نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[amrezzat82]

السلام عليكم
ياريت يا جماعة اللى عارف حد بيعلم السواقة يكون فاهم ممكن يدلنى عليه
خاص او مدرسة

انا مش عايز حد للرخصو خلاص انا معايا و كنت بسوق من زمان
بس عايز افهم و عشان انا خايف على عربيتي كأنيى مش متعلم حاجة

[م. عصام مهنى]

كل سنة وانت طيب يا استاذ حسين

وربنا يجعله عام سعيد علينا كلنا وعلى مصرنا الحبيبة

ونشوف تالقك فى هذا الموضوع وابداعاتك

[husseinoo]

السلام عليكم

وعليكم السلام ورحمة الله وبركاته

ياريت يا جماعة اللى عارف حد بيعلم السواقة يكون فاهم ممكن يدلنى عليه
خاص او مدرسة

هو فى الحقيقة ان المشكلة فى اسعار الناس اللى بتفهم كويس فى التعليم اكيد هاتكون غالية قوى ... خصوصا لو كنت هاتتعلم على سيارة موش بتاعتك ... للاسف ان اغلب اللى اتعلمته من اصدقائى ... الجميع استفدت منهم ... لكن قليل منهم اللى كان كلامهم واضح وسهل ومميز ....

انا مش عايز حد للرخصو خلاص انا معايا و كنت بسوق من زمان
بس عايز افهم و عشان انا خايف على عربيتي كأنيى مش متعلم حاجة

برافوا عليك ... لازم تخاف على عربيتك طبعا ... ده انا طول ما انا ماشى بالعربية ... اشوف عربيات جديدة لانج ... ومتخبطة فى كل حتة ... وتشعر ان اصحابها موش فارقة معاهم ... بينزلوا الشارع يتعلموا فيه ... لكن حضرتك بتفكر صح جدا ... الافضل انى اضحى بمبلغ مهما كان واتعلم كويس جدا جدا ... وبعد كده اركب عربيتى وامشى مثل اى واحد .... النصيحة لحضرتك هى الصبر والبحث الجيد عن مدرب ... والتدريب عدد ساعات كبير ... وبراحتك قوى حتى تشعر بالثقة التامة ... وان كل مهارات القيادة انت متمكن منها ... واوعى تصدق كلام اى حد يقولك انزل بعربيتك واتعلم فى الشارع .... الحاجة غالية جدا جدا جدا ... اليوم على سبيل المثال شاهدت احد العملاء بيشترى مراية جانبية لسيارته اعتقد انها يابانى تقريبا والله اعلم ... عارف كان سعرها كام ؟ ... تقريبا 350 جنيه .. وموش الاصلى كمان ... يعنى مراية تقليد بـ 350 جنيه ... يبقى الافضل اننا نتعلم كويس جدا جدا وبعدين نمشى بالعربية على بركة الله

كل سنة وانت طيب يا استاذ حسين


وحضرتك طيب وبالصحة وبالسلامة

وربنا يجعله عام سعيد علينا كلنا وعلى مصرنا الحبيبة

الله يبارك فى حضرتك وشكرا على الدعاء الجميل

ونشوف تالقك فى هذا الموضوع وابداعاتك

الله يكرمك ويسعدك دنيا وآخرة
انا كنت لسه هاكتب فى الموضوع النهاردة
وبالصدفة شاهدت مشاركة حضرتك
وانا بعتذر عن تأخرى بسبب تدريب فى الشغل .. ولازم اخلص الامتحانات بتاعته ...

على العموم انتم وحشتونى جدا جدا

مع اطيب التمنيات
اخوكم حسين غزالة

[husseinoo]

بسم الله الرحمن الرحيم

اللهم صل على محمد وعلى آله وصحبه أجمعين

تعلم القيادة فى 10 ايام

المرور فى التقاطعات

يجب الدخول على التقاطعات بسرعة هادئة جدا ... لماذا ؟ ... الدخول بسرعة هادئة يعطى لك فرصة للنظر يمين وشمال الطريق قبل الدخول على الطريق الرئيسى ... اما لو حضرتك دخلت بسرعة ... النتيجة انك هاتنزل على الطريق الرئيسى بدون مشاهدة اى شىء قادم فى اتجاهك ... طبعا ممكن تلاقى حاجات كثير جدا ... ممكن تلاقى سائق اوتوبيس مالوش دعوه ان المكان ده فيه تقاطع ... ويمكن كمان تلاقى سيارات مزاج عندها قوى انها تمشى فى الحارة الخاصة بالسيارة القادمة من التقاطع ... يعنى سايب الشارع كله ويعمل فيها ناصح وعايز يعدى من كل العربيات اللى امامه لكن من ناحية التقاطع ...



الخلاصة: المنطقة اللى فيها التقاطع بتكون من اخطر المناطق خصوصا للمبتدأين



احيانا تلاقى سيارات فى الخلف تضرب لك كلاكسات عشان تمشى بسرعة ... النتيجة انك تدخل التقاطع بدون النظر يمين او شمال عشان خاطر سعادة صاحب السيارة اللى فى الخلف عايز يمشى حتى ولو كانت النتيجة انك تعرض نفسك للخطر ... طبعا المفروض انك ولا تسأل فى اللى ماشى خلفك خالص واعتبره موش موجود ... الاولوية انك تنظر يمين وشمال قبل ما تدخل على الطريق الرئيسى

نصيحة اخرى: سواء كان الطريق سالك او مزدحم ... فى اى حالة لازم تنظر يمين وشمال قبل النزول الى الطريق الرئيسى ... لا تجعل سهولة الطريق وعدم وجود اى سيارات امامك تخدعك ... والنتيجة انك تنزل الشارع الرئيسى باندفاع وبدون النظر يمين او شمال

انظر الى الصورة السابقة

يظهر فيها ان قائد السيارة الزرقاء ... يدخل على الطريق الرئيسى بشكل بطىء ... وفى هذه الحالة يوجد فرصة كبيرة للرؤية الجيدة والنظر يمين وشمال بشكل يسمح له بكشف اى سيارة قادمة سواء من اليمين او الشمال





كمان لازم تشغل دماغك جامد قوى ... انظر جيدا واسأل نفسك ... لماذا السيارة النقل الصفراء الكبيرة متوقفة فى منتصف الطريق ولا تريد الدخول فى الشارع الجانبى .... السبب ان هناك سيارة خضراء بجوار الرصيف انت لا تراها جيدا .. هذه السيارة هى التى منعت السيارة الصفراء من التحرك والدخول فى الشارع الجانبى



يعنى حضرتك بمجرد ملاحظة السيارات الاخرى .. تستطيع توقع ان فيه سيارة قادمة فى الشارع الرئيسى ولكنك لا تراها مثل السيارة الخضراء



ايضا من الصعب جدا خصوصا على المبتدأ الدخول مثلا فى اتجاه اليسار وفى نفس الوقت مطلوب منه انه ينظر على السيارات القادمة من اتجاه اليمين هههههههههههه ... خصوصا لو كان فيه ناس فى منتهى الذكاء وراكن السيارة بجوار الرصيف لدرجة انه حاجب الرؤية عنك



والاخطر انك تكون بتنظر فى الناحية الشمال واثناء دخولك ناحية اليمين ... تجد سيارات راكنة بجوار الرصيف



للاسف زحمة المدينة تدفع اصحاب السيارة بركن السيارة فى اى مكان سواء نايحة اليمين او الشمال ...





بالخبرة بتقدر تعرف المناطق الصعبة والمناطق المتوقع فيها مشاكل من السيارات الراكنة فى الاجناب والتى تحجب الرؤية او تعرضك للخطر وتعمل حسابها ...

يعنى مثلا فى مناطق معينة الافضل انك تدخل الملف على واسع شوية ... لانك متوقع ان فيها سيارات راكنة وفى الحالة دى صعب انك تدخل الملف على ضيق





طيب ايه هو الصح اللى لازم نعمله ؟

الصح انك تدخل على التقاطع بهدوء جدا ... وانك تستخدم الدبرياج فى تحريك السيارة خفيف قوى ... واول ما توصل الى اقصى نقطة تستطيع الرؤية فيها بدون ان تعرض نفسك للخطر ... اضغط الدبرياج وتوقف بالسيارة اذا لزم الامر ... وانظر جيدا يمين وشمال قبل التحرك

هههههههههه يعنى الخلاصة اوعى تضغط بنزين وانت بتقترب من الشارع الرئيسى ... حرك السيارة بالدبرياج فقط ... لان لا قدر الله لو ضربت لخمة والعملية اتلخبط فيها وضغط على البنزين سوف تجد نفسك فى منتصف الشارع مباشرة وربنا يسترها مع الجميع .



حاجة كمان جميلة جدا جدا لازم كلنا نعملها ... ايه هى ؟

انك بمجرد الاقتراب من التقاطع ... حرك جسمك الى الامام ... وانظر يمين وشمال ... يعنى هههههههه مافيش داعى انك تطلع "ببوز" العربية فى الشارع الرئيسى ... الافضل من ذلك هههههههه انك تقرب "راسك" خلف الزجاج الامامى ... اثنى جسمك الى الامام عشان تستطيع النظر يمين وشمال بشكل جيد







نصيحة: يجب الحذر من الموتوسيكلات والدراجات التى تسير بالقرب من الرصيف ..

فى الصورة السابقة

يظهر ان قائد السيارة يدخل على الطريق الرئيسى بسرعة كبيرة ... لدرجة ان مجال الرؤية عنده اصبح ضعيف ولا يستطيع الرؤية بشكل جيد يمن او شمال مما يعرضه للخطر

انظر الى الصورة السابقة

توضح الصورة انك لازم تنظر الى السيارات القادمة فى الشارع الرئيسى... لو وجدت فرصة انك تدخل الشارع الرئيسى بدون اعتراض السيارات القادمة ... توكل على الله واستمرفى السير ... لكن اوعى تدخل الشارع الرئيسى مهما كانت الظروف اذا ظهر لك سيارة قادمة فى الشارع الرئيسى اتجاهك ... يبقى الافضل انك تنتظر قليلا حتى تظهر الفرصة المناسبة.

اذا نظرت يمين او شمال ... ووجدت مشاة .. ومتوقع انهم ينزلوا الشارع ... يبقى الافضل انك تضرب لهم كلاكس .. وتدخل الشارع بالراحة ... بشكل بطىء قوى ... لان الاولوية للمشاة ... لازم تكون حريص جدا عليهم





لازم تدرب نفسك على الدخول فى الشوارع الرئيسية فى الاتجاه اليمين والاتجاه اليسار ... حتى تزيد ثقتك فى نفسك بشكل كبير وكمان تدرب نفسك على طلوع الشوارع المرتفعة وايضا النزول من على شوارع مرتفعة ... مثل الصعود على الكبارى والهبوط من على الكبارى.





تابــــع

فى انتظار التواصل


يا ريت اسمع ارآئكم القيمة



مع اطيب التمنيات

اخوكم حسين غزالة

[amrezzat82]

ربنا يكرمكم جميعا بجد بستفيد كتير انا لسه فى الصفحة 12 قدامي مشوار كبييييييير

عندي كم سؤال مهم ياريت يكون ليه رد علمي و عملي و بتهيقلي دول بيجوا على بال اي حد مبتدأ

1- ازاي اعرف اخد الملفات حارتين و هي فاضية من غير غربيات رخمة راكنة و ازاي لو فى
فى الحالة الأولى هل المفروض انى اسيب بتاع متر و بعدين أكسر شوية لحد الدركسيون يكون علىحوالي الساعة 7 و خمسة و العربية تلف و اول ما خلص الفة اعدل
وايه العمل لو فى باشا جاي بسرعة من ورايا و عايز يعدي بأي طريقة
هل لازم ساعتها اغير حارتي؟

و ايه العمل لو ان الشارع و انا بلف وسع كمان حارة على يمينى و عربيات جاية من هذه الحارة و داخلة عليا . هل المفروض أنى أعمل ايه عشان اتفادي السريع اللى جاي يكسر و خلاص عليا


2- أزاي أعرف انى سايب مسافة مناسبة بينى و بين اللى قدامي، انا بعرفها ان لما آخر الأكصدام اللى قدامي يبقى قرب من بوز الكبوت يبقى انا كده سايب بتاع 80 سم او متر بينى و بينها ، كده صح؟

3- أزاي اعرف افادي الناس و العربيات فى الشارع من غير ما أكسر على اللى جانبي ، مع العلم أن في ناس بتترمي قدام العربيات عندنا فى وسط البلد و ناس داخلة عكس و عجل و موتوسيكلات و ناس راكنة صفين تلاتة و العملية كشري
فانا خايف اجي افادي حد اخش فى التاني

4- ياريت حد يفهمنى مبدأ الهدف الثابت ده ، حاولت أطبقه النهاردة و بصيت على العربية اللى قدامي بتاع 50 متر لقيت نفسي لا إرادي بعوم يمين و سمابل معاها بلا سبب و ساعات سرحت كمان فى مش عارف ازاي ابقى فى خط مستقيم من غير تعويم و خصوصا حتى لو ثبت الدركسيون الشوارع الزيالة الى عندي تخلي العربية تحدف


5- لحد دلوقتى مش عارف اتعود على المرايا خالص و اللى بيعملنى رافض ان ابص فى المرايا اصلا عشان ما لخبطش نفسي ، انا فى عربيتي المرايا الجانبية اليمين و الشمال بتجيب رؤيا جميلة جدا و لكن مرايا الصالون بتخيلنى جدا و مابتخلينيش اركز فى اللى قدامي اصلا


6- ساعات لما ابص فى المرايا اللى فى النص و اتحرك اقلاينى سفت نص المقعد الخلفى و الصورة بتاعة الزجاج او الشارع بتموج شوية ده بيعملى ربكة ، انا جايبها عادى من محلات الاكسسوار لأن مراية العربية اصلا صغيرة ، فهل يوجد حل ولا ده طبيعى؟

7- عايز أعرف أبعاد عربيتى مش عارف ابدا

كل الناس بتقول بالتعود و لكن انا بستغرب جدا لما حد يكون سايق عربية كبيرة قوى و يجي يسوق عربية عادية او صغيرة بيمشي عادي جدا ، طب عرف ازاي ابعادها بالسرعة ديه من أول مرة؟ نفس أفهم بجد بقى


8- فى الملفين الشمال اللي بينهم حتة شارع بتاع 2 متر و يكونوا ورا بعض عشان يعملوا يو ترن و يكون هذا اليوترن مكون من 4 او 5 حارات و هو اصلا طريق كويس مش سريع ، المشكلة انى لما أجي أخده دايما بلاقي نفسي فى نص الشارع رغم انى جاي هادي جدا ، فى حل؟

9- اظبط رجلي ازاي على دواسة البنزين بالتفصيل الممل عشان انا مش عارف خالص يا امى تقيلة و العربية تجري منى يا امى خفيفة و اعطل الشارع، أعمل ايه؟ و ليه كل عربية ليها الظبطة بتاعتها
انا عماة بظبطها بصوت الموتور و لكن فى بعض الأحيان العربية بتجري و بضطر اخفف رجلي لغاية ما جيب سرعة هادية ، بس انا عايز أغلب على كده عشان المواقف الصعبة لا قدر الله ساعات لا تحتمل الجرية ديه


معلش بس انا مش عارف سقت ازاي قبل كده بالفطرة و تعليم بسيط فى حتت كتيرة وزحمة من يجي 4 سنين و ماركزتش فى كل التفاصيل ديه خالص و لما جبت العربية نسيت كل حاجة و بقيت ادقق فى اقل حاجة

[husseinoo]

ربنا يكرمكم جميعا بجد بستفيد كتير انا لسه فى الصفحة 12 قدامي مشوار كبييييييير


ههههههههه اهلا وسهلا بحضرتك ... هو فعلا لسه امامك مواضيع كثير قوى لازم تقرأها ... لكن إن شاء الله يكون فيه استفادة كبيرة ... بشىء من الصبر والإطلاع بشكل يومى هاتعرف حاجات كثير قوى وهاتكون مفيدة بإذن الله


عندي كم سؤال مهم ياريت يكون ليه رد علمي و عملي و بتهيقلي دول بيجوا على بال اي حد مبتدأ

هو فيه اسئلة انا فهمتها ... وعلى قدر معرفتى هاحاول اجاوب

1- ازاي اعرف اخد الملفات حارتين و هي فاضية من غير غربيات رخمة راكنة و ازاي لو فى
فى الحالة الأولى هل المفروض انى اسيب بتاع متر و بعدين أكسر شوية لحد الدركسيون يكون علىحوالي الساعة 7 و خمسة و العربية تلف و اول ما خلص الفة اعدل

ببساطة لازم تلتزم بالحارة اللى حضرتك بتلف فيها ... يعنى لو فيه فرصة تقترب من الرصيف بحوالى متر او اقل شوية ... يبقى توكل على الله واقترب من الرصيف ولف بالعربية بجوار الرصيف
اما لو مافيش فرصة تقترب من الرصيف
يبقى تفضل فى نفس حارتك ... وتلف بحرص شديد ... وتحترس من السيارة المجاورة لك ... لو دخلت قبلك ... يبقى لازم تنتظر انت الاول ... اما لو دخلت انت الاول ونظرت الى صاحب السيارة المجاورة وسمح لك بالدخول ... يبقى تتوكل على الله وتدخل فى نفس حارتك ما تحاولش تنقل نفسك من حارة الى حارة
وموش عشان تقرب من الرصيف "تحدف" على السيارة المجاورة ... الموضوع سبق شرحه كثير قوى ... لكن ابحث جيدا فى المشاركات السابقة سوف تجد كلام كثير قوى على الملفات واليوتيرن

وايه العمل لو فى باشا جاي بسرعة من ورايا و عايز يعدي بأي طريقة
هل لازم ساعتها اغير حارتي؟

ببساطة ... اوعى تمشى بسرعة بطيئة فى الناحية الشمال نهائى ... برغم ان الكثيرين ينصحوا المبتدئين بالسير فى الحارة اليسرى بجوار الرصيف ... لكن انا من رأى ان افضل الحارات للسير هى الحارة الوسطى ... لو فيه حد عايز يعدى منك ... مافيش مشاكل لانك اساسا تركت الحارة اليسرى عشان العربيات اللى عايزة تجرى ... اما لو مشيت فى الحارة اليسرى ومنعت السيارات القادمة من الخلف انها تعدى منك بسبب سرعتك البطيئة فطبعا حاجة موش ظريفة
لكن
لو كان هناك فرصة انك توسع للسيارة القادمة من الخلف ... وسع على طول
اما لو كان هناك اى خطر عليك
او ما فيش فرصة تشوف كويس وتكشف الطريق كويس
يعنى بالبلدى كده موش متمكن من انك تغير حارتك الى حارة اخرى .... يبقى فى الحالة دى "كبر دماغك" ولا تعبره ولا تسأل فيه ... افضل ماشى فى خط مستقيم زى ما انت ... واتركه هو يسلك نفسه بنفسه وخلى اعصابك باردة ههههههههههه

و ايه العمل لو ان الشارع و انا بلف وسع كمان حارة على يمينى و عربيات جاية من هذه الحارة و داخلة عليا . هل المفروض أنى أعمل ايه عشان اتفادي السريع اللى جاي يكسر و خلاص عليا

فيه حاجة اسمها الاتصال بالعين ... يعنى انظر للسائق الماشى بجوارى ... لو سمح لى انى ادخل قبله خلاص اتوكل على الله والف وانا ملتزم بحارتى ... لو لم يسمح لى ودخل قبلى ... يبقى لازم انتظر واحترس قبل الدخول ... والافضل طبعا انا لازم استخد م الاشارة عشان الكل يعرف انى داخل الملف ... اما لو كنا موش داخل الملف ممكن استخدم الإشارة العكسية عشان الكل يعرف انى ماشى على طول ... وبعد كده اطفى الاشارة وماانسهاش .... اهم حاجة رجلك تكون خفيفة وضاغط على الدبرياج عشان تتحكم فى سرعة السيارة ... والموضوع ده تقريبا اتكلمنا فيه فى المشاركات الاولى


2- أزاي أعرف انى سايب مسافة مناسبة بينى و بين اللى قدامي، انا بعرفها ان لما آخر الأكصدام اللى قدامي يبقى قرب من بوز الكبوت يبقى انا كده سايب بتاع 80 سم او متر بينى و بينها ، كده صح؟

ببساطة جدا ومن الآخر وبدون تفاصيل كثير "لازم تشوف عجل السيارة الخلفى" ... يعنى السيارة اللى ماشية امامك لازم تشوف عجلها الخلفى .... وتحافظ على المسافة دى خصوصا اثناء السير الطىء ... اما لو كنت ماشى بسرعة فده له مشاركة سبق وشرحنا فيه المسافة اللى المفروض تركها حسب السرعة اللى انت ماشى بها

3- أزاي اعرف افادي الناس و العربيات فى الشارع من غير ما أكسر على اللى جانبي ، مع العلم أن في ناس بتترمي قدام العربيات عندنا فى وسط البلد و ناس داخلة عكس و عجل و موتوسيكلات و ناس راكنة صفين تلاتة و العملية كشري
فانا خايف اجي افادي حد اخش فى التاني

ههههههههههههه انت ماتفاديش حد ماشى ... لانك لو دخلت امامه ... ممكن يجرى عليك
اما لو دخلت خلفه ممكن يخاف ويرجع للخلف
الصح انك تنتظر وتهدى العربية وتحط دماغك فى الثلاجة حتى ولو حكم الامر انك تتوقف عشان الناس تعدى ... الاولوية للمشاة ولازم تكون حريص جدا جدا لان دول "لحم ودم" ... لازم تلتزم بحارتك ولا تغيرها خالص مهما كانت الظروف

4- ياريت حد يفهمنى مبدأ الهدف الثابت ده ، حاولت أطبقه النهاردة و بصيت على العربية اللى قدامي بتاع 50 متر لقيت نفسي لا إرادي بعوم يمين و سمابل معاها بلا سبب و ساعات سرحت كمان فى مش عارف ازاي ابقى فى خط مستقيم من غير تعويم و خصوصا حتى لو ثبت الدركسيون الشوارع الزيالة الى عندي تخلي العربية تحدف

عشان تمشى فى خط مستقيم ... اولا لازم العربية نفسها تكون مضبوطة "زوايا العجل" ودى يتم ضبها عند بتاع الزوايا
والنظر دائما يكون للامام بشكل كبير عشان العربية ما تحدفش منك ... يعنى لا تنظر اسفل الكابوت .... انظر الى الامام بشكل كبير عشان العربية ما تحدفش منك يمين او شمال


5- لحد دلوقتى مش عارف اتعود على المرايا خالص و اللى بيعملنى رافض ان ابص فى المرايا اصلا عشان ما لخبطش نفسي ، انا فى عربيتي المرايا الجانبية اليمين و الشمال بتجيب رؤيا جميلة جدا و لكن مرايا الصالون بتخيلنى جدا و مابتخلينيش اركز فى اللى قدامي اصلا

هى خطورة المرايا انها بتعلمك السرحان ههههههههه يعنى من كثر التركيز مع المرايا تلاقى نفسك سرحت وبطلت تنظر الى الامام والمفاجأة لو العربية التى امامك توقفت .... الصح انك تنظر فى المرايا نظرة خاطفة كل تقريبا 8 ثوانى ... وتعود الى النظر الى الامام ... يعنى كل فترة انظر فى المرايات بسرعة وارجع انظر الى الامام مرة تانية .... فيه مرايات حلوة ممكن تركبها فى منتصف العربية "بانوراما" بتظهر لك كل العربيات اللى ماشية خلفك من اليمين الى الشمال .... وفيه مرايات اسمها "عين سمكة" بتركب على الاجناب بتظهر اى شىء بيتحرك على يمينك او شمالك ... هو موضوع المرايات ده مهم جدا جدا جدا خصوصا قبل ما انقل نفسى من حارة الى حارة اخرى ... لازم انقل نفسى بشكل بطىء جدا وتدريجى .... عشان حتى لو انا دخلت خطأ على طول هاسمع كلاكس من السيارة القادمة خلفى ... وبالتالى هاعدل العربية مرة تانية فى نفس الحارة .... اما لو كنت شايف كويس فى المرايا ان الطريق امان وان مافيش عربيات ماشية خلفى ... يبقى فى الحالة دى هاتنقل نفسك بطىء برده حتى تنتهى من عملية النقل من حارة الى حارة اخرى ... وطبعا لازم استخدم الإشارة عشان اللى ماشى خلفى يعرف انى هانقل نفسى الى الحارة المجاورة ... وموش لازم عشان استخدم الإشارة انقل نفسى مرة واحدة ... لازم انتظر شوية وبعدين ابدأ فى الدخول

6- ساعات لما ابص فى المرايا اللى فى النص و اتحرك اقلاينى سفت نص المقعد الخلفى و الصورة بتاعة الزجاج او الشارع بتموج شوية ده بيعملى ربكة ، انا جايبها عادى من محلات الاكسسوار لأن مراية العربية اصلا صغيرة ، فهل يوجد حل ولا ده طبيعى؟

7- عايز أعرف أبعاد عربيتى مش عارف ابدا

كل الناس بتقول بالتعود و لكن انا بستغرب جدا لما حد يكون سايق عربية كبيرة قوى و يجي يسوق عربية عادية او صغيرة بيمشي عادي جدا ، طب عرف ازاي ابعادها بالسرعة ديه من أول مرة؟ نفس أفهم بجد بقى

لو كنت سايق عربية كبيرة وركبت عربية صغيرة ... مافيش اى مشاكل
المشكلة لو كنت راكب عربية صغيرة ومتعود عليها .. ومرة واحد ركبت عربية كبيرة طبعا بتخاف
الصح انك تنظر امامك بشكل اوسع ... يعنى لا تركز على الاجناب بشكل كبير
لو انت شايف ان المساحة التى امامك تكفى عربيتك
خلاص ركز فى ناحية واحد واقترب منها على قدر الامكان وادخل براحة ... ركز على الناحية التى بجوار السواق ... لو كنت بجوار الرصيف ... يبقى هاتركز على الرصيف انك تقترب منه ... اما لو كان على يسارك سيارة ... يبقى كل التركيز انك تقترب من هذه السيارة
والصح انك "ما تشحرش نفسك" بين الحارات
يعنى لو انت ملتزم بحارتك .. موش هاتشعر بمشكلة ابعاك السيارة
اما لو مشيت بين الحارات على الخطوط الفاصلة
يبقى فى الحالة دى المكان هايكون ضيق ... وتبدأ تخاف من حجم العربية
على العموم مع الوقت ها تتعود على حجم العربية

8- فى الملفين الشمال اللي بينهم حتة شارع بتاع 2 متر و يكونوا ورا بعض عشان يعملوا يو ترن و يكون هذا اليوترن مكون من 4 او 5 حارات و هو اصلا طريق كويس مش سريع ، المشكلة انى لما أجي أخده دايما بلاقي نفسي فى نص الشارع رغم انى جاي هادي جدا ، فى حل؟

ده كلام خطير جدا جدا جدا
لازم تقرأ كل المشاركات الخاصة باليوتيرن
وابدأ التمرين كثير قوى
ومافيش داعى تنزل بالعربية فى مناطق زحمة حتى تنتهى من التدريب

9- اظبط رجلي ازاي على دواسة البنزين بالتفصيل الممل عشان انا مش عارف خالص يا امى تقيلة و العربية تجري منى يا امى خفيفة و اعطل الشارع، أعمل ايه؟ و ليه كل عربية ليها الظبطة بتاعتها
انا عماة بظبطها بصوت الموتور و لكن فى بعض الأحيان العربية بتجري و بضطر اخفف رجلي لغاية ما جيب سرعة هادية ، بس انا عايز أغلب على كده عشان المواقف الصعبة لا قدر الله ساعات لا تحتمل الجرية ديه

هههههههههههه المشكلة ان الكلام ده كله كان فيه مشاركات قيمة وبالتفصيل الممل هههههههههههه لكن حضرتك قرأت حتى الصفحة 12 فقط ... يعنى المواضيع دى كلها اتكتب فيها كلام كثير قوى لكن محتاج قراءة وبحث
التحكم فى السرعة بيكون عن طريق الدبرياج
يعنى حتى ولو كانت رجلك تقيلة شوية على البنزين
لكن
بترفع رجلك براحة قوى على الدبرياج هاتقدر تتحكم فى سرعة العربية
وحتة انك بتحاول تعتمد على الاستماع الى صوت الموتور ... فده كويس جدا جدا

حاول تقرأ بسرعة كل عناوين المشاركات فقط لا غير
واكتب فى ورقة العناوين المهمة وارقام الصفحات
فى الآخر سوف تجد اجابات كثير قوى ومفيدة جدا وبسهولة هاتوصل لكل شىء انت عايزه

معلش بس انا مش عارف سقت ازاي قبل كده بالفطرة و تعليم بسيط فى حتت كتيرة وزحمة من يجي 4 سنين و ماركزتش فى كل التفاصيل ديه خالص و لما جبت العربية نسيت كل حاجة و بقيت ادقق فى اقل حاجة

طبعا لان السواقة ممارسة
واكيد نسيت كل حاجة
معلهش مع الوقت هاتفتكر كل حاجة
لكن نصيحة
خلص التدريب الاول وبعد كده انزل بعربيتك زى ما انت عايز

مرفق فهرس خاص بجميع المشاركات

لفتح اى مشاركة اضغط مفتاح كنترول مع "كيلك بالماوس"
سوف تجد ان المشاركة اتفتحت فى متصفح الانترنت

حاولت انى اعمل الفهرس داخل المنتدى ... لكن النتائح لم تكن جيدة بسبب انه اللنك اجده شكله غريب قوى ..
المهم
جربه الفهرس ده
وفى انتظار التواصل

مع اطيب التنميات
اخوكم حسين غزالة

[husseinoo]

فهرس خاص بجميع المشاركات

ارجوا ان اكون وفقت


مع اطيب التمنيات
اخوكم حسين غزالة

[A.Saad]

عايز اضيف حاجة فى التقاطع بعد اذن استاذ حسين

ملاحظة الانوار
يعنى ممكن التقاطع يكون الرؤية فيه مش كويسة بس اخد بالى من انوار السيارات التانية على الارض
لو لقيت نور يبقى فيه عربية جاية
انا كمان ادوس كلاكس متقطع خفيف
وارعش نورى
لو ملقتش
مش معنى كدة مفيش عربيات
لا ممكن يكون فيه لان فيه ناس متخلفة بتسوق من غير اى نور

عامة عند التقاطع
ترعش النور
تدى كلاكس
وتهدى زى ما استاذ حسين قال

موضوع عربية راكنة وحاجبة الرؤية
ساعات بعمل ايه
بهدى قبل الشارع شوية واحاول ابص من زجاج العربية التانية او من المسافة اللى بينها وبين المبنى اللى واقفه عنده
ده مؤشر بيوضح فيه حدجاى ولا لا
ولو شفت حد اخد بالى
ولو مشفتش مندفعش برده

[husseinoo]

عايز اضيف حاجة فى التقاطع بعد اذن استاذ حسين

ملاحظة الانوار
يعنى ممكن التقاطع يكون الرؤية فيه مش كويسة بس اخد بالى من انوار السيارات التانية على الارض
لو لقيت نور يبقى فيه عربية جاية
انا كمان ادوس كلاكس متقطع خفيف
وارعش نورى
لو ملقتش
مش معنى كدة مفيش عربيات
لا ممكن يكون فيه لان فيه ناس متخلفة بتسوق من غير اى نور

عامة عند التقاطع
ترعش النور
تدى كلاكس
وتهدى زى ما استاذ حسين قال

موضوع عربية راكنة وحاجبة الرؤية
ساعات بعمل ايه
بهدى قبل الشارع شوية واحاول ابص من زجاج العربية التانية او من المسافة اللى بينها وبين المبنى اللى واقفه عنده
ده مؤشر بيوضح فيه حدجاى ولا لا
ولو شفت حد اخد بالى
ولو مشفتش مندفعش برده

ما شاء الله عليك
كلام اساتذة
الله يبارك فى حضرتك

:b4_388:

[sossi]

دى مش نصائح دى قواعد مهمة جدا

جزاك الله كل خير

[م. عصام مهنى]

نصيحة: يجب الحذر من الموتوسيكلات والدراجات التى تسير بالقرب من الرصيف ..

دى نصيحة جميلة جداً

يعنى النهاردة وانا نازل الشغل فى يو ترن فى الشارع الرئيسى

وانا بلف اليوتيرن امامى موتوسيكل وعليه تلات بنى ادمين اليوتيرن دى هو عبارة عن يو تيرن ومطلع خفيف

انا ورا الاستاذ اللى سايق الموتوسيكل وداخل مهدئ افاجا ان الاستاذ وقف قدام العربية والاشخاص اللى معاه كانوا هيقعوا فوق كبوت العربية لانه الباشا مقدرش يطلع بالحمولة اللى على الموتوسيكل
النتيجة نه خبط فى العربية ناحية الفانوس اليمين وجرح العربية وخدش فى الفانوس

ومعلش يا استاذ

طيب هعملوا اية

مش مهم العربية المهم انه معاه ناس وهوا مش خايف عليهم

لو افترضت انى داخل على اليوتيرن سريع وهوا وقف مرة واحدة مش الناس دى كانت ممكن تبقى تحت العجل عندى

الحمد لله ربنا سترها

واحذروا الموتوسيكلات والدراجات

اللهم اكفنا شر الطريق وشر اغبياء الطريق

[husseinoo]

دى مش نصائح دى قواعد مهمة جدا

المشكلة ان الاساسيات فى القيادة كثير قوى ... وبتتغير حسب المكان فى تقاطع فى طريق سريع فى طريق فيه زحام وحسب سرعتك وعوامل كثير قوى ومواقف كثير قوى ... لدرجة ان الواحد بعد قراءة كثير من المواضيع بمجرد الجلوس خلف عجلة القيادة ههههههههههه والشعور بالخوف خصوصا لما يكون جديد فى موضوع تعلم القيادة ... على طول ينسى كل حاجة ههههههههههه
الافضل ان الواحد يحاول يركز شوية
ويراجع دائما المواقف اللى بيمر بيها
ويحاول يجرب كل مرة حتى ولو حاجة واحدة من اللى قرأها

يعنى مثلا قرأ موضوع المسافة الفاصلة بين السيارات وفهم الموضوع كويس
يبقى خلاص المرة القادمة
يحاول انه يحافظ على المسافة الفاصلة بينه وبين السيارات التى حوله حسب سرعته التى يسير بها
والمرة التالية
يركز فى مهارة اخرى وهكذا
لازم مستواه هايتحسن إن شاء الله
وكل السيارات التى تسير حوله سوف تشعر ان اللى سايق العربية راجل فاهم كويس وموش هاتضرب له كلاكسات خالص ...

جزاك الله كل خير

متشكر جدا على دعائك الجميل
ودى احلى حاجة اقرأها فى المنتدى
متشكر لحضرتك مرة تانية ... وهاقول لك انا ايضا "ولك مثله"

مع اطيب التمنيات
اخوكم حسين غزالة

دى نصيحة جميلة جداً

يعنى النهاردة وانا نازل الشغل فى يو ترن فى الشارع الرئيسى

وانا بلف اليوتيرن امامى موتوسيكل وعليه تلات بنى ادمين اليوتيرن دى هو عبارة عن يو تيرن ومطلع خفيف

انا ورا الاستاذ اللى سايق الموتوسيكل وداخل مهدئ افاجا ان الاستاذ وقف قدام العربية والاشخاص اللى معاه كانوا هيقعوا فوق كبوت العربية لانه الباشا مقدرش يطلع بالحمولة اللى على الموتوسيكل
النتيجة نه خبط فى العربية ناحية الفانوس اليمين وجرح العربية وخدش فى الفانوس

ومعلش يا استاذ

طيب هعملوا اية

مش مهم العربية المهم انه معاه ناس وهوا مش خايف عليهم

لو افترضت انى داخل على اليوتيرن سريع وهوا وقف مرة واحدة مش الناس دى كانت ممكن تبقى تحت العجل عندى

الحمد لله ربنا سترها

واحذروا الموتوسيكلات والدراجات

اللهم اكفنا شر الطريق وشر اغبياء الطريق
[/right]

الف مليون سلامة لحضرتك
فى الحقيقة الناس اللى بتركب الموتوسيكلات نسبة كبيرة منهم شباب صغير او صنايعية موش فاهمين خطورة "الموتوسيكل"
فى ثانية واحدة تلاقيه ماشى بجوارك
ولو ماعملتش حسابه كويس ... اى خبطة بسيطة تلاقيه واقع على الارض امامك ... ربنا يسترها مع الجميع
افتكرت حاجة حلوة قوى ايه هى ؟

ان فى مرة من المرات
سمعت صوت الموتوسيكل .. لكن انا موش شايف هو جاى منين عشان اعمل حسابه
طبعا الباشا عمال يعمل حركات
وانا ابحث فى المرايه عنه وموش شايفه هههههههههههههه
غضب عنى استمريت ماشى فى خط مستقيم
واخيرا ظهر هلاله ههههههههههههه
ومر بسلام بعيد عنى

ساعتها افتكرت النصيحة اللى بتقول انك لازم "تسمع كويس" يعنى موش تشوف فقط
لأ
لازم تشغل كل حواسك وانت سايق العربية
سمعت صوت الموتوسيكل على طول تاخد بالك جامد
وتبعد عنه قدر الإمكان
وتعتبره انه له الحق فى حارة كاملة مثل اى سيارة
يعنى لا تقترب منه تماما واعتبره سيارة ماشية

وكويس جدا ان حضرتك تارك مسافة كافية وممتازة بينك وبينه
وكمان التوقع
التوقع ممتاز جدا عند حضرتك
لان مافيش حد يتوقع انه فيه اى حد يتوقف على مطلع وكمان اثناء اليوتيرن

ربك هو الستار
واحنا بناخد بالأسباب

لكن صاحب الموتسيكل عمل ايه ؟
اكيد حضرتك استحملت شوية سفالة منه ومن اصدقائه
ههههههههههههه

معلهش حصل خير
واللى يعيش يا ما يشوف

الف مليون سلامة

مع اطيب التمنيات
اخوكم حسين غزالة

[husseinoo]

بسم الله الرحمن الرحيم

اللهم صل على محمد وعلى آله وصحبه أجمعين

تعلم القيادة فى 10 ايام

التحكم فى السيارة على سرعات منخفضة

يتم التدريب على هذه المهارة بعد الشعور بالثقة فى التحكم فى دبرياج السيارة
و يجب أن تكون قادر على تنفيذ جميع هذه التمارين بدرجة معقولة من الدقة والسلامة.

فى هذا التدريب سوف تستخدم الغيارالخلفى "للرجوع بالسيارة إلى الخلف" وطبعا لازم نفكتر كويس جدا أن الاولوية للمشاة ولازم تتأكد انك لن تسبب لهم اى ازعاج او مشاكل .. وانك لن تسبب اى مشاكل للطرق التى تتدرب عليها

لازم تنظر جيدا على المشاة خلف السيارة ... خصوصا الاطفال الصغار ... لانك ببساطة لن تراهم بشكل جيد لو كانوا بيلعبوا خلف السيارة

لذلك مهم جدا انك تختار مكان فاضى وخالى من المشاة والسيارات قبل التدريب


وطبعا لازم تغير المكان اللى بتتدرب فيه ... يعنى تختار فى كل مرة مكان شكله مختلف ... خصوصا فى الاماكن المخصص للتدريب التابعة لمدارس القيادة ....

التمارين

فى هذا التمرين تتعلم استخدام الدبرياج فى العودة للخلف

ابدا فى السير الى الامام على سرعة هادئة
ثم توقف عن طريق الضغط على الدبرياج
ثم ابدأ فى العودة للخلف


التمرين الثانى

كيف يتم التحرك الى الامام "فى حالة وجود سيارة راكنة امام سيارتك"
عندما تكون واثق فى عملية التحكم فى سرعة السيارة "سرعة هادئة جدا" وفى نفس الوقت التحرك فى مساحة صغيرة جدا والسيطرة على عجلة القيادة "الدركسيون" ههههههههههههه كله فى نفس الوقت
ندخل على التدريب ...

• ابحث عن سيارة متوقفة ... وتوقف خلفها على مسافة 3 متر تقريبا ...

• انظر امامك جيدا

• انظر خلف السيارة ايضا

• انظر نظرة خاطفة على المنطقة العمياء

• يفضل استخدام الإشارة لتنبيه السيارات الأخرى "انك ناوى تتحرك بالسيارة والخروج من الباركينج"

• عند ظهور فرصة تبدأ فى التحرك بشكل بطىء والخروج من السيارة المتوقفة امامك ... اذا لم تظهر لك فرصة للتحرك يجب عليك الإتتظار "لان موش لازم السيارات القادمة من الخلف تنتظر سعادتك حتى تبدأ فى الخروج والسير بسرعة"

انت اللى لازم تنتظر وتصبر حتى تظهر لك فرصة للتحرك

• ابدأ فى رفع قدمك فقط عن الدبرياج بشكل بطىء جدا ... لكى تتحرك السيارة بهدوء جدا للغاية ...

• انت فى هذه الحالة لا تحتاج الى الضغط على البنزين اطلاقا

كل اللى هاتحتاجه رفع رجلك عن الدبرياج خفيف قوى
حتى تبدأ السيارة فى التحرك الهادىء جدا

• ابدأ فى "لف الدركسيون" ناحية اليمين او الشمال حسب المكان اللى انت راكن فيه

• واول ما مقدمة السيارة تخرج من السيارة التى امامك

• ابدأ على الفور فى "تعدل مقدمة السيارة" الى الامام مرة اخرى

يعنى تخلى العربية ماشية فى خط مستقيم
ثم تبدأ فى التحرك الى الامام حتى تخرج عربيتك من خلف العربية الاخرى وتستمر فى السير بشكل طبيعى

عندما تزيد تقتك فى نفسك
تبدأ فى التدريب مرة اخرى لكن فى هذه المرة تقرب شوية اكثر من السيارة المتوقفة
يعنى تقف قريب شوية مثلا 2 متر خلف السيارة المتوقفة
وتختار مكان يكون فيه حركة شوية اكثر
وتبدأ فى التدريب مرة تانية

وعندما تزيد ثقتك فى نفسك اكثر

• ابدا التدريب فى مكان مرتفع

• او فى مكان منخفض

لكن يجب الحرص الشديد عند التحرك فى الاماكن المنخفضة لانك لازم تستخدم الفرامل ايضا حتى لا تندفع السيارة الى اسفل بسرعة



شوف كل الكلام ده على عملية الخروج فقط من السيارة المتوقفة امامك
لازم تتدرب كويس جدا
مافيش حاجة اسمها انزل امشى فى الشارع وخلاص
يبقى انا كده كويس قوى
وكل ما اركن العربية
او اخرج بالعربية
افضل اخبط فى السيارات اللى راكنة امامى

طبعا كلنا مرينا بالحكاية دى
وكل واحد حسب شطارته ... اللى كسر "الاكصدام" تماما
واللى كسر له كام فانوس ههههههههههه سواء فى عربيته او عربية الناس الغلابة اللى كانت راكنة جنبك
هههههههههه طبعا كلها مصاريف ومشاكل ملهاش لازمة
كل اللى هاتحتاجة 5 او 6 لتر بنزين بحوالى 12 جنيه
وتنزل تتدرب كويس قوى على الموضوع ده


تابــــع


مع اطيب التمنيات
اخوكم حسين غزالة

[A.Saad]

استاذ حسين
مشاركتك اللى فاتت فكرتنى بايام مكنت بتعلم ..........ياه كانت ايام
كنت بروح اماكن فاضية خالص وملقتش عربيات اتدرب عليها
جبت كارتونتين بتوع سجائر فاضيين وهما بيبقوا عاليين واتدربت عليهم
وجت لى فكرة تانية
ماسورة بلاستيك فاضية طول متر ولا متر ونصف وتتحط فى زجاجة فاضية وتوضع كانها ابعاد عربية تانية
كدة حافظت على عربيتى وعربية الناس

[husseinoo]

استاذ حسين
مشاركتك اللى فاتت فكرتنى بايام مكنت بتعلم ..........ياه كانت ايام
كنت بروح اماكن فاضية خالص وملقتش عربيات اتدرب عليها
جبت كارتونتين بتوع سجائر فاضيين وهما بيبقوا عاليين واتدربت عليهم
وجت لى فكرة تانية
ماسورة بلاستيك فاضية طول متر ولا متر ونصف وتتحط فى زجاجة فاضية وتوضع كانها ابعاد عربية تانية
كدة حافظت على عربيتى وعربية الناس

فكرة ممتازة
يا ريت كنت عرفتها ايام ما كنت بتعلم
لكن تخيل لو فيه وقت ممكن الواحد يعملها
ويتدرب مرة تانية بحيث انه يتعلم يركن فى اسرع وقت وبدقة عالية

خصوصا انها موش مكلفة خالص

ايوه كده عايزين نسمع الافكار العملية والسهلة التى تساعد على التدريب بشكل جيد
شكرا لحضرتك جدا



مع اطيب التمنيات
اخوكم حسين غزالة