نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

[quote=hossam165;3872845131]ربنا يبارك فيك يا استاذ حسين
انا من الناس الي اسفدت كتير من موضوعك ونصائحك
جعله الله في ميزان حسناتك[/quote]

الله يبارك فيك يا استاذ حسام
وانا سعيد جدا بكلامك
ومتشكر جدا جدا على دعائك الجميل ده
ما تتصورش انا فى امس حاجة الى الدعاء ده
متشكر لحضرتك جدا ولكل اصدقاء المنتدى على كلامهم الجميل والرقيق

شكرا لحضراتكم
وبارك الله فيكم

مع اطيب التمنيات
اخوكم حسين غزالة

[husseinoo]

بسم الله الرحمن الرحيم

اللهم صل على محمد وعلى آله وصحبه أجمعين







كيف تقود سيارتك بآمان
وكيف تصبح سائق جيد

حافظ على مسافة كافية بينك وبين السيارة التى فى الخلف

هههههههه طبعا فيه ناس كثيير هاتقول طيب ازاى الكلام ده يحصل ههههههههههه اللى تقدر تتحكم فيه هو المسافة بينك وبين العربية التى امامك ... او حتى المسافة بينك وبين العربيات التى بجوارك ..... لكن كيف يتم المحافظة على المسافة بينك وبين السيارة التى خلفك ؟


ببساطة تحاول تقف بعربيتك بشكل تدريجى ... يعنى تضغط على الفرامل بهدوء وتدريجى ... بالطريقة دى تعطى فرصة للسيارات القادمة من الخلف انها تتوقف هى ايضا فى هدوء ... لكن فى حالة التوقف المفاجىء وبشكال حاد ... النتيجة الاكيدة ان السيارة القادمة من الخلف هاتقترب منك بشكل كبير و"تلزق" لعربيتك من الخلف


انظر الى الصورة التالية

فى الصورة تظهر سيارة فى مراية "الصالون" ... ويظهر ان السيارة القادمة من الخلف قريبة جدا "لازقة" لعربيتك.

الخلاصة:
· من الصعب التحكم فى المسافة الموجودة بينك وبين السيارات القادمة من الخلف.
· اذا كانت السيارة التى تسير خلفك قريبة جدا من سيارتك حاول التوقف بهدوء لزيادة المسافة بينك وبين السيارة القادمة من الخلف

اهمية اختيار الفجوة الآمنة

ملحوظة: المقصود بكلمة "فجوة" gap او المساحة الخالية التى ترغب فى الدخول فيها بسيارتك


اختيار "الفجوة" المناسبة خصوصا عند الدخول فى الملفات او المرور من سيارة اخرى او تغيير الحارة التى تسير فيها الى حارة اخرة ... اختيار الفجوة المناسبة يعتبر المفتاح الاساسى لمهارة إدراك المخاطر.

اختيار "الفجوة" المناسبة يعتبر من اهم المواضيع فى التعامل مع التقاطعات

يتعرض 1 من كل 3 سائقين محترفين الى المشاكل خصوصا عند اختيار "فجوة" غير مناسبة لمرور السيارة مما يؤدى الى الاصطدام بسيارة اخرى.

ما هى "الفجوة" الآمنة
الفجوة الآمنة هى التى تسمح لك بالدخول فى الملفات بشكل سليم .. او المرور من اى سيارة اخرى ... او تغيير الحارة الى حارة اخرى او المرور فى اى تقاطع بشكل آمن دون التورط فى اى تصادم مع السيارات الاخرى .. ربنا يحفظ الجميع.


معنى الكلام ده ايه ؟ ... ان السيارات الأخرى عليها تجنب سيارتك


على سبيل المثال: اذا دخلت ملف على اليمين ... وانت قادم من شارع جانبى على شارع رئيسى ... والسيارات الموجودة فى الشارع الرئيسى تحتاج الى التوقف بصعوبة او تحتاج الى تغيير الحارة التى تسير فيها لتجنب الاصطدام بك ... فهذا معناه ان الفجوة التى قررت الدخول فيها "غير آمنة".


اذا كانت "الفجوة" غير كافية وليست كبيرة بشكل مناسب .. يبقى فى الحالة دى مافيش داعى للسير والدخول فيها ... تذكر ان السائق الجيد يدرك متى يسير بسيارته ؟ ومتى يتوقف ؟ .... يعنى موش شطارة انك تقرر الاستمرار فى السير حتى فى الاماكن الضيقة .. وقرارك بالتوقف فى الحالة دى لا يقل اهمية عن قرار الاستمرار فى السير بالسيارة.

التدريب المنفرد بالسيارة فى اماكن خالية على المرور والدخول فى الملفات تمرين مهم جدا جدا للمبتدأين
وكثرة التعرض لموضوع الملفات يزيد من خبرة المبتدأ .... هل المساحة كافية للمرور ؟ ... ما هى الطريقة المناسبة للدخول فى هذا الملف خصوصا انه ضيق بعض الشىء ؟ ... هل استمر فى السير وادخل هذا الملف ؟ ... ام اتوقف احسن من المغامرة والدخول فى هذا المكان الضيق ؟ ... وما هى الطريقة المناسبة للدخول فى هذا الملف ؟
حاجات كثيرة تقررها فى ثوانى
تحتاج منك الى التدريب ثم التدريب
ولا تحتاج الى الجراءة والشجاعة ... تحتاج الى تشغيل "الدماغ" والفهم والتدريب الجيد قبل كل شىء
ولا تحتاج الى النزول فى الشارع بدون تدريب والتخبيط فى العربيات المحيطة وتعريض عربيتك للخطر والمشاكل


كل ما تحتاجه الى التدريب فى مساحة خالية على كيفية التعامل مع المساحات الضيقة ... واذا كان المساحة لا تسمح بمرور السيارة بشكل آمن ... يبقى قرار التوقف هو الاصلح فى الحالة دى.

من المهم ان تقرر هل "الفجوة" التى امامك آمنة اوغير آمنة قبل الدخول بسيارتك فى اى ملف او المرور من اى سيارة اخرى او الدخول على التقاطعات

فى الصورة التالية على سبيل المثال ... يظهر ان المسافة خلف السيارة الحمراء غير كافية للدخول فى الملف ... هل انت موافق على ذلك ؟

اختيار "الفجوة" المناسبة للدخول بسيارتك يعتبر من اهم مهارات القيادة

الخلاصة:

• الفجوة تكون آمنة فى حالة انك تستطيع الدخول فى الملف بشكل سليم وآمن او المرور من سيارة اخرى او تغيير الحارة الى حارة اخرى او الدخول فى التقاطعات.
• عدم تعرضك الى تصادمات مع سيارات اخرى
• عدم تعريض السيارات الاخرى الى مخاطر
• عندما لا تحتاج السيارات الاخرى الى تجنب الاصطدام بسيارتك
• اذا كانت "الفجوة" التى تريد الدخول فيها موش واسعة بالقدر الكافى ... توقف فورا ... انتظر حتى تظهر فجوة واسعة امامك للدخول فيها.

نحاول فى المرات القادم نشرح ونفهم كيفية تحديد الفجوة الآمنة

ارجوا ان اكون وفقت

مع اطيب التمنيات
اخوكم حسين غزالة

[sara2001]

استاذ حسين حضرتك مش معقول كأنك بتقرأ كل الأفكار والأسئله اللي بتدور فى عقل اللى بيتعلم
ربنا يبارك في حضرتك ويجازيك كل خير
انا كنت لسه داخله اسأل حضرتك بخصوص المسافه الآمنه في الزحام من الأمام والخلف لغاية ما شفت الصوره دي
العربيه لما بتظهر كده عندي في المرآه او تختفي نصف الفوانيس بحس انها قريبه جدا فعلاً وخلاص هتخبطني

انظر الى الصورة التالية

فى الصورة تظهر سيارة فى مراية "الصالون" ... ويظهر ان السيارة القادمة من الخلف قريبة جدا "لازقة" لعربيتك.

طيب لو انا شايفه جزء من شنطة العربيه اللي امامي كده المسافه تبقى متر تقريباً ولا أكتر

عندي سؤال تاني بخصوص السرعه في الملف او اليوترن
حضرتك بتلف غالباً على سرعه كام ؟ او ما هي اقصى سرعه آمنه للملف؟
انا لاحظت وده طبعاً علشان انا مبتدئه لما باخد الملف على سرعه اكتر من 40 مش بتحكم قوي في اني اكون موازيه للرصيف يعني لو بلف في الناحيه الشمال بتاخد مني سنه يمين
هو كده انا بطيئه زياده ولا دي سرعه مناسبه للدوران

[nadeen]

السلام عليكم ورحمة الله وبركاته

سؤال يا جماعة ، لو انا ماشية فى شارع جانبى ما يعديش عربيتين جنب بعض علشان العربيات اللى راكنة على الجانبين وفجأة لقيت عربية تانية جاية قدامى فى العكسى وانا قطعت نصف الشارع يعنى صعب ارجع لورا بس لقيت يمينى مكان فاضيى انى ادخل ببوز العربية علشان اوسع للى جاى قدامى انه يعدى فطبعا لما دخلت يمين جامد علشان اوسع له ، ظهر العربية عندى ما لمش معايا وبكده ضيقت الطريق على اللى جاى قدامى اكتر ،وكمان هو كان خلاص بقى وش عربيته عند الباب الخلفى لعربيتى لزق ، لو كمل هيخبطنى ..نعمل ايه بأه ؟ معلش احنا اتفقنا من الأول اننا هنستحمل اسئلة بعض علشان نتعلم أصل الموقف ده حصل معايا امبارح ولولا ان الشخص اللى جاى قدامى فاهم قوى وقالى ما تتحركيش خالص وعرف يخلص نفسه مش عارفة كان المفروض اعمل ايه وطبعا علشان انا لسة مبتدئة حاسة انى انا اللى غلطت لما دخلت يمين جامد فى الحتة الفاضية .صح كده ولا ايه رأيكم؟؟

[husseinoo]

استاذ حسين حضرتك مش معقول كأنك بتقرأ كل الأفكار والأسئله اللي بتدور فى عقل اللى بيتعلم
ربنا يبارك في حضرتك ويجازيك كل خير

شكرا يا استاذة سارة على كلامك الجميل جدا ده ... وربنا يبارك فى حضرتك ويسعدك دنيا وآخرة

انا كنت لسه داخله اسأل حضرتك بخصوص المسافه الآمنه في الزحام من الأمام والخلف لغاية ما شفت الصوره دي
العربيه لما بتظهر كده عندي في المرآه او تختفي نصف الفوانيس بحس انها قريبه جدا فعلاً وخلاص هتخبطني

اهم حاجة انك لا تضغطى الفرامل بشكل جامد حتى لا يفاجأ انك توقفتى بشكل جامد ... والنتيجة هايقترب اكثر من عربيتك او لا قدر الله يصطدم بها من الخلف ... لو فيه حدا لازق لعربيتك حاولى تضغطى الفرامل بشكل تدريجى ولو فيه امكانية انك توسعى له شوية عشان يعدى منك يبقى احسن بدون تعريض عربيتك لاى مشاكل ... يعنى موش عشان اعديه انقل نفسى الى حارة كلها مشاكل وعربيات متوقفة.

طيب لو انا شايفه جزء من شنطة العربيه اللي امامي كده المسافه تبقى متر تقريباً ولا أكتر

لو انت ماشية فى الزحام الجامد قوى ... على الاقل تشوفى عجل العربية التى تسير امامك ... يعنى انت طول الوقت لازم تكونى "شايفة" عجل العربية التى تسير امامك ...

افتكرت حاجة مهمة جدا ... تحاولى تتركى مسافة تسمح بمرور سيارتك من السيارة التى امامك فى حالة تعطل السيارة التى امامك ... يعنى تقريبا مسافة نصف سيارتك ... تقريبا متر وربع او متر ونصف. ... هى دى المسافة الصح

عندي سؤال تاني بخصوص السرعه في الملف او اليوترن
حضرتك بتلف غالباً على سرعه كام ؟ او ما هي اقصى سرعه آمنه للملف؟

انا عن نفسى لن تزيد سرعتى عن 20 كيلوا فى الملفات ... وفى الغالب اقل من كده كثير ... المشكلة موش الملف لسه فيه مشاة وفيه عربيات فى الشارع الرئيسى واحتمال التوقف وارد ... عشان كده ادخل الملف بطىء جدا وبحرص كبير جدا

انا لاحظت وده طبعاً علشان انا مبتدئه لما باخد الملف على سرعه اكتر من 40 مش بتحكم قوي في اني اكون موازيه للرصيف يعني لو بلف في الناحيه الشمال بتاخد مني سنه يمين
هو كده انا بطيئه زياده ولا دي سرعه مناسبه
للدوران

اعتقد انك سريعة جامد ... لازم تدخلى الملفات بسرعة اقل من كده كثير .. ادخلى على سرعة 10 او 15 كيلوا ... ادخلى بطىء على قدر الامكان ... لان فيه عربيات ممكن تدخل معاكى وفيه مشاه وفيه عربيات على الطريق الرئيسى ... وفيه رصيف لا قدر الله ممكن تطلعى عليه ... ربنا يحفظ الجميع

السلام عليكم ورحمة الله وبركاته

وعليكم السلام ورحمة الله وبركاته

سؤال يا جماعة ، لو انا ماشية فى شارع جانبى ما يعديش عربيتين جنب بعض علشان العربيات اللى راكنة على الجانبين وفجأة لقيت عربية تانية جاية قدامى فى العكسى وانا قطعت نصف الشارع يعنى صعب ارجع لورا بس لقيت يمينى مكان فاضيى انى ادخل ببوز العربية علشان اوسع للى جاى قدامى انه يعدى فطبعا لما دخلت يمين جامد علشان اوسع له ، ظهر العربية عندى ما لمش معايا وبكده ضيقت الطريق على اللى جاى قدامى اكتر ،وكمان هو كان خلاص بقى وش عربيته عند الباب الخلفى لعربيتى لزق ، لو كمل هيخبطنى ..نعمل ايه بأه ؟ معلش احنا اتفقنا من الأول اننا هنستحمل اسئلة بعض علشان نتعلم أصل الموقف ده حصل معايا امبارح ولولا ان الشخص اللى جاى قدامى فاهم قوى وقالى ما تتحركيش خالص وعرف يخلص نفسه مش عارفة كان المفروض اعمل ايه وطبعا علشان انا لسة مبتدئة حاسة انى انا اللى غلطت لما دخلت يمين جامد فى الحتة الفاضية .صح كده ولا ايه رأيكم؟؟

انا عن نفسى اول حاجة هاعملها انى اضرب كلاكس خفيف ... عشان لو فيه سيارة ناوية تدخل نفس الشارع تعمل حسابها انى قادم ويأخر نفسه شوية.
اما فى حالة انه دخل هو كمان الشارع .. حسب مهارتك .. لو انت خايفة شوية او موش مقدرة ابعاد العربية كويس ... يبقى الافضل تعملى زى حالاتى تشوفى اقرب مكان فاضى وتقربى منه زى ما حضرتك عملتى بالضبط ... وبعدين اترك الباقى للسيارة القادمة...
او لو انا شايف انى ممكن امر من السيارة القادمة ... ممكن اشاور له أنه ينتظر شوية ... وادخل انا الأول .... يعنى الخلاصة مافيش داعى انى اتقدم بالعربية واقفل على العربية القادمة اذا كانت المساحة لن تكفى ... اما لو السيارة القادمة هى اللى وسعت لى .. خلاص هادخل انا على طول بدون تردد .. طبعا حضرتك اتصرفت صح ودخلتى فى مكان خالى عشان يعدى منك ... لكن وهو بيعدى من خلف عربيتك كان خايف ان عربيتك ترجع للخلف والنتيجة طبعا هاتبخطى السيارة التى تمر خلفك ....
لو حضرتك الشوارع الضيقة دى بتسبب لك مشاكل .. الافضل تأجلى الدخول فيها حتى تتمكنى من عملية السير وتشعرى بأبعاد العربية بشكل جيد جدا ... انا عن نفسى استحالة ادخل فى شارع من هذا النوع حتى ولو كان هايوفر لى وقت ... انا عن نفسى ممكن امشى مسافة اكبر ولا ادخل فى شارع من هذا النوع .... ممكن فى حالة واحدة فقط انى اكون متمكن جدا من عملية القيادة ... وربنا يحفظ الجميع

مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

كيف تقود سيارتك بآمان
وكيف تصبح سائق جيد

اهم مبادىء اختيار "الفجوة" الآمنة

الفجو الآمنة تختلف حسب حالة الطريق .. سرعة السيارات على الطريق ... حالة الجو ... من الصعب وضع قواعد ثابتة لكن فى هذا القسم سوف نقدم بعض المبادىء الهامة التى قد تساعد فى اختيار وتحديد "الفجوة" الأمنة فى زحام المواصلات سوف نغطى فى هذا الموضوع:

• المسافة الآمنة عند الدخول فى الملفات ناحية اليمين او الشمال.
• المسافة الآمنة عند الدخول فى "اليوتيرن"
• المسافة الآمنة عند الدخول فى التقاطعات
• المسافة الآمنة عند المرور من السيارات الأخرى

اى ارشادات فى هذا القسم تحتاج منك التدريب الجيد ثم التدريب مباشرة فى شوارع المحروسة .. تدريب واقعى وحقيقى بين السيارات.

اغلب ما تقرأه هو مساعدة لك بدون تدريب لذلك سوف تحتاج الى التدريب منفردا ثم بعد ذلك فى شوارع المحروسةلتنمية مهاراتك ...


اختيار المسافة الآمنة عند الدخول فى الملفات
الدخول فى الملفات موضوع صعب .. خصوصا عندما تكون الشوارع مزدحمة بالسيارات ... فأنت تحتاج الى مراقبة السيارات التى تسير فى الطريق بالإضافة اى المشاة امام سيارتك وعلى يمين السيارة ويسار السيارة.
المفتاح الاساسى للمشكلة هو اختيار "الفجوة" الكبيرة التى تسمح بالدخول فى الملف بشكل آمن ... هذه المهارة سوف تنجح فيها بعد التدريب الجيد جدا ...

"الفجوة" الآمنة ـ للدخول الملفات ناحية اليمين
الدخول فى الملفات ناحية اليمين يحتاج الى تدريب جيد ... ويعتبر من المهارات التى تحتاج الى وقت كافى للتدريب . ومن اهم الارشادات فى هذا الموضوع هو اذا كنت داخل على طريق والسيارات تسير فيه بسرعة 60 كيلوا فى الساعة فهذا معناه انك تحتاج الى "فجوة" حوالى 6 ثوانى بين سيارتك والسيارات الاخرى على الطريق الرئيسى ... ده بافتراض ان السيارات الاخرى تسير على سرعة 60 كيلوا ومن الممكن ان تكون على سرعة اكبر.


مساحة الـ 6 ثوانى معناها انك تحسب 6 ثوانى قبل ان تصل السيارة القادمة فى الطريق الرئيسى الى سيارتك.

معظم السائقين ذو الخبرة الكبيرة لن يدخلوا الى اى ملف إلا اذا كانت المسافة تساوى 6 ثوانى او اكثر.

بعض السائقين يدخلوا الملف اذا كانت المسافة حوالى 4 ثوانى فقط .. لكن هذه الطريقة تجبر السيارات فى الطريق الرئيسى على استخدام الفرامل حتى لا تصطدم مع السيارة التى تدخل فى الملف.
بالنسبة للسائقين المبتدأين ... المفروض انهم لا يدخلوا اى ملف إلا إذا كانت المسافة لا تقل عن 6 ثوانى وبشرط ان تكون السيارت على الطريق الرئيسى سرعتها حوالى 60 كيلوا ... يعنى تقريبا المسافة هاتكون حوالى 100 متر هذه هى "الفجوة" الآمنة.

اذا كانت "الفجوة" اقل من 100 متر للسيارات التى تسير على الطريق الرئيسى بسرعة 60 كيلوا ..فى هذه الحالة ليس من الحكمة الدخول فى هذا الملف.


أما اذا كانت السيارات على الطريق الرئيسى تسير بسرعة 80 كيلوا فى الساعة فى هذه الحالة سوف تحتاج تقريبا الى مسافة 135 متر .


طبعا كل الكلام ده استرشادى ... وانت الوحيد الذى يحتاج الى التدريب لتنمية هذه المهارة ولتحديد هل المساحة او "الفجوة" التى تراها امامك هل هى آمنة بشكل كافى قبل الدخول فى الملف ام لا ؟

طبعا انا عن نفسى قابلنى مرة سيارة ميكروباص كانت تسير بسرعة جنونية وفى الحارة التى سوف ادخل فيها ... فى اقل من ثانية كنت قررت انى اتوقف تماما ولا اغامر بالدخول مع هذا المجنون.


تحتاج الى التدريب على النظرة الخاطفة على الطريق الرئيسى قبل الدخول.
كثير من المبتدأين يدخل الملف دون النظر على السيارات القادمة من الطريق الرئيسى ... اعتماد على انه داخل وقريب من الرصيف وبسرعة معقولة ... كل هذا كلام جميل ... لكن يجب التدريب بشكل جيد جدا على النظر على السيارات القادمة "نظرة خاطفة" سريعة قبل الدخول على الشارع الرئيسى

الموضوع ده مهم جدا جدا جدا للمبتدأين ... لازم تنزل منطقة خالية من السيارات ... وتبدأ فى التدريب على الدخول فى الملف ... وقبل الدخول فى الملف تهدى من سيارتك تماما تقريبا تكون السيارة على سرعة اقل من 20 كيلوا ... وتنظر جيدا نظرة سريعة على السيارات القادمة وتقرر هل ادخل الملف ام لا ... وتختار الغيار المناسب للسرعة التى تسير عليها هل امشى على الغيار الثانى ام اختار الغيار الاول حسب سرعة السيارة
وطبعا رجلك ضاغطة على الدبرياج بالكامل والرجل الثانية فوق الفرامل وجاهزة للتوقف فى اى وقت
اذا وجدت ان الطريق آمن استمر فى السير على طول ... واذا وجدت ان هناك سيارات قادمة والمسافة او "الفجوة" غير آمنة ... اتوقف على طول بدون تردد.

موضوع النظرة الخاطفة ده محتاج تدريب جيد جدا .. وعدم التساهل فيه ... وعدم الاستعجال والنزول الى الزحام بدون تدريب

ما دام انا داخل على طريق رئيسى ... لازم ادخل على سرعة هادئة جدا جدا .... ولا يهمنى العربيات التى تسير خلفى وتستعجلنى فى السير ... انظر جيدا على السيارات القادمة ... واتأكد قبل الاستمرار فى السير
وسرعتى انا عن نفسى لن تزيد عن 20 كيلوا فى الملف او اقل حسب حدة الملف وحسب سرعة السيارات القادمة فى الطريق الرئيسى


فى اى حالة من الاحوال افضل الدخول على الملف فى منتهى الهدوء ... واختار الغيار المناسب قبل الدخول فى الملف ... ولا اقترب كثير من الرصيف حتى استطيع الدخول فى الملف بشكل صحيح "عشان العربية ما تطلعش فوق الرصيف"


وبمجرد النظر على السيارات القادمة على الطريق السريع نظرة سريعة جدا ... انظر امامى مباشرة "امام سيارتى" ... ولا داعى للسرحان ... ومافيش داعى انى افضل انظر للسيارات القادمة على الطريق الرئيسى وانسى عربيتى ... ولا داعى للسرحان لدرجة انى انزل بالعربية فى منتصف الشارع
والتزم بالحارة التى اسير فيها يعنى موش عشان انا داخل الملف ادخل وانا ماسك حارتين ... ولازم اراعى السيارة التى تدخل معى فى الحارة الاخرى واتجنب الاصطدام بها


التدريب ثم التدريب
فى اماكن خالية
ثم التدريب فى اماكن غير مزدحمة
ثم التدريب فى اماكن اكثر حركة
مافيش داعى للاستعجال



الخلاصة:

• اذا كانت السيارات التى تسير فى الطريق الرئيسى سرعتها حوالى 60 كيلوا فى الساعة فأنت تحتاج الى مسافة 100 متر بين السيارات القادمة على الطريق الرئيسى وبين سيارتك

• اذا كانت "الفجوة" غير آمنة وغير كافية .. الافضل لك هو الانتظار حتى تظهر لك فرصة جيدة قبل الدخول فى الملف.

تابع نستكمل فى اقرب وقت ان شاء الله

ارجو ان اكون وفقت

مع اطيب التمنيات
اخوكم حسين غزالة

[magid1010]

ازيك يا استاذ حسين ربنا يبارك لك على المعلومات الجميلة دى

[sara2001]

السلام عليكم ورحمة الله وبركاته

سؤال يا جماعة ، لو انا ماشية فى شارع جانبى ما يعديش عربيتين جنب بعض علشان العربيات اللى راكنة على الجانبين وفجأة لقيت عربية تانية جاية قدامى فى العكسى وانا قطعت نصف الشارع يعنى صعب ارجع لورا بس لقيت يمينى مكان فاضيى انى ادخل ببوز العربية علشان اوسع للى جاى قدامى انه يعدى فطبعا لما دخلت يمين جامد علشان اوسع له ، ظهر العربية عندى ما لمش معايا وبكده ضيقت الطريق على اللى جاى قدامى اكتر ،وكمان هو كان خلاص بقى وش عربيته عند الباب الخلفى لعربيتى لزق ، لو كمل هيخبطنى ..نعمل ايه بأه ؟ معلش احنا اتفقنا من الأول اننا هنستحمل اسئلة بعض علشان نتعلم أصل الموقف ده حصل معايا امبارح ولولا ان الشخص اللى جاى قدامى فاهم قوى وقالى ما تتحركيش خالص وعرف يخلص نفسه مش عارفة كان المفروض اعمل ايه وطبعا علشان انا لسة مبتدئة حاسة انى انا اللى غلطت لما دخلت يمين جامد فى الحتة الفاضية .صح كده ولا ايه رأيكم؟؟

بتفكريني بالمواقف اللي كانت بتحصل معايا بالضبط .....ساكنه في المنيل ولا ايه؟
بالإضافه لرد أستاذ حسين عليكي
لما يكون في مكان فاضي ادخلي فيه ببوز العربيه زي ما عملتي بس اعدلي بعدها الدريكسيون على طول علشان ظهر العربيه يلم للداخل كأنك راكنه بس بعيد عن الرصيف
لأنك لو دخلتي ببوز العربيه يمين بس من غير ما تعدلي الدريكسيون تاني الظهر هيفضل بره وكده ممكن يتخبط لو واحد معرفش يقدر المسافه كويس وهو بيعدي
بس خدي بالك ان المكان لازم يكون يكفي تدخلى فيه الأول

[sara2001]

لو انت ماشية فى الزحام الجامد قوى ... على الاقل تشوفى عجل العربية التى تسير امامك ... يعنى انت طول الوقت لازم تكونى "شايفة" عجل العربية التى تسير امامك ...

افتكرت حاجة مهمة جدا ... تحاولى تتركى مسافة تسمح بمرور سيارتك من السيارة التى امامك فى حالة تعطل السيارة التى امامك ... يعنى تقريبا مسافة نصف سيارتك ... تقريبا متر وربع او متر ونصف. ... هى دى المسافة الصح

اشوف عجل العربيه !!! بس كده المسافه دي اللي بتسمح بدخول عربيه ببوزها ده كده بابا بيخليني اقترب من اللي امامي زياده عن اللزوم انا آخري بشوف الشنطه ده بعد ما بنقف
بس ده في حالة الزحمه جداً يعني العربيات بتمشي دقيقه او أقل وترجع تقف

انا عن نفسى لن تزيد سرعتى عن 20 كيلوا فى الملفات ... وفى الغالب اقل من كده كثير ... المشكلة موش الملف لسه فيه مشاة وفيه عربيات فى الشارع الرئيسى واحتمال التوقف وارد ... عشان كده ادخل الملف بطىء جدا وبحرص كبير جدا

اعتقد انك سريعة جامد ... لازم تدخلى الملفات بسرعة اقل من كده كثير .. ادخلى على سرعة 10 او 15 كيلوا ... ادخلى بطىء على قدر الامكان ... لان فيه عربيات ممكن تدخل معاكى وفيه مشاه وفيه عربيات على الطريق الرئيسى ... وفيه رصيف لا قدر الله ممكن تطلعى عليه ... ربنا يحفظ الجميع

انا غالبا سرعتى في الملف بتكون من 30 : 40 بس في كام مره سرحت واخدت الملف بسرعه اكبر من كده وكان التحكم في البقاء في نفس الحاره صعب الحمد لله الملف كان فاضي

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

كيف تقود سيارتك بآمان
وكيف تصبح سائق جيد

انظر الى الصورة التالية

هنا تظهر الصعوبة الشديدة ... اذا كانت السيارة داخلة الى الملف اليمين فقط ... كل المطلوب فى هذه الحالة ان ينظر السيارات القادمة نظرة خاطفة ... واذا كانت السيارة القادمة سرعتها حوالى 60 كيلوا فى الساعة فأنت فى هذه الحالة تحتاج الى مسافة 100 متر على الأقل قبل الدخول فى الملف اليمين .

اما اذا كانت السيارة متجهة الى الملف اليسار كما هو موضح فى الصورة هنا تظهر المشكلة الكبيرة والهامة ....

ارشادات هامة عند الدخول فى الملف اليسار

انظر الى الصورة التالية

يظهر فى الصورة باختصار شديد انك تحتاج الى مسافة حوالى 70 متر بينك وبين السيارة الزرقاء ... وتحتاج الى مسافة 100 متر بينك وبين السيارة الصفراء ... واضح ان عملية الدخول فى مثل هذه الملفات "عملية مهمة جدا جدا وصعبة خصوصا اثناء السفر على الطرق السريعة.


ارشادات قبل الدخول فى التقاطعات

فى الصورة يظهر ان التقاطع اصبح اكثر تعقيدا ... وانت تحتاج الى المرور الى الأمام ... لكن فى نفس الوقت لا تستطيع الاستمرار فى السير قبل النظر امام سيارتك والنظر على السيارات القادمة من اليمين والسيارات القادمة من اليسار ... يعنى تحتاج الى النظر فى الثلاث اتجاهات فى نفس الوقت وبسرعة....
تحتاج الى تدريب جيد جدا فى اماكن خالية اولا ثم اماكن اكثر تعقيدا.

وطبعا المسافة التى تحتاجها قبل الدخول فى اى تقاطع "ليلا" يجب ان تزيد عن الوضع الطبيعى الذى سبق وان ذكرناه.

الخلاصة:

• تحتاج الى مسافة 70 متر على يسارك
• تحتاج الى مسافة 100 متر على يمينك
• تحتاج الى مسافة 70 متر امامك
• اذا كانت الفجوة غير آمنة للدخول فى التقاطع ... توقف فى الحال وانتظر حتى تظهر "فجوة" آمنة.

تدريب هام جدا

الخطوة الاولى : هو غريب شوية ... كل المطلوب انك تنزل وتقف فى احد الشوارع التى تأخذ شكل حرف T ثم تبدأ فى ملاحظة السيارات القادمة من اليمين ومن الشمال .. وتبدأ فى حساب المسافة الـ 70 متر من العربيات القادمة من اليسار ومسافة الـ 100 متر من السيارات القادمة من اليمين ... وتحددها بالنظر تقريبا المسافة المفروض تكون اد ايه.

تحاول الشعور بإحساس السائق قبل الدخول فى التقاطعات السريعة والتى تسير عليها السيارات بسرعة 60 كيلوا فى الساعة ..

الخطوة الثانية: اركب مع سائق محترف وقديم شوية ... واطلب منه الدخول فى هذا التقاطع اكثر من مرة .. وتابع باهتمام كيف تم اختيار "الفجوة" الآمنة قبل الدخول فى التقاطع... اطلب منه الدخول فى هذا التقاطع حوالى 6 مرات وانت تتابعه باهتمام وتركيز كبير جدا.

الخطوة الثالثة: استخدم نفس التقاطع لكن فى هذه المرة المطلوب انت تكون انت يا بطل السائق ... وتنبه الراكب بجوارك على مراقبتك ومتابعتك ... وتتناقش معاه هل دخلت فى التقاطع بشكل سليم ام لا ... وتقوم بهذا التدريب اكثر من مرة ... وتناقش مع السائق الذى يركب بجوارك ... لماذا انت اخترت هذه "الفجوة" وهل هى كافية وآمنة للدخول ام لا.

الخطوة الرابعة: التدريب مرة اخرى ولكن فى هذه المرة مع اكثر من سائق محترف ... حتى تزيد الثقة فى نفسك بشكل كبير.
الخطوة الخامسة: عندما تزيد الثقة فى نفسك تحاول التدريب على تقاطعات اكثر تعقيدا مثل الدخول الى الامام فى نفس الوقت تحتاج الى النظر الى الامام واليمين واليسار فى نفس الوقت وتراعى المشاة ايضا اذا وجد.

فى المرات القادمة نتناقش مرة تانية على موضوع اليوتيرن

ارجوا ان اكون وفقت


مع اطيب التمنيات
اخوكم حسين غزالة

[nadeen]

شكرا يا أستاذ حسين على الرد والتوضيح ، الحقيقة انا بكون مضطرة للدخول فى الشوارع الضيقة لان منهم شارع بيتى...
شكرا يا سارة على الرد ، انا فعلا كنت حاسة انه المفروض اعمل زى ما بتقولى بس المكان ما كانش هيكفى فى الموقف ده ..
يا جماعة انا فرحانة انى بقى لى اخوات محترمين زيكم برجع لهم كل ما احتاج حاجة..بارك الله فيكم ..

[shetoos2009]

الاستاذ حسين اول مشاركه ايجابيه لي معكم والمشاركات السابقه كانت عباره عن قراءه وتأمل وتعلم منك ومن باقى الزملاء فى المنتدي وخصوصا انى عضو جديد فى مدرسه المبتدئين .
اولا : اشكرك جدا على هذا الموضوع وانت لست فى حاجه الي مزيد من كلمات الاطراء والمدح لانه قد سبقنى اخرين لذلك ولم اعد اجد الكلمات التى توفيك حقك
ثانيا : برجاء والحاح واعذرني فى الحاحي ارجوا ان يتسع وقتك قبل ان تستطرد فى موضوع القياده الامنه فى ان تفرد بعض الكلمات لموضوع الركنه بجد ان فى اشد الحرج كل يوم عندما اتعرض لهذا الموقف وهو ركن سيارتى الحقيقه بضرب اخماس فى اسداس حتى يسعفنى احد الماره من اصحاب الخبره مثلك وينقذنى من هذا الموقف فارجوك ترحمنى من نظرات الشفقه ونظرات السخريه .......... الى اخره من النظرات وبعضها لا يخلوا من التزمر والتهكم على حالي فارجوك مزيد من التوضيح فى حاله ركن السياره سواء الركن موازي للرصيف بين سيارتين او الركن عمودى على الرصيف بين سيارتين ارجوا التوضيح باسهاب وبالصور لكل حركه مع العلم اني قرأت موضوع الركنه من قبل وتدربت كثيرا ولكن لم افلح فى ضبطها واشكرك مقدما

[husseinoo]

شكرا يا أستاذ حسين على الرد والتوضيح ،

العفو يا افندم انا تحت امرك

الحقيقة انا بكون مضطرة للدخول فى الشوارع الضيقة لان منهم شارع بيتى...
شكرا يا سارة على الرد ، انا فعلا كنت حاسة انه المفروض اعمل زى ما بتقولى بس المكان ما كانش هيكفى فى الموقف ده ..
يا جماعة انا فرحانة انى بقى لى اخوات محترمين زيكم برجع لهم كل ما احتاج حاجة..بارك الله فيكم ..


وانا ايضا فرحان جدا لما اسمع الكلام الجميل ده .. ويشرفنى طبعا اننا نكون اخوة محترمين وربنا يبارك فى حضرتك واحنا كلنا تحت امرك فى اى وقت

مع اطيب التمنيات
اخوكم حسين غزالة

الاستاذ حسين اول مشاركه ايجابيه لي معكم والمشاركات السابقه كانت عباره عن قراءه وتأمل وتعلم منك ومن باقى الزملاء فى المنتدي وخصوصا انى عضو جديد فى مدرسه المبتدئين .
اولا : اشكرك جدا على هذا الموضوع وانت لست فى حاجه الي مزيد من كلمات الاطراء والمدح لانه قد سبقنى اخرين لذلك ولم اعد اجد الكلمات التى توفيك حقك
انا سعيد جدا بتشريفك للموضوع ... وننتظر من حضرتك مشاركاتك القيمة والاستماع الى تجاربك عشان نستفيد منها كلنا

ثانيا : برجاء والحاح واعذرني فى الحاحي ارجوا ان يتسع وقتك قبل ان تستطرد فى موضوع القياده الامنه فى ان تفرد بعض الكلمات لموضوع الركنه بجد ان فى اشد الحرج كل يوم عندما اتعرض لهذا الموقف وهو ركن سيارتى الحقيقه بضرب اخماس فى اسداس حتى يسعفنى احد الماره من اصحاب الخبره مثلك وينقذنى من هذا الموقف فارجوك ترحمنى من نظرات الشفقه ونظرات السخريه .......... الى اخره من النظرات وبعضها لا يخلوا من التزمر والتهكم على حالي فارجوك مزيد من التوضيح فى حاله ركن السياره سواء الركن موازي للرصيف بين سيارتين او الركن عمودى على الرصيف بين سيارتين ارجوا التوضيح باسهاب وبالصور لكل حركه مع العلم اني قرأت موضوع الركنه من قبل وتدربت كثيرا ولكن لم افلح فى ضبطها واشكرك مقدما

وأنا عملت لحضرتك مفاجأة جميلة اتمنى انها تحل لك هذه المشكلة نهائيا
المفاجأة فى المشاركة التالية
مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

كيف تركن سيارتك

المرة دى الشرح بالفلاش
كل المطلوب اضغط على مفتاح الاستمرار ... عشان تتعلم موضوع ركن السيارة خطوة خطوة

بعد عمل بعض التعديلات انتهيت من عمل هذة الوحدة التعليمية البسيطة ارجوا ان تنال رضاكم


بعد عمل داونلود للملف .. ابدأ فى تشغيله .. بدون اى مشاكل إن شاء الله

حجم الملف صغير جدا

لتحميل الملف اضغط هنا

فى انتظار التواصل

مع اطيب التمنيات
اخوكم حسين غزالة

[sara2001]

شكرا يا أستاذ حسين على الرد والتوضيح ، الحقيقة انا بكون مضطرة للدخول فى الشوارع الضيقة لان منهم شارع بيتى...
شكرا يا سارة على الرد ، انا فعلا كنت حاسة انه المفروض اعمل زى ما بتقولى بس المكان ما كانش هيكفى فى الموقف ده ..
يا جماعة انا فرحانة انى بقى لى اخوات محترمين زيكم برجع لهم كل ما احتاج حاجة..بارك الله فيكم ..

العفو متشكره على الكلام الحلو ده
اللي يستحق كل الشكر استاذ حسين ربنا يبارك له
لو المكان مش مكفي لازم حد فيكم يرجع لوراء مفيش حل تاني
حصل معايا موقف مشابه وفي واحد اتبرع في الشارع انه يساعد وقعد يقنعني ان المكان هيكفي بالعافيه وحاولت ادخل فيه وظهر العربيه ما دخلش وكنت هجرح في العربيه اللي ورايا
وفي الآخر اللي كان في وشي رجع هو الشارع بظهره