نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

استاذنا الفاضل الاستاذ حسين مع خالص الشكرلمجهودك اسمحلى بالتعقيب اولا- الفلتر مع كل مرة تغيير زيت هو الافضل ليه الفلتر بيكون حالته اول مرة تختلف عن تانى مرة وبالتأكيد يختلف تماما عن ثالث مرة بمعنى عند تغييره اول مرة طبعا حالته اكيد بتكون افضل من المرات اللى بعد كده وده الكلام اللى بيعملوه فى التوكيل ونصيحة احد المهندسين لى والموثوق بهم ان اغيير الفلتر مع كل تغيير زيت وقالى الفرق مش كتير يعنى لو عربيتك جديدة وحديثة ماتستخسرش فيها ثمن فلتر مع تغيير الزيت وهو ثمن الفلتر بيكون كام يعنى بجانب ثمن الزيت مبلغ زهيد

اما لو العربية موديل قديم ومش حديثة فيبقلى تغيير الفلتر زى ماحضرتك قلت بعد كل مرتين تغيير زيت
ان الفلتر لا يتم تغيره الا بعد كل 3 مرات تغير زيت

ثانيا- جيركن المياه الخضراء نوعان واحد عادى وده ثمنه بيبقى 20ج وواحد اسمه سعودى بيتباع فى بنزينة وطنية وده ثمنه 25ج

ثالثا- ارجو التفضل بالتعليق لتصحيح المفاهيم ولانى باحب آرائك ومواظب جداجداجدا على الدخول للمنتدى يوميا لمتابعة الجديد فى دروسك الممتعة والشيقة جدا وباستفاد من تعليمك وان شاء الله يجعل اعمالك فى ميزان حسناتك لان كل حرف تعلمه لنا ثوابه ان شاء الله بعشرة امثاله وتقبل خالص تحياتى

والله حضرتك ده يرجع لصاحب العربية فى الأول والآخر ... خصوصا لو كان هايركب فلتر "اصلى" موش مضروب وماعنديش فكرة عن ثمن الفلتر الأصلى خالص ... اعتقد ان الفلتر الاصلى هايكون ثمنة غالى شوية

هو اللى كان بيحصل فى التوكيل مع صديقتنا ...انه لا يغير الفلتر ويكتب لها فى الفاتورة انه تم تغير الفلتر هههههههه يعنى عملية نصب خفيفة خصوصا لو كان صاحب العربية زى حالتنا معلوماته قليلة

بالنسبة لى الفلتر المصرى المضروب ثمنه تقريبا 10 او 15 جنيه واكيد كنت هاغيره على طول ولن انتظر عليه ... لكن لو كنت ركبت فلتر اصلى وده اساسا صعب انى اجده فى الغالب كنت هاغيره زى ما حضرتك بتقول كل مرتين او ثلات مرات تقريبا

بالنسبة لصديقتنا كانت بتروح التوكيل كل 3 شهور تعمل الموضوع ده ... طبعا للأسف كان بيتعمل معاها احلى شغل لحد ما اخوها عرف الحكاية دى .. وده راجل قديم فى موضوع العربيات جامد .. وقال لى: تصور كل ما تروح تعمل صيانة يقولها انا غيرت لك الفلتر ويدفعها فلوس زيادة


المهم زى ما حضرتك بتقول كل حاجة ترجع لصاحب العربية وراحته

وأهلا وسهلا بحضرتك
ورمضان كريم وكل سنة وحضرتك طيب
وشاكر جدا على الدعاء الجميل

مع اطيب التمنيات
اخوكم حسين غزالة

[magid1010]

بسم الله الرحمن الرحيم

اللهم صل على محمد وعلى آله وصحبه أجمعين

وكل عام وحضراتكم بخير
رمضان كريم

كيف تصعد الكوبرى بنجاح

استمر فى السير بعد اختيار غيار الفتيس المناسب وحاول الاستمرار فى الصعود على الكوبرى بهدوء خصوصا انك شايف ان العربيات ممكن انها تتوقف فى اى وقت .. يبقى مافيش داعى انى اقترب من العربيات زيادة عن اللزوم لانه ممكن الازمة تتحل قبل ما اوصلهم واستمر فى السير بدون توقف المهم:

• اول ما السيارة التى امامك تتوقف ... اضغط على الدبرياج بالكامل وفى نفس الوقت اضغط على الفرامل ولا ترفع رجلك عن الفرامل

• مور الفتيس ... اى ضع الفتيس فى وضعية "المور" يعنى بدون اى غيار

• ثم ارفع فرامل اليد "الهاند بريك"

• ارفع رجلك عن الفرامل وكمان ارفع رجل من على الدبرياج

• اذا تحركت السيارة التى امامك

• اضغط على الدبرياج وانقل الفتيس على الغيار الاول

• خليك ضاغط برجلك على الدبرياج واضغط خفيف على البنزين

• اضغط على البنزين زيادة شوية فى نفس الوقت ارفع رجلك عن الدبرياج خفيف وببطء ... لحد ما تشعر ان السيارة عايزة تتحرك او "بتترعش" ... سوف تشعر ان مقدمة السيارة بترتفع لأعلى ...

• زود بنزين خفيف مرة كمان ثم نزل فرامل اليد " الهاند بريك"

• ثبت رجلك على البنزين وعلى الدبرياج ... حتى تنتهى من صعود الكوبرى وتصل الى القمة

الموضوع محتاج تدريب
لكن لو اتبعت هذه الخطوات سوف تتم العملية بنجاح إن شاء الله




تذكر أن:

• مافيش داعى انك تنقل الغيار التانى اثناء صعودك الكوبرى ... استمر على الغيار الاول حتى تنتهى من الصعود ثم انقل الغيار التانى

• اوعى تنزل فرامل اليد "الهاند بريك" قبل ما تشعر ان السيارة عايزة تتحرك وان مقدمتها بترتفع من على الارض

• اوعى ترفع رجلك من على الدبرياج جامد او بسرعة جامدة .. العربية فى الحالة دى هاتبطل وتعطل منك على الكوبرى

• اوعى تضغط على البنزين خفيف قوى ... لدرجة ان السيارة ترجع للخلف وتريح على العربيات التى خلفك

• مافيش داعى انك تفضل تزود بنزين وترفع رجلك ثم تزود بنزين وترفع رجلك ... زى اللى عايز يسخن العربية بدون داعى

• بعد ما العربية ما تتحرك ... ثبت رجلك على البنزين وعلى الدبرياج حتى تنتهى من الصعود على الكوبرى ...
  

• مافيش داعى انك تحاول ترفع رجلك بسرعة عن الفرامل وتزود بنزين وترفع رجلك عن الدبرياج كله مرة واحدة زى الناس اللى عندها خبرة .. العربية هاترجع منك للخلف ... الموضوع محتاج تدريب وكل المطلوب منك فقط ارفع الهاند بريك ونفذ الخطوات السابقة

• وطبعا الموضوع محتاج صبر وكمان مراقبة للسيارة التى امام السيارة التى امامك ... يعنى لا تنتظر ان السيارة التى امامك تتحرك عشان تبدأ فى عمل الخطوات السابقة ... انظر الى ابعد من ذلك ... انظر الى السيارات التى فى القمة ... واول ما تشاهدها بدأت فى التحرك ابدأ انت فورا فى الإعداد للتحرك .

ارجوا ان اكون وفقت


فى انتظار التواصل




مع اطيب التمنيات
اخوكم حسين غزالة

شكرا على الرد وكل سنة و انت طيب

[teto2007]

شكرا على الشرح الوافى

[shrara]

كم مره

كنت باسأل انزل كم مره فى الاسبوع لوحدى واه هى انسب الاوقات عشان اتعلم السواقه جيدا

[husseinoo]

كنت باسأل انزل كم مره فى الاسبوع لوحدى واه هى انسب الاوقات عشان اتعلم السواقه جيدا

السلام عليكم ورحمة الله وبركاته
وكل عام وحضراتكم والامة الاسلامية بخير
رمضان كريم

هو فى الحقيقة موضوع النزول الى الشارع لوحدك ... موضوع مهم جدا .. لانه يمنحك الثقة فى النفس ... وده موضوع مهم قوى ... لكن احنا فى الاول موش عايزين نتسرع وننزل الشارع يعنى قصدى قبل النزول الى الشارع لازم المدرب بتاعك يقول لك رأيه فيك بصراحة
هل انت عندك استعداد كافى للنزول الى الشارع
هل انت ملم بالأساسيات

بناء على مستواك تقدر تحدد
متى يتم النزول الى الشارع
كم مرة فى الاسبوع
والساعة كام

يعنى مثلا لو كان مستواك متواضع جدا
يبقى فى الحالة دى استحالة انصحك بالنزول الى الشارع لوحدك .. لازم يكون معاك المدرب بتاعك

اما لو كان مستواك متقدم وملم بالأساسيات
يبقى فى الحالة دى ممكن النزول الى الشارع لكن فى اوقات تكون المواصلات فيها هادئة جدا
مثلا يوم الجمعة .. ده اساسى كل اسبوع لازم تخرج يوم الجمعة عندك من الساعة 6 صباحا حتى الساعة 11 قبل الصلاة

وممكن النزول يوم السبت ... لانه يوم السبت فيه ناس كثير اجازة والحركة بتكون قليلة شوية

ويوم الاحد

الايام دى ممكن الصبح تخرج فيها زى ما انت عايز يعنى من الساعة 9 الى الساعة 11 او 12

ويفضل طبعا اختيار مكان هادى وتمشى فيه على مهلك


اما لو كنت هاتروح مكان للتدريب اصلا ... يعنى مخصص للتدريب .. خلاص فى الحالة دى تنزل زى ما انت عايز وتتعلم فيه على قدر المستطاع .. لكن فى الاول يروح معاك المدرب

لو كنت كويس فى القيادة روح بنفسك
لو كنت مستواك عادى .. فى الحالة دى يسوق المدرب العربية لحد ما توصل منطقة التدريب
وبعد كده تكمل انت يا بطل

الخلاصة:

• لو كان مستواك متواضع .. ممنوع النزول الى الشارع لوحدك نهائى

• لو كان مستواك معقول .. انزل فى الصباح الباكر لوحدك وممكن تتمشى حوالين المنزل يعنى فى المنطقة بتاعتك

• ولو مستواك جيد .. تبدأ مرحلة النزول الى الشارع فى اوقات الزحام مع مدربك ... واخيرا تقدر تخرج لوحدك فى مناطق الزحام

ارجوا ان اكون وفقت

مع اطيب التمنيات
اخوكم حسين غزالة

[Meroo2008]

السلام عليكم ورحمة الله وبركاته
أستاذ حسين .. جزاكم الله خيراً .. بجد ألف ألف شكر لك
أنا سائق جديد لانج .. عندما بدأت القيادة بدأت أبحث فى النت عن دروس لها وهدانى الله لهذا المنتدى الرائع
بجد تحية كبيرة من كل قلبى لكل من يعمل فى هذا المنتدى
وبجد تحية كبيرة ومن كل قلبى أخصك بها يا أستاذ حسين
ولا أخفى عليك أننى عندما أقود سيارتى أكثر ما يضايقنى هو من يقود حولى
أرى منهم قيادة بتهور دون مراعاة لأى قواعد أو قوانين
إللى يكسر عليك ، وإللى يجرى علشان يمشى قدامك ، وإللى يزمر لك علشان تمشى بسرعة شوية
وإللى يطلع قدامك مرة واحدة
صدقنى فى كل مرة بعانى ممن هم حولى
وهم يشغلونى أكثر بكثير مما تشغلنى قيادة سيارتى باعتبار أننى سائق جديد
وفى تلك اللحظات أنسى كل القواعد وأحاول أن أقود بقوانين الغابة
ولكن عندما أقرأ ما تكتبه يا أستاذ حسين
أعود وأقرر أننى لن أتمادى معهم وألزم نفسى بالقيادة العاقلة
فلست أستطيع أن أتحمل كارثة أكون السبب فيها
وأخيراً .. جزاك الله خيراً
وفى انتظار كلامك ونصائحك
أخوك ـ محمد

[husseinoo]

السلام عليكم ورحمة الله وبركاته

وعليكم السلام ورحمة الله وبركاته

أستاذ حسين .. جزاكم الله خيراً .. بجد ألف ألف شكر لك

وجزاك الله كل الخير وكل سنة وحضرتك طيب ورمضان كريم

أنا سائق جديد لانج

ههههههههه زى حالتى يعنى

.. عندما بدأت القيادة بدأت أبحث فى النت عن دروس لها وهدانى الله لهذا المنتدى الرائع
بجد تحية كبيرة من كل قلبى لكل من يعمل فى هذا المنتدى
وبجد تحية كبيرة ومن كل قلبى أخصك بها يا أستاذ حسين

الله يخليك يا حبيب قلبى ... ومتشكر جدا على كل الكلام الجميل ده ... ما تتصورش مخلينى سعيد اد ايه

ولا أخفى عليك أننى عندما أقود سيارتى أكثر ما يضايقنى هو من يقود حولى
أرى منهم قيادة بتهور دون مراعاة لأى قواعد أو قوانين
إللى يكسر عليك ، وإللى يجرى علشان يمشى قدامك ، وإللى يزمر لك علشان تمشى بسرعة شوية
وإللى يطلع قدامك مرة واحدة
صدقنى فى كل مرة بعانى ممن هم حولى

كلامك عشرة على عشرة ... انا لسه من ثوانى كنت بكلم مع اخويا الكبير
وقال لى: انت سواقتك مهذبة زيادة عن اللزوم ههههههههههه
قلت له يعنى انا غلطان
قال لى: لأ هو فيه ناس كثير بصراحة "سواقتهم بلطجة" و
قال لى: انا اوتوبيس مينى باص اخضر كان هايخبطنى
قال لسائق المينى باص: انت رايح فين
سائق المينى باص قال له: رايح المطار يا حبيبى ...
يعنى كل الكلام والتصرفات بصراحة فى منتهى قلة الادب والبرود للأسف

وهم يشغلونى أكثر بكثير مما تشغلنى قيادة سيارتى باعتبار أننى سائق جديد

ده حقيقى ... يعنى ممكن تلاقى امامك مطب صناعى او قضيب متروا وانت عايز تعدى عليهم بهدوء عشان سلامة العربية ... واللى وراك مثلا شغال على عربية نص نقل وموش فارقة معاه ... يضرب لك كلاكسات عشان هو عايز يجرى حتى ولو كان على حساب العربية اللى شغال عليها موش مهم عنده انه يكسرها ... هى بتاعته ؟

وفى تلك اللحظات أنسى كل القواعد وأحاول أن أقود بقوانين الغابة

فعلا احيانا الواحد ينسى كل حاجة اتعلمها من كتر المواقف اللى بيشوفها

ولكن عندما أقرأ ما تكتبه يا أستاذ حسين
أعود وأقرر أننى لن أتمادى معهم وألزم نفسى بالقيادة العاقلة
فلست أستطيع أن أتحمل كارثة أكون السبب فيها


هو فعلا الواحد عمره ما هايكون غيره .... يعنى مثلا لو انت راجل فاهم كويس وعندك اصول فى القيادة عمرك ما هاتحاول تكون غيرك ... موش هاينفع
يعنى لو فيه سائق "بلطجى" موش هاقدر اكون زيه ... ممكن اتنرفز شوية وبعد دقائق معدوده ارجع كما كنت
لكن صدقنى اللى حضرتك بتعمله ده هو عين الصواب وعين العقل
ده انا الاسبوع اللى فات سرحت شوية ... او تقدر تقول ثقة زيادة ... لدرجة انى نسيت القواعد المفروض انى اعملها مثل الدخول على التقاطعات بهدوء ورجلك فوق الفرامل استعداد لاى حاجة ورجلك التانية على الدبرياج

المهم وجدت سيارة جاية من الشارع المتقاطع من الناحية اليمين
قلت ادخل وراها
المفاجأة ... ان فيه عربية تانية كانت ماشية خلفها مباشرة ... ولم اتوقع ان فيه عربية تانية تمشى وراها
المهم ربنا ستر ومريت بين العربيتين
وقلت لنفسى: ايه يا عم حسين اللى انت بتعمله ده ... انت نسيت الاصول ولا ايه ... فين التوقع وفين التركيز وفين قواعد المرور فى التقاطعات
الحمد لله ربنا ستر وعلى طول رجعت لعقلى هههههههههههههه مرة تانية



وأخيراً .. جزاك الله خيراً
وفى انتظار كلامك ونصائحك
أخوك ـ محمد

اهلا بك يا استاذ محمد اخ وصديق لنا فى المنتدى .... وفى انتظار مشاركاتك القيمة إن شاء الله عشان نستفيد كلنا منها
وكل سنة وحضرتك طيب وربنا يتقبل منك صيامك وقيامك ورمضان كريم

مع اطيب التمنيات
اخوكم حسين غزالة

[husseinoo]

رمضان كريم
الله اكبر ولله الحمد

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

كيف تقود سيارتك بآمان
وكيف تصبح سائق جيد

عملية الكشف الذكى

اثناء عملية المراجعة الروتينية او الكشف الروتينى ... هاتلاقى حاجات كثير انت شايفها وهاتلاقى انه من الصعب جدا انى اشوف كل تفاصيل اى حاجة بشكل واضح ... ده معناه ايه ؟ ... معناه انك محتاج ترتب او تعمل عملية "فلترة" لكل اللى بتشوفه ... وتركز على الحاجات المهمة فقط ...

انظر الى التغيرات
شوف فيه ايه بيتحرك بشكل موش طبيعى ... يعنى مثلا بالامس انا ماشى فى الدائرى ... وشايف عربيات ماشية خلفى ... مافيش مشاكل ... وكله تمام لحد ما ظهرعربية ميكروباص بتجرى بشكل غير طبيعى ... يبقى خلاص هو ده الهدف اللى لازماركز عليه ... كل العربيات اللى فى الخلف بتمشى بشكل روتينى وبأدب ... اماصاحبنا ماشى زى المجنون ... اصبح من الذكاء ان التركيز يكون على الميكروباصفقط ... اصبح من الاولوية التركيز على السيارة الميكروباص اهم من التركيزعلى السيارات التى تسير بشكل روتينى او على السيارات الراكنة على الطريق ... طبعا كل ما يتحرك خلفك يشتت انتباهك ويعمل للمبتدأ مشكلة .... سيارةشرطة قادمة من الخلف ... عربية نقل او اوتوبيس متوقف فى الحارة اللى انت ماشى فيها ... لأنك محتاج تشوف العربيات المتوقفة والعربيات التى تسير فى نفس الوقت

خطة عمل لكشف المخاطر

• انظر على مشاكل الطريق "مثلا المشاة اللى عايزين يعدوا الشارع"
• توقع ما سوف يحدث "ان المشاه فعلا يمروا امام سيارتك"

فكر كويس
ايه الاحتمالات اللى ممكن تعملها "اهدى العربية .. اغير الحارة اللى انا ماشىفيها وابعد عن المشاة .. ازود المسافة بينى وبين العربية اللى ماشية امامىعشان الناس تعدى الشارع فى سلام ... اضرب كلاكس"
افعل شىء يجعلك فى أمان
مثلا: هدىء السرعة واترك مسافة كافية بينك وبين السيارة التى امامك لمرور المشاة فى سلام

احنا عندنا احتمال واحد ههههههههههه دوس بنزين وخليه ينزل الشارع عشان احرمه يخرج من بيته هههههههه
ربنا يحظ الجميع

ملخص التعامل الذكى

• انظر
• فكر
• افعل

فهم هذه الخطوات الثلاث هى الاساس الجيد للمساعدة فى تجنب مشاكلالمواصلات... بالطبع كل هذه الخطوات تحتاج الى سرعة تصرف واحيانا تأخذ بعض الثوانى من المبتدأين.


لذلك المبتدأ فى القيادة يحتاج الى التدريب فى شوارع حقيقية وموقف حقيقية حتىتتحول عملية الكشف الذكى للمشاكل الى عملية تلقائية يقوم بها السائقالمبتدأ وتصبح شىء عادى ويتصرف بحكمة بدون اى خوف.

الإستماع إلى المخاطر
اثناء قيادة السيارة واجراء مسح روتينىبالنظر ... فإن عملية الإستماع من الممكن ان تساعد ايضا فى كشف المخاطر ..

على سبيل المثال:من الممكن انك تسمع صوت "سرينة" عربية اسعاف قبل ما تشوف العربية

مثال آخر:الموتسيكل من الصعب انك تشوفه .. لكن من السهل انك تسمع صوته وكمان تقدر تحدد انه قريب منك ولا موش قريب ... طبعا عشان تسمع كويس يبقى من الافضل ان صوت الكاسيت داخل العربية يكون هادىء وموش عالى ... هههههههه الكثير من الشباب بيحب يعلى الكاسيت ويعيشلدرجة انه يرى فقط وموش بيسمع اى حاجة حوالية .. لا كلاكس ولا اى حاجة ....


تجنب التعب والإرهاق
الإرهاق والتعب يا جماعة يؤدى الى ان السائق يفقد تركيزه ... يعنى ايه ؟ ... يعنى ضعف قدرتك على اكتشاف المخاطر اللى حواليك ودرجة رد الفعل لتجنب هذه المخاطر ... كل الأبحاث بتقول ان اكثر الناس بتعمل مشاكل وحوادث على الطريق بيكون الإرهاق والتعب سبب اساسى فى هذه الحوادث.

موش لازم اقود عربيتى مسافة كبيرة قوى حتى اشعر بالتعب والإرهاق ... او انىاشتغل ساعات طويلة وبعد الشغل المرهق اقرر انى اقود سيارتى وأنا بالحالة دى ... او اكون سهران "سهرة حلوة" وموش نايم كويس واصحى الصبح غصب عنى واركبعربيتى واسافر بيها مثلا ... الطريقة الوحيدة لتجنب الإرهاق هى انك تنامكويس ... وتفتح شباك العربية هههههههههه "وتشم شوية هواء نظاف" ... وياجماله لو كان فيه فنجان قهوة قبل ما تنزل الشارع .. وداخل العربية وانتماشى .. مافيش مانع انك تشغل الكاسيت وتعلى الصوت

لاتقود سيارتك فى الاوقات التى تكون الطبيعى فيها نائم ... يعنى مثلا تسافربالعربية فى وقت متأخر من الليل .. طيب ما انت فى الوقت ده المفروض بتكوننايم فى سريرك ههههههههههه او تسافر بالعربية الصبح بدرى قوى ... طبعاالسفر خلال الاوقات دى بتكون الرحلة خطر جدا جدا وكلها مشاكل والعياذ بالله ...

اذاكنت ناوى تسافر بالسيارة رحلة طويلة بعض الشىء .. المفروض انك تاخد راحةبالكثير كل ساعتين ... يعنى بعد كل ساعتين سفر لازم تريح نفسك شوية

ملخص الكشف المبكر للمخاطر

• الكشف المبكر للمخاطر معناه انك تكشف كل ما يدور حول سيارتك بدرجة 360 بالإضافة الى المنطقة العمياء للسيارة

• تحتاج الى كشف المخاطر بشكل ثابت .. انظر واسمع لكل ما يدور حولك

• استخدم اسلوب الكشف الروتينى

• انظر امامك بمسافة كافية على الاقل 200 متر لو كنت ماشى بسرعة 60 كيلوا

• انظر امامك بمسافة 300 متر لو كنت ماشى بسرعة 90 كيلوا

• اكتشف اى تغيير يحدث حولك او اى حركة غير عادية تحدثحولك

• افحص المرايات كل 8 او 10 ثوانى ... سواء المرايه الداخلية او المرايات الخارجية

• استخدمرأسك للنظر فوق كتفك لكشف المنطقة العمياء خصوصا قبل تغير مسار السيارة يميناو شمال او الدخول فى اى منحنيات.

• تجنب الإرهاق والتعب

• تذكر انعملية الكشف للمخاطر تحتوى على ثلاثة عناصر:
  • انظر "لكشف مشاكل الطريق"
  • فكر "ايه اللى حصل وايه اللى انت ناوى تعمله"
  • افعل "الشىء اللى يخليك فى سلام وأمان"
  
  

نصيحة:
تجنب الأشياء التى تعرضك للخطر مثل .. تشغيل الكاسيت او الراديو بصوت عال .. اوالتحدث مع الركاب .. او الحاجات الجميلة اللى بنعلقها داخل العربيةههههههههههه يعنى مثلا تعلق "عروسة" جميلة على مرايه العربية الداخليةوفىالآول والآخر خليها على الله وما تخليش موضوع كشف المخاطر يخوفك للدرجةانك تتأثر جامد اثناء القيادة ... يعنى اهتم بالموضوع بشكل طبيعى ولا تعطيه اكثر من حجمه وربنا هو الحافظ فى الاول والآخر.

ارجوا ان اكون وفقت
فى انتظار التواصل

مع اطيب التمنيات
اخوكم حسين غزالة

[Richman]

انت استاااااااااااذ

[hesham90]

شكرا ياستاذ حسين على المعلومات القيمة والتواصل نع المبتدئين واسمح لى احكى تجربتى اليوم نزلت


بالعربية وكما قلت من قبل كل اسبوع مرة لظروف العمل المهم حدث الموقف الاتى---الساعة كانت اتنين ظهرا وكنت مشغل التكييف على اربعة واثناء مرورى من حارة فى الطريق وهى تسع لمرور سيارة واحدة وكنت على التانى والسرعة 20ك لاقيت سواق تاكسى واقف وقافل الطريق وبيكلم واحد صاحبه المهم غيرت الفتيس على المور وبعدين السيارات من خلفى كلاكسات مستمرة وانا برضه كلاكس علشان عايز امشى وخايف العربية تبطل المهم السواق راح ماشى ببرود متناهى ولما حبيت امشى وغيرت للاول ومشيت زى مابطلع بطريقتى وهى اسيب الدبرياج حبة حبة دون البنزين والعربية بتطلع عادى المهم لاقيت العربية مابتطلعش ومش عايزة تسحب رغم انها دايرة والعربيات خلفى عملولى هوسة طبعا ماصدقوا واحد ضارب لخمة المهم تذكرت ان انا مشغل التكيف والعربية مش عايزة تسحب بالدبرياج فقط اديتها بنزين مع الدبرياج والمشكلة اتحلت وده موقف جديد اول مرة يحصل معايا من فضلك اشرح لنا حكاية السحب والتكييف شغال على اربعة والعربية مش عايزة تسحب وهل هناك علاقة بين التكييف والدبرياج فى تحريك العربية من الثبات وتقبل خالص تحياتى

[husseinoo]

شكرا ياستاذ حسين على المعلومات القيمة والتواصل نع المبتدئين

بسم الله الرحمن الرحيم
اللهم صل على محمد وعلى آله وصحبه أجمعين

كل عام وحضرتك بسلام وخير ورمضان كريم

واسمح لى احكى تجربتى اليوم نزلت بالعربية وكما قلت من قبل كل اسبوع مرة لظروف العمل المهم حدث الموقف الاتى---الساعة كانت اتنين ظهرا

الساعة اتنين الظهر يعنى كان وقت زحام جامد ... ويمكن اضعاف الايام العادية عشان الناس خارجة من شغلها بدرى شوية بسبب رمضان والإفطار ... يعنى هاتلاقى الساعة 2 فى رمضان صعب جدا

وكنت مشغل التكييف على اربعة واثناء مرورى من حارة فى الطريق وهى تسع لمرور سيارة واحدة وكنت على التانى والسرعة 20ك لاقيت سواق تاكسى واقف وقافل الطريق وبيكلم واحد صاحبه المهم غيرت الفتيس على المور وبعدين السيارات من خلفى كلاكسات مستمرة وانا برضه كلاكس علشان عايز امشى وخايف العربية تبطل المهم السواق راح ماشى ببرود متناهى

للأسف الكثير من السائقين عندهم برود ... وفيه منهم اعتقد للأسف عنده "غباء" ههههههههههههه أنا آسف على الكلام ده ... يعنى مثلا زى ما حضرتك بتشرح شارع حارة واحدة يعنى مافيش اى فرصة انك تركن خالص ... وموش محتاجة تفكير كثير ... يبقى ده تفسيره بإيه مالوش دعوة بقلة الأدب ... انا اعتقد انه "غباء" "حماقة" مالوش وصف ... زى اللى بيحب يركن عربيته على الناصية ... يعنى اى واحد داخل الشارع وموش واخد باله يخبط العربية على طول

ولما حبيت امشى وغيرت للاول ومشيت زى مابطلع بطريقتى وهى اسيب الدبرياج حبة حبة دون البنزين والعربية بتطلع عادى

أنا اعتقد ان الافضل انك تضغط "سنة" بنزين خفيف وتثبت رجلك على كده ... وبعد كده ترفع رجلك عن الدبرياج براحتك .. عشان تضمن ان العربية ما تبطلش خصوصا لو كان الشارع فيه مطلع

انا ممكن ارفع رجلى فقط عن الدبرياج حاجة خفيفة .. لو كنت بركن العربية ... وموش محتاج انى اضغط بنزين وعايز ارجع للخلف فى منتهى الهدوء

المهم لاقيت العربية مابتطلعش ومش عايزة تسحب رغم انها دايرة والعربيات خلفى عملولى هوسة طبعا ماصدقوا واحد ضارب لخمة المهم تذكرت ان انا مشغل التكيف والعربية مش عايزة تسحب بالدبرياج فقط اديتها بنزين مع الدبرياج والمشكلة اتحلت وده موقف جديد اول مرة يحصل معايا من فضلك اشرح لنا حكاية السحب والتكييف شغال على اربعة والعربية مش عايزة تسحب وهل هناك علاقة بين التكييف والدبرياج فى تحريك العربية من الثبات وتقبل خالص تحياتى


انا اعتقد والله اعلم انه اكيد التكييف يؤثر على سحب العربية ... وفيه ناس كثيرة تفضل تشغل التكييف فى الطريق الطوالى فقط ... وفيه عربيات يشتغل فيها التكييف زى الساعة خصوصا لو كانت 2000 سى سى او 1600 سى سى ... اما لو كانت العربية 1300 سى سى ... فكفاءة التكييف وقدرة العربية على السحب بتتوقف على نوع العربية ... يعنى فيه ناس كثيير عربياتها مثلا تويوتا كورولا ... او هوندا سيفيك .... التكييف شغال زى الساعة والسحب مية مية .... وفيه عربيات تانية التكييف يؤثر فيها جامد ... وافضل استخدام هو على الطريق السريع ...

وبينى وبينك هههههههه التكييف ده نعمة ... شغل يا بيه وعيش حياتك ... بس مافيش داعى انك ترفع رجلك عن الدبرياج فقط اضغط شوية بنزين خفيف ... وكل شىء هايكون تمام ....
ده انا كنت بفكر انى اركبه فى العربية ... وبرغم انها تويوتا كورولا ... لكن خايف من موضوع السحب ده وكمان العربية موش حديثة قوى هههههههههه فقلت لنفسى صلح التكييف اللى فى البيت الأول وبعدين فى العربية ههههههههههه


وكل عام وحضرتك طيب
مع اطيب التمنيات بالتوفيق

اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

كيف تقود سيارتك بآمان
وكيف تصبح سائق جيد

تدريبات هامة ـ لكشف المخاطر

1- المنطقة العمياء حول سيارتك
اسأل احد الأصدقاء اللى عندهم خبرة ... فين المنطقة العمياء لعربيتك ؟ ... يعنى اسأله اين المنطقة التى اذا دخلت فيها اى سيارة فإنك لن تستطيع رويتها من خلال المرايه ؟
وتحاول اثناء توقف السيارة بشكل آمن على جانب الطريق انك تفحص المرايات كويس وتتأكد انها مضبوطة مية مية ...

اطلب من صديقك انه يتحرك بجوار سيارتك ... ثم اطلب منه التوقف عندما لا تستطيع رؤيته فى المرايه الجانبية .. ثم تضبط مجال الرؤية للمرايه مرة تانية وتشوف هل المرايه تم ضبطها كويس يعنى كاشفة الطريق الذى بجوارك بشكل جيد ... كرر الموضوع ده حتى يتم ضبط المرايه بشكل جيد جدا.

حاول انك "تلف" راسك وتنظر فوق كتفك
هل تستطيع رؤية السيارات التى بجوارك فى المنطقة العمياء من خلال المرايه ... ولا مازال جزء من عربيتك يعوق كشف المنطقة العمياء بشكل جيد ... بعد ما تضبط المرايه بشكل كويس جدا هاتقدر فى اى وقت تضبط المرايه وحدك بدون الإستعانة بأى حد تانى ... وهاتقدر تعرف اى منطقة تستطيع رؤيتها بالنظر المباشر من فوق كتفك.

2- الكشف الروتينى

• يتم التدريب على النظر على مسافة 200 متر الى الامام لكشف المخاطر

• النظر فى المراية كل 8 او 12 ثانية

• التدريب على النظر فوق الكتف قبل الدخول يمين او شمال ... حاول التدريب اثناء توقف سيارات بجوارك مثلا فى اشارات المرور ... تدريب نفسك على الرؤية من فوق الكتف وانت متوقف فى اشارة المرور عشان تتعود ومتخافش من الحكاية دى ...
  عندما تشعر بالثقة فى نفسك ... تقدر تجرب التدريبات فى مناطق مختلفة ... وعلى سرعات مختلفة .. يعنى مثلا تبدأ فى التدريب على شوارع العربيات ماشية فيه على سرعة 50 كيلوا ... وممكن بعد كده تنزل طريق طوالى يكون العربيات بتسير فيه على سرعة 90 كيلوا ... وهكذا
  من الحكمة التدريب على طرق هادئة ثم الخروج الى طرق اكثر زحاما

3- المقارنة لكل ما تراه اثناء عملية الكشف
اسأل احد الأصدقاء ذو الخبرة ... يعنى لازم يكون شخص انت بتثق فيه وتعرفه جيدا .. ويكون هذا الشخص عنده القدرة انه يساعدك بجد وانك تستطيع الاستفادة من خبرته ... يعنى على الاقل يكون عنده خبرة 10 سنين قيادة سيارات ... هههههههههههههه وطبعا لازم يكون معاه رخصة سارية ههههههههههههههه


انزل مع صديقك منطقة فيها اشارات مرور وفيها حركة سير عربيات خفيفة وكمان مافيش مانع انه يكون فيه حركة للمشاة ... اطلب من صديقك انه يقود السيارة وحضرتك تركب بجواره .. اكتشف مشاكل الطريق "اكنك انت اللى سايق العربية" ... اسأل صديقك "اين تنظر الآن ؟" ... اسأله ما هو الشىء الذى يلفت نظره ويعتقد انه يمثل مشكلة على الطريق ... يعنى سؤال مثل "ماذا ترى الآن من مشاكل ؟ ... وماذا سوف تعمل الآن ؟ ... الطريقة دى اسمها "تسجيل الاحداث" ... ويستخدم الطريقة دى السائقين المبتدأين لكى يستطيعوا الكشف على ما المفروض ان يراه السائق ويركز عليه جيدا .. ما هى المشاكل التى يراها السائق على الطريق وماذا ينوى ان يفعل ؟ ... طبعا هو موضوع غريب شوية ... لكن مع التدريب هايكون مفيد جدا


يعنى انا مثلا لما بكون راكب بجوار صديقى ... بحاول اتعلم منه .. واسأله اى سؤال واحاول افهم ايه اللى بيدور فى دماغه .. مثلا : اسأله الراجل اللى ماشى امامنا ده بيتعلم وموش عارف يمشى صح ...
صديقى يقول لى: اللى ماشى امامنا ده موش هو اللى مخوفنى ... لانه ملتزم بالحارة اللى هو فيها
اسأله: طيب ايه اللى مخوفك
يقول لى: فيه واحد ماشى خلفى وعايز يعدى بأى شكل وما بيعرفش يسوق ... وموش شايف اللى امامى ... وبصراحة انا قرفان منه وعايز اعديه عشان يبعد عنى

شوف انت حوار زى ده بيكون مفيد جدا ... وانتم ايضا لازم تكونوا مركزين وانتم راكبين مع اى صديق ... ههههههههههه ولا تجلس زى السائح عمال تتفرج وخلاص ههههههههههههه ... حاول تدرب نفسك على طريقة "تسجيل الاحداث" ... عشان تتعلم من المواقف المختلفة.

يعنى انت لازم تتعلم وتعرف السائق الخبرة ده بينظر على ايه ؟ ... او ايه اللى لازم انظر اليه فى الموقف ده ؟ وايه هى مشاكل الطريق وهايتعامل معاها ازاى ؟ ... والاهم من كده .. هل صديقك ينظر على الشىء الذى تنظر اليه انت ايضا ؟ ... يعنى انت راكب بجواره ومركز على شىء معين على الطريق ... هل صديقك مركز على نفس الشىء ؟ ... هل هو يستيطع كشف المخاطر ؟ وانت مازلت لا تستطيع كشفها حتى وانت راكب بجواره واعصابك اكثر هدوء ؟ هههههههههههههه هل توافق على الطريقة التى استعملها صديقك فى التعامل مع المشكلة ؟

وعندما ينتهى صديقك من المرحلة او الرحلة القصيرة ... توقف فى اى مكان آمن و "دردش" معاه شوية فى كل اللى حصل وشاهدته على الطريق ... بعد الحديث عن مشاكل الطريق وكشف مشاكل الطريق .. اركب عربيتك بنفسك وامشى على نفس الطريق اثناء العودة ... اطلب من صديقك انه يكتشف مخاطر الطريق وطول ما انت ماشى تحاول ان تقول لصديقك ما ترى او ما الذى تنظر عليه ؟ او ايه الشىء اللى انت مركز عليه ؟ ... وايه الشىء اللى انت شايف انه يمثل مشكلة على الطريق ؟

توقف على جانب الطريق و"دردش" مع صديقك وقارن بين اللى انت كنت بتفكر فيه واللى هو كان بيفكر فيه .. هل انتم كنتم تنظرو على نفس الشىء فى نفس الوقت ؟ .... هل انت ركزت على مشكلة وصديقك لم يرى انها مشكلة اساسا ؟ .... هل شاهدتم مشكلة على الطريق وتتفق انت وصديقك انها فعلا مشكلة ؟

هذا التكينيك .. او هذه الطريقة "طريقة تسجيل الاحداث" ... ومقارنة ما تشاهده مع ما يشاهده صديقك ... الطريقة دى يا جماعة مفيدة جدا وياريت نجرب الطريقة دى مع اكثر من سائق ... وممكن كمان يكون السائقين مختلفين فى الاعمار يعنى تركب مرة ما سائق شاب ومرة مع سائق كبير فى السن وهكذا ...

الكثير منا بيعمل كده بشكل تلقائى انه يفضل يدردش مع السائق اللى بجواره ... لكن احنا عايزين نعمل كده بشكل علمى وبتركيز ... يعنى انت راكب مع احد الاصدقاء فى مشوار حوالى ساعة على الاقل ... لازم تستفيد من المشوار ده وتتعلم منه على قدر الامكان


ارجوا ان اكون وفقت
وفى انتظار التواصل

مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

كيف تقود سيارتك بآمان
وكيف تصبح سائق جيد

الحالات الهامة التى يجب تحديد مصدر الخطر فيها

مهارة تحديد المخاطر مهمة جدا ... ولا ترتبط بمتى تقود سيارتك او اين تقود سيارتك ؟ ... على العموم هناك بعض المواقف الهامة جدا سواء لحضرتك وانت بتقود سيارتك او حتى بالنسبة لكل مستخدمى الطريق اللى سعادتك ماشى عليه وسبق اعتقد قبل كده وضحنا الـ 5 حوادث الأكثر حدوثا على الطريق والتى يجب الاهتمام بهم اثناء القيادة ... فى هذا القسم سنحاول تفسير هذه المواقف مرة تانية:

بالنسبة لأنك سائق جديد ومبتدأ يجب ان تجيد التعامل مع هذه المواقف :
- المشاة على الطريق او بالقرب من الطريق
- راكبى الدراجات
- راكبى الموتوسيكلات
- التعامل مع سيارات النقل والاوتوبيس
- التعامل مع الزحام على الطريق
- الحوادث واعطال الطريق التى يكون السبب فيها سيارات اخرى
اومستخدمى الطريق من اى نوع
- الحيوانات على الطريق او بالقرب من الطريق

التعامل مع هذه الحالات
للتعامل مع هذه الحالات لا تحتاج الى مهارة جديدة ... يعنى نفس الكلام السابق هاتعمله مع هذه الحالات مثل:
- كشف المخاطر المبكر
- الحفاظ على مسافة كافية من اى مستخدم للطريق
- تحديد واختيار "الفجوة الآمنة"

طبعا اهم نصيحة او اختيار للسائق هى انه يهدى سرعته ويخفض من سرعة سير السيارة ... او التوقف .. او تغير مسار سير السيارة لتجنب المشاكل التى تتوقع ان تقابلك على الطريق
الهدف من هذا القسم هو مساعدتك على التعامل تحديدا مع هذه المواقف

المشاة و راكبى الدراجات والموتوسيكلات

المشاة وراكبى الدراجات والموتوسيكلات .. تقدر تقول عليهم الناس الضعيفة هههههههههههه يعنى "الناس الغلابة" على الطريق هههههههه لا يوجد عندهم اى حماية فى حالة حدوث اى تصادم مع اى سيارة لا قدر الله ... التصادم البسيط اللى ممكن يعمل "خدش" فى عربية سعادتك ممكن يكون سبب فى وفاة او اصابة مستخدمى الطريق من الناس الغلابة اللى بنتكلم عنهم ... حجم الناس اللى بتتوفى من راكبى الدراجات والمشاة وراكبى الموتسيكلات فى تزايد كل عام ... ربنا يحفظ الجميع ... واللى يزيد الموضوع صعوبة ان الناس دى صعب قوى انك تشوفهم بسهولة ... يعنى ممكن بسهولة انك تكشف سيارة ملاكى او سيارة نقل تسير بجوارك او امامك ... لكن صعب انك مثلا تشوف احد المشاة مرة واحدة ينزل امامك على الطريق ... عشان كده لازم تكشف عن الناس الغلابة بحرص وعناية زيادة ...

المشاة
المشاة طبعا سوف تشاهدهم فى كثير من الاماكن ... كيف يمكن مشاهدتهم وتحديد اماكنهم ؟ ... من الممكن ان تركز على الاماكن اللى فيها محلات او "مول" او مدرسة او محطة اوتوبيس او تقاطع اشارة ... انت تحتاج الى كشف الطريق ... كشف المناطق اللى بيسير فيها المشاة "الرصيف" .. النظر بين العربيات خصوصا لو كان فيه اطفال ... الأطفال عموما لا يمكن التنبؤ بتصرفاتهم .. ويمكن انهم يمروا امامك حتى ولو كان الطريق موش آمن او حتى كانت إشارة المرور "حمراء" وصعب قوى انك تشوفهم بخلاف العربية ممكن تشوفها بسهولة ... من السهولة انك ترى المشاة وتتوقع خط سيرهم اثناء المرور فى إشارة المرور ... لكن من الصعب كشف الأطفال وانك تتوقع متى يظهروا وفى اى مكان من خلف اى سيارة ... عملية صعبة جدا ...

لكى تستطيع التصرف الصحيح مع المشاة خصوصا لازم تمنح نفسك مزيد من الوقت والمساحة لكى تكتشف اماكن تواجدهم وتستطيع التعامل مع المواقف المختلفة ... لذلك يجب انى تهدىء من سرعة السيارة اول ما تدخل منطقة متوقع ان يكون فيها "مشاة" مثل "منطقة مدرسية او محلات او مول" ... لازم تكون حريص مع الاطفال ومع كبار السن... الاطفال يقدروا ينزلوا الشارع بسرعة جدا وطبعا ليس عندهم حكمة الكبار وتقدريرهم لخطورة الشارع ... وكبار السن عندهم خبرة كبيرة للتعامل مع الشارع ولكنهم ليسوا فى رشاقة او صحة الشباب ... وهذا معناه انهم مثلا لا يستطيعوا النظر جيدا للسيارات القادمة ... ويحتاجوا الى وقت كبير لعبور الشارع

لازم تعطى لجميع المشاة مسافة كافية عند الاقتراب منهم ... خصوصا عند الدخول شارع يمين او شمال ... حاول تستخدم طريقة "اتصال العين" يعنى تنظر فى وجوهم لكى تتأكد انهم رأوك ... يعنى وانت ماشى بالعربية لما تشعر ان اللى ماشى على رجليه رآك جيدا تستمر فى السير ... يعنى اتذكر والدى الله يرحمه كان لا يمكن يضرب كلاكس بجوار المشاة ... ولما سألته ليه ؟ قال لى: لو ضربت كلاكس بجواره ممكن يخاف لدرجة انه ينزل امام العربية بدل ما يبعد عنها ... الافضل انى اصبر شوية واتركه يسير فى اتجاهه ويبعد عن العربية ..
من الممكن استخدام الكلاكس فى حالة انك متأكد ان اللى ماشى على رجليه موش عارف انك وراه وموش حاسس بك خالص
وتقدر انك تتوقف بالسيارة تماما اذا لزم الامر مافيش اى مشكلة لازم يكون عندك صبر
تذكر ان المشاة صعب جدا انك تراهم مساء او اثناء يوم ممطر وفيه ضباب او شبورة اذا كان اللى ماشى ههههههههه "فى غيبوبة" ......... بالبلدى كده تقدر تقول عليه واكل فول


تابـــــع


فى انتظار التواصل


مع اطيب التمنيات
اخوكم حسين غزالة

[lilo]

فنان

انت اكيد فنان الدماغ الجامدة لازم تتعلم صح