نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

السلام عليكم ورحمة الله وبركاته

تحية وتقدير للاستاذ/ ياسر ... على شجاعتك وصراحتك

لانه يوجد الكثير من المبتدأين فى القيادة لا يريد الإعتراف بوجود مشكلة فى عملية القيادة .... وإذا سألته ايه الاخبار ؟

امام الناس كلهم يؤكد انه ممتاز ... وانه بينزل الشوارع بكافة اشكالها ... وانه اتولد سواق ههههههههههههه

وفى الحقيقة ... اكيد بيخبط فى كل اللى حواليه


اسوء نصيحة سمعتها وما زلت اسمعها
هى انزل الشارع وانت خوفك هايقل

ظاهريا الكلام كويس

لكن فى الحقيقة الشىء الوحيد اللى انا مقتنع به للحد من الخوف
هو انك تكون فاهم موش حافظ

واحد + واحد يساوى 2

وكل مشكلة لها طريقة فى المعالجة ... وبأسلوب علمى موش تجربة وخطأ

على العموم احنا كلنا فى شغف اننا نسمع من حضرتك تجربتك وافكارك وكل ما تشعر به عشان نستفيد كلنا من التجربة الجديدة دى

فى انتظار التواصل
مع اطيب التمنيات
اخوكم حسين غزالة

[yasiressa]

السلام عليكم ورحمة الله وبركاته
نبدأ الحكايه وسلسلة اخفقاتى فى السواقة
اول ذى بدء كان الكلام عندما قررت شراء سيارة والسؤال عن انواع السيارات والواحد يشترى جديد والا مستعمل ابتديت ادى اهمية للموضوع وقررت الشراء ويكون جديد احسن من المستعملبس اول حاجه نطلع الرخصة لان دى اصعب حاجه فى الموضوع ووالسواقه بعد كده راح تكون سهله وبتيجى مع الوقت (( ده طبعا كلام كل اللى سئلتهم))
ذهبت لاحد مركز تعليم السواقة وكان برنامجهم 4 سعات نظرى و3 ساعات على عربية ثابته و3 ساعات سواقه فعليه
وكان التعليم على 28 ومشيت ساعة فى طريق احمد حلمى كويس وباقى الساعات تعليم على الاداره واختبار الاقماع علشان الرخصة
وكان خلصنا ورحت خدت الرخصة وطلعت موضوع الرخصة اسهل حاجة فى الموضوع كله
ورحت لشراء السيارة والحمد لله ربنا سهل واخترت العربية ورحت استلمها معى زوجتى وابنى
طبعا المعرض جاب العربية ركبت فيها وقلت اشوف اللى اتعلمته فى السواقه لقيت العربية غير ال28 خالص
طبعا الحجم اكبر والاوبشن مختلف واقل حاجه المسها العربية تجرى
معرفش ايه اللى حصل خفت من سواقتها واتصلت بقريب لى يجيلى علشان اوصل بيها البيت
طبعا الخوف كان مبرر وله الف سبب
اول الاسباب انى انا كل اللى اعرفة ازاى ادور واطلع لقدام وارجع للوراء
ومش هى دى السواقه
حتى السواقة اللى اتعلمتها كان فيه واحد هو اللى بيدى الاوامر ويفكرلى (اول غير للتانى هدئ سرع لف يمين لف شمال )
المهم جيت اول شارعنا وطلبت انا السواقه ((ميصحش ادخل بعربيتى شارعى وانا مش سايق)
قعدت مكان السائق ومع اول طلعة دخلت مطب ولسة بتعدل لقيت ميكروباص وتكتك عاملين سبق مع بعض وزنقوا عليا
قمت رامى شمال لقيت نفسى داخا فى تاكسى
قمت عادل الدركسيون لقين انى داخل فى عمود خرسانى
فرملت (( من عند ربنا اننى دوست على الفرامل ))
وقفت قبل العمود الخرسانى بنص متر
طبعاقريبى وزوجتى افتكروا اننى انااللى دوست الفرامل بمزاجى مش عارفين انها جت كده
ابيتديت تانى خطوة احد الاصدقاء ساب مشاغله وتفرع لى اسبوع يعلمنى كل حاجة
بس كان اهم عيب له انه مستعجل جدا عاوز يخلص
و انه مجنون سرعة وعاوز ان اللى اتعلمته منه انفذه بدون تدريب على الحركات مع نفسى لاتقانها
المهم اخر يومين طلعنا بالعربيه للعين السخنه انا سايق رايح جاى وطبعا على سرعة 100
طبعا مش حأحكى عن شعور الواحد ايه ما بين فرحة بالسواقه وخوف من السرعة العاليه اللى انا ماشى بيها يحصل اى حاجةوالواحد ميعرفش يسيطر على العربية
المهم عدى اختبار العين السخنة على خير وجه التنفيذعلى السواقة داخل البلد
وطلعنا بالعربية بالليل طريق النصروابتديت السواقه فيه براحة لكن صديقى قالى انت لو عاوز تروح شبرا بالسرعة دى فيها ساعتين
لا كده مينفعش زود السرعة
وكان بها زوت السرعة بس دماغى شلت عن التفكير واصبحت منفذ للاوامر فقط

حسيت بنفسى انى مبفكرش وعند العودة كان النقاش الحاد على السرعات انها عاليه وانا لسه يدوب بادئ سواقه وطبعا لو لوحدى وسقت بالسرعة دى كنت حعمل مشاكل اما صديقى رايه ثابت عند ان مصر(القاهرة) مينفعش فيها غير كده
والسرعة اللى انا عاوز امشى بيها تنفع للاقاليم
المهم صمم على ايه وقال انا اللى بعلم
اسمع كلامى وحتشوف
تانى يوم ابتديت مع نفسى فى حته فاضيه لمد ساعة وقلنا نخش على الزحمة وكان مع اول طلعة لطيق الصر لقيت واحد جاى شمال بسرعة حبيت افاديه دخلت فى الرصيف وسياج شجرى
والحمد لله ربنا سلم
خساير عجله فرقعت وترحيل العجله اليمين نص سم للخلف
طبعا قريفت منة ومن العربية وخليته يوصلنى البيت وشكرته جدا وطبعا استغنيت عن خدماته

دلوقتى عدت لمدرسة سواقه جنبى اتعلم من اول تانى
ساعة يوميا النهارده كان الحصة التالته

طبعا قبل المدرسة دخلت على الموضوع ده
وانتم لكم فضل كبير بعد ربنا سبحانه وتعالى فى العودة الى السواقه
وقررت امشى وحدة وحدة فى السواقة ولو حكرر الحصص لحد مأتقن السواقة بعدها اسوق براحتى

[Miss_Pharma]

ربنا معاكم ومعايا ..

[م. عصام مهنى]

السلام عليكم ورحمة الله وبركاته

نبدأ الحكايه وسلسلة اخفقاتى فى السواقة
اول ذى بدء كان الكلام عندما قررت شراء سيارة والسؤال عن انواع السيارات والواحد يشترى جديد والا مستعمل ابتديت ادى اهمية للموضوع وقررت الشراء ويكون جديد احسن من المستعملبس اول حاجه نطلع الرخصة لان دى اصعب حاجه فى الموضوع ووالسواقه بعد كده راح تكون سهله وبتيجى مع الوقت (( ده طبعا كلام كل اللى سئلتهم))
ذهبت لاحد مركز تعليم السواقة وكان برنامجهم 4 سعات نظرى و3 ساعات على عربية ثابته و3 ساعات سواقه فعليه
وكان التعليم على 28 ومشيت ساعة فى طريق احمد حلمى كويس وباقى الساعات تعليم على الاداره واختبار الاقماع علشان الرخصة
وكان خلصنا ورحت خدت الرخصة وطلعت موضوع الرخصة اسهل حاجة فى الموضوع كله
ورحت لشراء السيارة والحمد لله ربنا سهل واخترت العربية ورحت استلمها معى زوجتى وابنى
طبعا المعرض جاب العربية ركبت فيها وقلت اشوف اللى اتعلمته فى السواقه لقيت العربية غير ال28 خالص
طبعا الحجم اكبر والاوبشن مختلف واقل حاجه المسها العربية تجرى
معرفش ايه اللى حصل خفت من سواقتها واتصلت بقريب لى يجيلى علشان اوصل بيها البيت
طبعا الخوف كان مبرر وله الف سبب
اول الاسباب انى انا كل اللى اعرفة ازاى ادور واطلع لقدام وارجع للوراء
ومش هى دى السواقه
حتى السواقة اللى اتعلمتها كان فيه واحد هو اللى بيدى الاوامر ويفكرلى (اول غير للتانى هدئ سرع لف يمين لف شمال )
المهم جيت اول شارعنا وطلبت انا السواقه ((ميصحش ادخل بعربيتى شارعى وانا مش سايق)
قعدت مكان السائق ومع اول طلعة دخلت مطب ولسة بتعدل لقيت ميكروباص وتكتك عاملين سبق مع بعض وزنقوا عليا
قمت رامى شمال لقيت نفسى داخا فى تاكسى
قمت عادل الدركسيون لقين انى داخل فى عمود خرسانى
فرملت (( من عند ربنا اننى دوست على الفرامل ))
وقفت قبل العمود الخرسانى بنص متر
طبعاقريبى وزوجتى افتكروا اننى انااللى دوست الفرامل بمزاجى مش عارفين انها جت كده
ابيتديت تانى خطوة احد الاصدقاء ساب مشاغله وتفرع لى اسبوع يعلمنى كل حاجة
بس كان اهم عيب له انه مستعجل جدا عاوز يخلص
و انه مجنون سرعة وعاوز ان اللى اتعلمته منه انفذه بدون تدريب على الحركات مع نفسى لاتقانها
المهم اخر يومين طلعنا بالعربيه للعين السخنه انا سايق رايح جاى وطبعا على سرعة 100
طبعا مش حأحكى عن شعور الواحد ايه ما بين فرحة بالسواقه وخوف من السرعة العاليه اللى انا ماشى بيها يحصل اى حاجةوالواحد ميعرفش يسيطر على العربية
المهم عدى اختبار العين السخنة على خير وجه التنفيذعلى السواقة داخل البلد
وطلعنا بالعربية بالليل طريق النصروابتديت السواقه فيه براحة لكن صديقى قالى انت لو عاوز تروح شبرا بالسرعة دى فيها ساعتين
لا كده مينفعش زود السرعة
وكان بها زوت السرعة بس دماغى شلت عن التفكير واصبحت منفذ للاوامر فقط

حسيت بنفسى انى مبفكرش وعند العودة كان النقاش الحاد على السرعات انها عاليه وانا لسه يدوب بادئ سواقه وطبعا لو لوحدى وسقت بالسرعة دى كنت حعمل مشاكل اما صديقى رايه ثابت عند ان مصر(القاهرة) مينفعش فيها غير كده
والسرعة اللى انا عاوز امشى بيها تنفع للاقاليم
المهم صمم على ايه وقال انا اللى بعلم
اسمع كلامى وحتشوف
تانى يوم ابتديت مع نفسى فى حته فاضيه لمد ساعة وقلنا نخش على الزحمة وكان مع اول طلعة لطيق الصر لقيت واحد جاى شمال بسرعة حبيت افاديه دخلت فى الرصيف وسياج شجرى
والحمد لله ربنا سلم
خساير عجله فرقعت وترحيل العجله اليمين نص سم للخلف
طبعا قريفت منة ومن العربية وخليته يوصلنى البيت وشكرته جدا وطبعا استغنيت عن خدماته

دلوقتى عدت لمدرسة سواقه جنبى اتعلم من اول تانى
ساعة يوميا النهارده كان الحصة التالته

طبعا قبل المدرسة دخلت على الموضوع ده
وانتم لكم فضل كبير بعد ربنا سبحانه وتعالى فى العودة الى السواقه
وقررت امشى وحدة وحدة فى السواقة ولو حكرر الحصص لحد مأتقن السواقة بعدها اسوق براحتى

سوق لوحدك كتير فى اماكن فاضية يعنى ممكن تروح اكنوبر يوم جمعة كل اسبوع ولف اكتوبر كلها عند المناطق الصناعية هتاخذ ثقة وهتغلط وهتتعلم واهم حاجة شيل الخوف منك ، وسنة سنة انزل فى الزحمة وخد الحارة اليمين وامشى براحتك وميهمكش اللى ماشى وراك يقعد يضايقك او يستفزك اعمل كانك مش شايفة حتى لو عدى منك سيبه يعدى وإن شاء الله هتبقى زى الفل وماتستعجلش ومش كل حاجة حد هيعلمهالك لازم تغلط علشان تتعلم مش تتعقد وربنا معاك
اخوكم
م.عصام مهنى

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

وحشتونى جدا

الاسبوعين اللى فاتوا كنت مشغول جدا جدا ... تقدروا تقولوا حطام عظام ... اقصى حاجة كنت اعملها انى اشغل العربية 5 دقائق واطلع البيت انام عشان الحق الشغل

المهم خرجت اليوم وكان فيه بعض الملاحظات الهامة جدا جدا

انظرو الى الصورة التالية

فى الصورة انا بالسيارة الزرقاء ... والشارع واسع وجميل وسريع
وبرغم الآمان التام
لكن يحدث ما لا تتوقعه ابدا

السيارة الحمراء ... صاحبها مبتدأ زى حالاتى
مرة واحدة اعطى اشارة يمين
مافيش مشاكل لحد الآن

ولكنه قرر ينقل نفسه يمين بزاوية حادة جدا
برده مافيش مشاكل


المشكلة الحقيقية تتلخص فى التالى:

اولا برغم ان الشارع كان موش زحمة ... إلا إنه نقل نفسه فى منتهى البطء .. يعنى كان بطيء جدا جدا

ثانيا: بدأ يهدى سرعته جامد جدا جدا وفين ... فى الحارة الوسطى

ثالثا: هو كان عايز يدخل الملف القادم يمين .... لكن بدأ فى تهدئه سرعته بشكل جامد جدا جدا فى منتصف الطريق


طبعا يا جماعة ده للاسف كله غلط جامد

اولا: انا ماشى عادى وموش متوقع ابدا ان فيه حد ممكن موش يقف امامك ... ده تقريبا قاطع الطريق امامك بالعرض وماشى بطىء جدا

ثانيا: تضرب له كلاكس من بعيد من قريب بأى شكل ... لا يتحرك ماشى زى السحلفاة

ثالثا: هو لو كان نظر وراه فى المراية كان عرف ان فيه عربيات فى الحارة الوسطى قادمة بسرعة كبيرة وكان لازم ينقل نفسه اسرع شوية الى الحارة اليمنى

اهم حاجة واخطر حاجة
انه بدأ يهدى قبل الملف بمسافة كبيرة جدا جدا وفى منتصف الشارع

الخلاصة: ابدأ التهدئة الحقيقية عندما تنقل نفسك الى الحارة اليمنى
والمفروض تبدأ تهدى قبل الملف بمسافة معقولة ... يعنى موش قبل الملف بمسافة كبيرة ابدأ اهدى العربية ... واعرض نفسى للخطر ... لأن فيه عربيات سريعة جدا قادمة من الخلف

المهم ربنا ستر ... وضغط على الفرامل ... وعشان كان فيه مسافة معقولة بينى وبينه ... ضغط على الفرامل بشكل معقول وفى نفس الوقت ما غيرتش نفسى الى حارة اخرى خوفا من القادمين من الخلف


يا جماعة موش معنى انى اعطيت اشارة ان كل شىء اصبح تمام

لازم افهم موضوع نقل نفسى من حارة الى حارة
امتى انقل نفسى
امتى اهدى العربية
امتى استخدم الإشارات
ونقل العربية يكون بزاوية موش حادة ... يعنى موش معقول اقطع ثلاث حارات بالعربية عشان انقل نفسى الى الحارة اليمين ... الصح انى انقل نفسى تدريجى واكون شبه موازى للحارة اللى انا هانقل نفسى فيها

لا قدر الله لو فيه عربية كانت مسرعة من الخلف وكانت فراملها خفيفة شوية ... وفوجىء بالسيارة الحمراء تهدى جامد فى منتصف الشارع وفى نفس الوقت قاطعة عليه الطريق بالشكل ده ... النتيجة هاتكون موش كويسة


وكمان افتكرت .. هههههههه اوعى تعتمد على الكلاكس انه هايغير حاجة ... الصح انك تضغط فرامل مباشرة وتهدى سرعتك ولا تعتمد على أن السيارة التى فى الامام صاحبها سوف يستجيب للكلاكس
ممكن يكون عنده مشكلة مثلا العربية بتقطع منه
وانت تفضل تضرب فى كلاكس ههههههههههههه لحد ما تقترب منه بشكل خطير .. ومرة واحدة تفتكر ان تحت رجليك فيه حاجة اسمها "فرامل" ههههههههههههههههه
الافضل طبعا .. حافظ على المسافة بينك وبينه ... وتهدى عربيتك تدريجى مباشرة ثم استخدم الكلاكس بعد ذلك براحتك


وربنا يحفظ الجميع

فى انتظار التواصل

مع اطيب التمنيات
اخوكم حسين غزالة

[husseinoo]

السلام عليكم ورحمة الله وبركاته
اللهم صل على محمد وعلى آله وصحبه أجمعين

اليوم خرجت بالسيارة لكن فى طريق سريع ... طريق الاسماعيلية ... مشيت لحد سوق العبور ... اشتريت بطيخة .. وطلعت موش ولا بد هههههههههه

المهم انا اليوم "صممت" انى اسير فى الحارة الوسطى

برغم انى الطريق سريع ... لكنى لاول مرة اصممم على السير فى الحارة الوسطى
وبصراحة السير فى الحارة الوسطى عشرة على عشرة

مافيش اى مشاكل والحمد لله

ولا تلاقى يوتيرن تعمل له حساب بشكل جامد
ولا عربيات واقفة وبتحمل ركاب على اليمين

انت فى المنتصف واللى عايز يجرى يتفضل يجرى على اليمين او الشمال مافيش مشاكل

المشكلة الحقيقية
ان فيه عربيات بتجرى وراك اكثر من 100 كيلوا فى الساعة وعايزين "يمروا" من اليمين والشمال فى نفس الوقت

طبعا فى الحالة دى لازم تكون اعصابك قوية ... وتركز امامك ... واوعى العربية تحدف منك يمين او شمال

طبعا لما كنت انظر فى المراية الوسطى ... ههههههههه شاهدت خلفى سيارة نقل تقيل ... طبعا ده وسعت له الطريق ... لكن بحذر
يعنى ايه
يعنى وسعت يمين شوية صغيرة ... لحد ما صاحبنا مر من اليمين بسلام ... وانا رجعت على طول فى الحارة الوسطى ... يعنى انا لم اترك الحارة الوسطى بالكامل ... تنازلت عن جزء منها عشان العربية النقل تمر بسلام بعيد عنى.

ومرة تانية شاهدت اوتوبس سياحى قادم من الخلف بسرعة جامدة جدا
تعاملت معاها بنفس المنطق

اما بالنسبة للعربيات الملاكى ... مادام الشارع واسع ... مافيش مشاكل .. ما بتحركش من مكانى وهما بيمروا بسلام


افتكرت موقف مهم قوى قوى
انظر الى الصورة



فى الصورة انا ماشى بالعربية الزرقاء
قادم من الخلف العربية الحمراء كان نوعها "ريتمو"
صاحب السيارة الزرقاء عايز يعيش فى دور انه بيجرى وبيعدى والكلام الجميل ده
المهم موش عيب ان عربيتى تكون كتر خيرها على اد الحال
المشكلة انك عايز تعدى من العربية التى امامك لكن بنفس سرعة العربية التى امامك


النتيجة
ان العربية الزرقاء ... شعرت انه هايفضل ماشى بجوارى مسافة طويلة الى ما شاء الله
وعمل سعادته "بلوك" بجوارى
طبعا بالطريقة دى العربيات اللى فى الخلف موش هاتعدى خالص بسبب حضرته "قافل" الحارة اليسرى

واحنا سبق واتفقنا على ان الحارة اليسرى معمولة للتخطى فقط
يعنى "تعدى" من العربية اللى امامك
وتعود مرة تانية الى الحارة الوسطى
لان فيه عربيات اسرع منك تريد المرور



طيب انت موش قادر تعدى من العربية التى امامك وماشى فى نفس سرعتها
طيب ليه من اساسه تفضل ماشى بجوارها

سبق واتفقنا على ان من اساسيات القيادة الدفاعية .. انك تبتعد عن الحصار
هههههههه يعنى موش كويس انى افضل ماشى مدة طويلة وصاحبنا لازق بجوارى بالشكل ده
لازم احاول ان امشى بعيد عن الحصار عشان لو لا قدر الله حصل اى حاجة ممكن اتحرك يمين او شمال يعنى اعرف اتصرف

نظرت فى المراية التى فى الخلف
وجدت فعلا فيه عربيات عايزة تمر
وصاحبنا ولا على باله

قررت انى اهدى سرعتى انا شوية
وبالطريقة دى فعلا فتحت "البلوك" اللى صاحبنا عمله بجوارى
والعربيات التى فى الخلف مرت بسلام

الخلاصة: اوعى تعمل "بلوك" فى الحارة السريعة او فى اى مكان بجوار سيارة اخرى
اوعى تمشى بجوارها بنفس السرعة
عايز تمر ... لازم تكون سرعتك اعلى ... وتمر بسرعة وفى وقت قصير ... ثم تعود الى الحارة الوسطى .. وتهدى سرعتك مرة تانية الى المعدل المطلوب


ملحوظة: فيه ناس كثيير للاسف فاهمة ان الحارة اليسرى معمولة عشان تفضل ماشى فيها بسرعة ... طيب لو فيه حد اسرع منك هاتعمل ايه



فى انتظار التواصل
مع اطيب التمنيات
اخوكم حسين غزالة

[mtito45]

السلام عليكم ورحمة الله وبركاتة
والله الواحد مش عارف يقول ايه لكل الناس المحترمة اللي بتشارك في الموضوع العظيم دة
بارك الله فيكم
وجزاكم كل خير

[Amro_ON]

فعلا الحارة الوسطى راحت بال بس عاوزة الواحد يجمد قلبة ويركز..... انا بقالي ثلات اسابيع بتعلم على عربيتي و مسقتش قبل كدة المهم طلعت الاسبوع الي فات على طريق مصر اسكندرية الزراعي لاول مرة وقلت اجمد قلبي عشان السواقة عاوزة قلب جامد بس .... المهم عملت فيها نبيه وخليت الميعاد ليوم الجمعة الصبح

صحيت الصبح صليت الفجر و توكلت على الله .... وانا ماشي قلت في نفسي ان همشي في الحارة الوسطى في الطرية الزراعي وان شاء الله كلة هيبأ تمام خصوصا ان خارج يوم الجمعة و الفجر كمان.

خلصت الطريق لحد الزراعي و كلة تمام تقريبا مفيش عربيات ماشية.... انا من بنها... أول ما دخلت وصلة الزراعي و جيت اعمل فيها شمشون ومشي في النص لقيت الطريق مش فاضي خالص زي ما كنت فاكر .... اتفاجئت وترعبت .... يدوب مشيت فى الحارة الوسطى ربع دقيقه لقيت وريا تريلا محترمة جية بسرعة رحت رامي شمال من غير مبص في المريا بس اديت اشارة (فالح انا )

الحمد لله جت سليمة .... بصيت لقيت الطريق كلة ترلات .. فيما بعد عرفت قرار الداخلية بنقل مسار النقل من الصحراوي للزراعي ايام الخميس و الجمعة و السبت (حسبي الله ونعم الوكيل) ... طبعا مسكت شمالي طول الطريق ....طبعا هتقلولي دة غلط.. هقولكم ان معظم الترلات كانت بتمسك شمال وبتمشي على 60 ودي بضبط سرعتي. الطريق كان رعب بحقيقي و لو حظك وحش زي و ديقت حد من النقل تلاقي فتح عليك الزمارة الفظيعة بتعته و تنيين بيضمنوا معاه ... ألقيه عاوزني اوسعلة ومشي في نص الطريق الي النقل ماشي فيه على 120 على الاقل .... تننشطه ... زمر بقوة ... رحت عملت فيها فالح تاني وشغلتله انتظار عشان الحارة الوسطى تفضى ... هي صحيح كانت فضية شوية بس بالنسبالي متعتبرش فاضية .... فيما بعد عرفت ان كدة كأن بشتمة او برخم علية مع ان والله كان قصدي مش كدة خالص ... المهم عمل شوية حركات مش ظريفة يعني ورحت رامي يمين ... وختش بالي ان سرعتي 60 وطبعا لقيت مكروباص جاي ورايا كابس فرحت كابس انا كمان ... الكارثة ان عربيتي اتوماتيك و مجمعتش بسرعة زي المانيوال ... وبتاع الترلا مسدق لهف مكاني الي على الشمال ....ومشحلق انقل يمين.... بتاع الميكروباص كان هيلبس فيا لولا ستر ربنا ... كالعادة فيما بعد عرفت ان في حاجة اسمها كيك دوان بتسعف بتوع الاوتوماتيك في المواقف الي زي دي ... المهم عديت مابين ترلتين و مسكت شمالي طول الطريق وزوت لحد 80

معلش صدعتكم بس بجد انا شايف ان الحارة الوسطى متنفعش للمبتدئيين زي حلاتي خالص

[husseinoo]

بسم الله الرحمن الرحيم
السلام عليكم ورحمة الله وبركاته

فعلا الحارة الوسطى راحت بال بس عاوزة الواحد يجمد قلبة ويركز.....

كده انت اختصرت الكلام بشكل ممتاز أن الحارة الوسطى احسن حاجة وعايزة قلب جامد شوية

انا بقالي ثلات اسابيع بتعلم على عربيتي و مسقتش قبل كدة المهم طلعت الاسبوع الي فات على طريق مصر اسكندرية الزراعي لاول مرة وقلت اجمد قلبي عشان السواقة عاوزة قلب جامد بس ....

يا راجل يا طيب بقالك 3 اسابيع بتتعلم وخرجت بالعربية على الطريق السريع ده انت قلبك ماشاء الله ولا حول ولا قوة إلا بالله حديد ....
طبعا انا كنت افضل ان الخروج الى الطريق السريع يكون فى مرحلة متأخرة جدا ... لان الطريق السريع مشاكله قليلة لكن خطيرة وربنا يحفظ الجميع

المهم عملت فيها نبيه وخليت الميعاد ليوم الجمعة الصبح
طبعا يوم مناسب للتدريب ... لكن اعتقد ان فيه ناس كثيير تفضل السفر يوم الجمعة على الطريق السريع والله اعلم أنا عن نفسى حتى الآن معظم خروجى يوم الجمعة فقط.


صحيت الصبح صليت الفجر و توكلت على الله ....

عشرة على عشرة ربنا يبارك لك

وانا ماشي قلت في نفسي انا همشي في الحارة الوسطى في الطرية الزراعي وان شاء الله كلة هيبأ تمام خصوصا ان خارج يوم الجمعة و الفجر كمان.

ده كلام سليم

خلصت الطريق لحد الزراعي و كلة تمام تقريبا مفيش عربيات ماشية.... انا من بنها... أول ما دخلت وصلة الزراعي و جيت اعمل فيها شمشون ومشي في النص لقيت الطريق مش فاضي خالص زي ما كنت فاكر .... اتفاجئت وترعبت .... يدوب مشيت فى الحارة الوسطى ربع دقيقه لقيت وريا تريلا محترمة جية بسرعة رحت رامي شمال من غير مبص في المريا بس اديت اشارة (فالح انا )

ما دام حضرتك لاحظت ان فيه شوية خوف ... مافيش اى مشاكل .. كل المطلوب ترجع تواصل تدريبك فى مناطق اقل ازدحاما وتصبر شوية مافيش داعى للاستعجال ...
ولو حصل اى حاجة لاقدر الله سببت لك بعض الضيق او "الخوف" ممكن ترجع لفترة محدود الى مقعد الراكب ... يعنى تبطل تركب العربية لحد ما اعصابك تهدى شوية وتنسى المشكلة والموضوع ده ... وترجع تواصل تدريبك عادى خالص بدون مشاكل إن شاء الله


الحمد لله جت سليمة .... بصيت لقيت الطريق كلة ترلات .. فيما بعد عرفت قرار الداخلية بنقل مسار النقل من الصحراوي للزراعي ايام الخميس و الجمعة و السبت (حسبي الله ونعم الوكيل) ...

مشكلة طبعا موش ظريفة .. موش معقولة امشى فى طريق كله عربيات نقل عملية عايزة قلب جامد وموش سهلة

طبعا مسكت شمالي طول الطريق ....طبعا هتقلولي دة غلط.. هقولكم ان معظم الترلات كانت بتمسك شمال وبتمشي على 60 ودي بضبط سرعتي.

طبعا العربيات النقل بتعتمد على تعليمات المرور ... مادام قررتم انهم يمشوا ثلاث ايام فى الاسبوع على الطريق الزراعى ... خلاص يمشى زى ما هو عايز وبأى سرعة
وعلى العموم .. هما سائقين درجة اولى .. وفاهمين كويس وممكن يكونوا عارفين الطريق كويس جدا ... يعنى عارف التقاطعات موجودة فين وعارف اليوتيرن موجود فين .. حتى المطبات الصناعى حافظ مكانها ... عشان كده ماشى على الشمال وهو مطمئن ... لكن موش فاكر هل فيه "يافطة" مرور مكتوب فيها ان اقصى سرعة هى 60 كيلوا ولا العربية النقل ماشية على مزاجها فى الشمال ... ولا هو كان مسير عشان فيه عربيات زحمة امامه .. اعتقد ان اقصى سرعة للنقل فى حدود 70 كيلوا تقريبا والله اعلم


الطريق كان رعب بحقيقي و لو حظك وحش زي و ديقت حد من النقل تلاقي فتح عليك الزمارة الفظيعة بتعته و تنيين بيضمنوا معاه ... ألقيه عاوزني اوسعلة ومشي في نص الطريق الي النقل ماشي فيه على 120 على الاقل .... تننشطه ... زمر بقوة ...

ما هو زمر لك لأنك موش شايفه فى المرايه ... او لاحظت انه ماشى وراك متأخر ... او شايف انك ماشى امامه وموش بتحاول توسع له شوية .. او عايز يعدى منك وعارف انك مبتدىء وخايف يقرب منك

رحت عملت فيها فالح تاني وشغلتله انتظار عشان الحارة الوسطى تفضى ...

اعتقد ان الانتظار معناه انك سوف تتوقف فى اى وقت بسبب اى مشكلة امامك ... مثلا وجود ازدحام متوقع ... ومتوقع ان العربيات سوف تتوقف فيه ... او انك سوف تتوقف على جانب الطريق ... او حتى توقفت على جانب الطريق فى الحالة دى تشغل الانتظار عشان القادم من الخلف يشوفك كويس خصوصا بالليل

هي صحيح كانت فضية شوية بس بالنسبالي متعتبرش فاضية .... فيما بعد عرفت ان كدة كأن بشتمة او برخم علية

ده كلام سليم

مع ان والله كان قصدي مش كدة خالص ...

حصل خير ههههههههه

المهم عمل شوية حركات مش ظريفة يعني ورحت رامي يمين ...

اهم حاجة واخطر حاجة فى موضوع السواقة ده ... هو الانتقال الى حارة اخرى ... عارف انت لو ماشى على طول بدون اى تغيير للحارة مافيش اى مشاكل ... لكن لو حبيت تنقل نفسك الى حارة تانية ... لازم تنظر فى المراية كويس جدا .. وتنظر فوق كتفك عشان تكشف المنطقة العمياء ... ولما تتأكد ان كل شىء تمام .. اعطى اشارة وانقل نفسك فى أمان .. على العموم النقطة دى من اهم النقاط للمبتدئين وهى تشكل معظم مشاكلهم فى القيادة

وختش بالي ان سرعتي 60 وطبعا لقيت مكروباص جاي ورايا كابس فرحت كابس انا كمان ...

ده كلام موش سليم ... انت شايف انه كابس وراك ... ببساطة خليه يعدى منك .. ايه المشكلة فى كده ... ده سائق متهور او جرىء او مستعجل او وراه اى مشكلة ... انت ببساطة وسع له شوية وخلاص وبدون اى مشاكل .. يعنى انت ماشى 60 او 70 كويس قوى عشان تكبس العربية وتجرى انت كمان هاتوصل سرعة العربية الى 100 او اكثر ... ودى سرعة طبعا خطر على المبتدىء جدا

الكارثة ان عربيتي اتوماتيك و مجمعتش بسرعة زي المانيوال ... وبتاع الترلا مسدق لهف مكاني الي على الشمال ....ومشحلق انقل يمين.... بتاع الميكروباص كان هيلبس فيا لولا ستر ربنا ... كالعادة فيما بعد عرفت ان في حاجة اسمها كيك دوان بتسعف بتوع الاوتوماتيك في المواقف الي زي دي ... المهم عديت مابين ترلتين

أنا آسف جدا ... وده موقف خطر جدا ... يعنى موش مطلوب من حضرتك انك تحاصر نفسك بين العربيات .. او بالبلدى كده اوعى "تحشر " نفسك بين العربيات ... وكمان عربيات نقل ... كده موش تمام


و مسكت شمالي طول الطريق وزوت لحد 80

معلش صدعتكم بس بجد انا شايف ان الحارة الوسطى متنفعش للمبتدئيين زي حلاتي خالص


اخى الحبيب
المشى فى الشمال يكون للتخطى فقط ... يعنى لو عايز تعدى من السيارة التى امامك استخدم الحارة اليسرى

المشى فى الحارة اليسرى على طول بدون تغيير خطر وهاشرح لحضرتك ليه:

انت مثلا ماشى فى الشمال وكل شىء تمام التمام ... ومافيش عربيات بتعدى الا من على يمينك ... لو حصل لا قدر الله وفيه اى عربية عملت معاك اى حركة من على يمينك هاتعمل ايه؟
اكيد هاتبعد عنها ناحية اليسار
طيب هاتروح فين ؟
مافيش غير انك هاتطلع على الرصيف "لا قدر الله"
او لو كنت ماشى بسرعة جامدة يبقى فى الحالة دى هاتروح للطريق المعاكس على طول "ربنا يحفظ الجميع"

اما لو انت كنت ماشى فى الحارة الوسطى ... وعربية حدفت عليك من اليمين فى الحالة دى فيه فرصة تبعد عنه فى الحارة اليسرى

ولو ظهرت عربية فى الحارة اليسرى "حدفت" عليك .. فى الحالة دى فيه فرصة تبعد عنه فى الحارة اليمنى

يعنى الخلاصة : لو انت ماشى فى الحارة اليسرى ومادام انت موش محاصر من اليمين او الشمال بعربيات او رصيف ... يبقى عندك فرصتين للهروب من اى مشكلة

اما لو انت ماشى فى الشمال يبقى عندك فرصة واحدة للهروب من اى مشكلة وهى انك تروح يمين

ولو انت ماشى فى اليمين فقط يبقى عندك فرصة واحدة للهروب من اى مشكلة وهى انك تروح شمال


مرة احد الاصدقاء كان راكب عربية فولكس "خنفساء" هههههههه وكنا مسافرين اسكندرية وعلى طريق بنها وهو كان جديد فى موضوع السواقة وكان ماشى على الشمال وبيجرى
لان الشمال بيجبرك انك لازم تجرى غصب عنك

احنا ماشيين وراه بعربية "لادا" وهو ماشى على الشمال ...
مرة واحده ظهر له "بلاطة" من الرصيف مرمية على جانب الطريق من الناحية الشمال ... طبعا صاحبنا مشى على البلاطة وكانت العربية لا قدر الله "هاتنقلب" على جنبها ... زى اللى ماشى وبيجرى وفيه واحد "شنكله" ... ربنا ستر

القلب الجامد مطلوب فى القيادة
لكن الفهم وعدم الاستعجال والتدريب الجيد هما اهم حاجة للسائق المبتدىء

معلهش
مافيش داعى للاستعجال
واتمنى من حضرتك تكون قرأت المشاركات المكتوبة كلها
وانا عن نفسى سعيد جدا بالتجربة اللى حضرتك كتبتها لنا عشان نتعلم منها كلنا
حضرتك اثرت موضوع مهم جدا وتجربة مهمة جدا جدا

يا ريت كل الاعضاء يكتبوا لنا تجاربهم عشان نتعلم كلنا

اشكر حضرتك جدا جدا جدا
والف مليون سلامة

فى انتظار التواصل
مع اطيب التمنيات
اخوكم حسين غزالة

[abeeron]

سلام عليكم
الله ينور عليك يا ا.حسين
ويحفظنا جميعا خاصة الاخوة الجدد المبتدئين...وانا منهم جدا برضو!
بالمناسبة انا كمان رحت العبور الجمعة صباحا ورجعت صباح السبت ودي اكبر مشاوير عملتها وتمت فقط بستر ربنا لان للاسف العربية بتقطع مني كتير (مش عارفة دا غلط ع العربية ولا لا واتلافاه ازاي) وكمان اللي حواليا بيجبروني اسرع وفجاة تيجي مناطق اختناق زي عند موقف العاشر والعرب والمزلقان وغيرها والغيارات لا تتم معي بسلاسة
بخصوص موضوع الحارات..انا باحاول التزم بالوسطى فعلا عشان اسلم من اليمين واللي داخلين فيها ومن الشمال واللي خارجين منها ل"يو تيرن" ...بس احيان كثير بيضطروني للتغيير لما تقف لوقت طويل
الظريف بقى اني كنت راجعة من شغلي ف شارع صغير لا يتسع سوى لعربيتين جنب بعض..وقدامي عربية "كارو" ..بس بحصان!! ويبدو انه لهذا السبب كان مصر يمشي في نص الشارع وامشي وراه على خطوة الحصان اللي وااااخد راحته وبيتمخطر ويمين كان افضى من شمال انما لا يكفي عربيتي متناهية الصغر...فاديته كلاكس عشان يوسع لي حتة كمان يمين فعداني وهو بيقول تعليق كدا اللي فهمته منه انه متعرض عشان تخطيته من ناحية اليمين!!!...بس والله حضرته ماكانش سامح م الشمال..بس هي حكاية التخطي دي تسري مع ال"كارو"؟؟؟؟

[aaaa77]

السلام عليكم
انا برضوا جديد في عالم السواقه بس انا قلت اتعلم صح الاول رحت مركز تعليم بصراحه فدني كتير نظري وشويه عملي وتوكلت علي الله واشتريت سياره زيرو 010 2 اول اسبوع كنت مرعوب جدا لدرجه اني كنت خايف اسوقها واول يوم اروح بيها شغلي في العبور وطبعا طريق سريع مينفعش واحد لسه مبتدئ يمشي فيه بس قلت احاول هما يعني اللي بيسوقوا دول احسن من الواحد في ايه توكلت علي الله وسوقتها اول اسبوعين كنت بسمع تريقه من ناس وناس مضايقه مني والسياره كانت بتبطل مني كتير واصريت اني اتعلم واحاول مره ومره لغايه الحمد لله بقالي شهرين دلوقتي علي الطريق السريع بروح واجي يوميا واتعلمت كتير ولما بتيجي فرصه اني اجري بجري او اتخطي اي سياره وقلت الحمد لله كل حاجه في اولها صعب بس واحده واحده نتعلم واهم شي توكل علي الله وبحاول اطبق اللي درسته في النظري من اشارات ودوران وتخطي وخطوط فدني كتير فعلا والحمد لله ماشي الحال

[sara2001]

سلام عليكم
الله ينور عليك يا ا.حسين
ويحفظنا جميعا خاصة الاخوة الجدد المبتدئين...وانا منهم جدا برضو!
بالمناسبة انا كمان رحت العبور الجمعة صباحا ورجعت صباح السبت ودي اكبر مشاوير عملتها وتمت فقط بستر ربنا لان للاسف العربية بتقطع مني كتير (مش عارفة دا غلط ع العربية ولا لا واتلافاه ازاي) وكمان اللي حواليا بيجبروني اسرع وفجاة تيجي مناطق اختناق زي عند موقف العاشر والعرب والمزلقان وغيرها والغيارات لا تتم معي بسلاسة
بخصوص موضوع الحارات..انا باحاول التزم بالوسطى فعلا عشان اسلم من اليمين واللي داخلين فيها ومن الشمال واللي خارجين منها ل"يو تيرن" ...بس احيان كثير بيضطروني للتغيير لما تقف لوقت طويل
الظريف بقى اني كنت راجعة من شغلي ف شارع صغير لا يتسع سوى لعربيتين جنب بعض..وقدامي عربية "كارو" ..بس بحصان!! ويبدو انه لهذا السبب كان مصر يمشي في نص الشارع وامشي وراه على خطوة الحصان اللي وااااخد راحته وبيتمخطر ويمين كان افضى من شمال انما لا يكفي عربيتي متناهية الصغر...فاديته كلاكس عشان يوسع لي حتة كمان يمين فعداني وهو بيقول تعليق كدا اللي فهمته منه انه متعرض عشان تخطيته من ناحية اليمين!!!...بس والله حضرته ماكانش سامح م الشمال..بس هي حكاية التخطي دي تسري مع ال"كارو"؟؟؟؟

ههههههههههه
فكرتيني بنفسي وانا ماشيه ورا الحنطور على كوبري قصر النيل ومفيش حد عايز يستنى علشان اعدي منه
المشكله ان الحنطور او العربيه الكارو اللي سايقها ما بيعرفش يتحكم فيها كويس وبتلاقيه فجأه حدف عليكي لو فكرتي تعدي
انا بخاف من رد فعله لو اديتله كلاكس جامد

[abeeron]

لا والله يا سارة كان كلاكس صغير ..على استحياء كدا لاني باعتبر كل اللي سايقين على حق وانا اللي غلطانة لحد ما اتعلم كويس
وكمان كان الشارع صغير ..لسا ماوصلتش لوسط البلد وقصر النيل..ربنا يحفظك ويحفظنا جميعا ويخلي الناس كدا عندها صبر وذوق وايثار في السواقة...ربنا قادر على كل شيء
واظن فعلا المفروض الكلاكس عموما يكون صغير عشان الناس اللي بتتلكك وعموما عشان تقليل الازعاج..اللي كان بيعلمني قال لي عند اي تقاطع ادي كلاكسين صغيرين عشان ماحدش يخرج باندفاع ..بس برضو ولا بيهمهم!
ربنا يحفظك ويحفظنا جميعا ونتطور كدا في القيادة ..ويخلي الناس كدا عندها صبر وذوق وايثار في السواقة...ربنا قادر على كل شيء
رايك ايه يا ا. حسين..حضرتك لم تعلق.. لعل المانع خير باذن الله

[powersha]

احلى فتره هى فتره الاولى فى السواقه
انا فى البدايه رحت مدرسه السواقه تبع امرور علشان اطلع رخصه وطبعا طلعت بعرفش حاجه
بدائت وحده وحده اطلع بعربيه اخويا قدام ورا حبه حبه
وبدات اخرج بيها اول مره انا واخويا الف بيها اتمكن اكتر
مشيت فى شارع قعت الف فيه اخد يوترن وارجع الف تانى وهكزا
ولقيت الحياه حلوه (بيخوفونا بقى ليه)
فى الاخر كنت ماشى فى شارع عكس فجاه قلى حود شمال وانا كنت ماشى بسرعه
حوت بنقس السرعه وازا بعربيه فى وشى عملت فيها شومخر وكسرت الدركسيون بسرعه لبست فى كشك على اليمين
وبعدها قررت مركبش العربيه تانى

وبعد زمن حوالى سنه جبت 127 وما ادراك 127
جبتها فى رمضان قلت الواجد كل يوم بعد الفجر ينزل فى الروقان يمشى بيها شويه
اول يوم بعد الفجر رحت الدور العربيه مش رضيه احيله برده
مبدهاش الناس سهرانه زقه يرجاله ونزق نزق نزق سواق تكسى طبعا الى كان بيقومها
العربيه شرقانه
طب يرجاله زقه لحد المكانيكى حططها ادام الورشه ومشيت
روحت البيت بعد ساعه
ايه الاخبار سوقت (لا زقيت)
قعت على الموضوع ه اسبوع علشان ادور العربيه بس وكل يوم طبعا بركنها عند مكانيكى شكل (وكله زق)
الحمد لله عرفت هى مبدورش ليه وبدات اتعلم فى الميكانيكا بتعتها من الميكانيكا ابص بيعمل ايه الكلام ده
وبدات اخرج بيها اول مشوار كان عندى احساس بواحد بيعدى الطريق على الدائرى
بلف حولين نفسى لما بدات امشى فى الزحمه
فضلت على الكلام ده كام يوم وفى فتره صغيره قبل ميخلص رمضان
بقيت بكسر على المكروباظات
وههى بقلها معايه اقل ن سنه فى الفتره ده متخبطتش منى غير مرتين (فنوس و تريحه على الباب الى ورا )


من التجربه اهم حاجه تكون عارف عربيتك كويس وتتعود عليها وتعرف ابعادك وتحاول تمشى امورك فى الميكانيكا
وقلب جامد ميهموش

[husseinoo]

السلام عليكم

وعليكم السلام ورحمة الله وبركاته

الله ينور عليك يا ا.حسين

الله يكرمك ويبارك فى حضرتك

ويحفظنا جميعا خاصة الاخوة الجدد المبتدئين...وانا منهم جدا برضو!

اللهم آمين

بالمناسبة انا كمان رحت العبور الجمعة صباحا ورجعت صباح السبت ودي اكبر مشاوير عملتها وتمت فقط بستر ربنا لان للاسف العربية بتقطع مني كتير (مش عارفة دا غلط ع العربية ولا لا واتلافاه ازاي)

أهم اسباب تقطيع العربية هى طقم الكهرباء .. وهو عبارة عن البوجيهات والابلاتين والكوندنسر ... والثلاثة ثمنهم تقريبا فى حدود 50 جنيه والافضل تركيب بوجيهات ثلاثة شمعة ودى ثمنها حوالى 65 جنيه يعنى مع الابلاتين والكوندنسر يبقى تقريبا 85 جنيه ومع التركيب تبقى العربية محتاجة 100 جنيه وكل شىء يكون تمام ... يفضل تغيير فلتر البنزين وفلتر الزيت

وكمان اللي حواليا بيجبروني اسرع وفجاة تيجي مناطق اختناق زي عند موقف العاشر والعرب والمزلقان وغيرها

لو حضرتك تركت لهم الحارة الشمال فاضية ... فى الحالة دى مايهمكيش من اى حد ... يعنى انا مثلا كان ورايا عربية نص نقل وبيضرب لى كلاكس ... فى نفس الوقت انا تركت الحارة الشمال عشان اللى عايز يعدى ... فى الحالة دى كبرت دماغى .. وبعد ثوانى صاحب العربية النصف نقل شغل دماغه شوية وقرر يستخدم الحارة الشمال اللى انا تركتها ومر فى سلام ... احيانا اللى وراكى بيكون كسلان شوية انه يستخدم الحارة الشمال ويفضل يضرب كلاكس للعربيات اللى امامه عايزها توسع له وخلاص

والغيارات لا تتم معي بسلاسة

اضغطى على الدبرياج بالكامل على الآخر ... وفى بعض الحالات يتم الضغط على الدبرياج اكثر من مرة قبل نقل الفتيس ... ويفضل الكشف على زيت الفتيس يمكن يكون ناقص ... وممكن يكون حضرتك بتختارى غيار غير مناسب للسرعة ... يعنى انا مثلا احيانا اختار الغيار التانى واشعر ان العربية لا تستجيب لكن عندما اختار الغيار الثالث يتم النقل بسهولة ويسر ... عملية اختيار الغيار المناسب لسرعة العربية مهمة جدا ... ومافيش داعى لاستخدام القوة .. يعنى براحة عشان ما يحصلش حاجة فى الفتيس لا قدر الله

بخصوص موضوع الحارات..انا باحاول التزم بالوسطى فعلا عشان اسلم من اليمين واللي داخلين فيها ومن الشمال واللي خارجين منها ل"يو تيرن" ...

عشرة على عشرة واكثر من ممتاز

بس احيان كثير بيضطروني للتغيير لما تقف لوقت طويل

تغيير الحارات بكثرة لن يوفر اى وقت ... يعنى بعد التعب والمخاطرة موش هايوفر معاك اى مسافة او وقت ... ما دام انت موش قافلة على حد وموسعة الطريق خلاص خليك خلف السيارة التى امامك وحافظى على المسافة وخلاص

الظريف بقى اني كنت راجعة من شغلي ف شارع صغير لا يتسع سوى لعربيتين جنب بعض..وقدامي عربية "كارو" ..بس بحصان!! ويبدو انه لهذا السبب كان مصر يمشي في نص الشارع وامشي وراه على خطوة الحصان اللي وااااخد راحته وبيتمخطر ويمين كان افضى من شمال انما لا يكفي عربيتي متناهية الصغر...فاديته كلاكس عشان يوسع لي حتة كمان يمين فعداني وهو بيقول تعليق كدا اللي فهمته منه انه متعرض عشان تخطيته من ناحية اليمين!!!...بس والله حضرته ماكانش سامح م الشمال..بس هي حكاية التخطي دي تسري مع ال"كارو"؟؟؟؟

هههههههههههه
عسل والله
حسب ظروف "الحصان"
هههههههههه

السلام عليكم

وعليكم السلام ورحمة الله وبركاته

انا برضوا جديد في عالم السواقه بس انا قلت اتعلم صح الاول رحت مركز تعليم بصراحه فدني كتير نظري وشويه عملي وتوكلت علي الله واشتريت سياره زيرو 010 2 اول اسبوع كنت مرعوب جدا لدرجه اني كنت خايف اسوقها

ده شىء طبيعى جدا
خصوصا ان تعبك وشقاك فى عربية على اربع عجلات لازم تكون خايف عليها جدا


واول يوم اروح بيها شغلي في العبور وطبعا طريق سريع مينفعش واحد لسه مبتدئ يمشي فيه بس قلت احاول هما يعني اللي بيسوقوا دول احسن من الواحد في ايه توكلت علي الله وسوقتها اول اسبوعين كنت بسمع تريقه من ناس وناس مضايقه مني

معلهش ... دى قلة أدب موش أكثر .. المفروض الناس تكون عندها شوية صبر خصوصا مع المبتدأين خصوصا لو كانوا موش بيعملوا اى حاجة خطر .. يعنى لو ماشى بطىء مافيش مشاكل انى استحمله عادى خالص ... المهم انه ما يحدفش يمين او شمال عمال على بطال ده هو اللى خطر


والسياره كانت بتبطل مني كتير واصريت اني اتعلم واحاول مره ومره لغايه الحمد لله بقالي شهرين دلوقتي علي الطريق السريع بروح واجي يوميا واتعلمت كتير ولما بتيجي فرصه اني اجري بجري او اتخطي اي سياره وقلت الحمد لله كل حاجه في اولها صعب بس واحده واحده نتعلم

ده كلام سليم ولو انى كنت افضل المشى على الطريق السريع يكون فى مرحلة متأخرة ... لان مشاكل الطريق السريع قليلة لكن خطيرة

واهم شي توكل علي الله

ونعم بالله
لكن الواحد لازم ياخد بالاسباب الاول
يعنى التدريب ثم التدريب
والفهم الصحيح هو اللى بيقلل الخوف


وبحاول اطبق اللي درسته في النظري من اشارات ودوران وتخطي وخطوط فدني كتير فعلا والحمد لله ماشي الحال

الحمد لله رب العالمين
وفى انتظار الاستماع الى تجاربك للاستفادة منها
شكرا لحضرتك جدا

لا والله يا سارة كان كلاكس صغير ..على استحياء كدا لاني باعتبر كل اللي سايقين على حق وانا اللي غلطانة لحد ما اتعلم كويس

انا عن نفسى اتوقع ان كل اللى سايقين هما اللى هايغلطوا وانا اللى لازم اتوقع الخطأ واتجنبه عشان افضل مركز على طول

وكمان كان الشارع صغير ..لسا ماوصلتش لوسط البلد وقصر النيل..ربنا يحفظك ويحفظنا جميعا ويخلي الناس كدا عندها صبر وذوق وايثار في السواقة...ربنا قادر على كل شيء

اللهم آمين

واظن فعلا المفروض الكلاكس عموما يكون صغير عشان الناس اللي بتتلكك وعموما عشان تقليل الازعاج..اللي كان بيعلمني قال لي عند اي تقاطع ادي كلاكسين صغيرين عشان ماحدش يخرج باندفاع

ده كلام عشرة على عشرة
انا مرة فى الصباح الباكر الساعة تقريبا السابعة صباحة يوم الجمعة ... كنت خارج وماشى فى شوارع جانبية
خرجت عربيت من الشارع الرئيسى سريعة جدا
لولا انى داخل التقاطع براحة جدا جدا كان هايحصل مشكلة كبيرة
لكن اللى كان المفروض انى اعمله كمان انى اضرب كلاكس صغير
حتى ولو كان الشارع فاضى ... زيادة فى الاطمئنان .. لانه ممكن يخرج لك اى عربية بسرعة


..بس برضو ولا بيهمهم!
ربنا يحفظك ويحفظنا جميعا ونتطور كدا في القيادة ..ويخلي الناس كدا عندها صبر وذوق وايثار في السواقة...ربنا قادر على كل شيء
رايك ايه يا ا. حسين..حضرتك لم تعلق.. لعل المانع خير باذن الله

شكرا لحضرتك يا استاذة عبير ... هو فى الحقيقة انا مشغول جدا جدا اليومين دول ... لكن فى نفس الوقت لما بقرأ تعليقاتكم بكون سعيد جدا جدا ... واقول لنفسى ... اترك التعليقات دى شوية عشان الاصدقاء فى المنتدى يكون لهم فرصة يكتبوا اى وجه نظر تانية براحتهم وممكن تكون مختلفة عن اللى انا هاكتبه ... لكن موش مهم المهم اننا كلنا نستفيد

فى انتظار التواصل

مع اطيب التمنيات
اخوكم حسين غزالة

احلى فتره هى فتره الاولى فى السواقه
انا فى البدايه رحت مدرسه السواقه تبع امرور علشان اطلع رخصه وطبعا طلعت بعرفش حاجه

ههههههههههه
ده شىء طبيعى جدا .. كلنا رحنا مدرسة القيادة عشان الرخصة فقط

بدائت وحده وحده اطلع بعربيه اخويا قدام ورا حبه حبه
وبدات اخرج بيها اول مره انا واخويا الف بيها اتمكن اكتر
مشيت فى شارع قعت الف فيه اخد يوترن وارجع الف تانى وهكزا
ولقيت الحياه حلوه (بيخوفونا بقى ليه)
فى الاخر كنت ماشى فى شارع عكس فجاه قلى حود شمال وانا كنت ماشى بسرعه
حوت بنقس السرعه وازا بعربيه فى وشى عملت فيها شومخر وكسرت الدركسيون بسرعه لبست فى كشك على اليمين
وبعدها قررت مركبش العربيه تانى


قدر الله وما شاء فعل
عارف موضوع اليوتيرن ده ... انا فضلت ادرب عليه بالساعات الطويلة ... والفضل فيه كان لصديقى ... وكل ما الف بالعربية يقول لى: لأ انت دخلت بسرعة .... لأ انت بعيد قوى عن الرصيف ... لأ انت قريب جدا من الرصيف ... انت نزلت نص الشارع ... انت ما بصتش على العربيات قبل ما تلف ... عشرين نصيحة وكذا مرة عشان فقط ادخل اليوتيرن صح

وده محتاج تدريب جامد جدا وكلام كثيير جدا للمبتدأين




وبعد زمن حوالى سنه جبت 127 وما ادراك 127
جبتها فى رمضان قلت الواجد كل يوم بعد الفجر ينزل فى الروقان يمشى بيها شويه
اول يوم بعد الفجر رحت الدور العربيه مش رضيه احيله برده
مبدهاش الناس سهرانه زقه يرجاله ونزق نزق نزق سواق تكسى طبعا الى كان بيقومها
العربيه شرقانه
طب يرجاله زقه لحد المكانيكى حططها ادام الورشه ومشيت
روحت البيت بعد ساعه
ايه الاخبار سوقت (لا زقيت)

ههههههههههه
والله عسل

قعت على الموضوع ه اسبوع علشان ادور العربيه بس وكل يوم طبعا بركنها عند مكانيكى شكل (وكله زق)
الحمد لله عرفت هى مبدورش ليه وبدات اتعلم فى الميكانيكا بتعتها من الميكانيكا ابص بيعمل ايه الكلام ده
وبدات اخرج بيها اول مشوار كان عندى احساس بواحد بيعدى الطريق على الدائرى
بلف حولين نفسى لما بدات امشى فى الزحمه
فضلت على الكلام ده كام يوم وفى فتره صغيره قبل ميخلص رمضان
بقيت بكسر على المكروباظات
وههى بقلها معايه اقل ن سنه فى الفتره ده متخبطتش منى غير مرتين (فنوس و تريحه على الباب الى ورا )

خد بالك لما الواحد بيركب عربية وقطع غيارها فى متناول اليد ... بتكون اعصابه قوية شوية ... لكن لما بيركب عربية زيرو اكيد طبعا بيخاف عليها جدا ...


من التجربه اهم حاجه تكون عارف عربيتك كويس وتتعود عليها وتعرف ابعادك وتحاول تمشى امورك فى الميكانيكا

ده كلام سليم وعشرة على عشرة

وقلب جامد ميهموش

قلب جامد بعد ما يكون تم التدريب وفهم كويس ... لكن قلب جامد بدون تدريب وكمان موش فاهم بالطريقة دى هايعرض نفسه للمشاكل
وربنا يحفظ الجميع

فى انتظار التواصل
مع اطيب التمنيات
اخوكم حسين غزالة