نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

السلام عليكم ورحمة الله

انا عندى مشكلة فى طلوع الكبارى مرة كنت طالعة كوبرى زحمة وانا طالعة بالعربية الكوبرى وقف فروحت موقفة العربية لكنها فجأة بطلت بالرغم انى كنت ماسكة الدبرياج مع الفرامل والعربية بأت بتريح على ورا واللى ورايا يكلكس وانا مش عارفة اتصرف ...

اولا حمد لله على سلامتك
الاول لازم تتأكدى ان الفرامل عندك تمام
يعنى مستوى زيت الفرامل مثلا مضوبط ... ولا بينقص ... يعنى لو فيه اى مشكلة خاصة بالفرامل لازم الاول تتحل عند الميكانيكى
لان حضرتك بتقولى انك ضغطى على الدبرياج مع الفرامل ومع ذلك العربية رجعت الى الخلف

ممكن تكون العربية ريحت على ورا ... بسبب ان عملية نقل الغيار والتحرك تتم بشكل بطىء ... يعنى حضرتك بطيئة شوية
وعلى ما ترفعى رجلك من على الفرامل وتضغطى على البنزين .. فى الوقت ده تكون العربية ريحت الى الخلف شوية

طبعا رفعت فرامل اليد ودورت العربية لكن اول ماكنت بحاول اتحرك بيها وانزل فرامل اليد الاقيها نطت وبطلت تانى ... وفضلت ع الوضع ده وطبعا بقيت فرجة وسط العربيات وعطلت الناس و كانت شغلانة ... لغاية اما ربنا سترها وكملت الكوبرى على خير ...

حضرتك اتصرفت صح بأنك رفعتى فرامل اليد
المشكلة هنا ... ان حضرتك نزلتى فرامل اليد قبل ما العربية ما تتحرك
يعنى المفروض ان الاول ابدأ فى نقل الغيار
ثم الضغط على البنزين زيادة شوية عن المعتاد لان السيارة فى مطلع
ثم رفع الرجل عن الدبرياج بشكلى بطىء ... يعنى موش بسرعة
واول ما اشعر ان العربية عايزة تتحرك
انزل فرامل اليد
سوف اجد ان السيارة اتحركت الى الامام بدون مشاكل وبدون ما تريح على الناس اللى فى الخلف

انا عن نفسى بريج دماغى تماما
حتى ولو متوقف فى اشارة مرور
برفع فرامل اليد ... عشان العربية ما تريحش على اللى ورايا او اللى امامى
واريح رجلى شوية
وامور السيارة

لكن عينى دائما الى الامام بشكل كبير قوى ... واول ما اشعر ان العربيات التى فى الامام بدأت تتحرك او اول ما الاقى ان اشارة المرور اصبحت خضراء ... على طول اجهز نفسى وانقل الغيار الاول واكون مستعد

ودائما انظر من خلال زجاج السيارة التى امامى
انظر على السيارات التى امام السيارة التى امامى هههههههههه
حاسس انى بقول "لغز" او انى بتعلم الكلام ههههههههه

المهم انى اراقب السيارات التى فى المقدمة وليس السيارة التى امامى فقط ... ده عشان اتحرك بسرعة واتوقف كمان بشكل آمن وفى الوقت المناسب

انا فى النزلة كويسة لأنى ببقى متحكمة فى العربية كويس لكن مش عارفة الطلوع عندى وحش جدا لو الكوبرى وقف فجأة وانا على المطلع.

النزول ايضا فيه خطورة ... لان العربية بتنزل بسهولة وبتجرى بسهولة مهما كان نوعها ومهما كان حالتها
عشان كده لازم تنزلى ورجلك جاهزة فوق الفرامل ... وتنزلى بشكل هادىء شوية
واوعى تضغطى دبرياج اثناء النزول .. عمر العربية ما هاتقف بسهولة
اضغطى الدبرياج قبل السيارة التى امامك بحوالى 4 متر ... وبمجرد الشعور ان السيارة سوف تتوقف اضغطى الدبرياج مع الفرامل

فيه حاجة تانية انا لاحظت ان عربيتى بتطلع دخان اسود اول مااشغلها وبعدين بيختفى ... ولما بصيت على الشكمان من ورا لقيت زى سائل اسود كده فى الماسورة ... ده يبقى ايه؟؟

بالنسبة للدخان الاسود ... مافيش مشاكل ان شاء الله والموضوع بسيط ... "
لو الدخان لونه ابيض ... يبقى للاسف الموتور محتاج عمرة
لو العربية بارده وطلعت شوية دخان أسود ،، قد يكون السبب هو

• نظافة الكاربراتير ،

• او البوجيهات

• او محتاجة ضبط لبكات البنزين

• او شفاط الهواء محتاج ضبط

• او فلتر الهواء يكون مسدود

وجزاكم الله خيرا
سلام عليكم


وجزاكى كل الخير
ارجوا ان اكون وفقت

مع اطيب التمنيات
اخوكم حسين غزالة

[calipha3]

الحمد لله ربنا كرمني و نجحت, القراطيس كانت مرصوصه بشكل مستقيم و انت تعدي اس رايح و بظهرك, و للاسف كانوا 3 عربيات و الي انا ركبتها كانت مراياتها بايظه فقلت للسواق الي واقف بيتابعني يوجهني و ليه الحلاوه و الراجل مقصرش يعني واحد اعمي و ده بيشد ايدي و الله مكنتش مصدق اما وصلت اني مشلتش ولا قرطاس .

[calipha3]

انا قبلها رحت مدرسه خاصه تعليم سواقه عامتا بس للاسف المدرب منطقش بولاكلمه ربنا يبارك فيك كنت بقرأ كلامك هنا و اطبقه,
بالنسبه للكوبري فعلا كنت طالع مش سريع قوي و شايف بالمرايه عربيه نقل جيه ورايا بسرعه فضلت اقول للمدرب اسرع عشان انا شايف انوا هيلحقني و هيزنقني علي حوده الكوبري و الي حصل لقيته زنقني في التحويده و حدف عليا و الكوبري ضيق و الحته ده بتحصل حوادث كتير فيها بس الحمد لله انا بتحكم كويس في العربيه و فاديته من غير ما طير من علي الكوبري و المدرب جنبي اعصايه باظت هههههههه و ربنا يستر.

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام


تدريبات هامة جدا

تدريب على التوقف الفورى

طبعا الكلام ده كله برغم انه سهل ... لكن انا عن نفسى اتذكر ان طوال مدة التدريب فى مدرسة القيادة حوالى 3 اسابيع لم يتحدث مع سائق واحد بخصوص الموضوع ده


وكمان اصدقائى ايضا لم يتحدثوا مع بخصوص الموضوع ده
فى الحقيقة ان تذكرته من زمان اثناء متابعة حديث "لوالدى الله يرحمه بخصوص مساعدة العربية فى التوقف الفورى" كنت صغير فى الوقت ده لكن انا فاكر الحوار كويس ههههههههه المهم نبدأ على بركة الله تعالى ...




محاولتك الاولى للتوقف بالسيارة يجب ان تتم بحكمة وذكاء .... والتدريب على التوقف الجيد يجب ان يكون على سرعة هادئة فى الأول ... يعنى موش معقولة عايز اتدرب على التوقف الجيد واكون ماشى بالسيارة على سرعة 90 كيلوا او اكثر هههههههههههه خصوصا ان احنا مبتدأين

المطلوب هو التدريب على التوقف مع الضغط على الفرامل اكثر قليلا عن المعتاد

• اول ما صديقك الذى يجلس بجوارك او المدرب الذى يجلس بجوار يعطى لك إشارة بالتوقف ...

• يجب ان تستجيب على الفور ...

• وتضع قدمك فوق الفرامل بسرعة

• ترفع قدمك عن الدبرياج ولا تضغط عليه تماما .. إلا ... عند الشعور ان السيارة خلاص سوف تتوقف ... يعنى قبل ما السيارة تتوقف تماما اضغط على الدبرياج وانقل الغيار المطلوب او "مور" السيارة

• طبعا الطريقة دى سوف تساعدك على التوقف الجيد مع الشعور بالإستقرار والأمان والثقة

• اذا تركت الدبرياج فى حاله ههههههههههههه لآخر لحظة ... موتور السيارة سوف يساعد السيارة فى تهدئة سرعتها

طبعا الطريقة دى هاتمنع العربية من الإنزلاق ...

يعنى انت تبقى ماشى بالسيارة ومرة واحدة تقرر التوقف والمفاجأة أن السيارة لا تريد التوقف ... او تتوقف على آخر لحظة وطبعا ههههههههه قلبك هايقع ... " اقفى يا بنت الحلال" هههههههههههه وفى الآخر تقف العربية بعد ما قلبك يقف الأول ..... وكل ده كان ليه ؟ .... عشان حضرتك ضغط على الدبرياج بدرى قوى وفى نفس الوقت ضغط على الفرامل ....

ملحوظة: احيانا المبتدأين اول ما يفكر انه يتوقف على طول بشكل تلقائى يضغط على الدبرياج والفرامل مع بعض مهما كانت سرعته ... يعنى يبقى ماشى على سرعة اكثر من 60 كيلوا ومرة واحدة يضغط على الدبرياج والفرامل ... طبعا استحالة السيارة تتوقف

انظر الى الصورة السابقة
السيارة الاولى التى فى المقدمة ... ضغط فيها السائق على الفرامل والدبرياج مبكرا ... والنتيجة انه بيحدث زيادة فى الحمل على مقدمة السيارة ... واصبح من الصعب التوقف بسهولة والتحكم فى السيارة

السيارة التى فى الخلف ... ضغط قائدها على الدبرياج قبل التوقف تماما ... او قبل السيارة التى امامه بقليل ... واستطاع التوقف بشكل آمن وجيد

الخلاصة: لازم تضغط على الدبرياج اول ما تشعر ان العربية خلاص سوف تتوقف بعد ثوانى

طبعا اثناء قيادة السيارة ... لازم تكون ايديك الأثنين ممسكين بعجلة القيادة بإحكام


لأنك فى اى وقت ممكن تغير مكانك من حارة الى حارة او تكون بتمر من تقاطع مهم او محتاج انك تتفادى سيارة اخرى

قبل التحرك بالسيارة مجددا افحص كل ما يدور حول سيارتك جيدا ... انظر فوق كتفك الايمن والايسر لترى ما يحدث حولك

تابــــــــــــــــع


مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

"التعويم" انزلاق السيارة

اى عربية معرضة "للتعويم" والانزلاق ... خصوصا فى الشتاء
حالة العربية والقيادة بطريقة آمنه مهمين جدا ... لكن فى الحالة اللى احنا بنتكلم عليها ... "التعويم" .... اهم حاجة لازم نأخذ حذرنا منها هى "حالة الطريق" نفسه اللى هانمشى عليه
اذا كان الطريق "ضيق"
اذا كان الطريق "مبلل بالماء"
اذا كان الطريق "عليه ثلج" ... ده طبعا فى المناطق الباردة
كاوتش العربية ... تأثيره بيكون ضعيف .. يعنى موش ملامس الارض كويس

العلامات اللى على الطريق بتوضح لك ان الطريق "سىء" هههههههههههه لكن صعب انها تقول لك "حالة الجو" النهارده ايه

"تعويم" العربية يحدث اذا حاولت انك تغير من سرعة السيارة او انك تفرمل السيارة
او انك تغير من اتجاه السير للسيارة بشكل مفاجىء
فى الحالة دى عجل السيارة بيفقد حساسيته ولا يلتصق بالارض

عدم التحكم بالفرامل يعتبر الخطر الرئيسى عنك حدوث "تعويم " للسيارة

التحكم فى الفرامل يكون فعال جدا خصوصا لو انت ماشى فى طريق مستقيم


عند الضغط على الفرامل "ثقل" السيارة ينتقل الى المقدمة
مما يقلل من ضغط العجلات الامامية على الارض ويعرض السيارة الى الإنزلاق
وفيه احتمال ان السيارة "تلف" حول نفسها

كيف تواجه انزلاق السيارة "تعويم" السيارة

ارفع رجلك عن البنزين تماما

ارفع قدمك عن الفرامل لكى تعود السيطرة على السيارة مرة اخرى
اضغط على الفرامل عند الضرورة
اضغط على الفرامل خفيف اذا شعرت بتعويم العربية
عند رفع قدمك عن الفرامل .. حاول ان تسيطر على السيارة فى شكل مستقيم ... يعنى "اعدل العربية" للأمام لا يمين ولا شمال

لازم تكون حذر لان عملية الانزلاق .. ممكن توجه العربية الى اتجاه السيارات المقابل مما يعرضك للخطر

وعلى فكرة حتى ولو كان الطريق جاف .. اذا ضغط على الفرامل بشكل قوى ... فى الحالة دى ممكن العربية "تعوم" منك وتفقد السيطرة عليها ولا تستطيع التحكم فيها

تذكرت موقف من يومين

ظهر لى الاوتوبيس ومتجه الى اليوتيرن
وخلفى السيارة الحمراء موديل 2010 وصاحبتها بتجرى ما شاء الله وعمالة تضرب لى كلاكسات عشان ادخل امام الاوتوبيس
هههههههه طبعا كبرت دماغى وشاورت لها ... انت موش شايفه ان فيه اوتوبيس "اد الداهية" ماشى امامى
المهم انا اتجهت اقصى اليمين لكى ابتعد عن زحمة اليوتيرن لانى اساسا ماشى على طول
والاستاذة ... افتكرت انى بوسع لها الطريق ... وهى اساسا عايزة تجرى وخلاص ... والعربية بصراحة ماشاء الله ولا حول ولا قوة إلا بالله صاروخ ... النتيجة هههههههههههه انها زنقت نفسها فى زحمة اليوتيرن

المهم
بعد فترة من الزمن انظر خلفى اجد نفس السيارة هههههههههههه ونفس المطاردة
المهم انا شايف ان فيه مترو ماشى
وانا داخل اليوتيرن شمال
وحاسب المسافة انى استحالة اعدى قبل المترو
المهم ... صاحبتنا موش عايزة تنتظر ... ازاى وهى راكبة عربية ماشاء الله 2010
تعدى من على يمينى وتعمل فيها ناصحة ... واول ما تبدأ تدخل اليوتيرن ... تفاجأ بسيارة متوقفة على اليمين بسبب عطل فيها


بنفس الاصرار ... تعدى من السيارة المتوقفة ..... ... هههههههههههه لكن المرة دى تقف غصب عنها ... لانها وجدت "المترو" هو اللى هايدخل فيها ... دخلة موت ههههههههههههه

طبعا موش هاحكي لكم على "تعويم" العربية اللى حصل له
لانها عمالة تمشى يمين فى شمال فى يمين
مهما كانت كفاءة العربية ... كان ممكن يحدث كارثة ... وربنا يسترها مع الجميع

الخلاصة: اوعى حالة العربية الممتازة .. تخدعك فى الجرى بدون وعى وفى اماكن المفروض انك تكون فيها اكثر حرصا


والخبرة ببساطة "موش فتاكة" ... الخبرة تظهر مع الإنسان اللى عايز يتعلم ... يعنى مثلا انت عارف ان فيه "يوتيرن" وانت موش داخل اليوتيرن من اساسه ... تحاول تبعد عنه قدر الإمكان إذا سمحت لك الظروف

هههههههه يعنى موش اعمل كارثة عشان ابعد عن اليوتيرن
لو فيه فرصة اتحرك بعيد عنه عشان "تسلك" نفسك وتستمر فى السير


لو مافيش فرصة .. خلاص امرك لله ... هدى اعصابك وامشى بعقل خلف العربية التى امامك ... لحد ما ربنا يفرجها والطريق يسلك ... اهم حاجة سلامتك وسلامة الآخرين


تابـــــــع
مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين




تعلم القيادة فى 10 ايام

التخطيط للمستقبل لتجنب المخاطر

وجود اى مشكلة امام سيارتك لا يعطيك العذر لكى تكون سبب فى تعريض الآخرين للخطر


من المهم جدا مراقبة الإشارات التى تراها من السيارات التى امامك وتوقع رد فعلهم عند رؤية فلاش الإشارة ... اى سائق لازم يهدىء من سرعته قبل عمل اى مناورة بالسيارة ... عشان كده لازم تستحمل ويكون عندك صبر



يعنى انت شايف ان السيارة التى امامك بتعطى إشارة عشان مثلا تدخل اول شمال ... الاكيد انه سوف يهدىء السيارة قبل الدخول ... وانت مافيش عندك صبر .. عايز تغمض وتفتح عينيك .. تلاقيه اختفى من امامك ... طيب ازاى هو هايدخل الملف الشمال وهو على سرعته هههههههههه ما هو لازم يهدى عربيته قبل الدخول فى الملف.

انظر الى الصورة السابقة
الطبيعى ان لما السيارة التى امامى تعطى إشارة شمال .. انا على طول اتجه ناحية اليمين عشان "اعدى" من السيارة التى امامى .. لكن فى نفس الوقت لازم اكون حريص ان يكون فيه مساحة كافية ممكن اعدى منها بسلامة ... هههههههه ماعملش زى الآلة .... اول ما اشوف اشارة شمال من السيارة التى امامى ... ادخل انا يمين بدون تردد وبدون مرايات واكنى بلعب "فيديو جيم" موش راكب عربية

لازم اكون مستعد انى اهدىء السيارة وانتظر إذا كانت المساحة غير كافية وضيقة لكى امر بسلامة ... وطبعا احتمال كبير ان السيارة التى امامى تتوقف لاى سبب .. مثلا ظهور عربية فى الطريق المقابل ... وطبعا غصب عن قائد السيارة التى امامى سوف يتوقف حتى تظهر له فرصة ويدخل الشارع اللى هو عايز يدخل فيه

انظر الى الصورة السابقة
السيارة الحمراء داخلة يمين .. واعطت إشارة يمين
طبعا السيارة الحمراء سوف تهدىء من سرعتها لكى تدخل يمين
بالنسبة للسيارة التى فى الخلف ... على طول لازم هى كمان تهدى سرعتها ... ثم يبدأ فى الانتقال الى الشمال لكى يعدى منه ...

المشكلة هنا إيه ؟
اولا انت لا ترى شىء فى الشارع الجانبى
وكمان متوقع ان السيارة الحمراء تدخل يمين بدون مشاكل
واحيانا تستمر فى السير بنفس سرعتك .. على اساس ان السيارة الحمراء سوف تستمر فى السير حتى ولو كانت سرعتها هادئة
النتيجة ان السيارة الحمراء تتوقف تماما بسبب ظهور سيارة خارجة من نفس الشارع اللى هى داخلة فيه او لوجود مشاة فى الشارع

وطبعا حضرتك لم تهدىء من سرعة العربية
ولم تتوقع ان السيارة الحمراء سوف تتوقف تماما
ولم تستعد لعمل مناورة للإنتقال الى الحارة اليسار لكى "تعدى" من السيارة الحمراء
وفيه احتمال انك تلاقى عربية من الخلف عمالة تضرب لك كلاكسات عشان "تعدى" من السيارة الحمراء بأى شكل
ههههههههههه خصوصا لو كان ماشى وراك عربية أجرة او ميكروباس
كل ده بيحصل فى ثوانى

مطلوب استخدام المرايات كويس جدا
انقل نفسى الى الحارة الشمال لو كان فيه فرصة .. او استمر زى ما انا حتى ولو توقفت العربية ... اهم حاجة لا انتقل الى الحارة اليسار ... إلا إذا كنت متأكد مية مية ان كل شىء تمام التمام
اغلب مشاكل المبتدأين بتكون فى مواقف زى دى تماما

واحيانا كثير قوى ... تجد السيارة التى امامك تهدىء من سرعتها وبدون مقدمات يقرر انه يدخل الشارع الجانبى .. وبدون استخدام اى نوع من الإشارات

واحيانا كثير تجد ان فيه سيارات بدون إشارات من اساسه مثل "الاوتوبيسات الخاصة بالنقل العام"


لازم تتوقع كل شىء ... اعتبر نفسك ماشى فى سيرك ههههههه والمطلوب منك الحذر والتوقع ثم التوقع ... ورجلك جاهزة على طول فوق الفرامل وعدم السرحان تماما





تذكرت اليوم قابلنى فى شارع جسر السويس سيارة قادمة عكسى فى نفس الشارع ........ ههههههههه تخيل انت فاكر ان السيارة متوقفة ... وبعد الإقتراب منها تجد ان الباشا ماشى بالعربية عكس الإتجاه ...

يعنى احنا بنتكلم على السيارة التى تسير فى نفس الإتجاه وكيف نتجنب مشكلتها ... لكن عمر ما الواحد يفكر انه يلاقى عربية ماشية عكس الإتجاه وفى طريق مفتوح وسريع مثل جسر السويس .. وكان التوقيت فى الصباح الباكر والطريق سالك والعربيات بتحرى براحتها .. هانقول ايه ربنا يسترها مع الجميع ههههههههههه



وربنا يحفظ الجميع


تابـــــــــــــع
مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

مكانك على الطريق

يجب احترام الطريق .. انت موش ماشى لوحدك فى الشارع ...

• مافيش داعى انك تعمل حركات وانت بتنقل نفسك من حارة الى حارة "غرزة" .. ههههههههه ربنا يحفظنا من الغرز واللى بيعملوا الغرز ههههههههه ... لو عايز تنقل نفسك من حارة الى حارة لازم تتحرك بشكل هادىء وناعم

يعنى مثلا امامك سيارة متعطلة ... ولازم هانقل نفسى الى حارة اخرى ... هاعمل ايه ؟

• اهم حاجة انى الف الدركسيون "خفيف قوى" ... عشان لو كان فيه سيارة قادمة من الخلف وانت موش شايفها كويس فى المرايه ... اكيد هاتضرب لك كلاكس .. فى الحالة دى هاتتوقف عن نقل العربية .. وهاتستمر فى السير على طول وامرك لله ... اوعى تنقل نفسك من حارة الى حارة زى اللى بيلعب "فييو جيم" هههههههه خطر جدا وربنا يسترها مع الجميع

• حاول الابتعاد عن السيارات الاخرى حوالى متر على الأقل ... لان السيارات التى بجوارك ممكن تكون عايز تعدى منك ...

ابتعد عن الرصيف على قدر الإمكان للاسباب التالية:

• ممكن تلاقى مشاة نزلت الشارع مرة واحدة وانت موش شايفهم خصوصا بالليل

• لو قابلك اى مشكلة وانت قريب جدا من الرصيف ممكن تحدف على الرصيف وتلاقى نفسك فوق الرصيف

• لو لا قدر الله خبط الرصيف ... النتيجة ان إطارات السيارة سوف تعرض للتلف الشديد

• ممكن المشاة يفتكروا انك ناوى تتوقف بالسيارة وتركن ... لانك اساسا قريب قوى من الرصيف .. والمفاجأة انك مستمر فى السير ولو واحد منهم نزل من على الرصيف هههههههه انتم عارفين الباقى ... ربنا يسترها مع الجميع

• مافيش داعى انى امشى فى الحارة اليسرى بسرعة بطيئة ... بالشكل ده هامنع الآخرين من انهم "يمروا" ويستمروا فى السير ... ده غير انك مانع الرؤية عن السيارات القادمة من الخلف ... يعنى هو عايز يمر منك وانت ماشى بطىء فى الحارة الشمال ... لا انت موسع له عشان يمر ولا هو شايف حاجة بسببك ...احسن حاجة انك تمشى فى الحارة الوسطى

الإنضباط اثناء السير داخل الحارة

الحارة معمول لها خط ابيض ... وتم تقسيم الشارع بحيث انك تمشى داخل الحارة على راحتك ... كل المطلوب منك انك تمشى فى منتصف الحارة تماما

انظر الى الصورة السابقة

• لازم تمشى فى منتصف الحارة تماما ... الموضوع ده يا جماعة مهم جدا جدا جدا ... يعنى الحكومة كتر خيرها عملت لك خط ابيض فاصل بين الحارات ... ايه اللى يخليك تمشى على الخط الابيض بين الحارات ... واللى ماشى خلفك موش عارف انت رايح يمين ولا رايح شمال ... طبعا الحكاية دى منتشرة جدا وبتعمل عطلة ... وقلة ادب ... وتبقى ماشى موش عارف اللى امامك ناوى يعمل ايه ... ومضيق عليك الحارة بتاعتك .. لا انت عارف تستمر فى السير بشكل طبيعى ولا عارف السيارة اللى امامك رايحة فيه ... يمين ولا شمال ... ده غير ان لو فيه سيارة عايزة تمر منك وانت ماشى قريب من الخط او على الخط ... اكيد هاتكون قريبة منك جدا جدا ... وممكن يحصل لك مشكلة كبيرة .... عشان كده

قاعدة مهمة جدا جدا جدا : التزم بالحارة اللى انت ماشى فيها .. واستمر فى السير فى منتصفها تماما

• مافيش داعى انك تنقل نفسك من حارة الى حارة فى آخر لحظة ... يعنى تفضل نايم على نفسك وتقرب من العربية او المشكلة التى امامك وفى آخر لحظة تقرر انك تنقل نفسك الى الحارة المجاورة .. لو انت عملت حسابك من بدرى قوى .. ونقلت نفسك "خفيف" الى الحارة المجاورة ... وبشكل هادىء .. هاتم العملية بنجاح ... اما لو نقلت نفسك فى آخر لحظة وبشكل مفاجىء للسيارات القادمة من الخلف ... النتيجة هاتكون وحشة قوى قوى وربنا يسترها مع الجميع

• انظر الى الامام بشكل كافى لكى تضبط السيارة فى منتصف الحارة تماما هههههههه يعنى موش تنظر امام "كبوت" العربية هههههههههه وتفضل تحدف يمين وشمال عشان العربية تمشى فى منتصف الحارة ... لأ ... انظر الى الامام بشكل كافى وسوف تجد نفسك تلقائى بتضبط العربية فى منتصف الحارة ... وان عملية السير فى منتصف الحارة بتم بشكل لا إرادى ولن تشغل بالك بها مرة تانية

تابــــــــــــــع

مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

الدوران فى الملفات

التعامل مع الملفات مهم جدا جدا جدا
واهم حاجة فيه ... نحب نكرر تانى هى مكانك اثناء الملف
يعنى لازم تكون ماشى فى مكان مناسب اثناء الدوران فى الملف ... المكان المناسب هايوفر لك الآمان وسوف يسمح لك بمجال رؤية كويس جدا
لازم اكون حريص اثناء الملفات
لازم اختار امشى على سرعة منخفضة فى توقيت مناسب ... يعنى قبل الملف بوقت مناسب ابدأ فى تهدئة السرعة ثم اختار الغيار الأقل ... يعنى مثلا لو كنت ماشى على الغيار الرابع ... انقل الى الغيار الثالث او حتى التانى اذا لزم الأمر .. لكى تستطيع التحكم فى السيارة بشكل جيد

وطبعا مهم جدا جدا جدا انك لا تستعمل الفرامل اثناء السير فى الملفات
كل المطلوب ان السيارة تستمر فى السير ... وليس المطلوب انك تأخذ الملف بسرعة عالية

انظر الى الصورة التالية:

السيارة هنا مكانها خطأ جدا ... قائد السيارة موش شايف اى حاجة خالص اثناء الدوران ... وطبعا ممكن يفاجأ بسيارة مختفية والنتيجة موش كويسة

انظر الى الصورة التالية

يظهر فى الصورة ان قائد السيارة اخذ الملف على واسع ... مما سمح له بمجال رؤية كويس ... وانه اثناء الدوران يقدر يشوف العربية المختفية على الناصية ... ويستطيع انه يتجنبها ما دام سرعته معقولة اثناء الملف ... يعنى هايكون فيه وقت كافى عشان تتصرف صح ...

بخلاف لو كنت داخل الملف على ضيق

لا قدر الله لو كان الملف ده على كوبرى
وصاحب السيارة كان ماشى بسرعة
وفوجىء بسيارة بطيئة او متوقفة زى الصورة
النتيجة لا قدر الله .. يا تصادم سىء ... او يحاول يتفادى السيارة المختفية ويسقط من فوق الكوبرى ههههههه وربنا يحفظ الجميع

نكرر تانى
لازم تكون سرعتك معقولة
الغيار اقل
وتأخذ الملف على واسع عشان تشوف بشكل احسن

البعض ينصحك بدخول الملف على ضيق مثل الصورة التالية

يظهر فى الصورة ان قائد السيارة الزرقاء كان داخل المف على ضيق قوى .. لدرجة انه لا يشاهد المشاة الموجودين فى الملف ... تعتبر المنطقة التى يسير فيها المشاة منظقة عمياء بالنسبة لقائد السيارة وفى نفس الوقت لا يستطيع ان يأخذ الملف على واسع قوى طيب ايه العمل ؟

انظر الى الصورة التالية

فى الصورة يظهر ان قائد السيارة اتصرف بحكمة بالغة ... لانه اخذ الملف على واسع شوية وابتعد عن الرصيف على قدر الإمكان ... وبذلك استطاع مشاهدة المشاة المختبأين فى المنطقة العمياء ... ويستطيع المشاه ايضا مشاهدة السيارة


المشهد اللى فات ده يا جماعة .. يقابلنى كل يوم فى الصباح الباكر .. طلبة وتلاميذ فى الابتدائى والإعدادى وامهات بصحبة ابنائهم وتلاميذ معاهم اخواتهم الصغيرين فى الحضانة وشغلانة كبيرة فى الملف


اذا اخذت الملف على ضيق ... تفاجأ بالاولاد فى الملف
اذا اخذت الملف على واسع شوية ... تظهر لك فرصة جيدة لمشاهدة الاولاد على الطريق
وطبعا هذا لا يمنع من الدخول على سرعة هادئة جدا
ورجلى فوق الفرامل تتحكم فى سرعة العربية وجاهز للتوقف فى اى وقت
ومفيش مانع من ضرب كلاكس او اثنين عشان لوفيه اولاد صغار او حتى كبار فى الملف


نرجع ونقول ان القيادة علم وفن ومهارة وتدريب
مطلوب طبعا الشجاعة وتشغيل الدماغ
لكن هانشغل الدماغ فى ايه ... اذا كنا موش عارفين المعلومة دى بشىء من الفهم


ان الملف لازم ادخله على واسع وبسرعة بطيئة وبغيار فتيس بطىء وبحرص شديد

وطبعا بمجرد الإنتهاء من الدوران ... لازم استمر فى السير بشكل سريع ومناسب لسرعة الطريق .... وانظر فى المرايات جيدا واتابع السيارات القادمة من الخلف اثناء الدوران .. وافرمل العربية بهدوء وعلى فترات متقطعة عشان احذر السيارات القادمة من الخلف ... عشان يعرفوا انى ناوى اهدىء السيارة فى الملف

التعامل مع التقاطعات

تقدر تعتبر اليوتيرن من اهم التقاطعات اللى لازم نتدرب عليها
وهانتكلم عن التعامل مع التقاطعات مرة تانية بشىء من التفصيل الممل هههههههههههه

المفتاح الرئيسى لكى تتعامل مع التقاطعات بشكل آمن وسليم .. المفتاح هو "الوقت"
يعنى ايه الكلام ده ؟
لازم المدرب اللى معاك ههههههههه وطبعا الكلام ده نادر انه يحصل هههههههههه لازم المدرب اللى معاك يخطط لك الوقت المناسب لكل عمل قبل الدخول فى التقاطع
يعنى ايه ؟

نركز مع بعض مرة تانية ... عشان الموضوع ده اتكلمنا فيه قبل كده .. وعشان هو مهم هانتكلم فيه مع بعض مرة تانية

1- المرايات
لازم انظر فى المرايات جيدا واتابع السيارة القادمة من الخلف .. واحاول الا اتوقف امامها بشكل مفاجىء ... لازم اتوقف بشكل هادىء ومتدرج وعلى فترات اضغط الفرامل خفيف "ضغطات تحذيرية" ... ثم ابدأ فى التوقف اوتهدئة السيارة بشكل اقوى من الأول

2- الإشارة
لازم استخدم الإشارة المناسبة ... يعنى لو داخل يمين استخدم الإشارة يمين ... ولو داخل شمال استخدم الإشارة شمال ... ههههههههههه حتى الآن فيه ناس بتتلخبط ... والله .. ويبقى موش عارف يمينه من شماله ههههههههههه من كثر اللخبطة اللى هو فيها
اذا استخدمت الإشارة بدرى قوى .. كده يبقى غلط
ليه ؟
ممكن اللى ماشى خلفك يفتكر انك ناسى الإشارة
وممكن يكون فيه اى تقاطع قبل التقاطع اللى انت ناوى تدخل فيه ... فى الحالة دى السيارة اللى خلفك هاتفتكر انك داخل التقاطع ده
عشان كده لازم تستخدم الإشارة المناسبة قبل التقاطع بحوالى 30 متر مثلا

3- المكان
الطبيعى انك تكون قريب من الرصيف بحوالى متر... طبعا لازم انظر فى المرايات كويس جدا قبل ما انقل نفسى بجوار الرصيف ... اذا كان فيه فرصة كويسة انى انقل نفسى بجوار الرصيف ... خلاص انقل نفسى بهدوء ومن بدرى ...
يعنى موش قبل اليوتيرن ... ومرة واحدة افكر انى انقل نفسى بجوار الرصيف وبدون اشارات او مقدمات
لو كان مافيش فرصة انى انقل نفسى بجوار الرصيف خلاص ... استمر فى السير فى نفس الحارة ولا احاول تغيير مكانى حتى انتهى من الدوران فى اليوتيرن

4- السرعة
لازم تضبط سرعتك قبل الدخول على الملف ... ببساطة
ارفع رجلك من على البنزين
واستخدم الفرامل عند اللزوم وفى التوقيت المناسب ... يعنى اهدى سرعة العربية .. بضغطات خفيفة ... واحاول انى اترك العربية تسير على قدر الإمكان ... ولو قدرت انى اتركها تسير بدون توقف اثناء الدوران يبقى هايل ... يعنى ايه ؟
احاول انى لا اضغط على البنزين نهائى
واترك السيارة تسير بالقوة الدافعة
اذا شعرت انى محتاج اتوقف او اهدى العربية ... هاضغط على الفرامل "لان رجلى اساسا فوق الفرامل" ومستعد للتوقف فى اى وقت
واذا شعرت ان السيارات التى امامى تسير فى الملف بشكل مناسب ... خلاص ارفع رجلى من على الفرامل ... واترك السيارة مستمرة فى السير ... لكن رجلى تستمر ومستعدة فوق الفرامل .... يعنى موش معنى انى ارفع رجلى من على الفرامل انى اضعها فوق البنزين
لا
معناه ان رجلى تستمر فوق الفرامل لكن لن اضغط على الفرامل إلا عند اللزوم
لو العربية ماشية ... اتركها تسير
لو سرعتها عالية ... اضغط على الفرامل .. وارفع رجلى من عليها تانى ... لكى اترك السيارة تسير لوحدها دون الحاجة للضغط على البنزين

الخلاصة: حاول انك تترك السيارة تلف الدوران دون الحاجة الى الضغط على البنزين ... فقط ادخل بسرعتك واتحكم فى السرعة ورجلك فوق الفرامل وليست فوق البنزين

طبعا التدريب ده مهم جدا جدا جدا
لا قدر الله لو حصل اى حاجة ... ببساطة اضغط الفرامل وتوقف
لكن لو كانت رجلك فوق البنزين
وضربت لخمة
النتيجة انك هاتضغط على البنزين .... وتتصطدم بالسيارة التى امامك .. او تجد ان السيارة توجهت الى منتصف الشارع الرئيسى وتعرض نفسك للخطر

طبعا بعد ما السيارة تهدى سرعتها ... لازم اختار الغيار المناسب للسرعة ... لو كنت ماشى خلاص اختار الغيار التانى ... ولو كنت توقف لازم اختار الغيار الأول

بالنسبة للمبتدأين ... يفضل نقل الغيار التالى بعد الإنتهاء من الدوران ... عشان ماتلخبطش نفسك

بالنسبة للمتقدمين فى السواقة
طبعا اكيد "بيمور" السيارة اثناء الدوران ... ويترك السيارة تلف على سرعتها .. ورجله فوق الفرامل يتحكم فى سرعة العربية ... وبعد الإنتهاء من الدوران ... ينقل الغيار التانى ويستمر فى السير
الغرض من الحكاية دى ان قائد السيارة يحافظ على "كبالن" العربية اثناء الدوران

هههههههه لان الكثير من السيارات اثناء الدوران تسمع لها احلى "طقطقة" للكبالن ... عشان كده لو كنت متمكن اعمل زى المتقدمين فى السواقة

ولو كنت غلبان زى حالاتى هههههههههههه لازم تنقل الغيار المناسب قبل الدخول فى الملف

5- انظر جيدا

لازم تنظر جيدا على السيارات القادمة فى الشارع الرئيسى
... يعنى لو شايف ان فيه سيارة ميكروباس صاحبها مجنون وماشى فى نفس الحارة اللى انت هاتلف فيها ... على طول "اكبر دماغى" واتوقف او اهدى من سرعتى فى الدوران جامد ... احيانا كثيير قوى ... يقابلك اصحاب سيارات موش فاهمين حاجة وتجدهم ماشيين بعربياتهم فى نفس الحارة اللى انت بتلف فيها ... يعنى لو الواحد ماشى فى شارع رئيسى الطبيعى انه يبتعد عن الحارة اللى فيها سيارات خارجة من يوتيرن

وطبعا لازم انظر جيدا على المشاة ... واحنا فى مصر المحروسة ... الناس موش بتقف فوق الرصيف ... ممكن تلاقى الناس واقفة فى منتصف الشارع ههههههههه عادى خالص ... وكلنا سمعنا عن حادث الدائرى الأخير "السيارة البى ام دبليو" اللى دخلت فى المشاة لانهم كانوا منتظرين الميكروباس فى الشارع ... المهم ربنا يسترها مع الجميع

وكمان لازم تتوقع ان فيه سيارة متوقفة على الناصية ... زى الميكروباس
او صاحب سيارة أنا آسف "غبى" وواقف بعربيته على الناصية
او صاحب سيارة بينزل اولاده المدرسة ... ومصمم انه يسلم عليهم .. ويرسل اليهم القبلات .. ومنتظر لما يشوفهم وهما داخلين من باب المدرسة ... ومنتظر انه يقفل زجاج العربية ... وموش فى دماغه خالص انه واقف فى ملف خطر
لازم تتوقف كل شىء اثناء الدوران


لازم تلف الدوران فى توقيت مناسب
يعنى احترس من البدء فى الدوران فى وقت مبكر ههههههههههه هالاقى العربية طلعت فوق الرصيف على طول

لازم التزم بالحارة اللى انا بلف فيها
الف الدركسيون بهدوء ... واتابع الخط الفاصل للحارة اللى انا ماشى فيها ... واحاول انى لا اخرج عن هذا الخط

وبعد الإنتهاء من الدوران ... لازم اتأكد ان الإِشارة توقف بشكل تلقائى فى تابلوه العربية

ارجوا ان اكون وفقت

تابـــــــــــــــع

فى انتظار آرائكم القيمة والتواصل

مع طيب التمنيات
اخوكم حسين غزالة

[abogalal222]

اولا شكرا يا استاذ حسين جدا الصراحة علي المجهودة الجبار دة..
انا معنديش عربية بس ناوي اجبها ان شاء الله خلال 3 او 4 اشهر.بقالي شهرين باجر عربية واطلع بيها مع صاحب العربية واكتشفت حاجة مهمة جدا بعد ما قريت كل مجهودة العظيم دة ان لازم يكون واحد فاهم جنبك يقلك لاني كنت مفكر اني لما اغير من الاول للتاني والتالت اني خلاص كدة بقيت اقدر اطلع للشارع.. لكن بعد ما قريت عن الدبرياش والفرامل والكباري والمطبات عرفت ان لسة قدامي كتير ولازم حد يكون فاهم صح يعلمني ودي نقطة مهمة جدا.........

وحقلك لحضرتك مثال من اسبوع مثلا قلت اطلع بعربية واحد معرفة اهو اتمرن شوية وقلت اتمرن للرجوع بظهري في شارع واسع وفعلا بدات وطبعا اللي جنبي دة عبارة عن واحد بيقلي بص وهدي وبنزين وامسك فرامل وطبعا مش كلام واحد بيعلم واحد زي اللي حضرتك بتقولة كلام بيتقال لواحد متعلم المفروض مش واحد لسة المهم العربية ظهرها رايح جي وانا برجع وطيعا مش عارف اضغط اية واخلي رجلي فين واعمل اية رحت خابط العربية من الجنب وصلحتها لصحبها علي حسابي..
طبعا اديقت واتخنقت بس قررت اني اول يوم اجازة بعدها حركب برضة عربة واجرب وفعلا اجرت عربية والراجل اللي اجرتها منة دة كان فاهم شوية واحدة واحدة بدات افهم ولما قريت الموضوع دة وكلام حضرتك استفدت كتير اقل حاجة انا كنت مستغرب اللي بيركن دة بيركن ازاي ..لكن مع حكاية اني الف الدريكسون بمحازاة الرصيف ونص العربية لما يظهر واخر العربية اللي جنبي والكلام دة استسهلت الموضوع وحسيت انة حيبقي سهل مش صعب اني اتعلم دة...حتي لو الموضوع من غير صور فموضوع جميل ومهم..
اشكرك مرة تانية وطبعا اي تجربة ليا في تعليم السواقة حكتبها عشان استفاد ويمكن حد يستفيد برضة من التجربة..

[mohamed2007]

تسلم ايدك يا أستاذ حسين عالشرح الرائع والمعلومات القوية والصور المساعدة للشرح اللى كلنا بنستفاد منها وانشاء الله قريب جدا سنرى بالاسواق كتاب (الاستاذ حسين لتعليم القيادة فى 10 ايام) وكنت باشوف مشاركات حضرتك فى قسم البيجو اللى ساعدتنى انى اشترى سيارة مناسبة لى وكنت لسه مابعرفش اسوق وتعلمت القيادة والان انا معايا رخصة من سنة وربنا كرمنى بسيارة سكودا فليشيا 95 والحمد لله استفدت من حضرتك كتير سواء فى التعامل مع السيارة والتعامل مع الطريق سواء افراد او سيارات باتباع الخطوات السليمة والحذر من اخطاء الغير وقيادة السيارات اللى حولى اثناء السير
وربنا يكرمك يارب ويجعله فى ميزان حسناتك

[husseinoo]

اولا شكرا يا استاذ حسين جدا
اهلا وسهلا بحضرتك ... ولا شكر على واجب
الصراحة علي المجهودة الجبار دة..
انا معنديش عربية بس ناوي اجبها ان شاء الله خلال 3 او 4 اشهر

ربنا ييسر لك الاحوال وتشترى عربية كويسة

.بقالي شهرين باجر عربية واطلع بيها مع صاحب العربية واكتشفت حاجة مهمة جدا بعد ما قريت كل مجهودة العظيم دة ان لازم يكون واحد فاهم جنبك يقلك


دى حاجة مهمة جدا جدا .... موش كل اللى بيعرف يسوق كويس .. موش ضرورى يكون بيعرف يعلم كوبس

لاني كنت مفكر اني لما اغير من الاول للتاني والتالت اني خلاص كدة بقيت اقدر اطلع للشارع.. لكن بعد ما قريت عن الدبرياش والفرامل والكباري والمطبات عرفت ان لسة قدامي كتير ولازم حد يكون فاهم صح يعلمني ودي نقطة مهمة جدا.........

هو فى الحقيقة الواحد كل يوم بيتعلم حاجة جديدة ... حتى ولو كان مطلع الرخصة منذ وقت بعيد ... والذكى فقط هو اللى بيطور فى نفسه ويراقب ويتأمل ويتعرف على معلومات جديدة

وحقلك لحضرتك مثال من اسبوع مثلا قلت اطلع بعربية واحد معرفة اهو اتمرن شوية وقلت اتمرن للرجوع بظهري في شارع واسع وفعلا بدات وطبعا اللي جنبي دة عبارة عن واحد بيقلي بص وهدي وبنزين وامسك فرامل وطبعا مش كلام واحد بيعلم واحد زي اللي حضرتك بتقولة كلام بيتقال لواحد متعلم

ههههههههههههه هو اغلبهم من النوع ده

المفروض مش واحد لسة المهم العربية ظهرها رايح جي وانا برجع وطيعا مش عارف اضغط اية واخلي رجلي فين واعمل اية رحت خابط العربية من الجنب وصلحتها لصحبها علي حسابي..

يعنى على الاقل المفروض ان اللى جالس بجوارك تكون ايده على فرامل اليد ... وكان رفعها بمجرد ظهور اى علامة ارتباك

هو الصح ان العربية بيرفعوا لها البنزين شوية ... يعنى "يعلوا سحب البنزين فى الكاربوراتير شوية زيادة" .... عشان بمجرد ما ترفع رجلك من على الدبرياج العربية تمشى لوحده دون الحاجة الى الضغط على البنزين ... بالطريقة دى المبتدأ يكون كل تركيزه فى البداية على الدبرياج والفرامل فقط ... وبعد اكثر من جلسة يبدأ يتعامل مع البنزين وهكذا ...
يعنى فى المثال اللى حضرتك شرحته ... هاترفع رجلك عن الدبرياج تدريجى ... وتترك العربية ترجع الى الخلف لوحدها دون الحاجة الى الضغط على البنزين ... واول ما تحب ان العربية تقف مرة تانية ... هاتضغط على الدبرياج فقط ولو احتاج الامر انك تضغط على الفرامل ايضا .... الموضوع محتاج تدريج ... يعنى مثلا الاول اسير الى الامام 20 متر واعود الى الخلف مثلهم بجوار الرصيف ... وهكذا ثم ابداء الذهاب الى الامام ولف يوتيرن ... ثم العودة بظهر العربية .... الخ

طبعا اديقت واتخنقت بس قررت اني اول يوم اجازة بعدها حركب برضة عربة واجرب وفعلا اجرت عربية والراجل اللي اجرتها منة دة كان فاهم شوية واحدة واحدة بدات افهم ولما قريت الموضوع دة وكلام حضرتك استفدت كتير اقل حاجة انا كنت مستغرب اللي بيركن دة بيركن ازاي ..لكن مع حكاية اني الف الدريكسون بمحازاة الرصيف ونص العربية لما يظهر واخر العربية اللي جنبي والكلام دة استسهلت الموضوع وحسيت انة حيبقي سهل مش صعب اني اتعلم دة...حتي لو الموضوع من غير صور فموضوع جميل ومهم..
اشكرك مرة تانية وطبعا اي تجربة ليا في تعليم السواقة حكتبها عشان استفاد ويمكن حد يستفيد برضة من التجربة..


هو كويس جدا انك بتقدر تحكم على الشخص اللى بيعلمك هل هو فاهم وبيقدر يوصل كويس المعلومة ولا لأ ... وكمان الموضوع موش محتاج استعجال ... هو محتاج واحد فاهم كويس معاك ... وصبر على التعلم ... ومنهج علمى تتدرب عليه ... ولما تخلص كل ده وتتأكد انك مية مية ... تشترى عربية وتتوكل على الله ...

انا بالنسبة لى افضل السيارات الصغيرة لانها موفرة فى البنزين ومريحة جدا فى القيادة داخل شوارع المحروسة ... وسهلة للمبتدأين سواء فى السير فى الزحام او فى الركنة وعملية جدا بصراحة مثل "الكيا برايد ... او البكانو .. او الـ 127 ـــ او الجولف او الابيزا .... او البيجو ستارليت ... او دايهاتسو شاريد ....

على العموم انا سعيد جدا بمشاركة حضرتك وفى انتظار الاستماع الى اخبارك بصفة مستمرة


مع اطيب التمنيات
اخوكم حسين غزالة

تسلم ايدك يا أستاذ حسين عالشرح الرائع والمعلومات القوية والصور المساعدة للشرح اللى كلنا بنستفاد منها وان شاء الله قريب جدا سنرى بالاسواق كتاب (الاستاذ حسين لتعليم القيادة فى 10 ايام)

ههههههههه الله يكرمك على كلامك الجميل ده .... ههههههه انت كده بتشجعنى جامد ... شكرا لحضرتك

وكنت باشوف مشاركات حضرتك فى قسم البيجو

آه كان نفسى اشترى بيجو ... لكن واحد قريبى الله يسامحه خلانى اغير راى ... المهم الخير الواحد موش عارف فين ... انا معايا تويوتا كورولا ... والحمد لله رب العالمين كويسة جدا ما شاء الله ولا حول ولا قوة الا بالله ... هههههه لكن الإنسان مابيملاش عينه الى التراب هههههههههههههه يبقى عايز كل حاجة

اللى ساعدتنى انى اشترى سيارة مناسبة لى وكنت لسه مابعرفش اسوق وتعلمت القيادة والان انا معايا رخصة من سنة وربنا كرمنى بسيارة سكودا فليشيا 95

عربية كويسة وشكلها جميل ... بس خد بالك على طول من حرارة السيارة ودائما تابع المياه فى الراديتير وعينك على طول على مؤشر الحرارة


والحمد لله استفدت من حضرتك كتير سواء فى التعامل مع السيارة والتعامل مع الطريق سواء افراد او سيارات باتباع الخطوات السليمة والحذر من اخطاء الغير وقيادة السيارات اللى حولى اثناء السير
وربنا يكرمك يارب ويجعله فى ميزان حسناتك

الله يكرمك وشكرا لحضرتك جدا

مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

الدخول فى الطرق الجانبية "اتجاه الشمال"

الخطر الرئيسى فى موضوع الدخول فى الطرق الجانبية ناحية الشمال ... الخطر يكمن فى السيارات القادمة من الإتجاه العكسى
يعنى الناس اللى بتسافر خصوصا فى طرق طوالى ... ومرة واحدة محتاج انه يدخل شارع فى الإتجاه الشمال ...

• المفروض الاولوية تكون للسيارات القريبة أولا

• المفروض انك تهدى سيارتك حتى تصل الى التقاطع المطلوب

• يجب ان تتوقف فى المكان المناسب ... يعنى موش معقولة اعدى الشارع اللى انا ناوى ادخل فيه ومرة واحدة اقرر انى ادخل فى الشارع الجانبى

• لازم اقف فى المكان الصح قبل ما ادخل فى الشارع الجانبى

• لازم اتوقف تماما إذا لزم الأمر وانتظر فرصة مناسبة

• لازم افحص المرايات واستخدم الإشارة المناسبة

انظر الى الصورة التالية

بالنسبة للسيارة الحمراء

• اولا لازم اقترب من الخط المتقطع الموجود فى منتصف الطريق على قدر الإمكان

• لازم مقدمة السيارة تكون متوقفة قبل منتصف الطريق الجانبى بالضبط

• لازم اترك مسافة كافية ومناسبة للسيارات القادمة من الخلف للمرور من على يمين سيارتى "قبل الخط البرتقالى"
  

• اذا كان الشارع ليس مخطط بالخطوط البيضاء

فى الحالة دى لازم اتخيل وجود خط وهمى فى الشارع ... واستخدم هذا الخط الوهمى فى عملية الإرشاد تخيل ان فيه خط فى منتصف الطريق قبل ما تدخل فى الشارع الجانبى

• اذا كانت سرعتك بطيئة .. لازم تختار الغيار المناسب للسرعة ... مثلا الغيار التانى

• ولو كنت متوقف تماما ... اختار الغيار الاول

ملحوظة: لا قدر الله ممكن من كثرة الزحام ... والارتباك ... تنسى اختيار الغيار المناسب ... يعنى مثلا تكون متوقف على الغيار الثانى ... وفى نفس الوقت كان لازم تحضر نفسك وتنقل الغيار الاول وتنتظر الفرصة المناسبة للمرور
ومرة واحدة تظهر الفرصة .. تضغط بنزين .. والسيارة لا تستجيب ... بل تتوقف فى الشارع الرئيسى المقابل ... والسيارات قادمة فى اتجاهك بسرعة هائلة ههههههههه كل ده عشان انت نسيت تنقل الغيار الاول قبل الدخول فى التقاطع ..... "العربية توقفت تماما ... وانت ضاغط على الدبرياج وفاكر انك ناقل الغيار الاول ... وعند بدء التحرك ... تجد ان السيارة لا تستجيب ولا تسير بل توقفت فى عرض الطريق"


طبعا لازم انظر جيدا على الطريق اللى انا ناوى ادخل فيه على قدر الأمكان ... واقرر هل الوقت مناسب للدخول ام لا ؟



الأولوية

فى الحالة المعقدة للموقف السابق ... اعتقد ان المفروض الاولوية تكون لسيارتك ... يعنى المفروض ان السيارات القادمة فى الإتجاه المعاكس ... هى اللى تنتظرك حتى تدخل فى أمان
اذا لزم الامر ان سيارتك تنتظر قليلا حتى تظهر فرصة ... يبقى فى الحالة دى لازم تتوقف بجوار الخط الموجود فى منتصف الطريق ... وكمان مقدمة سيارتك لازم لا تتخطى منتصف الطريق اللى انت ناوى تدخل فيه

ملحوظة: انا راسم خط باللون البرتقالى ... يوضح المكان اللى لازم السيارة تتوقف عنده قبل الدخول فى التقاطع

اول ما تجد فرصة مناسبة للدخول فى التقاطع ... "لف" الدركسيون بهدوء ... حتى تدخل السيارة فى الشارع الجانبى بشكل مناسب ...
افحص المرايات قبل ما تزيد من سرعتك "تابع السيارات القادمة من الخلف"
وتأكد ان الإشارات تم الغاءها تلقائيا فى "تابلوه" السيارة



بالأمس كنت فى موقف يشبه الموقف ده تماما
لكن انا كنت راكن السيارة
ووجدت ان مقدمة السيارة فعلا متوقفة بعد منتصف التقاطع ... وصعب انى ادخل الشارع بشكل سليم ... ولو حصل انى قررت الدخول هالاقى نفسى فوق الرصيف ... او على الاقل هاحتاج الى الرجوع للخلف ثم التقدم الى الامام ... والشارع اصلا زحمة

نظرت خلفى ووجدت الطريق فاضى
رجعت الى الخلف شوية حتى اصبحت مقدمة السيارة عند منتصف الطريق اللى انا عايز ادخله

نظرت فى المرايات كويس
ونظرت من فوق كتفى
ونظرت من شباك السيارة
واستخدمت الإشارة
واخترت الغيار الاول "لانى كنت راكن السيارة ومتوقف"
وعند اول فرصة ... دخلت على طول مع سيارة اخرى كانت داخلة نفس الشارع

طبعا لو لم تظهر اى فرصة للدخول ... انا كنت مقرر انى استمر فى السير الى الامام والف بالعربية من اى مكان تانى لكن بشكل آمن ... يعنى كان شعارى "امشى سنة ولا تخطيش أنة"


تذكر أن : يحب ان تتوقف سيارتك عند منتصف الطريق "الذى تنوى الدخول فيه" ... انا راسم خط برتقالى يوضح المكان المناسب للتوقف قبل الدخول فى الشارع الجانبى ... لو لا قدر الله توقفت بعد منتصف الطريق اللى انت هاتدخل فيه ... فى الحالة دى ممكن لا قدر الله اول ما تفكر "تلف" بالسيارة ... تجد انها طلعت فوق الرصيف
وكل ده بسبب حاجة بسيطة قوى ... انك وقفت فى مكان خطأ قبل الدخول فى الشارع الجانبى





المخاطر التى تقابلك عند الدخول فى الملفات

السيارة الحمراء لم تلتزم بخط السير الموضح باللون الاحمر ... ودخل فى المنطقة الخاصة بالسيارة التى باللون الازرق .... ههههههههه يعنى تقدر تقول عليه قطع عليه الطريق

• انظر جيدا على السيارات التى تقابلك فى الشارع الجانبى

• يجب الدخول بسرعة زيادة عن اللزوم

• سيارتك والسيارة القادمة من الشارع الجانبى والسيارات القادمة من الشارع الرئيسى ... انتم الثلاثة هاتعملوا مع بعض "قفلة" ههههههههه ربنا يحفظ الجميع

• احيانا السيارات القادمة فى الشارع المعاكس "تجبرك" على الدخول فى الشارع الجانبى متأخر

• فى الحالة دى مافيش داعى انك تبدأ بالدخول فى الشارع الجانبى إلا بعد السيارات القادمة من الشارع الجانبى "تخرج" الأول

يعنى الاولوية تكون للسيارات الموجودة فى الشارع الجانبى
ثم بعد ذلك تبدأ انت فى الدخول

• طبعا لازم تدخل بحرص شديد ... خصوصا لو انت موش شايف كويس السيارات القادمة فى الإتجاه المعاكس فى الشارع الرئيسى

انا عن نفسى الموقف ده بيقابلنى كثير قوى كل يوم تقريبا
طبعا بضرب كلاكس على طول عشان السيارة المقابلة يأخذ حرصه
وكمان اتوقف بعيدا وانتظر فرصة
واذا ظهر سيارة فى الشارع الجانبى ... اعطى لها الاولوية للخروج اولا
ثم بعد ذلك يكون تركيزى على السيارات الموجودة فى الشارع الرئيسى
اذا ظهرت فرصة ... اتوكل على الله وادخل فى آمان
طبعا اللى يزيد الموضوع صعوبة ... عندما تجد سيارات "راكنة" على الناصية
فى الحالة دى انت بتبقى موش شايف السيارات القادمة فى الشارع الرئيسى
ولا السيارات القادمة فى الشارع الرئيسى شايفاك
عشان كده استخدم الكلاكس
واتوقف تماما حتى تظهر الفرصة



تابــــــــــــــــع
فى انتظار الاستماع الى آرائكم القيمة والتواصل


اسألكم الدعاء لى ولوالدى


مع اطيب التمنيات
اخوكم حسين غزالة

[calipha3]

كلام زي الفل المدرب الي كان معايا عمره مانطق بكلمه من دول, سبحان الله ....

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

التعامل مع المشاة وراكبى الدراجات

طبعا اول انطباع اول ما تسمع كلمة مشاة وراكبى الدراجات ... اول انطباع للقارىء يقول لنفسه "اشترى دماغك" ههههههههه دراجات ايه يا عم اللى هاخد بالى بيها

وانا احب اقول لكل اللى الاصدقاء المبتدأين ... ان اخطر حاجة فى الدنيا كلها هى الإنسان ... يعنى لا قدر الله لو خبط سيارة .. آخر حاجة هاتوصلها انك هاتدفع فلوس تصليح ... لكن لا قدر الله لو خبط بنى آدم ... مشكلة موش بسيطة

المهم

بالنسبة للمشاة لازم تعطى له الفرصة فى عبور الطريق ...خصوصا ان فيه كثير من المشاة اشكال والوان ... سيدات كبيرة السن ... ورجال سنهم كبير ... واطفال ... واولاد فى المدرسة ... واولاد مع اخواتهم الصغار متوجهين الى المدرسة ... وامهات مع اولادهم ... وحكاية كبيرة ... لازم تاخد بالك ... ومافيش داعى انك تحاول المرور من الامام او من الخلف ...


الخلاصة: الافضل انك تهدى سرعتك حتى ولو توقفت ... المهم الاولوية للمشاة فى المرور

طبعا فيه مشاة بيكون ظهرهم للسيارة ... يعنى ماشى فى الطريق وموش شايف ان فيه عربية قادمة من الخلف او موش سامع صوت السيارة ... الأفضل انك تستعمل الكلاكس لتنبيه المشاة ... خصوصا اللى ظهرهم للعربية ... لكن يفضل انك تستعمل الكلاكس خفيف ... يعنى من بعيد ... موش تقرب منهم وبعد تفتكر انك تضرب للمشاة كلاكس جامد ... طبعا ممكن "يخاف" ويتحرك فى اتجاه العربية ... يعنى الافضل انك من بعيد تضرب كلاكس عشان المشاة تعمل حسابها ... ولكن قبل اى شىء الاولوية للمشاة فى المرور "حتى ولو كان اللى ماشى شاب صغير مستهتهر وشايف نفسه" هههههههههههههه يعنى احيانا تلاقى ناس مافيش عندها "دم" ماشية فى وسط الشارع اكنها تمتلك الشارع ... حاجة كده "تخلف" ... معلهش لازم تحط دماغك فى الثلاجة وتكبر دماغك ... ومافيش داعى للإنفعال .. وتكبر فى دماغك انك تعمل للمشاة اى حركة عشان تخوفه عشان يتحرك بسرعة ... معلهش ... استحمل شويتين خصوصا عندنا فى المحروسة

تذكرت شىء بالأمس ههههههههههههه كوميدى جدا
انا شايف بعض الشباب "اللى مالوش لازمة" واقفين يهزروا مع بعض فى منتصف الشارع ... المهم واحد منهم وهو بيمر وبيعدى من امام السيارة "شبشبه" اتخلع منه ... ومرة واحدة توقف فى منتصف الشارع ... لكن الحمد لله رب العالمين ... عشان عامل حسابى على التخلف ده ... كانت رجلى فوق الفرامل وعامل حسابى والحمد لله ... لو انا كنت متوقع ان الولد ده هايعدى بشكل طبيعى ... كنت "شيلته" على الكبوت ... لازم تلاقى مواقف كثير جدا تقابلك بالشكل ده

مثلا: هههههههههههه واحد ماشى وبيجر عربية صغيرة وفيها خضار ... الراجال ماشى عادى ... وانا هديت عشان يعدى ... ومرة واحد ... حاجة من الخضار تقع على الارض ... ومرة واحدة الراجل يتوقف فى منتصف الشارع عشان يجيب اللى وقع .... لو انت ماشى بالعربية وموش عامل حسابك ... تقول عليه هههههههه يا رحمن يا رحيم .... لكن فى الاول والآخر ربك هو اللى بيستر ... وانت اللى بتعمل بالأسباب


بالنسبة لراكبى الدراجات
طبعا لازم تعطى له فرصة للمرور الأول ... وتعمل حساب انه ممكن يقع بالدراجة امامك ... وانك ما تضغطش عليه وتفتكر انه هايقدر فى ثوانى يمر من امامك بسهولة ههههههههه ممكن يكون "نفسه" مقطوع من ركوب العجلة ... وانت موش حاسس بحاجة ههههههههههه وعمال تلخبط فيه وتضرب له كلاكسات .. المهم لازم تاخد بالك من راكبى الدراجات والمشاة


اختيار الغيار المناسب اثناء السير فى التقاطعات

الكثير من المبتدأين بيخاف من موضوع اختيار الغيار المناسب اثناء السير فى التقاطعات ... والموضوع ده بيعمل له "قلق"
المفروض ان المدرب ينصحك ويعلمك ويفهمك ان الغيار "الثانى" هو اكثر الغيارات استخداما فى التقاطعات والزحام

اختيار الغيار المناسب فى الغالب يتوقف على شكل التقاطع او الملف اللى هاتدخل فيه

انظر الى الصورة
هناك تقاطع سهل ومريح ومساحة الرؤية فيه واضحة
وهناك تقاطع او ملف ضيق ومساحة الرؤية فيه غير واضحة

لو كان الملف واسع ومريح ... وتقدر تدخل فيه على سرعة عالية اكثر من الملف الضيق ... عشان كده الملفات الواسعة المريحة ممكن تدخلها على "الغيار" الثالث

اما لو كان التقاطع او الملف "ضيق" جدا ... وكمان انت موش شايف حاجة فى الملف ... على طول لازم تدخل الملف على الغيار الاول

بغض النظر عن الغيار اللى هاتستخدمه فى الملفات والتقاطعات
تذكر ان: انك تحتاج اثناء الدخول فى الملفات الى الضغط على البنزين خفيف .. ولا تحتاج الى تغير الفتيس اثناء الملف ... يعنى بعد الإنتهاء من الدخول فى الملف ... انقل الغيار التالى واستمر فى السير بشكل طبيعى ... مافيش داعى لنقل الفتيس اثناء الدخول فى اللفات خصوصا للمبتدأين منعا للإربتاك والقلق والخوف ... كل المطلوب الثبات على غيار واحد حتى تنتهى من الملف تماما ... ثم بعد ذلك انقل الغيار التالى واستمر فى السير.

بالنسبة للمبتدأين

• المطلوب منهم التدريب على الدخول فى ملفات متنوعة

• مرة تدخل على ملف ضيق

• ومرة تدخل على ملف واسع

• وتستمر فى التدريب حتى تشعر بالثقة التامة ... وتفهم كويس جدا طريقة الدخول المناسبة على كل ملف ... والسرعة المناسبة لكل ملف ... والغيار المناسب لكل ملف

طبعا الموضوع ظاهره بسيط
لكن الموضوع مهم جدا جدا جدا
الكثير من الأصداقاء وضح لنا مشاكل كثيرة جدا ظهرت معاهم فى الملفات .. ووضح لنا احد الاصدقاء خطورة الملف والحادث الذى تعرض له ... برغم انه كان على كلامه ماشى بالسيارة زى الفل

• لازم المعلم يحكم على مستواك بشكل جيد ... هل انت "محضن" بشكل جيد بجوار الرصيف اثناء الملف

• هل سرعتك مناسبة للملف
  

• هل تنظر الى السيارة القادمة جيدا

• هل تنظر فى المرايات قبل الدخول فى الملف

• هل مقدمة السيارة مستمرة فى السير داخل الحارة اثناء الملف

• هل السيارة اندفعت الى منتصف الطريق ام استمرت فى السير داخل الحارة التى "تلف" فيها

• هل السيارة حدفت على السيارة المجاورة

مواقف كثيرة جدا جدا جدا
والحل المناسب هو التدريب الجيد والمستمر

هههههههههههه
فبدلا من الكلام الكثير والشكوى من موضوع الخوف
الافضل هو التدريب الجيد جدا بفهم وبصبر وعقلانية

ارجوا ان اكون وفقت
فى انتظار التواصل


تابـــــــــــــــــع


مع اطيب التمنيات
اخوكم حسين غزالة

[husseinoo]

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

التعامل مع المشاة وراكبى الدراجات

طبعا اول انطباع اول ما تسمع كلمة مشاة وراكبى الدراجات ... اول انطباع للقارىء يقول لنفسه "اشترى دماغك" ههههههههه دراجات ايه يا عم اللى هاخد بالى بيها

وانا احب اقول لكل اللى الاصدقاء المبتدأين ... ان اخطر حاجة فى الدنيا كلها هى الإنسان ... يعنى لا قدر الله لو خبط سيارة .. آخر حاجة هاتوصلها انك هاتدفع فلوس تصليح ... لكن لا قدر الله لو خبط بنى آدم ... مشكلة موش بسيطة

المهم

بالنسبة للمشاة لازم تعطى له الفرصة فى عبور الطريق ...خصوصا ان فيه كثير من المشاة اشكال والوان ... سيدات كبيرة السن ... ورجال سنهم كبير ... واطفال ... واولاد فى المدرسة ... واولاد مع اخواتهم الصغار متوجهين الى المدرسة ... وامهات مع اولادهم ... وحكاية كبيرة ... لازم تاخد بالك ... ومافيش داعى انك تحاول المرور من الامام او من الخلف ...


الخلاصة: الافضل انك تهدى سرعتك حتى ولو توقفت ... المهم الاولوية للمشاة فى المرور

طبعا فيه مشاة بيكون ظهرهم للسيارة ... يعنى ماشى فى الطريق وموش شايف ان فيه عربية قادمة من الخلف او موش سامع صوت السيارة ... الأفضل انك تستعمل الكلاكس لتنبيه المشاة ... خصوصا اللى ظهرهم للعربية ... لكن يفضل انك تستعمل الكلاكس خفيف ... يعنى من بعيد ... موش تقرب منهم وبعد تفتكر انك تضرب للمشاة كلاكس جامد ... طبعا ممكن "يخاف" ويتحرك فى اتجاه العربية ... يعنى الافضل انك من بعيد تضرب كلاكس عشان المشاة تعمل حسابها ... ولكن قبل اى شىء الاولوية للمشاة فى المرور "حتى ولو كان اللى ماشى شاب صغير مستهتهر وشايف نفسه" هههههههههههههه يعنى احيانا تلاقى ناس مافيش عندها "دم" ماشية فى وسط الشارع اكنها تمتلك الشارع ... حاجة كده "تخلف" ... معلهش لازم تحط دماغك فى الثلاجة وتكبر دماغك ... ومافيش داعى للإنفعال .. وتكبر فى دماغك انك تعمل للمشاة اى حركة عشان تخوفه عشان يتحرك بسرعة ... معلهش ... استحمل شويتين خصوصا عندنا فى المحروسة

تذكرت شىء بالأمس ههههههههههههه كوميدى جدا
انا شايف بعض الشباب "اللى مالوش لازمة" واقفين يهزروا مع بعض فى منتصف الشارع ... المهم واحد منهم وهو بيمر وبيعدى من امام السيارة "شبشبه" اتخلع منه ... ومرة واحدة توقف فى منتصف الشارع ... لكن الحمد لله رب العالمين ... عشان عامل حسابى على التخلف ده ... كانت رجلى فوق الفرامل وعامل حسابى والحمد لله ... لو انا كنت متوقع ان الولد ده هايعدى بشكل طبيعى ... كنت "شيلته" على الكبوت ... لازم تلاقى مواقف كثير جدا تقابلك بالشكل ده

مثلا: هههههههههههه واحد ماشى وبيجر عربية صغيرة وفيها خضار ... الراجال ماشى عادى ... وانا هديت عشان يعدى ... ومرة واحد ... حاجة من الخضار تقع على الارض ... ومرة واحدة الراجل يتوقف فى منتصف الشارع عشان يجيب اللى وقع .... لو انت ماشى بالعربية وموش عامل حسابك ... تقول عليه هههههههه يا رحمن يا رحيم .... لكن فى الاول والآخر ربك هو اللى بيستر ... وانت اللى بتعمل بالأسباب


بالنسبة لراكبى الدراجات
طبعا لازم تعطى له فرصة للمرور الأول ... وتعمل حساب انه ممكن يقع بالدراجة امامك ... وانك ما تضغطش عليه وتفتكر انه هايقدر فى ثوانى يمر من امامك بسهولة ههههههههه ممكن يكون "نفسه" مقطوع من ركوب العجلة ... وانت موش حاسس بحاجة ههههههههههه وعمال تلخبط فيه وتضرب له كلاكسات .. المهم لازم تاخد بالك من راكبى الدراجات والمشاة


اختيار الغيار المناسب اثناء السير فى التقاطعات

الكثير من المبتدأين بيخاف من موضوع اختيار الغيار المناسب اثناء السير فى التقاطعات ... والموضوع ده بيعمل له "قلق"
المفروض ان المدرب ينصحك ويعلمك ويفهمك ان الغيار "الثانى" هو اكثر الغيارات استخداما فى التقاطعات والزحام

اختيار الغيار المناسب فى الغالب يتوقف على شكل التقاطع او الملف اللى هاتدخل فيه

انظر الى الصورة
هناك تقاطع سهل ومريح ومساحة الرؤية فيه واضحة
وهناك تقاطع او ملف ضيق ومساحة الرؤية فيه غير واضحة

لو كان الملف واسع ومريح ... وتقدر تدخل فيه على سرعة عالية اكثر من الملف الضيق ... عشان كده الملفات الواسعة المريحة ممكن تدخلها على "الغيار" الثالث

اما لو كان التقاطع او الملف "ضيق" جدا ... وكمان انت موش شايف حاجة فى الملف ... على طول لازم تدخل الملف على الغيار الاول

بغض النظر عن الغيار اللى هاتستخدمه فى الملفات والتقاطعات
تذكر ان: انك تحتاج اثناء الدخول فى الملفات الى الضغط على البنزين خفيف .. ولا تحتاج الى تغير الفتيس اثناء الملف ... يعنى بعد الإنتهاء من الدخول فى الملف ... انقل الغيار التالى واستمر فى السير بشكل طبيعى ... مافيش داعى لنقل الفتيس اثناء الدخول فى اللفات خصوصا للمبتدأين منعا للإربتاك والقلق والخوف ... كل المطلوب الثبات على غيار واحد حتى تنتهى من الملف تماما ... ثم بعد ذلك انقل الغيار التالى واستمر فى السير.

بالنسبة للمبتدأين

• المطلوب منهم التدريب على الدخول فى ملفات متنوعة

• مرة تدخل على ملف ضيق

• ومرة تدخل على ملف واسع

• وتستمر فى التدريب حتى تشعر بالثقة التامة ... وتفهم كويس جدا طريقة الدخول المناسبة على كل ملف ... والسرعة المناسبة لكل ملف ... والغيار المناسب لكل ملف

طبعا الموضوع ظاهره بسيط
لكن الموضوع مهم جدا جدا جدا
الكثير من الأصداقاء وضح لنا مشاكل كثيرة جدا ظهرت معاهم فى الملفات .. ووضح لنا احد الاصدقاء خطورة الملف والحادث الذى تعرض له ... برغم انه كان على كلامه ماشى بالسيارة زى الفل

• لازم المعلم يحكم على مستواك بشكل جيد ... هل انت "محضن" بشكل جيد بجوار الرصيف اثناء الملف

• هل سرعتك مناسبة للملف
  

• هل تنظر الى السيارة القادمة جيدا

• هل تنظر فى المرايات قبل الدخول فى الملف

• هل مقدمة السيارة مستمرة فى السير داخل الحارة اثناء الملف

• هل السيارة اندفعت الى منتصف الطريق ام استمرت فى السير داخل الحارة التى "تلف" فيها

• هل السيارة حدفت على السيارة المجاورة

مواقف كثيرة جدا جدا جدا
والحل المناسب هو التدريب الجيد والمستمر

هههههههههههه
فبدلا من الكلام الكثير والشكوى من موضوع الخوف
الافضل هو التدريب الجيد جدا بفهم وبصبر وعقلانية

ارجوا ان اكون وفقت
فى انتظار التواصل


تابـــــــــــــــــع


مع اطيب التمنيات
اخوكم حسين غزالة