نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

عايز أسأل الناس اللى بتفهم فى السواقة
ليه كل ما أنا أتعلم أسوق أحسن و ألتزم بالحارات و عدم الرمي على اللى جنبي و السرعات
ألاقي الناس كأنها فى ملاهي و كله فى البتنجان و بيرمي عليك و كأن فى ناس قليلة جدا بتفهم و الباقي كله فى البتنجان ولا سواقين الميكروباصات
حتى العربيات النقل و النص و المقطورة و الترلا لازم ترمي عليك و تاخد غرز على الصحراوي او الدائري
مش عارف ايه كمية الملاهي و التهريج ده

ههههههههههههههههه
ده الاحساس الطبيعى عندنا كلنا
تشعر ان الناس المحترمة هى اللى بتمشى بصعوبه
وتشعر انك من كوكب تانى
وان كل السيرك اللى حواليك ... ينظر اليك اكنك موش بتفهم حاجة
لكن
لا قدر الله لما يحصل مشكلة ... الواحد على طول بيعرف انه ماشى صح ... وربنا اللى بيسترها فى الاول والآخر

الاسبوع الماضى
شاهدت مينى باص اخضر خابط فى سيارة نقل
والنتيجة المذهلة انى وجدت سيارة اسعاف ... عشان المينى باص
تخيل انت حجم الحادث
والسبب ببساطة ان الافندى نازل من القلعة ... الى السيدة عائشة والشارع منحدر بشدة ولا يسمح بالسرعة اطلاقا
يعنى ابسط انواع القواعد ... انك نازل من مكان عالى ... يبقى لازم اكون معشق السيارة ورجلى فوق الفرامل ... واضغط عليها بدرى ... عشان اتحكم فى السرعة
ايه اللى استفادوا ... "المعلم سائق المينى باص" ... بالفهلوة وقلة الادب اللى هو ماشى بيها

نصيحة: تحط دماغك فى الثلاجة قبل النزول الى شوارع المحروسة
لكن لازم تلتزم بكل قواعد القيادة الدقاعية ... كأسلوب آمن ومناسب للكثير من المبتدأين زى حالتنا ... حتى ولو كان اللى حواليك ماشيين فى سيرك ... وربنا يسترها مع الجميع

مع اطيب التمنيات
اخوكم حسين غزالة

[husseinoo]

موضوع رائع ومثمر حقيقى، طويل بعض الشئ خصوصاً إنى لسه مكتشفه من يومين فقط.. لكن فعلاً تعليمى بشكل ممتع

القصة وما فيها انى قررت اتعلم سواقة.. رحت مدرسة جنب البيت عندنا.. الفكرة بقى انها تقريباً اشهر مدرسة فى المنطقة وبقالها ييجى 20 سنة

المدرب فى منتهى - آسف - السخافة.. لأنه ببساطة رغاى وسوقى وفهلوى ومعندوش "منهج" فى التعليم سواء ميكانيكياً من ناحية كيفية التعامل مع الآلة، أو أخلاقياً لأنه لم يأتى على ذكر أى آداب للسواقة ومبدأه هو "طالما تجيبك عدّى"!!
طبعاً هو غير متعلم لكن عنده فلسفة "لوذعية" فى تعليم القيادة.. بيقولك أولاً هو "تدريب" مش تعليم.. تدريب على ميكانيكة الأداء واكتساب المهارة بدون فهم (ده نقل عن لسانه على فكرة.. بيتكلم بالفصحى حضرته).. طبعاً انا مش نافع معايا قصة (دوس - انقل - ارفع - سيب - هات يمين - خد عليك - الخ الخ) من غير ما افهم حقيقى انا باعمل كدة ليه؟ وايه التصرف السليم فى العادى وفى المواقف الخاصة عشان ماتعلمش حركات غلط تفضل معايا على طول

المهم.. هل فى مصدر الواحد ممكن يتعلم منه صح؟ سواء كتاب، فيديو او حتى مدرسة تانية حد يرشحها ليا؟

وأخيراً نصيحة لكل المقبلين على تعلم السواقة..اوعى تدفع تمن الدورة بالكامل وخد بنظام الحصة عشان لو معجبكش المدرب تسيبك منهم وتشوف حد تانى

هههههههههههه
للاسف الكثير من مدارس القيادة ... "بطيــــــــــــخ"
وموش لازم كل اللى بيعرف يسوق ... يعرف يعلم
لكن والله احيانا ناس تقول انها اتعلمت على ايد سائقين وبشكل ممتاز
انا عن نفسى اتعلمت مع احد اصدقائى ... زى ما كتبت فى بداية المشاركة ... لكن عشان الراجل مشغول ... كل اللى خرجت معاه مرتين او ثلاثة
لكن هو ممتاز ومتعلم وفاهم

حاول تقرأ معانا شوية
وتشارك بتجاربك
ولو ظهر اى حد بيعلم كويس ... ممكن الاصدقاء يكتبوا لنا تليفونه
وربنا ييسر الاحوال

مع اطيب التمنيات
اخوكم حسين غزالة

[husseinoo]

تعلم القيادة فى 10 ايام

مراجعة القواعد الاساسية فى القيادة

• اذا كنت لا تستطيع رؤية نمرة السيارة التى امامك على مسافة 20 متر ... فى هذه الحالة الافضل انك ترتدى النظارة الطبية الخاصة بك.

• يجب ان تهدىء من سرعتك اذا كانت الشمس فى وجهك

• اذا كنت تسير ليلا ... الافضل عدم ارتداء نظارات شمسية

• لا تتحدث اطلاقا فى الموبايل ... او تنظر الى من يجلس بجوارك وتتحدث معه

يجب ضبط المقعد ومسند المقعد بشكل مناسب حسب طولك كما فى الصورة

الاطفال لهم مقعد خاص بهم .. ويجب ربط الحزام الخاص بهم بإحكام ... وغير مسموح لهم بالجلوس فى المقعد الامامى ... ممكن تتلخبط ويحصل لك مشاكل بسببهم

• لا تستعمل اشارات السيارة فى وقت مبكر او متأخر ... ومن الممكن استخدام اشارات يدويه اذا لزم الامر

• افضل طريقة لكى تتوقف السيارة ... هو التوقف مبكرا ولكن بطريقة هادئة وليست مفاجأة للقادم من الخلف ... يعنى اضغط فرامل خفيف قوى حتى تتوقف السيارة بهدوء وبدون مفاجأت

• الحد الاقصى للسرعة ... ليس معناه انك لازم توصل بسرعة السيارة الى هذا الحد ... ولكن معناه انك لا يجب ان تتخطى الحد الاقصى للسرعة على الطريق

• شارك الطريق مع الآخرين ... يوجد على الطريق مشاه .. اطفال ... دراجات ... موتوسيكلات ... سيارات ... الخ ... انت لا تسير وحدك على الطريق ... عشان تمشى بسرعة زيادة ... ولا تتعجل السير بسرعة حتى ولو سمعت كلاكسات من الخلف ... خصوصا فى الشوارع المزدحمة.

• حافظ دائما على مسافة مناسبة بينك وبين السيارة التى امامك ... ودى اهم قاعدة فى القيادة ... على الاقل 2 ثانية

• واحترس من السيارات القادمة من الخلف التى تريد ان تدفعك الى الاقتراب بشكل غير مناسب من السيارة التى امامك.

• قبل تغير الحارة التى تسير فيها الى حارة اخرى يجب :

1. ان تنظر جيدا فى المرايا
2. ان تنظر جيدا فوق كتفك على المنطقة العمياء للسيارة
3. اذا وجدت فرصة مناسبة ... لازم تستخدم الاشارات
4. ثم تبدأ فى التحرك بشكل بطىء ومتدرج من حارة الى حارة اخرى

اذا كنت تسير فى طريق مزدحم ... فلا داعى ان تتوقف وتقطع الطريق السالك على السيارات الاخرى ... انظر الى السيارة التى عليها دائرة لو تقدمت خطوه واحدة النتيجة انها هاتقطع الطريق الآخر ... طبعا الموضوع ده محتاج قبل مهارة القيادة ... ان السائق يكون عنده "اخلاااااااااااااق"

انظر فوق كتفك لكشف المنطقة العمياء للسيارة ... خصوصا قبل التحرك او اثناء الانتقال من حارة الى حارة

يجب ان تتعامل مع راكبى الدراجات والموتوسيكلات ... مثل باقى السيارات
يعنى لازم تعطى لهم نفس المساحة وتبتعد عنهم تماما اكنهم راكبين عربية مثلك
لانهم فى اى لحظة من الممكن ان يتوقف .. وينزل رجله على الارض ... ده غير اللى بيعمل منهم اكروبات فى الشارع اكنه فى السيرك

لازم تعدى من السيارة التى امامك بحرص ... ولا تقطع عليها الطريق بسرعة زيادة عن اللزوم
ولازم تتأكد انه فيه مساحة كافية قبل المرور من السيارة التى امامك ... وطبعا لازم عربيتك تكون سرعتها اعلى من السيارة التى امامك

الاولوية على طول للمشاة ... خصوصا للمشاة اللى بدأو فى النزول وعبور الشارع
رجلك على طول تكون جاهزة على الفرامل ... وتتركه يعدى فى سلام ... ولا تتسرع بسبب السيارات التى تسير خلفك

لا تتوقف على الخطوط البيضاء المتقطعة او على المناطق المخصصة لعبور المشاة

توقف فى المكان المناسب قبل الدخول شمال

انظر الى الخط المنقط بالأزرق
صاحب السيارة الخضراء فى الصورة اليمين ... توقف مبكرا فى مكان خطأ

اما فى الصورة الشمال ... توقف قبل الخط الازرق تماما وفى الحارة الشمال ... فى الحالة دى لم يتسبب فى مشاكل للسيارات الاخرى

تابـــــــــــــــع
مع اطيب التمنيات
اخوكم حسين غزالة

[reco1]

السلام عليكم أستاذ حسين
أنا لى رجاء عند حضرتك ياريت لو رسومات الموضوع بالكامل بالشرح موجودة عندك على الكومبيوتر فى ملف كامل أو حتى عدة ملفات تضعها لنا فى المرفقات لأنى كل ما أرجع لأى موقف و أريد مراجعته مرة أخرى لا أجد الرسومات أو تضع الرسومات عن طريق النسخ و اللزق فى الموضوع نفسه أفضل كتير من تحميل الرسومات على مواقع لأن الموقع يمسح الصورة بعد كام يوم أنا دلوقتى مش عارفة أتابع أى موقف من المواقف السابقة لأن الرسومات إتمسحت
و جزاك الله كل خير

[husseinoo]

السلام عليكم أستاذ حسين
وعليكم السلام ورحمة الله وبركاته

أنا لى رجاء عند حضرتك ياريت لو رسومات الموضوع بالكامل بالشرح موجودة عندك على الكومبيوتر فى ملف كامل أو حتى عدة ملفات تضعها لنا فى المرفقات لأنى كل ما أرجع لأى موقف و أريد مراجعته مرة أخرى لا أجد الرسومات أو تضع الرسومات عن طريق النسخ و اللزق فى الموضوع نفسه أفضل كتير من تحميل الرسومات على مواقع لأن الموقع يمسح الصورة بعد كام يوم أنا دلوقتى مش عارفة أتابع أى موقف من المواقف السابقة لأن الرسومات إتمسحت
و جزاك الله كل خير


والله موضوع ان السيرفر المستخدم فى السايت ... لما وقع السيرفر ... طبعا ادارة السايت كانت عايزة ترجع السايت باسرع وقت ... وطبعا كان لازم تخف كل الصور من السايت .. ودى كانت اكبر مفاجأة لى

ان اكثر من 60 % من المشاركات الصور اتمسحت منها

حتى موضوع رفع الصور على السايت اصبح غير متاح

يعنى لازم ارفع الصور على موقع آخر وبعد كده ارجع تانى اضع اللنك الخاص بها فى المشاركة


طبعا الحكاية دى قللت شوية من المشاركات


بالنسبة للمشاركات الاولى ... ودى فعلا كانت مهمة جدا

ربنا يسهل
بعد ما ننتهى من مراجعة موضوع التعليم فى 10 ايام

نحاول نعيد ونراجع المشاركات الهامة مع الصور إن شاء الله


وانا تحت امر حضرتك

مع اطيب التمنيات
اخوكم حسين غزالة

[reco1]

شكراً يا أستاذ حسين

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

مراجعة القواعد الاساسية فى القيادة

انظر الى الصورة السابقة ... افترض انك داخل يمين
لكن واضح انه فيه بعض المشاة واقفين على الرصيف
وكمان فيه سيارة حمراء راكنة على الناصية
والاثنين يحجبوا الرؤية عنك
ماذا تفعل ؟
انا اعتقد ان الافضل لك ... انك تتحرك شوية الى الامام بجسمك .. وتحاول ان تنظر جيدا ... وممكن قبل الدخول استخدام الكلاكس للتحذير والدخول طبعا لازم يكون بشكل بطىء حتى تطمئن ثم تواصل الدخول فى الشارع

لازم تعرف ان الدراجة لن تتوقف بسهولة ... وتحتاج الى مسافة كبيرة لكى تتوقف
عشان كده اوعى تتوقف امام الدراجة ... وتعتقد انه سوف يتوقف بسهولة

مثلا لو حبيت انك تدخل اول يمين... ولكن فى نفس الوقت يوجد دراجة تسير على يمينك
فى الحالة دى لازم الانتظار والصبر قليلا حتى يمر من امامك راكب الدراجة ثم توصال السير انت من خلف راكب الدراجة والدخول شمال زى ما انت عايز
اما لو كانت سرعتك اعلى والمسافة كبيرة
وانت حاسبها انك سوف تسبق طبعا راكب الدراجة ... وانك سوف تهدىء السيارة بشكل مناسب والدخول يمين ... بدون التوقف المفاجىء امام راكب الدراجة .... الله يكرمك ... راكب الدراجة ممكن لو توقفت امامه بشكل غير مناسب ... انك تلاقيه فوق شنطة عربيتك لا قدر الله ... وربنا يسترها مع الجميع

الخط المتصل ده يا جماعة معناه ممنوع التخطى الى الحارة الثانية
يعنى غير مسموح انك تنقل نفسك من حارة الى حارة
احيانا تلاقى خط متصل فوق الكوبرى ... وفى الحالة دى لازم الالتزام بالحارة التى تسير فيها ولا تفكر اطلاقا فى الانتقال الى الحارة الاخرى
لكن
طبعا لازم تلاقى ناس متهورة او موش فاهمة حاجة خالص
للتوضيح ... معروف طبعا ان الكوبرى محتاج قوة دافعة للسيارة عالية لكى تستيطع الصعود فوق الكوبرى بشكل مناسب
والعربيات بتكون قادمة بشكل سريع
وفجأة يظهر امامك واحد ذكى ... ويحاول ينقل نفسه من حارة الى حارة ... طبعا النتيجة هاتكون سيئة جدا ... وربنا يحفظنا احيانا عربيات تسقط من فوق الكوبرى بسبب الجهل والتهور

نفس الشىء اسفل الكوبرى
تجد خط متصل
معناه الالتزام بحارتك
لان فيه سيارات قادمة اسفل الكوبرى
ومرة واحدة تظهر سيارة من فوق الكوبرى تنقل نفسها امام السيارات القادمة بسرعة اسفل الكوبرى وتحدث مشاكل رهيبة
او داخل الانفاق

الخلاصة: الخط المتصل ده مهم جدا جدا جدا ... انك تعمل له الف حساب وربنا يسترها مع الجميع

فى الصورة ظهرت امامك سيارة نقل وتريد المرور منها
وفى نفس الوقت ظهر لك سيارة ملاكى مرت من السيارة النقل
هل المفروض انى امر انا كمان خلف السيارة الملاكى
طبعا لأ
لأن المرور من على اليمين المفروض خطأ
والافضل الإنتظار حتى تنتقل السيارة النقل الى اليمين وتستمر انت فى السير وتمر من على شمالها
او على الاقل لو حبيت امر من السيارة النقل ومافيش فايدة خلاص
على الاقل انظر جيدا لمسافة بعيدة ... قبل الدخول ... لكشف الطريق وتحديد المسافة التى سوف احتاج لقطعها قبل المرور من السيارة النقل
وطبعا يا ريت عدم الاقتراب من السيارة النقل من الخلف ... لان بالتأكيد سائق النقل لن يراك فى المراية ... لان المنطقة الخلفية للسيارة النقل تعتبر من المناطق العمياء التى لا يراها سائق النقل ... عشان كده لازم تترك مسافة جيدة جدا بعيد عن السيارة النقل ... مسافة تسمح لك بالتوقف الآمن لو توقفت السيارة النقل بشكل مفاجىء

مرة تانية نحذر من الاوتوبيسات
لازم تكون واخد بالك كويس جدا من الاوتوبيس ... الاوتوبيس ممكن يتحرك مرة واحدة بدون مقدمات
وممكن الناس اللى راكبة تظهر امامك بشكل مفاجىء

نرجع مرة تانى وتالث للميادين
وواضح من الصورة ان اللى ماشى على طول يدخل الميدان من الخارج ... مثل السيارة الزرقاء
اما لو كنت ناوى تلف الميدان يبقى لازم تتبع المسار الاخضر مثل السيارة الخضراء

بالنسبة للسيارة البرتقالى ... واضح انه التزم الحارة المجاورة للرصيف اثناء دورانه .. يعنى بالبلدى كده مانزلش نص الشارع عشان يلف
لأ
التزم بالحارة المجاورة للرصيف

انظر جيدا الى الصورة
تلاحظ ان السيارة الزرقاء التزمت الحارة اليمين قبل الدخول فى الميدان
يعنى ما نقلش نفسه من الحارة التانية الى الحارة اليمين ثم دخل الى الميدان ويعمل ثلاثين مشكلة
طبعا المفروض اى سائق قبل ما ينزل اى مكان لازم يتوقع شكل الميدان
واى حارة يجب الالتزام بها من مسافة كبيرة
قبل ما يقترب من الميدان ويعمل لنفسه مشاكل

العملية بيسطة إن شاء الله ولكن بعد ما نفهم كويس

طبعا لازم تحترس جيدا فى الميادين
ولا تعتقد ان جميع من حولك يعلموا اصول الدخول فى الميادين
يعنى ممكن تكون بتلف الميدان على المسار الاخضر ... ويظهر لك سيارة فى آخر لحظة تنقل نفسها من المسار الازرق وتدخل معاك او امامك عشان هو كمان فى آخر لحظة قرر انه يلف الميدان ... عشان كده لازم تتوقع اخطاء الآخرين

ورجلك لازم تكون على الفرامل وجاهز للتوقف
يعنى تعطى العربية دفعة كويسة قبل الدخول فى الميدان
وتبدأ التحكم فى السرعة وانت رجلك فوق الفرامل
لو الامور ماشية كويس .... اترك السيارة تسير ورجلك جاهزة فوق الفرامل
لو وجدت اى مشاكل ... اضغط الفرامل بالتدريج بدون اى مشاكل او عصبية

المشاة لازم تعطى لهم الفرصة للعبور ... ولازم تحط فى دماغك كويس ان للمشاة مليون "اولوية"
ودائما رجلك فوق الفرامل وانت ماشى فى اماكن فيها مشاة ... وصحصح الناس بالكلاكس
طبعا المشاه عندنا حدث ولا حرج
يعنى ممكن تلاقى اللى ماشى وموش عارف هو رايح فين اصلا ؟
واللى ماشى بطىء بالعند فيك ... وبيقولك حاول تلمسنى وشوف انا هاعمل فيك ايه ؟
واللى ماشى .. ومرة واحدة يرجع فى كلامه
واللى ماشى ... وبيتكلم فى الموبايل وباصص الناحية التانية يعنى موش بينظر اليك من اصله
والناس الكبيرة
واللى جالس على الرصيف بيشحت و"مدلدل" رجليه فى الشارع ههههههههههههههه
والستات الى معاها اطفال ..... الخ
الخلاصة: حط اعصابك فى الثلاجة والاولوية للمشاه وفتح عينك كويس جدا ... لان فى الاول والآخر الناس دى "لحم ودم" موش حديد ... رينا يسترها مع الجميع

وانت راجع بالعربية للخلف ... انظر جيدا الله يكرمك ... وخد وقتك وبدون استعجال
الاسبوع الماضى ... الناس عامله حواجز من الحجارة لغلق الشوارع خصوصا فى المناطق الهادئة
والنتيجة "نصف حجر" لن تراه ابدا اثناء ركوب السيارة
المهم الحجر اصطدم بالشكمان ... والنتيجة زيارة سريعة لصيانة الشكمان
الحمد لله على كل حال

احترس من الاطفال
طبعا عندنا العيال بتتولد فى الشارع اساسا
خصوصا فى المناطق المزدحمة والعشوائية
ممكن تلاقى عيال تحت السن هههههههههههههه ممكن تلاقى اطفال مادخلوش "كى جى ون" من اساسه وماشى فى الشارع عادى خالص ...
واللى راكب عجلة واللى بيجرى وراه اصدقائه
وربنا يستر ... لازم تحترس جدا جدا من الاطفال

العربيات النقل والاوتوبيس محتاجة مساحة كبيرة اثناء الدوران
عشان كده لازم تاخد بالك كويس جدا
لو دخلت من يمين السائق ممكن .. "تزنق" نفسك فى الرصيف او يخبطك وبدون ان يشعر السائق
لأنه اساسا لا يراك فى المراية
اما لو دخلت معاه من الشمال .. ممكن يخبطك بمؤخرة السيارة ... ودى معلومة قليل اللى عرافها
على العموم يفضل انك تبتعد عنه خالص ... حتى ينتهى من الملف ... وبعد كده ادخل انت بسلام

حافظ على نظافة الزجاج ... وطبعا لو احنا فى الشتاء كنت قلت لك .. لازم تتأكد من جلد المساحات سليم ... لو المساحات موش سليمة يبقى لازم تغيرها وماتكسلش

احترس قبل ما تفتح باب السيارة
انظر فى المراية جيدا خلفك
انظر فوق كتفك
افتح الباب بشكل بطىء وانظر مرة اخرى جيدا

فى الصورة اليمين
السيارة متوقفة على مكان عالى
ومتجهة الى اسفل
لاحظ اتجاه العجل ناحية الرصيف


فى الصورة اليسار
السيارة متوقفة على مكان عالى
ومتجهة الى اسفل لكن للخلف
لاحظ اتجاه العجل ناحية الرصيف

طبعا مهم جدا جدا الموضوع ده
حماية كبيرة للسيارة ... عشان لا قدر الله لو حصل اى شىء للفرامل ... عمر العربية ما تتحرك من مكانها لان العجل متجه ناحية الرصيف اساسا
ممكن تحتاج الموضوع ده فى شوارعنا المرتفعة خصوصا فى اسكندرية اثناء المصيف


اعتقد ان موضوع تعلم القيادة فى 10 ايام اخذ حقه والله اعلم

ارجوا ان اكون وفقت

وفى انتظار مقترحاتكم القيمة




مع اطيب التمنيات
اخوكم حسين غزالة

[reco1]

الله ينور عليك يا أستاذ حسين
فى صفحة رقم 40 المشاركة رقم 400 فيها صور ممسوحة فلو كانت موجودة عند حضرتك ياريت توضعها لنا فى مشاركة جديدة و جزاك الله كل خير على صبرك و كرم أخلاقك معنا

[reco1]

أنا جمعت بعض الصفحات اللى رسوماتها إتمسحت و هما بالترتيب كالآتى :
صفحة رقم 15 مشاركة رقم 148
صفحة رقم 16 مشاركة رقم 151
صفحة رقم 23 مشاركة رقم 221
صفحة رقم 24 مشاركة رقم 238
صفحة رقم 26 مشاركة رقم 253
صفحة رقم 27 مشاركة رقم 263
صفحة رقم 29 مشاركة رقم 283 و 287
صفحة رقم 31 مشاركة رقم 301
صفحة رقم 37 مشاركة رقم 365
صفحة رقم 38 مشاركة رقم 377
صفحة رقم 39 مشاركة رقم 385 و 387 و 389
صفحة رقم 40 مشاركة رقم 400
تقريباً كل صور موضوع القيادة الدفاعية إتمسحت و بعض الموضوعات اللى قبلها

[lela]

بدايتى مع السواقة انى اشتريت عربية وبعد كده اخذت دورة سواقة فى مكتب والمدرب كان كويس جدا

وبعد كده كملت على عربيتى واتدربت كويس عليها لحد المدرب لما قالى انى مش محتاجة اى تدريب ثانى بس

انا مشكلتى ان لازم حد يكون قاعد جنبى وانا بسوق وانا اتعلمت من شهر ونصف فقط وخايفة اخرج بيها لوحدى

هو شهر ونصف يكون كفاية ولا اكمل لحد ما اخذ الثقة اكثر فى نفسى

[lela]

انا سائق جديد

بدايتى مع السواقة انى اشتريت عربية وبعد كده اخذت دورة سواقة فى مكتب والمدرب كان كويس جدا

وبعد كده كملت على عربيتى واتدربت كويس عليها لحد المدرب لما قالى انى مش محتاجة اى تدريب ثانى بس

انا مشكلتى ان لازم حد يكون قاعد جنبى وانا بسوق وانا اتعلمت من شهر ونصف فقط وخايفة اخرج بيها لوحدى

هو شهر ونصف يكون كفاية ولا اكمل لحد ما اخذ الثقة اكثر فى نفسى

[lela]

ممكن يا استاذ حسين ترد على

[husseinoo]

بدايتى مع السواقة انى اشتريت عربية وبعد كده اخذت دورة سواقة فى مكتب والمدرب كان كويس جدا

وبعد كده كملت على عربيتى واتدربت كويس عليها لحد المدرب لما قالى انى مش محتاجة اى تدريب ثانى بس

انا مشكلتى ان لازم حد يكون قاعد جنبى وانا بسوق وانا اتعلمت من شهر ونصف فقط وخايفة اخرج بيها لوحدى

هو شهر ونصف يكون كفاية ولا اكمل لحد ما اخذ الثقة اكثر فى نفسى

التغلب على الخوف

كيف تقود سيارتك بدون خوف ؟

الأكيد انك تشعر بالخوف على الطرق السريعة
خصوصا عندما تجد انك محاصر بسيارات ملاكى وخصوصا سيارات النقل سواء كانت ركاب "مينى باص ـ ميكروباص ـ اوتوبيس" او سيارات النقل "نص نقل او نقل كبير او مقطورات اوحاويات عملاقة"

اذا كان الخوف بيعمل لك حالة من شلل التفكير الجامد قوى هههههههههههههه
اذا فقط حان الوقت للتغيير

التالى بعض النصائح للتغلب على الخوف:


الخطوة الأولى:
إذا كنت تقود سيارتك "نادرا" ... او بالبلدى كده ما بتخرجش بالعربية كثير خصوصا فى شوارع المحروسة المزدحمة وكمان على الطرق السريعة ... فأكيد هاتشعر بالخوف ... لازم هاتخاف
كل ما هاتقود سيارتك "كثير" وتواجه مواقف مختلفة ومتنوعة وتقدر تتغلب عليها طبعا إن شاء الله ... كل ده هايزيد الثقة فى النفس بشكل جامد جدا.
كبداية حاول تخرج بالعربية مثلا روح بيها السوق اشترى اى حاجة .. مشوار صغير وعلى السريع ههههههههههههههههه
انا عن نفسى روحت كثير قوى مشوار السوق ده ... منه استفادة من انخفاض الاسعار خصوصا فى اسواق الجملة ... او الاسواق الشعبية ومنه تدريب على السير بالعربية مدة طويلة وفى ظروف مختلفة ....
او حتى اخرج بالعربية روح المسجد ... صلى ركعتين وارجع تانى
او روح للمكتبة ... استعير كتاب وارجع البيت تانى
اى مشوار صغير هاتعمله وهاترجع البيت بالسلامة إن شاء الله .. النتيجة هاتكون ان ثقتك فى نفسك هاتزيد.

الخطوة الثانية:
حاول تنزل مرة منطقة زحمة شوية .... وممكن طريق يكون سريع شوية ... وتمشى مشوار كبير لمدة اطول ...
إذا ما زلت تشعر بقليل من القلق ... على طول اعد التدريب حتى تشعر بالراحة

أما اذا رجعت من المشوار ده ... وما زلت تشغر بالخوف الشديد جدا جدا وربكة جامدة من داخلك ... يبقى الافضل تنزل بالمستوى ... يعنى افضلك تستكمل تدريبك فى منطقة اقل ازدحام ويكون فيها عربيات اقل فى السرعة .... ولكن الاهم هو الاستمرار ... ترجع زى الشاطر هههههههه للعربية وتصمم انك تمشى بيها اطول فترة ممكنة.


الخطوة التالتة:
هل تستطيع كشف المخاطر ... يعنى عينك بالصلى على النبى بتقدر تشوف المخاطر قبل ما تحدث ... وتتوقعها وتكتشفها
ولا زى ناس كثيير لا تشعر بالمشاكل إلا اذا اصبحت المشكلة امامك مباشرة


... يعنى مثلا شايف ان فيه عربية متعطلة ولا تتوقف إلا إذا توقفت العربية التى امامك مباشرة ... يعنى اقصى حاجة بتشوفها كبوت عربتيك ههههههههههههه والعربية التى امامك فقط لا غير

حاول تاخد بالك شوية من لافتات المرور ... يعنى مثلا فيه علامة يوتيرن ... وانت مصمم تمشى فى حارة اليوتيرن .... وفى الآخر بتشتكى من العربيات اللى بتحدف عليك ههههههههههههههههه


قدرتك على اختيار الحارة المناسبة للسير ... هاتسهلك حاجات كثير قوى قوى
داخل يمين التزم الحارة اليمين
داخل شمال التزم الحارة الشمال
ماشى على طول التزم الحارة الوسطى
إن شاء الله الموضوع يكون بسيط


الخطوة التالتة:
شغل شوية قرآن وهدى اعصابك قبل ما تمشى بالعربية ... وادعى دعاء الركوب ... وصلى ركعتين الصبح ... واتوكل على الله وكل شىء هايكون تمام التمام ... أنا آسف جدا هى المفروض تكون الخطوة الأولى هى التوكل على الله سبحانه وتعالى


الخطوة الرابعة:
حاول انك تتحكم فى موضوع انحراف السيارة ... يعنى تمشى على خط مستقيم
وما تحدفش على حد كل شوية

بطل "الكاسيت" او "الراديو" او حتى خفض الصوت ولو كنت بتحب تسمع موسيقى او اغنية يا ريت تكون اغنية هادئة ... والافضل طبعا شوية قرآن
لا تتكلم مع الركاب داخل السيارة
القيادة موضوع جد وموش لعبة ومحتاج منك تركيز على الطريق بشكل جامد.

الخطوة الخامسة:
خد لك كورس فى القيادة مع اى حد بيفهم كويس قوى
وحاول تقرأ بتأنى موضوع القيادة الدفاعية
ممكن يركب معاك حد قريبك او صديقك يكون هادى ... واعصابه قوية وفاهم كويس .... عشان يزود ثقتك فى نفسك موش يخوفك وآسف من الكلام ده يرعبك ويروشك اكثر ... مهم قوى اختيار الشخص اللى بيعلمك سواء كان قريبك او من مدرسة قيادة


الخطوة السادسة:
اذا كان فيه بعض الحالات بتشعر فيها بالقلق والخوف الشديد


مثلا لو كنت بتخاف من طلوع الكبارى أو دخول الانفاق
حاول تدرب نفسك على طلوع الكبارى فى اوقات مافيهاش زحمة خالص او استبدال الكوبرى بـ مثلا بشارع مرتفع مثل الكوبرى
يفضل التدريب يكون فى اوقات العربيات تكون فيها قليلة وكمان الناس تكون قليلة عشان تتدرب براحتك


الخطوة السابعة:
اعمل لنفسك جدول للتدريب على قدر الإمكان.
اكتب فى الجدول الاماكن الغير مزدحمة ... والاوقات المناسبة للخروج الى هذه الاماكن.
اخرج الى عملك بدرى شوية مثلا نص ساعة عشان تلحق تروح شغلك بعيدا عن الزحمة وبعيد عن التسرع وتلحق تركن عربيتك وتفطر كمان قبل الشغل ههههههه
قبل السفر على الطرق السريعة ... اعمل لنفسك جدول ... حاول تسافر فى اوقات تكون المواصلات فيها هادئة .... اختر افضل الطرق واسهلها التى تحتوى على عربيات نقل اقل ...

إذا كانت عربيات النقل بتخوفك وبتضايقك خلاص اختار طريق تانى ... يعنى مثلا لو بتحب تسافر على الطريق الزراعى او الاحسن لك الطريق الصحراوى ... وتحب تسافر فى الصباح الباكر جدا ... ولا تسافر مساء ...

الخطوة الثامنة:
خلاصة الكلام .. كل ما هاتتعرض لمواقف كثير كل ما ثقتك فى نفسك هاتزيد كثير ... وهاتقدر تتعامل مع اى موقف هاتقابله على الطريق مهما كان ... اذا كنت مازلت بتخاف من العربيات النقل العملاقة والانفاق والكبارى على سبيل المثال ... ماتخافش المهم انك تتدرب مع حد فاهم ... وتفهم كويس المواقف المختلفة ... وتعمل لنفسك جدول متدرج فى الصعوبة ... اختيارك للوقت المناسب للتدريب مهم .... سواء كان فى الصباح الباكر او مساء ....

الخلاصة: ودى اجمل جملة عرفتها بتقول ايه...
لو انتظرت انك تكون جاهز نفسيا عشان تركب عربيتك .... وتواصل التدريب ... عمرك ما هاتركب العربية ابدا ... وهاتفضل تخاف ...

الطريقة الوحيدة للتغلب على الخوف هى انك تكون خلف "الدركسيون" وتمشى بعربيتك باستمرار حتى ولو كانت الشوارع خالية فى الصباح الباكر


ملحوظة:
لا قدر الله لو تعرضت لاى حادث موش تمام مثلا طلعت بالعربية على الرصيف
ربنا يحفظ الجميع
ببساطة ارجع تانى واعتبر نفسك "راكب"
يعنى ارجع تانى واركب المواصلات عادى خالص ... بطل تركب العربية شوية لحد ما اعصابك تهدى وتنسى موضوع الحادث اللى اتعرضت له
ومرة تانية ارجع واصل التدريب من جديد وبإصرار.

وفى الاول والآخر خليك مع الله وربنا هو الحافظ الستار .

ارجو ان اكون وفقت

فى انتظار التواصل
مع اطيب التمنيات
اخوكم حسين غزالة

[Bright]

[OVERLINE]السلام عليكم
انا جديدة هنا فى المنتدى ومتابعة الموضوع من اول صفحة وبجد الموضوع تحفة ومفيد جداااا واهم احجة تطبيق المعلومات دى ونفسى كل حد بيسوق يقراه عشان نبقى كلنا ماشين على قواعد ومفاهيم واحدة ((بحلم طبعا : D

انا بقالى يجى سنتين اخويا بيعلمنى السواقة ومبسوقش غير وهو جنبى مش عيب منى بس هو على طول بيخوفنى ويتعصب عليا
لحد ما فى اتهورت من اسبوع و سر... قصدى اخدت العربية و رحت بيها الكلية ورجعت سليمة الحمد لله انا والعربية

بس برده خايفة جدااا يحصلى اى موقف او تتعطل بيا و برده فى البيت كده وبيقولولى العربية كبيرة عليكى بس انا زهقت من بهدلة المواصلات

وانا سايقة بقى بركز على الحارة بتاعتى عشان الناس اللى جنبى تعدى براحتها وغالبا بمشى على الشمال عشان الميكروباصات والاتوبيسات و ابقى مركزة على العربيات اللى على يمينى بس انا عارفة انه غلط عشان ساعات ببقى بطيئة شوية بالنسبة لبعض الناس بس هما بيعدونى ويجوا قدامى
فيه ملف فى طريقى بس مشكلته انه منزل بجد بشششششع و بدعى اد كده وانا بعديه عشان العربية مترجعش منى لورا او تبطل

انا قلت اعرفكوا بنفسى بسرعة واقلكوا شكررررررررررا جدا على معومات بجد استفدت منها انا فى صفحة 25 ومكملة ان شاء الله ....ادعولىىىىىى [/OVERLINE]

[aboyosouf]

السلام عليكم ورحمة الله وبركاته

هذه هي أول مشاركة لي في هذا المنتدى الكريم

بصراحة يعجز لساني عن الشكر لكل من ساهم في هذا الموضوع الرائع

فقدر كنت أبحث عن نصائح للسائق الجديد في جوجل فجاء بي البحث إلى هنا حيث هذا الموضوع القيم

فأحببت أن أسجل معكم في المنتدى ، وقد ظللت قرابة الساعتين ونصف فقرأت من أول الموضوع الذي أنشأه الأخ الفاضل

حسين غزالة الذي حتى الآن لا أعلم هل هو يعمل في مجال التدريس أم لا لإني قرأت في بغض ردوده أنه يخاف من وزير التعليم

أنه ينقله أسوان ههههههههه لسؤاله عن كلمه المبتدأين التي تكتب هكذا ( المبتدئين ) فأقول له لا تخف فمعك أخوك أبو يوسف

مدرس لغة عربية سابقا

وعشان ما أطولش في المقدمة

فإني قرأت من المشاركة الأولى التي كانت بتاريخ 24-02-2010, 09:00 pm

وحتى المشاركة االأخيرة التي تحمل رقم 749 كانت بتاريخ 11-06-2011, 12:11 am

فقرأت هذه المشاركات حرفا حرفا

فلا أملك بعد ذلك إلا أن أقول جزاكم الله خير الجزاء على إفادتي بمعلومات كنت لا أعلمها من قبل

وأقول لكم إني سائق مبتدئ

والحمد لله وشكم كلكم حلو علي واليوم إن شاء الله هو أول يوم لي في قيادة التاكسي

طبعا كنت بسوق من زمان لكن كار التاكسي لسه جديد شوية علي

فبارك الله فيكم جميعا وإن شاء الله أكون متابع معكم دائما

وأخيرا شكر خاص للأساذ حسين غزالة

وسؤالي له قبل أن أختم الموضوع

كيف حالك مع السواقة الآن بعد حوالي سنة ونصف تقريبا من كتابة هذا الموضوع القيم ؟؟