نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

اولا اشكركم جدا على تشجيعكم الإجابى .... ورغبتكم فى تثبيت الموضوع تؤكد لى أن الموضوع مفيد ... وده اهم حاجة بالنسبة لى

على العموم انا اتمنى لكم كل خير ... واللى يجيبوا ربنا كله كويس

نرجع لموضوعنا ضبط المرايه

انظر الى الصورة التالية


فى الصورة الاولى تظهر السيارة التى تسير بجوارك
ويظهر ايضا جزء من سيارتك كما يفضل البعض

فى الصورة التالية
تبدأ السيارة المجاورة فى الدخول الى المنطقة العمياء للمرايه
يعنى تبقى العربية بجوارك وانت موش شايفها تقريبا هههههههههههه
وكمان واضح ان فى جزء من سيارتك ظاهر فى المرايه


إذا لو حضرتك حركت المرايه شوية وضحيت بالجزء اللى ظاهر من عربيتك
موش هاتخسر اى حاجة
بالعكس ... هاتقدر تشوف العربية التى بدأت فى الاختفاء فى المنطقة العمياء
صح ولا لأ


ولو حركت المرايه شوية كمان صغيرين قوى
بحيث ان الجزء الصغير الموجود بين عربيتك والعربية المجاورة موش عايزه يظهر
اعتقد كده ان العربية التى بجوارك سوف يظهر معظمها حتى ولو كانت بجوارك

وترتاح شوية من موضوع المنطقة العمياء
خصوصا اثناء الانتقال من حارة الى حارة



بالمناسبة
احد الاصدقاء كان يحكى لى عن حادثة خطيرة بالنسبة له
بيقول ايه: انه كان ماشى على كوبرى ... وكان فيه فرع للكوبرى نازل لاسفل
وهو نازل على الفرع ده

قررت عربية اخرى انها تغير مسارها لكى تنزل هى كمان من على الكوبرى .... بدلا من الاستمرار فى السير طوالى على الكوبرى

النتيجة انها خبطت عربية الراجل وهو اصلا نازل بسرعة
والعربية فضلت تتمرجح يمين وشمال
وكتب لنفسه عمر جديد

كل ده طبعا بسبب انه كان ماشى فى المنطقة العمياء للسيارة الاخرى
واول ما العربية التانية غيرت مسارها ... راحت خبطاه خبطة مية مية ... كانت هاتقلبه من فوق الكوبرى
ربنا يحفظ الجميع



طبعا هو بيلوم السيارة الاخرى انها غيرت مسارها مرة واحدة
وانا قلت له كلامك صح ... لكن انت موش واخد بالك بأنك كنت ماشى بالنسبة للعربية التانية فى المنطقة العمياء
والعربية التانية اصلا موش شايفاك فى المراية
والنتيجة اللخبطة دى كلها
ربنا يستر



الخلاصة: إذا كنت بتسمع كلاكسات بطريقة مفاجأة
او بتسمع صيحات سائقين آخرين
وانفعالات حولك
خصوصا اثناء تغير مسارك من حارة الى حارة


فأرجوك اهتم كثيرا بضبط المرايه ... لكى ترى المنطقة العمياء
او على الأقل
حاول ان تنظر فوق كتفك وللوراء قليلا .. قبل تغيير مسارك من حارة الى حارة


ارجوا ان اكون وفقت

اسألكم الدعاء لى ولوالدى الله يرحمهم

مع اطيب التمنيات
اخوكم حسين غزالة

[linkin2008]

بارك الله فيك يا استاذ حسين انا بقالى يومين مدخلتش على الموضوع علشان كان عندى حوارات لكن لما دخلت لقيت معلومات جديدة كتير انا والله حاطط الموضوع فى favorites لازم يوميا ادخل اشوف المعلومات الجديده الى الامام يا استاذ حسين بارك الله فيك مره اخرى
اخوكم عبدالرحمن

[husseinoo]

التغلب على الخوف

كيف تقود سيارتك بدون خوف ؟

الأكيد انك تشعر بالخوف على الطرق السريعة
خصوصا عندما تجد انك محاصر بسيارات ملاكى وخصوصا سيارات النقل سواء كانت ركاب "مينى باص ـ ميكروباص ـ اوتوبيس" او سيارات النقل "نص نقل او نقل كبير او مقطورات اوحاويات عملاقة"

اذا كان الخوف بيعمل لك حالة من شلل التفكير الجامد قوى هههههههههههههه
اذا فقط حان الوقت للتغيير

التالى بعض النصائح للتغلب على الخوف:


الخطوة الأولى:
إذا كنت تقود سيارتك "نادرا" ... او بالبلدى كده ما بتخرجش بالعربية كثير خصوصا فى شوارع المحروسة المزدحمة وكمان على الطرق السريعة ... فأكيد هاتشعر بالخوف ... لازم هاتخاف
كل ما هاتقود سيارتك "كثير" وتواجه مواقف مختلفة ومتنوعة وتقدر تتغلب عليها طبعا إن شاء الله ... كل ده هايزيد الثقة فى النفس بشكل جامد جدا.
كبداية حاول تخرج بالعربية مثلا روح بيها السوق اشترى اى حاجة .. مشوار صغير وعلى السريع ههههههههههههههههه
انا عن نفسى روحت كثير قوى مشوار السوق ده ... منه استفادة من انخفاض الاسعار خصوصا فى اسواق الجملة ... او الاسواق الشعبية ومنه تدريب على السير بالعربية مدة طويلة وفى ظروف مختلفة ....
او حتى اخرج بالعربية روح المسجد ... صلى ركعتين وارجع تانى
او روح للمكتبة ... استعير كتاب وارجع البيت تانى
اى مشوار صغير هاتعمله وهاترجع البيت بالسلامة إن شاء الله .. النتيجة هاتكون ان ثقتك فى نفسك هاتزيد.

الخطوة الثانية:
حاول تنزل مرة منطقة زحمة شوية .... وممكن طريق يكون سريع شوية ... وتمشى مشوار كبير لمدة اطول ...
إذا ما زلت تشعر بقليل من القلق ... على طول اعد التدريب حتى تشعر بالراحة

أما اذا رجعت من المشوار ده ... وما زلت تشغر بالخوف الشديد جدا جدا وربكة جامدة من داخلك ... يبقى الافضل تنزل بالمستوى ... يعنى افضلك تستكمل تدريبك فى منطقة اقل ازدحام ويكون فيها عربيات اقل فى السرعة .... ولكن الاهم هو الاستمرار ... ترجع زى الشاطر هههههههه للعربية وتصمم انك تمشى بيها اطول فترة ممكنة.


الخطوة التالتة:
هل تستطيع كشف المخاطر ... يعنى عينك بالصلى على النبى بتقدر تشوف المخاطر قبل ما تحدث ... وتتوقعها وتكتشفها
ولا زى ناس كثيير لا تشعر بالمشاكل إلا اذا اصبحت المشكلة امامك مباشرة


... يعنى مثلا شايف ان فيه عربية متعطلة ولا تتوقف إلا إذا توقفت العربية التى امامك مباشرة ... يعنى اقصى حاجة بتشوفها كبوت عربتيك ههههههههههههه والعربية التى امامك فقط لا غير

حاول تاخد بالك شوية من لافتات المرور ... يعنى مثلا فيه علامة يوتيرن ... وانت مصمم تمشى فى حارة اليوتيرن .... وفى الآخر بتشتكى من العربيات اللى بتحدف عليك ههههههههههههههههه


قدرتك على اختيار الحارة المناسبة للسير ... هاتسهلك حاجات كثير قوى قوى
داخل يمين التزم الحارة اليمين
داخل شمال التزم الحارة الشمال
ماشى على طول التزم الحارة الوسطى
إن شاء الله الموضوع يكون بسيط


الخطوة التالتة:
شغل شوية قرآن وهدى اعصابك قبل ما تمشى بالعربية ... وادعى دعاء الركوب ... وصلى ركعتين الصبح ... واتوكل على الله وكل شىء هايكون تمام التمام ... أنا آسف جدا هى المفروض تكون الخطوة الأولى هى التوكل على الله سبحانه وتعالى


الخطوة الرابعة:
حاول انك تتحكم فى موضوع انحراف السيارة ... يعنى تمشى على خط مستقيم
وما تحدفش على حد كل شوية

بطل "الكاسيت" او "الراديو" او حتى خفض الصوت ولو كنت بتحب تسمع موسيقى او اغنية يا ريت تكون اغنية هادئة ... والافضل طبعا شوية قرآن
لا تتكلم مع الركاب داخل السيارة
القيادة موضوع جد وموش لعبة ومحتاج منك تركيز على الطريق بشكل جامد.

الخطوة الخامسة:
خد لك كورس فى القيادة مع اى حد بيفهم كويس قوى
وحاول تقرأ بتأنى موضوع القيادة الدفاعية
ممكن يركب معاك حد قريبك او صديقك يكون هادى ... واعصابه قوية وفاهم كويس .... عشان يزود ثقتك فى نفسك موش يخوفك وآسف من الكلام ده يرعبك ويروشك اكثر ... مهم قوى اختيار الشخص اللى بيعلمك سواء كان قريبك او من مدرسة قيادة


الخطوة السادسة:
اذا كان فيه بعض الحالات بتشعر فيها بالقلق والخوف الشديد


مثلا لو كنت بتخاف من طلوع الكبارى أو دخول الانفاق
حاول تدرب نفسك على طلوع الكبارى فى اوقات مافيهاش زحمة خالص او استبدال الكوبرى بـ مثلا بشارع مرتفع مثل الكوبرى
يفضل التدريب يكون فى اوقات العربيات تكون فيها قليلة وكمان الناس تكون قليلة عشان تتدرب براحتك


الخطوة السابعة:
اعمل لنفسك جدول للتدريب على قدر الإمكان.
اكتب فى الجدول الاماكن الغير مزدحمة ... والاوقات المناسبة للخروج الى هذه الاماكن.
اخرج الى عملك بدرى شوية مثلا نص ساعة عشان تلحق تروح شغلك بعيدا عن الزحمة وبعيد عن التسرع وتلحق تركن عربيتك وتفطر كمان قبل الشغل ههههههه
قبل السفر على الطرق السريعة ... اعمل لنفسك جدول ... حاول تسافر فى اوقات تكون المواصلات فيها هادئة .... اختر افضل الطرق واسهلها التى تحتوى على عربيات نقل اقل ...

إذا كانت عربيات النقل بتخوفك وبتضايقك خلاص اختار طريق تانى ... يعنى مثلا لو بتحب تسافر على الطريق الزراعى او الاحسن لك الطريق الصحراوى ... وتحب تسافر فى الصباح الباكر جدا ... ولا تسافر مساء ...

الخطوة الثامنة:
خلاصة الكلام .. كل ما هاتتعرض لمواقف كثير كل ما ثقتك فى نفسك هاتزيد كثير ... وهاتقدر تتعامل مع اى موقف هاتقابله على الطريق مهما كان ... اذا كنت مازلت بتخاف من العربيات النقل العملاقة والانفاق والكبارى على سبيل المثال ... ماتخافش المهم انك تتدرب مع حد فاهم ... وتفهم كويس المواقف المختلفة ... وتعمل لنفسك جدول متدرج فى الصعوبة ... اختيارك للوقت المناسب للتدريب مهم .... سواء كان فى الصباح الباكر او مساء ....

الخلاصة: ودى اجمل جملة عرفتها بتقول ايه...
لو انتظرت انك تكون جاهز نفسيا عشان تركب عربيتك .... وتواصل التدريب ... عمرك ما هاتركب العربية ابدا ... وهاتفضل تخاف ...

الطريقة الوحيدة للتغلب على الخوف هى انك تكون خلف "الدركسيون" وتمشى بعربيتك باستمرار حتى ولو كانت الشوارع خالية فى الصباح الباكر


ملحوظة:
لا قدر الله لو تعرضت لاى حادث موش تمام مثلا طلعت بالعربية على الرصيف
ربنا يحفظ الجميع
ببساطة ارجع تانى واعتبر نفسك "راكب"
يعنى ارجع تانى واركب المواصلات عادى خالص ... بطل تركب العربية شوية لحد ما اعصابك تهدى وتنسى موضوع الحادث اللى اتعرضت له
ومرة تانية ارجع واصل التدريب من جديد وبإصرار.

وفى الاول والآخر خليك مع الله وربنا هو الحافظ الستار .

ارجو ان اكون وفقت

فى انتظار التواصل
مع اطيب التمنيات
اخوكم حسين غزالة

[ACC.Eslam Arif]

استاذ/ حسين


شكرا



favorites

[teto2007]

شكرا على المواضيع الهامة دى والمعلومات القيمة جزاك الله خيرا

[magid1010]

السلام عليكم ورحمة الله وبركاته
يا استاذ حسين مش عارف اقولك اية بس بجد الواحد بقى مستنى على احر من الجمر اى مشاركة من مواضيعك المتميزة دى و اول حاجة بيفتحها بيدور على اى مشركة منك
شكراااااااااااااا

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

شكرا لحضراتكم على الكلام الجميل ده ... وعلى تشجيعكم الإجابى ... واتمنى لكم السعادة

ملحوظة: ايه التوقيع الجامد ده يا ماجد هههههههههههه حلو قوى ... على فكرة انا غاوى تصوير جامد من سنة 1990 وانا فى الموال ده ... توقيع ملعوب ... وبيقول انك راجل دماغ عالية قوى ... عشرة على عشرة

اربع نصائح

للتغلب على فوبيا الخوف من قيادة السيارة

الخوف من قيادة السيارة هى احد الأشياء التى يكرهها البعض فى الوقت الحاضر
اغلب الناس الذين يعانون من فوبيا الخوف من قيادة السيارة ... إذا نظرت الى حياتهم الإجتماعية أو المهنية ... عموما سوف تجد أنهم يشعروا بعدم السعادة بسبب هذا البلاء
وعلى الرغم من الآثار المريعة لهذه الظاهرة ، وإهمال كثير من الناس أن تفعل أي شيء حيال ذلك ... وأن اغلب الذين يشعرون بالخوف لا يحاولون علاج هذا الخوف ويتجنبوا تماما اى أنشطة لها علاقة بقيادة السيارة والبقاء داخل المنزل لمدة طويلة ههههههههه بس انا غصب عنى اجلس فى البيت لأن اغلب الشباب والأصدقاء تزوجوا وكل واحد فى حاله الآن هههههههه

فى الحقيقة دى حاجة تكسف ههههههههههههه
لأنه موضوع الخوف من قيادة السيارة ممكن الشفاء منه تماما ... مثله مثل اى نوع من المخاوف ...
انها حالة نفسية يجب أن تتخلص منها ... ولا يجب أن تظل عليها لمدة طويلة ... إذا كنت تعانى من هذه المخاوف ... يجب أن تعلم أن الجواب يكمن داخلك ... كل ما هو مطلوب منك هو أن تواجه هذه المخاوف بنفسك



التالى 4 نصائح للتغلب على الخوف من قيادة السيارة:




1- ابدأ بخطوات صغيرة قوى لتصل فى النهاية الى الهدف المنشود ... يعنى ايه الكلام ده ... الكثير من الناس الذين يشعروا بالخوف من قيادة السيارة يستسلموا تماما ويقرروا انهم مايركبوش العربية ههههههههههه ويمكن يبيعوا العربية ويتخلصوا منها تماما هههههههههههه زى حالاتى كده .... فى أول يوم او يومين كنت عايز اغمض عينية وافتحها ماشوفش العربية دى امامى .............
المطلوب منك انك تساعد نفسك للتخلص من هذه المخاوف وليس عقاب نفسك ...

إذا كنت تشعر بأنك غير قادر على قيادة السيارة ... ببساطة اركب عربيتك مشوار صغير خالص ... حتى ولو كنت هاتلف حوالين البيت موش اكثر من كده .... اى مشوار صغير جدا عشان تقدر تقلل من مشاعر الخوف داخلك .... بالطريقة دى هاتقدر تكييف عقلك على التغلب على مخاوف القيادة تدريجيا.
يعنى كل ما تخرج بالعربية مشوار سهل خالص مثلا حوالين البيت ... او اى مكان فاضى انت عارفه وهادى هاتقدر تفرمل وتتغلب على الخوف من القيادة.





2- الاستماع الى بعض الموسيقى الهادئة حلو قوى ... الموسيقى الهادئة لها تأثير هايل على الحالة المزاجية للإنسان ... وفيه ناس كثيير تفضل تسمع شوية قرآن فى العربية وانا واحد منهم ومافيش احلى من كده ... كل ده هايشعرك بالإسترخاء والهدوء ... مستوى التوتر عندك هايقل كثيير ... وهاتبدأ تستمتع بتجربة القيادة اكثر من الأول.





3- شوف لك "بودى جارد" ههههههههههههه قصدى شوف لك واحد صاحبك أمين وهادى الطباع يخرج معاك ... معروف ان اى حاجة نعملها مع بعض موش بتخوفنا زى لو عملناها لوحدنا ... بعض الناس يشعروا بالخوف من القيادة لوحدهم ... وأنا من الناس دى إلى حد ما .... يمكن حتى الآن ... افضل انى اركب عربيتى وعندى استعداد اروح اى مكان مافيش مشاكل لكن عايز حد يركب بجوارى حتى ولو ماكانش بيعرف يسوق عربية من اساسه زى "ام الأولاد" هههههههههههه
اطلب من أحد الأصدقاء او افراد الأسرة أنه يركب معاك وانت بتتعلم .... بالطريقة دى ثقتك فى نفسك هاتزيد وخبرتك فى القيادة هاتزيد بشكل كويس قوى.





4- إذا كانت دى اول تجربة لك ... وأول مشوار لك بالعربية .. وشعرت انك "بتعرق .. فيه آلم فى معدتك ... حاسس أنك هاترجع" الحل انك تاخد نفس عميق من الهواء ... خذ نفسا عميقا عدة مرات خذ نفسا عميق وخرج الزفير براحة قوى ... النفس العميق بيساعد على ثبات ضربات القلب والشعور بالإسترخاء ... تذكر دائما انك تستطيع التغلب على فوبيا الخوف من ركوب السيارة ....

ابدأ الخطوة الأولى وشارك بشكل إجابى فى مواجهة فوبيا الخوف من قيادة السيارة وابدأ التجربة من أول وجديد.


فى إنتظار التواصل

مع اطيب التمنيات
اخوكم حسين غزالة

[magid1010]

بسم الله الرحمن الرحيم

اللهم صل على محمد وعلى آله وصحبه أجمعين

شكرا لحضراتكم على الكلام الجميل ده ... وعلى تشجيعكم الإجابى ... واتمنى لكم السعادة

ملحوظة: ايه التوقيع الجامد ده يا ماجد هههههههههههه حلو قوى ... على فكرة انا غاوى تصوير جامد من سنة 1990 وانا فى الموال ده ... توقيع ملعوب ... وبيقول انك راجل دماغ عالية قوى ... عشرة على عشرة


شكرا جدا يا استاذ حسين على الاطراء الجميل دة و اللة انا فرحت بالكلام دة جدا وانا فعلا غاوى تصوير بردة و توقيعك بردة جميل ربنا يحفظلك ابنك و يباركلك فية

اربع نصائح

للتغلب على فوبيا الخوف من قيادة السيارة

الخوف من قيادة السيارة هى احد الأشياء التى يكرهها البعض فى الوقت الحاضر
اغلب الناس الذين يعانون من فوبيا الخوف من قيادة السيارة ... إذا نظرت الى حياتهم الإجتماعية أو المهنية ... عموما سوف تجد أنهم يشعروا بعدم السعادة بسبب هذا البلاء
وعلى الرغم من الآثار المريعة لهذه الظاهرة ، وإهمال كثير من الناس أن تفعل أي شيء حيال ذلك ... وأن اغلب الذين يشعرون بالخوف لا يحاولون علاج هذا الخوف ويتجنبوا تماما اى أنشطة لها علاقة بقيادة السيارة والبقاء داخل المنزل لمدة طويلة ههههههههه بس انا غصب عنى اجلس فى البيت لأن اغلب الشباب والأصدقاء تزوجوا وكل واحد فى حاله الآن هههههههه

فى الحقيقة دى حاجة تكسف ههههههههههههه
لأنه موضوع الخوف من قيادة السيارة ممكن الشفاء منه تماما ... مثله مثل اى نوع من المخاوف ...
انها حالة نفسية يجب أن تتخلص منها ... ولا يجب أن تظل عليها لمدة طويلة ... إذا كنت تعانى من هذه المخاوف ... يجب أن تعلم أن الجواب يكمن داخلك ... كل ما هو مطلوب منك هو أن تواجه هذه المخاوف بنفسك



التالى 4 نصائح للتغلب على الخوف من قيادة السيارة:




1- ابدأ بخطوات صغيرة قوى لتصل فى النهاية الى الهدف المنشود ... يعنى ايه الكلام ده ... الكثير من الناس الذين يشعروا بالخوف من قيادة السيارة يستسلموا تماما ويقرروا انهم مايركبوش العربية ههههههههههه ويمكن يبيعوا العربية ويتخلصوا منها تماما هههههههههههه زى حالاتى كده .... فى أول يوم او يومين كنت عايز اغمض عينية وافتحها ماشوفش العربية دى امامى .............
المطلوب منك انك تساعد نفسك للتخلص من هذه المخاوف وليس عقاب نفسك ...

إذا كنت تشعر بأنك غير قادر على قيادة السيارة ... ببساطة اركب عربيتك مشوار صغير خالص ... حتى ولو كنت هاتلف حوالين البيت موش اكثر من كده .... اى مشوار صغير جدا عشان تقدر تقلل من مشاعر الخوف داخلك .... بالطريقة دى هاتقدر تكييف عقلك على التغلب على مخاوف القيادة تدريجيا.
يعنى كل ما تخرج بالعربية مشوار سهل خالص مثلا حوالين البيت ... او اى مكان فاضى انت عارفه وهادى هاتقدر تفرمل وتتغلب على الخوف من القيادة.





2- الاستماع الى بعض الموسيقى الهادئة حلو قوى ... الموسيقى الهادئة لها تأثير هايل على الحالة المزاجية للإنسان ... وفيه ناس كثيير تفضل تسمع شوية قرآن فى العربية وانا واحد منهم ومافيش احلى من كده ... كل ده هايشعرك بالإسترخاء والهدوء ... مستوى التوتر عندك هايقل كثيير ... وهاتبدأ تستمتع بتجربة القيادة اكثر من الأول.





3- شوف لك "بودى جارد" ههههههههههههه قصدى شوف لك واحد صاحبك أمين وهادى الطباع يخرج معاك ... معروف ان اى حاجة نعملها مع بعض موش بتخوفنا زى لو عملناها لوحدنا ... بعض الناس يشعروا بالخوف من القيادة لوحدهم ... وأنا من الناس دى إلى حد ما .... يمكن حتى الآن ... افضل انى اركب عربيتى وعندى استعداد اروح اى مكان مافيش مشاكل لكن عايز حد يركب بجوارى حتى ولو ماكانش بيعرف يسوق عربية من اساسه زى "ام الأولاد" هههههههههههه
اطلب من أحد الأصدقاء او افراد الأسرة أنه يركب معاك وانت بتتعلم .... بالطريقة دى ثقتك فى نفسك هاتزيد وخبرتك فى القيادة هاتزيد بشكل كويس قوى.





4- إذا كانت دى اول تجربة لك ... وأول مشوار لك بالعربية .. وشعرت انك "بتعرق .. فيه آلم فى معدتك ... حاسس أنك هاترجع" الحل انك تاخد نفس عميق من الهواء ... خذ نفسا عميقا عدة مرات خذ نفسا عميق وخرج الزفير براحة قوى ... النفس العميق بيساعد على ثبات ضربات القلب والشعور بالإسترخاء ... تذكر دائما انك تستطيع التغلب على فوبيا الخوف من ركوب السيارة ....

ابدأ الخطوة الأولى وشارك بشكل إجابى فى مواجهة فوبيا الخوف من قيادة السيارة وابدأ التجربة من أول وجديد.


فى إنتظار التواصل

مع اطيب التمنيات
اخوكم حسين غزالة

[magid1010]

ودة بردة موقع جمبل لاعضاء المنتدى الرائع دة و بالاخص اللاستاذ حسين غزالة اللى غاوى تصوير زى الموقع دة ترفعلة اى صورة و هو يحطلك عليها مؤثرات روعة
http://www.photofunia.com

[saso2010]

مرسى جدا يااستاذ حسين على نصايحك الرائعة دى وبجد كلامك دة حضرتك مش متخيل قد اية مهم بالنسبة لواحدة مرعوبة زى انا تقريبا مش بنام من الخوف بس بجد كل ماهسوق هفتكر كلام حضرتك ويارب الخوف يقل مع الوقت

[husseinoo]

ودة بردة موقع جمبل لاعضاء المنتدى الرائع دة و بالاخص اللاستاذ حسين غزالة اللى غاوى تصوير زى الموقع دة ترفعلة اى صورة و هو يحطلك عليها مؤثرات روعة
PhotoFunia

الف شكر يا ماجد على الموقع الجميل ده

مرسى جدا يااستاذ حسين على نصايحك الرائعة دى

حضرتك لا شكر على واجب ... انا لما قرأت مشاركة حضرتك بخصوص موضوع الخوف ده ... حسيت بحضرتك تماما لانى وكل المبتدأين عارفين الموضوع ده ... خصوصا لما تركب عربيتك اللى انت تعبان فيها

وبجد كلامك دة حضرتك مش متخيل قد اية مهم بالنسبة لواحدة مرعوبة زى انا تقريبا مش بنام من الخوف

والله انا كمان كنت زهقان جدا وموش طايق اشوف العربية وكنت عايز ابيعها فى نفس الاسبوع واكثر من كده كمان

بس بجد كل ماهسوق هفتكر كلام حضرتك ويارب الخوف يقل مع الوقت


برافو عليكى هو ده الكلام
المسألة محتاجة وقت فقط لا غير
حتى ولو كنت بتخرجى تمشى بيها فى الصباح الباكر حوالين البيت فقط لا غير .... مع الوقت كل شىء هايكون تمام التمام
وإن شاء الله لو فيه اى حاجة جديدة فى الموضوع ده سوف يتم اضافتها بإذن الله

مع اطيب التمنيات
اخوكم حسين غزالة

[husseinoo]

اللهم صل على محمد وعلى آله وصحبه أجمعين

18 نصيحة ذكية

للسائقين المبتدأين

إذا كنت تعرضت لا قدر الله لحادث سخيف بسيارتك ... او كنت من السائقين المبتدأين ولم يمر عليك اكثر من سنتين فى قيادة السيارة هههههههه انا بقالى حوالى 5 شهور تقريبا ... المهم اقرأ النصائح التالية يمكن تكون مفيدة إن شاء الله:



1- بعد الحصول على الرخصة مباشرة... تشعر بالغربة فى السيارة ههههههه وتشعر بالخوف عندما ترى الكرسى الذى بجوارك لاول مرة خالى من الركاب ههههههههههه ... حاول تشوف حد يركب معاك عشان يشجعك ... الجميل فى الخارج يتم لصق ورقة على السيارة من الخلف تحمل حرف p والمقصود بها ان قائد السيارة "مبتدأ" ولسه جديد فى عملية القيادة .... عشان اللى العربيات اللى وراه تعمل حسابها وماتحاولش تربكه .... موش عارف الموضوع ده قانونى عندنا ولا لأ .... ههههههههههههه احنا البديل بتاعنا انك تلصق ورقة على العربية من الخلف وتكتب عليها "عفوا السيارة فى التليين" ههههههههههههه.



2- عندما تقرر انك تركب العربية لوحدك خلاص.... بعد ما تاخد حبوب الشجاعة ... حاول تمشى فى طريق انت عارفه ... طريق يكون سهل وانت عارف هاترجع البيت تانى ازاى .... يعنى ما تعملش فيها عشر رجالة وتدخل منطقة ما تخرجش منها بسهولة ... وبعدين فى البيت يعملوا اعلان "خرج ولم يعد" هههههههههههه
انا عن نفسى بجد والله العظيم اى مكان افكر اروحه ... والله ادخل على جوجل ايرث واشوف الشوارع فى المنطقة دى عاملة ايه ... وهادخل منين وهارجع منين ... بالعكس الايام دى وانا راكب مع اخويا فى اى مشوار ... بحفظ المطبات المنيلة وكمان ازاى هانروح المكان ده وهانرجع ازاى ... يمكن فى المستقبل انزل نفس المكان الله اعلم.... حتى وانا ماشى على رجلى ونازل اتمشى ... طول ما انا ماشى عمال اشوف انسب مكان لركن السيارة فين ... كده يعنى العملية اختلفت دلوقتى .



3- لما ثقتك فى نفسك تزيد ... يجب قيادة السيارة كأنك "تملك السيارة" وليس كأنك "تملك الطريق" .... يعنى موش عشان حضرتك بقيت شجاع وجرىء شوية ... خلاص انزل الشارع واعمل فيها "عشر رجالة" وانسى كل قواعد القيادة اللى تعبنا واتكلمنا فيها مع بعض .... واحاول انى اقلد الناس الكبيرة او قصدى الناس القديمة والخبرة فى موضوع القيادة .



4- يجب الالتزام بقواعد المرور ... وتاخد بالك من الآخرين ... خصوصا المشاة ... عشان ترجع البيت بالسلامة إن شاء الله



5- رد الفعل السريع لن يمنع المشاكل.... طيب ايه اللى هايمنع المشاكل ... انك زى ماقلنا قبل كده انك توفر وقت كافى لرد الفعل ... يعنى لو انت لازق للعربية اللى امامك .. بالطريقة دى مافيش وقت لرد الفعل ... ولو تارك مسافة كافية وكويسة بينك وبين العربية اللى امامك ... كده هاتوفر وقت عشان رد الفعل.

5- حاول تقود سيارتك بطريقة بسيطة وسليمة ... لن نشعر بالإعجاب عندما نراك تقود سيارتك بسرعة وفى مكان خاطىء مما يعرضك للمشاكل ... طبعا فيه شباب كثير يحب يعمل حركات ويجرى ويحاول يثبت انه سائق كفاءة ... عشان اللى راكبين معاه يقولوا عليه ده واد مية مية ... كل ده موش مهم المهم انك تسوق عربيتك بالعقل وزى ما اتعلمنا .



7- نام كويس..... خصوصا لو كنت هاتسافر بالعربية .... وحاول تأخذ فكرة عن الطريق هل فيه مشاكل ؟ ... وتأكد ان عربيتك مليانة بنزين ... قبل السفر .... والله الكلام ده انا كنت اقرأه عادى ... لكن فيه يوم خرجت فيه بدرى ولم انام جيدا خالص ... وفعلا كنت سايق العربية موش تمام ... والتركيز ضعيف جدا جدا ... يعنى عايز تغمض وتفتح تلاقى نفسك وصلت البيت .. والكلام ده موش كويس لان كثيير من المبتدأين "بيصحوا بدرى" عشان يتعلموا خصوصا يوم الجمعة ... وطبعا يوم الجمعة بيكون آخر الأسبوع ... يعنى بعد انتها اسبوع كامل من العمل ... بدل ما ينام ويرتاح فى البيت ويصحوا براحته ويروح يصلى الجمعة ... يصحوا فى الساعة السابعة صباحا وينزل وهو نايم على نفسه .... معلهش حاول تنام كويس قبل ما تسوق العربية.




فى انتظار التواصل

تابـــــع

مع اطيب التمنيات
اخوكم حسين غزالة

[bebo_abdeldayem]

انا بقالي 3 سنين بس بسوق.. بصراحه اول كام مرة كنت مش مقتنع بموضوع المرايات خالص, و كانت دي المشكلة الاساسيه بالنسبالي , بس بالنسبة للسواقه نفسها بحاول ابقي هادي خالص عشان مفيش حاجه مضمونه , و ربنا يستر طريقنا جميعا

[sara2001]

اولا متشكره جدا يا استاذ حسين على الشرح الوافي بخصوص موضوع المرايات
الصور المرفقه في الموضوع فادتني جدا
وموضوع التغلب على الخوف من السواقه مش عارفه ليييييه كنت حسه كأنه موجه لي ههههههههه وضحكني جدا موضوع البودي جارد ده
بس انا عايزه بودي جارد ييجي معايا من البيت للشغل ويرجع هو العربيه لوحده
شفت كارثه اكتر من كده

2- عندما تقرر انك تركب العربية لوحدك خلاص.... بعد ما تاخد حبوب الشجاعة ... حاول تمشى فى طريق انت عارفه ... طريق يكون سهل وانت عارف هاترجع البيت تانى ازاى .... يعنى ما تعملش فيها عشر رجالة وتدخل منطقة ما تخرجش منها بسهولة ... وبعدين فى البيت يعملوا اعلان "خرج ولم يعد" هههههههههههه
انا عن نفسى بجد والله العظيم اى مكان افكر اروحه ... والله ادخل على جوجل ايرث واشوف الشوارع فى المنطقة دى عاملة ايه ... وهادخل منين وهارجع منين ... بالعكس الايام دى وانا راكب مع اخويا فى اى مشوار ... بحفظ المطبات المنيلة وكمان ازاى هانروح المكان ده وهانرجع ازاى ... يمكن فى المستقبل انزل نفس المكان الله اعلم.... حتى وانا ماشى على رجلى ونازل اتمشى ... طول ما انا ماشى عمال اشوف انسب مكان لركن السيارة فين ... كده يعنى العملية اختلفت دلوقتى .

انا كنت عايزه اسأل اللي لسه بيتعلموا زيي كده في موضوع الطرق الجديده ده
انا بفضل امشي في طريق محدد وثابت يعني مشيت فيه قبل كده عدة مرات كأني بحفظ الطريق حاجه ملل مش كده
يعني ساعات والدي يختار ندخل من طريق تاني على غير المعتاد وبقلق من ان انا مش عارفه الملفات واليوترن في الطريق ده فين ولسه هأكتشفها
وبفضل لو هجرب طريق جديد يكون الصبح بدري الأول وبعد كده امشي فيه في اي وقت
هو ده عادي ولا الموضوع ده زياده عندي

[husseinoo]

اولا متشكره جدا يا استاذ حسين على الشرح الوافي بخصوص موضوع المرايات

حضرتك لا شكر على واجب

الصور المرفقه في الموضوع فادتني جدا

طيب الحمد لله ... وأنا انكسرت لى مراية صغيرة جانبية اثناء غسيل العربية بالمياه القوية ههههههههههه وجدت العامل جايب لى زجاج المراية فى ايديه هههههههه انتم عارفين شغل الصين الله يسامحهم ... هاشترى واحدة بدالها وامرى لله ...

وموضوع التغلب على الخوف من السواقه مش عارفه ليييييه كنت حسه كأنه موجه لي ههههههههه وضحكني جدا موضوع البودي جارد ده

وانا البودى جارد بتاعى " ام الاولاد" .. قاعد جنبى وبيضحك هو كمان على لما يقرأ الكلام ده ... لكن فى الحقيقة لا اقدر الاستغناء عنه ... محتاج وقت شوية

بس انا عايزه بودي جارد ييجي معايا من البيت للشغل ويرجع هو العربيه لوحده
شفت كارثه اكتر من كده
والله كانت زميلتنا فى العمل بتقول لى انها كانت تروح الشغل مع البواب ولما توصل الشغل تدفع له 5 جنيه عشان ياخد تاكسى ويروح بالموصلات هههههههههه ... معلهش فى الاول كده وبعد شوية كل شىء هايكون تمام التمام مافيش اى عيب او اى مشاكل


انا كنت عايزه اسأل اللي لسه بيتعلموا زيي كده في موضوع الطرق الجديده ده
انا بفضل امشي في طريق محدد وثابت يعني مشيت فيه قبل كده عدة مرات كأني بحفظ الطريق حاجه ملل مش كده
يعني ساعات والدي يختار ندخل من طريق تاني على غير المعتاد وبقلق من ان انا مش عارفه الملفات واليوترن في الطريق ده فين ولسه هأكتشفها
وبفضل لو هجرب طريق جديد يكون الصبح بدري الأول وبعد كده امشي فيه في اي وقت
هو ده عادي ولا الموضوع ده زياده عندي

ده عشرة على عشرة .... هو ده الكلام الصح والسليم ... قبل ما اروح اى مشوار موش عارفه ... ممكن اثناء التعليم اخرج فى الصباح الباكر وامشى فى المنطقة اللى بفكر انى انزلها وده الكلام الصح والتمام ... حتى ولو هانزل المناطق اللى احتمال انى هامشى فيها فى المستقبل برافو عليكى

مع اطيب التمنيات
اخوكم حسين غزالة