نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[A.Saad]

بعد اذن استاذ حسين عايز اضيف

لو الشكمان مخروم زى ما استاذ حسين قال
الصوت بيكون من اسفل السيارة

لو تلف فى الدبرياج
اعراضه ان السحب قل مع صوت عالى يعنى السرعة مش بتزيد بنفس زيادة ضغطك على دواسة البنزين
وكذلك زيادة استهلاك البنزين واحيانا رجرجة عند الطلوع

[A.Saad]

انا عرفت ان العربية محتاجة تغير بوجيهات لان كهربتها ضعفت وعلشان خرطة البنزين يتنظف لازم نغير البوجيهات يا ترى الكلام ده صح ولا غلط

اكشفى على الموبينة
وتغيير البوجيهات يفضل معاها تغيير السلوك
باقى المشاركو مش فاهمه للاسف

[husseinoo]

انا عرفت ان العربية محتاجة تغير بوجيهات لان كهربتها ضعفت وعلشان خرطة البنزين يتنظف لازم نغير البوجيهات يا ترى الكلام ده صح ولا غلط

بسيطة خالص
اشترى طقم كهرباء ويشمل "البوجيهات ـ الابلاتين والكوندنسر"
ولو كانت العربية بتستخدم الاشعال الالكترونى
يبقى هاتشترى بوجيهات فقط لا غير

• يفضل انك تشترى بوجيهات مطابقة لنفس الرقم المناسب فى مانيوال العربية ... يعنى لما تقرأى مانيوال العربية تجدى فيه رقم البوجيه المناسب الذى يقترحه المصنع

• المهم فيه ناس تفضل تركب بويجيهات 2 شمعة

• البعض يفضل بوجيهات ماركة "دنسو"

ثم ماركة "ngk"

• البوجيهات لازم تتغير بعد مدة معينة او بعد عدد كيلوا متر ... اعتقد 10000

فيه ناس تغيرها كل سنة
وانا اغيرها كل ستة اشهر ... لان سعرها رخيص اساسا حوالى 35 جنيه تقريبا
اما لو كانت 2 شمعة بيكون سعرها فى حدود 50 جنيه او اكثر تقريبا

• فيه زجاجة منظف لدورة الوقود اسمها "stp" منظف لدورة الوقود

تضيف الزجاجة الى تانك البنزين مرة واحدة كل 3000 ميل ... يعنى تقريبا كل سنة مرة
النتيجة ان العربية بالبلدى كده "بتفوق" ويبان على آدائها ان السحب اصبح اسرع والصوت اهدأ واستهلاك البنزين اقل سعر الزجاجة تقريبا 30 جنيه

• طبعا ممكن ايضا قبل تغيير زيت السيارة

يفضل استخدام زيت الفلاش لتنظيف الموتور من الداخل من الزيوت المتراكمة
ثم يتم اضافة زيت السيارة مرة اخرى على نظيف
النتيجة ان صوت السيارة بيهدى جدا والدخان الاسود من الشكمان يختفى

دى بعض الاشياء اللى ممكن تحسن آداء السيارة وتخفض صوتها والله اعلم

مع اطيب التمنيات
اخوكم حسين غزالة

[kfathy]

نانو

الاستاذ الفاضل حسين لااستطيع حصر كم المعلومات التي احتوي عليها هذا المنتدي ولكم جزيل الشكر ارجو القاء الضوء علي رايكم في السيارة المصرية نانو

[lela]

اكشفى على الموبينة
وتغيير البوجيهات يفضل معاها تغيير السلوك
باقى المشاركو مش فاهمه للاسف

سلوك ايه هى البوجيهات فيها سلوك ونوعها ايه

[A.Saad]

سلوك ايه هى البوجيهات فيها سلوك ونوعها ايه

البوجيه بيطلع شرارة لاحراق البنزين

يبقى محتاج مصدر كهربى

ده دور السلوك

نقل التيار من الموبينة للبوجيه

[Nanona2011]

مبروووووووك

على فكرة انا كمان زيك
واقولك حاجة سيكريت انا كل شوية بسمع النصايح دي لنفسي وانا قاعدة فاضيه كده عشان منساش
وعلى فكرة انا اتعلمت منيوال ووراها اوتو على طول فطبعا حبيت الاوتو وكرهت المنيوال
بس لسة ممتحنتش
بالمناسبة يا جماعة
حد عنده خلفيه فعلا اتلغى امتحان الهيدروماتيك ولا عادي؟
انا من بورسعيد

[lela]

اذيك عاملة ايه يا Nanona2011 يا ترى اتعلمتى تطلعى لوحدك بعد قد ايه ولا انتى خايفة زى انا ببقى مرعوبة وانا بسوق خايفة اخبط حد او اعمل حادثة

[wlelw2003]

موضوع مفيد جدا وزود معلمواتنا

[Quantum]

شكر و تقدير

السلام عليكم ورحمه الله و بركاته

الحمد لله بعد اكتر من شهر قدرت اوصل لاخر صفحه في الموضوع

في البدايه احب اشكر الاستاذ حسين كل الشكر على المجهود الاكثر من رائع اللي بذله في الموضوع ده
وكفايا دعوات الناس ليك وانا اولهم من كم الاستفاده من الموضوع ده (جزاك الله كل خير)

ثانيا عاوز اقول كل سنه وانتم بخير وتقبل الله منكم صالح الاعمال في رمضان

ثالثا بقه انا برده مبتدئ من شهرين كده و بمشي بقواعد القياده الدفاعيه و الحذر وان السلامه اولى من السرعه و الحمد لله كل مره اخرج مستوايا يتحسن مع بعض الاخطاء و ربنا هو الستار

مشكلتي الركنه في الاماكن الضيقه اللي انا مجبر عليها لان في الشغل الشوارع مفيهاش خرم ابره و ممكن اقعد اركن ربع ساعه و ساعات السايس يحرجني و يقولي انا اللي اركنهالك لو سمحت لما يشوفني ضارب لخمه

واخيرا متابع باهتمام

[Nanona2011]

اذيك عاملة ايه يا Nanona2011 يا ترى اتعلمتى تطلعى لوحدك بعد قد ايه ولا انتى خايفة زى انا ببقى مرعوبة وانا بسوق خايفة اخبط حد او اعمل حادثة

الحمد لله انا تمام التمام انهرده كنت مأجرة كيا سيراتو ومعجبتنيشششش خالص بس كنت حابة اجربها وكانت رحلة موفقة بالنسبة لمستوايا في القيادة
اتعلمت اطلع لوحدي من اول مرة بس اول مرة وقفت مني كتير اوي ولحد اخر حصة كانت بتقف مني عادي
المنيوال تعود وطالما سايقة مانيوال لازم تخلي بالك اوي من حركة رجلك على الدبرياج السر في كلمتين
رجلك مبتتحركش كلها وانما باطن مشط رجلك وكعبك هو الي ثابت في الارض بتحركي وش القدم بس
وطول ما كعبك ثابت هتلحقي نفسك ومش هتبطل منك
باختصار متبعديش رجلك عن البنزين ولا الدبرياج وخلي كعبك ثابت بس لو سايقة في وضع عادي على الاول مثلا او التاني بتبقا رجلك ع الدبرياج ومش ضاغطه دبرياج يعني وش رجلك مش لامسه بس مريحة كعبك ع الارض

ثاني حاجة هتيجي بالتمرين انا من شهر واحد مكنتش عارفة الدريكسيون من الفتيس وبفضل الله ومدرسة القيادة اتعلمت كل حاجة وبتعلم دلوقتي في الميكانيكا وبسوق لوحدي وبروح مشاوير وكل حاجة تمام التمام

اما عن الخوف فبرضو هقولك حاجتين :
وانتي بتتعلمي ياريت ياريت متركبيش معاكي حد يشاغلك ويكلمك ومتتكلميش ولا تفكري غير في الطريق قدامك و فوانيس العربيات الي سبقاكي لما يهدو بالفرامل هينور الفانوس بالاحمر تبدئي انتي تهدي وتخلي بالك من اللي وراكي في المراية
برضو حاجة كمان في الاول كنت شاغله نفسي اوي طب هبص ع المرايات ولا ع مراية الصالون ولا قدام
لا انتي باصة قدام وبتبصي في المراية في 3 حالات :
لو هتهدي شوية عشان في عربية معدية قدامك
لو هتوقفي في اشارة بتبصي وراكي علشان تخلي بالك لو وقفتي فجاة اكيد الي وراكي هيخبط فيكي فبتهدي خفيف بالبنزين ففوانيسك هتنور احمر فيبدأ هو يخلي باله
لو هتعملي تخطي (يعني هتسبقي عربية قدامك في طريق واسع من خلال انك تحودي شماله و تسبقيه برضو بتركزي اوي في مراياتك علشان الناس الي وراكي برضو)
والخوف هيروح بمجرد انك تركزي وتثقي في فراملك انتي معاكي فراملين فرامل دواسة وفرامل يد يبقا تخافي من ايه؟ وقت ما تحبي توقفيها هتوقفيها متخافيش وثقي في نفسك و متمشيش على سرعة عالية في البداية
وكله بفضل الله واذنه ميسر

وبالنوفيق وياريت تحيكلنا عن تجربتك في القيادة

[Nanona2011]

السلام عليكم ورحمه الله و بركاته

الحمد لله بعد اكتر من شهر قدرت اوصل لاخر صفحه في الموضوع

في البدايه احب اشكر الاستاذ حسين كل الشكر على المجهود الاكثر من رائع اللي بذله في الموضوع ده
وكفايا دعوات الناس ليك وانا اولهم من كم الاستفاده من الموضوع ده (جزاك الله كل خير)

ثانيا عاوز اقول كل سنه وانتم بخير وتقبل الله منكم صالح الاعمال في رمضان

ثالثا بقه انا برده مبتدئ من شهرين كده و بمشي بقواعد القياده الدفاعيه و الحذر وان السلامه اولى من السرعه و الحمد لله كل مره اخرج مستوايا يتحسن مع بعض الاخطاء و ربنا هو الستار

مشكلتي الركنه في الاماكن الضيقه اللي انا مجبر عليها لان في الشغل الشوارع مفيهاش خرم ابره و ممكن اقعد اركن ربع ساعه و ساعات السايس يحرجني و يقولي انا اللي اركنهالك لو سمحت لما يشوفني ضارب لخمه

واخيرا متابع باهتمام

الركنات الضيقة موضوع حساس يا جماعة ويستاهل النقاش لانه مش بنتعلمه في مدرسة قيادة في مرة ولا اتنين
لا ده فيلم بمعنى الكلمة عاوز فترة تعود
عشان كده في الاول حاول تختار اماكن واسعه تركن فيها وان متوفقتش يبقا لازم تركز و بالراحة وعلى اقل من مهلك لو منيوال امشي ع الاول وانت بتجرج
انا شخصيا مش بجرج في جراج وانما تحت بيتي و في مشكلة هنا ان بيبقا في عربية ولازم اركن وراها مع ترك مسافة
علشان كده انت هتعمل التالي
هتخلي ضهرك للحتة الي هتركن فيها ولو هي ورا ضهرك يمين او شمال يبقا بتشغل مارشديرك مع لف الدريكسيون في اتجاه الركنه بتفضل ترجع وانت على الغيار الاول منيوال او بنزين خفيف اوي اوي لو اوتو
لو هتركن جنب عربية بتستنا لما انت اقصد الجزء الاول من عربيتك يكون عند اكرة باب السيارة التانية وهنا هتبدا تحود عشان تيجي وراها و اول ما تشوف نفسك اتظبطت بتهدى وترجع تحود دريكسيونك في الاتجاه المخالف علشان تعدل العجلات

في الاتوماتيك الركنة شيء ممتع علشان الباور ستيرنج بتعد 3 لفات وبعدين لفة ونص
وفي المنيوال رخم

ده رأيي المتواضع شاركونا...

[Quantum]

السلام عليكم

المشكله اني بلاقي نفسي دايما يا اما بعيد اوي يا اما قريب زيادهعن العربيه اللي هاركن جنبها (عمودي على الرصيف) و الشارع اصلا موش واسع و علشان اظبط نفسي زي ما بتقولوا موش بتيجي من اول مره و بفضل اطلع قدام و ارجع للخلف كذا مره و بيبقى شكلي وحش

يعني الداخله الاولانيه وانا بقرب من مكان الركن موش بعرف اقدره تماما و خصوصا لو هاركن بضهري

وشكرا

[Quantum]

السلام عليكم

انا كمان عندي استفسار ياريت نتكلم فيه بالتفصيل الا و هو القياده اثناء الليل

يعني انا لحد دلوقتي خايف اخرج بالعربيه بالليل و موش عارف ايه الاحتياطات اللي مفروض اعملها و كمان الانوار
امتى اشغل العالي و امتى اشغل الواطي

وحاجه بقه صعبه جدا وهي الركنه بالليل لما ارجع وع الاخذ في الاعتبار ان اماكن الركن غالبا بتكون ضيقه زي ما قلت و الرجوه بظهري

وشكرا

[Nanona2011]

السلام عليكم

المشكله اني بلاقي نفسي دايما يا اما بعيد اوي يا اما قريب زيادهعن العربيه اللي هاركن جنبها (عمودي على الرصيف) و الشارع اصلا موش واسع و علشان اظبط نفسي زي ما بتقولوا موش بتيجي من اول مره و بفضل اطلع قدام و ارجع للخلف كذا مره و بيبقى شكلي وحش

يعني الداخله الاولانيه وانا بقرب من مكان الركن موش بعرف اقدره تماما و خصوصا لو هاركن بضهري

وشكرا

عليكم السلام

حضرتك متمشيش على الغيار التاني وانت بتركن لا امشي على الاول ولو اوتو دوس بنزين همسة صغيرة وبفرملة خفيفة تبطء يعني امشي بالراحة كأنك ماشي فوق منطقة مش ممهدة كويس على اقل من مهلك ولما توصل لقرب مناسب ابدأ اركن
ثانيا شكلك مش وحش وانت بتطلع قدام وترجع ورا سوري في التعبير محدش اشترى الشارع بفلوسه اهم حاجة نقطتين انك مش تعطل الطريق تاني شيء ان حضرتك تضمن سلامتك اولا وسلامة العربية ثانيا

و كمان انا على فكرة مبتدئة جدا جدا ومعلوماتي بسيطة اوي بس مش بيهمني اني اغلط طالما اخطاء مش هتضر حد و بعدين لازم نكون مركزين وكل شيء بالتدريب هيبقا تلقائي بعد كدة انا بعد اول حصتين تعليم ركنات لقيتني حفظت ابعاد العربية شوية وبدات اركن في حتت ضيقة وواسعة وبفضل الله كله بسيط

ممكن حضرتك تقولنا حضرتك بتسوق من اد ايه؟!