نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

السلام عليكم ورحمة الله وبركاته

ازيك يا استاذ حسين وحشنى كتير

الله يكرمك يا ماجد وانت عامل ايه .. إن شاء الله تكون بخير

متشكر جدا جدا على موضوع الركنة انا نزلت امبارح بالعربية و كان الشارع زحمة جدا فمشيت براحة جدا عن طريق انى دايس دبرياج و فرامل و مغير على الاول كل ما اشيل رجلى من على الدبرياج العربية تتحرك و ارجع ادوس فرامل علشان تقف و لكن واحد صحبى قالى مور لمل تيجى تقف ولما تتحرك ارجع ادى اول علشان تحافظ على اسطوانة الدبرياج وهكذا لكن دة صعب جدا خصوصا مع مبتدا زى

موش صعب ولا حاجة
كل الحكاية انك لو شعرت ان عملية التوقف هاطول شوية ... طبعا على طول بدون تردد "مور" الفتيس عشان تريح العربية ... لكن لو العربيات كانت ماشية بسرعة هادئة جدا يبقى اللى انت بتعمله ده صح وعشرة على عشرة ... لو كانت العربيات ماشية بطىء قوى لكن فى حدود 20 كيلوا .. خلاص فى الحالة دى لو كان هناك فرصة تعطى العربية الغيار التانى يكون افضل ... يعنى لو عملية السير البطىء دى هاتستمر كثير يبقى الافضل تعطى الغيار التانى على طول بدون تردد

وفى اى حال من الاحوال .. حاول ترفع رجلك من على الدبرياج بالكامل إذا قدرت بدون ما تتوقف العربية ده يكون افضل بكثير

يعنى فيه سائقين بمجرد العربية ما اتحركت على طول يغير على "الغيار الثانى" ويستمر فى السير مهما كان بطىء ..

العربية هاتبطل منك لو وقفت تماما وانت لم تضغط على الدبرياج سواء كنت على الاول او التانى او اى غيار

الاهم من ده كله ايه
لو "مورت" الفتيس
عينك على طول على إشارة المرور
وكمان عينك على العربية اللى امام العربية التى امامك
يعنى انظر على العربيات المتوقفة بعيد عنك ... واول ما تشوف ان العربيات بدأت تتحرك .. على طول انقل الغيار الاول وكن مستعد واتحرك على طول ... يعنى لا تنتظر لما العربية اللى امامك تتحرك ... لازم تنظر على العربيات التانية اللى امام العربية اللى امامك عشان تلحق تمشى مع باقى العربيات بدون اى مشاكل
وفى الحالة دى مافيش اى خوف انك "تمور" الفتيس عند اللزوم وده يكون افضل للسيارة طبعا
ممكن درس فى موضوع المشى بطئ بالصور
لو وجدت اى جديد هانعرضه إن شاء الله

؟وشكرا لحضرتك

لا شكر على واجب .. المهم نسمع اخبارك على طول وإن شاء الله تكون خير


مع اطيب التمنيات
اخوكم حسين غزالة

[magid1010]

الف الف شكر يا استاذ حسين و كل سنة و انت طيب رمضان كريم

[husseinoo]

بسم الله الرحمن الرحيم

اللهم صل على محمد وعلى آله وصحبه أجمعين


كيف تقود سيارتك بأمان

وكيف تصبح سائق جيد

المسافة الآمنة عند المرور من السيارة التى امامك
يعتبر المرور من السيارة التى امامك عملية تحتوى على بعض الصعاب خصوصا فى السير على الطريق السريع ... وتزيد المشكلة إذا كان الطريق ليس مزدوج ... يعنى شارع واحد والسيارات بتسير فيه فى اتجاهين فى نفس الوقت .. وبيكون الشارع فى الغالب حارتين فقط ... حارة للذهاب وحارة للسيارات القادمة "مثل طريق الصعيد" على سبيل المثال
إذا لا قدر الله لم تستطيع تقدير المسافة بالنسبة للسيارة القادمة .. سوف تكون النتائج سيئة للغاية ... ربنا يحفظ الجميع
المشكلة الكبيرة ان حجم تصادم سيارتين على سرعة 60 كيلوا لكن بالمواجهة تكون اكبر وتوازى تصادم سيارتين على سرعة 120 كيلوا فى الساعة ... تخيل حجم التصادم وقوته .. اعوذ بالله ربنا يسترها معانا.

انظر الى الصورة

انت تحتاج إلى مسافة لتجنب التصادم مع السيارة التى امامك .... اختيار "الفجوة" الآمنة قبل المرور من السيارة التى امامك يعتبر مفتاج اساسى لهذه المهارة .. فأنت تحتاج الى الوقت والتدريب الجيد جدا.

المرور من السيارة التى امامك مشابه الى حد كبير من المرور من اى سيارة اخرى على طريق مزدوج او طريق متعدد الحارات "طريق طوالى سريع" ولكنه يحتوى على مخاطر كبيرة لان عملية المرور بتكون على طريق واحد حارتين فقط ... وعند المرور فأنت تذهب الى الطريق المقابل العكسى للسيارات القادمة .


بعض التحذيرات
قرار المرور من السيارة التى امامك او الاستمرار فى السير خلفها يعود إليك ... الوقت الذى تحتاجة للمرور يتوقف على سرعتك ... واحيانا كثير تحتاج الى المرور من سيارات متوقفة او اى مشكلة فى الطريق .... احسن حاجة تعملها انك تتذكر انك موش مجبر تمر من السيارة التى امامك إلا إذا كنت مجبر على كده ... يعنى لو انت موش متمكن مافيش اى مشاكل انك تفضل ماشى خلف السيارة التى امامك .... إلى إذا كنت مجبر تمر من السيارة التى امامك بسبب توقفها او وجود عطل فيها .... وعلى فكرة انا من النوع ده ... مابحبش اعمل حركات عالفاضى .... مافيش اى مشكلة انى استمر فى السير خلف السيارة التى امامى حتى ولو كانت سرعتها اقل منى بحاجة بسيطة ... مافيش اى مشاكل افضل من الدخول فى مغامرات واحاول تقليد الآخرين وانا مازلت مبتدأ فى عملية القيادة وموش هاوفر وقت بعد كل المغامرات دى ... يعنى عربيات ماشية على سرعة فى حدود 100 كيلوا ممكن تكون انت ماشى 80 كيلوا مافيش اى مشاكل وموش هاتفرق فى الوقت خالص ... المهم انك توصل بالسلامة.

انظر الى الصورة

تذكرت احد الزملاء اشترى عربية جديدة ... وخلال شهر قرر انه يسافر بها على طريق الصعيد ... طريق يشبه الصوره ... طبع للاسف صاحبنا انقلب بالعربية .. خرج عن الطريق لتجنب التصادم هههههههههههههههههه المهم ربنا ستر ... انا حتى الآن خايف اسافر بها بلدنا ... لأن فيه مسافة الطريق فيها يشبه الصورة تماما ... على إيه لما الواحد يتمكن كويس جدا ويفهم الموضوع ده ممكن يفكر انه يسافر .... الصبر جميل والعملية موش "فتح صدر" ههههههههههههه والواحد عايز يعمل فيها معلم وخلاص ....



المهم نرجع لموضوعنا
من الحاجات المهمة ايضا هو موضوع "ابعاد العربية" .... حجم العربية اللى انت عايز تمر منها ... ومدى قدرة سيارتك على زيادة سرعتها ...

على سبيل المثال:
المرور من سيارة عادية يأخذ من الوقت اقل من المرور من سيارة نقل او من سيارة شاحنة حاوية زى ما هو ظاهر فى الصور ... السيارة النقل او الاوتوبيس يحتاج من الوقت 3 اضعاف وقت المرور من السيارة الملاكى ... ونفس الشىء تحتاج من الوقت الى 5 اضعاف وقت المرور من السيارة الملاكى اذا كنت عايز تمر من سيارة شاحنة حاوية ... احيانا تحتاج الى 9 اضعاف الوقت العادى.
انظر الى الصورة

تذكر ان:
ان السيارة التى لا تستطيع زيادة سرعتها .... سوف تحتاج الى وقت اطول لكى تمر من السيارة التى امامها ........ هههههههههههه وتظهر المشكلة بحجمها الحقيقى على الطريق السريع الطوالى ... انتم فاكرين انا كنت ماشى على 80 او 85 احيانا ورغم ذلك لا تشعر بأن تسير بسرعة خالص خصوصا على الطريق السريع ... طبعا السرعة دى داخل المدينة ممكن تحس انك بتجرى جامد ... لكن على الطريق الطوالى تشعر انك راكب "سحلفاة" ههههههههههه الحمد لله على كل حال .... ما بالك لما تحب تمر من اى سيارة امامك ... لازم تفكر كويس جدا .

ارشادات عند اختيار "الفجوة" الآمنة قبل المرور من سيارة اخرى
نظرا لأن عملية المرور من السيارة التى امامك عملية معقدة وتحمل بعض المخاطر لازم تراعى التالى:

• حالة الطريق هل يوجد زحام ام الطريق معقول والعربيات التى تسير عليه قليلة ؟

• ابعاد وحجم العربية التى ترغب فى المرور منها

• سرعة عربيتك القصوى التى ممكن الوصول اليها .. يعنى عربية 1300 سى سى اكيد سرعتها اقل من عربية 2000 سى سى

طيب انت هاتقول لى انت عقدتها خلاص ههههههههههههههه هاقول لك لأ لسه شوية هههههههههههههههه والحل ممكن يكون بعد التدريب التالى:

ممكن ببساطة تتمرن على موضوع المرور على طريق يكون فيه اكثر من حارة .. وده الخطورة فيه هاتكون طبعا اقل من الطريق الموضح فى الصور السابقة .... لكن اذا كنت لا تشعر بالثقة فى المرور من السيارة التى امامك او حاسس انك موش مرتاح للحكاية دى .. خلاص انسى تماما وماتحاولش تعدى من العربية التى امامك ههههههههههههه "من خاف سلم"

الخطوة 1 عند المرور من السيارة التى امامك على طريق متعدد الحارات
ابحث على طريق تكون السيارات تسير عليه بسرعة 60 او 70 كيلوا فى الساعة ويكون الشارع فيه حارتين رايح وحارتين جاى ... يعنى حارتين للسيارت الذاهبة وحارتين للسيارات القادمة ... شارع حلو كده ويكون واسع
المهم ابدأ التدريب على المرور من السيارات الملاكى الصغير ... واحسب الوقت الذى تحتاجه سيارتك للمرور من سيارة صغيرة اخرى ... بعد كده ممكن تتمرن على المرور من سيارات كبيرة شوية مثل الاوتوبيسات او السيارات النقل او الحاويات الكبيرة .. وتحسب الوقت الذى تأخذه سيارتك عند المرور

الخطوة 2 عند المرور من السيارة التى امامك على طريق متعدد الحارات

انك تنزل طريق متعدد الحارات وواسع زى ما هو واضح فى الصورة
المهم ... تنزل فى وقت يكون حركة السيرة خفيفة ... والجو يكون حلو يعنى مافيش شبورة ولا امطار والدنيا نهار وميت فل وعشرة ههههههههههههه .... وتبدأ تحسب الوقت اللى هاتخده العربية القادمة لحد ما توصل لعربيتك ......... تعتبر العربية القادمة فى الطريق العكسى انها قادمة فى نفس طريقك وتحسب هاتاخد وقت اد ايه لحد ما توصل لك.... ابدأ عملية الحساب اكثر من مرة ... ولاكثر من نوع عربية ... مرة تحسب مثلا العربية الملاكة دى هاتوصل بعد 3 او اربع ثوانى ... العربية النقل دى هاتوصل لى بعد 6 ثوانى ... وهكذا ...


الخطوة 3
انت الآن تدربت على موضوع المرور من السيارت على الطرق متعددة الحارات ... فى الخطوة 1 انت حسبت الوقت الذى تأخذه سيارتك عند المرور من السيارات الاخرى مثلا 12 ثانية تقريبا من اول ما اعطيت اشارة مرور حتى الأنتهاء من عملية المرور والعودة مرة تانية لنفس الحارة التى تسير فيها . ....
انظر الى الصورة

يعنى مثلا لو كانت عربيتك هاتحتاج وقت 12 ثانية للمرور من السيارة التى امامها تقدر تضيف كمان 3 ثوانى احتياطى يبقى كده انت هاتحتاج وقت حوالى 15 ثانية للمرور من السيارة التى امامك
انظر الى الصورة

لو افترضنا ان السيارة الصفراء قادمة فى نفس طريقك ... فى الحالة دى عملية المرور من السيارة الزرقاء ليس آمنة تماما ... الموضوع محتاج الى تدريب جامد جدا وحساب كويس قوى ....


نصيحة هامة
للمرور من السيارة التى امامك تحتاج الى حساب الوقت الذى تستغرقه سيارتك فى عملية المرور بالإضافة الى 3 ثوانى احتياطى لكى تكون عملية المرور آمنة تماما
اذا كنت تشعر بعدم الراحة او الآمان من عملية المرور من السيارة التى امامك ... خلاص من خاف سلم وكبر دماغك واستمر فى السير .

طبعا خطورة الموضوع ده بتظهر على الطرق الزراعية والريفية الصغيرة ... ويفضل المرور من السيارات البطيئة فقط مثل الجرارات الزراعية وفى الاماكن المناسبة فقط مثلا يكون الطريق مستقيم ولا يوجد عليه اى معوقات مثل المطبات او امطار وتكون المسافة "الفجوة" التى تحتاجها آمنة بما فيه الكفاية وربنا يحفظ الجميع.



ارجوا ان اكون وفقت


فى انتظار التواصل




مع اطيب التمنيات
اخوكم حسين غزالة

[hesham90]

شكر للتواصل من الاستاذ حسين

شكرا للاستاذ حسين غزالة على الرد والتواصل والمشاركة بالرأى والافادة الهائلة لكل ماهو مفيد للاعضاء بس المشكلة التعليم النظرى على المنتدى بالرغم من انه مفيد جدا جدا جدا ورائع الا انه عند التطبيق العملى الواحد بينسى كل حاجة وزى ماقالت احدى العضوات الفضليات ان الواحد عايز يطبع التعليم بتاع الاستاذ حسين وياخده معاه فى العربية ويذاكر ويطبق مع خالص تحياتى لسيادتك ولجميع الاعضاء المشاركين وارجوا التفضل بالتواصل بالرد مع الشكر الجزيل

[rasim]

السلام عليكم
جزاك الله خيرا يا اخى حسين وبارك الله فيك ووضعه فى ميزان حسناتك وكل عام وانت بخير
فى سؤال ؟
انا لسه بقالى شهر بتعلم والحمد لله كويس الى حد ما
بس المكان الذى اسكن فيه مكان ليس به سيارات كتير هو مليان مطبات هههههههههههههه
بس الحمد لله بعرف اعدى منها والحمد لله يعنى ممكن مره العربية تقف بس الحمد لله كتير مش بتقف
المهم انا عاوز اتعلم الاحتاكاك ومافى طريق غير الدائرى عندى اعمل ايه
وجزاكم الله خيرا

[husseinoo]

شكرا للاستاذ حسين غزالة على الرد والتواصل والمشاركة بالرأى والافادة الهائلة لكل ماهو مفيد للاعضاء

الله يكرمك يا هشام وبارك الله فيك وكل سنة وحضرتك طيب

بس المشكلة التعليم النظرى على المنتدى بالرغم من انه مفيد جدا جدا جدا ورائع الا انه عند التطبيق العملى الواحد بينسى كل حاجة

هههههههههه ده حقيقى

وزى ماقالت احدى العضوات الفضليات ان الواحد عايز يطبع التعليم بتاع الاستاذ حسين وياخده معاه فى العربية ويذاكر ويطبق مع خالص تحياتى لسيادتك ولجميع الاعضاء المشاركين وارجوا التفضل بالتواصل بالرد مع الشكر الجزيل

هو الواحد فعلا بمجرد ما يركب العربية يشعر بالسعادة والرهبة والإثارة كله فى نفس الوقت لدرجة انه ينسى هو كان عايز يركز على إيه ... ويصبح كل همه انه يعدى التدريب على خير بدون ما العربية ما تتوقف وبدون اى خسائر .. عشان كده المفروض يكون عندك جدول وتكون كاتب فيه خطة للتدريب بمراحله المختلفة والوقت المحدد لكل مرحلة وهل تم اجتيازها ولا لأ عشان تركب العربية وانت عارف الهدف من التدريب ايه

يعنى مثلا لو الهدف من التدريب "تخطى المطب الصناعى" ... خلاص كل المعلومات الخاصة بالمطب الصناعى هى للى هاركز عليها فقط لا غير ... يعنى موش معقولة هاركز على معلومات خاصة بطلوع الكبارى فى نفس الوقت .... لأ كل موضوع وله معلومات خاصة به ... طبعا فيه ثوابت عمرها ما هاتتغير زى انك لو وقفت بالعربية بدون الضغط على الدبرياج او "مورت" الفتيس ... اكيد العربية هاتتوقف عن العمل وهكذا ... ربنا يسهل ونشارك كلنا فى فكرة عمل جدول للتدريب بمراحله المختلفة والوقت المحدد لكل مرحلة دى فكرة فى دماغى لكن عايزة بعض التفكير ... ربنا يسهل وكل سنة وحضرتك طيب

السلام عليكم

وعليكم السلام ورحمة الله وبركاته

جزاك الله خيرا يا اخى حسين وبارك الله فيك ووضعه فى ميزان حسناتك وكل عام وانت بخير

وحضرتك بخير وشاكر جدا لحضرتك على الدعاء الجميل

فى سؤال ؟
انا لسه بقالى شهر بتعلم والحمد لله كويس الى حد ما

طيب الحمد لله وإن شاء الله نسمع كل اخبارك الجميلة عشان نستفيد كلنا مع بعض

بس المكان الذى اسكن فيه مكان ليس به سيارات كتير هو مليان مطبات هههههههههههههه
بس الحمد لله بعرف اعدى منها والحمد لله يعنى ممكن مره العربية تقف بس الحمد لله كتير مش بتقف
المهم انا عاوز اتعلم الاحتاكاك ومافى طريق غير الدائرى عندى اعمل ايه

انا اول ما قرأت موضوع الطريق الدائرى .. حبيت اكتب لحضرتك الرد الفورى على طول
شوف يا سيدى الطريق السريع عموما ... طريق سهل ومشاكله قليلة
لكن برغم ان مشاكله قليلة لكن خطيرة جدا جدا ربنا يحفظ الجميع

عندما تسير بالسيارة فى شارع داخل المدينة ويوجد سيارات حولك ... اول ما تسمع كلاكس تجد نفسك بشكل تلقائى تبعد عن صوت الكلاكس والعربية "تحدف" الى حارة اخرى وتسبب مشاكل للآخرين ... واحيانا اول ما تجد سيارة تمر بجوارك ... يحصل نفس الشىء يحاول السائق الإبتعاد عن السيارة التى اقتربت منه
الحالة دى يشعر بها كل سائق مبتدأ ... وتأخذ وقت على ما اعصاب المتعلم تثبت وانه لا يهتز مهما حصل حواليه
ده غير موضوع المنطقة العمياء التى لا يراها المبتدأ فى المرايه عايزة وقت هى كمان عشان المبتدأ "مايخبطش" فى اللى حواليه خصوصا عند تغيير الحارات
معلهش ممكن تأجل السير فى الطريق السريع شوية لأنه خطر
ولو كان ضرورى قوى
يبقى خلاص لازم يكون معاك حد راكب بجوارك
وتمشى على سرعة لا تتجاوز الـ 60 كيلوا
وتحافظ على مسافة كافية بينك وبين السيارات التى امامك
وتمشى فى الحارة اليمين على قدر الإمكان
بالكثيير قوى تمشى فى الحارة الوسطى عند اللزوم فقط

يا ريت تأجل موضوع الدائرى ده شوية
وتخرج بالعربية مع اى صديق الى منطقة تانية حتى ولو هاتأخذ منك بعض الوقت

ومافيش داعى للأستعجال
المشى على الطريق الطوالى محتاج تدريب خاص
المشى داخل المدينة والزحام محتاج تدريب خاص
لازم تأخذ وقتك
وإن شاء الله كل هايبقى تمام التمام

وكل سنة وحضرتك طيب

مع اطيب التمنيات
اخوك حسين غزالة

وجزاكم الله خيرا

[magid1010]

السلام عليكم ورحمة الله وبركاته


طمعنين يا استاذ حسين فى درس عن طلوع الكوبرى و لو العربية بطلت اعمل اية وهى على مطلع؟

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

وكل عام وحضراتكم بخير
رمضان كريم



كيف تصعد الكوبرى بنجاح

استمر فى السير بعد اختيار غيار الفتيس المناسب وحاول الاستمرار فى الصعود على الكوبرى بهدوء خصوصا انك شايف ان العربيات ممكن انها تتوقف فى اى وقت .. يبقى مافيش داعى انى اقترب من العربيات زيادة عن اللزوم لانه ممكن الازمة تتحل قبل ما اوصلهم واستمر فى السير بدون توقف المهم:

• اول ما السيارة التى امامك تتوقف ... اضغط على الدبرياج بالكامل وفى نفس الوقت اضغط على الفرامل ولا ترفع رجلك عن الفرامل

• مور الفتيس ... اى ضع الفتيس فى وضعية "المور" يعنى بدون اى غيار

• ثم ارفع فرامل اليد "الهاند بريك"

• ارفع رجلك عن الفرامل وكمان ارفع رجل من على الدبرياج

• اذا تحركت السيارة التى امامك

• اضغط على الدبرياج وانقل الفتيس على الغيار الاول

• خليك ضاغط برجلك على الدبرياج واضغط خفيف على البنزين

• اضغط على البنزين زيادة شوية فى نفس الوقت ارفع رجلك عن الدبرياج خفيف وببطء ... لحد ما تشعر ان السيارة عايزة تتحرك او "بتترعش" ... سوف تشعر ان مقدمة السيارة بترتفع لأعلى ...

• زود بنزين خفيف مرة كمان ثم نزل فرامل اليد " الهاند بريك"

• ثبت رجلك على البنزين وعلى الدبرياج ... حتى تنتهى من صعود الكوبرى وتصل الى القمة

الموضوع محتاج تدريب
لكن لو اتبعت هذه الخطوات سوف تتم العملية بنجاح إن شاء الله




تذكر أن:

• مافيش داعى انك تنقل الغيار التانى اثناء صعودك الكوبرى ... استمر على الغيار الاول حتى تنتهى من الصعود ثم انقل الغيار التانى

• اوعى تنزل فرامل اليد "الهاند بريك" قبل ما تشعر ان السيارة عايزة تتحرك وان مقدمتها بترتفع من على الارض

• اوعى ترفع رجلك من على الدبرياج جامد او بسرعة جامدة .. العربية فى الحالة دى هاتبطل وتعطل منك على الكوبرى

• اوعى تضغط على البنزين خفيف قوى ... لدرجة ان السيارة ترجع للخلف وتريح على العربيات التى خلفك

• مافيش داعى انك تفضل تزود بنزين وترفع رجلك ثم تزود بنزين وترفع رجلك ... زى اللى عايز يسخن العربية بدون داعى

• بعد ما العربية ما تتحرك ... ثبت رجلك على البنزين وعلى الدبرياج حتى تنتهى من الصعود على الكوبرى ...
  

• مافيش داعى انك تحاول ترفع رجلك بسرعة عن الفرامل وتزود بنزين وترفع رجلك عن الدبرياج كله مرة واحدة زى الناس اللى عندها خبرة .. العربية هاترجع منك للخلف ... الموضوع محتاج تدريب وكل المطلوب منك فقط ارفع الهاند بريك ونفذ الخطوات السابقة

• وطبعا الموضوع محتاج صبر وكمان مراقبة للسيارة التى امام السيارة التى امامك ... يعنى لا تنتظر ان السيارة التى امامك تتحرك عشان تبدأ فى عمل الخطوات السابقة ... انظر الى ابعد من ذلك ... انظر الى السيارات التى فى القمة ... واول ما تشاهدها بدأت فى التحرك ابدأ انت فورا فى الإعداد للتحرك .

ارجوا ان اكون وفقت


فى انتظار التواصل




مع اطيب التمنيات
اخوكم حسين غزالة

[م. عصام مهنى]

جزاك الله كل خير

[rasim]

السلام عليكم
جزاك الله خيرا اخى حسين انا الحمد لله جربت اطلعه (مع العلم انه لا يوجد مخرج تانى غير الدائرى) الحمد لله كانت عمليه صعبة فى الاول وكنت مرعوب شوية بس بعد ذلك الحمد لله وكنت ماشى ما بين 60 و 75 والحمد لله وافتكرت كلام حضرتك وانا بعد المقطوره اعد كام ثانية بعد المقطوره انا مره عدتيت طلعت 13 والحمد لله ما وجهتش اى صعوبة وجزاك الله خيرا اخى الكريم على الرد فى سؤال
هل لوانا مشيت على الثالث كتير اى ما بين السرعه 60 و79 تحصل حاجه الى العربية ؟

وجزاك الله خيرا

اخوك فى الله
احمد

[husseinoo]

السلام عليكم
جزاك الله خيرا اخى حسين انا الحمد لله جربت اطلعه (مع العلم انه لا يوجد مخرج تانى غير الدائرى) الحمد لله كانت عمليه صعبة فى الاول وكنت مرعوب شوية بس بعد ذلك الحمد لله وكنت ماشى ما بين 60 و 75 والحمد لله وافتكرت كلام حضرتك وانا بعد المقطوره اعد كام ثانية بعد المقطوره انا مره عدتيت طلعت 13 والحمد لله ما وجهتش اى صعوبة وجزاك الله خيرا اخى الكريم على الرد فى سؤال
هل لوانا مشيت على الثالث كتير اى ما بين السرعه 60 و79 تحصل حاجه الى العربية ؟

جميل وبرافو عليك

بالنسبة لموضوع المرور من المقطورة اللى اخذ منك وقت 13 ثانية مع مراعاة سرعة العربية وحالة الطريق واضافة وقت 3 ثوانى كمان للأمان ... يبقى انت محتاج 15 ثانية للمرور من اى سيارة مقطورة ...


بالنسبة للمشى على الثالث مدة طويلة ... هو اغلب المشى بالعربية بيكون على الثالث ... لأن مافيش فرصة ان الواحد يمشى على الرابع من شدة الزحام ... عملية نقل الغيارات تتوقف على حالة العربية وكفاءتها
يعنى انا مثلا ممكن امشى على الرابع على سرعة 80 كيلوا مافيش اى مشاكل ... لكن لو السرعة نزلت الى 60 على طول انقل الغيار الثالث

طبع لو كان فيه فرصة تريح العربية فى الغيارات يكون كويس ... يعنى لا تنتظر ان العربية تصل الى السرعة القصوى فى الغيار عشان انقل الى الغيار التالي

مثلا سيارتى تويوتا وسرعتها 180 كيلوا فى الساعة
عشان اوصل لسرعة اكثر من 120 كيلوا .. محتاج انى ادوس بنزين جامد واصبر على الغيار لحد ما اصل الى اقصى سرعة ... يعنى لما السرعة مثلا تصل الى 55 او 60 ممكن انقل الغيار الثالث ولما اصل الى 80 او 90 انقل الغيار الرابع كل ده يمثل ضغط على العربية

لكن انا بعمل ايه
لما العربية توصل الى 40 كيلوا انقل الغيار الثالث
ولما توصل الى 60 انقل الغيار الرابع
ولما توصل الى 80 او 85 كيلوا ... بثبت رجلى على البنزين ... كده العربية ماشية مرتاح بدون ضغط

حضرتك بعد شوية هاتحس بالعربية كويس ... وتسمع المتور ... وتنقل الغيار قبل ما صوت الموتور يعلى ...

يعنى ممكن تمشى على الثالث مدة طويلة وفى نفس الوقت بدون الضغط على الموتور .. يعنى بدون زيادة البنزين جامد ... لو عايز اجرى اكثر من كده يبقى الافضل انى انقل الغيار الرابع

ارجوا ان اكون وفقت

مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

كيف تقود سيارتك بآمان
وكيف تصبح سائق جيد

اكتشاف المخاطر

يعنى ايه كلمة كشف ؟
عملية الكشف معناها انك تركز على كل ما يدودر حول سيارتك بزاوية 360 درجة ........ يعنى تشوف كل اللى بيحصل حول العربية من جميع الإتجاهات .... هو ده المفتاح الرئيسى لكشف المخاطر .... وتجنب المشاكل ... انت تحتاج الى كشف وتجنب المخاطر بصورة مستمرة اثناء القيادة.

طيب يعنى ايه ان "عملية الكشف" فعالة ؟
معنى ان عملية الكشف فعالة .. انك بتحرك عينيك او رأسك اثناء عملية القيادة لتستطيع كشف المشاكل التى تظهر حول سيارتك من الأجناب او من الخلف.

كل الأبحاث تؤكد على أن السائقين المبتدأين ضعاف جدا جدا فى عملية الكشف ... وأن كل او اغلب اللى بيركز عليه المبتدأ هو مقدمة السيارة وما يحدث امامه فقط هههههههههههههه ... طيب فيه واحد هايقول لى انت بتعقدنا وبتفكرنا بمشاكلنا ........ هههههههه هاقول له : لأ .. الأخبار الكويسة ان السائقين المبتدأين يستطيعوا التغلب على هذه المشكلة بالتدريب .


فى هذا القسم سنحاول مساعدة المبتدأين على تحسين عملية الكشف حول السيارة .. وتسطيع كشف المشاكل حول سيارتك قبل ان تتحول المشاكل اى مخاطر سواء للسائق المبتدأ او لباقى قائدى السيارات التى على نفس الطريق .... ربنا يحفظ الجميع ...


كيف تستطيع كشف المخاطر اثناء قيادة السيارة ؟
لكى تستطيع كشف المخاطر حول سيارتك بشكل فعال وممتاز .. فأنت تحتاج الى تحريك عينيك وكمان تحريك رأسك ويمكن تحتاج الى تحريك جسمك "نصف جسمك الأعلى" لكى تحصل على صورة جيدة حول ماذا يحدث حول سيارتك ؟
انظر الى الصورة التالية

فى الصورة يظهر انك تحتاج الى مجال للرؤية 360 درجة حول عربيتك يعنى من جميع الجهات

معنى الكلام ده ايه ؟ ... معناه انك لازم تنظر من خلال الزجاج الامامى للسيارة ... وتنظر جيدا على أجناب السيارة ... لكى تتوقع ما سوف يحدث فى المستقبل ... وايضا انت تحتاج الى استخدام "المرايه" الجانبية لكى تعرف ماذا يحدث خلفك ... لكن فى نفس الوقت المرايه الجانبية لن تظهر "تغطى" كل شىء يحدث خلفك ... على طول سوف تجد مساحات اسمها "المنطقة العمياء" هذه المساحات لن تظهر فى المرايه الجانبية .... طيب ما هو الحل ؟

الحل محتاج منك انك ترفع راسك وتنظر فوق كتفك على الشباك الخلفى لسيارتك ... لكى ترى ماذا يحدث بجوارك ........

طبعا المنطقة العمياء بتختلف حسب نوع السيارة التى تقودها ... يعنى سيارة نقل .. اوتوبيس .. كل هذه السيارات تختلف المنطقة العمياء فيها عن السيارة الملاكى ...


عملية كشف المنطقة العمياء بتكون فعال اذا تمت عن طريق الرؤية المباشرة ...
يعنى ايه ؟ ... يعنى كل المطلوب من حضرتك انك تلف بجسمك وتنظر فوق كتفك من الشباك الخلفى للسيارة .. خصوصا اذا كنت عايز تنقل نفسك من حارة الى حارة اخرى ..
انظر الى الصورة التالية

عملية الكشف الروتينى
طبعا اى سائق قديم وخبرة .. على طول وبشكل مستمر بيكشف اى مشاكل اثناء عملية القيادة ... وبيعمل كده بشكل تلقائى ... وعشان تستطيع ايجادة عملية الكشف بطريقة فعالة هاقول لك على الحل المناسب ...

• اذا كنت تسير بالسيارة على سرعة 60 كيلوا فى الحالة دى يجب ان تنظر الى الأمام مسافة حوالى 200 متر امامك

• اذا كنت تسير بالسيارة على سرعة 90 كيلوا على الطريق السريع فى الحالة دى يجب ان تنظر الى الامام مسافة حوالى 300 متر امامك

انظر الى الصورة التالية

فى الصورة يظهر ان السائق ينظر امامه تقريبا على مسافة 200 متر وهو يسير تقريبا على سرعة حوالى 50 او 60 كيلوا فى الساعة
كشف المخاطر التى تحدث امامك بمسافة كبيرة يتيح لك الفرصة لكى تتجنب هذه المخاطر ... ممكن تلاقى على الطريق عربية عطلانة .. او حادث سيارة على الطريق ... او احدى الحارات يظهر عليها ضيق شديد يعنى "عملية المرور اصبحت صعبة فى هذه الحارة" ... لو عملية الكشف تمت فى الوقت المناسب "بدرى شوية" هاتقدر تتجنب هذه المشاكل بشكل كويس جدا.


اثناء القيادة فى منطقة زحمة طبعا موش محتاج انك تنظر امامك على مسافة 200 متر هههههههههه لأنك اساسا هاتكون ماشى على سرعة بطيئة وده هايساعدك على تجنب المشاكل ... يعنى المشى البطىء فى الزحام لا يسبب اى مشاكل .. كل الحكاية انك "بتزهق" و طبعا بتكون خايف على العربية من انها تسخن اثناء القيادة فى الحر الشديد ...

الكشف المبكر يا جماعة معناه انك تنظر امامك بمسافة كافية ...
على سبيل المثال : تقدر تشوف الأنوار الخلفية للعربيات التى تسير امامك .. وبمجرد انك تشوف الأنوار الخلفية "مضيئة" على طول بتعرف ان السيارات التى امامك بتتوقف لاى سبب وانك لازم هاتتوقف فى اى وقت ... وده يعطى لك فرصة ووقت كافى للاستعداد للتوقف فى اى وقت

علمية الكشف ليس معناها انك تنظر الى السيارات التى امامك مباشرة ... ههههههههههه فيه ناس كثيير اكثر حاجة تنظر اليها "كبوت العربية" ههههههههه يعنى بالكثيير تنظر على العربية التى امامه فقط لا غير ....

والكشف السليم للمستقبل معناه انك تنظر على اجناب السيارة اليمين والشمال لتجنب وكشف المخاطر خصوصا وانت تسير على الطريق السريع واثناء المرور على التقاطعات ... ممكن تلاقى سيارات متوقفة على الطريق ... ممكن تلاقى ناس راكبة دراجات "عجل" .. ممكن تلاقى مشاة ...
الكشف الفعال يا جماعة معناه انك تحرك راسك باستمرار وتحرك عينيك باستمرار لكشف اى شىء يدور حواليك وعدم التركيز على نقطة محددة ... يعنى موش معقول طول الوقت تنظرامامك فقط لا غير

احد الاصدقاء ذو الخبرة قال لى: انت تنظر امامك فقط وتركز على اللى بيحصل امامك وما تفكرش كثير فى اللى بيحصل حواليك ... طبعا انا رفضت النصيحة تماما ... هو عايز "يخدمنى" ويقول لى: انت عشان جديد فى السواقة خليك مركز فى العربيات اللى امامك فقط ... طبعا الكلام ده يودى فى داهية هههههههههههه اعوذ بالله وربنا يحفظ الجميع


اخويا بالأمس يقول لى: انت بتمشى بالعربية موش بسرعة كفاية ... بصراحة زعلت منه وقلت له : انت لسه من شوية صغيرة بتقول الشارع مافيهوش الهوا عشان الواحد يمشى ويخرج بالعربية ... طيب ازاى انت تبقى شايف ان الشارع زحمة وعايز تجرى ... هو جرى وخلاص ... انت نسيت المساحة الصغيرة اللى انت قلت لى ادخل فيها والنتيجة ان المرايه حكت حاجة خفيفة فى العربية اللى بجوارى ...
موش كل اللى تسمعه من اى سائق قديم "تصدقه" هههههههههههههههههههه لازم تفهم كويس وتثق فى نفسك وفى العلم اللى انت عارفه.

انظر فى المراية كل 8 او 10 ثوانى .... الدنيا بتتغير حواليك كل شوية ... سواء امام السيارة او على الاجناب او خلف السيارة ... لو انت بتشوف المرايه باستمرار هاتقدر مثلا تكشف ان فيه سيارة قادمة من الخلف وعايزة تمر منك وتقدر تعمل حسابها ... او حتى فيه عربية شرطة او عربية اسعاف قادمة من الخلف وعايز تمر منك.

افحص المنطقة العمياء
لو انت ماشى على طريق طوالى .. وفى نفس الوقت كنت بتراجع المرايات بصفة مستمرة .. وتنظر امامك بمسافة مناسبة ... ده كله كافى وتمام التمام خصوصا انك موش ناوى تغير الحارة بتاعتك الى حارة اخرى
لكن افرض انك محتاج "تلف" بالعربية يمين او شمال ... او تريد الابتعاد بالسيارة عن اى شىء على الطريق ... فى الحالة دى هاتحتاج تكشف ما يدور فى المنطقة العمياء للسيارة ... وانت ماشى تمام التمام ممكن تلاقى "بلاعة مجارى" وعايز تتجنبها .. طبعا هاتروح ماشى يمين او شمال .. لو انت موش شايف ايه اللى بيحصل فى المنطقة العمياء للسيارة هايحدث معاك مشاكل ربنا يحفظ الجميع

ملخص الكشف الروتينى

• انظر امامك بمسافة 200 متر تقريبا

• انظر فى المرايات كل 8 او 10 ثوانى

• انظر الى المنطقة العمياء عن طريق النظر فوق كتفك للخلف خصوصا قبل "لف" العربية فى شارع جانبى او الرغبة فى تغيير الاتجاه يمين او شمال

انظر الى الصورة التالية

عملية الكشف محتاجة منك الاستمرارية ... يعنى على طول خليك شغال ... طول ما انت ماشى عينيك وراسك شغالين تنظر امامك تنظر خلفك تنظر على الاجناب ... فى حالة ظهور اى مشكلة .. فى الحالة دى كل تركيزك هايكون على تجنب المشكلة التى ظهرت وبعد ذلك تعود الى عملية الكشف الروتينية باستمرار ... يعنى مثلا ظهر امامك سيارة متعطلة وترغب فى المرور منها ... بعد الإنتهاء من عملية المرور ترجع على طول لموضوع الكشف المبكر هههههههههههه وتنظر امامك بشكل كافى وعلى الاجناب وخلف السيارة وتراجع المنطقة العمياء


عملية الكشف الذكى
اثناء عملية المراجعة الروتينية او الكشف الروتينى ... هاتلاقى حاجات كثير انت شايفها وهاتلاقى انه من الصعب جدا انى اشوف كل تفاصيل اى حاجة بشكل واضح ... ده معناه ايه ؟ ... معناه انك محتاج ترتب او تعمل عملية "فلترة" لكل اللى بتشوفه ... وتركز على الحاجات المهمة فقط ... هاشرح الكلام ده فى الدروس القادمة

ارجوا ان اكون وفقت
فى انتظار التواصل

مع اطيب التمنيات
اخوكم حسين غزالة

[egyptawy2010]

طيب معلش ممكن تقولولنا ازاى اغير الزيت والميه واغيره كل اد ايه

لو فيه صور يبقى كويس قوى

شكرا

[husseinoo]

طيب معلش ممكن تقولولنا ازاى اغير الزيت والميه واغيره كل اد ايه لو فيه صور يبقى كويس قوى



اهلا وسهلا بحضرتك

انا بالنسبة لى اول مرة اغير زيت كان نوع الزيت "ايسو" ويتم تغيره كل 1500 كيلوا ... وتم تغير فلتر الزيت "فلتر مصرى" والكشف على زيت الفتيس كل ده كان تكلفته تقريبا 70 جنيه او 75 جنيه موش فاكر

المرة دى إن شاء الله عايز اغير الزيت نوعه "موبيل" وده يتم تغيير بعد 4000 كيلوا

لو العربية جديدة فيه ناس تفضل تغيير الزيت بعد 10000 كيلوا


لكن افضل تغييره بعد 4000 كيلوا "خير الامور الوسط"

وطبعا فلتر الزيت يتم تغيير كل 3 مرات زيت
يعنى تغير الزيت وتضع فلتر زيت جديد
ثم تغير الزيت مرة كمان
ثم تغير الزيت مرة كمان

كده يبقى انت غيرت الزيت 3 مرات
المرة الرابعة اعتقد تغير فلتر الزيت
ودى صورة فلتر الزيت

طبعا اعرف احدى الصديقات كانت تروح التوكيل عشان الصيانة الدورية
وكان كل ما يغير لها الزيت يقول لها احنا غيرنا "الفلتر" .. عملية نصب ظريفة عشان ياخد منها فلوس .. لحد ما اخوها عرف الحكاية دى بالصدفة وقال لها: ان الفلتر لا يتم تغيره الا بعد كل 3 مرات تغير زيت


دى صورة عبوة الزيت

لاحظ انه مكتوب عليها 15W-50
وثمنه تقريبا 100 او 120 جنيه ... إلا إذا كان ثمنه غلى عن كده
وفيه ناس تحب تغيره قبل ما يتم 4000 كيلوا ... يعنى مثلا بعد 2500 كيلوا ... براحتك

اهم حاجة انك تكشف على الزيت بصفة دورية وتتأكد تماما انه مؤشر الزيت متغطى كويس

بالنسبة للمياه
انت تحتاج الى وجود "جيركل" مياه خضراء فى شنطة العربية
ولو كان الراديتير سليم وتمام
يبقى فى الحالة دى موش هاتفتح غير "قربة المياه" تكشف على مستوى المياه وتزود حاجة بسيطة من المياه الخضراء
طبعا كلنا عارفين ان المياه الخضراء بتحافظ على سلامة دورة المياه للسيارة وان المياه العادية مية الحنفية بيكون فيها املاح تؤثر على كفاءة الراديتير ودورة المياه لذلك يفضل انك تستخدم المياه الخضراء
وثمن الجيركل اعتقد تقريبا فى حدود 10 او 12 جنيه تقريبا

ارجوا ان اكون وفقت

فى انتظار التواصل

مع اطيب التمنيات
اخوكم حسين غزالة

[hesham90]

استاذنا الفاضل الاستاذ حسين مع خالص الشكرلمجهودك اسمحلى بالتعقيب اولا- الفلتر مع كل مرة تغيير زيت هو الافضل ليه الفلتر بيكون حالته اول مرة تختلف عن تانى مرة وبالتأكيد يختلف تماما عن ثالث مرة بمعنى عند تغييره اول مرة طبعا حالته اكيد بتكون افضل من المرات اللى بعد كده وده الكلام اللى بيعملوه فى التوكيل ونصيحة احد المهندسين لى والموثوق بهم ان اغيير الفلتر مع كل تغيير زيت وقالى الفرق مش كتير يعنى لو عربيتك جديدة وحديثة ماتستخسرش فيها ثمن فلتر مع تغيير الزيت وهو ثمن الفلتر بيكون كام يعنى بجانب ثمن الزيت مبلغ زهيد اما لو العربية موديل قديم ومش حديثة فيبقلى تغيير الفلتر زى ماحضرتك قلت بعد كل مرتين تغيير زيت
ان الفلتر لا يتم تغيره الا بعد كل 3 مرات تغير زيت

ثانيا- جيركن المياه الخضراء نوعان واحد عادى وده ثمنه بيبقى 20ج وواحد اسمه سعودى بيتباع فى بنزينة وطنية وده ثمنه 25ج

ثالثا- ارجو التفضل بالتعليق لتصحيح المفاهيم ولانى باحب آرائك ومواظب جداجداجدا على الدخول للمنتدى يوميا لمتابعة الجديد فى دروسك الممتعة والشيقة جدا وباستفاد من تعليمك وان شاء الله يجعل اعمالك فى ميزان حسناتك لان كل حرف تعلمه لنا ثوابه ان شاء الله بعشرة امثاله وتقبل خالص تحياتى