نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

السلام عليكم ورحمة الله وبركاته

كيف حالك يا استاذة سارة ... ندعوا الله انك تكونى فى احسن حال

الغريب ان في ناس اعرفهم في دبي وهناك علشان تطلع رخصه صعب جدا ويمكن مش قبل 6 شهور

بصراحة احنا عندنا مدارس القيادة معمولة عشان اجتياز اختبار المرور فقط ... وعمر ما حد يستطيع القيادة مهارة من خلال 4 او حتى 6 حصص ... يعنى يسوق 6 او حتى 10 ساعات هايتعلم فيهم ايه ... ده عشان بس يعرف ينقل الفتيس ويحرك العربية عايز له 2 ولا 3 ... طيب وباقى المهارات ... الكبارى .. اليوتيرن .. الملفات .. التقاطعات .. المطبات ... الطرق السريعة .... الخ

والله انا سعيده ان فيه حد بيشجعنى وانا معاك فعلا في فرق بين اول ما بدأت وبين دلوقتي كفايه ان الأعصاب بدأت تكون اهدى من الأول ماعدا في المواقف الصعبه

المواقف الصعبة محتاجة نفهمها كويس ... وكل شىء هايبقى تمام إن شاء الله
ويا ريت تكتبى لنا عن المواقف الصعبة دى على طول

ههههههههههه المره اللي بعدها بعد ما قفلت الزجاج وانا بلف من جنبهم كانوا مأنتخين خالص وبراءة الأطفال في عينيهم وكنت بستعد علشان أجري
لازم الزعيم بتاعهم ماكانش موجود ... اوعى تثقى فيهم هههههههههههههه

فعلا هو ده الخطأ اللي عملته انا مقتنعه بكده حتى لو مش مقدره الأبعاد كويس مفيش داعي ان انا اعدي اللي ورايا من جنبي لو شايفه ان المكان ضيق او هيكون على حساب ان انا اقرب من المشاه زي ما حصل
على فكرة انا اول يوم خرجت فيه مع صديق لى ... كنت ماشى فى شارع جانبى وهادىء ... والشارع لا يسمح بمرور إلا عربية واحدة .. وجه من خلفى واحد ضرب لى كلاكس .. فى الوقت اللى كنت بلف فيه ... حبيت اعمل فيها مصلح خير ... وانى امشى على جنب شوية عشان الراجل يعدى .. طبعا النتيجة حكيت خفيف فى عربية واقفة .... على طول صديقى قال لى: مادام الشارع ضيق وموش هايسمح بمرور غير سيارة واحدة ... يبقى ما فيش داعى تعرض نفسك للخطر عشان اللى وراك يعدى ... سيبه يضرب كلاكس ولا يضرب دماغه فى الحيط ... انساه تماما ... ولما ربنا يوسعها عليك تبقى تمشى يمين شوية عشان تعديه

والله كل اللي بتقوله على المشاه ده صحيح انا بشوفه وانا راجعه يومياً في شارع جامعة الدول العربيه وبتعصب جدا رغم ان مش انا اللي سايقه بس الناس بتعدي بطريقه غريبه جدا تلاقي واحد فجأه نزل في نصف الشارع اول ما الإشارة بقت لسير العربيات ويعدي باصص الناحيه التانيه مش ناحية العربيات سلوك غريب
معلهش برغم ان بعض المشاة غير مسئولين فعلا ... لكن لازم نفتكر دائما انهم لحم ودم ... يعنى لازم نهدى جامد جدا جدا جدا ... حتى ولو هانقف بالعربية مافيش اى مشاكل

العفو انا تقريبا بكتب الواجب بتاعي ههههههههه علشان اصلحه من الأساتذه هنا متشكره جدا لحضرتك

انتى عشرة على عشرة ... وربنا يكرمك يا رب عشان انت كمان بتكتبى لنا تجاربك عشان نتعلم منها كلنا
انا متابعه مع حضرتك اساسيات القياده الدفاعيه ولسه بذاااااكر
وحلو قوي موضوع التواصل مع الآخرين


فعلا من احسن الموضايع اللى عجبانى أنا شخصيا موضوع التواصل مع الآخرين ... محتاج تدريب جامد ... وانك تجعل كل اللى حواليك شايفينك وعارفين مكانك ومصحصحين معاك وانت معاهم .. حاجة جميلة قوى

السلام عليكم

وعليكم السلام ورحمة الله وبركاته
اهلا وسهلا يا استاذة عبير

اولا ربنا يشفي اخونا محمد وكل مرضانا ويجعل مرضهم في ميزان حسناتهم واسرهم

اللهم آمين

وبعدين جزاك الله كل خيرا يا ا. حسين على نصائحك وكتاباتك والصور التفصيلية الموضحة وتشجيعك واهتمامك بالمبتدئين جدا امثالنا

الله يكرمك يا رب ويسعدك دنيا وآخره ... على قدر المستطاع بحاول انقل اللى اعرفه واتمنى انها تكون مشاركات مفيدة

بس انا ماكنتش باعرف اسوق..انا اخذت الرخصة لمجرد اني عديت امتحان ميسر بيتعمل مخصوص لطلاب المدارس اللي تبع المحافظة

وأنا نفس الكلام ... 4 حصص على السريع ودخلت الاختبار .. ونجحت .. وطلعت رخصة .. وكنت بمشى بالعربية على خفيف قبل الرخصة ... لكن بعد ما تمتلكى عربية بتاعتك ... بتخافى عليها وعلى عربيات الآخرين ... وعملية الخوف دى هى الدافع لى عشان افتح الموضوع بتاعنا


بعدها اخدت كورس كان 4 حصص عملي وللاسف لم اتدرب كفاية وماكانش عندي عربية ولا متاح اي فرصة تدريب غير الخوف وعدم الثقة
المشكلة ان الواحد بيشترى عربية غالية ... ويستخسر يدفع فلوس للمدرب ... انا موش قصدى حضرتك ... يعنى عايز اقول ان كثيير من الناس وانا منهم ... بعد شراء السيارة .. عايز ينزل بيها ويتعلم فيها .. انا شايف ان الافضل .. يتعلم مع مدرب ممتاز ودى اهم خطوة ... بعد كده يخرج مع المدرب اكثر من مرة موش مهم عدد الحصص ... ايه المشكلة لما يدفع له 500 جنيه ولا اكثر ... بافتراض ان الحصة بـ 25 جنيه ... يعنى هايخرج مع المدرب حوالى 20 حصة ... موش وحشين ... حلوين قوى ... المهم انه يتعلم مية مية ... والاهم مرة تانية ... ان المدرب يكون راجل فاهم وممتاز ... يعنى اخرج معاه ... ومن اول حصة هاعرف ... الراجل ده فاهم وكويس ولا اى كلام ... على طول اغيره واشوف غيره


ومؤخرا بدات انزل مع مدرب خاص بيعلمني من اول وجديد
وامبارح بس نزلت بها لوحدي لحد شغلي

معنى كده ان المدرب ده كان كويس معاكى ... طيب يا ريت تقول لنا اسلوبه فى التعليم ازاى وكان بيركز معاكى على ايه

وطبعا عملت اخطاء لكن الحمد لله مع الدعاء المستمر طول السكة ربنا ستر ورحت ورجعت بها وكان يوم تاريخي بالنسبة لي وان كنت مش متاكدة اني باعمل كل حاجة صح

والله انت جريئة ما شاء الله عليكى
ولو انى كنت اتمنى ان الموضوع ده يتم بعد ما تتمكنى من القيادة عشرة على عشرة وبدون استعجال خدى وقت كفاية

يعني مثلا مش باسوق الا ع الاول عشان اطلع وبعدين التاني فقط لان سرعتي لا تتعدى 35 مثلا(رجاء عدم الضحك..على قدي وعشان الحق نفسي) ..

لو الطريق فاضى امامك ... مافيش مانع تنقلى على الثالث .. وتمشى تقريبا حوالى 45 او 50 وموش مطلوب تمشى داخل المدينة اكثر من 60 كيلوا اساسا

لكن احد الزملاء قال لي ان دا غلط ع الموتور واني لازم اطلع للغيار التالت حتى لو سرعتي محدودة كدا..فايه راي حضرتك وباقي الاخوة والاخوات الافاضل هنا؟

لو فيه زحام امام .. طبعا سرعتك معقولة جدا
لكن لو الطريق فاضى .. الافضل تنقلى الغيار التالت .. وترفعى السرعة شوية الى 45 كيلوا ولا تزيد عن 60 كيلوا باى حال من الاحوال
ودائما ابدا حافظى على المسافة بينك وبين العربيات اللى امامك ... سواء ماشية 30 كليوا او حتى 120 كيلوا فى الساعة

وسؤال تاني: المفروض حركة القدم اليمنى تكون محورية بان الكعب على الارضية والمقدمة تحت المشط بتتحرك بين دواستي البنزين والفرامل ..صح كدا؟ لكن انا مابعرفش اعمل كدا لاني باحس دواسة الفرامل عالي فبانقل القدم بكاملها وليس مقدمتها فقط من غير تثبيت كعبها..هل دي غلطة كبيرة او ماينفعش اكمل كدا؟

فى الصورة التالية توضيح لوضع القدم ... الكعب على الارض ... ومشط القدم يضغط على الدواسة المطلوبة


بالنسبة للرجل اليمنى ... فى الصورة توضيح للمكان المناسب لوضعية القدم .. تقريبا هى امام الفرامل ... ويتم تحريك مشط القدم فقط للضغط على البنزين ... لكن الكعب مازال امام الفرامل


فى الصورة القدم اليسرى امام الدبرياج ... والقدم اليمنى امام الفرامل ... ولكن المشط هو الذى يتحرك الى اليمين للضغط على البنزين





وبالمقابل القدم اليسرى سمعت برضو انها المفروض تكون على الارضية مالم اكن محتاجة لضغط دواسة الدبرياج

انا عن نفسى لو ماشى على طريق طوالى ... زى مثلا طريق الاسماعيلية ... ومافيش اى عوائق فى الطريق ... خلاص .. بريح رجلى الشمال ... واحطها على ارضية العربية عادى جدا


لكن انا باخاف ما الحقش انقلها بسرعة من الارضية للدواسة لو احتجت افرمل فجاة لاي سبب...

ده تصرف طبيعى ... ما دام فيه زحمة امامى ... او متوقعة انى هاتوقف ... او داخل على تقاطع او ملفات لازم رجلى تكون جاهزة على الدبرياج

فباكون وقت كبير حاطاها ع الدبرياج حتى لو مش ضاغطاه بس سمعت ان دا غلط على اسطوانة الدبرياج ..ايه رايكم تنصحوني بايه؟

ايه الغلط انك مجهزة رجلك على الدبرياج لكن موش ضاغطة عليه ... اعتقد ما فيش اى مشاكل ... المشكلة اللى ضاغط على الدبرياج بصفة مستمرة باى شكل من الاشكال خصوصا لو طالع كوبرى وموش عايز العربية ترجع للخلف ... وبدل ما يضغط الفرامل ... يفضل ضاغط الدبرياج خفيف عشان العربية تفضل متعلقة

متهيالي اسهل نصيحة ماسوقش تاني بس معلش انا مضطرة والله..
شكرا جزيلا وربنا يكرمكم جميعا

هههههههههههههه
إن شاء الله كل شىء هايكون تمام التمام
وبكره نضحك على الايام دى
بس انت اوعى تنسى تساعدى المبتدأين لما تبقى كويسة

مع اطيب التمنيات
اخوكم حسين غزالة

[Nader_Mohamed]

موضع جميل جداااااااا وشكرا ليك يا husseinoo على النصايح الجامدة

العفو حضرتك ... لا شكر على واجب

ونصيحة منى بعد 5 شهور سواقة خلى بالك ديما من الى وراك فى مراية الصالون زى الى قدامك بظبط علشان محدش يلبس فيك من ورا زى ما حصل معايا.

اولا: الف مليون سلامة لحضرتك
ثانيا: المهم انك بخير ... وقدر الله وماشاء فعل
ثالثا: الف شكر لحضرتك على نصيحتك الغالية ...

ولو ان الموضوع بايخ وكله زكريات موش تمام بالنسبة لحضرتك ... لكننا كنا عايزين نعرف تفاصيل الحادث ...
هل انت السبب فيه
ولا السيارة اللى فى الخلف
ولا انتم الاثنين مشتركين فى المشكلة ... عشان نستفيد كلنا ونتعلم

وهل فيه نصائح تانية تحب تقولها لنا عشان نستفيد منها احنا كمان

وإن شاء الله تكون آخر الحوادث لحضرتك
وربنا يسترها معاك بإذن الله

وشكرا جدا لحضرتك مرة ثانية

مع اطيب التمنيات
اخوكم حسين غزالة

لا بجد موضعك جميل اوى فى تعليم المبتدئين

الحادث كان بسبب اهمال السائق الى فى الخلف وقضاء وقدر والحمد لله ان ربنا ستر

الموضع كلو ان وقفت فى الاشارة الالكترونية الى امام المصل واللقاح وبعد ثانية او اتنين من توقفى دخل فيا اتوبس ركاب بكل قوتة فى ظهر العربية وطبعا كانت النتيجة انت العربية طارت حوالى 80 متر بدون مبالغة والحمد لله انى قدرت اتحكم فيها ومدخلتش فى العربيات الى كانت اشرتها خضراء لان الخبطة جت فى الجنب اليمين والعربية حدفت شمال بسرعة الى اتعلمتو ان لازم الشخض يستخدم المريات واهمهم مراية الصالون علشان بتكون تقريبا كاشفة الطريق كلو وراك بس بردو الحذر لا يمنع القدر وربنا يسترها معنا كلنا ان شاء الله.

وكمان حاجة ان الواحد ديما يعمل حساب انو لو فرمل جامد ممكن الى وراة يدخل فية بسبب الفرملة المفاجاة فديما لما الواحد يحب يفرمل جامد لازم تعمل حساب الى وراك وطبعا لازم تعمل مسافة كافية بينك وبين الى قدامك علشان لو فرمل هو كمان فجاة.


وشكرا ليك مرة تانية على موضعك الجميل

[magid1010]

النقطة العمياء فى المرايا

السلام عليكم ورحمة الله وبركاته
النهاردة اتبعلت ليا ايميل عن النقطة العمية فى المرايا و ازاى تظبط المرايا على 90درجة ودة كلة فى ملف باوربويت رفعتة على ميديا فاير
وده الينك
http://www.mediafire.com/?yzm4myw2mjg

[ابو حسين]

شكرا جدا على مجهودك

[husseinoo]

لا بجد موضعك جميل اوى فى تعليم المبتدئين

والله رايك الإيجابى ده هو اللى بيشجع الواحد انه يستمر ... وشكرا لحضرتك

الحادث كان بسبب اهمال السائق الى فى الخلف وقضاء وقدر والحمد لله ان ربنا ستر

الحمد لله رب العالمين وإن شاء الله تكون آخر الحوادث

الموضع كلو ان وقفت فى الاشارة الالكترونية الى امام المصل واللقاح وبعد ثانية او اتنين من توقفى دخل فيا اتوبس ركاب بكل قوتة فى ظهر العربية

المشكلة ان الاوتوبيس يحتاج وقت اكبر من السيارة الملاكى عشان يتوقف تماما ... وعلى كلامك لو الزمن المتاح ثانية .. يبقى اكيد هو كان بيجرى وراك بسرعة عشان يلحق يعدى الإشارة ... او يمكن تكون وقفت مرة واحدة ... حتى ولو بعد ثانيتين ... المسافة برده صغيرة قوى عشان الاوتوبيس يقف تماما ... المهم ربنا ستر وانت بخير والحمد لله

وطبعا كانت النتيجة انت العربية طارت حوالى 80 متر بدون مبالغة والحمد لله انى قدرت اتحكم فيها ومدخلتش فى العربيات الى كانت اشرتها خضراء لان الخبطة جت فى الجنب اليمين والعربية حدفت شمال بسرعة

يا ساتر يا رب .... ربنا يحفظك من كل سوء

الى اتعلمتو ان لازم الشخض يستخدم المريات واهمهم مراية الصالون علشان بتكون تقريبا كاشفة الطريق كلو وراك

ده كلام سليم مية مية ... ولازم المبتدأ يتعلم النظر فى المرايات تدريجى ... يعنى لما يشعر انه يستطيع التحكم فى السيارة وفى نفس الوقت ينظر فى المرايات .. ممكن فى الحالة دى يمشى فى شارع سريع شوية ... والاهم انه لا يستعجل فى النزول الى الشارع السريع او المزدحم ... لازم ياخد وقته ويدرب كويس قوى ويصبر شوية

بس بردو الحذر لا يمنع القدر وربنا يسترها معنا كلنا ان شاء الله.

قدر الله وما شاء فعل والحمد لله على كل حال

وكمان حاجة ان الواحد ديما يعمل حساب انو لو فرمل جامد ممكن الى وراة يدخل فية بسبب الفرملة المفاجاة فديما لما الواحد يحب يفرمل جامد لازم تعمل حساب الى وراك وطبعا لازم تعمل مسافة كافية بينك وبين الى قدامك علشان لو فرمل هو كمان فجاة.

ده كلام سليم مية مية ... ونحب نكرر مرة تانية ... ان احسن حاجة تفرمل على مرحلتين ... اول مرة على خفيف ... لتحذير السيارة اللى فى الخلف .. وتانى مرة عشان تتوقف تماما

وشكرا ليك مرة تانية على موضعك الجميل

العفو حضرتك ... احنا اللى شاكرين لحضرتك عرضك للحادث .. برغم انه فكرك بمشاعر سيئة .. وانا اعتذر لحضرتك مرة تانية ... وإن شاء الله نسمع منك كل خير ونتعلم منك كل جديد

السلام عليكم ورحمة الله وبركاته

وعليكم السلام ورحمة الله وبركاته

النهاردة اتبعلت ليا ايميل عن النقطة العمية فى المرايا و ازاى تظبط المرايا على 90درجة ودة كلة فى ملف باوربويت رفعتة على ميديا فاير
وده الينك
http://www.mediafire.com/?yzm4myw2mjg

الله يكرمك ويبارك فيك ... اتفرجت عليه ... شغل جميل ما شاء الله
والصدفة الغريبة انى بعد شوية هاعرض موضوع عن المنطقة العمياء
شكرا لمجهود حضرتك

مع اطيب التمنيات
اخوكم حسين غزالة

[husseinoo]

اللهم صل على محمد وعلى آله وصحبه أجمعين

السلام عليكم ورحمة الله وبركاته

اساسيات القيادة الدفاعية

10- التعرف على المنطقة العمياء

جميع السيارت عندها منطقة عمياء ... المنطقة التى لا يستطيع السائق رؤيتك من خلال المرايه ... تابع الصور فى الموضوع السابق

تشعر دائما بعدم الراحة إذا كنت تقود سيارتك فى المنطقة
... اوعند اختفاء سيارة عن الرؤيه ومرة واحدة تظهر لك وهى تمر بجوارك
اكثر شىء يتعب ويزعج المبتدأ هى العربيات اللى بتظهر فجأة





مهم جدا انك تقف فى المكان الصحيح لكى يراك السائق الآخر بشكل دائم على قدر المستطاع

اين تقع المنطقة العمياء ؟
الإجابة تتوقف على نوع العربية


لكل سيارة منطقة عمياء على الأجناب فى المنطقة الخلفية
وده معناه انك لا تستطيع رؤية اى شىء من خلال المرايه لكشف هذه المنطقة

والمشكلة تكون اكبر فى السيارات المرتفعة ... ذات كابينة القيادة المرتفعة ... فهو لن يستطيع رؤية اى شىء تقريبا قريبا من مقدمة السيارة

نصيحة هامة:
من المهم انك تنظر فى المرايه كل 5 او 8 ثوانى لترى من خلفك
طبعا موش مهم انك تنظر فى المرايه لمجرد النظر ههههههههههههههه
إذا كنت قديم فى السواقة ... فأكيد انت عارف موضوع المنطقة العمياء
والمرايه لن تظهر السيارات التى تغير الاتجاه من حارة الى اخرى بشكل كافى

مثال:
اذا كنت بتقود سيارتك فى الحارة اليمين وكان الشارع فيه اكثر من حاره
ثم اعطيت إشارة عشان تنقل نفسك الى الحارة رقم 2 على يسارك مباشرة
فى نفس الوقت فيه سيارة فى الحارة رقم 3 وتريد نقل نفسها الى الحارة رقم 2 على يمينه

هههههههههههههه
يعنى انتم الاثنين عايزين تنقلوا نفسكم الى الحارة رقم 2 فى نفس الوقت
والحارة رقم 2 كانت فعلا خالية من اى عربيات فى نفس اللحظة
طبعا موضوع خطر
الافضل انك قبل ما تنقل نفسك الى الحارة التالية ... انك تنظر فوق كتفك نظرة سريعة على الحارة التى تريد الإنتقال إليها ... وتكشف على اى سيارة موش ظاهرة فى المرايه ... قبل ما تغير اتجاهك

انظر الى الصورة التالية




فى الصورة تظهر منطقة عمياء للسيارة الملاكى اثناء اقترابها من التقاطع
نصيحة غالية
ادخل على التقاطع بهدوء شديد جدا عشان تشوف اللى ماشى فى الشارع الرئيسى نظرة خاطفة وسريعة قبل ما تدخل يمين او شمال





انظر الى الصورة التالية




تصرف خطأ لقائد السيارة الملاكى

السيارة الملاكى داخلة على الملف "على ضيق" يعنى قريبة قوى من الرصيف
عشان كده اصبح عنده منطقة عمياء كبيرة .. يعنى موش شايف اى حاجة قادمة فى الملف





انظر الى الصورة التالية


تصرف سليم وصحيح لقائد السيارة الملاكى
السيارة الملاكى دخلت على الملف على واسع شوية ... وبهدوء
بالطريقة دى استطاع انه يكشف على قدر المستطاع المنطقة العمياء الموجودة امامه ... يعنى قدر يشوف اكبر مساحة من الملف امامه





عربيات المقطورة ... والشاحنات الحاويات الكبيرة ... هم ايضا لهم منطقة عمياء
وسوف تلاحظ ان المرايه الجانبيه هى مصدر الرؤية الوحيد للسائق لكى يرى ما يحدث فى الخلف

انظر الى الصورة التالية

فى الصورة السابقة
السيارة الملاكى ماشية قريب قوى من السيارة النقل ... انا عن نفسى كنت فاهم ان كده كويس ... وبقول لنفسى انا ماشى فى حماية العربية النقل هههههههههههههه ... لكن الكلام ده طبعا غلط جدا جدا ... اولا لانك موش شايف اى حاجة خالص ... يعنى العربية النقل لو عملت اى حاجة هاتكون مفاجأة كبيرة جدا للسيارة الملاكى ...



انظر الى الصورة التالية


فى الصورة السيارة الملاكى تركت مسافة حلوة قوى بينها وبين العربية النقل .. بالطريقة دى قائد السيارة الملاكى شايف كل حاجة تمام التمام ... وكمان فيه مسافة كويسة بينه وبين العربية النقل ... يعنى لو العربية النقل توقفت او عملت اى حاجة .. مافيش مشاكل العربية الملاكى هاتلحق تتصرف وتقف ... وكمان لو حبيت تعدى من العربية النقل هاتعدى فى امان .. وكل ما تكون واقف بعيد ... سائق النقل هايشوفك فى المرايا ويعمل حسابك كويس







تظهر خطورة السيارات العملاقة "الشاحنات الحاويات" ... ان العربية دى يا جماعة لو كانت بتلف مثلا يمين طبعا بتكون واخدة شكل منحنى ... وفى نفس الوقت كان فيه عربية ملاكى بتلف على يمينه ....
انسى ان السائق يراه ... استحاله ... وممكن يحصل للملاكى كوارث والعياذ بالله

لأن ببساطة .. مقطورة العربية موجودة فى شارع وصندوق العربية موجود فى شارع تانى

يعنى مرايه العربية لن تظهر غير الموجود فى الشارع اللى فيه المقطورة اما صندوق العربية لن يظهر ابدا ... وبالتالى اى عربية ماشية بجوار صندوق العربية لن تظهر فى المرايه هى كمان

وطبعا المرايه اللى على اليسار .. لن تظهر اى شىء خالص هى كمان لأن كل الأحداث ناحية اليمين

ولكى يرى السائق ما يحدث فى الخلف ... ليس لها حل غير انه يخرج دماغه من الشباك وينظر خلف السيارة ههههههههههههههه

نصيحة غالية جدا
اوعى تمشى بجوار سيارة نقل "حاوية شاحنة" ... إلا إذا كنت شايف السائق فى المراية الخاصة بسيارته
يعنى لو انت شايف السائق يبقى هو كمان شايفك فى المرايه

انا الجمعة اللى فاتت قابلنى عربيه شاحنة كبيرة كانت بتلف على خفيف
طبعا قدرت سرعته وكانت بطيئة ... وكنت متأكد انه استحالة يشوفنى
لكن عشان هو سائق ممتاز كان بيلف بحركة بطيئة جدا
وانا كمان قدرت سرعتى انى اقدر اعدى منه بسرعة .. وفى نفس الوقت استخدمت الكلاكس عشان ياخد بالله انى داخل بجواره
وده كان افضل حل
وكان من الخطأ انى اهدى سرعتى لأنى دخلت بجواره خلاص

لكن لو كان هو سابق
كنت هديت على طول وضربت له تعظيم سلام وعمرى ما هادخل بجواره نهائى

لازم تتأكد انك ظاهر للسائق وانه شايفك كويس
ولو كنت شايفه فى المرايه بتاعته خلاص اتأكد انه هو كمان شايفك كويس جدا

فى النهاية لازم تعرف ان العربية وهى راكنة يوجد منطقة عمياء خلف السيارة
عشان كده قبل ما تتحرك بعربيتك لازم تنظر خلفها كويس ... ممكن يكون فيه اطفال بتلعب خلف العربية "لا قدر الله" ... وممكن يكون فيه اى حاجة ملقاه خلف السيارة

الغريب والمفاجأ يوم الجمعة اللى فاتت
انى والله العظيم يا جماعة كان بيمر بجوارى عربيات شاحنات بسرعة موش هاتصدقوا حوالى 100 كيلوا فى الساعة
إذا كنت انا ماشى 80 كيوا والطريق زحمة اساسا عند سوق العاشر
يبقى عربية شاحنة حاوية طولها رهيب جدا ومرعبة وعايز تعدى من جنبى

على طول موش رفعت رجلى من على البنزين فقط ده انا ضغط فرامل خفيف عشان يعدى ويبعد عنى
ولو فيه فرصة كنت جريت الى الامام عشان ابعد عنه
بصراحة فيه سواقين نقل ثقيل اعوذ بالله "مجانين" فاكر نفسه سايق عربية ملاكى

وفيه سائق سبق وقلنا عليه عايز يعدى بين الحارتين
وده لمحته اليوم فى المرايه كان راكب 128 حمراء
وعامل زاى الآلة
عايز يحشر نفسه بينى وبين سيارة شيفروليه سوداء
روحت ضارب له كلاكس ... ومشاور له بإيدى انت رايح فين ... اعقل شوية
وفعلا راح لامم نفس
شغل مجانين
ده تقدر تقول عليه بالبلدى كده سواق "دركسيون"
يعنى عامل زى الآلة اى مكان يشوفه فاضى عايز يحشر نفسه فيه
حاجة فى منتهى الغباء ... شارع زحمة والعربيات بتجرى اقل سرعة 70 كيلوا
وعايز يحشر نفسه بين الحارات بأى شكل ... فاكر انها نصاحة ... وده نوع خطير جدا جدا جدا فى الطرق عندنا
احترس من اللى بيحشر نفسه بين الحارات
لو فيه فرصة خليه يعدى بالسلامة بعيد عنك
ولو عدى منك
مافيش مانع تضرب له عشرين كلاكس عشان تقوله انت ؟؟؟؟ ولا بلاش

أخيرا
اوعى تعتمد على اليفط التى على الطريق
فيه يفط بتوضح السرعة القانونية
يعنى مثلا كاتب لك الملاكى 100 كيلوا
طبعا الكلام ده كان زمان ... لما كان الطريق جديد وفاضى
لكن لو طبقت نفس الكلام ده مثلا عند موقف العاشر على طريق الإسماعيلية
يبقى خطر جدا ... وبالكثيير تمشى 80 كيلوا يبقى افضل واحسن لك


وربنا يسترها مع الجميع

مع اطيب التمنيات
اخوكم حسين غزالة

[husseinoo]

الحمد لله رب العالمين

[magid1010]

وعليكم السلام ورحمة الله وبركاته

النهاردة اتبعلت ليا ايميل عن النقطة العمية فى المرايا و ازاى تظبط المرايا على 90درجة ودة كلة فى ملف باوربويت رفعتة على ميديا فاير
وده الينك
http://www.mediafire.com/?yzm4myw2mjg

الله يكرمك ويبارك فيك ... اتفرجت عليه ... شغل جميل ما شاء الله
والصدفة الغريبة انى بعد شوية هاعرض موضوع عن المنطقة العمياء
شكرا لمجهود حضرتك

مع اطيب التمنيات
اخوكم حسين غزالة




السلام عليكم ورحمة الله وبركاته
دا انا اللى متشكر جدا على النصائح الجميلة و كمية المعلومات اللى عندك دى بالنسبا ليها نقطة فى بحر

[linkin2008]

بارك الله فيكم وان شاء الله فى القريب اجيب عربية واحكيلكم مغامراتى وايه الدروس الى اتعلمتها علشان انا بحب اتعلم واجرب
بارك الله فيكم مره اخرى
اخوكم عبدالرحمن

[A.Saad]

انا جيت

السواقين الغريبة اللى بتلاقيه بيحشر نفسه جنبك وتلاقى بوزه عايز يسابق بوزك
ياما تهدى وتخليه يبعد بس توقع انه ممكن ييجى قدامك فى حارتك
او تديله كلاكس
وساعتها انا مش بدى كلاكس واحد لا
كلاكسات متقطعة ورا بعض بسرعة
واللى اعرفه ان الكلاكس المتقطع اشد ازعاجا من كلاكس واحد طويل

كمان سواق النقل
محدش يعدى نقل من اليمين
واقصد هنا النقل التقيل والمقطورة والتريللا
اولا
الجزء اللى تحت الكابينة من الناحية اليمين مش بيكون باين ليه
لو تريللا او مقطورة
نفس الوضع وكمان وهوة بيلف المرايا مش بتجيب غير اخر ديله يعنى كل الاجسام اللى على يمينه مش باينه له

طيب لو اضطريت اعدى من يمينه
يبقى كلاكسات كذا مرة بصورة متقطعة - بس بلاش تبقى مزعجة اوى - ولو باللليل تقليب نور كمان علشان يعرف ان فيه حد هنا

[husseinoo]

بارك الله فيكم
وربنا يبارك فيك اخى الحبيب

وان شاء الله فى القريب اجيب عربية

ربنا إن شاء الله يوفقك فى عربية كويسة ... وتفرح بها ... وتاخد خيرها ويكفيك شرها


واحكيلكم مغامراتى وايه الدروس الى اتعلمتها علشان انا بحب اتعلم واجرب

واحنا فى الإنتظار .. بشغف
بارك الله فيكم مره اخرى
اخوكم عبدالرحمن

ربنا يبارك فيك يا عبدالرحمن .. ويسعدك إن شاء الله بالعربية .. ونسمع منك احلى اخبار إن شاء الله
فى رعاية الله

انا جيت
الف مليون سلامة يا استاذ احمد "نورت المنتدى"

السواقين الغريبة اللى بتلاقيه بيحشر نفسه جنبك وتلاقى بوزه عايز يسابق بوزك
ياما تهدى وتخليه يبعد بس توقع انه ممكن ييجى قدامك فى حارتك

معلومة حلوة قوى قوى ... "توقع انه ييجى قدامك" ده لو انا هديت عشان اتركه يعدى ... فعلا كلام عشرة على عشرة

او تديله كلاكس
وساعتها انا مش بدى كلاكس واحد لا
كلاكسات متقطعة ورا بعض بسرعة
واللى اعرفه ان الكلاكس المتقطع اشد ازعاجا من كلاكس واحد طويل
والله انا فعلا اضرب له كلاكس ... لان كل اللى حواليه هايكونوا معايا .. وهو ما دام اتصرف غلط مالوش حق يتكلم خالص ... وفى الغالب هايعدى ويجرى على طول ... المشكلة انها طريقة او سلوك فى القيادة كله غباء .. مالوش علاقة "بالحرفنة والمهارة والعقل" ... وفى الآخر بعد كل المناورات دى ... تلاقيه واقف امامك على بعد امتار فى اى اشارة ... طيب ليه من الأول .. ربنا يهدى الجميع


كمان سواق النقل
محدش يعدى نقل من اليمين
واقصد هنا النقل التقيل والمقطورة والتريللا
اولا
الجزء اللى تحت الكابينة من الناحية اليمين مش بيكون باين ليه
لو تريللا او مقطورة

نفس الوضع وكمان وهوة بيلف المرايا مش بتجيب غير اخر ديله يعنى كل الاجسام اللى على يمينه مش باينه له

طيب لو اضطريت اعدى من يمينه
يبقى كلاكسات كذا مرة بصورة متقطعة - بس بلاش تبقى مزعجة اوى - ولو باللليل تقليب نور كمان علشان يعرف ان فيه حد هنا

وده كلام فوق الممتاز ... خذوا بالكم يا جماعة كويس جدا من الكلام ده ...
الراجل لخص الكلام سواء ماشى بالنهار او بالليل
لازم تاخدوا بالكم جامد ... الكلام ده موش للتسلية ... وعربيات النقل موش بتلعب ... يعنى اعوذ بالله "انت مالكش عنده ديه" زى ما بيقولوا
اوعى تستهر بالنقل او تحاول تلعب معاه

لا يوجد اى تعليق على الكلام الاكثر من ممتاز ده خالص غير انى اقول ...
خير الكلام ما قل ودل
وربنا يبارك فيك يا استاذ احمد ويسعدك دنيا وآخرة


مع اطيب التمنيات
اخوكم حسين غزالة

[A.Saad]

http://www.nilemotors.net/Nile/146586-a.html

[husseinoo]

اساسيات القيادة الدفاعية

11- احترس من التقاطعات

التقاطعات هى واحدة من اكثر المناطق خطورة على اى سائق سواء جديد او قديم ... مبتدأ او خبير

والإحصاءات تشير الى ان 80 % من الحوادث بتكون بسبب التقاطعات

ومما يزيد من قوة التصادم هى السرعة التى تصل الى 80 كيلوا

تخيلوا واحد داخل على تقاطع او يوتيرن وسرعته 80 كيلوا ورجله على البنزين ... يعنى لو ضرب لخمة ... بدل ما يدوس على الفرامل يرفع سرعته الى 100 كيلوا ... يانهار ابيض يا جماعة على الدماغ .. ربنا يسترها مع الجميع

والصدامات اغلبها فى الابواب الجانبية

كيف تقلل من مخاطر التقاطعات
اولا: هدى سرعتك قبل الدخول على التقاطعات
ثانيا: النظر على يمينك وشمالك اكثر من مرة
ثالثا: احيانا التقاطع بيكون فى المنطقة العمياء ... يعنى لا تظهر اى سيارة خارجة من التقاطع الا بعد السير فى الشارع الرئيسى
رابعا: اغلب السائقين يدخلوا على التقاطع ورجله على الفرامل "فوق الفرامل" .. عشان يوفر وقت لو ظهر له اى حاجة يلحق يقف
خامسا: الخطورة تظهر من اللى جاى من الناحية العكسية


يعنى مثلا الجمعة اللى فاتت ...
داخل على تقاطع "مائل" ... الطبيعى انى ادخل وانا مهدى العربية ... والعربيات بتدخل من على اليسار ... فجأة ... يظهر "الغبى" هههههههه اعوذ بالله ... يظهر واحد فاكر نفسه ناصح ويدخل من على يمينك ... فى الوقت اللى بتدخل فيه عربيات من على شمالك "قادمة من التقاطع" ... لو لا قدر الله عربية من على شمالك حدفت حاجة بسيطة عليك ... هاتحاول تفاديها يمين شوية .... لكن فى نفس الوقت يحاول "المتهور" يعدى منك من على اليمين وفى نفس المكان اللى فيه التقاطع
النتيجة طبعا انتم عارفينها "بووووووووووووم"
ربنا يسترها مع الجميع
انظر الى الصورة للتوضيح

معظم الحوادث تتم خلال 4 ثوانى فى التقاطعات
طبعا كلنا موش عايزين نكون موجودين خلال الـ 4 ثوانى فى التقاطعات
والمشكلة فى الناس اللى خلفك بيشعروا بالإنفعال بسرعة

الجمعة اللى فاتت ... جاى من طريق الإسماعيلية وخلاص انا نازل على الكلية الحربية ...
المفروض طبعا انى اهدى شوية ... يعنى انت جاى من طريق سريع واقل واحد ماشى 70 او 80 كيلوا ... وداخل على شارع رئيسى "شارع الكلية الحربية"
يبقى المفروض انزل بسرعتى و اهدى شوية
وفجأة ... يظهر "الغلس" .... معلهش أنا آسف غصب عنى
راكب بجوارة "البنت الجميلة"
وهو عايز يثبت لها انه واد "توت فروت" وانه راكب عربية خطيرة وايه الغلبان اللى ماشى امامى ده هههههههههههه
يعمل ايه "الرخم" يخرج من اليوتيرن ويمشى وراك .... ويعلق ايده على الكلاكس
لدرجة غصب عنى "اتنرفزت"
وزعقت له ........ "عايز ايه يابنى" .... "اروح لك فين " .... "اطلع لك على الرصيف يعنى عشان سعادتك عايز تجرى" .......... ما الشارع امامك يعدى عشرين عربية عايز تجرى اجرى
لأ هو عايزك انت توسع له ... حتى ولو هاترمى نفسك على اى عربية تانية ... موش مهم ... وطبعا مافيش مانع من شوية "قلة ادب" .... وشوية كلاكسات "زى بتوع الميكروباص" ...
قال يعنى "بيشتمك بالكلاكس" ..........
وانا كمان اول ما مشى امامى رحت "ضاغط على الكلاكس مده طويلة"
فى ثوانى هو كمان اتغاظ بشدة
طيب ما انت "بتحس اهه"
طيب ليه من الأول
حتى بعد ما جرى "المغفل" ... والله العظيم .. مافيش 100 متر راح واقف غصب عنه فى زحام "شيراتون"
طيب لزومه ايه "الشو اللى انت عامله ده"
انت "اتنرفزت"
وانا كمان "اتعكننت"
حاجة كلها غلط فى غلط
وبعد شوية قلت لنفسى ... انا اتصرفت غلط جدا ... كان لازم اتحكم فى اعصابى اكثر من كده
النرفزة والعصبية يا جماعة بتخرجكك من تركيزك تماما
وتجعلك موش شايف امامك كويس
وموش بتحلل اى حاجة امامك او حواليك

طبعا نتيجة النرفزة
عربية راكنة او عطلانة فى حتة زحمة فى شيراتون
وسائق التاكسى عايز يمر منها ومن غير اى اشارة خالص
والعربية القادمة من الخلف فوجئت بالتاكسى
راح رامى على عربيتى شوية عشان يبعد عن التاكسى
طبعا ضربت له كام كلاكس من بعيد عشان "يلم نفسه" ... وبصراحة الراجل وقف وانا عديت فى سلام

طبعا لو كنت موش متنرفز من الشاب الأولانى
كنت ضرب الكلاكس من بدرى ... او كنت هديت اكثر على ما الموقف ده يتحل بسلام وفى منتهى الهدوء


نصيحة غالية جدا جدا
اوعى تتنرفز ...اوعى
لو حصل اركن فى اى حتة اشرب لك حاجة ساقعة وهدى اعصابك ... الله يكرمك .. وربنا يسترها مع الجميع

اعتقد الافضل ... لو انت عارف ان فيه تقاطع فى الشارع ده
الاحسن من بدرى تنقل نفسك بعيد عن التقاطع وعن العربيات اللى خارجة منه
افضل حارة فى الحالات دى هى الحارة اللى فى الوسط
لان مرة تلاقى تقاطع ناحية اليمين ومرة تلاقى تقاطع ناحية اليسار وشغلانة خصوصا اليومين دول "اليوتيرن" معمول عمال على بطال ... كل شوية يو تيرن

وتخف رجلك من على البنزين
وتدخل ورجل على الفرامل على اتم الاستعداد للتوقف
وتستخدم الكلاكس عشان تنبه اى عربية خارجة من التقاطع
وتنظر كويس جدا على العربيات الآخرى
وتنظر فى المرايه عشان لو فيه "الناصح" اللى انتم عارفينه لو عايز يعدى اثناء التقاطعات ... وفاكر نفسه ناصح
اتركه يعدى ... ووسع له لو كان فيه فرصة ... لان العملية موش ناقصة غباء







انظر الى الصورة التالية




فى الصورة العربية الحمراء داخلة التقاطع اللى فى اليسار
العربية الحمراء استخدمت الإشارة شمال

العربية الزرقاء وهى داخلة على التقاطع ... لازم تهدى سرعتها
ويلتزم الجانب الايمن بعيد عن اللى داخل شمال
وعينه على الإشارات الخاصة بالعربية الحمراء
ولازم يتوقع ان العربية الحمراء هاتاخد بعض الوقت عشان تعمل مناورة

واحتمال ان العربية الحمراء تتوقف تماما عشان السيارة القادمة من الجهة العكسية
ولازم على السيارة الزرقاء تتأكد من المسافة الخالية خلف السيارة الحمراء هل تسمح بمروره ولا المكان ضيق
واحتمال العربية الحمراء يرجع فى كلامه ويستمر فى السير على طول
الخلاصة :
التقاطعات فى منتهى الخطورة ... ولازم تكون فى منتهى الحرص وانت بتعدى من اى تقاطع


انظر الى الصورة



السيارة الحمراء قررت تدخل يمين
وفى نفس الوقت ظهرت له العربية الخضراء هى كمان داخل يمين
غصب عنه راح مهدى نفسه جامد واحيانا يتوقف تماما
كله ده يحصل فى ثوانى زى قولنا




انظر الى الصورة التالية



فى الصورة السابقة تشرح مراحل الدخول على التقاطع

ا- النظر فى المرايه .. تلاحظ من قادم خلفك يمكن يكون جاى بطريقة مسرعة جدا ... ممكن تشاور له بإيدك هدى شوية ... موش عيب ... وممكن يكون فيه سيارة تانية على شمالك داخله معاك "غلاسة" وموش عايز يدخل من على شمالك



2- استخدام الإشارة ... لازم يكون فى توقيت صحيح ... يعنى عمرى ما استخدم الإشارة بعد الإقتراب الشديد من الملف ... لازم استخدم الإشارة بدرى شوية عشان اللى خلفى يعمل حسابه .. ولو الإشارة عطلانة استخدم ايدى .. واشاور للقادم من الخلف انى داخل يمين


3- اقترب من الرصيف ... لا احاول الاقتراب من الرصيف زيادة عن اللزوم عشان تعرف تلف بالعربية كويس وماتخبطش فى الرصيف ... المسافة المطلوبة تقريبا حوالى متر ... يعنى لا احاول الدخول على الملف بشكل مفاجىء .. او عندما ارى الملف احدف يمين مرة واحدة ... لأ ... اقترب من الرصيف فى الوقت المناسب والمكان المناسب من بدرى



4- اختار الغيار المناسب ... يعنى لو العربية مازالت سريعة .. اضغط فرامل تدريجى واهدى جامد واختار الغيار مثلا الثانى حسب سرعة العربية ... لكن فى الغالب بيكون الغيار الثانى هو المناسب


5- مرحلة الدخول على الملف .. لازم يكون فى منتهى الهدوء ... ولازم انظر على الشارع الجانبى كويس واتوقع اى حاجة فى تعوق تقدمى بالسيارة ... مشاة .. سيارة متوقفة ... اى شىء لا قدر الله
ولو وجدت ان الطريق سالك وتمام التمام ... ادخل على طول وازود بنزين ...

لكن تحذير اوعى تزود بنزين قبل التأكد من الشارع اللى انت داخله ..




المرة اللى جاية هاحكى لكم على مغامرة جامدة قوى حصلت معايا
فى انتظار التواصل معاكم

اسألكم الدعاء لى ولوالدى الله يرحمهم



وربنا يسترها مع الجميع

مع اطيب التمنيات
اخوكم حسين غزالة

[kamatsho85]

استــاذ حسيـــن . مشاركاتك اكتـــر من رائعـــة .. بالتوفيــق والتميــيز الدائـــمين

[husseinoo]

استــاذ حسيـــن . مشاركاتك اكتـــر من رائعـــة .. بالتوفيــق والتميــيز الدائـــمين

الله يكرمك ويبارك فيك ... ده بس من زوقك
شاكر لحضرتك تشجيعك الإجابى
ويشرفنا دائما مرورك

بارك الله فيك
فى رعاية الله

مع اطيب التمنيات
اخوكم حسين غزالة