نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[THE_HERO2005]

السلام عليكم ورحمه الله وبركاته......

انا بشوف كميه مواقف يوميا ومش عارف انا لو كنت فيها كنت هعمل ايه ؟!!!
موقف مثلا زى : كنت شايف واحدة راكبه ماتريكس لسه بلزقتها ومتلمستش المهم العربية كان ماشى وراها اوتوبيس نقل عام ومرة واحده لقيت الاوتوبيس نزل من مطب جامد ولبس فى شنطة الماتركيس ولقيت الكنبه الخلفيه فى التابلوه !!! مش عارف لو كنت مكانها كنت هاعمل ايه ؟؟؟

المهم من ربع ساعة لسة حاصل معايا موقف .... واحد بتاع ميكروباص خبطلى الاكصدام الامامى بتاعى والاكصدام متكسرش بس اتخلع من الحديدة الى راكبه فيه.. وانا قاعد فى العربية قلت هنزل اضربه ولا اقطعه .... فى الاخر قولتلو الله يسهلك !! مش عارف عملت كدا ازاى وحاسس بتأنيت ضمير ؟

المهم نفسى اعرف المفروض الواحد يعمل ايه فى المواقف دى وكمان عايز اعرف تكلفة تصليح الحاجات دى ؟ وامتى اقول الله يسهلك وامتى انزل اقولو هات فلوسك او حياتك ؟

[م. عصام مهنى]

استاذ / حسين
وحشتنا الفترة اللى فاتت

والحمد لله المنتدى رجع بالسلامة

[magid1010]

استاذ حسين وحشتنا جامد

[husseinoo]

استاذ / حسين
وحشتنا الفترة اللى فاتت

والحمد لله المنتدى رجع بالسلامة

استاذ حسين وحشتنا جامد

السلام عليكم ورحمة الله وبركاته
اللهم صل على محمد وعلى آله وصحبه أجمعين

والله انتم كمان وحشتونى جدا جدا
لكن بالنسبة لى .... انا فى حالة صدمة ههههههههههههههههههه

ولما عرفت ان الباكب سوف يتم رفعه من تاريخ شهر اكتوبر اللى فات ... قلت لنفسى موش مشكلة
شغل شهر نقدر مع الوقت نرفعه تانى على المنتدى

المفاجأة الغير سارة
ان وجدت ان كل الصور المرفوعة فى المشاركت .... كل الصور غير موجودة

وطبعا كلام من غير صور
اكنك بتتفرج على مجلة وكلها كلام فقط .... حاجة غير شيقة بالمرة

دماغى واقفة خالص
موش عارف اعمل ايه

تخيلوا انتم كل الافكار والشروحات اللى اتعملت اصبحت مجرد كلام ....

معقولة هانبدأ من جديد ... نكتب الكلام ده
موش عارف ايه اللى الواحد يعمله


ربنا ببسر الاحوال

قدر الله وما شاء فعل

فى انتظار التواصل

مع اطيب التمنيات
اخوكم حسين غزالة

[م. عصام مهنى]

لا تحزن سيجاريك الله خير عن كل المجهود الذى بذلته فى المشاركات السابقة
وما عند الله لا يضيع
نحن فى انتظار مشاركاتك القيمة
وجزاك الله كل خير

[aymanay32]

معلش متزعلش المهم ان المنتدى اشتغل تانى
ورجعت اكثر البيانات فيه

[retaliation]

السلام عليكم ورحمة الله وبركاته

اللهم صل على محمد وعلى آله وصحبه أجمعين

والله انتم كمان وحشتونى جدا جدا
لكن بالنسبة لى .... انا فى حالة صدمة ههههههههههههههههههه

ولما عرفت ان الباكب سوف يتم رفعه من تاريخ شهر اكتوبر اللى فات ... قلت لنفسى موش مشكلة
شغل شهر نقدر مع الوقت نرفعه تانى على المنتدى

المفاجأة الغير سارة
ان وجدت ان كل الصور المرفوعة فى المشاركت .... كل الصور غير موجودة

وطبعا كلام من غير صور
اكنك بتتفرج على مجلة وكلها كلام فقط .... حاجة غير شيقة بالمرة

دماغى واقفة خالص
موش عارف اعمل ايه

تخيلوا انتم كل الافكار والشروحات اللى اتعملت اصبحت مجرد كلام ....

معقولة هانبدأ من جديد ... نكتب الكلام ده
موش عارف ايه اللى الواحد يعمله


ربنا ببسر الاحوال

قدر الله وما شاء فعل

فى انتظار التواصل

مع اطيب التمنيات
اخوكم حسين غزالة

أنا مش عارف أقول لحضرتك أيه بس كل اللى أقدر أقوله و أتمنى أنه يقلل من ضيق حضرتك أن تعبك ده مرحش على الفاضى وأن ناس كتيررر أستفادت منه
أنا عن نفسى كنت شفت الموضوع هو كان حوالى 50 صفحه رجعت قريته كله من الأول و كان عباره عن مرجع ليا

[sara2001]

استاذ حسين
ما تزعلش على المجهود اللي راح
مش مشكله الجزء اللي اتحذف
انا حاولت ادور على الصفحات على google في النسخ المخبأه
وللأسف معرفتش
كان نفسي اساعد حضرتك في البحث عن الصفحات المحذوفه

[husseinoo]

بسم الله الرحمن الرحيم
السلام عليكم ورحمة الله وبركاته

شكرا لمشاعركم النبيلة
موش هاقدر اقول غير "قدر الله وما شاء فعل"

نتوكل على الله ونستكمل مرة تانية من آخر موضوع

تعلم القيادة فى 10 ايام

التعامل مع المرتفعات

تمارين هامة

التمرين الاول: استخدام الدبرياج لكى تتوقف السيارة على اى مرتفع

فى هذا التمرين نحتاج الى مكان مرتفع للتدريب مثلا شارع انت متأكد انه آمن للتدريب وطبعا لازم يكون الشارع ده مرتفع مثل مطلع الكوبرى
ولازم يكون امامك منطقة خالية ... وكمان منطقة خالية خلف سيارتك
اثناء دوران السيارة "دوران الموتور"
اختار الغيار الاول
اضغط على البنزين خفيف وثبت رجلك
ثم ابحث على "نقطة التحرك" ... يعنى ارفع رجلك عن الدبرياج حتى تشعر ان السيارة سوف تتحرك اذا رفعت رجلك اكثر من ذلك .. دى اسمها نقطة التحرك
سوف تحتاج الى انك تضغط بنزين شوية زيادة خلاف السير على الطريق المستقيم العادى "الذى لا يوجد به اى ارتفاعات"
اذا كان لا يوجد اى سيارة خلفك او امامك ... "نزل فرامل اليد الى اسفل"
انتظر ثوانى واحتفظ بالسيارة فى هذا الوضع بدون اى حركة للامام او الى الخلف
اذا تحركت السيارة الى الامام .. اضغط على الدبرياج خفيف حتى تتوقف السيارة
اذا تحركت السيارة الى الخلف ... احتفظ بهدؤك وارفع رجلك خفيف على الدبرياج حتى تتوقف السيارة
بعد ثوانى قليلة
اضغط على الدبرياج بالكامل
ثم اضغط على الفرامل
ثم ارفع فرامل اليد
وريح رجلك واعصابك شوية ههههههههههههههههه

استمر فى التدريب حتى تشعر بالثقة فى نفسك انك تقدر تحتفظ بالسيارة متوقفة على اى مرتفع مثل الكوبرى باستخدام الدبرياج والبنزين فقط دون الحاجة الى استخدام فرامل اليد.


التمرين الثانى
والغرض منه التدريب على السيطرة على السيارة اذا تحركت الى الخلف
هذا التمرين الغرض منه زيادة الثقة فى نفسك عن طريق انه يوضح لحضرتك بسهولة كيف يمكن التحكم فى السيارة ومنعها من التحرك الى الخلف.
اولا لازم تتأكد انه لا يوجد سيارات متوقفة خلفك او مشاة
اعد التمرين السابق "التوقف على المرتفعات"
اضغط على الدبرياج خفيف حتى تشعر ان السيارة بترجع للخلف
ارفع رجلك على الدبرياج خفيف حتى تشعر بأن السيارة توقفت عن الرجوع الى الخلف
مهم جدا ان تتحكم فى الدبرياج بهدوء وثقة
اذا رفعت رجلك عن الدبرياج جامد وزيادة عن اللزوم وبسرعة ... فى الحالة دى العربية هاتقفز الى الامام.
طبعا الحكاية دى لو كانت فى زحمة الإشارات "لا قدر الله" ... هايكون الموقف خطر جدا .. وممكن تكون اخطر من عملية الرجوع الى الخلف.

يعنى بالنسبة للمبتدأين: مثلا السيارة بتتوقف فى احدى الإشارات ... ثم يشعر السائق المبتدأ بأن السيارة تعود للخلف او يسمع شوية كلاكسات حلوة من الخلف ههههههههههههه ونتيجة ذلك يرتبك ويرفع رجله عن الدبرياج بسرعة ... وبدل ما العربية تتوقف ... المفاجأة ان العربية تقفز به الى الامام ثم يصطدم بالسيارة التى امامه ... ربنا يستر مع الجميع.


التمرين التالى
التحرك على مرتفع الى اعلى
هههههههههه ارجع واتمرن على التمرين الاول مرة تانية
وتوقف على الشارع المرتفع باستخدام الدبرياج والبنزين
بهدوء ارفع رجلك من على الدبرياج حتى تبدأ السيارة فى التحرك الى الامام
ممكن فى الحالة دى هاتحتاج انك تضغط بنزين زيادة شوية
اتحرك الى الامام 2 متر او 3 متر
ثم توقف مرة تانية عن طريق الضغط على الدبرياج خفيف الى اسفل حتى تصل الى "نقطة التوقف"
اذا ضغط على الدبرياج الى اسفل اكثر من اللازم ... العربية هاترجع للخلف
لكن اذا كنت عارف كويس ومتمرن كويس على منع السيارة من الرجوع الى الخلف ... ثقتك فى نفسك هاتكون عالية ولن ترتبك او تخاف خصوصا لو كان التوقف ده على كوبرى ويوجد الكثير من السيارات خلفك


مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

الإنطلاق صعودا

احيانا يقابلك موقف انك بتكون فيه متوقف وامامك شارع مرتفع او كوبرى مثلا فى الحالة دى ايه اللى لازم نعمله ؟
تذكر انك لازم الاول تنظر جيدا فوق كتفك لكى تكتشف المنطقة العمياء "الله يخرب بيت المنطقة العمياء" هههههههههههههه صدقونى اخطر حاجة فى السواقة كلها هى حكاية المنطقة العمياء دى ... خصوصا لو كانت المرايات فى عربيتك تعبانة وموش مضبوطة بشكل كويس

المهم
انظر جيدا على المنطقة العمياء .. قبل ما تتحرك .. يعنى انت مثلا متوقف بجوار الرصيف وناوى تتحرك .. الاول انظر فى المرايات وفوق كتفى لكشف المنطقة العمياء

طبعا هاتحتاج مساحة كافية بينك وبين السيارات القادمة من الخلف
يعنى موش معقولة اشوف سيارة قريبة منى قادمة من الخلف .. وانا اقرر الخروج بالسيارة من المكان اللى انا راكن فيه وكمان اطلع بها المرتفع او الكوبرى اللى موجود امام السيارة

انت هاتحتاج مسافة كافية للخروج بأمان
وكمان مسافة كافية امامك فاضية لكى تستمر فى السير فيها لمدة معقولة لكى تصل بالسيارة الى السرعة المطلوبة قبل ما توصل للكوبرى

يبقى موش معقولة انى شايف الطريق امامى موش سالك قوى
واقرر الصعود على الكوبرى

الافضل انى انتظر فرصة
ان الشارع يكون "رايق شوية"
وبعدين انطلق بالسيارة دون توقف حتى تصل الى السرعة المطلوبة قبل ما اصعد على الكوبرى

لو حصل لا قدر الله انك لم تستطيع الوصول بالسيارة الى السرعة المطلوبة قبل الصعود على الكوبرى ... هاتضطر انك تستمر فى الصعود على سرعتك البطيئة

طبعا حاجة موش ظريفة
لكن مسير موش مخير فى الحالة دى

سوف تحتاج ايضا الى انك تضغط على البنزين اكثر من الوضع العادى
يعنى لازم تضغط على البنزين شوية زيادة
لانك طالع الكوبرى ومحتاج قوة اكثر عن السير فى الشوارع العادية

اذا العربية "اهتزت" او "اترجت" منك هههههههههه بالبلدى كده يقولوا العربية "كركرت منك" وعايزة تبطل
سوف تحتاج الى انك ترفع رجلك عن الدبرياج بشكل بطىء شوية اكثر
او
انك تضغط على البنزين اكثر شوية

اذا الموتور "اتخنق" هههههههههههه يعنى العربية موش عايزة تسحب معاك ... يعنى موش عايزة تمشى بالشكل الطبيعى اللى انت متعود عليه
فى الحالة خفف رجلك شوية عن البنزين هههههههههههه "وارحمها يا اخى شوية"
أو
ارفع رجلك شوية عن الدبرياج


طبعا الموتور عليه شغل اكثر من المطلوب منه فى الشارع العادى
يعنى وانت طالع الكوبرى العربية هاتحتاج مزيد من القوة اكثر من السير فى الشارع العادى
هاتحتاج انك تسير على الغيارات البطيئة شوية
يعنى فى الغالب ممكن تطلع الكوبرى على الغيار الثانى
ولو العربية شبه متوقفة ... احتمال كبير انك تستمر فى الصعود على الغيار الأول

وهاتحتاج الى السرعة فى نقل الغيار
وهو ده اصعب شىء
يعنى انت طالع مثلا على الغيار الاول وعايز تنقل الغيار التانى عشان العربية ترتاح شوية
لو انت بطىء فى عملية نقل الغيارات
العربية سوف تتوقف منك
واحتمال كبير لا قدر الله ترجع بك الى الخلف

عشان كده انت محتاج الى التدريب وعدم التساهل فى التدريب

معلهش هههههههههههه انا موش بخوفك من الصعود على الكوبرى
لكن بحاول اشرح لحضرتك المشاكل اللى ممكن تقابلك ... خصوصا المبتدأين اللى زى حالاتنا

لازم تشعر بالسيارة
بتسحب معاك وماشية طبيعى
بتترج منك وهاتتوقف
توقفت وهاترجع للخلف
لازم اكون جاهز فى كل المواقف


التحرك الى اسفل
هههههههههههه ده موضوع سهل شوية .. يعنى مثلا انت ماشى على شارع والشارع ده منخفض مثلا انت نازل من على كوبرى الى اسفل ... هانحتاج نعمل ايه فى الموقف ده ؟

طبعا سهل جدا انك تتحرك الى اسفل .. لان حجم العربية وثقلها سوف يساعد على التحرك الى الامام او الى اسفل الكوبرى مثلا

التدريب المطلوب
توقف فى شارع منخفض ... يعنى شارع يشبه الكوبرى فى ارتفاعه

انقل الغيار الاول
او
انقل الغيار الثانى اذا كان المنحدر جامد قوى

جهز رجلك فوق الفرامل .. يعنى اضغط رجلك على الفرامل
ثم خفض او نزل الهاند بريك "فرامل اليد"

ارفع رجلك عن الدبرياج خفيف قوى قوى ... حتى تصل الى نقطة التحرك

ارفع رجلك خفيف قوى عن الفرامل لكى تتحرك السيارة الى اسفل
ارفع رجلك عن الدبرياج خفيف شوية كمان زيادة بهدوء
يتم زياة الضغط على البنزين اذا كان الشارع او المنحدر أمان ... اضغط على البنزين اذا كان الطريق أمان

إذا كان الطريق موش سالك وفيه شوية زحمة وفيه عربيات راكنة وفيه عربيات نقل مثلا امامك
يبقى فى الحالة دى
ارفع رجلك من على الدبرياج حتى تصل الى نقطة التحرك
واضغط على الفرامل لكى تتوقف السيارة
ثم
ارفع رجلك عن الفرامل خفيف قوى حتى تتحرك بشكل بطىء
وعند اللزوم اضغط على الفرامل مرة اخرى لكى تتوقف تماما


الموضوع محتاج شوية تدريب
محتاج تدريب جيد على استخدام الدبرياج زى ما سبق شرحه
سواء وانت طالع كوبرى مثلا
او
اونت نازل اى منحدر مثل الكوبرى


طبعا فيه ناس موش بتعمل حساب خالص اثناء النزول من على المنحدرات
وفاكرين ان العملية سهلة
ولا يستطيع التحكم فى السيارة ... لأنها حتى ولو كانت سيارة قديمة .. ٍسوف تجد انها بتتحرك بسرعة وخفة مثل اى سيارة حديثة ... وطبعا بتشجع صاحبها على الجرى بسرعة هههههههههههه يعنى نفسه يجرى بسرعة مرة من نفسه مثل اى سيارة حديثة

تذكرت اليوم موضوع خطير جدا قابلنى على كوبرى 6 اكتوبر

العربيات ماشية بسرعة عالية على الكوبرى
وفى احد المنحدرات .... مرة واحدة شاهدت سيارة متوقفة تماما فى الجانب الايسر للطريق


طبعا انا الحمد لله شفتها
وعلى الفور ابتدأت اضغط على الفرامل بدون تردد
والحمد لله وقفت بشكل كويس


لكن من داخلى "قلقت" شوية
اولا العربية نازلة على منطقة منخفضة
وكمان العربية كانت بتجرى منذ مدة وسرعتها عالية
يعنى اقل عربية كانت ماشية 80 كيلوا على الاقل
وبعدين لا قدر الله "لو انا سرحت شوية" معتمدا على ان الطريق ماشى كويس واستحالة انه يظهر اى حاجة تعطل العربيات وهى ماشية كان حصلت مشكلة كبيرة


اخطر حاجة يا جماعة انك تثق زيادة عن اللزوم فى نفسك وتثق فى الطريق وتثق فى السيارات التى تسير حولك


والاخطر انك تتحدث مع الجالس بجوارك ههههههههههه "اللى كان بجوارى ام الاولاد والاطفال كانوا فى الكنبة الخلفية"


ويا جماله لو كان الموضوع فيه اكل وشريط كاسيت شغال



والسرحان والثقة الزيادة عن اللزوم ... ومرة واحد يظهر لك واحد متوقف فى نفس الحارة التى تسير عليها وكمان على منحدر


وانت تنظر الى الامام ... وتفتكر ان السيارة التى امامك من بعيد ... تفتكر انها ماشية وتسير بشكل طبيعى .... وبعد الإقتراب منها ... تكتشف ان السيارة التى امامك متوقفة تماما


امامك حل من اثنين
الحل الأول
التوقف الفورى وتشغيل انتظار عشان السيارة التى خلفك تعمل حسابها ... وطبعا تضغط على الفرامل تدريجى موش مرة واحدة خصوصا لو انت اكتشفت المشكلة من بدرى


الحل التانى
انك تعطى اشارة يمين
وتهدى العربية
وتبدأ البحث عن فرصة للخروج من السيارة المتوقفة


انا عن نفسى عشان الطريق كان مزدحم والعربيات كانت ماشية بسرعة ومافيش فرصة لنقل السيارة الى حارة اخرى ... على طول اختر التوقف التدريجى .. بدل ما انقل نفسى بطريقة خاطئة الى الحارة اليمنى وفى نفس الوقت فيه سيارات قادمة من الخلف بسرعة جدا


المهم ربنا ستر ... وكل يوم هايقابلنا مواقف كثير


النصيحة الاخيرة: احترس من الثقة الزيادة عن اللزوم ودائما انظر الى الامام بشكل كافى جدا






تابـــــــــــــــــــــــــــــــــع

مع اطيب التمنيات
اخوكم حسين غزالة

[husseinoo]

بسم الله الرحمن الرحيم

تعلم القيادة فى 10 ايام

ملاحظات هامة

بالنسبة للصعود على مرتفعات مثل الكبارى

يجب ان تراعى التالى:

السيارات النقل الثقيل اثناء الصعود على الكوبرى ... تحاول الإبتعاد عنها على قدر الإمكان ... لأن العربية النقل تحتاج الى قوة شديدة وتحكم جامد خصوصا لو كانت السيارة محملة بالبضائع .... هههههههه ومرة واحدة تظهر سيارة حضرتك امامه وطبعا لو كنت ماشى امامه بشكل بطىء هاتعرض نفسك للخطر لأنه فى الغالب هايكون قادم بسرعة لكى يستطيع الصعود على الكوبرى

اذا كانت عملية الصعود على الكوبرى او المرتفع تحتاج الى نقل غيار اقل ... يعنى مثلا انت ماشى على الغيار الثالث وشعرت ان الافضل الصعود على الغيار الثانى ... فى الحالة دى احسن حاجة لك ... انك قبل ما تبدأ فى الصعود على الكوبرى تكون اخترت الغيار المناسب ... يعنى ليس من الحكمة انى اكون ابتدأت الصعود على الكوبرى وبعد قليل من الوقت اشعر ان السيارة لا تريد السحب والسير بشكل طبيعى ... واضطر فى الحالة دى انى اغير الفتيس الى غيار اقل ... بالنسبة للمبتدأين العملية دى بتكون سخيفة وتسبب مشاكل ..

وتذكر التالى :
من الصعب زيادة السرعة اثناء الصعود على الكوبرى ... يعنى الافضل طبعا انك تكون قادم بسرعة ثم تبدأ فى الصعود ... بالنسبة للمبتدأين ... هههههههههههه يعتقد انه سهل انه يزيد سرعته اثناء الصعود ... وبعد ما يبدأ فى الصعود يفاجأ ان السيارة لا تريد السحب ...


الخلاصة : لازم تحاول تكون سريع شوية على قدر الإمكان قبل ما تبدأ فى الصعود على الكوبرى

• الفرامل بتكون شديدة وقوية اثناء الصعود ... يعنى اى ضغط على الفرامل سوف تتوقف العربية فى الحال وبسرعة

• تستطيع الضغط على الفرامل فى اى وقت متأخر ... يعنى موش محتاج مسافة كبيرة امامك لكى تتوقف ... انت اساسا صاعد على الكوبرى ولو قابلك اى حاجة ... بمجرد الضغط خفيف على الفرامل ... العربية هاتتوقف منك بدون اى مجهود

• اذا ضغط على الدبرياج اثناء الصعود ... بتهدى العربية دون الحاجة الى الضغط على الفرامل ... واذا استمريت فى الضغط على الدبرياج ... الاكيد ان السيارة سوف تتوقف اثناء الصعود ... خصوصا لو كان الكوبرى كبير والعربية كانت سرعتها عادية يعنى موش سريعة قوى

• اذا رفعت رجلك فقط عن البنزين اثناء الصعود ... بتهدى العربية اكثر .. دون الحاجة الى الضغط على الفرامل

• اثناء الصعود ... الافضل انك تزيد من المسافة الفاصلة بينك وبين السيارة التى امامك ... لأن السيارة التى امامك من الممكن ان تتوقف فجأة وبدون مقدمات وتسبب لك مشاكل

تذكرت اليوم موقف حدث معى فى ميدان العباسية
كنت عايز اطلع الكوبرى المتوجه الى ش صلاح سالم ثم الى مصر الجديدة


المهم


شاهدت حاجة عجيبة قوى هههههههه شاهدت ميكروباس "اخضر" لنقل الركاب متوقف ... لكن متوقف فين ؟ ههههههههههه متوقف فى الحارة اليسرى للكوبرى ... ومتوقف فى بداية مطلع الكوبرى


طبعا عامل ازمة كبيرة للسيارات اثناء الصعود



حسبتها بسرعة ... لو طلعت الكوبرى بسرعة بطيئة ... يبقى شكلى كده هاستمر طالع لمدة طويلة بسرعة بطيئة ... ودى حاجة موش كويسة للعربية


على طول قررت انى استمر فى السير اسفل الكوبرى والتوجه الى شارع الخليفة المأمون فى اتجاه كلية التجارة عين شمس


ام الاولاد هههههههههههه قالت لى: انت رايح فين ههههههه ما الكوبرى اهه ... موش هاتطلع عليه
انا ضحكت وقلت لها: المثل بيقول ايه "امشي سنة ولا تخطيش أنه"
يعنى الافضل انى امشى فى طريق طويل شوية احسن ما اطلع الكوبرى على الغيار التانى ... واحتمال التوقف واطلع على الغيار الاول ... وحاجات كثير موش كويسة



بالنسبة للهبوط من على الكبارى
الافضل طبعا اختيار غيار منخفض للفتيس ... الغيار المنخفض سوف يساعد السيارة على التوقف بسهولة
وتذكر التالى:

• من الصعب على السيارة العودة الى الخلف مرة تانية

• عند الضغط على الفرامل لن تتوقف السيارة بسهولة وتحتاج الى مزيد من الوقت

• عند ظهور اى مخاطر يجب التوقف بدون تردد وفورا

• عند الضغط على الدبرياج سوف يؤدى الى اندفاع السيارة وعدم توقفها بسهولة

• عند رفع قدمك عن البنزين سوف يخفف سرعة السيارة خفيف قوى يعنى موش كثير

• الافضل اختيار غيار منخفض قليلا عن المطلوب لكى تتحكم فى السيارة وتستطيع ايقافها بسهولة

• الضغط على الفرامل خفيف ... يعطى تحذيرا للسيارات القادمة من الخلف

واخيرا لازم تكون حريص جدا اثناء النزول من على الكبارى بالذات ... ومافيش داعى للجرى السريع ... على الاقل ضع رجلك فوق الفرامل واضغط خفيف للتحكم فى سرعة العربية وهى نازلة من فوق الكوبرى ... وتوقع اشياء كثير جدا مثلا سيارة تتوجه من اليسار الى اليمين مرة واحدة بدون مقدمات ... وانت نازل من فوق الكوبرى بسرعة ... هايحصل مشكلة


تابــــــــــــــــــع

مع اطيب التمنيات
اخوك حسين غزالة

[calipha3]

ممكن حضرتك تفيدني في نظريه ازاي تعدي القراطيس حرف اس رايح و بظهرك؟؟؟ عشان الامتحان يوم السبت هههههههه

[Nen0]

السلام عليكم ورحمة الله

انا عندى مشكلة فى طلوع الكبارى مرة كنت طالعة كوبرى زحمة وانا طالعة بالعربية الكوبرى وقف فروحت موقفة العربية لكنها فجأة بطلت بالرغم انى كنت ماسكة الدبرياج مع الفرامل والعربية بأت بتريح على ورا واللى ورايا يكلكس وانا مش عارفة اتصرف ... طبعا رفعت فرامل اليد ودورت العربية لكن اول ماكنت بحاول اتحرك بيها وانزل فرامل اليد الاقيها نطت وبطلت تانى ... وفضلت ع الوضع ده وطبعا بقيت فرجة وسط العربيات وعطلت الناس و كانت شغلانة ... لغاية اما ربنا سترها وكملت الكوبرى على خير ...

انا فى النزلة كويسة لأنى ببقى متحكمة فى العربية كويس لكن مش عارفة الطلوع عندى وحش جدا لو الكوبرى وقف فجأة وانا على المطلع.

فيه حاجة تانية انا لاحظت ان عربيتى بتطلع دخان اسود اول مااشغلها وبعدين بيختفى ... ولما بصيت على الشكمان من ورا لقيت زى سائل اسود كده فى الماسورة ... ده يبقى ايه؟؟

وجزاكم الله خيرا
سلام عليكم

[ahmedfrk]

ما شاء الله تفكيرك مرتب واسلوب كتابتك جميل و ربنا يحفظك و يبارك لصاحبك.

[husseinoo]

ممكن حضرتك تفيدني في نظريه ازاي تعدي القراطيس حرف اس رايح و بظهرك؟؟؟ عشان الامتحان يوم السبت هههههههه

بسم الله الرحمن الرحيم
اللهم صل على محمد وعلى آله وصحبه أجمعين



الدخول فى الملفات والرجوع للخلف

أولا: أنا آسف على التأخير ... لأن يوم السبت زمانه فات ... ده غير حدوث عطل فى الكمبيوتر ولسه مصلحه دلوقتى هههههههههههههه على العموم يا ريت نعرف اخبارك فى اختبار المرور



وبالنسبة للأخوة اللى ناويين يدخلوا اختبار المرور احب اقدم لهم الشرح المبسط ده للأختبار

بالنسبة للصورة السابقة
اغلب الداخلين على اختبار المرور خصوصا فى السيارات التابعة للحى الخاصة بمدارس القيادة ... بتكون عربيات نصف نقل

المهم
الخطوات المطلوبة عند التحرك الى الامام

لازم يكون تركيزك على الفانوس الشمال لسيارتك

تبدأ التحرك والذهاب باتجاه "القمع رقم 2"
يعنى تحاول الاقتراب بفانوس عربيتك الايسر ... تحاول الاقتراب من "القمع رقم 2"

انظر الى الصورة السابقة
عند الاقتراب من القمع رقم 2
تلاحظ ان السيارة ابتعدت عن الرصيف الداخلى وده هايساعدك عن الملف بحيث انك تبتعد عن الاصطدام بالرصيف

المهم بمجرد الوصول الى "القمع رقم 2"

تنساه خالص
لا تفكر فى اى حاجة تخص القمع رقم 2

وتبدأ تفكر فى القمع رقم 3
وتبدأ التوجه والاقتراب من القمع رقم 3

انظر الى الصورة السابقة
عند الاقتراب على قدر الامكان من "القمع رقم 3"
لا تفكر فى القمع رقم 2 خالص وانساه تماما
واول ما تعدى من القمع رقم 3 تنساه تماما ولا تفكر فيه
وتبدأ تقترب من القمع رقم 4

انظر الى الصورة السابقة
عند الاقتراب من القمع رقم 4
فى نفس الوقت تلاحظ ان السيارة ابتعدت عن الرصيف
لكن انت فى نفس الوقت لا تركز نظرك على الرصيف اطلاقا
كل تركيزك هو الاقتراب "بفانوس عربيتك الايسر" من "القمع رقم 4"
وبمجرد الوصول الى القمع رقم 4
تنساه تماما
وتبدأ الاقتراب من القمع رقم 5

وهكذا
ثم تعدل مقدمة العربية وتستمر فى السير حتى النهاية


هههههههههههههه إذا طلب منك الرجوع للخلف هاتعمل ايه ؟

انظر الى الصورة السابقة

عند العودة للخلف
كل تركيزك هايكون على فانوس سيارتك الخلفى الأيمن
تضع يدك فوق الكرسى
وتفك الحزام
وتنظر الى الخلف
وتبدأ التحرك والاقتراب من القمع رقم 4

انظر الى الصورة السابقة
بمجرد الاقتراب من القمع رقم 4
واول ما خلفية السيارة تمر من القمع رقم 4
تنسى تمام القمع رقم 4
وتركز تماما فى القمع رقم 3
وتبدأ الاقتراب منه بفانوسك الخلفى الايمن

انظر الى الصورة السابقة
بمجرد الاقتراب من القمع رقم 3
والمرور من القمع رقم 3
تبدأ التفكير فى القمع رقم 2 وتحاول الاقتراب منه

انظر الى الصورة السابقة
بمجرد المرور من القمع رقم 2
تنساه تماما
وتبدأ التحرك فى اتجاه القمع رقم 1 والاقتراب منه بفانوس سيارتك الخلفى الايمن

ثم تبدأ فى توجيه السيارة باعتدال على شكل مستقيم


طبعا لو كان ممكن تتحرك بدون الضغط على البنزين يبقى هايل
يعنى يا دوب ترفع رجلك عن الدبرياج فقط للتحرك
ولو حبيت تهدى العربية اضغط على الدبرياج مرة تانية

هما فى مدرسة المرور بعدلوا السيارة بحيث انك تستخدم الدبرياج فقط ولا حاجة الى الضغط على البنزين خالص

الموضوع محتاج تدريب مستمر
ومفيد جدا فى الحياة العملية

خصوصا لو كنت راجع الى الخلف
او داخل الى الامام فى اى ملف

اهم حاجة تذكر انك بمجرد ما عديت من اى قمع .. تنساه تماما ... وتبدأ تفكر فى القمع التالى وتحاول الاقتراب منه


ارجوا ان اكون وفقت

مع اطيب التمنيات
اخوكم حسين غزالة