قادرة ارجع ورا علشان ادى عزم للعربية شوية انها تصعد المطب دا لان اللى لازق فيه ورا

ودا بئى شغال كلاكسات ماشاء الله ايده لازئت على الكلاكس وبمنتهى الة الزوق وانا تصببت عرق وفين وفين لما دوست بنزيين جامد اوى العربية قدرت تعدى بس الشارع كله كان عمال يبص علية واتكسفت جدا لدرجة انى كنت هعيط لانى لوحدى

[husseinoo]

الاخ الفاضل / حسين
ربنا يبارك لك
وجزاك الله كل خير

وكل عام وانتم بخير

الله يبارك لحضرتك يا حبيب قلبى ويسعدك دنيا وآخرة
وكل رمضان وانت طيب
وكل الأمة الإسلامية بخير وسلامة

شكرا استاذ حسين على تواصلك وردك

العفو حضرتك انا تحت امرك وامر كل اصدقاء المنتدى المهذبين والمحترمين وكل سنة وانتم طيبين

انا اليومين دى مستولية على العربية شوية لان جوزى سافر وعملى توكيل لادارة العربية علشان اسوقها

هههههههه وضع يد يعنى

بس فيه مشكلة ان لسة مش طلعت الرخصة بس ممكن كدة على الاسبوع القادم ان شاء الله فيه حد ممكن يساعدنى انى اطلعها ودعواتكم


عشرة على عشرة خصوصا ان معاكى حد معرفة ... وعلى فكرة انت اساسا بتسوقى كويس وإن شاء الله الامور هاتعدى على خير وعلى العموم فى المرور السيدات بيمتحنوا على عربية صغيرة الحجم والمهمة إن شاء الله هاتكون سهلة
فى المرور التركيز كله بيكون على الرجالة ههههههههه ونصفهم بيسقط فى الاختبار خصوصا لو كان عايز يطلع رخصة "مهنى" مش ملاكى
بالنسبة لحضرتك الامور هاتكون سهلة إن شاء الله .... لانى رأيت بنفسى حوالى 40 بنت دخلت الامتحان وكلهم نجحوا برغم ان اغلبهم خبط فى الاقماع ويمكن مشى عليها كمان هههههههههههههه ما عدا بنت واحدة كانت مصممة تمشى على الاقماع كلها هههههههههههههههه وكل ما ضابط المرور يعطى لها فرصة تكرر نفس الحكاية يعنى تقدرى تقولى عليها عمرها ماركبت عربية


المهم بئى انا بمشى العربية كل يوم لوحدى دلؤتى بس هو محلفنى انى مخرجش على فيصل الرئيسى وبلف فى الشوارع الجانبية للعمارت والشارع الخلفى لفيصل

ده كلام سليم خصوصا انك مافيش معاكى رخصة ... وعموما فى الأول حضرتك بتتصرفى صح جدا ... يعنى فى الاول الواحد يتمرن حوالين البيت مسافات صغيرة فى اوقات مافيهاش زحمة مثلا فى الصباح الباكر جدا ... كل المشاوير دى بتعطى ثقة ممتازة وبعد ما تطلع الرخصة إن شاء الله وبدون استعجال خالص نخرج الى فيصل لكن موش كثير وبدون اى استعجال ... وبشىء من الصبر هايكون كل شىء تمام التمام

طبعا بتعلم من دا المشى فى الزنقة وفى وسط العربيات الراكنة والرجوع فى مسافات ضيقة او بين عربيتين ويادوب مسافة تعدى عربيتك

ده انت إن شاء الله هاتكونى ممتازة ... يعنى بتعملى اللى كل المبتدأين بيخافوا منه موش عايز اقول لك ان فيه ناس قديمة بتتجنب المشى فى الشوارع الضيقة تجنبا للمشاكل وربنا يحفظ الجميع

بس امبارح اتعرضت لموقف ربكنى

فيه شارع جانبى لفيصل عبارة عن شارع بحارة واحدة بس رايح جاى وفيه مطب عالى اوى وانا ماشية وبفتكر فى الكلام اللى قريته هنا عن كيفية المشى على المطب تقريبا سرحت والعربية بطلت منى امام المطب بالزبط

الحمد لله ان العربية وقفت قبل المطب ... موش فوق المطب .... لو كانت وقفت فوق المطب فى الحالة دى ممكن العربية ترجع للخلف على العربيات الموجودة وراكى .. على العموم عادى انا بيحصل معايا الموقف ده .. ويمكن حصل معايا الاسبوع ده ... لان حضرتك عارفة ان العربيات الحديثة والقديمة عموما لازم الكل ياخد باله وهو بيعدى على المطب الصناعى خصوصا فى الشوارع الجانبية المبطات الصناعية معمولة "عمولة" ههههههههه بدون اى مواصفات عشان كده لازم نعطى للمطب "تعظيم سلام" قبل ما نعدى عليه

وطبعا مش قادرة اوصف بئى على الربكة اللى حصلت فى الشارع وكمان كان وراية ولازق فيه ميكروباس فولكس وطبعا كل سكان فيصل عارفين يعنى ايه سواق فولكس دا وكل ماجى ادور العربية وانقل على الاول علشان اطلع المطب العربية تبطل تانى لانا امام المطب العالى على طول ومش قادرة ارجع ورا علشان ادى عزم للعربية شوية انها تصعد المطب دا لان اللى لازق فيه ورا

ما هو ده اللى اسمه "المتخلف" يعنى موش مهارة منه ولا جدعنة ولا ذكاء ... ده تعتبريه غباء من الآخر ... اذا كان الواحد فى الشوارع العادية المفروض يترك مسافة بينه وبين العربية التى امامه ... طيب لو كان فيه مطب صناعى لازم ابعد عن العربية اللى امامى عشان لو العربية ريحت منه ما يخبطش فى عربيتى ... دى حاجة بديهية ... العيب موش منك العيب من المرفوض انه سائق والمفروض ان سائق قديم

ودا بئى شغال كلاكسات ماشاء الله ايده لازئت على الكلاكس وبمنتهى الة الزوق

ما هو عشان معلهش "غبى" وزنق نفسه وراكى ... وخايف ان عربيتك تريح عليه وتخبطه ... طيب ما هو كان من الأول مافيش داعى تقرب منها وهى بتعدى المطب الصناعى

وانا تصببت عرق وفين وفين لما دوست بنزيين جامد اوى العربية قدرت تعدى بس الشارع كله كان عمال يبص علية واتكسفت جدا لدرجة انى كنت هعيط لانى لوحدى

هههههههههههههه لا يا ست الكل مافيش اى مشاكل خالص ... انت بكل بساطة:
كنت رفعتى فرامل اليد عشان العربية ما ترجعش للخلف ده فى حالة ان العربية تكون واقفة على المطب وعايزة ترجع للخلف

اما فى حالتك العربية متوقفة قبل المطب لكن لو كان الشارع مائل للخلف وحضرتك بتشعرى ان العربية بترجع للوراء ... يبقى الافضل انك ترفعى فرامل اليد

بعد كده تمور الفتيس "يعنى نضع الفتيس فى وضع المور بدون اى غيار"
او
لو كانت العربية على الغيار الاول ... خلاص اضغطى دبرياج على الآخر

بعد كده دورى العربية ... وممكن تساعديها بأنك تضغطى على البنزين خفيف وانت بتدورى العربية

المهم
انقلى الغيار الاولانى
واضغطى بنزين زيادة شوية عشان المطب محتاج عزم وقوة وارفعى رجلك خفيف من على الدبرياج
واول ما العربية تشعرى انها عايزة تتحرك ... خفضى الهاند بريك "فرامل اليد"


على فكرة ممكن العربية تبطل منك لو كنتى خرجتى بها بدون ما تسخنيها
يعنى مثلا دورتى العربية ومشيتى بها على طول
انا افضل انى اسخن العربية 3 او 5 دقائق
إلا إذا كان الجو حر وسخن جدا
يبقى فى الحالة دى بالكثير 3 دقائق واتوكل على الله

وفى الاول والآخر احب اقول لك ان الغلطة موش غلطة حضرتك انت بتتعلمى واللى خلفك لازم يبعد عنك اساسا شوية ... ههههههههههههه ممكن تلزقى على العربية ورقة مكتوب فيها "عفوا السيارة فى التليين" عشان اللى وراكى مايفضلش يعمل حركات ويريح دماغه شوية

وانا عن نفسى اول ما بيحصل معايا نفس الموقف
واسمع اى كلاكس
على طول ارفع فرامل اليد
ممكن تكون العربية بترجع للخلف وانا موش حاسس بها
وعشان اريح دماغى
ارفع فرامل اليد
وادور العربية
وانقل الفتيس براحتى
وابدأ فى السير
واول ما تتحرك
انزل فرامل اليد
ويا دار ما دخلك شر

وبعد كده حضرتك مريتى بتجربة والنتيجة نجاح لأنك رجعتى بالسلامة الى المنزل ... يبقى خلاص انت المستفيدة والموضوع ده ممكن تتدربى عليه مرة تانية وفى نفس الشارع وفى نفس المطب

زى فيلم "رصيف نمرة خمسة" لما ذكى رستم قال : انا هانتقم بنفسى وفى بيته وفى فرشته ههههههههههههه

وكل سنة وحضرتك طيبة
ورمضان كريم

مع اطيب التمنيات
اخوكم حسين غزالة

[abeer_roushdy]

كل سنة وحضرتك طيب يا استاذ حسين
وشكرا جدا على تواصلك

هى اللعربية ماكنتش بتريح عليه ولاحاجة دا الاستاذ مستعجل وطبعا اكيد لاحظ انى بتعلم جديد من شكل ربكتى فحب بئى يعمل علية عنتر

انا انهاردة روحت فى نفس الشارع تانى (علشان تعرف انى زكى رستم ههههههههههههه)
قولت لازم اكسر شوكة الشارع دا وخوفى منه

وفى نفس الوقت هيدربنى انى امشى فى الشوارع الجانبية الضيقة اللىف يها التجاهين
الحمد لله ماوقفتش فى المطب وعدت بس عملت غلطة خدو بالكو منها

الشارع دا هو ضيق اصلا بس بيمشى على اضيق وفى اخر مكان لعربية واحدة بس اللى تعدى

انا جاية من الواسع للضيق ومتجهة للمطب وجاى عكسى عربية من الضيق للواسع انا زى ما تقول كدة كنت مركزة فى المطب وماختش بالى انى لازم اخلى مسافة علشان اللى جاى من الضيق للواسع انه بعد مايعدى المطب يحود عنى ويمشى لانه جاية من مسافة لعربية واحدة بس

يا رييت تكونو فاهمنى لان دا درس مهم جدا اتعلمته انهاردة

انى لما اكون ماشية فى شارع ضيق وفيه عربية جاية عكسى مازنقش نفسى واسرع لحد ما اكون فى نقطة التقاء وياها طالما انا اللى عندى الواسع اقف قبلها بمسافة كافية انه يعدى منى

دا اول موقف

تانى موقف وانا ماشية حبيت اضيقها على نفسى اكتر واضغط اكتر علشان اتعلم اكتر روحت دخلت على شارع جانبى من الجانبى وبعد كدة جانبى تانى علشان اشتر حاجة الامور عدت بسلام بس فيه موقف توفيق ربنا وستره هو اللى عدانى وانا داخلة على الشارع دا هو ضيق جدااااااااااااااااا لائيت عربي ركنة بعد متر بالزبط من دخلته بصراحة انا لحد الان مش عارفة انا حودت ولفيت ال 90 درجة وعديت العربية اللى اتفاجئت بيها دى ازاى من غير ماخبط فى الرصيف انا قولت يا عدوووووووووووووووى ومشيت هههههههههههههه

الى دايقنى فى نفسى بئى الركنة اللى ركنتها اوصاد المحل انا تخيلت انى راكنة خط مستقيم بعد ما نزلت وببص لئيت العربية بزاوية 45 درجة وكمان جمبى حجر كبير جدا
ودى مشكلتى الاتجاهات عندى مش مزبوطة دايما بيتهيئلى انى فى خط مستقيم والحقيقة انى بكون حادفة العربية بميل

مع انى مهندسة والمفروض الاتجاهات عندى تكون متزبطة بس واضح ان دى فيها مشكلة عندىومش عارفة هتتحل بالممارسة ولا دى عيب فية انا

المهم وانا برجع ورا علشان اطلع من الجانبى على العمودى عليه طبعا الحجر عملى مشكلة وخبطت فيه بسيط بس العربية بطلت منى طلعت اودام شوية تانى ورجعت ورا تانى بس التنشنة خليتنى ماوسعش لنفسى والعربية حدفت منى شوية وانا راجعة وكمان رجعت بسرعة وانا بعدل نفسى فى زاوية 90 درجة ودا غلط جداااااااااااااااااااا لانى كان ممكن اتفاجئ بعربية او اطفال لانه شارع عادى وفيه مشاه كتير بس ربنا هو اللى سترها معاية

الملاحظة االتالتة انى العربية مش بمشى بيها بردو فى خط مستقيم بفضل احدف بيها يمين وشمال بدرجة اقل من الاول بس لسة موجودة

كل اللى بحكيه دا بيدينى خبرة زى ما قولت فى التعامل مع العربيات فى الشوارع الجانبية الضيقة

المواهب بئى هتظهر وقت ما هخرج على الرئيسى تانى ولما الموضوع يكون فيه مشى بسرعة شوية

[hesham90]

اسئلة عايزة اجابات

تحياتى للاستاذ حسين ومرحبا بالعضوة الجديدة الاستاذة عبير

1-لو ماشى على التانى وقدامى مطب ينفع امور واعدى المطب وبعدين اديها الاول واطلع
2- عالتانى والعربية ماشية ينفع اديها الاول واطلع المطب ولا لازم اقف خالص وبعدين اديها الاول
3-لو نازل منحدر او كوبرى انزل عالتانى وبعدين اهدى بالفرامل بس
4-ايه حكاية وانا نازل من الكوبرى امور العربية ده صح ولا غلط
5- فى سؤال فى امتحان الاشارات على الكمبيوتر وانت نازل من كوبرى لازم تكون العربية معشقة هل الاجابة صح ولاغلط مع التعليل بهزر........*
6-نيجى بقى لتجربة امس واليوم حصل معايا موقفين الاول فى يوتيرن وانا داخل شمال قمت مدى اشارة شمال وهديت وبصيت على الطريق المقابل لاقيت تكتوك جاى براحة رحت مدى قلابات وكلاكس وفهمت انه عرف ان انا حعدى وجيت اعدى لاقيته جاى بسرعة قوى وانا بعدى وفهمت انه حيقف علشان اعدى ورحت معدى لاقيته جاى بسرعة برضه المهم لحقت نفسى بسرعة ودست فرامل قبل ماصدمه ارجوا تصحيح الاخطاء
7- خارج من شارع ضيق لايسع غير عربيتين رايح جاى وانا خارج لاقيت عربية جاية والشارع فى مخرجه ضيق ولاقيت اليمين بتاعى مش حيكون مسعف لى روحت راكن شمالى علشان كان الشمال اوسع لى فى الوقفة والمشى واللى جاى راح داخل من يمينى يعنى من شماله وانتظرت لما يعدى اروح ماشى فلقيت عربية تانية داخلة وعربية تالتة ودخلوا من الشمال وانا واقف فى الشمال منتظر يعدوا وبعدين اعدى المهم لاقيت واحد جاى من ورايا وراح بدل مايقف ورايا ويدى فرصة للعربيات اللى دخلت الشارع فعلا يعدوا راح واقف بجوارى وقفل الشارع ولما زعقوله قلهم انا واخد يمينى وده طريقى وانتم داخلين شمال وحارتكم يمين مش شمال وقفل مخه معاهم رحت انا راجع للخلف ورحت سايب الشارع خالص وداخل من شارع تانى ارجوا التعقيب
8- تقبل خالص تحياتى وشكرا على مواصلتك للاعضاء وكل عام وانت بخير والسلام عليكم ورحمة الله وبركاته-*

[husseinoo]

كل سنة وحضرتك طيب يا استاذ حسين

وحضرتك بالصحة والسلامة

وشكرا جدا على تواصلك

أنا تحت امرك ومرحب بحضرتك فى اى وقت

هى اللعربية ماكنتش بتريح عليه ولاحاجة دا الاستاذ مستعجل وطبعا اكيد لاحظ انى بتعلم جديد من شكل ربكتى فحب بئى يعمل علية عنتر

يعنى تقدرى تقولى "قلة ذوق" او "قلة أدب" ... لأنه معروف ان الواحد مهما جرى فى شوارع المحروسة موش هايوفر وقت كثير ومافيش داعى انه يعمل ازعاج للآخرين ... هايروح فين يعنى .. ثوانى وهايقف تانى فى اى مكان ... هى فى الأول والآخر "مافيش عقل" ولا "أدب" ...

انا انهاردة روحت فى نفس الشارع تانى (علشان تعرف انى زكى رستم ههههههههههههه)


ههههههههههه الله يكرمك ضحكتنى انا وأم الأولاد ههههههههههههه

قولت لازم اكسر شوكة الشارع دا وخوفى منه

وفى نفس الوقت هيدربنى انى امشى فى الشوارع الجانبية الضيقة اللىف يها التجاهين


والله ماشاء الله على حضرتك ولا حول ولا قوة إلا بالله ... ده انا عمرى ما افكر فى الدخول فى اى شارع جانبى إلا للشديد القوى هههههههههه عندك شجاعة ماشاء الله موش موجودة عند ناس تانية وانا منهم ههههه

الحمد لله ماوقفتش فى المطب وعدت بس عملت غلطة خدو بالكو منها

الشارع دا هو ضيق اصلا بس بيمشى على اضيق وفى اخر مكان لعربية واحدة بس اللى تعدى


هههههههه تخيلى حضرتك ان الموضوع ده منتشر فى شوراع المحروسة بشكل غريب .... بداية الشارع واسعة ونهاية الشارع لا تتسع الا لعربية واحدة ههههههههههههه حاجة غريبة قوى ... اكيد الشوارع دى من تصميم الأهالى

انا جاية من الواسع للضيق ومتجهة للمطب وجاى عكسى عربية من الضيق للواسع انا زى ما تقول كدة كنت مركزة فى المطب وماختش بالى انى لازم اخلى مسافة علشان اللى جاى من الضيق للواسع انه بعد مايعدى المطب يحود عنى ويمشى لانه جاية من مسافة لعربية واحدة بس

يا رييت تكونو فاهمنى لان دا درس مهم جدا اتعلمته انهاردة


عشرة على عشرة ..... فعلا لازم الواحد دائما مايسرحش ولازم ينظر الى الامام على قدر الإمكان ... يعنى ... موش عشان هو ماشى كويس ينسى انه ينظر الى الامام عشان كشف المخاطر والمشاكل ربنا يحفظ الجميع

انى لما اكون ماشية فى شارع ضيق وفيه عربية جاية عكسى مازنقش نفسى واسرع لحد ما اكون فى نقطة التقاء وياها طالما انا اللى عندى الواسع اقف قبلها بمسافة كافية انه يعدى منى


ده كلام مضبوظ ومية مية .... يعنى المفروض انى موش اقف فى المكان الواسع ... طيب لو وقفت فى المكان الواسع اللى جاى هايدخل فين ... يعنى لازم اعمل حساب للعربية اللى جاية واتخيل هل المكان اللى هايعدى منه ده كافى وهايسمح انى ادخل معاه فى نفس الوقت ... العملية بتبقى عملية تقدير لأبعاد العربية وطبعا تشغيل دماغ كويس ... فيه ناس للأسف راكبين عربيات ممتازة ولكن تلاقيهم دخلوا ورا بعض لحد ما الشارع يقفل موش عارف هما بيفكروا ازاى ... او اتعلموا ازاى ... الله اعلم

دا اول موقف

تانى موقف وانا ماشية حبيت اضيقها على نفسى اكتر واضغط اكتر علشان اتعلم اكتر روحت دخلت على شارع جانبى من الجانبى وبعد كدة جانبى تانى علشان اشتر حاجة الامور عدت بسلام بس فيه موقف توفيق ربنا وستره هو اللى عدانى وانا داخلة على الشارع دا هو ضيق جدااااااااااااااااا لائيت عربي ركنة بعد متر بالزبط من دخلته بصراحة انا لحد الان مش عارفة انا حودت ولفيت ال 90 درجة وعديت العربية اللى اتفاجئت بيها دى ازاى من غير ماخبط فى الرصيف انا قولت يا عدوووووووووووووووى ومشيت هههههههههههههه


انا عن نفسى لما بحب ادخل اى شارع جانبى .... اترك العربية تسير بالقوة الدافعة ... واضغط دبرياج واتحكم فى السرعة بالفرامل فقط ... لو كان الشارع آمان ... مافيش مشاكل ارفع رجلى عن الفرامل واتركها تسير .. وإذا فوجئت بعربيات مثلا راكنة صف تانى او اى مشكلة فى مدخل الشارع ... اضغط فرامل شوية ... المهم عمرى ما ادخل شارع جانبى ورجلي فوق البنزين .... عشان اقدر اتحكم فى العربية ... وابسط حاجة هاعملها هاوقف العربية وبعدين انقل الغيار وابدأ فى التحرك فى آمان مرة تانية

الى دايقنى فى نفسى بئى الركنة اللى ركنتها اوصاد المحل انا تخيلت انى راكنة خط مستقيم بعد ما نزلت وببص لئيت العربية بزاوية 45 درجة وكمان جمبى حجر كبير جدا
ودى مشكلتى الاتجاهات عندى مش مزبوطة دايما بيتهيئلى انى فى خط مستقيم والحقيقة انى بكون حادفة العربية بميل

مع انى مهندسة والمفروض الاتجاهات عندى تكون متزبطة بس واضح ان دى فيها مشكلة عندىومش عارفة هتتحل بالممارسة ولا دى عيب فية انا

المهم وانا برجع ورا علشان اطلع من الجانبى على العمودى عليه طبعا الحجر عملى مشكلة وخبطت فيه بسيط بس العربية بطلت منى طلعت اودام شوية تانى ورجعت ورا تانى بس التنشنة خليتنى ماوسعش لنفسى والعربية حدفت منى شوية وانا راجعة وكمان رجعت بسرعة وانا بعدل نفسى فى زاوية 90 درجة ودا غلط جداااااااااااااااااااا لانى كان ممكن اتفاجئ بعربية او اطفال لانه شارع عادى وفيه مشاه كتير بس ربنا هو اللى سترها معاية

ده كلام ممتاز

الملاحظة االتالتة انى العربية مش بمشى بيها بردو فى خط مستقيم بفضل احدف بيها يمين وشمال بدرجة اقل من الاول بس لسة موجودة

كل اللى بحكيه دا بيدينى خبرة زى ما قولت فى التعامل مع العربيات فى الشوارع الجانبية الضيقة

المواهب بئى هتظهر وقت ما هخرج على الرئيسى تانى ولما الموضوع يكون فيه مشى بسرعة شوية

تجربة ممتازة واحب بعد إذن حضرتك اضيف حاجة بسيطة
فى تمرين جميل قوى ومهم جدا

فى الصورة تظهر السيارة الزرقاء تسير الى الامام حول "يوتيرن"
وتعود مرة اخرى للخلف "بظهر العربية"
مع ملاحظة عدم الدخول فى الحارة التانية المعلمة بالأحمر

نفس التمرين السابق لكن فى الحارة الخارجية
ومراعاة عدم الدخول فى الحارة المعلمة بالأحمر

العربية تمشى الى الامام وتعود للخلف "بظهر العربية"

التمرين ده بيفيد جدا للإحساس بإتجاهات العربية خصوصا عند العودة للخلف بظهر العربية او حتى فى ركن العربية

بالنسبة لوقت التمرين زى ما حضرتك عايزة
ممكن تستمرى فى التمرين ده ساعتين ويمكن اكثر
وطبعا اكثر من يوم

حتى تشعرى ان عملية العودة للخلف عملية عادية واحساسك بأن العربية بتحدف يمين او شمال

طبعا ظاهر التمرين سهل ههههههههههههههههه
لكن فى الحقيقة
فى البداية سوف تجد الكثير من السائقين المبتدئين خصوصا عند العودة للخلف ... تجد ان العربية تحدف منهم ويدخلوا الى المناطق الحمراء

ولكى يستطيع الوصول الى خط النهاية خصوصا وهو راجع بظهرة ... عملية محتاجة تدريب كويس قوى

على اساس انه من الممكن مثلا انك تضطر الى الرجوع للخلف ووتجنب عربية راكنة فى الشارع فى نفس الوقت
او تحتاج الى الوصول الى مكان محدد وانت راجع للخلف


المهم تحتاج الى النزول الى مكان خالى من السيارات ويوجد به يوتيرن
وتبدأ فى التمرين

وبعد شوية تريح العربية عشان عملية المشى البطىء والرجوع للخلف "بتسخن العربية"
والافضل
النزول فى وقت مبكر او فى وقت يكون الجو موش حر
حتى كمان عشان المتعلم مايزهقش من التدريب

التدريب ده يا جماعة مهم جدا جدا جدا

تحياتى للاستاذ حسين ومرحبا بالعضوة الجديدة الاستاذة عبير

1-لو ماشى على التانى وقدامى مطب ينفع امور واعدى المطب وبعدين اديها الاول واطلع


مافيش مشاكل ما دام العربية انت حاسس ان سرعتها وقوة الدفع هاتعدى المطب بدون توقف وفى نفس الوقت بدون "عنف" يعنى ممكن الواحد يمور ويعدى على المطب بسرعة جامدة .. بترجع لحساسية قائد السيارة واحساسه هل سرعة السيارة مناسبة وهاتستطيع العبور بدون "تخبيط" فى العربية ولا لأ


2- عالتانى والعربية ماشية ينفع اديها الاول واطلع المطب ولا لازم اقف خالص وبعدين اديها الاول


لازم تكون العربية متوقفة تماما إذا كنت عايز تنقل الغيار الاول ... او شبه متوقفة يعنى يا دوب بتتحرك ... لو كان مافيش عربيات خلفك والعملية رايقة ... ممكن تتوقف قبل المطب وتنقل الغيار الآول وبعدين تعدى المطب ....

لكن الطبيعى ان الناس بتطلع المطب على الغيار التانى او الآول حسب سرعة العربية .....

انا عن نفسى كان التدريب كالتالى امور العربية وادخل على المطب بسرعة هادئة ...
واول ما عجل العربية الامامى يكون فوق المطب وقبل ما العربية ما تنزل من على المطب بالعجل الأمامى ... اكون ناقل الفتيس على الغيار التانى او الأول حسب الظروف فى الغالب بيكون الغيار التانى لأن العربية بتكون بتتحرك ..
وهى نازلة من فوق المطب ادوس بنزين واستمر فى السير .... يعنى الفن كله انك تنقل وتدوس بنزين والعربية نازلة من فوق المطب

واحيانا كثيرة الواحد بيفضل على الغيار التانى زى ما هو ماشى ويطلع وينزل على نفس الغيار ويستمر فى السير عادى بدون مشاكل

الفكرة اعتقد حسب شكل المطب ... يعنى فيه مطبات غبية جدا
واحسن حاجة ليها التوقف التام
ونقل الفتيس الاول
والطلوع فى منتهى الهدوء والنزول فى منتهى الهدوء

وفيه مطبات موش محتاجة كل ده ... كل اللى محتاجه تهدئة السيارة والصعود على الغيار التانى والاستمرار فى السير وموش محتاجة توقف خالص

وفيه مطبات محتاجة تهدئة بسيطة موش اكثر



3-لو نازل منحدر او كوبرى انزل عالتانى وبعدين اهدى بالفرامل بس
4-ايه حكاية وانا نازل من الكوبرى امور العربية ده صح ولا غلط


أنا عن نفسى لا احب ان امور العربية وانا نازل من على الكوبرى .... عشان العربية تمسك نفسها إذا حبيت افرمل ... يعنى عملية تعشيق الفتيس مع الضغط على الفرامل بتساعد على التوقف بشكل جيد
وطبعا العربية وهى نازلة من على الكوبرى بتكون خفيفة وسريعة
واى عربية سواء قديمة او جديدة هاتكون خفيفة وسريعة وهى نازلة من على الكوبرى
عشان كده لازم رجلك تكون فوق الفرامل ونازل فى منتهى الحرص
وماتخليش العربية تسرقك وانت نازل
طبعا فيه ناس كثيير بتنزل بسرعة وموش فى دماعها
انه لو حب يتوقف هايحتاج وقت اكثر
وكمان لو نازل على مكان فيه محطة اوتوبيس او مترو والناس بتجرى عشان تلحق اوتوبيس او اشارة او عربيات ماشية اسفل الكوبرى

لازم تنزل براحة ورجلك جاهزة على الفرامل وعامل حسابك على كل حاجة

انا مرة شاهدت سائق تاكسى مجنون نازل من على الكوبرى ولم يتوقف إلا فى الإشارة ... تخيل مدى السرعة اللى كان ماشى عليها "شغل مجانين"

الله يرحمه والدى كان بيقول لى: العربية لا تستطيع التحكم فيها بسهولة خصوصا فى "نزلة الكوبرى" ... عشان كده لازم النزول بحرص وهدوء والرجل جاهزة فوق الفرامل ... وياريت التهدئة تكون بدرى شوية عشان اللى وراك يعمل حسابه


5- فى سؤال فى امتحان الاشارات على الكمبيوتر وانت نازل من كوبرى لازم تكون العربية معشقة هل الاجابة صح ولاغلط مع التعليل بهزر........*


الإجابة صحيحة وممتازة ... وإجابة ناس فاهمة موش حافظة ... ويمكن احيانا كثيرة الناس تفضل ان العربية تكون معشقة على طول الخط عشان تساعد على التوقف السريع ... يعنى فيه ناس موش بتمور الفتيس إلا على آخر لحظة قبل التوقف بمسافة قصيرة
6-نيجى بقى لتجربة امس واليوم حصل معايا موقفين الاول فى يوتيرن وانا داخل شمال قمت مدى اشارة شمال وهديت وبصيت على الطريق المقابل لاقيت تكتوك جاى براحة رحت مدى قلابات وكلاكس وفهمت انه عرف ان انا حعدى وجيت اعدى لاقيته جاى بسرعة قوى وانا بعدى وفهمت انه حيقف علشان اعدى ورحت معدى لاقيته جاى بسرعة برضه المهم لحقت نفسى بسرعة ودست فرامل قبل ماصدمه ارجوا تصحيح الاخطاء


يا بيه انت تصرفك عشرة على عشرة ومثالى وممتاز ... العيب موش فى حضرتك ... العيب فى سورى "الزبالة" ... يعنى هو كان ماشى بطىء وانت دخلت وضربت له كلاكس وابتدأت تتحرك ... وعشان سعادته عيل صغير فى الغالب ... ومتخلف ... يسخن وعايز يعدى قبلك ... لأنه موش خسران حاجة ... هو راكب "صفيحة زبالة" وموش فارقة معاه حاجة يخبط او يتخبط ... عشان كده حضرتك توقفت وعملت له حساب وده صح موش غلط ... هو كان عايز سائق ميكروباس "الترامكو" كان خبطه ورماه فى نص الشارع ... عشان يبطل يعمل حركات ... لكن فى الأول والآخر لازم يكون عندنا صبر ... ونتحمل ... ونمشى بالأصول اللى اتعملناه مهما كان فيه "أغبياء" حوالينا .... انت صح وعشرة على عشرة




7- خارج من شارع ضيق لايسع غير عربيتين رايح جاى وانا خارج لاقيت عربية جاية والشارع فى مخرجه ضيق ولاقيت اليمين بتاعى مش حيكون مسعف لى روحت راكن شمالى علشان كان الشمال اوسع لى فى الوقفة والمشى واللى جاى راح داخل من يمينى يعنى من شماله وانتظرت لما يعدى اروح ماشى فلقيت عربية تانية داخلة وعربية تالتة ودخلوا من الشمال وانا واقف فى الشمال منتظر يعدوا وبعدين اعدى المهم لاقيت واحد جاى من ورايا وراح بدل مايقف ورايا ويدى فرصة للعربيات اللى دخلت الشارع فعلا يعدوا راح واقف بجوارى وقفل الشارع ولما زعقوله قلهم انا واخد يمينى وده طريقى وانتم داخلين شمال وحارتكم يمين مش شمال وقفل مخه معاهم رحت انا راجع للخلف ورحت سايب الشارع خالص وداخل من شارع تانى ارجوا التعقيب



ما دام اليمين كان ضيق شوية ... كنت هديت العربية جامد ومادخلتش من اساسه ... إلا اذا شعرت انك هاتخرج من الشارع فى آمان ... يعنى المفروض انى فى اليمين التزم اليمين
وانظر الى الامام على قدر الإمكان
لو وجدت الطريق سالك مافيش مشاكل
لو وجدت ان فيه قلق وزحمه اهدى العربية ومافيش داعى انى الزق للعربية التى امامى
واترك فراغ يمكن احتاجه
او العربيات القادمة تحتاجه

هو الصح لو كانت العربيات الداخلة وجدت حضرتك واقف على الشمال كان اعطى لك فرصة عشان تخرج
وبعدين هو يدخل براحته فى حارته
لكن احنا بنمشى زى "الفيديو جيم"
اى حتى فاضية يدخل ويحشر نفسه فيها
بدون تشغيل مخ
زى الآلة
اكنه واقف فى طابور عيش وعايز يلحق
موش عارف انه هايقفل الشارع بالطريقة دى

8- تقبل خالص تحياتى وشكرا على مواصلتك للاعضاء وكل عام وانت بخير والسلام عليكم ورحمة الله وبركاته-*

كل سنة وحضرتك طيب وبالصحة والسلامة

مع اطيب التمنيات
اخوكم حسين غزالة

[Nen0]

السلام عليكم ورحمة الله

انا امبارح طلعت بالعربية .... والصراحة ده تانى مرة اطلع بالعربية من غير مدرب سواقة ... اه بالمناسبة المرة الاولانية كانت علشان انقل العربية من جراج داخلى الى جراج على الشارع العمومى اهو قلت ارحمها من مطبات الشوارع الداخلية وارحم فلوس اهلى اللى بتتصرف على الفوانيس اللى بدمرها كل شوية

المهم انا بقالى فترة عاوزة انزل اتمرن كده شوية لكن المشكلة ان رمضان وقته ضيق و مش بعرف اصحى بدرى خالص -فاشلة يعنى - وخصوصا انى اجازة من شغلى طول فترة رمضان فمش بقوم اصلا الصبح وطبعا بعد الساعة 10 بفتح شباك بيتنا بلاقى الشمس بتزغررررررررد فبقفل الشباك واستعيذ بالله من الشيطان الرجيم واقول خلاص مش هينفع النهاردة خليها بكره وبكره يجيب بعده وبعد بعده .... لغاية ما اتخنقت وقلت لأ مش هينفع كده ماانا لازم انزل بأه ده انا كده هنسى اللى اتعلمته
وقررت انى انزل بعد الفطار مباشرة ... وكنت متخيلة ان ده افضل وقت لأن الناس نصها هيبقى متنح بعد الفطار والنص التانى فى المساجد بيصلوا ... وفعلا اقنعت كل اللى فى البيت انه يانعيش سوا يانموت سوا واخدت بابا وماما واختى ورحت طالعة بيهم امبارح بالعربية ... انا طبعا كنت عاملة فيها شجيعة السيما بس انا كنت حاسة انى اللى هيقف جنبى هيسمع دقات قلبى
المهم رحت الجراج وطبعا عملت فيها البت الى هى وطالعة بالعربية والعيال بتوع الجراج عمالين بيتوشوشوا كده بس مش عارفة ياترى بيتوشوشوا على مييييييييييين. المهم ماركزتش وطلعت بس انا كان عندى مشكلةانى لما بطلع بالعربية بلاقى فى وشى فتحة يوتيرن والمفروض انى بلف معاها علشان اخرج من المنطقة ... انا كنت مرعوبة انى لما هطلع بالعربية هكون واقفة بالعرض وهقفل الطريق تقربيا لغاية اما الاقى فرصة الف فيها العربية لأن الطريق الحمد لله كان واقف جدا والعربيات فوق بعضها ...... تقريبا والله اعلم امى ادت اشارات غير مرئية كده للواد بتاع الجراج - يالله اهو يكمل تريقة - وخلته يوقفلى العربيات ويوسعلى كده سكة علشان الف وامشى وفعلا الحمد لله مرت بسلام بعد كده الطريق كان واقف جدا بس على الاقل اكتسبت خبره انى بعرف اقف وامشى واقف وامشى وسمعت كلام حضرتك وبقيت بخلى مسافة كافية بينى وبين اللى قدامى ... بس هو المشكلة ان الشعب المصرى بيحب البلاى ستاشن اوى لقيت اللى بيزنق عليا واللى بيكسر عليا علشان يقف قدامى فعرفت انى لازم اخلى مسافة بينى وبين اللى قدامى بس فى نفس الوقت ماتكونش كبيرة اوى علشان ماتغريش حد انه يكسر عليا

كل ده والدنيا تمام بس قلت اعدى على الراجل بتاع الكاوتش اطمن على الهوا بتاع العجل المهم رحت وركنت عنده وبعد ما خلص المفروض انى برجع بضهرى وبلف الدركسيون ناحية اليمين علشان اظبط زاويتى وامشى وفجأة وانا بعمل كده تقريبا رجلى كانت تقيلة على البنزين انا لقيت العربية جريت منى وبقيت مش شايفة قدامى من ورايا ولفت حوالى 180 درجة واللى معايا يصوتوا واصحاب المحل يصوتوا وانا مش عارفة حتى ادوس فرامل خلااااااااااص اعصابى سابت ... ستر ربنا انى كنت فى حتى فاضية ومفيهاش عربيات كتير بس العربيات اللى كانت بتيجى كانت بتبقى سريعة ...

المهم ربنا ستر ..
طبعا اخدت كلمتبن فى الوريد والعضل من امى وابويا والراجل بتاع الكاوتش طبعا مااتوصاش وقاللى انتى كده عديتى مرحلة تكسير العربية ودخلت فى مرحلة ارواح الناس وبلاش تكملى وانا هرجعكم وانا وشى بأه شبه فانوس رمضان كل حتة لون من الخضة والكسوف من الراجل ... بس الصراحة انا صممت انى انا اللى ارجع وعلى اول يوتيرن ورحت لفة ورجعت الجراج طبعا كنت لسه مرعوبة من موضوع الرجوع بظهرى فمارضيتش اركن وخليت السايس هو اللى يركن حفاظا على عربيات الناس

ولقيت السايس بيقولى اهو لو كتى انتى يامزمازيل اللى ركنتى كنتى هتاخديلك فيها ساعتين طبعا المزمازيل انكتمت وقلت له عندك حق معلش ادينا بنتعلم وبسس

انا انبسطت انى مشيت حوالى ساعة ونص فى المشوار ده من غير خساير بشرية او خساير فى العربية لكن الحركة اللى عملتها عند بتاع الكاوتش مضايقانى جدا بس يالله اهو تهزيقة تفوت ولا حد يموت

[abeer_roushdy]

ههههههههههههههههه سلامتك من التهزيق يا نينو ماتزعليش نفسك كلنا لها

اجمل مافى الموضوع هنا ان الواحد عرف انه مش لوحده فى عالم التهزيق دا انا الاول كانت كرامتى بتوجعنى اوى بس بعد ما عشت معاكم عرفت انى مش لوحدى وبجد والله دا خفف عنى كتير اوى لانى حسيت انى مش عجيبة من عجايب الزمن اللى طول مانا ماشية الناس بتتفرج عليها وبتتوشوش وفيه كتير زى

المهم اوعى تعقدى نفسك ودا عادى علشان لسة رجلك ماخدتش على حساسية البنزيين وخصوصا وانتى بترجعى وبتعدلى نفسك

مانا لسة بحكى حاجة شبه كدة عملتها امبارح

استاذ هشام شكرا كتير على ترحيبك

استاذ حسين
انا عايزة اسالك سؤال بخصوص اسئلة استاذ هشام

يعنى ايه انزل بالعربية من الكوبرى وانا معشقة اصدكم يعنى اكون مدية غيار للعربية معلش لو السؤال غبى شوية ؟

وكمان لية بيتقولو اعدى المطب وانا عاملة موور انا دايما بعديه على الغيار الاولانى لانى تقريبا حالية مش بمشى الا عليه هو واالتانى ولما بيجى المطب بهدى بالدبرياج والفرامل لحد ماهدى خالص وبعد كدة ادوس بنزين تانى

يا ترى فيه سبب علمى او قاعدة يعنى فى موضوع المور دا

[Nen0]

متشكرة ياعبير ربنا يكرمك هنعمل ايه .. كلنا لها .... فعلا مافيش حلاوة من غير نار
بس فعلا هو ماينفعش فى المواقف ده الا البرود التام والوش الجبس وعادى بأه ... اللى يقولى انتى كده هتكسرى العربية اقوله عادى اكسرها وماله واجيب عليها واحدة كمان - طبعا ده كله من ورا قلبى - بس اعمل ايه ماهو انا لازم افرس اللى يفرسنى ويحسسنى انى غبية ومفيش امل فيه ... واللى يقولى هتخلصى على عيلتك هقوله انت مالك همه عيلتك ولا عيلتى وبعدين دول هيبقوا شهداء الطريق....
كله بيعدى .... بس اهم حاجة ان ان شاء الله فيه امل مااهو غلطت ونيلت الدنيا بس الحمد لله ربنا ستر ورحت مشوار وطلعت كوبرى وعديت على ييجى خمناشر تمناشر مطب والحمد لله العربية تمام وانا تمام وعيلتى تمام واول ما روحنا امى جريت تتوضى تصلى ركعتين شكر ان ربنا نجاها منى ... عاااادى يعنى وان شاء الله كل مرة الواحد بيتعلم عن المرة اللى قبلها بس اهم حاجة الصبر وما نيأسش.

[husseinoo]

السلام عليكم ورحمة الله

وعليكم السلام ورحمة الله وبركاته

انا امبارح طلعت بالعربية .... والصراحة ده تانى مرة اطلع بالعربية من غير مدرب سواقة ... اه بالمناسبة المرة الاولانية كانت علشان انقل العربية من جراج داخلى الى جراج على الشارع العمومى اهو قلت ارحمها من مطبات الشوارع الداخلية وارحم فلوس اهلى اللى بتتصرف على الفوانيس اللى بدمرها كل شوية

المهم انا بقالى فترة عاوزة انزل اتمرن كده شوية لكن المشكلة ان رمضان وقته ضيق و مش بعرف اصحى بدرى خالص -فاشلة يعنى - وخصوصا انى اجازة من شغلى طول فترة رمضان فمش بقوم اصلا الصبح وطبعا بعد الساعة 10 بفتح شباك بيتنا بلاقى الشمس بتزغررررررررد فبقفل الشباك واستعيذ بالله من الشيطان الرجيم واقول خلاص مش هينفع النهاردة خليها بكره وبكره يجيب بعده وبعد بعده .... لغاية ما اتخنقت وقلت لأ مش هينفع كده ماانا لازم انزل بأه ده انا كده هنسى اللى اتعلمته

تصدقى ان انسب وقت فى رمضان الصباح الباكر ... خصوصا يوم الجمعة والسبت ... حتى ولو نزلتى الساعة 10 هاتلاقى الدنيا رايقة وزى الفل ... يعنى النهاردة الجمعة مثلا خرجت الساعة 10:30 صباحا ومشيت حتى مساكن شيراتون .. ووقفت فى حتة ظل وغسلت العربية بجيرجل مياه كان معايا فى العربية ورجعت تانى ... والحمد لله كان مشوار تمام ... خصوصا ان العربية لازم تمشى شوية حفاظا على البطارية

وقررت انى انزل بعد الفطار مباشرة ... وكنت متخيلة ان ده افضل وقت لأن الناس نصها هيبقى متنح بعد الفطار والنص التانى فى المساجد بيصلوا ...

للأسف بعد الإفطار كثير من الناس بنزل تانى شغله ...وفيه اللى بينزل يشترى ملابس العيد للاطفال .. والحركة بتكون جامدة جدا ... لدرجة انى كنت راجع من عند "حماتى" بالليل ... وقلت لنفسى مافيش داعى ترجع دلوقتى عشان الطريق هاتلاقيه زحمة جدا .. وفعلا رجعت الساعة 12:30 تقريبا ... والطريق يا دوب ابتدأ يروق ويبقى كويس

وفعلا اقنعت كل اللى فى البيت انه يانعيش سوا يانموت سوا واخدت بابا وماما واختى ورحت طالعة بيهم امبارح بالعربية ... انا طبعا كنت عاملة فيها شجيعة السيما بس انا كنت حاسة انى اللى هيقف جنبى هيسمع دقات قلبى

هههههههههه حاسس بحضرتك

المهم رحت الجراج وطبعا عملت فيها البت الى هى وطالعة بالعربية والعيال بتوع الجراج عمالين بيتوشوشوا كده بس مش عارفة ياترى بيتوشوشوا على مييييييييييين. المهم ماركزتش

للأسف شوية "قلة زوق" معلهش ... وكويس انك ماركزتيش معاهم


وطلعت بس انا كان عندى مشكلةانى لما بطلع بالعربية بلاقى فى وشى فتحة يوتيرن والمفروض انى بلف معاها علشان اخرج من المنطقة ... انا كنت مرعوبة انى لما هطلع بالعربية هكون واقفة بالعرض وهقفل الطريق تقربيا لغاية اما الاقى فرصة الف فيها العربية لأن الطريق الحمد لله كان واقف جدا والعربيات فوق بعضها ......

موقف صعب جدا جدا ... بصراحة وده يمكن من المواقف اللى ارجوا من الله انى اتجنبه .. وفى اماكن فيها مواقف تشبه كده استحالة انزل فيها ... ممكن انزل فيها لكن فى اوقات انا واثق ان الشارع رايق شوية

تقريبا والله اعلم امى ادت اشارات غير مرئية كده للواد بتاع الجراج - يالله اهو يكمل تريقة - وخلته يوقفلى العربيات ويوسعلى كده سكة علشان الف وامشى

طيب هو المفروض يعمل كده من نفسه ... الا اذا كان هو شايف ان الطريق معقول .. بس حضرتك اللى خايفة شوية

وفعلا الحمد لله مرت بسلام بعد كده الطريق كان واقف جدا بس على الاقل اكتسبت خبره انى بعرف اقف وامشى واقف وامشى وسمعت كلام حضرتك وبقيت بخلى مسافة كافية بينى وبين اللى قدامى ... بس هو المشكلة ان الشعب المصرى بيحب البلاى ستاشن اوى لقيت اللى بيزنق عليا واللى بيكسر عليا علشان يقف قدامى فعرفت انى لازم اخلى مسافة بينى وبين اللى قدامى بس فى نفس الوقت ماتكونش كبيرة اوى علشان ماتغريش حد انه يكسر عليا

كلام حضرتك عشرة على عشرة ... المشكلة فعلا فيه ناس مافيش عندها اى دماغ او تفكير خالص ... لو فيه متر واحد امامك فاضى .. يفضل يضرب فى كلاكسات ... عشان اركب بالعربية فوق اللى امامى ... لكن زى ما بتقولى المسافة طبعا المفروض ما تكونش كبيرة وتسمح لك بالمرور من السيارة التى امامك لو كان فيه اى ظروف تحتاج لذلك ... والاهم طبعا ان الواحد مايعملش فيها عشر رجالة ويقترب من السيارة التى امامه زيادة عن اللزوم .. واول ما السيارة التى امامك تتوقف فى الحالة دى لا اجد وقت كافى "عشان رد الفعل" يعنى سرعة الإستجابة وانى اتوقف ايضا ... الحكاية دى بتظهر اهميتها خصوصا بالليل ... من يومين كنت راجع بالليل واحساسى بالمسافات كان ضعيف جدا ... واكتشفت ان السير بالليل لازم يكون بحرص اكتر وبسرعة اهدى ... وشعرت ان موش انا فقط اللى حاسس بكده ... شعرت بأن كل العربيات التى تسير بالليل عاملة حسابها وماشية اهدى من العربيات اللى بتمشى بالنهار


كل ده والدنيا تمام بس قلت اعدى على الراجل بتاع الكاوتش اطمن على الهوا بتاع العجل المهم رحت وركنت عنده وبعد ما خلص المفروض انى برجع بضهرى وبلف الدركسيون ناحية اليمين علشان اظبط زاويتى وامشى وفجأة وانا بعمل كده تقريبا رجلى كانت تقيلة على البنزين

موش مشكلة ان رجلك تكون ضاغطة شوية على البنزين ... اهم حاجة رجلك ما تترفعش عن الدبرياج بسرعة فى اى حالة من الأحول ... لانك لو رفعتى رجلك بسرعة العربية هاتجرى منك او هاتتوقف منك وتبطل ... يعنى انا مثلا لما اشعر ان العربية هاترجع للخلف وانا متوقف فى الإشارة فى الحالة دى ممكن اضغط بنزين زيادة شوية ولكن فى نفس الوقت ارفع رجلى عن الدبرياج خفيف عشان العربية ما ترجعش للخلف ... طبعا لو رفعت رجلى جامد العربية هاتجرى الى الامام وهاتخبط العربية التى امامى

وكان ممكن انك ما تضغطيش بنزين خالص نهائى ... وترفعى رجلك فقط عن الدبرياج خفيف قوى وترجعى فى منتهى الهدوء والأمان للخلف

انا لقيت العربية جريت منى وبقيت مش شايفة قدامى من ورايا ولفت حوالى 180 درجة واللى معايا يصوتوا واصحاب المحل يصوتوا وانا مش عارفة حتى ادوس فرامل خلااااااااااص اعصابى سابت ... ستر ربنا انى كنت فى حتى فاضية ومفيهاش عربيات كتير بس العربيات اللى كانت بتيجى كانت بتبقى سريعة ...

عشان كده ... التمرين اللى وضعت صوره فى المشاركة الاخيرة ... تمرين مهم جدا .. على موضوع الرجوع للخلف وحساسية رجلك على البنزين والفرامل وكل الكلام اللى حضرتك شرحتيه ... لو فيه فرصة انزلى واتمرنى عليه

المهم ربنا ستر ..

الحمد لله على كل حال المهم حضرتك بخير والناس اللى حواليكى بخير

طبعا اخدت كلمتبن فى الوريد والعضل من امى وابويا والراجل بتاع الكاوتش طبعا مااتوصاش وقاللى انتى كده عديتى مرحلة تكسير العربية ودخلت فى مرحلة ارواح الناس وبلاش تكملى وانا هرجعكم وانا وشى بأه شبه فانوس رمضان كل حتة لون من الخضة والكسوف من الراجل ...

معلهش حصل خير ... عشان كده كنت افضل انك تنزلى بالعربية كتير فى الصباح الباكر ... حتى ولو كل يوم ... مافيش اى مشاكل ... ثقتك فى نفسك هاتزيد ... واحساسك بالعربية هايكون افضل

بس الصراحة انا صممت انى انا اللى ارجع وعلى اول يوتيرن ورحت لفة ورجعت الجراج طبعا كنت لسه مرعوبة من موضوع الرجوع بظهرى فمارضيتش اركن وخليت السايس هو اللى يركن حفاظا على عربيات الناس

انت بس خفتى شوية .. واعصابك تعبت من الموقف ده ... وممكن بعد ما تهدى وتفكرى كثير فى الموقف ده تفضلى متأثرة به ... عشان كده احب اقول لحضرتك مافيش اى مشاكل ... الموضوع محتاج فقط الى وقت وصبر وتدريب ... يعنى بدون اى استعجال ... وممكن تبطلى تركبى العربية شوية لحد ما تنسى الحكاية دى تماما ... ثم تبدأى فى التدريب مرة تانية ... مافيش اى مشاكل خالص

ولقيت السايس بيقولى اهو لو كتى انتى يامزمازيل اللى ركنتى كنتى هتاخديلك فيها ساعتين طبعا المزمازيل انكتمت وقلت له عندك حق معلش ادينا بنتعلم وبسس

هو عايز يظهر مهارته .... طيب ما هى دى شغلتك كل يوم وكل ساعة عايز تقارن نفسك بأى قائد سيارة تانى حتى ولو قديم فى السواقة .... وعلى كل ده والدى الله يرحمه كان بيركن فى الجراج وفى مكان ضيق وفيه عمود وعربيات راكنة ... والسايس يادوب هايقول له يمين وشمال والكلام ده ... قال له: استنى شوية ... وبالمرايات فقط ... ماشاء الله ركن فى مكان يا دوب على اد حجم السيارة ... الله يرحمه ياريت الواحد يكون 10% من مهارته وعقله

انا انبسطت انى مشيت حوالى ساعة ونص فى المشوار ده من غير خساير بشرية او خساير فى العربية لكن الحركة اللى عملتها عند بتاع الكاوتش مضايقانى جدا بس يالله اهو تهزيقة تفوت ولا حد يموت

ساعة ونص فى الزحام ... عشرة على عشرة ... لكنى افضل عدم النزول فى الزحام الآن ... يا ريت ننزل الصبح بدرى ... ونمشى كثير مافيش مشاكل ... ونمشى فى الشوارع اللى حضرتك متوقعة النزول فيها .. وننزل الزحام بالتدريج وكل شىء هايكون تمام التمام

ههههههههههههههههه سلامتك من التهزيق يا نينو ماتزعليش نفسك كلنا لها

اجمل مافى الموضوع هنا ان الواحد عرف انه مش لوحده فى عالم التهزيق

هههههههههههههههه ... لكن تصدقى انى حتى الآن لما واحد بيضرب لى كلاكس من الخلف بدون داعى بتنرفز واضايق ... ولما الاقى واحد واقف فى مكان غلط بتنرفز ... وبحاول اهدى نفسى ... يعنى مثلا تلاقى واحد راكن صف تانى فى اول الشارع يعنى فى مدخل الشارع ... اى عربية داخلة الشارع تفاجأ ان فيه عربية راكنة صف تانى ... وما بالك لو كان الشارع ده عمومى وزحمة كمان ... بحاول اهدى نفسى شوية لكن غصب عنى لأن الغلط فى الاساسيات يبقى بايخ قوى .. عايز تقف صف تانى ... على الاقل لا تقف فى اول الشارع على الناصية ... امشى لك 20 ولا 30 متر ثم توقف ... يبقى اللى داخل الشارع شايفك ويعمل لك حساب كده يعنى

دا انا الاول كانت كرامتى بتوجعنى اوى بس بعد ما عشت معاكم عرفت انى مش لوحدى وبجد والله دا خفف عنى كتير اوى لانى حسيت انى مش عجيبة من عجايب الزمن اللى طول مانا ماشية الناس بتتفرج عليها وبتتوشوش وفيه كتير زى

شوفى ما دام حضرتك ماشية فى خط مستقيم وملتزمة بحارتك ومابتحدفيش على حد ... مافيش اى مشاكل حتى ولو كان كل تركيزك على العربية التى امامك فقط ... يضرب كلاكس .. يطلع على الحيط ... يعمل فيها صرصار ... ولا يهمك ... ليه ؟ ... عشان انت كده ما بتعرضيش اى حد للخطر ... اللى وراكى عايز يجرى هو حر ... يصرف نفسه بنفسه ... انت ماشية فى خط مستقيم ملتزمة بحارتك وتاركة مسافة للامان بينك وبين العربية التى امامك ... هى دى الاساسيات ...

وطبعا لو بتقدرى تغيرى مكانك من حارة الى حارة بشكل جيد .... خلاص يبقى تقريبا كل شىء هايكون تمام التمام ... اما عن قلة الزوق فى الشارع ... معلهش هى سخافة وقلة ادب خصوصا لما تكون اللى راكبة السيارة سيدة ... يظهر لنا اصحاب الدم الخفيف ... واصحاب الاخلاق السيئة .. والاستظراف ... الزايد عن اللزوم ... ولا يهمك ولا تسمعى اى حاجة ولا تعبرى ... هما يعنى اول ما نزلوا الشارع اتعلموا مرة واحدة طبعا لأ ... لكن الادب حلوا والاحترام شىء جميل ...

المهم اوعى تعقدى نفسك ودا عادى علشان لسة رجلك ماخدتش على حساسية البنزيين وخصوصا وانتى بترجعى وبتعدلى نفسك

مانا لسة بحكى حاجة شبه كدة عملتها امبارح

استاذ هشام شكرا كتير على ترحيبك

استاذ حسين
انا عايزة اسالك سؤال بخصوص اسئلة استاذ هشام

يعنى ايه انزل بالعربية من الكوبرى وانا معشقة اصدكم يعنى اكون مدية غيار للعربية معلش لو السؤال غبى شوية ؟

العفو حضرتك واهلا وسهلا بك ... ومافيش اى مشاكل حتى ولو كان السؤال بسيط بالنسبة لنا ممكن يكون فيه ناس كثير موش عارفاه

الموضوع ببساطة إذا ضغط فرامل والعربية كانت ناقلة مثلا الغيار التانى الثالث الرابع اى غيار ... فى الحالة دى العربية سوف تتوقف بشكل جيد جدا ... لأنها معشقة ... يعنى العربية سوف تتوقف اعتمادا على الفرامل بالإضافة على عملية تعشيق التروس الخاصة بالفتيس ونقل الحركة ...

اما لو كانت العربية فى وضع "المور" فقط اى بدون اى غيار
فى الحالة دى لو ضغطى فرامل ... العربية سوف تعتمد على الفرامل فقط
ولو كانت العربية ماشية بسرعة ... هاتشعرى انها موش عايزة تقف بسهولة

عشان كده فيه ناس تضغط فرامل
وقبل ما العربية ما تتوقف تماما يعنى سرعتها توصل الى 20 كيلوا مثلا ... يبدأ السائق فى الضغط على الدبرياج وفضل الحركة واختيار غيار اقل او يضع الغيار فى وضع المور

وكمان لية بيتقولو اعدى المطب وانا عاملة موور انا دايما بعديه على الغيار الاولانى لانى تقريبا حالية مش بمشى الا عليه هو واالتانى ولما بيجى المطب بهدى بالدبرياج والفرامل لحد ماهدى خالص وبعد كدة ادوس بنزين تانى

يا ترى فيه سبب علمى او قاعدة يعنى فى موضوع المور دا

والله هى عملية حسب اللى راكب العربية .. بترجع له وبطريقة قيادته للسيارة

يعنى انا مثلا ... ماشى كويس ... لكن شايف ان فيه مطب صناعى على بعد 200 متر او اكثر
اول حاجة اعملها ايه
"امور" الفتيس
واترك العربية تسير المسافة الباقية لوحدها ... وبراحتها خالص
وقبل المطب الصناعى ... طبعا العربية هاتكون سرعتها هادية ... ابدأ فى الضغط على الفرامل خفيف ... بحيث انى اتركها تسير بشكل هادى ... واول ما تطلع فوق المطب ... اختار الغيار المناسب

يعنى ايه ؟
لو انا اتحكمت فى عملية الطلوع بشكل مناسب وبسرعة مناسبة
يبقى فى الحالة دى هاختار الغيار التانى
واستمر فى السير

لو انا لم استطيع تقدير المسافة والسرعة المناسبة للطلوع على المطب
يعنى العربية وقفت على المطب او كانت سرعتها بطيئة جدا جدا
يبقى فى الحالة دى هاختار الغيار الاول
واستمر فى السير

الكلام ده بيتعمل خصوصا مع المطبات الرخمة والجامدة

لكن لو المطب عادى خفيف
خلاص
قبل ما اطلع عليه بختار الغيار التانى واستمر فى السير بدون اى مشاكل


طبعا حكاية انى "امور" الفتيس دى ... انا بعملها على طول
يعنى مثلا شايف امامى ... قضيب مترو فى مصر الجديدة وعايز اعدى فوق القضيب بشكل هادى
خلاص ... بمور الفتيس واترك العربية تمشى بهدوء ... وقبل شريط المترو ... اضغط فرامل خفيف
واول ما العربية تبدأ فى المرور فوق القضيب .. انقل الغيار التانى واستمر فى السير

ونفس الشىء
شايف انى فيه امامى اشارة متوقفة
مثلا فى ميدان المحكمة
بمور الفتيس ... واترك العربية تسير براحتها
وقبل الإشارة ابدأ اضغط فرامل خفيف حتى تتوقف العربية

طبعا الحكاية دى بتريح العربية
ايه الداعى انى اضغط بنزين واجرى بسرعة وقبل الإشارة مثلا ... اضغط فرامل جامد عشان اتوقف
كل ده تعتبريه استهلاك
استهلاك بنزين
استهلاك كاوتش لو بتفرمل بشكل موش مناسب
استهلاك "تيل فرامل"
استهلاك اعصاب ... لانك بتدخل على المكان وانت بتجرى وعايز تقف قبل العربية التى امامك بمتر واحد ... وتفضل تعمل فى حركات بدون داعى

ما هو انت كده كده هاتتوقف فى الإشارة
خلاص ريح نفسك
وريح العربية

وتوقف بهدوء

طبعا فيه ناس كثير موش بيعجبها الطريقة دى

لكن انا مرة كنت مع والدى الله يرحمه عند الميكانيكى
وانا لسه طالب فى ابتدائى ولا اعدادى
وفاكر الكلام اللى كان بيقولوا الميكانيكى
كان راجل كبير فى السن
وكان بيقول لوالدى: انا عمرى ما استهلكت "تيل الفرامل"
اول ما اشوف ان العربية هاتوقف بعد شوية فى الإشارة مثلا
بمور الفتيس واتركها حتى تتوقف لوحدها
تخيلوا ... يعنى يادوب يضغط على الفرامل خفيف قوى

ناس عاقلة ... وحلوة قوى

دلوقتى .. العربيات حديثة ... او حتى موش حديثة
الكل عايز يجرى ... بداعى وبدون داعى
فاكر نفسه بيلعب دور "فيديو جيم"

وفى الأول و الآخر هى تقدروا تقولوا عليها "استايل"
طريقة بتحب تقود بها سيارتك

يا ريت اسمع تعليق منكم على موضوع الاستايل ده
هل فيه حد يشاركنى الرأى ؟

فى انتظار التواصل

مع اطيب التمنيات
اخوكم حسين غزالة

[hesham90]

ههههههههههههههههه سلامتك من التهزيق يا نينو ماتزعليش نفسك كلنا لها

اجمل مافى الموضوع هنا ان الواحد عرف انه مش لوحده فى عالم التهزيق دا انا الاول كانت كرامتى بتوجعنى اوى بس بعد ما عشت معاكم عرفت انى مش لوحدى وبجد والله دا خفف عنى كتير اوى لانى حسيت انى مش عجيبة من عجايب الزمن اللى طول مانا ماشية الناس بتتفرج عليها وبتتوشوش وفيه كتير زى

المهم اوعى تعقدى نفسك ودا عادى علشان لسة رجلك ماخدتش على حساسية البنزيين وخصوصا وانتى بترجعى وبتعدلى نفسك

مانا لسة بحكى حاجة شبه كدة عملتها امبارح

استاذ هشام شكرا كتير على ترحيبك

استاذ حسين
انا عايزة اسالك سؤال بخصوص اسئلة استاذ هشام

يعنى ايه انزل بالعربية من الكوبرى وانا معشقة اصدكم يعنى اكون مدية غيار للعربية معلش لو السؤال غبى شوية ؟

وكمان لية بيتقولو اعدى المطب وانا عاملة موور انا دايما بعديه على الغيار الاولانى لانى تقريبا حالية مش بمشى الا عليه هو واالتانى ولما بيجى المطب بهدى بالدبرياج والفرامل لحد ماهدى خالص وبعد كدة ادوس بنزين تانى

يا ترى فيه سبب علمى او قاعدة يعنى فى موضوع المور دا

بعد اذن الاستاذ حسين ارد لحد ما حضرتك تعقب........
اولا-شكرا للاستاذة عبير للتواصل
ثانيا- مرحبا بالعضوة الجديدة نينو
ثالثا- معشقة يعنى مدية غيار زى ماحضرتك تفضلتى وقلتى ودى لغة السائقين
رابعا-موضوع المور اللى ناقشته مع الاستاذ حسين ده يمكن يكون حالة خاصة بعربيتى وليست قاعدة واسمحى لى اشرحلك ........*لما بكون ماشى على التانى وقدامى مطب غبى وعالى قوى عربيتى بتكون بتسحب جامد وهى بالمناسبة ماتريكس فعلشان اجى قبل المطب واهدى بالفرامل بس على ماطلع المطب بتروح مخبطة من تحت فى المساعدين او الشكمان او اى حاجة من تحت وده زى ماقلت علشان سحبها عالى ولو حاولت ادوس فرامل من غيردبرياج ممكن تبطل ولو بطلت فوق المطب العالى الغبى ده تبقى كارثة ببقى زى اللى راكب مرجيحة وطبعا علشان تدورى وتطلعى تبقى حكاية لانك متشعلة وناهيكى عن الكلاكسات والهيصة للسائقين اللى وراكى فعلشان كده بفضل امور العربية قبل المطب وده لو كان عالى وغبى زى ماقلت علشان اعدى عليه بالراحة والعربية ماتبطلش ....*بعدين وانا فوق المطب والعجل اللى قدام بينزل اروح مديها التانى وطالع فوريرة وده مع المطب العالى بس اما باقى المطبات طبقا لحالة كل مطب ممكن اطلع المطب واعديه وانا على التانى من غير مامور........ وشكرا على التواصل وتحياتى للاستاذ حسين ولسيادتك ومنتظر التعقيب وتقبلوا خالص تحياتى

[abeer_roushdy]

مممممممممممم

طيب ليه بتدوس فرامل من غير دبرياج انا عن نفسى لما حاولت اعمل الحركة دى العربية بطلت لازم ادوس دبرياج قبل الفرامل انا اصلا رجلى على الدبرياج دا مش ببتتحرك على طول اى حاجة اقوم دايسة عليه دا حتى ساعات بنسى وادوس دبرياج من غير حاجة :)

يعنى انا شايفة انك تدوس دبرياج وفرامل وتهدى بيه احسن من انك تمور وبعدين تغير تانى
مش عارفة انا عن نفسى بتلخبط من كتر التعامل مع الفتيس

بس معلش سؤال غبى تانى سحبها جامد يعنى سريعة ولا المقصود ايه؟

انا انهاردة رحمتكم من مغمراتى علشان مانزلتش بالعربية مع انى كنت ناوية ونزلت فعلا وكمان كانت معاية حماتى كنت هوديها مشوار فى الشارع الجانبى بتاع المطب ايااه بس لاقيت كذا عربية قافلة علية قولت يا فرج الله وقولت وانا بضحك فى سرى يا خسارة يا حماتى شوفتى الحظ العربيات قافلة ومالهاش حل يلا حظك وحش بئى

وشكلى كنت هعمل حاجة وربنا سترها معاية علشان شكلى ما يبئاش وحش اوصادها وتخلى جوزى يحلف علية مانا راكباها تانى

[dr_mim81]

يا جماعة انا عندي مشكلة هامة؟

انا كنت خدت دورة سولقة من ياجي تسع سنين وكنت عرفت السواقة المبادئ يعني بس من ساعتها ما سوقتش ولا مرة
انا دلوقتي مضطر اشتري عربية ولاسباب عديدة ما ينفعش اجيب حاجة اتعلم فيها هاجيب حاجة عالطول غالية وكويسة ان شاء الله ممكن تكون باسات 2009 كدة ودة اللي مخوفني اكتر
فانا خايف اوي من موضوع السواقة بس انا ان شاء الله العربية اللي هاجبيها هتكون اوتوماتيك -ستيبترونيك- وناس قالولي اني ابدا الاول انزل بالعربية بالليل متاخر وبالتدريج ابدا انزل بيها بدري لحد معرف اسوق في عز الضهر علما بان انا مش من القاهرة والدنيا عندنا اهدي من القاهرة ؟
هو انا ناوي اروح مدرسة عشر حصص وبعد كدة اجيب العربية واعمل الكلام السابق
فاية رايكم في الحل دة؟الكلام دة ينفع وخصوصا العربية اتوماتيك؟
ياريت تفيدوني

[husseinoo]

رابعا-موضوع المور اللى ناقشته مع الاستاذ حسين ده يمكن يكون حالة خاصة بعربيتى وليست قاعدة واسمحى لى اشرحلك ........*لما بكون ماشى على التانى وقدامى مطب غبى وعالى قوى عربيتى بتكون بتسحب جامد وهى بالمناسبة ماتريكس فعلشان اجى قبل المطب واهدى بالفرامل بس على ماطلع المطب بتروح مخبطة من تحت فى المساعدين او الشكمان او اى حاجة من تحت

هههههههه هو حضرتك بتعانى من المطبات زى حالاتى ... لو طلعت فوق المطب بسرعة هاتسمع اصوات من تحت العربية ههههههه ربنا يستر

وده زى ماقلت علشان سحبها عالى ولو حاولت ادوس فرامل من غيردبرياج ممكن تبطل ولو بطلت فوق المطب العالى الغبى ده تبقى كارثة ببقى زى اللى راكب مرجيحة وطبعا علشان تدورى وتطلعى تبقى حكاية لانك متشعلة وناهيكى عن الكلاكسات والهيصة للسائقين اللى وراكى فعلشان كده بفضل امور العربية قبل المطب وده لو كان عالى وغبى زى ماقلت علشان اعدى عليه بالراحة والعربية ماتبطلش ....*بعدين وانا فوق المطب والعجل اللى قدام بينزل اروح مديها التانى وطالع فوريرة وده مع المطب العالى بس اما باقى المطبات طبقا لحالة كل مطب ممكن اطلع المطب واعديه وانا على التانى من غير مامور........ وشكرا على التواصل وتحياتى للاستاذ حسين ولسيادتك ومنتظر التعقيب وتقبلوا خالص تحياتى

هو فيه نصيحة كان السواقين القدام يقولوا عليها بخصوص المطب والعربيات اللى ارتفاعها منخفض ... النصيحة هى: انك لا تصعد على المطب بالعجلتين الاماميتين هههههههههههه

يعنى لما تطلع على المطب اطلع عليه "بجانب" العربية .. يعنى مثلا العجلة اليسار الاول وبعد كده العجلة اليمين

يعنى اطلع عليه بشكل موازى شوية

ده طبعا فى حالة ان المطب يكون غبى وعالى قوى
وطبعا لازم تكون العربيات وراك قليلة شوية عشان يسمحوا لك تعمل المناورة دى ههههههه
وكل سنة وحضرتك طيب

مممممممممممم

طيب ليه بتدوس فرامل من غير دبرياج انا عن نفسى لما حاولت اعمل الحركة دى العربية بطلت لازم ادوس دبرياج قبل الفرامل انا اصلا رجلى على الدبرياج دا مش ببتتحرك على طول اى حاجة اقوم دايسة عليه دا حتى ساعات بنسى وادوس دبرياج من غير حاجة :)


الله يكرمك هو فيه ناس كثيير اتكلمت عن موضوع الدبرياج ده ... وانك اول ما تنقلى الفتيس ... على قدر الامكان ترفعى رجلك تماما من على الدبرياج ... حفاظا عليه ... لانك لو فضلتى ضاغطة عليه "نصف ضاغطة" ... معنى كده ان اسطوانه الدبرياج هاتستهلك بسرعة ... وده موش كويس

يعنى اول ما نتقلى غيار .. سنة بنزين ... وارفعى رجلك عن الدبرياج بالتدريج ... ثم ارفعى رجلك عن الدبرياج بالكامل

فى الزحام فقط وفى التقاطعات والملفات اللى كلها قلق ... الحالات دى فقط هى اللى تضغطى على الدبرياج تحسبا لاى توقف

لكن فى اى فرصة ارفعى رجلك عن الدبرياج بالكامل حفاظا عليه

يعنى انا شايفة انك تدوس دبرياج وفرامل وتهدى بيه احسن من انك تمور وبعدين تغير تانى
مش عارفة انا عن نفسى بتلخبط من كتر التعامل مع الفتيس


اهم حاجة ان العربية ما تبطلش منك
ان العربية ما تريحش على العربيات الموجودة خلفك
ان العربية ما تخبطش فى المطب من اسفل
والبعض لا يفضل استعمال الفرامل قبل الصعود على المطب


بس معلش سؤال غبى تانى سحبها جامد يعنى سريعة ولا المقصود ايه؟

سحبها جامد معناه: ان فى اقل وقت العربية ما شاء الله بتوصل الى سرعة عالية ... يعنى مثلا هههههههه انا على ما اوصل لسرعة 80 او 90 كيلوا قولى هامشى بالعربية لمدة دقيقة او اكثر
بالنسبة للعربيات اللى سحبها جامد
ممكن توصل لسرعة 80 او 90 فى ثوانى
يعنى لو صاحبها موش حاسس بقوتها ... اى ضغطة على دواسة البنزين سوف يجد العربية بتجرى به بسرعة جدا


انا انهاردة رحمتكم من مغمراتى علشان مانزلتش بالعربية مع انى كنت ناوية ونزلت فعلا وكمان كانت معاية حماتى كنت هوديها مشوار فى الشارع الجانبى بتاع المطب ايااه بس لاقيت كذا عربية قافلة علية قولت يا فرج الله وقولت وانا بضحك فى سرى يا خسارة يا حماتى شوفتى الحظ العربيات قافلة ومالهاش حل يلا حظك وحش بئى

وشكلى كنت هعمل حاجة وربنا سترها معاية علشان شكلى ما يبئاش وحش اوصادها وتخلى جوزى يحلف علية مانا راكباها تانى


هههههههههه انا كنت حاسس بك ... ومنتظر النهاية دى
لكن الصراحة ما شاء الله ولا حول ولا قوة الا بالله
برغم الزحام عندك فى المنطقة
لكنك ما شاء الله بتخرجى بها وكمان معاكى زبائن "اعزاء" جدا
هههههههه
كل عام وحضرتك بخير

يا جماعة انا عندي مشكلة هامة؟

انا كنت خدت دورة سولقة من ياجي تسع سنين وكنت عرفت السواقة المبادئ يعني بس من ساعتها ما سوقتش ولا مرة
انا دلوقتي مضطر اشتري عربية ولاسباب عديدة ما ينفعش اجيب حاجة اتعلم فيها هاجيب حاجة عالطول غالية وكويسة ان شاء الله ممكن تكون باسات 2009 كدة ودة اللي مخوفني اكتر
فانا خايف اوي من موضوع السواقة بس انا ان شاء الله العربية اللي هاجبيها هتكون اوتوماتيك -ستيبترونيك- وناس قالولي اني ابدا الاول انزل بالعربية بالليل متاخر وبالتدريج ابدا انزل بيها بدري لحد معرف اسوق في عز الضهر علما بان انا مش من القاهرة والدنيا عندنا اهدي من القاهرة ؟
هو انا ناوي اروح مدرسة عشر حصص وبعد كدة اجيب العربية واعمل الكلام السابق
فاية رايكم في الحل دة؟الكلام دة ينفع وخصوصا العربية اتوماتيك؟
ياريت تفيدوني


الاول اهلا وسهلا بحضرتك
ثانيا بالنسبة لموضوع شراء عربية بشكل نهائى انا من انصار الموضوع ده ...
ثالثا: بالنسبة ان حضرتك تفضل انك تاخد مع اى مدرس قيادة 10 حصص ... ده كلام ممتاز جدا ... ولو قدرت تضاعف الحصص يبقى هايل ونظريتى كالتالى:
ما شاء الله ولا حول ولا قوة إلا بالله ... الواحد مننا ربنا بيكرمه بشراء سيارة غالية ... وعند التدريب موش عايز يصرف ... وده موش تمام ... الصح انى اصرف كويس على التدريب خصوصا لو كان المدرب فاهم وبستفيد منه
والاهم من كده انى ادرب على عربية مدرسة القيادة بعيدا عن سيارتى

يعنى فى المرحلة الاولى اخرج على عربية مدرسة القيادة ... 10 او حتى 20 حصة وفى اماكن زحمة وطوالى وركن عربية ومطبات وكبارى وانفاق ... وكل الظروف

ولو شعرت انى محتاج حصص تانى ... مافيش اى مشاكل
يعنى مصاريف التدريب لن توازى ثمن "فانوس" فى العربية

اهم حاجة انك تشعر بالإستفادة من التدريب وان المدرب فاهم وعنده قدرة على التوصيل

وبعد الإنتهاء من التدريب والتأكد تماما انك اصبحت مية مية
وان ثقتك فى نفسك ممتازة

ممكن المدرب يخرج معاك على عربيتك ... ده بعد الإنتهاء من التدريب على عربية مدرسة القيادة ...
تخرج شوية على عربيتك عشان تشعر بأبعادها وتأخذ حساسية القيادة .. وتسمع بعض المعلومات من المدرب بخصوص التعامل مع عربيتك
خصوصا ان حضرتك تفضل شرائها اتوماتيك ... وانا عن نفسى بحب الاوتوماتيك جدا جدا ... برغم ان الميكانيكية بيخافوا منها هههههههههه

ربنا يبارك لحضرتك فيها

تبدأ تخرج على عربيتك مع اى صديق آخر ولمدة انت اللى تقدرها
تخرج فى الصباح الباكر
إن شاء الله كل يوم نص ساعة
واول ما تشعر ان ثقتك فى نفسك تمام التمام

اتوكل على الله وامشى بالعربية زى ما نت عايز

وما دام المنطقة اللى حضرتك فيها رايقة وموش زحمة ... لن تشعر بالمعاناة التى يشعر بها المبتدأين امثالنا فى شوراع المحروسة

اثناء التدريب إن شاء الله
لازم تركز على ابعاد العربية
العودة للخلف
ركن السيارة
استعمال المراية بشكل جيد جدا
الصعود والتوقف على المطالع
وطريقة النزول على الكبارى

طبعا موضوع الركن والعودة للخلف بالذات من اكبر اسباب احتكاكات العربية مع العربيات التانية

والله لو قدرت تاخد حصص كثيير مع المدرب مافيش اى مشاكل ... موش لازم موضوع 10 حصص ده ... يعنى هادفع كام ؟ ... موش مشكلة ... المهم انك تركب عربيتك إن شاء الله زى الملك ... وموش خايف .. وواثق فى نفسك ... زود حصص التدريب زى ما انت عايز

وفيه ناس هاتقولك لأ خد 10 حصص كفاية وكمل على عربيتك عشان تتعلم عليها

لأ طبعا

انا اتعلم الأول مية مية فى مدرسة قيادة ... وبدون اى استعجال وبشىء من الصبر وعلى اقل من مهلك خد وقتك

وبعدين اركب ما شاء الله ولا حول ولا قوة إلا بالله "العربية باسات 2009" واحافظ عليها وامشى زى الفل


عشان إن شاء الله لما تشترى العربية ... ربنا يبارك لك فيها إن شاء الله وتحافظ عليها

وفى الأول والآخر ربنا هو الستار

وكل سنة وحضرتك طيب
رمضان كريم

مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

كيف تنظف بوجيهات السيارة

هى مشاركة غير مباشرة كنت عملتها اليوم ... وقلت لنفسى يمكن تفيد اى حد من المبتدأين بخصوص موضوع الصيانة


اول حاجة لازم تتأكد ان المكان اللى مربوط فيه البوجيه نظيف .. يعنى لا يوجد اى اتساخات ... لو قدرت تنفخ المكان ده بشوية هواء عند العجلاتى يبقى كويس
عشان اى وساخة ما تنزلش داخل الموتور بعد ما تفك البوجيه

ثانى حاجة اكيد عندك فى العربية مفتاح خاص بالبوجيه ... فك السلك عن بوجيه واحد فقط
وبعد كده فك البوجيه
ثم استعمل فى تنظيف البوجيه اسبراى "WD 40" يعنى تبخ على سن البوجيه شوية صغيرين من علبة الاسبراى ... وبعد وقت قليل امسح البوجيه فى فوطة العربية
سوف تجد ان البوجيه نظف وبقى مية مية

لو شعرت انك محتاج تبخ مرة تانية الاسبراى ... مافيش اى مشاكل
المهم بعد كده تركب البوجيه
وتربطه جيدا
وتركب السلك بتاعه فى مكانه


وبعد كده تكرر نفس الخطوات مع كل بوجيه لوحده

يعنى اوعى تفك البوجيها كلها مرة واحدة
عشان ممكن تتلخبط فى تركيب السلك بتاع البوجيهات وتسبب مشاكل كبيرة ... بدون الدخول فى التفاصيل كل بوجيه وله سلك خاص به هههههههه ده من الآخر ... تمام كده

يعنى مثلا سلك البوجيه الاول تركبه على البوجيه التانى او اى خطأ يشبه كده

فك كل بوجيه لوحده
وبعد تنظيفه
وتركيبه
وتركيب السلك الخاص به

تبدأ فى فك البوجيه التالى وهكذا


على فكرة علبة الاسبراى WD 40 العلبة دى اساسى عندى فى العربية والحجم الكبير منها ثمنه تقريبا فى حدود 24 جنيه وفيه منها احجام صغيرة ثمنها فى حدود 12 او 14 جنيه
وتجدها فى البنزينة وعند محلات الكماليات وفى كارفور وطبعا فى التوفيقية ... وفى انواع بديلة .. ولكنى افضل الـ WD 40

و دى صورة العلبة

الفيديو ده هايبين تأثير الاسبراى فى تنظيف البوجيهات بشكل ممتاز

YouTube - wd 40 with spark plugs test

مع اطيب التمنيات بالتوفيق والنجاح
اخوكم حسين غزالة