نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

شرح حادث خطير

المشهد الأول
انظر الى الصورة السابقة
انا قادم من يوتيرن بالسيارة الخضراء
ومتوجه الى الشارع اليمين
وقادم من خلفى السيارة الحمراء... قادم من الناحية اليمين وعايز يمشى على طول فى الاتجاه الشمال

المشهد الثانى
السيارة الحمراء .. عايز يتوجه ناحية الشمال وموش عايز يدخل الملف اليمين

المفاجأة
ظهور السيارة الزرقاء ... ركباها سيدة محترمة ... وتحاول الدخول يمين بسرعة هادئة فى آخر لحظة

النيتجة ان التاكسى يتوقف بشكل جامد جدا لتجنب الاصطدام بالسيارة الزرقاء ... وطبعا تسمع احلى فرامل امريكانى وفى الآخر يخبط السيارة الزرقاء من الخلف خبطة جامدة

والحمد لله
انا توقفت على آخر لحظة خلف السيارة الحمراء مباشرة

على فكرة السيارة الحمراء كانت سيارة تاكسى "ابيض" الجديدة وصاحبها كان بيجرى بسرعة كبيرة جدا
طبعا كان الزحام شديد والسيارات كثير قوى .. تقريبا الساعة 12 ظهرا



ماذا تتعلم من الموقف ده لجميع الأخوة المبتدأين

• السيارة الزرقاء هى كمان غلطانة لانها فى آخر لحظة قررت الدخول يمين بدلا من الاستمرار فى السير الى الامام

• الإنتقال من حارة الى حارة يجب أن يكون بشكل تدريجى ... وطبعا لازم انقل نفسى لسرعة السيارات القادمة من الخلف ... يعنى صعب انى انقل نفسى من حارة الى حارة بشكل بطىء واعطل السيارات القادمة من الخلف فى نفس الوقت

• قبل الإنتقال من حارة الى حارة ... لازم تنظر فى المرايات بشكل جيد خلفك ... اذا سمحت الظروف انقل نفسك بلا تردد ... إذا لم تسمح الظروف استمر فى السير فى خط مستقيم ... المهم اوعى تحدف على السيارة التى تسير بجوارك ...
  
• بعد استخدام الإشارة يمين ... اذا لم تظهر فرصة للانتقال يمين استمر فى السير ولف من منطقة تانية المهم تجنب الاصطدام بالسيارات المجاورة يعنى اوعى تحدف عليها
  

• وانت داخل على الملف لازم تكون رجلك فوق الفرامل تتحكم فى سرعة السيارة ... بمعنى لا قدر الله لو كانت رجلى على البنزين اثناء هذا الحادث ... كان ممكن بدل ما اضغط فرامل اضغط بنزين من كثرة الخوف ... وطبعا النتيجة كنت اصطدمت بالسيارة التاكسى من الخلف

• طبعا بالنسبة للسيارة التاكسى خطأ كبير جدا انه يتحرك من اقصى اليمين الى اقصى الشمال ... انت عايز تتوجه ناحية الشمال ... يبقى كان لازم من الاول وبسرعة معقولة يمر من على شمالى وليس من على يمينى

• ورغم ذلك لازم نستخدم المرايات جيدا ... ورغم انك ماشى صح ... لازم تتجنب اخطاء الآخرين ....

• الحمد لله رب العالمين على كل حال .... ولولا انى شايف البنى آدم ده ماشى من خلفى وعارف انه سوف يمر من على يمينى بالشكل الغبى ده ... وعملت حسابه كويس جدا وهدأت من سرعتى ... كان ممكن يحصل مشاكل كبيرة

• وانا بلف ناحية اليمين ... كنت ملتزم بالحارة اللى انا ماشى فيها ... يعنى ايه ؟ .... يعنى كان من الصعب انى الف بجوار الرصيف من كثرة الزحام ... فكان لازم افضل ملتزم بالحارة التانية والف فيها ايضا ... لكن بحرص شديد من السيارات المجاورة ... افضل من انى احدف على السيارات المجاورة

• الحمد لله رب العالمين ... مادام انت تارك مسافة كويسة بينك وبين السيارة اللى ماشية امامك ... بيكون فيه فرصة كبيرة لانك تتوقف عند اللزوم بشكل جيد .... والحمد لله كان فيه فرصة كويسة انى اتوقف بالتدريج وبدون مفاجأة للسيارات القادمة من الخلف ... يعنى مافيش داعى انك تقلد الآخرين وتقترب من السيارة التى تسير امامك بشكل مبالغ فيه عشان تعمل فيها انك سائق جامد ومحترف ههههههههههههه
  

• اول ما توقفت استخدمت ايدى للإشارة للسيارات القادمة من الخلف بسرعة لتنبيها للحادث وعلى طول بدل ما اقف اتفرج على التاكسى المتوقف امامى وازود مشاكل المرور ... قررت انى امر منه وادخل يمين على طول ... طبعا كان لازم استخدم نور الإنتظار للتحذير ... لكن ربنا ستر.
  

• وطبعا مع الخبرة والحمد لله الاعصاب كانت معقولة والفضل لربنا قبل كل حاجة وللتدريب والتركيز.

• واخيرا ده درس سريع ومهم لكل مبتدأ فى القيادة .... هو ربنا الستار قبل كل شىء ... ولكن احنا لازم نأخذ بالأسباب ونتعلم كويس ونفهم كويس ... يعنى من الآخر بلاش الفهلوة ... والتعليم مالوش كبير ... يعنى كل يوم لازم نتعلم ...
  

فى انتظار التواصل
مع اطيب التمنيات
اخوكم حسين غزالة

[Reem_11691]

الموضوع دا جميييييل جدااااا

انا اتعلمت السواقه فى اسبوع بس لسه طبعا مستوايا مستوى المبتدأين

كنت عاوزة اسأل على حاجة عشان العربيه بتفوت منى وانا بعدى اليوتيرن

لما ادخل على يوتيرن اضغط فرامل ودبرياج واخد الغيار الاقل

ولا اضغط فرامل ودبرياج على اساس ان العربيه تهدى بس من غير ما انقل ؟؟؟؟؟؟؟؟

[husseinoo]

الموضوع دا جميييييل جدااااا

انا اتعلمت السواقه فى اسبوع بس لسه طبعا مستوايا مستوى المبتدأين

كنت عاوزة اسأل على حاجة عشان العربيه بتفوت منى وانا بعدى اليوتيرن

لما ادخل على يوتيرن اضغط فرامل ودبرياج واخد الغيار الاقل

ولا اضغط فرامل ودبرياج على اساس ان العربيه تهدى بس من غير ما انقل ؟؟؟؟؟؟؟؟

اهلا وسهلا بحضرتك
بالنسبة لموضوع اليوتيرن ونظرا لأهميته نقدر نقسم التدريب الى مرحلتين مهمين جدا

المرحلة الأولى:

• ان حضرتك تركبى السيارة فى منطقة خالية من السيارات بغرض التدريب

• الاول يكون هناك ملف مثل اليوتيرن

• والسيارة ماشية بسرعتها العادية وقبل ما نوصل للملف ... نضغط على الفرامل لتهدئة سرعة العربية

• نحاول اننا لا نتوقف بالسيارة تماما

• فقط نضغط الفرامل ضغطات متقطعة حتى يتم تهدئة سرعة العربية ... والوصول بالسيارة الى سرعة مناسبة للدخول على اليوتيرن او الملف
  

• طبعا فى الوقت ده كل اللى انا باستعمله هو الفرامل فقط ... واحيانا كثير قوى الفتيس بيكون فى وضع المور

يعنى السيارة ماشية كويس جدا

• وانا رجلى فوق الفرامل بتحكم فى سرعتها

• واحاول الا اتوقف بالسيارة تماما

• وادخل على الملف واحاول ان اتحكم فى السرعة المناسبة للدخول على الملف

• واحاول انى الف اليوتيرن بدون توقف ورجلى جاهزة على الفرامل

• لو الملف ماشى بشكل معقول خلاص ... برفع رجلى من على الفرامل واترك السيارة تسير بشكل طبيعى

• لو الملف كان فيه اى مشاكل ... اضغط فرامل خفيف ... وانتظر شوية يمكن العملية تكون اسهل فى الملف

بعد الإنتهاء من الملف

• فى الغالب السيارة بتكون لسه ماشية كويس لكن بشكل بطىء طبعا

• على طول انقل الغيار التانى واستمر فى السير

ما هى الفائدة من التدريب السابق ؟

• اولا رجلك هاتكون دائما فوق الفرامل وجاهزة للتوقف فى اى وقت

• ثانيا الفتيس فى وضع المور وده بيريح العربية فى الملفات ويحافظ على الكبالن من التلف

• ثالثا بيكون كل تركيزك على السيارة التى تسير امامك فقط وتستطيع التوقف بهدوء فى اى وقت
  

• رابعا سيارتك بتكون ماشية بشكل طبيعى وبتلف بسهولة وبدون مشاكل

• خامسا لو تم الملف بسلام يتم الإنطلاق على الغيار التانى بشكل تلقائى بلا تردد

المهم
الحالة التانية
ان الملف يكون فيه مشاكل مرورية

• طبعا احنا قولنا ان رجلنا هاتكون فوق الفرامل

وبمجرد ما انى وجدت مشاكل فى الملف هاضغط على الفرامل

• واذا حصل والسيارة سرعتها هدأت لدرجة انها لن تكمل الملف ... يبقى على طول هاختار الغيار التانى واستكمل الملف

• اما لو كانت السيارة توقفت تماما ... خلاص هانقل الغيار الاول واستمر فى الملف

هنا بقى ترجع لخبرة وتدريب السائق ... يعنى لو شعر ان السيارة سوف تتوقف وسرعتها لن تكمل الملف ده يرجع لخبرته ... على طول هاينقل الغيار الاول او التانى حسب سرعة السيارة ويستمر فى السير ...

عشان كده بنقول لازم نتدرب كويس جدا جدا جدا



الحالة التالثة

• هنا بعض المبتدأين يبفضلوا انهم ينقلوا الغيار المناسب قبل الدخول فى الملف

• يعنى قبل اليوتيرن يختار مثلا الغيار التانى او الاول حسب السرعة

• ويستمر فى الدخول فى الملف على نفس الغيار

• وطبعا هايفضل رجله ضغطة على الدبرياج "نص ضغطة" عشان يتحكم فى سرعة العربية

يعنى رجل متثبتة على البنزين "ضغطة خفيفة"

• والرجل التانية بتتحكم فى سرعة السيارة عن طريق الدبرياج

• اذا رفع رجله عن الدبرياج السيارة هاتمشى بشكل طبيعى

• واذا ضغط رجله على الدبرياج السيارة هاتتوقف

• اذا رفع رجله جامد السيارة هاتمشى بسرعة شوية

• اذا رفع رجله خفيف السيارة هاتمشى بسرعة خفيفة

• واذا لزم الامر للتوقف هايضغط على الدبرياج والفرامل مرة واحدة

هنا يظهر اهمية التدريب ايضا
لان اى خطاء فى استخدام البنزين والدبرياج السيارة سوف تندفع الى الامام بشكل موش كويس وفى منطقة خطر


الموضوع ده مهم جدا جدا جدا
انا عن نفس افضل الطريقة الاولى

• عمرى فى حياتى ادخل على ملف او تقاطع ورجلى تكون فوق البنزين

• استحالة

ربنا هو الستار قبل كل شىء
لازم ادخل على اليوتيرن او التقاطع ورجلى فوق الفرامل اتحكم فى السرعة واترك السيارة تسير بسرعة مناسبة
بعد الانتهاء من التقاطع او اليوتيرن اختار الغيار المناسب واستمر فى السير


لو حصل لا قدر الله
اى حالة من الإرتباك وكانت رجل السائق فوق البنزين
النتيجة موش كويسة

• ممكن يتلخبط وبدل ما يضغط على الفرامل يضغط على البنزين وطبعا العربية هاتندفع الى الامام

يا هايخبط السيارة التى امامه
او يجد نفسه مندفع الى منتصف الشارع الرئيسى
او يجد نفسه يصطدم بالسيارات المتوقفة
المهم النتيجة موش كويس
وربنا يسترها مع الجميع


التدريب السابق ده
انا فضلت اتمرن عليه مدة طويلة جدا
وحتى وقتنا هذا "ادعوا لصديقى اللى علمنى الموضوع ده"
كتر خيره

يعنى تخيلى مثلا

• داخل شارع يمين جانبى

• والمفاجئة مثلا اولاد صغيرين بيعدوا الشارع

لو رجلى فوق البنزين اثناء الملف
او

• رجلى فوق الفرامل اثناء الملف

لازم نتدرب كويس

وبعدين المدرب لازم يكون له راى ؟

او المتعلم نفسه

يعنى ايه ؟


ادخل الملف
واشوف

• هل انا دخلت المرة دى بسرعة معقولة ؟

• هل انا كنت ملتزم بالحارة التى اسير فيها
• هل المسافة بينى وبين الرصيف مناسبة ولا اقتربت زيادة عن اللزوم بالرصيف ؟
  

• هل مقدمة السيارة نزلت الى الشارع الرئيسى بشكل مبالغ ؟

• هل انا نظرت جيدا على السيارات القادمة فى الشارع الرئيسى قبل الدخول فى اليوتيرن ؟
  

• هل انا بدأت تهدئة السيارة بدرى جدا قبل اليوتيرن ؟

• هل انا سرعة استجابتى فى نقل الفتيس كويسة ... ولا بطىء فى الملف وفى نقل الفتيس ؟
• هل انا انظر الى السيارةالتى امامى فقط ولا انظر الى السيارات التى امامى ... يعنى لازم اتوقع هل السيارةالتى امامى سوف تتوقف بسبب اى شىء امامها .... ولا انا بتوقف نتيجة رد الفعل من السيارة التى تسير امامى فقط ..... يعنى الخلاصة: لازم انظر الى الامام بشكل كبير لتوقع الحدث ... اذا وجدت ان حركة السير ماشية كويس ... يبقى مافيش داعى اضغط على الفرامل زيادة عن اللزوم واترك السيارة تدخل الملف على سرعة معقولة .... اما لو وجدت ان هناك مشاكل مرورية ... يبقى الافضل اتأخر شوية قبل الوصول الى الزحام يمكن ربنا ييسر الاحوال وعلى ما اوصل للزحام تكون حركة السير مستمرة ... وبدلا من التوقف تماما ثم العودة الى السير مرة اخرى .... يبقى الافضل انى ادخل على سرعة هادئة وعلى ما اوصل للزحام اضغط بنزين شوية لزيادة سرعة السيارة وارجع تانى اضغ رجلى فوق الفرامل واستعد للملف ... يعنى احاول انى لا اتوقف بالسيارة الا عند اللزوم وده محتاج خبرة وتدريب
  

نفضل نتمرن على الموضوع ده
الدخول بهدوء
ثم الانطلاق الى الامام


واثناء الملف
ممكن اتقدم "براسى" الى الامام .. يعنى راسى تكون فوق التابلوه عشان انظر على السيارات القادمة فى الشارع الرئيسى


المهم الكلام كثير قوى
ومهم جدا جدا جدا

نخلينا فى موضوع الملفات والتقاطعات ورجلنا لازم تكون فوق الفرامل وليس فوق البنزين

وربنا هو الستار فى الاول والآخر
وربنا يحفظ الجميع

ارجوا ان اكون وفقت
مع اطيب التمنيات
اخوكم حسين غزالة

[tiger45]

موضوع اكثر من رائع

[Reem_11691]

شكرا يا استاذ حسين على الشرح الخطير دا

انا مشكلتى انى مش مدربه على كل حاجة لان طبعا اللى بيعلمنى قريبى و مش فاضيلى طول الوقت

لما بتشرح بحس انك ما شاء الله فاهم السواقه صح قبل ما تكون مسألة تعود بالنسبالك

والرجوع لورا بتلخبط فيه جدااااا

كتير بحس انى السواقه دى صعبه ومش زى ما كنت متخيله وبحس ان الموضوع كبير اوى عليا خصوصا فى الرجوع لورا والركنه

بس مصرة اتعلم بردو مش ها اسيبها

[toty858]

استاذ حسين
انا داخلة انهاردة اقولك انى بفضل ربنا ونصايحك بقيت بلف اليوتيرن مظبوط اوى
انت فاكر الاول كنت بشتكى انى طلعت على الرصيف في اليو تيرن
وانتى قلتلى مكسرش الدركسيون كلة الا اما بوز العربية يطلع منة جزء
وانا فعلا بقيت بعمل كدة كل ماجى على يوتيرن افتكر الكلام واطبقة وبعد ملف اقول جزاك الله خيرا

[magid1010]

الف شكر استاذ حسين على الموضوع فوق الرائع ده كنت عايز اسأل سؤال الحمد لل بعرف اسوق كويس دلوقتى بفضل نصايحك بس انا بستحدم الدبريج كتير كل لما ادوس فرامل لا ارادى بدوس دبرياج ده صح و لا؟

[tifa55555]

السلام عليكم ورحمة الله وبركاته
احب انقل لحضراتكم حالى فى السواقه
انا بفهم فى السواقه كويس جدا (نظرى) ومعايا رخصه من 11 سنه و اعرف كويس جدا احلل اخطاء السائقين فى الطريق وكان المفروض يمشى ازاى ولكن كل ذلك نظرى،ولما ربنا كرمنى وجبت سياره من شهرين ما كونتش لاقى حد فاضى يطلع معايا يعلمنى، واعتمدت على نفسى بعد ربنا طبعا،والحمد لله اهى ماشيه ولكن كل ما اخرج بالسياره ارجع زعلان من نفسى جدا لانى بتطلع منى حاجات فى السواقه مش المفروض انى اعملها اخطاء يعنى والحمد لله ربنا بيسترها معايا لحد دلوقتى
ولكن مشكلتى انى لما بنزل من العربيه بكون زعلان من نفسى على الخطأ اللى عملته بس الحمد لله الاخطاء بتقل تدريجيا،حاجه تانيه انى بنزل من العربيه تعبان جدا جدا لان الزحمه بتتعب اعصابى والسواقه مش ممتعه لان فى ناس كتير بيخترعوا سواقه فى الطريق والله الموفق

[husseinoo]

موضوع اكثر من رائع
شكرا لحضرتك تشجيعك

شكرا يا استاذ حسين على الشرح الخطير دا
العفو حضرتك ... لا شكر على واجب

انا مشكلتى انى مش مدربه على كل حاجة لان طبعا اللى بيعلمنى قريبى و مش فاضيلى طول الوقت

لما بتشرح بحس انك ما شاء الله فاهم السواقه صح قبل ما تكون مسألة تعود بالنسبالك

والرجوع لورا بتلخبط فيه جدااااا

كتير بحس انى السواقه دى صعبه ومش زى ما كنت متخيله وبحس ان الموضوع كبير اوى عليا خصوصا فى الرجوع لورا والركنه

هو موضوع ركن السيارة فعلا "رخم" شوية
لكن مع التدريب هاتقدر تركن من اول مرة
احيانا كثير الواحد يركن من ثانى مرة ...يعنى موش عيب ... انك تخبط فى الرصيف خفيف قوى ... وتحتاج انك تطلع الى الامام ثم العودة مرة تانية الى الخلف ... واحيانا كثير اكتشف ان المكان موش واسع كفاية ... او خبرتى فى الاماكن الضيقة مازالت محتاجة تدريب .... واحيانا اقول لنفسى هو لازم المكان الضيق ده "ماربنا موسعها عليك" اختر مكان تانى هههههههههه

بس مصرة اتعلم بردو مش ها اسيبه
اهم حاجة مافيش داعى تخبطى اكصدام السيارة التى امامك او خلفك ... اذا كان المكان موش واسع كفاية اختارى مكان تانى

ا

استاذ حسين
انا داخلة انهاردة اقولك انى بفضل ربنا ونصايحك بقيت بلف اليوتيرن مظبوط اوى

الفضل كله لربنا ولتشجيعكم .... وشكرا لحضرتك على الكلام الطيب ده

انت فاكر الاول كنت بشتكى انى طلعت على الرصيف في اليو تيرن
وانتى قلتلى مكسرش الدركسيون كلة الا اما بوز العربية يطلع منة جزء
وانا فعلا بقيت بعمل كدة كل ماجى على يوتيرن افتكر الكلام واطبقة وبعد ملف اقول جزاك الله خيرا

وجزاك كل الخير لحضرتك واسرتك واصدقائك وكل معارفك
هو موضوع اليوتيرن مهم جدا جدا ... يعنى موش مجرد ان الواحد يلف بسلام
محتاج تركيز جامد جدا .. خصوصا على السيارات التى تسير بجوارك لازم تحترسى منها ... وربنا هو الستار فى الاول والآخر

الف شكر استاذ حسين على الموضوع فوق الرائع ده
شكرا لحضرتك على الكلام الجميل ده

كنت عايز اسأل سؤال الحمد لل بعرف اسوق كويس دلوقتى بفضل نصايحك بس انا بستحدم الدبريج كتير كل لما ادوس فرامل لا ارادى بدوس دبرياج ده صح و لا؟

اضغط الدبرياج اذا اقتربت من السيارة التى امامك خصوصا وانت ماشى على سرعة بطيئة ومحتاج انك تتوقف بالسيارة او تغير الفتيس الى غيار مختلف ... خلاف كده حاول انك ماتضغطش على الدبرياج خالص ... واذا كان فيه فرصة انك تعمل "مور" وتقف بالسيارة بطريقة آمنة قبل اى مطب او قضيب متروا او إشارة مرور ... يبقى افضل انك "تمور الفتيس " عشان تريح العربية شوية

السلام عليكم ورحمة الله وبركاته
وعليكم السلام ورحمة الله وبركاته

احب انقل لحضراتكم حالى فى السواقه
انا بفهم فى السواقه كويس جدا (نظرى) ومعايا رخصه من 11 سنه و اعرف كويس جدا احلل اخطاء السائقين فى الطريق وكان المفروض يمشى ازاى ولكن كل ذلك نظرى

ودى بداية ممتازة جدا ... انك فاهم كويس

،ولما ربنا كرمنى وجبت سياره من شهرين ما كونتش لاقى حد فاضى يطلع معايا يعلمنى، واعتمدت على نفسى بعد ربنا طبعا،والحمد لله اهى ماشيه ولكن كل ما اخرج بالسياره ارجع زعلان من نفسى جدا لانى بتطلع منى حاجات فى السواقه مش المفروض انى اعملها اخطاء يعنى والحمد لله ربنا بيسترها معايا لحد دلوقتى
ولكن مشكلتى انى لما بنزل من العربيه بكون زعلان من نفسى على الخطأ اللى عملته بس الحمد لله الاخطاء بتقل تدريجيا،

ما دام بتخرج بالسيارة لوحدك ... يبقى الافضل تخرج بها فى وقت مبكر فى الصباح او فى منطقة خالية .... وامشى بها زى ما انت عايز واتمرن عليها بما فيه الكفاية ... فى "يوتيرن" او على مطالع ... او على كبارى ... او ركن السيارة ... او حساسية الرجل على الدبرياج .... الخ ... وانزل المناطق المزدحمة بالتدريج ... يعنى فى الاول مناطق متوسطة الكثافة ... وبالتدريج مناطق اكثر ازدحام وهكذا ... لكن انا راى ان ما دام حضرتك بتسوق وعندك فكرة ... يبقى الافضل انه يكون معاك سائق خبرة جامد .... تركب معاه كام حصة وتعرف منه الخلاصة.

حاجه تانيه انى بنزل من العربيه تعبان جدا جدا لان الزحمه بتتعب اعصابى والسواقه مش ممتعه لان فى ناس كتير بيخترعوا سواقه فى الطريق والله الموفق

هههههههههههه .... فعلا الواحد بيشعر انه متكسر خصوصا فى الصيف والزحام .... لكن العربية المكيفة هههههههه بتريح برده .... مع الوقت الواحد بيتعود ... وكمان نوع العربية بيفرق ... يعنى انا كنت بتعلم على 128 ... كنت اشعر ان رجلى سخنة زى الفرن بعد التدريب ... وبعدين ركبت عربية شيفروليه جديدة هى كانت نص نقل لكن قيادتها كان سهل جدا جدا وجميلة ... واخيرا اشتريت تويوتا وطبعا اشعر بفرق كبير ... لكن مع الوقت وحب الإنسان لعربيته ... واهمية المشوار .. بتجعل الواحد يحمد ربنا على انه عنده سيارة ... وانه خلص فترة التدريبة والتعليم وانتهى من مشاكلها

مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

ركن السيارة فى الباركينج

بشكل عمودى

لازم الاول اتأكد من ان المساحة اللى هادخل فيها واسعة كفاية
ههههههههههه
لأنك لو دخلت فى مكان ضيق موش هاتعرف تفتح ابواب السيارة


الطريقة الاولى

• وفى الصورة يظهر ان الخطوة الاولى هى التحرك الى الامام حتى تتخطى المكان اللى هاتركن فيه

• تقريبا الخط الأزرق بيكون موازى "لمنتصف السيارة"

• ثم العودة الى الخلف بشكل بطىء حتى تدخل فى المكان المطلوب

الطريقة التانية

• لو كان فيه مساحة واسعة استخدم الطريقة دى

• فى الصورة يظهر ان الخطوة الاولى هى التحرك الى الامام على قدر الإمكان "الى اعلى"

• الخطوة التانية هى العودة الى الخلف والدخول فى خط مستقيم

ارجوا ان اكون وفقت
مع اطيب التمنيات
اخوكم حسين غزالة

[tifa55555]

جزاك الله خيرا سيدى الفاضل

[magid1010]

الف شكر يا استاذ حسين ممكن اقترح عليك نفهرس المواضيع زى اللى فى الينك ده

http://www.nilemotors.net/Nile/124842-a.html

يعنى مثلا ازاى اخد ملف يبق اللينك بتاعه كذا
ازاى اطلع على الكوبرى يبقى اللينك كذا
ازاى ابص و اظبط المرايات يبقى اللينك كذا
واشكرك لرحابه صدرك و دعمك الدائم لينا

[husseinoo]

جزاك الله خيرا سيدى الفاضل


شكرا لحضرتك جدا على الدعاء الجميل

الف شكر يا استاذ حسين

الله يبارك لحضرتك يا استاذ ماجد شكرا لحضرتك

ممكن اقترح عليك نفهرس المواضيع زى اللى فى الينك ده

http://www.nilemotors.net/Nile/124842-a.html

يعنى مثلا ازاى اخد ملف يبق اللينك بتاعه كذا
ازاى اطلع على الكوبرى يبقى اللينك كذا
ازاى ابص و اظبط المرايات يبقى اللينك كذا
واشكرك لرحابه صدرك و دعمك الدائم لينا

هاجرب تانى إن شاء الله
انت عارف ان المشكلة ان اللنك الاصلى بيظهر بجوار النص المكتوب ... ودى حاجة مش ظريفة
يعنى تلاقى بجوار النص عنوان اللنك الاصلى "نصائح سائق جديد ...الخ" واحيانا كان يظهر النص الإنجليزى "nilemotors.com" الخ

فى مواقع تانية
لما تكتب لنك مثلا
"لعمل داونلود اضغط هنا"
لا يظهر إلا الرسالة المكتوبة باللون المختلف
مش عارف ده اوبشن فى المنتدى
ولا إيه السبب ؟

على العموم هاجرب تانى إن شاء الله

شكرا على تواصلك معايا

مع اطيب التمنيات
اخوكم حسين غزالة

[magid1010]

يا باشا العفو ده انت استاذنا يمكن الاستاذ كريم منير يساعدنا و المشرفين فى الموضوع ده

[Sankora]

شكرا استفدت كتير