نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[reco1]

ألف مبروك يا أستاذ حسين على تكريم المنتدى
فالتكريم صادف أهله لأنك تبذل جهد صادق فى الموضوع فأنت تواصل العمل الدؤوب فى هذا الموضوع و تريد منه الخير
و الإستفادة للجميع فجزاك الله كل خير

لكن عاوزين نعرف مستوى الأستاذ حسين فى السواقة وصل لحد فين

[reco1]

هاسأل بعض الأسئلة وارجوا من حضراتكم الإجابة:

1- افترض ان السيارة الخضراء ترغب فى الاتجاه على طول وهى نازلة اصلا من على كوبرى
ايه اللى المفروض يعمله السائق ويراعيه فى الموقف ده
النزول من على الكوبرى لازم أدوس فرامل خفيف علشان العربية سرعتها تهدى شوية فى منزل الكوبرى و أنتبه للسيارات القادمة من اليمين و ألتزم الحارة الوسطى و الإنتباه للسيارات الراكنة جنب الرصيف و أنتبه للسيارات التى تهدى و تعطى إشارة شمال علشان تحاول دخول اليوتيرن و أنتبه للسيارات القادمة من اليمين و تحاول تهدى و تعطى إشارة شمال أيضاً لدخول اليوتيرن

2- افترض ان السيارة الخضراء ترغب فى الدخول على اليوتيرن
أولاً النظر فى المرايات ثم إعطاء إشارة شمال قبل اليوتيرن بوقت كافى و لكن النظر فى المرايات يكون سريع و خاطف لكى لا أصطدم بالسيارات التى تهدى أمامى أو تكسر على علشان تدخل اليوتيرن مع الإلتزام بنفس الحارة بعد الدخول فى اليوتيرن

3- افترض ان السيارة الصفراء ترغب فى الدخول على اليوتيرن
أعتقد نفس الخطوات السابقة

4- افترض ان السيارة الصفراء ترغب فى السير على طول
نفس خطوات السيارة الخضراء و لكن يجب على الجميع الإنتباه للسيار ات الراكنة و تحاول الخروج للطريق

5- افترض ان السيارة الحمراء ترغب فى الاتجاه الى اليمين طوالى
لابد أن تهدى سرعتها ثم النظر فى المرايات و تعطى إشارة يمين و تاخد الملف اليمين على ضيق مع الأخذ فى الإعتبار السيارات القادمة من على الكوبرى و الراكنة على الرصيف و اللى بيفكر يطلع بالعربية من الركنة

6- افترض ان السيارة الحمراء ترغب فى الاتجاه الى اليمين ثم الى اليوتيرن
مرايات + إشارة + أخذ الإتجاه المطلوب بحذر

7- افترض ان السيارة الحمراء ترغب فى الاتجاه الى اليمين ثم الانتقال الى الحارة اليسار
مرايات + إشارة + أخذ الإتجاه المطلوب بحذر

ملحوظة هامة:
على فكرة الكتابة سهلة لكن العبرة بالتنفيذ على الطبيعة
أحياناً بيكون الطريق سريع و زحمة فى نفس الوقت و لما تنتبه للجنبك و أمامك و إذا فجاة تلاقى ميكروباص كاسر عليك
و الطريق سريع و متقدرش تهدى أو تقف فجأة و مهما تبعد عن الميكرباصات الأمر ميسلمش فجأة تلاقيهم أمامك و كأنهم بيطلعوا من تحت الأرض الميكروباص و التاكسى يحسسوك إنهم هما إللى ماشيين فى الشارع لوحدهم إحنا نمشى مركزين حوالينا و حذرين و هما كل تركيزهم إزاى يحدفوا نفسهم و يكسروا على اللى حواليهم علشان يركبوا أو ينزلوا زبون

و متشكرة جداً على تعبك فى إعادة الرسم و منتظرة تصحيحك للكلام اللى أنا كتبته

[EMO_ELNEMS]

بسم الله الرحمن الرحيم
شكرا جدا يا استاذ حسين على مجهودك الرائع وجزاك الله خيرا وألف مبروك على التكريم
عندي سوال غبي شوية
انا اشتريت سيارة مستعملة وحالتها كويسة وانا متعلم القيادة منذ سنة بس مسافرتش مشوار اكتر من 50كيلو وشغال في محافظة تبعد عن القاهرة 850 كيلو
هل اقدر اسافر لوحدي المشوار ده ؟
على فكرة زملائي عملوها وربنا بيستر

[husseinoo]

ألف مبروك يا أستاذ حسين على تكريم المنتدى
فالتكريم صادف أهله لأنك تبذل جهد صادق فى الموضوع فأنت تواصل العمل الدؤوب فى هذا الموضوع و تريد منه الخير
و الإستفادة للجميع فجزاك الله كل خير


شكرا لحضرتك على كلامك الجميل
واتمنى لحضرتك التوفيق والنجاح

لكن عاوزين نعرف مستوى الأستاذ حسين فى السواقة وصل لحد فين

بالنسبة لمستوي القيادة عندى ... الحمد لله فيه تحسن كبير ... ولكن فيه قاعدة مهمة بتقول ان "السواقة ليس لها كبير" .... يعنى على طول لازم تكون حريص ... وتستخدم كل مهاراتك اللى اتعلمتها على قدر الإمكان ...

طبعا بالنسبة للمبتدأين عملية ابعاد السيارة بتحتاج بعض الوقت عشان تتعود عليها خصوصا فى الاماكن الضيقة ....

واكثر الاشياء ازعاج فى القيادة بالنسبة لى هى خروج الآخرين عن النص هههههههههههه مثل سائقى الميكروباص والتاكسيات والنص نقل وبعض السيارات الملاكى المتهورين .... قل الفهم عند البعض هى المشكلة الاساسية ... وهى دى اللى بنحاول فيها مع بعض نفهم ونتناقش ونتعلم كل يوم وبشكل مستمر .... عشان نستفيد وكمان يستفيد كل اخوتنا الجداد فى عملية القيادة ... وربنا ييسر الاحوال للجميع

مع اطيب التمنيات
اخوكم حسين غزالة

[husseinoo]

بسم الله الرحمن الرحيم
شكرا جدا يا استاذ حسين على مجهودك الرائع وجزاك الله خيرا وألف مبروك على التكريم

شكرا لحضرتك جدا

عندي سوال غبي شوية
انا اشتريت سيارة مستعملة وحالتها كويسة وانا متعلم القيادة منذ سنة بس مسافرتش مشوار اكتر من 50كيلو وشغال في محافظة تبعد عن القاهرة 850 كيلو
هل اقدر اسافر لوحدي المشوار ده ؟
على فكرة زملائي عملوها وربنا بيستر

مشوار جامد جدا جدا
تقريبا انا سافرت كثير قوى فى سيارات "بيجو" ونفس المسافة وكانت اماكن التوقف كالتالى
اول مرة فى المنيا
وتانى مرة فى اسيوط
وثالث مرة فى سوهاج
وطبعا الطريق كان ضيق وفى اتجاهين
لكن السائق كان محترف وشغلته ... ومشى فى الطريق ده اكثر من مرة رغم صعوبته

العملية تتوقف على :
نوع الطريق
المسافة
ولازم يكون معاك حد بيعرف يسوق فى الاول عشان يبدل معاك
والاهم "هل الموضوع يستاهل انى استهلك السيارة فى مشوار زى ده ؟
يعنى ببساطة امشى حوالى 2000 كيلوا رايح جاى
طبعا مشوار جامد جدا
يعنى المسافة دى ... ممكن اى واحد بيروح شغله ويرجع ... يمشيها فى 6 شهور هههههههههههه
حافظ على عربيتك احسن
ممكن تروح مصيف مثل اسكندرية 300 كيلوا فى "الظريف اللطيف" مافيش مشاكل
3 ساعات مع استراحة فى النص والامور بتعدى ... وتنام قبلها كويس جدا

انما مسافة كبيرة زى دى .... صعب قوى ... مافيش داعى

انا اعرف واحد كان لسه جديد فى السواقة ... وطلبت معاه انه يسافر الصعيد ... وكان معاه اصدقائة ... السيارة انقلبت به من على الطريق .... ربنا ستر وخرج منها بالسلامة هو واصدقائه

الطرق صعبة جدا
ممكن لا قدر الله تقابلك شبوره ... تعمل لحضرتك مشاكل ... واحنا لسه ناس جديدة فى السواقة
ممكن يكون فيه اجزاء من الطريق "اتجاهين" ويقابلك فيها ناس كثير بعربيات يجرها الحيوانات ... ودى بتعمل مشاكل
او طرق زراعية .. الفلاحين بيعملوا عليها مطبات صناعية "عموله" هههههههههه
حاجات كثير قوى ... اعوذ بالله بتقابلنا على الطرق السريعة

كفاية علينا "بلاعات" الطرق الداخلية فى مصر المحروسة

وربنا يسترها معاك ويبارك فيك وفى اسرتك

مع اطيب التمنيات
اخوكم حسين غزالة

[husseinoo]

هاسأل بعض الأسئلة وارجوا من حضراتكم الإجابة:

1- افترض ان السيارة الخضراء ترغب فى الاتجاه على طول وهى نازلة اصلا من على كوبرى
ايه اللى المفروض يعمله السائق ويراعيه فى الموقف ده
النزول من على الكوبرى لازم أدوس فرامل خفيف علشان العربية سرعتها تهدى شوية فى منزل الكوبرى

المفروض ان سرعتك على الكوبرى لا تزيد عن 60 كيلوا ... ولازم تكون السيارة متعشقة على غيار ... يعنى اوعى "تمورى" الفتيس اثناء النزول من على الكوبرى ... او تضغطى على الدبرياج لفصل الحركة ... عشان العربية تقف معاك بشكل جيد ... وطبعا رجلك لازم تكون على الفرامل جاهزة للتوقف .. ولو شعرتى ان السيارة مندفعة بقوة ... لازم احكمها شوية بالفرامل

اثناء النزول من على الكوبرى ... انظر شوية الى الامام ... انظر بعيد على قدر الإمكان ... لو شاهدت تجمع لسيارات اسفل الكوبرى ... ومتوقع ان السيارات دى تتوقف فى اى لحظة ... استعد للنزول بهدوء ... واحاول اتحكم فى السيارة شوية .... يمكن الزحام اسفل الكوبرى يتحرك شوية ... والعربيات تمشى قبل ما اوصل اليها ....

ويفضل انى اشغل نور الإنتظار فى حالة التوقف اسفل الكوبرى نتيجة الزحام ... ولما الاقى ان العربيات التى فى الخلف ماشية وارايا بهدوء ... خلاص اطفى نور الانتظار وامشى براحة مثل باقى العربيات

لان ممكن لا قدر الله .. تلاقى واحد نازل من اعلى الكوبى و "سرحان" ومرة واحدة يفاجىء ان السيارات متوقفة اسفل الكوبرى والنتيجة موش كويسة وربنا يسترها مع الجميع

يالنسبة لبعض سائقى الميكروباص ... احيانا يتوقفوا اسفل الكوبرى ... فى الحالة دى يبتقى حارة واحدة هى اللى "سالكة" .... فى الحالة دى لازم الواحد يتوقع ان السيارات التى تسير فى اليمين سوف تتجه الى الشمال... عشان تنزل من على الكوبرى .... وتعدى من الميكروباس

يبقى لازم الواحد يكون حريص قوى
ورجله فوق الفرامل وجاهز للتوقف

وطبعا ممكن فى اى لحظة ان الميكروباس المتوقف اسفل الكوبرى ... فى اى لحظة يتحرك مرة واحدة و"يحدف" عليكى ... يبقى لازم انبهه بالكلاكس قبل واثناء المرور من على يساره

ولازم اضرب كلاكسات ... يمكن احد ركاب الميكروباس يفكر يعدى الكوبرى "بالمرة" ... ويعمل لنا مشكلة


و أنتبه للسيارات القادمة من اليمين و ألتزم الحارة الوسطى

ده كلام سليم ومية مية
ما دام انا ماشى الى الامام يفضل عدم السير فى حارة "اليوتيرن" التى على اليسار

لكن لو قدرت انى اتحرك الى الحارة اليمنى ... يكون افضل ... عشان تبتعدى تماما عن منطقة اليوتيرن ... وهاتلاقى نفسك ماشية بشكل مستمر وسليم لماذا ؟؟

السيارات التى تسير فى الحارة الوسطى
سوف تفاجىء بسيارات خارجة من اليوتيرن ... وسوف تتوقف آجلا او عاجلا
وممكن تتوقف بسبب سيارات تسير فى الحارةالوسطى وترغب فى الدخول الى اليوتيرن

عشان كده فى منطقة اليوتيرن
افضل مكان انك تمشى فى اول حارة بعيد عن اليوتيرن ... وهاتلاقى نفسك ماشى بهدوء لكن بشكل مستمر وآمن


و الإنتباه للسيارات الراكنة جنب الرصيف

عشرة على عشرة ... و رجلى تكون جاهزة فوق الفرامل ... لو فيه شوية صبر ... اترك فرصة للسيارة المتوقفة انها تدخل الشارع وانتظر انا شوية ... لو مافيش فرصة ... يبقى اضرب للسيارة المتوقفة اكثر من كلاكس عشان ياخد باله

ولو كنت ماشى بالليل
انور له النور الفلاشر اكثر من مرة عشان يتوقف مكانه


و أنتبه للسيارات التى تهدى و تعطى إشارة شمال علشان تحاول دخول اليوتيرن

ممتاز ... لو وجدت ان فيه سيارة داخل اليوتيرن ... وفيه فرصة انى اتركه يدخل بسلام ... مافيش مشاكل ... اكبر انا دماغى ... واصبر شوية واتركه يدخل امامى ... عادى خالص

و أنتبه للسيارات القادمة من اليمين و تحاول تهدى و تعطى إشارة شمال أيضاً لدخول اليوتيرن

تمام ... لو وجدتى فرصة ... انك تدخلى قبل السيارات القادمة من على اليمين ... ادخلى بلا تردد
لكن لو وجدتى انه مافيش فرصة
انتظر شوية
واحاول الابتعاد عن الحارة الوسطى
لان زى ماقلت ان الحارة الوسطى والحارة اليسار فى الغالب بيكون فيهم مشاكل بسبب "اليوتيرن"
وافضل مكان هو الحارة اليمنى اثناء المرور من اليوتيرن



2- افترض ان السيارة الخضراء ترغب فى الدخول على اليوتيرن
أولاً النظر فى المرايات ثم إعطاء إشارة شمال قبل اليوتيرن بوقت كافى و لكن النظر فى المرايات يكون سريع و خاطف لكى لا أصطدم بالسيارات التى تهدى أمامى أو تكسر على علشان تدخل اليوتيرن مع الإلتزام بنفس الحارة بعد الدخول فى اليوتيرن

والله لو فيه فرصة انك تدخلى فى الحارة المجاورة للرصيف ... يكون احسن طبعا
لكن لو مافيش فرصة ... يبقى استمر فى الحارة اللى انا ماشى فيها ... واحترس اثناء الدخول فى اليوتيرن
انا عن نفسى ... اعطى إشارة
وكمان اخرج ايدى من الشباك هههههههه
واشاور للسيارات القادمة من الخلف انى داخل اليوتيرن
واعتذر له عن انه هاتأخر بسببى شوية

وكمان فيه حاجة ظريفة عايز اقولها للاخوة المبتدئين مثل حالاتى:
هههههههه اثناء المرور فى اليوتيرن ... ممكن تستخدم ايد واحدة لمسك الدركسيون وباليد التانية تشاور للسيارات التى بجوارك انك داخل اليوتيرن ... ولو سمحتم الإنتظار شوية ... الطريقة دى ههههههههه بتجيب نتيجة كويسة قوى ... لكن لا تستعملها مع سائقى التاكسى والميكروباس والنص نقل



3- افترض ان السيارة الصفراء ترغب فى الدخول على اليوتيرن
أعتقد نفس الخطوات السابقة
بالنسبة للسيارة الصفراء ... المسافة اصبحت قريبة جدا من اليوتيرن ..
عشان كده يفضل انه يلتزم بالحارة التى يسير فيها حتى ينتهى من الدخول على اليوتيرن
وطبعا مافيش داعى للسير بالتوقع
يعنى يتوقع ان السيارة امامه انها مثلا مستمرة فى السير على طول ... ومرة واحدة تكون المفاجئة انه داخل اليوتيرن
او العكس




4- افترض ان السيارة الصفراء ترغب فى السير على طول
نفس خطوات السيارة الخضراء و لكن يجب على الجميع الإنتباه للسيار ات الراكنة و تحاول الخروج للطريق

لو السيارة الصفراء ترغب فى السير على طول يفضل اعطاء إِشارة يمين ... متفطعة عشان الماشى فى الخلف يعرف انك موش هاتدخل اليوتيرن
انا عن نفسى احيانا كثير جدا ... اشاور بإيدى انى مستمر فى السير الى الأمام ... عشان الماشى خلفى يعمل حسابه
وطبعا بتوقع ان السيارة التى امامى داخلة اليوتيرن
ورجلى دائما فوق الفرامل
ونظرى بيكون فى كل الحالات على السيارات التى تسير امام السيارة التى امامى
ولو قدرت انظر ابعد من ذلك يكون افضل
ودائما بحافظ على المسافة بينى وبين السيارة التى امامى


5- افترض ان السيارة الحمراء ترغب فى الاتجاه الى اليمين طوالى
لابد أن تهدى سرعتها ثم النظر فى المرايات و تعطى إشارة يمين و تاخد الملف اليمين على ضيق مع الأخذ فى الإعتبار السيارات القادمة من على الكوبرى و الراكنة على الرصيف و اللى بيفكر يطلع بالعربية من الركنة

الموقف ده من المواقف الصعبة شوية
لازم اعرف ان الاولوية للسيارات القادمة من على الشمال
وفى الحالة دى الاولوية للسيارات القادمة من على الكوبرى
وطبعا لازم اقدر سرعتها
وانظر نظرة خاطفة على السيارات الراكنة بجوار الرصيف
لو فيه سيارة راكنة صف تانى ... يبقى لازم اعمل حسابى
المهم
انظر نظرة خاطفة على السيارات القادمة من على الكوبرى
لو وجدات اوتوبيس او ميكروباص او تاكسى او نص نقل
على اكبر دماغى وانتظر شوية
لو فيه فرصة للدخول ... اجهز السيارة على الغيار الاول
وادخل بهدوء جدا
وممكن اشاور من الشباك بإيدى انى داخل بعد إذنك
وانا داخل انظر على السيارات التى امامى
وانظر على السيارات التى امام السيارة التى امامى
واحافظ على المسافة بينى وبين السيارة التى امامى
واحترس اثناء الدخول فى الشارع الرئيسى ان السيارة تحدف منى على السيارات الراكنة واصطدم بها لا قدر الله


6- افترض ان السيارة الحمراء ترغب فى الاتجاه الى اليمين ثم الى اليوتيرن
مرايات + إشارة + أخذ الإتجاه المطلوب بحذر

هنا لازم ادخل بحرص شديد
يعنى موش لازم من اول مرة انقل نفسى من الحارة اليمين الى الحارة الوسطى الى الحارة الشمال
لأ
براحة قوى
انظر خلفى
واشوف مين اللى ماشى ورايا
لو سيارة ملاكى هههههههههههه يبقى فيه امل ان العملية تتم بنجاح
المهم انى انقل نفسى براحة قوى
سنة ... سنة
لو سمعت كلاكس ... يبقى خلاص اعدل نفسى وامتنع عن التحرك ناحية الشمال
وكمان انظر الى السيارة التى تسير امامى ... والسيارة التى تسير بجوارى
لو السيارة التى تسير امامى داخلة اليوتيرن
يبقى الافضل انى ادخل وراها
لو السيارة التى بجوارى ماشية على طول
يبقى الافضل انى انتظر وادخل وراه براحة
واول ما يمشى على طول ادخل انا شمال براحة قوى

الخلاصة: انى ادخل شمال براحة قوى
واعطى اشارة
واشاور من الشباك بإيدى لو استطعت ... مافيش مشاكل
ولو كنت بشوف كويس فى المرايات ... طبعا يكون افضل
لكن الكثير منا اثناء الزحام ينسى موضوع المرايات ده
وممكن اثناء النظر فى المراية ... يخبط السيارة التى امامه

لازم احافظ على المسافة بينى وبين السيارة التى امامى ... متر على الاقل ... ودى قاعدة نهائية بدون مناقشة


7- افترض ان السيارة الحمراء ترغب فى الاتجاه الى اليمين ثم الانتقال الى الحارة اليسار
مرايات + إشارة + أخذ الإتجاه المطلوب بحذر

ملحوظة هامة:
على فكرة الكتابة سهلة لكن العبرة بالتنفيذ على الطبيعة
أحياناً بيكون الطريق سريع و زحمة فى نفس الوقت و لما تنتبه للجنبك و أمامك و إذا فجاة تلاقى ميكروباص كاسر عليك
و الطريق سريع و متقدرش تهدى أو تقف فجأة و مهما تبعد عن الميكرباصات الأمر ميسلمش فجأة تلاقيهم أمامك و كأنهم بيطلعوا من تحت الأرض الميكروباص و التاكسى يحسسوك إنهم هما إللى ماشيين فى الشارع لوحدهم إحنا نمشى مركزين حوالينا و حذرين و هما كل تركيزهم إزاى يحدفوا نفسهم و يكسروا على اللى حواليهم علشان يركبوا أو ينزلوا زبون


كلام حضرتك ممتاز جدا وسليم جدا ... بارك الله فيكى
لو شاءت الظروف انى استمر فى السير وادخل من يوتيرن فى مكان آخر مافيش مشاكل
انا عن نفس بعمل الحكاية دى كل يوم
بدل ما ادخل فى يوتيرن زحمة وكله مشاكل
امشى شوية صغيرين ... وادخل من يوتيرن اسهل بكثير وبعيد عن المشاكل
وربنا يسترها مع الجميع

و متشكرة جداً على تعبك فى إعادة الرسم و منتظرة تصحيحك للكلام اللى أنا كتبته

انا اللى شاكر لحضرتك
وانتظر من حضرتك الكثير من المشاركات القيمة
مع اطيب التمنيات
اخوكم حسين غزالة

[magid1010]

الف الف مبروك يا استاذ حسين على تكريم المنتدى و بانتظار المزيد معلش التوقيع بتاعك مش بيظهر عندى
بيظهر كده
[SIGPIC]http://www.nilemotors.net/Nile/signaturepics/sigpic40184_4.gif[/SIGPIC]

[husseinoo]

الف الف مبروك يا استاذ حسين على تكريم المنتدى و بانتظار المزيد معلش التوقيع بتاعك مش بيظهر عندى
بيظهر كده
[sigpic]http://www.nilemotors.net/nile/signaturepics/sigpic40184_4.gif[/sigpic]

شكرا جزيلا لحضرتك
واتمنى لحضرتك الصحة والسعادة

مع اطيب التمنيات
اخوكم حسين غزالة

[reco1]

السلام عليكم يا استاذ حسين

خطر على بالى سؤال حالاً و مش عارفة إذا كنت حضرتك إتكلمت عنه هنا فى هذا الموضوع أو لم تتكلم عنه و هو
لو أنا داخلة شارع و بدور على محل معين يعنى مكان أو محل أو عنوان لم أذهب له من قبل
ما هى الطريقة الصحيحة للبحث عن مكان أو عنوان أو محل أثناء القيادة و خصوصا فى الأماكن اللى فيها زحمة سيارات و زحمة مشاه يعنى مثلاً الشوارع فى مدينة نصر المسافات و الشوارع فيها كبيرة ( مثلاً شارع عباس العقاد ) يعنى أحياناً مينفعش إنى أركن السيارة و أدور سيراً على الأقدام لازم و أنا سايقة
الموضوع لو حصل عندى إحساس أنى هاعمل إرتباك حولى و الكلاكسات هتشتغل و يمكن أخبط فى اللى أمامى بسبب إنى أبحث عن محل معين بصراحة الموقف ده عاوزة أعرف التعامل الصحيح معاه و الأمن فى نفس الوقت


كمان لو لم أجد مكان لركنة السيارة أتصرف إزاى

[EMO_ELNEMS]

بسم الله الرحمن الرحيم
شكرا لاهتمامك بالرد.
وفعلا عند حضرتك حق وسوف أخد بنصيحتك الغالية

[husseinoo]

السلام عليكم يا استاذ حسين

خطر على بالى سؤال حالاً و مش عارفة إذا كنت حضرتك إتكلمت عنه هنا فى هذا الموضوع أو لم تتكلم عنه و هو
لو أنا داخلة شارع و بدور على محل معين يعنى مكان أو محل أو عنوان لم أذهب له من قبل
ما هى الطريقة الصحيحة للبحث عن مكان أو عنوان أو محل أثناء القيادة و خصوصا فى الأماكن اللى فيها زحمة سيارات و زحمة مشاه يعنى مثلاً الشوارع فى مدينة نصر المسافات و الشوارع فيها كبيرة ( مثلاً شارع عباس العقاد ) يعنى أحياناً مينفعش إنى أركن السيارة و أدور سيراً على الأقدام لازم و أنا سايقة
الموضوع لو حصل عندى إحساس أنى هاعمل إرتباك حولى و الكلاكسات هتشتغل و يمكن أخبط فى اللى أمامى بسبب إنى أبحث عن محل معين بصراحة الموقف ده عاوزة أعرف التعامل الصحيح معاه و الأمن فى نفس الوقت


كمان لو لم أجد مكان لركنة السيارة أتصرف إزاى

هههههههههه اهلا وسهلا بحضرتك
ببساطة
لو الشارع انا موش عارف مكانه
ابدأ فى البحث عن المكان فى "جوجل ايرث"
مثلا فى مكان معين فى السيدة زينب انا اول مره عايز اروحه
وانا اساسا عمرى فى حياتى ما رحت السيدة زينب بعربية ...
المهم عرفت المكان ... وعرفت كيفية الدخول اليه والخروج والعودة
بعد كده
خرجت يوم جمعة الساعة 8 صباحا
وذهبت الى نفس المكان
رجعت تانى زى ما خريطة جوجل كانت موضحة

تانى مرة
نزلت فى الزحام بقلب جامد
لانى عرفت المكان كويس جدا

بالنسبة للبحث عن محل معين
دى عملية صعبة وكلها مشاكل

يا اما ابحث عنه فى الصباح الباكر براحتى قوى
والمرة التالية انزل فى توقيت الحركة فيه تكون خفيفة ... اشترى اللى انا عيزه وارجع تانى
مثلا انزل فى وقت ماتش الاهلى هههههههههههههه

او الافضل انى ابحث على باركينج ... واركن السيارة وانزل ابحث براحتى

لكن
لو الشارع واسع
يبقى يفضل انى اشغل الانتظار
وامشى فى الحارة اليمين
وياريت يكون فيه حد راكب بجوارك ... وهو اللى يبحث عن المحل المطلوب

والله اعلم

مع اطيب التمنيات
اخوكم حسين غزالة

[reco1]

شكراً يا أستاذ محمود على هذه الأفكار المبتكرة أنا فعلاً إستعملت جوجل إرث لمعرفة الشوارع المحيطة بسكنى بعد ما ذكرت البرنامج فى هذا الموضوع بالرغم إنى أعرف هذا البرنامج و إستعملته من قبل لكن لم أفكر فيه فى البداية لكن عيب جوجل إرث إنه مش مكتوب أسماء الشوارع فمن المفيد إستعمال خريطة للقاهرة موضح فيها أسماء الشوارع مع هذا البرنامج هتكون الفايدة أكبر لأن طالما همشى بسيارتى فلابد إنى أعرف أسماء و أماكن الشوارع الرئيسية فى كل حى أو منطقة و من خلال معرفتى بالشوارع الرئيسية أقدر أوصل لأى شارع فرعى
عجبتى كمان فكرة الطلعة الإستكشافية يوم الجمعة الصبح الساعة 8
و كمان إتحلت مشكلة الركنة هاستنى وقت ماتش الأهلى و أخلص مشاويرى هو ده الوقت اللى ممكن أجد مكان أركن فيه

[amrezzat82]

ممكن تستخدم موقع
wikimapia.org
google maps
yellow pages
حيحدد مكان اي حاجة بتدور عليها

بالنسبة فى الشارع أحسن حاجة تبقى يمين و تدوس أنتظار تهدي شويتين و تدور براحتك و لو حاد رخم و عايز يعدي من اليمين لو عرفت تعديه ماشي لو مش عارف يضرب دماغة فى الحيط و يسلك نفسه فى الجانب الشمال

[amrezzat82]

عايز أسأل الناس اللى بتفهم فى السواقة
ليه كل ما أنا أتعلم أسوق أحسن و ألتزم بالحارات و عدم الرمي على اللى جنبي و السرعات
ألاقي الناس كأنها فى ملاهي و كله فى البتنجان و بيرمي عليك و كأن فى ناس قليلة جدا بتفهم و الباقي كله فى البتنجان ولا سواقين الميكروباصات
حتى العربيات النقل و النص و المقطورة و الترلا لازم ترمي عليك و تاخد غرز على الصحراوي او الدائري
مش عارف ايه كمية الملاهي و التهريج ده

[doctor_blue]

موضوع رائع ومثمر حقيقى، طويل بعض الشئ خصوصاً إنى لسه مكتشفه من يومين فقط.. لكن فعلاً تعليمى بشكل ممتع

القصة وما فيها انى قررت اتعلم سواقة.. رحت مدرسة جنب البيت عندنا.. الفكرة بقى انها تقريباً اشهر مدرسة فى المنطقة وبقالها ييجى 20 سنة

المدرب فى منتهى - آسف - السخافة.. لأنه ببساطة رغاى وسوقى وفهلوى ومعندوش "منهج" فى التعليم سواء ميكانيكياً من ناحية كيفية التعامل مع الآلة، أو أخلاقياً لأنه لم يأتى على ذكر أى آداب للسواقة ومبدأه هو "طالما تجيبك عدّى"!!
طبعاً هو غير متعلم لكن عنده فلسفة "لوذعية" فى تعليم القيادة.. بيقولك أولاً هو "تدريب" مش تعليم.. تدريب على ميكانيكة الأداء واكتساب المهارة بدون فهم (ده نقل عن لسانه على فكرة.. بيتكلم بالفصحى حضرته).. طبعاً انا مش نافع معايا قصة (دوس - انقل - ارفع - سيب - هات يمين - خد عليك - الخ الخ) من غير ما افهم حقيقى انا باعمل كدة ليه؟ وايه التصرف السليم فى العادى وفى المواقف الخاصة عشان ماتعلمش حركات غلط تفضل معايا على طول

المهم.. هل فى مصدر الواحد ممكن يتعلم منه صح؟ سواء كتاب، فيديو او حتى مدرسة تانية حد يرشحها ليا؟

وأخيراً نصيحة لكل المقبلين على تعلم السواقة..اوعى تدفع تمن الدورة بالكامل وخد بنظام الحصة عشان لو معجبكش المدرب تسيبك منهم وتشوف حد تانى